“ಸತಾಟ್ ಮಹಿನ್ಯಾಂ ಥಾವ್ನ್ ಕಾಂಯ್‍ಚ್ ಬರಯ್ನಾಂಯ್. ಗಜಾಲ್ ಕಿತೆಂ?” ವಿಚಾರಿ ಯೆಜ್ಮಾನ್, “ದೀಸ್ ಭೊರ್ ವಾಚುನ್ ಬಸ್ತಾಯ್ ವ ಯೂ-ಟ್ಯೂಬ್ ವೀಡಿಯೊ ಪಳೆತಾಯ್”
“ಬರೆ ರುಚಿಕ್, ಮಾರ್ಮಿಕ್, ಸಣ್ಸಣಿತ್ ಆನಿಂ ಚಮಕ್‍ದಾರ್ ವಿಷಯ್ ಮೆಳಾಜೆ ನೇ? ಇತ್ಲೆ ವಿಷಯ್ ಮತಿಂತ್ ಘುಂವ್ತಾತ್-ಗೀ ವಿಂಚೊಣ್ ಜಾಯ್ನಾ. ತುಂಚ್ ಸಲಹಾ ದೀ ಪಳೆಯಾ”. ಹೆಂ ಮ್ಹಜೆಂ ನೀಬ್ ಮ್ಹಣ್ ಹಾಂವ್-ಯೀ ಜಾಣಾಂ, ತೀಯೀ ಜಾಣಾಂ.
” ಒಟ್ಟುಕ್ ತುಕಾ ನೀಬಾಕ್ ಏಕ್ ನಿವ್ಣೆಂ ಜಾಯ್ ನೇ? ಆಳ್ಸಾಯ್ ಮ್ಹಣಾಂನಾಂಯ್ ಕಿತ್ಯಾಕ್? ಕಾರಣಾಂ ಸೊದ್ಚಿಂ ಸೊಡ್. ಬರಂವ್ಕ್ ಸುರು ಕರ್. ಅರಿಸ್ಟೊಟಲಾನ್ ಸಾಂಗ್ಲಾಂ: well begun is half done! ಪ್ರೇತನ್ ಕರ್. ಆನಿಂ ವಿಷಯ್? ಟ್ರಂಪ್ ಆಸಾ, ಮೋದಿ ಆಸಾ, ಪುತಿನ್ ಆಸಾ, ಜೆಲೆನ್ಸ್ಕಿ ಆಸಾ, ಷಿ ಆಸಾ. ವಯ್ಲ್ಯಾನ್, ಧಾ ಬಾರಾ ಝುಜಾಂ ಚಲ್ತಾತ್: ಗಾಜಾ-ಇಸ್ರೇಲ್, ಯುಕ್ರೇನ್-ರಶಿಯಾ, ಇಂಡಿಯಾ-ಪಾಕಿಸ್ತಾನ್, ಪಾಕಿಸ್ತಾನ್-ಅಫ್ಘಾನಿಸ್ತಾನ್, ತಾಯ್ಲೆಂಡ್-ಕೆಂಬೋಡಿಯಾ ಇತ್ಯಾದಿ. ಸಗ್ಳಿ ಪಟ್ಟಿ ಟ್ರಂಪಾಕಡೆಂ ಆಸಾ. ಬಾಂಗರ್-ರುಪ್ಯಾಚಿಂ ಮೋಲಾಂ ಆಕಾಸಾಕ್ ತೆಂಕ್ಲ್ಯಾಂತ್. ಆಮ್ಚೊ ಶೇರ್ ಬಾಜರ್ ತಾಪ್ಲೆಲೆ ಕಾಯ್ಲಿ ಪರಿಂ ಹುನುನ್ ಜಾಲಾ ನೇ? ಕ್ರಿಪ್ಟೊ ವಿಷಿಂ ಸಾಂಗ್ಚ್ಯೆಂಚ್ ನಾಕಾ.”
