ಎಕಾ ಮನ್ಶ್ಯಾನ್ ಸಮಾಜಿಂತ್ ಸಕ್ಡಾಂಕ್ ಮಾನ್ವೊಂಚ್ಯಾ ರಿತಿರ್, ಹೆರಾಂಕ್ ದೇಖ್ ದಿಂವ್ಚ್ಯಾ ರಿತಿರ್, ಕಿತೆಂ ಕರುಂಕ್ ಚಿಂತ್ಲಾಂ ತೆಂ ಕರುನ್ಂಚ್ ದಾಕಂವ್ಚೆಂ ಆಪ್ರೂಪ್ ದೆಣೆಂ ಆಪ್ಣಾಯ್ಜಯ್ ತರ್, ತಾಚಾ ಕುಟ್ಮಾಂತ್ ತಸಲೆಂ ವಾತಾವರಣ್ ಆಸಾಜಾಯ್ ಮ್ಹಳ್ಳಿ ಗಜಾಲ್ ಆಮಿ ಸರ್ವ್ ಜಾಣಾಂವ್. ಬರ‍್ಯಾ ಮಾತಿಯೆಂತ್ ಲಾಯಿಲ್ಲೆಂ ಝಡ್ ಆಪ್ಲಿಂ ಪಾಳಾಂ ಸುಲಭಾಯೆನ್ ವಿಸ್ತಾರಾಯ್ತಾ. ಪುಣ್ ತ್ಯಾ ಝುಡಾಕ್ ತಿತ್ಲ್ಯಾರ್‌ಚ್ ಸೊಡುಂಕ್ ಜಾಯ್ನಾ, ಫಾವೊತೊ ಈಟ್ ಘಾಲೊನಾ ತರ್, ತೆಂ ಝುಡ್ ಫಳಾಂ ದೀನಾತ್‌ಲ್ಲೊ ಆಡ್ಬಸ್ರೊ ರೂಕ್ ಜಾತಾ.
ಬರಿ ಮಾತಿ ಆನಿ ಬರೊ ಈಟ್, ರೋಶು-ಬಜ್ಪೆ-ಚಾ ಜಿಣಿಯೆಂತ್ ಫಾವೊ ಜಾಲಾ ಮ್ಹಣ್ಚಾಕ್, ಕೊಣೀ ನ್ಹಯ್ ಮ್ಹಣ್ಚೆನಾಂತ್. ತಾಣೆಂ ಇತ್ಲ್ಯಾ ತರ್ನ್ಯಾ ಪ್ರಾಯೆರ್ ಕೆಲ್ಲಿಂ ಸಾಹಿತಿಕ್ ಸಾಧನಾಂ, ಕೊಣೆಂಯ್ ಮೆಚ್ವಾಜಾಯ್ ಜಾಲ್ಲಿಂ. ತಾಚಾ ಆವಯ್ಕ್ ಮೆಳ್ಚೆಂ ಭಾಗ್ ಮ್ಹಾಕಾ ಫಾವೊ ಜಾಂವ್ಕ್ ನಾ ತರೀ, ತಾಕಾ ತಿಚೆರ್ ಆಸ್‌ಲ್ಲೊ ಮೋಗ್ ಆನಿ ಅಭಿಮಾನ್, ಆಮ್ಚಾ ಗಜಾಲಿಂ ಮಧೆಂ ಮ್ಹಜಾ ಮತಿಕ್ ಗೆಲ್ಲೊ ಆಸಾ. ಆದ್ಲ್ಯಾ ವರ್ಸಾ ಹಾಂವೆಂ ಹಾಂಗಾಸರ್ ಸಿಡ್ನಿಂತ್ ಎಕಾ ಫುಲಾಂ-ದಾಖವ್ಣೆಕ್ ಭೆಟ್ ದಿಲಿ. ಎಕ್ರ್ಯಾಂ ಗಟ್ಲ್ಯಾನ್ ಸೊಭಿತ್ ಸುಂದರ್ ಫುಲಾಂ, ರಂಗ್-ರಂಗಾಳ್ ಫುಲಾಂ ತಿಂ ಪಳೆವ್ನ್ ಮನ್ ಪಿಸ್ವಾತಾನಾ, ರೋಶುಚಿ ಮೆಸ್ಸೇಜ್ ಯೇಜಾಯ್‌ಗೀ? ಹಾಂವೆಂ ಫುಲಾಂಚ್ಯೊ ಥೊಡ್ಯೊ ತಸ್ವಿರ‍್ಯೊ ತಾಕಾ ಜಾಪ್ ಜಾವ್ನ್ ಧಾಡ್ಲ್ಯೊ. ಥೊಡ್ಯಾ ವೆಳಾನ್, ರೋಶುನ್ ತ್ಯೋ ತಸ್ವಿರ‍್ಯೊ ಪಳೆವ್ನ್ ಮೆಚ್ವಣಿ ಪಾಚಾರ್ಚ್ಯಾ ಸಂಗಿಂ, ತಾಚ್ಯಾ ಆವಯ್ಕ್ ಫುಲಾಂಚೊ ಮೋಗ್ ಕಿತ್ಲೊಗೀ ಮ್ಹಳ್ಳಿ ಗಜಾಲ್ ಸಾಂಗ್ಲಿ ಮಾತ್ರ್ ನ್ಹಯ್, ತಿಣೆಂ ತಾಂಚಾ ಘರ್ಚಾ ವೊಡ್ತಾಂತ್ ಫುಲಾಂ ಮಧೆಂ ಭೊಂವ್ಚಿ ತಸ್ವೀರ್ ಮ್ಹಾಕಾ ಧಾಡ್ಲಿ. ವೆವೆಗ್ಳ್ಯಾ ಗಾಂವಾಂನಿ ಆಸ್ಚೆ – ಹಾಂವ್ ಆಸ್ಟ್ರೇಲಿಯಾಂತ್ ಆನಿ ರೋಶು ಗಾಂವಾಂತ್ – ಎಕಾಮೆಕಾ ಮುಕಾಮುಕಿಂ ಭೆಟೊನ್ ಪರಿಚಯ್ ನಾತ್‌ಲ್ಲೆ ಆಮಿ – ಫಕತ್ ಫುಲಾಂಚಾ ಸಂಗ್ತಿಚೆರ್, ಕುಟ್ಮಾ ವಿಶ್ಯಾಂತ್ ಉಲಂವ್ಕ್ ಲಾಗ್ಲ್ಯಾಂವ್. ಹೊ ಸಂಸಾರ್ ವಿಚಿತ್ರ್.
ಎಕಾ-ಮೆಕಾ ಮುಕಾಮುಕಿಂ ಭೆಟೊನ್ ಪರಿಚಯ್ ನಾತ್‍ಲ್ಲ್ಯಾ ಆಮ್ಚಿ ಒಳೊಕ್ ಜಾಲ್ಲಿಯ್ ಚುಕಾಮುಕಿಂಚ್ ಮ್ಹಣ್ಯೆತ್. 2021 ಇಸ್ವೆಯಿತ್ಲ್ಯಾಕ್ ಮಜೆಂ ಏಕ್ ಲಾಂಬ್ ತೆಂಪಾಚೆಂ ಸಪಣ್ ನೀಜ್ ಜಾಲೆಂ. ಲಗ್‍ಬಗ್ ತೀಸ್ ವರ್ಸಾಂ ಹಾಂವ್ ಸಾಹಿತಾಂತ್ ಥಾವ್ನ್ ಪಯ್ಸ್ ಉರ್ಲೊಂ ತರೀ ತಿ ಖೊರೊಜ್ ಪರತ್ ಉಸ್ಕಾಲ್ಲಿ, ಏಕ್ ಚೀನಾಚೆಂ ಫಿಲ್ಮ್ ಪಳೆಲ್ಯಾ ಉಪ್ರಾಂತ್. 