2024 -25 ಆರ್ಥಿಕ್ ವರ್ಸಾಂತ್ ಎಂ.ಸಿ.ಸಿ. ಬ್ಯಾಂಕಾನ್ ರೂ. 9.51 ಕೊರೊಡ್ ಲಾಭ್ ಜೊಡ್ಚೆಸವೆಂ, ಬ್ಯಾಂಕಾಚಾ ಚರಿತ್ರೆಂತ್ ಐತಿಹಾಸಿಕ್ ಪ್ರಗತಿ ದಾಖಲ್ ಕೆಲ್ಯಾ ಆಸುನ್, ರಿಸರ್ವ್ ಬ್ಯಾಂಕಾಚ್ಯಾ ನಿರ್ದೇಶನಾಖಾಲ್ ಹಿಶೆದಾರಾಂಕ್ 10% ಲಾಭಾವಾಂಟೊ ಜಾಹೀರ್ ಕೆಲಾ.
ಕೊಡಿಯಾಳ್‌ಬಯ್ಲ್ ಮಂಗ್ಳುರ್, ಸಾಂ. ಲುವಿಸ್ ಪದ್ವೆ ಪೂರ್ವ್ ಕೊಲೆಜಿಚ್ಯಾ ಲೊಯೊಲಾ ಸಭಾಸಾಲಾಂತ್, ಆಯ್ತಾರಾ 21 ಸಪ್ತೆಂಬರ್ 2025 ವೆರ್ ಸಕಾಳಿಂ 11 ವ್ಹರಾಂಚೆರ್ ಚಲ್ಲೆಲ್ಲ್ಯಾ ವಾರ್ಷಿಕ್ ಜೆರಾಲ್ ಜಮಾತೆರ್ ಬ್ಯಾಂಕಾಚೊ ಅಧ್ಯಕ್ಷ್ ಸಹಕಾರ ರತ್ನ ಶ್ರೀ ಅನಿಲ್ ಲೋಬೊ ಹಾಣೆ ಲಾಭಾವಾಂಟೊ ಘೋಷಿತ್ ಕೆಲೊ.
ಬ್ಯಾಂಕ್ ಶಿಬಂದೆನ್ ಮಾಗ್ಣ್ಯಾಗಿತಾ ದ್ವಾರಿಂ ಜಮಾತೆಕ್ ಚಾಲನ್ ದಿಲೆಂ.
ಬ್ಯಾಂಕಾಚೊ ಅಧ್ಯಕ್ಷ್ ಶ್ರೀ ಅನಿಲ್ ಲೋಬೊ, ಉಪಾಧ್ಯಕ್ಷ್ ಶ್ರೀ ಜೆರಾಲ್ಡ್ ಜೂಡ್ ಡಿಸಿಲ್ವಾ ಆನಿ ವೃತ್ತಿಪರ್ ನಿರ್ದೇಶಕ್ ಶ್ರೀ ಸಿ.ಜಿ.ಪಿಂಟೊ ಹಾಣಿಂ ದಿವೊ ಪೆಟಂವ್ಚೆಂ ಸವೆಂ ಜಮಾತ್ ಆರಂಭ್ ಕೆಲಿ. ವಿಶೇಷ್ ಆಮಂತ್ರಿತ್ ಶ್ರೀ ಪ್ರವೀಣ್ ಎಸ್. ಲೋಬೊ (ವಕೀಲ್ ಆನಿ ನೋಟರಿ), ಶ್ರೀ ಮೆಲ್ವಿನ್ ಆರಾನ್ಹಾ (ಶಿರ್ವಾ ಫಿರ್ಗಜ್ ಉಪಾಧ್ಯಕ್ಷ್), ಶ್ರೀಮತಿ ಅನಿತಾ ಫ್ರಾಂಕ್ (ಮಂಗ್ಳೂರ್ ದಿಯೆಸೆಜ್, ಸ್ತ್ರೀ ಆಯೋಗಾಚಿ ಕಾರ್ಯದರ್ಶಿ), ಶ್ರೀಮತಿ ಮೇಬಲ್ ಡಿಸೋಜಾ (ಕುಂದಾಪುರ್ ಕಥೊಲಿಕ್ ಸಭೆಚಿ ಮಾಜಿ ಅಧ್ಯಕ್ಷಿಣ್) ಆನಿ ಶ್ರೀ ಜೆ.ವಿ. ಡಿಮೆಲ್ಲೊ (ಎಮ್‌ಸಿಸಿ ಬ್ಯಾಂಕ್ ಮಾಜಿ ನಿರ್ದೇಶಕ್) ಹಾಣಿಂ ಬ್ಯಾಂಕಾಚ್ಯಾ ಸಂಸ್ಥಾಪಕಾಕ್ ಪುಲಾಂ ಅರ್ಪುಂಚ್ಯಾ ಸವೆಂ ಮಾನ್ ದಿಲೊ.