“ಬಾಂಗಾರಾಚ್ಯಾ ಮೋಲಾ ವಿಷಿಂ ಬರವ್ಯೆತೆಂ. ಪೂಣ್, ಮಾಲ್ಗಡೊ ಸಾಹಿತಿ ಆನಿಂ ಮ್ಹಜೊ ಆಪ್ತ್ ಮಿತ್ರ್ ಜ್ಯೋ ಕ್ವಾಡ್ರಸಾನ್ ತ್ಯಾ ವಿಷಿಂ ಏಕ್ ಮಾರ್ಮಿಕ್ ಚುಟುಕ್ ಬರಯ್ಲಾಂ. ತಾಚ್ಯಾ ವಾಟ್ಸಪ್ ಗ್ರುಪಾಂತ್ ಪರ್ಗಟ್ಲಾಂ. ತಾಚಿ ವಿನೋದಿ ಸ್ಟಾಯ್ಲ್ ಕೊಪಿ ಕರ್ಚಿ ಶ್ಯಾಥಿ ನಾಂ ಮ್ಹಾಕಾ.”
“ಜೊಕ್ವಾಚೊ ಕಸ್ಲೊ ವಿನೋದ್? ಮ್ಹಕಾಯೀ ಅಯ್ಕೊಂಕ್ ಜಾಯ್. ಸಾಂಗ್”.
“ಆಯ್ಕ್:
‘ಬಾಂಗಾರಾಚಿ ರೇಟ್ ಆಕಾಸಾಕ್ ಚಡ್ಲ್ಯಾ
ಮ್ಹಜಿ ಲೆಂಡಿ ಗುಡ್ಗುಡೊಂಕ್ ಲಾಗ್ಲ್ಯಾ!
ಭಾಯ್ರ್ ವೆತಾನಾ ಮಾಸ್ಕ್ ವಾಪ್ರುಂಕ್ ಲಾಗ್ಲಾಂ
ಅಪಾಯ್ ಆಡಾಂವ್ಕ್ ಬಾಂಗ್ರಾ ದಾಂತ್ ಲಿಪಯ್ಜೆ ಪಡ್ಲಾಂ!’
***
“ಚುಟುಕಾಂ ಬರಂವ್ಚಿ ಶ್ಯಾಥಿ ತುಕಾ ನಾಂ, ಓ.ಕೆ. ಮಾಂದ್ತಾಂ. ಪೂಣ್, essays ಬರಯ್ತಾಯ್ ನೇ? ಕಿತೆಂ ಮ್ಹಣ್ತಾತ್? ಹಾಂ! ವಿಶ್ಲೇಶಣ್. ಬೊಲ್ಮೆಂ ಲೆಗುನ್ ಸಾಂಗ್ತಾಯ್! ಬಾಂಗಾರ್-ರುಪೆಂ buy, sell or hold ಸಾಂಗ್ ಪಳೆಯಾಂ”.
“ಹ್ಯಾ ಮಾರ್ಚ್ ಮಹಿನ್ಯಾಂತ್, ಪಾಪಾ ಫ್ರಾನ್ಸಿಸ್ ನಿಮೋನಿಯಾ ಪಿಡೆ ವರ್ವಿಂ ಅಸ್ಪತ್ರೆಚ್ಯಾ ಖಟ್ಲ್ಯಾರ್ ವಳ್ವಳೊನ್ ಆಪ್ಲೆ ನಿಮಾಣೆಂ ದೀಸ್ ಮೆಜುನ್ ಆಸ್ತಾನಾಂ, ‘ಪಾಪಾ ಫ್ರಾನ್ಸಿಸಾಚೊ ಉತ್ತರಾಧಿಕಾರಿ ಕೋಣ್?’ ಮ್ಹಣ್ ಮ್ಹಜೆಂ ವಿಶ್ಲೇಶಣ್ ಪರ್ಗಟ್ಲೆಲೆಂ ಉಡಾಸ್ ಆಸಾ ನೇ? ತಾಚ್ಯಾ ಪಯ್ಲೆಂ ಫೆಬ್ರೆರಾಂತ್, ಯುಕ್ರೆನಾಚೊ ಜೆಲೆನ್ಸ್ಕಿಓವಲ್ ಒಫಿಸಾಂತ್ ಟ್ರಂಪಾಕ್ ಮೆಳೊಂಕ್ ಗೆಲ್ಲೊ. ತ್ಯೆ ಅಧಿಕ್ರತ್ ಭೆಟೆವೆಳಿಂ ಜಾಲ್ಲೊ ಘೊಟಾಳೊ ಆನಿಂ ಜಗ್ಡಿಂ ವಿವರುನ್ “ಅಡ್ಕಳಿ ಟ್ರಂಪ್ ಆನಿಂ ಝುಜಾರಿ ಜೆಲೆನ್ಸ್ಕಿ: ದೋಗ್ ವಿಸಂಗತ್ ಸರ್ವಾಧಿಕಾರಿ” ಮ್ಹಳ್ಳೊ ಪ್ರಬಂಧ್ ಪರ್ಗಟ್ಲೊಲೊ. ಆಖ್ರೇಕ್, ಮ್ಹಜಿ punchline ಅಭಿಪ್ರಾಯ್: ಜೆಲೆನ್ಸ್ಕಿಚ್ಯೆ ದೀಸ್ ಭರ್ಲ್ಯಾತ್! ಮ್ಹಜ್ಯೆಂ ಬೊಲ್ಮೆಂ ದೋನ್-ಯೀ ಪಾವ್ಟಿ ಪೇಯ್ಲ್. “
“ತಾರಾಕ್ ಮೆಹ್ತಾ ಕಾ ಉಳ್ಟಾ ಚಸ್ಮಾ ಸೀರಿಯಲಾಚ್ಯಾ ಫಾಮಾದ್ ಡಯಲೊಗಾ ಪ್ರಮಾಣೆಂ, ‘बडे सयाने बॊल्के गयेँ हेँ; We cannot predict the future. But, we can invent it!’ ಕೋಣಿ-ಯೀ ಭವಿಷ್ಯವಾಣಿ ಕರುಂಕ್ ಸಕಾನಾಂತ್. ಪೂಣ್, ಫುಡಾರ್ ನಿರ್ಮುಂಕ್ ಸಕ್ತಾಂವ್. ಮ್ಹಜಿ ಸಲಹಾ ತುಕಾ: ಬೊಲ್ಮೆ ಸಾಂಗ್ಚಿ ಚೂಕ್ ಕರಿನಾಕಾ. ಫುಡಾರ್ ಕಸೊ ಆಸಾಜೆ ಮ್ಹಣ್ ಏಕ್ ಆರ್ಸೊ ದಾಕಯ್.”
ಯೆಜ್ಮಾನ್ ಮ್ಹಜಿ ಜಾಣ್ವಾಯೆಚೊ ಖಜಾನೊ ಕಶಿ ಜಾಲಿಗಾಯ್? ಏಕ್ಯೆ ವಾಟೆನ್ ಪಾತ್ಯೆಂವ್ಕ್ ಜಾಲೆಂ ನಾಂ. ಆನ್ಯೆಕ್ಯೆ ವಾಟೆನ್ ತಿಚ್ಯೆರ್ ಅಭಿಮಾನ್ ಭಗ್ಲೊ. ಆಜ್-ಕಾಲ್ ತಿಚ್ಯೆಂ multi-tasking ಮೊಳ್ಬಾಕ್ ತೆಂಕ್ಲಾಂ; ಬಾಂಗಾರಾಚ್ಯೆ ರೇಟಿ ಪರಿಂ. ಟಿವಿರ್ ಖಾನಾ ಖಜಾನಾ, ಐಪೇಡಾರ್ trending news ಆನಿಂ ಫೊನಾರ್ Facebook feed. ಸಾಂಗಾತಚ್, ಕುಜ್ನಾಂತ್ ಗ್ಯೇಸ್ ಸ್ಟವಾರ್ ನಿಸ್ತೆಂ ಶಿಜೊಂಕ್ ದವರ್ತಾ ಸಯ್ತ್. ಜೆದ್ನಾಂ ನಿಸ್ತೆಂ ಕರ್ಪಾಲೆಂ, ಜವಾಬ್ದಾರ್ ಹಾಂವ್ . ಕಿತ್ಯಾಕ್, ತಿಕಾ ಕೇವಲ್ ದೋನ್ ಹಾತ್ ಆಸಾತ್. ಆನಿಂ ಹಾಂವ್ ಬಿಲ್ಕುಲ್ “ನಲ್ಲಾ”, ಬೆಕಾರ್; ಮ್ಹಾಕಾ ಕಸ್ಸಲೆಂ ಕಾಮ್ ನಾಂ!