1976 ವರ್ಸಾಂತ್ ಚೀನಾಂತ್ ಸಂಭವ್‌ಲ್ಲ್ಯಾ ಹ್ಯಾ ಭಿರಾಂಕುಳ್ ಭುಂಯ್-ಕಾಂಪಿಚೆರ್ ಮಾಂಡುನ್ ಹಾಡ್‌ಲ್ಲಿ ತಿ ಕಾಳಿಜ್ ಕಡಂವ್ಚಿ ಕಥಾ ಕೊಂಕ್ಣೆಂತ್ ಬರಯ್ಜೆ ಮ್ಹಣೊನ್ ಮ್ಹಾಕಾ ಭೊಗ್‌ಲ್ಲೆಂ 2014 ಇಸ್ವೆಂತ್ ತರೀ ತೆಂ ಸಪಣ್ ಜ್ಯಾರಿ ಜಾಲ್ಲೆಂ 2021 ಇಸ್ವೆಂತ್. 1990 ಇಸ್ವೆಂತ್ ಗಾಂವ್ ಸೊಡುನ್ ಗೆಲ್ಲ್ಯಾ ಮ್ಹಾಕಾ ಕೊಂಕ್ಣಿ ಸಾಹಿತಾಂತ್ ಜಾಲ್ಲ್ಯಾ ಬದ್ಲಾವಣ್ಯಾಂ ವಿಶಿಂ ಚಡಿತ್ ಮಾಹೆತ್ ನಾತ್‌ಲ್ಲಿ. ಆತಾಂ ‘ಭುಂಯ್-ಕಾಂಪ್’ ಬೂಕ್ ಬರಯ್ಲಾ ಆಸ್ತಾಂ, ಖಂಚಾ ಪ್ರಕಾಶನಾಕ್ ಧಾಡ್ಚೊ ಮ್ಹಳ್ಳೆಂ ಸವಾಲ್ ಉಬ್ಜಾಲೆಂ. ಥೊಡ್ಯಾ ಸಂಪಾದಕಾಂಕ್ ಬರಯ್ಲೆಂ ಪುಣ್ ಜಾಪ್ ಆಯ್ಲಿನಾ. ನಿಮಾಣೆಂ ದಾಯ್ಜಿ-ವರ್ಲ್ಡ್ ಜಾಳಿ-ಪತ್ರಾಕ್ ಬರಯ್ಲೆಂ. ಅಜಾಪಿಂ ಥರಾನ್, ಮೆಲ್ವಿನ್ ರೊಡ್ರಿಗಸಾಚಿ ಜಾಪ್ ಆಯ್ಲಿ.
ಸತ್ ಸಾಂಗ್ಚೆಂ ತರ್, ಮೆಲ್ವಿನ್ ರೊಡ್ರಿಗಸಾಕ್ ಖಾಸ್ಗೆನ್ ಒಳ್ಕೊನ್ ಹಾಂವ್ ನೆಣಾಂ. ಪುಣ್ ತಾಚೆಂ ಇಮೆಯ್ಲ್ ವಾಚ್ತಾನಾ, ತಾಕಾ ಮ್ಹಜೆ ವಿಶಿಂ ಕಳಿತ್ ಆಸಾ ತೆಂ ಪಳೆವ್ನ್ ಸಂತೊಸ್ ಜಾಲೊ. ತ್ಯಾ ಪಾಟಾಪಾಟ್, ಮೆಲ್ವಿನಾ ವಿಶಿಂ ಜಾಳಿಜಾಗ್ಯಾರ್ ಸೊಧ್ನಾಂ ಕರ್ತಾನಾ, ಮೆಲ್ವಿನ್ ಸಾಹಿತ್ ಸಂಸಾರಾಂತ್ ಕಿತ್ಲ್ಯಾ ಉಂಚಾಯೆಕ್ ಪಾವ್ಲಾ ತೆಂ ಕಳೊನ್ ಆಯ್ಲೆಂ. ಇತ್ಲ್ಯಾ ಉಂಚಾಯೆಕ್ ಪಾವ್‌ಲ್ಲ್ಯಾ ಬರಯ್ಣಾರಾನ್ ಮ್ಹಾಕಾ ಜಾಪ್ ದಿಲ್ಲ್ಯಾಕ್ ಸಂತೊಸ್ ಜಾಲೊ ಮಾತ್ರ್ ನ್ಹಯ್, ತಾಣೆಂ ಮ್ಹಜೊ ಬೂಕ್ ಫಾಯ್ಸ್ ಕರ್ಚಾ ವಿಶಿಂ ದಾಕಯಿಲ್ಲಿ ಉರ್ಭಾ ಪಳೆವ್ನ್ ಅಜಾಪ್‌ಯೀ ಜಾಲೆಂ ಮ್ಹಣ್ಯೆತ್. ಪುಣ್ ಹಾಂವೆಂ ತಾಚಾ ಬರ‍್ಯಾ ಮನಾಚೊ ಫಾಯ್ದೊ ಉಟಂವ್ಚೊ ಸಾರ್ಕೊ ನ್ಹಯ್ ಮ್ಹಣ್ ಚಿಂತುನ್, ಹೊ ಮ್ಹಜೊ ಬೂಕ್ ಫಾಯ್ಸ್ ಕರ್ಚಾ ಪಯ್ಲೆಂ, ಕೊಣಾಕ್ ಪುಣಿ ವಾಚುಂಕ್ ದೀವ್ನ್, ಹ್ಯಾ ಬುಕಾಚೊ ವಿಶಯ್, ಬರಯಿಲ್ಲಿ ರೀತ್ ಆನಿ ವಾಪರ್‌ಲ್ಲಿ ಭಾಸ್, ಆತಾಂಚಾ ಕೊಂಕ್ಣೆಕ್ ತಾಳ್ ಪಡ್ತಾಗೀ ನಾ ತೆಂ ಪಳೆಂವ್ಕ್ ವಿನತಿ ಕೆಲಿ. ಮೆಲ್ವಿನ್ ರೊಡ್ರಿಗಸಾನ್, ದೊಗಾಂ-ತೆಗಾಂಕ್ ಮ್ಹಜೊ ಬೂಕ್ ಧಾಡ್ಲೊ.
ಎಕಾ ಹಪ್ತ್ಯಾ ಭಿತರ್, ಎಕ್ಲ್ಯಾಚಿ ಜಾಪ್ ಆಯ್ಲ್ಯಾ ಮ್ಹಣ್ ಮೆಲ್ವಿನಾನ್ ಮೆಸೆಜ್ ಕೆಲಿ ಮಾತ್ ನ್ಹಯ್, ತ್ಯಾ ವಾಚ್ಪ್ಯಾಚಿ ಅಭಿಪ್ರಾಯ್ ಮ್ಹಾಕಾ ಧಾಡುನ್ ದಿಲಿ.
ತೊ ವಾಚ್ಪಿ ಜಾವ್ನಾಸ್‌ಲ್ಲೊ – ರೋಶು, ಬಜ್ಪೆ.
ಆತಾಂ, ಹೊ ರೋಶು ಬಜ್ಪೆ ಮ್ಹಳ್ಯಾರ್ ಕೋಣ್ ತೆಂ ಕಳಿತ್ ಜಾಂವ್ಚಾ ವಾಟೆನ್ ಪರತ್ ಜಾಳಿ ಜಾಗ್ಯಾರ್ ಸೊಧ್ನಾಂ ಕರಿಜಾಯ್ ಪಡ್ಲಿಂ. ಪಳೆತಾನಾ, ತಸ್ವಿರೆ ಸಂಗಿಂ, ಸಭಾರ್ ಪ್ರಶಸ್ತ್ಯೊ ಆಪ್ಣಯಿಲ್ಲೊ ಫಾಮಾದ್ ಬರಯ್ಣಾರ್ ಆನಿ ಕವಿ ಮ್ಹಳ್ಳೆಂ ಕಳೊನ್ ಆಯ್ಲೆಂ. ತರ್ ಅಸಲ್ಯಾ ಬರಯ್ಣಾರಾಚಿ ಅಭಿಪ್ರಾಯ್ ಗಮಂಡಾಯೆನ್ ವಾಚುನ್ ಪಳೆಂವ್ಚಿ ಗರ್ಜ್ ಸಮ್ಜಾಲ್ಲೊಂ ಹಾಂವ್, ತಿ ಅಭಿಪ್ರಾಯ್ ವಾಚುನ್ ಖುಬ್ ಸಂತೊಸ್ಲೊಂ. ಇತ್ಲ್ಯಾ ವರ್ಸಾಂ ಉಪ್ರಾಂತ್ ಪರತ್ ಬರಂವ್ಚೆಂ ಸಾಧನ್ ಕೆಲ್ಯಾರೀ, ನಿರ್ಫಳ್ ಜಾಂವ್ಕ್ ನಾ ತೆಂ ಸಮ್ಜುನ್, ಸಮಧಾನ್ ಜಾಲೆಂ. ಪುಣ್ ಹಿ ಫಕತ್ ಎಕ್ಲ್ಯಾಚಿ ಅಭಿಪ್ರಾಯ್, ಹೆರ್ ಕಿತೆಂ ಮ್ಹಣ್ತಾತ್ ಪಳೆವ್ಯಾಂ ಮ್ಹಣ್ ರಾಕ್ಚೊ ನಿರ್ಧಾರ್ ಕೆಲೊ. ಕ್ರಮೇಣ್ ಹೆರಾಂನಿಯೀ ಉತ್ತೇಜಿತ್ ಜಾಪಿ ಧಾಡ್ಲ್ಯೊ.
ಮೆಲ್ವಿನಾಚಾ ಸಾಧನಾಕ್ ಲಾಗೊನ್, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿ ದ್ವಾರಿಂ 2022 ಇಸ್ವೆಂತ್, ‘ಭುಂಯ್‌ಕಾಂಪ್’ ಬೂಕ್ ಫಾಯ್ಸ್ ಜಾಲೊ. ತ್ಯಾ ಉಪ್ರಾಂತ್, ರೋಶುಚೆಂ ಖಾಸ್ಗಿ ನಂಬರ್ ಸೊಧುನ್ ಕಾಡುನ್, ತಾಚೊ ಉಪ್ಕಾರ್ ಬಾವ್ಡುಂಚಿ ಉರ್ಬಾ ಜ್ಯಾರಿ ಜಾಂವ್ಚ್ಯಾ ಪಯ್ಲೆಂ, ರೋಶುನ್ಂಚ್ ಮ್ಹಜೆಂ ನಂಬರ್ ಸೊಧುನ್ ಕಾಡುನ್ ಮ್ಹಾಕಾ ಫೊನ್ ಕೆಲೆಂ. ಆಮಿ ದೊಗೀ, ಸಭಾರ್ ತೆಂಪಾ ಥಾವ್ನ್ ಒಳೊಕ್ ಆಸ್ಚೆಬರಿ ಉಲಂವ್ಕ್ ಲಾಗ್ಲ್ಯಾಂವ್ ಆನಿ ತ್ಯಾ ಬರಾಬರ್, ಏಕ್ ನವಿ ಸಂಗತ್ ಉಗ್ತಾಡಾಕ್ ಆಯ್ಲಿ. ಹಾಂವೆಂ 1990 ಇಸ್ವೆಂತ್ ‘ರಾಯ್ ಉಂದಿರ್’ ನಾಂವಾಚೊ ಬೂಕ್ ಬರಯಿಲ್ಲೊ ಆನಿ ‘ರಾಕ್ಣೊ’ ಪತ್ರಾನ್ ತೊ ಪ್ರಕಟ್‌ಲ್ಲೊ. ತೆದಾಳಾ ಹೈಸ್ಕೂಲಾಂತ್ ಆಸ್‌ಲ್ಲ್ಯಾ ರೋಶುಕ್, ರಾಕ್ಣೊಚಾ ಎಕಾ ಸ್ಪರ್ಧ್ಯಾಂತ್ ಇನಾಮ್ ಜಾವ್ನ್ ಮ್ಹಜೊ ‘ರಾಯ್ ಉಂದಿರ್’ ಬೂಕ್ ಲಾಬ್‌ಲ್ಲೊ ಕಂಯ್. ತೊ ತಾಣೆಂ ವಾಚ್‌ಲ್ಲೊ ಪಯ್ಲೊ ಬೂಕ್. ತ್ಯಾ ಬುಕಾ ವರ್ವಿಂ ತಾಚಿ ಬರಂವ್ಚಿ ಉರ್ಬಾ ಚಡ್ಲಿ ಮ್ಹಣ್ತಾ ತೊ – ತಿಂ ತಾಚಿಂ ಉತ್ರಾಂ, ಮ್ಹಜಿಂ ನ್ಹಯ್. ತರ್, ಹ್ಯಾ ಸಂಸಾರಾಂತ್ ಆಮ್ಚ್ಯಾ ಸಮ್ಜಣೆವಿಣೆಂ ಕಿತ್ಲಿಂ ಸರ್ವ್ ಘಡಿತಾಂ ಘಡ್ತಾತ್? ಕಿತ್ಲ್ಯಾ ಜಣಾಂಕ್ ಆಮ್ಚೆ ಥಾವ್ನ್ ಪ್ರೇರಣ್ ವಾ ನಿರಾಶಾ ಜಾತಾ? ಆಮಿ ಕಿತ್ಲೆಂ ಚಿಂತುನ್ ಪಳೆವ್ನ್ ಜಿಣಿ ಸಾರಿಜಾಯ್ ಮ್ಹಳ್ಳ್ಯಾಚೊ ಏಕ್ ಲ್ಹಾನ್ ಧಾಖ್ಲೊ ಹೊ.
ತ್ಯಾ ದಿಸಾ ಥಾವ್ನ್, ಆಜೂನ್ ಪರ‍್ಯಾಂತ್ ಖಳಾನಾಸ್ತಾಂ ಮ್ಹಾಕಾ ‘ಗುಡ್ ಮೊರ್ನಿಂಗ್’ ಮ್ಹಣೊನ್ ತಾಣೆಂ ಮೆಸೆಜ್ ಕರಿನಾತ್‌ಲ್ಲೊ ದೀಸ್ ನಾ ಮ್ಹಳ್ಯಾರ್ ಕೊಣಾಯ್ಕಿ ಅಜಾಪ್ ಜಾಯ್ತ್. ತಸಲೊ ಹೆರಾಂಕ್ ಮಾನ್ ದಿಂವ್ಚೊ ಗೂಣ್ ತಾಚೊ.
ಪಾಸ್ಕಾಂ ಫೆಸ್ತಾಕ್ ಎಕಾ ವಾತಿ ಥಾವ್ನ್ ಆಮಿ ಸಭಾರ್ ವಾತಿ ಪೆಟಯ್ತಾಂವ್. ಅಶೆಂಚ್ ಜಾವ್ನಾಸಾ ಬರಯ್ಣಾರಾಂಚೆಂ ಜೀವನ್. ಆಮಿ ಬರಯಿಲ್ಲೆಂ ಹೆರಾಂಕ್ ಪ್ರೇರಣ್ ದೀಂವ್ಕ್ ಸಕ್ಲೆಂ ತರ್, ತ್ಯಾ ವರ್ತಿ ಪ್ರಶಸ್ತಿ ದುಸ್ರಿ ಗರ್ಜ್ ನಾ. ರೋಶುಚಿ ಆವಯ್‌ಯೀ, ಬರಯ್ಣಾರ್ ನ್ಹಯ್ ತರೀ ಮೊಗಾ-ಮಯ್ಪಾಸಾಚಿ ಏಕ್ ವಾತ್ ಜಾವ್ನಾಸ್‌ಲ್ಲಿ ಮ್ಹಳ್ಳಿ ಗಜಾಲ್, ಎಚ್ಚೆಮಾಚಾ ಲೇಖನಾಂತ್ ಕಳೊನ್ ಯೆತಾ. ತಿಚಾ ವಾತಿಚೊ ಉಜೊ, ತಿಚಾ ಭುರ್ಗ್ಯಾಂಚಾ ಕಾಳ್ಜಾನಿಂಯೀ ಪೆಟ್ಲಾ ತೆಂ ನ್ಹಯ್ ಮ್ಹಣೊಂಕ್ ಅಸಾಧ್ಯ್. ರೋಶು ಆಜ್ ಏಕ್ ಉಂಚ್ಲೊ ಬರವ್ಪಿ ಆನಿ ಕವಿ ಜಾಲಾ ತರ್, ಹೆರ್ ಬರಯ್ಣಾರಾಂಕ್ ಮಾನ್ ದೀವ್ನ್ ತಾಂಚಿ ದೇಖ್ ಆಪ್ಣಾಂವ್ಕ್ ಸಕ್ಲಾ ತರ್, ತಾಚಾ ಕುಟ್ಮಾಂತ್ ತಸಲೆಂ ಏಕ್ ವಾತಾವರಣ್ ಆಸ್‌ಲ್ಲಿ ಸಂಗತ್‌ಚ್ ಕಾರಾಣ್. ತಿಣೆಂ ಪೆಟಯಿಲ್ಲಿ ವಾತ್, ಹೆರ್ ಸಭಾರ್ ವಾತಿ ಪೆಟಂವ್ಕ್ ಪಾವೊಂ ಮ್ಹಣ್ ಮಾಗ್ತಾಂ.
♦ ಸುನಂದ್
1 comment
ಮ್ಹಜ್ಯಾ ಕಾಳ್ಜಾಕ್ ಸುಶೆಗ್ ಮೆಳ್ಳೊ.
ಆವಯ್ ಸರ್‌ಲ್ಲ್ಯಾ ಹ್ಯಾ ಸಂದರ್ಭಾರ್ ಮ್ಹಜಿಂ ಭೊಗ್ಣಾಂ ಜಾಣಾ ಜಾಲ್ಲ್ಯಾ ಆನಿ ತ್ಯಾ ಮಾರಿಫಾತ್ ಏಕ್ ಲೇಖನ್ ಮ್ಹಣಾನಾ ಹಾಂವ್, ಏಕ್ ಉತ್ರಾಂ ನಮಾನ್ ಪಾಟಯಿಲ್ಕ್ಯಾ ಸುನಂದ್ ಸರ್ ತುಮ್ಕಾಂ ಹಾಂವ್ ಅಭಾರಿ. ತುಮಿಂ ಹ್ಯಾ ಮಾರಿಫಾತ್ ಏಕ್ ಭುಜವಣ್ ಮ್ಹಾಕಾ ಪಾಟಯ್ಲ್ಯಾ. ತುಮ್ಕಾಂ ದೇವ್ ಬರೆಂ ಕರುಂ. ಪಯ್ಲೆಂ ಎಚ್ಚೆಮ್, ಉಪ್ರಾಂತ್ ತುಮಿಂ, ಮ್ಹಾಕಾ ದಿಸ್ತಾ ಸಾಹಿತ್ಯಾಕ್ ಕಾಳ್ಜಾ ಭಿತರ್ ರಿಗೊನ್ ಭಾಯ್ರ್ ಘಾಲ್ಚಿ ವಿಶೇಸ್ ತಾಂಕ್ ತುಮ್ಕಾಂ ಆಸಾ.
ಆಮಿ ಪಯ್ಸ್ ಆಸಾಂವ್ ಖರೆಂ, ಪೂಣ್ ಹ್ಯಾ ತುಮ್ಚ್ಯಾ ಭೊಗ್ಣಾದ್ವಾರಿಂ ಮ್ಹಾಕಾ ತುಮಿ ಆಪಡ್ಲೆಂ ತಶೆಂ ಭೊಗ್ಲೆಂ.
ಮ್ಹಾಕಾ ಇತ್ಲ್ಯಾ ಲಾಗ್ಶಿಲ್ಯಾನ್ ಒಳ್ಕಲ್ಲ್ಯಾ ತುಮ್ಕಾಂ ಕೆದಿಂಚ್ ವಿಸ್ರೊಂಚೊಂ ನಾಂ.