ಬ್ಯಾಂಕಾಚೊ ಅಧ್ಯಕ್ಷ್ ಶ್ರೀ ಅನಿಲ್ ಲೋಬೊ ಉಲವ್ನ್ ಆರ್ಥಿಕ್ ವರಸ್ 2024 -25 ಹಾಂತು, ಬ್ಯಾಂಕಾನ್ 9.51 ಕೊರೊಡ್ ರುಪಯ್ ಲಾಭ್ ಜೊಡ್ಲಾ. ಬ್ಯಾಂಕಾಂತ್ ಠೇವ್ 705.40 ಕೊರೊಡ್ ರುಪ್ಯಾಂಕ್ ವಾಡೊನ್ ಆದ್ಲ್ಯಾ ವರ್ಸಾಚ್ಯಾ ತುಲನಾಂತ್ 10% ವೃದ್ದಿ ಜಾಲ್ಯಾ, ದಿಲ್ಲಿಂ ರಿಣಾಂ 535.49 ಕೊರೊಡ್ ಆಸೊನ್, ಆದ್ಲ್ಯಾ ವರ್ಸಾಚ್ಯಾ ತುಲನಾಂತ್ 25.21% ವೃದ್ದಿ ಜಾಲ್ಯಾ. ರು.830.30 ಕೊರೊಡ್ ವರ್ಕಿಂಗ್ ಕ್ಯಾಪಿಟಲ್ (10.03% ವೃದ್ಧಿ), ರು.32.43 ಕೋಟಿ ಹಿಶ್ಯಾ ಬಂಡ್ವಾಳ್ (14.07% ವಾಡಾವಳ್), ಆದ್ಲ್ಯಾ ವರ್ಸಾ 1.62% ಆಸ್‌ಲ್ಲಿ ಎನ್.ಪಿ.ಎ. ಪ್ರಸ್ತುತ್ ವರ್ಸಾ 1.40% ಕ್ ದೆವ್ಲ್ಯಾ, ಆರ್‌ಒಎ 1.15%, ಬ್ಯಾಂಕಾಚೊ ಬಂಡ್ವಾಳ್ 11.26% ವಾಡೊನ್ 684.31 ಕೊರೊಡ್ ರುಪಯ್ ಜಾಲಾ. 31 ಮಾರ್ಚ್ 2025 ವೆರ್ ಸಿಆರ್‌ಆರ್ 18.92% ಆಸೊನ್ ರಿಸರ್ವ್ ಬ್ಯಾಂಕಾನ್ ನಿಗದಿತ್ ಕೆಲ್ಲ್ಯಾ ಕನಿಷ್ಠ್ 12 ಮಿತಿ ವರ್ನಿಂ ಚಡಿತ್ ಜಾಲ್ಯಾ. ಆನಿ ವ್ಯವಹಾರ್ ವಯ್ವಾಟ್ ರು 1,300 ಕೊರೊಡಾಂಕ್ ಮಿಕ್ವಾಲಾ. ಅಶೆಂ ಬ್ಯಾಂಕಾಚಿ ವಾಡಾವಳ್ ದಾದೊಸ್ಕಾಯೆಚಿ ಆನಿ ಸಮಾದಾನೆಚಿ ಜಾಂವ್ಕ್ ಪಾವ್ಲ್ಯಾ ಆಸ್ತಾಂ, ಬ್ಯಾಂಕಾಚ್ಯಾ ಪ್ರಗತೆಂತ್ ಹಾತ್ ಮೆಳಯಿಲ್ಲ್ಯಾ ಸರ್ವ್ ಗ್ರಾಹಕಾಂಚೊಂ, ಸಾಂದ್ಯಾಂಚೊಂ, ಸಿಬಂದೆಚೊ ಶ್ರೀ ಅನಿಲ್ ಲೋಬೊನ್, ಹ್ಯಾ ವೆಳಿಂ ವಿನಮೃತೆನ್ ಉಪ್ಕಾರ್ ಬಾವುಡ್ಲೊ.