“ಆಯ್ಕ್. ಕುಜ್ನಾಂತ್ ಕಿತೆಂ-ಗೀ ಕರ್ಪಲಾಂ, ತಾಚೊ ವಾಸ್ ಯೇತಾ. ಪಳೆ” ಮದಾಮೆಕ್ ಕುಜ್ನಾಕ್ ಧಾಡ್ನ್, ಹಾಂವ್ ಚಿಂತುಂಕ್ ಪಡ್ಲೊಂ. ಜೊಕ್ತೊ ವಿಷಯ್ ದಾಕಯ್ ದೇವಾ, ಮತಿಂತ್‍ಚ್ ಮಾಗ್ಣೆಂ ಕೆಲೆಂ!
***
“ಒಪರೆಶನ್ ಸಿಂದೂರ್ ವಿಷಿಂ ತುಂ ಕಿತ್ಯಾಕ್ ವಿಶ್ಲೇಶಣ್ ಬರಯ್ನಾಂಯ್? ಲಾಂಬ್-ರೂಂದ್ ವಾದ್ ವಿವಾದ್ ಚಲ್ಲಾ ನೇ? ” ಕರ್ಪಾಲ್ಲೆಂ ನಿಸ್ತೆಂ ಭುಂಯ್ ದವರ್ನ್, ಕುಜ್ನಾಂತ್ ಥಾವ್ನ್ ಯೆಜ್ಮಾನ್ ಪಾಟಿಂ ಆಯ್ಲಿ.
” ಒಪರೆಶನ್ ಸಿಂದೂರ್ ಫಕ್ತ್ ಏಕ್ ದಾಖವ್ಪ್; optics ಮಾತ್ರ್. ಪಾಕಿಸ್ತಾನಾಚ್ಯೆಂ ಕಮರ್ ಮೊಡ್ಲೆಂ ಮ್ಹಣ್ ಪ್ರಚ್ಯಾರ್ ಕರ್ಪಾಕ್. अभि बी, मॊदि हे तो मुम्किन हे! ಉಳ್ಟೊ ಮಾರ್ ಪಡ್ಲಾ ಮ್ಹಣ್ತಲೆ ದೇಶ್-ದ್ರೋಹಿ. ಆನಿಂ, ಟ್ರಂಪಾಚೊ ದಾವೊ? ’ಆಪ್ಣೆಂ ವ್ಯಾಪಾರ್ ಸುಂಕ್ (trade tariff) ಹಾತೆರ್ ವಾಪರ್ಲೆಂ. 200% ಟಾರಿಫ್ಫ್ ಲಾಗು ಕರ್ತಾಂ ಮ್ಹಣ್ ಭೆಸ್ಟಾಯ್ಲೆಂ. ಚವೀಸ್ ವರಾಂ ಭಿತರ್ ಮೋದಿನ್ ಝುಜಾ-ವಿರಾಮಾಕ್ ಕಬ್ಲಾತ್ ದಿಲಿ’ ಕೊಣ್ ಫಟ್ ಮಾರ್ತಾ? ಮೋದಿ-ಗೀ ಟ್ರಂಪ್?”
“ಹಾಂವ್ ಆಮ್ಚ್ಯಾ ಸರ್ಕಾರಾಚ್ಯೆಂ ಸಾಂಗ್ಣೆಂಚ್ ಮಾಂದ್ತಾಂ. ಟ್ರಂಪಾಕ್ ಕಿತ್ಯಾಕ್ ಪಾತ್ಯೆಜೆ? ತೊ ನೋಬೆಲ್ ಶಾಂತಿ ಪುರಸ್ಕಾರಾ ಖಾತಿರ್ ತೊಂಡಾಕ್ ಆಯಿಲ್ಲೆಂ ವೊಂಕ್ತಾ.”
“ಅಸುಂ. ಹೊ ವಿಷಯ್ ಪರ್ನೊ ಜಾಲಾ ಆತಾಂ. ನಿವ್ಲೆಲಿ ಪೇಜ್ ಕೊಣಾಕ್ ರುಚ್ತಾ?” ನಿಸ್ರೊನ್ ಕಾಡುಂಕ್ ಹಾಂವೆಂ ಪ್ರೇತನ್ ಕೆಲೆಂ.
“ಬಿಹಾರ್ ಚುನಾವ್ ಮಾತ್ಯಾರ್ ಆಸಾತ್. ಯೆದೊಳ್-ಚ್, ಜಬರ್-ದಸ್ತ್ ಪ್ರಚ್ಯಾರ್ ಚಾಲು ಆಸಾತ್. ಚ್ಯಾರ್-ಪಾಂಚ್ ದೀಸಾಂ ಪಯ್ಲೆಂ ಮೋದಿನ್ ಆಪ್ಲಿ ರೇಲಿ ಸಮಸ್ತಿಪುರ್ ಜಿಲ್ಲ್ಯಾಂತ್ ಕೆಲ್ಯಾ. ಪಹಲ್ಗಾಮ್ ಆತಂಕ್-ವಾದಿ ಹಲ್ಲೊ ವಿಸ್ರೊನ್ ವಚೊಂಕ್ ನಾಂ. ಒಪರೆಶನ್ ಸಿಂದೂರ್ ಜೊಕ್ತೊ ಚುನಾವಿ ಮುದ್ದೊ ಮ್ಹಣ್ತಾಂ ಹಾಂವ್.”
“ಹಾಂ. ಬಿಹಾರ್ ಚುನಾವ್ ಹುನುನ್ headlines news. ರೀಲ್ಸ್ ಆನಿಂ ತರ್ಕಾಂಚ್ಯೆ ವೀಡಿಯೊ ಸೊಶಿಯಲ್ ಮೀಡಿಯಾಚ್ಯೆರ್ ನಾಚ್ತಾತ್. ದೋನ್-ತೀನ್ ಹಫ್ತ್ಯಾಂ ಥಾವ್ನ್ ಯೂ-ಟ್ಯುಬಾರ್ ಇತ್ಲೆ ವೀಡಿಯೊ ಹಾಂವೆಂ ಪಳೆಲ್ಯಾತ್; ರೆಕೊರ್ಡ್ ಮ್ಹಣ್ಯೆತ್!”
“ಏಕ್ ಪಾವ್ಟಿಂ ಪುಣಿ ಕಾನ್ ದಿಲೆಯ್ ನೇ? ಆಪ್ರೂಪಾನ್ ತರ್-ಯೀ. दॆर आये, दुरुस्त आयॆ. ದೇವ್ ಬರೆಂ ಕರುಂ.” ತಿಚ್ಯಾ ಉತ್ರಾಂನಿಂ ವ್ಯಂಗ್ ಉಠೊನ್ ದಿಸ್ಲೆಂ ಪುಣ್ ಹಾಂವೆಂ ಗಣ್ಣೆಂ ಕೆಲೆಂನಾಂ. ” ಮ್ಹಜೊ ವೋಟ್ ಬಾಜಪಾ-ಮುಕೆಲ್-ಪಣಾಚ್ಯಾ NDA ಘಟ್‍ಬಂಧನಾಕ್. ರಾಜದಾ-ಮುಕೆಲ್-ಪಣಾಚ್ಯಾ ಮಹಾ-ಘಟ್‍ಬಂಧನಾಕ್ ಪಡ್ಲಲೊ ವೋಟ್ ‘ಜಂಗಲ್ ರಾಜ್’ ಪರತ್ ಜಿವಾಳ್ ಕರುಂಕ್ ಶಿವಾಯ್ ವಿಕಾಸಾ ಖಾತಿರ್ ನಹಿಂ. ಬಿಹಾರಾಚೊ ಲೋಕ್ ವಿಕಾಸ್ ಆಶೆತಾ. NDA ಸರ್ಕಾರ್ ಮ್ಹಣ್ಜೆ ಮೋದಿಚ್ಯೆಂ ಡಬಲ್ ಇಂಜಿನ್. ಬಿಹಾರ್ ವಿಕಾಸಾಚಿ ಗತಿ ಫಾಸ್ಟ್ ಜಾತಾಗೀ ನಾಂ ಪಳೆ!”
