ನೆದರ್ಲ್ಯಾಂಡ್ಸಾಂತ್ ವಾವುರ್ನ್ ಆನಿ ಜಿಯೆವ್ನ್ ಆಸ್ಚ್ಯಾ ಕೊಂಕ್ಣಿ ಉಲವ್ಪಿ ಮಂಗ್ಳುರಿ ಆನಿ ಗೊಂಯ್ಕಾರ್ ಕುಟ್ಮಾಚ್ಯಾಂನಿ ತಿಸ್ರ್ಯಾ ವರ್ಸಾ ಪರತ್ ಏಕ್ ಪಾವ್ಟಿಂ ಸಾಂಗಾತಾ ಮೆಳೊನ್ ಮೊಂತಿ ಫೆಸ್ತ್ ಭೋವ್‍ಚ್ಚ್ ಗದ್ದಾಳಾಯೆನ್ ಆನಿ ಭಕ್ತಿನ್, ಹೋವ್‍ಡೋರ್ಫ್ ಶಹರಾಂತ್ಲ್ಯಾ ಸಾಂ ಜುವಾಂವ್ ಬಾವ್ತಿಸ್ತ್ ಫಿರ್ಗಜೆಂತ್ ಆಚರಣ್ ಕೆಲೆಂ
ಸುರ್ವೆರ್ ಮೊಂತಿ ಮಾಯೆಕ್ ಫುಲಾಂ ಅರ್ಪುನ್, ನೊವೆನಾ ಸಂಗಿ ಫೆಸ್ತಾಚೆಂ ಆಚರಣ್ ಆರಂಭ್ ಜಾಲೆಂ. ಉಪ್ರಾಂತ್ ನೆದರ್ಲ್ಯಾಂಡ್ಸ್ ಕೊಂಕ್ಣಿ ಸಮುದಾಯಾಚೊ ಆತ್ಮಿಕ್ ದಿರೊಕ್ತೊರ್ ಬಾಪ್ ರಿಚರ್ಡ್ ಲೋಬೋನ್ ಕೊಂಕ್ಣೆಂತ್ ಸಂಭ್ರಮಿಕ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಮಿಸಾವೆಳಿಂ ಮರಿಯೆಕ್ ಹೊಗೊಳ್ಸಿಯಾಂ, ಸಕ್ಕಡ್ ಸಾಂಗಾತಾ ಮೆಳ್ಯಾಂ . . . ಅಸಲಿಂ ಕೊಂಕ್ಣಿ ಭಕ್ತಿಕ್ ಗಿತಾಂ ಗಾವುನ್ ಗಾಯನ್ ಮಂಡಳಿನ್ ಸಂಭ್ರಮ್ ದೊಡ್ತೊ ಕೆಲೊ. ಕುಟ್ಮಾ ಜಿವಿತ್, ಸಾಮುದಾಯಿಕ್ ಮೌಲ್ಯಾಂ, ಪ್ರಕೃತೆ ಸಂಗಿ ಆಮ್ಚೆಂ ಜಿವಿತ್ ಹ್ಯಾ ವಿಶಿಂ ಬಾಪ್ ರಿಚರ್ಡಾಚೊ ಅರ್ಥಾಭರಿತ್ ಪ್ರಸಂಗ್ ಜಮ್ಲೆಲ್ಯಾ ಲೊಕಾಚಿ ಭಕ್ತ್ ಆನಿ ಉರ್ಭಾ ವಾಡಂವ್ಕ್ ಪಾವ್ಲೊ. ನೊವೆನಾಂತ್ ತಶೆಂಚ್ ಮಿಸಾಂತ್ ಸಕ್ರಿಯ್ ವಾಂಟೊ ಘೆತ್ಲೆಲ್ಯಾ ಭುರ್ಗ್ಯಾಂಕ್, ಗಾಂವಾಂತ್ಲ್ಯಾ ರಿವಾಜೆ ಪರ್ಮಾಣೆಂ ಮಿಸಾಚ್ಯಾ ಅಖ್ರೇಕ್ ಕೊಬು ವಾಂಟ್ಲೊ.