ಪಾಟ್ಲ್ಯಾ 7 ವರ್ಸಾಂನಿ ಬ್ಯಾಂಕಾಚ್ಯಾ ಆಡಳ್ತ್ಯಾ ಮಂಡಳೆಚಿ ತ್ವರಿತ್ ಪ್ರಗತಿ ಆನಿ ವಾಡಾವಳೆಕ್ ಕಾರಣ್ ಜಾಲ್ಲ್ಯಾ ಸರ್ವ್ ಸಾಂದ್ಯಾಂಚೊ, ಗ್ರಾಹಕಾಂಚೊ ಆನಿ ಸಿಬಂದೆಚೊ ಉಪ್ಕಾರ್ ಭಾವುಡ್ಲೊ. ಆಮ್ಚ್ಯಾ ಮಾಲ್ಗಡ್ಯಾಂಚೆಂ ಹೆಂ ದಾಯ್ಜ್ ಮುಕ್ಲ್ಯಾ ಪಿಳ್ಗೆಕ್ ಹತಾಂತರ್ ಕರ‍್ಚೆಂ ಮಹತ್ವ್ ಸಭೆರ್ ಶ್ರೀ ಅನಿಲ್ ಲೋಬೊ ಕಳಯ್‌ಲಾಗ್ಲೊ. ಬ್ಯಾಂಕಾಕ್ ಪ್ರಾಮಾಣಿಕ್ ರಾವೊಂಕ್ ಆನಿ ಆಮ್ಚ್ಯಾ ಸಂಸ್ಥ್ಯಾವಿಶಿಂ ಜಾಂವ್ ಆಡಳ್ತ್ಯಾ ಮಂಡಳೆವಿಶಿಂ ಜಾಂವ್ ಫಟ್ಕಿರ‍್ಯೊ ಖಬ್ರೊ ಪಾಸಾರ್ ಕರಿನಾಶೆಂ ಸಾಂದ್ಯಾಂಕ್ ತಾಣೆಂ ವಿನತಿ ಕೆಲಿ. ಬ್ಯಾಂಕಾಚಿ ಸೆವಾ ಆನಿ ಸವ್ಲಾತಾಯೊ ಚಡಂವ್ಕ್ ಆಧಾರ್ ಜಾಂವ್ಚ್ಯಾಕ್ ಸರ್ವ್ ಸಹಾ ಸೂಚಾನಾಂ ಶೀದಾ ಬ್ಯಾಂಕ್ ಆಡಳ್ತ್ಯಾ ಮಂಡಳೆಲಾಗಿಂ ವಾಂಟುಂಕ್ ಸಾಂದ್ಯಾಂಕ್ ವಿನತಿ ಕೆಲಿ.