“ಬಾಜಪ್-ಜೆಡಿಯು NDA ಆನಿಂ ರಾಜದಾ-ಕೊಂಗ್ರೆಸ್ Mahaghathbandhan ಹ್ಯಾ ದೋನಿ ಚೋರ್ ದಳಾಂಕ್ ಬಿಹಾರ್ ಜಣಾಂನಿಂ ಜಿಕಯ್ಲಾಂ. ದೋನ್ ತೀನ್ ಶತಕಾಂ ಥಾವ್ನ್ ತಾಂಚ್ಯೆ ಆಡಳ್ತೆಂ ಸೊಸ್ಲಾಂ. ವೀಸ್ ವರ್ಸಾಂಚ್ಯೆ ರೆಕೊರ್ಡ್ ಆವ್ಧೆಕ್ ಮುಕೆಲ್ ಮಂತ್ರಿ ತೋಚ್: ನಿತಿಶ್ ಕುಮಾರ್. ಸಾರ್ಕೆಂ ಸಾಂಗ್ಚ್ಯೆಂ ತರ್ ‘ಪಳ್ಟಿ ಕುಮಾರ್’. ತೊ ಕೆದ್ನಾಂ NDA, ಆನಿಂ ಕೆದ್ನಾಂ Mahaghathbandhan. ಹೊ ‘ಕುರ್ಸಿ ಕುಮಾರ್’ ವೆಗಿಂಚ್ 75 ವರ್ಸಾಂಚೊ ಮಾತಾರೊ ಜಾತಾ. ತೊ ಮೋದಿಚಿ ಬಾವ್ಲಿ ಜಾಯ್ತ್. ಆದ್ಲೊ ‘ಸುಶಾಸನ್ ಬಾಬು’ ನಹಿಂ.”
ಮ್ಹಜಿ ಅಭಿಪ್ರಾಯ್ ನೆಗಟಿವ್ ಮ್ಹಣ್ ಯೆಜ್ಮಾನಿಕ್ ಭೊಗ್ಲೆಂ. “ವೋಟ್ ಕೊಣಾಕ್ ದೀಜೆ ಮ್ಹಣ್ ಸಾಂಗ್. ಬಿಹಾರ್ ಮತದಾರಾಕ್ ಪರ್ಯಾಯ್ ಖೈಂ ಆಸಾ? NDA ವ Mahaghathbandhan ಶಿವಾಯ್? “
“ಚರಿತ್ರೆಂತ್ ದಾಕ್ಲೆ ಆಸಾತ್. 2013 ಇಸ್ವೆ ಪೈಲೆಂ, ದಿಲ್ಲಿ ರಾಜಧಾನಿ ಅಸೆಂಬ್ಲಿ ಮತದಾರಾಂಕ್ ದೋನ್ ಮಾತ್ರ್ ಪರ್ಯಾಯ್ (options) ಆಸ್ಲೆ: ಕೊಂಗ್ರೆಸ್ ವ ಬಾಜಪಾ. ತವಳ್, ತಿಸ್ರಿ ಪಾಡ್ತ್ ಜನ್ಮಾಲಿ: ಆಮ್ ಆದ್ಮಿ ಪಾರ್ಟಿ. ತಶೆಂ, ಬಿಹಾರ್ ರಾಜ್ಯಾಂತ್ ಜನ್ ಸುರಾಜ್ ಪಾಡ್ತ್ ಜನ್ಮಲ್ಯಾ. ದೆಕುನ್ ಆತಾಂ ತಿಸ್ರೊ ಪರ್ಯಾಯ್ ಆಸಾ. ತೀನ್ ವರ್ಸಾಂ ಬಿಹಾರ್ ಗಾಂವ್ ಗಾಂವಾಂನಿಂ ಪಾಯ್-ವಾಟೆನ್ ಚಲೊನ್, ಲೋಕಾಚಿ ಗತ್ ಪಳೆವ್ನ್, ತಾಂಚ್ಯೆ ಕಡೆಂ ಸಂವಾದ್ ಚಲವ್ನ್, ಪ್ರಶಾಂತ್ ಕಿಶೋರ್ ಆನಿಂ ತಾಚ್ಯೆ ಶಿಬಂಧಿನ್ ವರ್ಸಾ ಪಯ್ಲೆಂ ಹಿ ಪಾಡ್ತ್ ಘಡ್ಲಿ. ಹೆಂ ಭೂಮೂಳ್ ಆಂದೋಲನ್ ಬಿಹಾರ್ ರಾಜ್ಯಾಚ್ಯಾ ಸಾಮಾನ್ಯ್ ಅನಿಂ ಆಮ್ ಲೋಕಾಚ್ಯಾ ಕಾಳ್ಜಾಂತ್ ರೊಂಬ್ಲಾಂ. ದೆಕುನ್ ಹುಮೆದಿಚ್ಯೆಂ ಏಕ್ ಕೀರ್ಣ್ ಉದೆಲಾಂ. ಏಕ್ ಭರ್ವಾಸೊ ಆಸಾ; voter will take a quantum leap of faith.” ಹಾಂವ್ ಬಿಲ್ಕುಲ್ ನಕಾರಾತ್ಮಕ್ ನಹಿಂ ಬಗಾರ್ ಅಜ್ಯಾಪಾಂನಿಂ ಪಾತ್ಯೆಂವ್ಚೊ ಸಕಾರಾತ್ಮಕ್ ಮಾನಾಯ್!
“ಆಮ್ ಆದ್ಮಿ ಪಾಡ್ತ್ ಸ್ಥಾಪನ್ ಜಾಲ್ಲ್ಯಾ ದಿಸಾ ಥಾವ್ನ್, ಅರವಿಂದ್ ಕೇಜ್ರಿವಾಲ್ ತುಜೊ ಪಾತ್ರೊನ್ ಸಾಂತ್ ಜಾಲ್ಲೊ. ಆಪ್, ಜನ್ ಲೋಕ್‍ಪಾಲ್, ದಿಲ್ಲಿಂತ್ ಆಪ್ ಸರ್ಕಾರಾಚಿಂ ಧೊರಣಾಂ ಆನಿಂ ದಿಲ್ಲಿ ಬಜೆಟ್ ಅಸಲ್ಯಾಂ ವಿಷಯಾಂ ವಯ್ರ್ ಡಜನಾಂಕ್ ಮಿಕ್ವೊನ್ ತುಜಿಂ ಲೇಕನಾಂ ಪರ್ಗಟ್ಲ್ಯಾಂತ್. ಹಾಂವೆಂ ವಾಚ್ಲ್ಯಾಂತ್. ಭ್ರಸ್ಟಾಚಾರಾ ವಿರುದ್ಧ್ ಚಲಯಿಲ್ಲ್ಯಾ India Against Corruption ಭೂಮೂಳ್ ಆಂದೋಲನಾ ಥಾವ್ನ್ ಜನ್ಮಾಲ್ಲಿ ಆಮ್ ಆದ್ಮಿ ಪಾಡ್ತ್ ಸಯ್ತ್ ಭ್ರಸ್ಟಾಚಾರ್ ಆನಿಂ ಪಟ್ಟಿಂಗ್‍ಪಣಾಚ್ಯಾ ಆರೋಪಾಂನಿಂ ಶಿರ್ಕಾರ್ಲಿ ನೇ? ಆಯ್ಲೆವಾರ್ ಆಪ್ ದಿಲ್ಲಿ ಚುನಾವ್ ಹಾರ್ಲ್ಯಾ. ದಿಲ್ಲಿಂತ್ ಬಾಜಪಾಚೊ ಸರ್ಕಾರ್ ಆಸಾ. ಮೋದಿಚ್ಯೆಂ ‘ಡಬಲ್ ಇಂಜಿನ್ ಸರ್ಕಾರ್ ಮೊಡೆಲ್’ ಅಪೂರ್ಬಾಯೆಚಿಂ ಯೋಜನಾಂ ಜ್ಯಾರಿ ಕರಿತ್ತ್ ಆಸಾ.”