ಮಿಸಾ ಉಪ್ರಾಂತ್ ಜಮ್ಲೆಲ್ಯಾ ಸರ್ವಾಂನಿ ಗಾಂವ್ಚ್ಯಾ ರಿತಿರ್ ನೊವ್ಯಾ ಬೆಳ್ಯಾಚೆಂ ಜೆವಣ್ ಸೆವುನ್ ಕುಟ್ಮಾ ಭಾಂದ್ ಘಟ್ ಕೆಲೊ. ಉಪ್ರಾಂತ್ ಆಸಾ ಕೆಲ್ಲ್ಯಾ ಮನೋರಂಜನ್ ಕಾರ್ಯಾವೆಳಿಂ ಖೆಳ್, ಪದಾಂ, ಬೈಲಾ ನಾಚ್, ಡಿಜೆ ಸಂಗೀತ್ ಲೊಕಾಚಿಂ ಮನಾ ದಾಧೊಸಾಂವ್ಕ್ ಪಾವ್ಲೆಂ. ನೆದರ್ಲ್ಯಾಂಡ್ಸಾಂತ್ ನವ್ಯಾನ್ ಆಯ್ಲೆಲ್ಯಾ ಕೊಂಕ್ಣಿ ಕುಟ್ಮಾಂಕ್ ನೆದರ್ಲ್ಯಾಂಡ್ಸ್ ಕೊಂಕ್ಣಿ ಸಮುದಾಯಾಕ್ ಬರೊ ಯೇವ್ಕಾರ್ ಮಾಗುನ್ ಕುಟ್ಮಾ ಬಾಂಧ್ ಘಟ್ ಕೆಲೊ.
ಓಸ್ಕರ್ ರೊಡ್ರಿಗಸಾನ್ ಮೊಂತಿ ಫೆಸ್ತಾಚೆಂ ಹೆಂ ಸಗ್ಳೆಂ ಕಾರ್ಯೆಂ ವರ್ತ್ಯಾ ಮ್ಹಿನತೆನ್ ಮಾಂಡುನ್ ಹಾಡ್ಲೆಲೆಂ. ತಾಕಾ ಡಿಜೆ ಲವಿಟಾ ತಶೆಂಚ್ ಕೊಂಕ್ಣಿ ಸಮುದಾಯಾಚ್ಯಾ ಹೆರಾನಿಂ ತಾಂಚೊ ಸಹಕಾರ್ ದಿಲ್ಲೊ ಆಸುನ್, ಸಗ್ಳೆಂ ಕಾರ್ಯೆಕ್ ಭೋವ್‍‍ಚ್ ಸೊಭಿತ್ ಆನಿ ಮನಾಪಸಂಧೆಚೆಂ ಜಾಲೆಂ. ಕೊಂಕ್ಣಿ ಆನಿ ಕ್ರೀಸ್ತಾಂವ್ ಸಮುದಾಯಾಚ್ಯೊ ರಿತಿ-ರಿವಾಜಿ ಸಾಂಬಾಳುನ್ ದವರ್ನ್ ಪಯ್ಶಿಲ್ಯಾ ಗಾಂವಾಂತ್ ತಾಂಚೊ ಪೋಸ್ ಕರ್ಚ್ಯಾಂತ್ ಅಸಲ್ಯಾ ಆಚರಣಾಚೊ ಪಾತ್ರ್ ಭೋವ್ ವರ್ತೊ ಮ್ಹಣ್ ಸಮ್ಜೊನ್ ಮುಕ್ಲ್ಯಾ ವರ್ಸಾ ಹಾಚ್ಯಾನೀ ಚಡ್ ಗದ್ದಾಳಾಯೆನ್ ಆನಿ ಭಕ್ತಿನ್ ಮೊಂತಿ ಫೆಸ್ತಾಚೆಂ ಆಚರಣ್ ಮಾಂಡುನ್ ಹಾಡ್ಚೊ ನಿಚೆವ್ ಕರುನ್ ತ್ಯಾ ದಿಸಾಚೊ ಸಂಭ್ರಮ್ ಅಖೇರ್ ಜಾಲೊ.