ಉಡುಪಿ ಜಿಲ್ಲ್ಯಾಚ್ಯಾ ಸಂತೆಕಟ್ಟೆಂತ್ ಅಕ್ಟೋಬರ್ ೫ ತಾರಿಕೆರ್ ಬ್ಯಾಂಕಾಚೊ ೨೧ವೊ ಶಾಖೊ ಉದ್ಘಾಟನ್ ಆಸ್ತಲೊ, ಸರ್ವ್ ಸಾಂದ್ಯಾಂಕ್ ಹಾಜರ್ ಜಾಂವ್ಕ್ ಉಲೊ ದಿಲೊ. ಮುಕ್ಲ್ಯಾ ಜೆರಾಲ್ ಜಮಾತೆ ಪಯ್ಲೆಂ 25 ನವೆ ಶಾಖೆ ಆನಿ 20 ಎಟಿಎಮ್ ಸೆಂಟರ್ ವಿಸ್ತಾರಾಂವ್ಚ್ಯಾ ಬ್ಯಾಂಕಾಚ್ಯಾ ಯೋಜನಾಂಕ್ ಸಹಕಾರ್ ಆನಿ ಪಾಟಿಂಬೊ ಮಾಗುನ್ ಜೆರಾಲ್ ಸಭೆಕ್ ಹಾಜರ್ ಜಾಲ್ಲ್ಯಾ ಸರ್ವ್ ಸಾಂದ್ಯಾಂಚೊ ಶ್ರೀ ಅನಿಲ್ ಲೋಬೊನ್ ಉಪ್ಕಾರ್ ಭಾವುಡ್ಲೊ
ಜಮಾತೆರ್ ಬ್ಯಾಂಕಾಚೆ ನಿರ್ದೇಶಕ್ ಶ್ರೀ ಅಂಡ್ರ್ಯೂ ಡಿಸೋಜ, ಜೋಸೆಫ್ ಎಮ್. ಅನಿಲ್ ಪತ್ರಾವೊ, ಡಾ| ಜೆರಾಲ್ಡ್ ಪಿಂಟೊ, ಡೇವಿಡ್ ಡಿಸೋಜ, ಎಲ್‌ರೊಯ್ ಕಿರಣ್ ಕ್ರಾಸ್ಟೊ, ರೋಶನ್ ಡಿ’ಸೋಜ, ಹೆರಾಲ್ಡ್ ಮೊಂತೇರೊ, ಜೆ. ಪಿ. ರೊಡ್ರಿಗಸ್, ವಿನ್ಸೆಂಟ್ ಲಸ್ರಾದೊ, ಮೆಲ್ವಿನ್ ವಾಸ್, ಐರಿನ್ ರೆಬೆಲ್ಲೊ, ಡಾ| ಫ್ರೀಡಾ ಡಿಸೋಜ, ವೃತ್ತಿಪರ ನಿರ್ದೇಶಕ್ ಸಿ.ಜಿ. ಪಿಂಟೊ, ಸುಶಾಂತ್ ಸಲ್ಡಾನ್ಹಾ ಸಾಂಗಾತಾ ಮಹಾ ಪ್ರಬಂದಕ್ ಶ್ರೀ ಸುನಿಲ್ ಮಿನೇಜಸ್, ಉಪ ಮಹಾಪ್ರಬಂದಕ್ ರಾಜ್ ಎಫ್. ಮಿನೇಜಸ್ ಹಾಜರ್ ಆಸ್ಲೆ.
ಮಹಾಪಬಂದಕ್ ಶ್ರೀ ಸುನಿಲ್ ಮಿನೇಜಸ್ ಹಾಣಿ ಸ್ವಾಗತ್ ಕೆಲೊ. ಬ್ರಹ್ಮಾವರ್ ಶಾಖ್ಯಾಚೊ ವ್ಯವಸ್ಥಾಪಕ್ ಶ್ರೀ ಒವಿನ್ ರೆಬೆಲ್ಲೊನ್ ಕಾರ್ಯೆಂ ಚಲವ್ನ್ ವೆಲೆಂ.