“ಏಕ್ ಚುನಾವ್ ಹಾರ್ಲಿ ಮ್ಹಣ್ತಚ್ ಆಪ್ ನಪಂಯ್ಚ್ ಜಾವ್ನಾ. ಪ್ರಜಾತಂತ್ರಾಂತ್ ಪರ್ಯಾಯ್ ಆನಿಂ ನಿವಡ್ (choice) ಗರ್ಜೆಚಿಂ. ಬಿಹಾರ್ ರಾಜ್ಯಾಂತ್ ದ್ವಿಕೋಣ್ (duopoly) ರಾಜಕಾರಣ್ ಚಲ್ಲಾಂ. ಬಾಜಪಾಚ್ಯಾ ಕೋಮುವಾದ್ ಭ್ಯಾಂಯಾನ್ ಮುಸ್ಲಿಮ್ ಆನಿಂ ಸೆಕುಲರ್ ಮತದಾರ್ ಮಹಾಘಠ್‍ಬಂಧನಾಕ್ ವೋಟ್ ದಿತಾತ್. ರಾಜದಾಚ್ಯಾ ‘ಬಾಹುಬಲಿ ಜಂಗಲ್ ರಾಜ್’ ಭ್ಯಾಂಯಾನ್ ಹೆರ್ ಸರ್ವ್ NDAಕ್ ವೋಟ್ ದಿತಾತ್. ಬಿಹಾರ್ ಆಮ್ಚೊ ಭಾರಿಚ್ ದುಬ್ಳೊ ರಾಜ್ಯ್. ಆಂಕ್ಡೆ ದಾಕಯ್ತಾತ್ ತ್ಯಾ ಪ್ರಾಸ್ ಚಡ್ ದುಬ್ಳಿಕಾಯ್ ಆಸಾ ಬಿಹಾರಿ ಹಳ್ಳೆಂನಿಂ. ಹಾಂಚಿಂ ಸಮಸ್ಸಿಂ ದ್ವಿಕೋಣ್ ರಾಜಕಾರಣ್ ಉಲಯ್ನಾಂ.”
“ಯೆದೊಳ್ ಪರ್ಗಟ್ಲೆಲ್ಯಾಂ ಸಮೀಕ್ಶೆಂ ಪ್ರಮಾಣೆಂ, ತೇಜಸ್ವಿ ಯಾದವ್ ಮುಕೆಲ್-ಮಂತ್ರಿ ಪದ್ವೆಕ್ ಅಧಿಕ್ ದಾವೆದಾರ್ ಆನಿಂ ಲೋಕ್-ಪ್ರಿಯ್. ಪ್ರಶಾಂತ್ ಕಿಶೋರ್ ತಿಸ್ರ್ಯಾ ಸ್ತಾನಾರ್ ಆಸಾ. ವಯ್ಲ್ಯಾನ್ ತೊ ಖುದ್ದ್ ಚುನಾವ್ ಝುಜಾನಾಂ. ಮ್ಹಕಾ ಭೊಗನಾಂ ತಾಚೊ ವೇಳ್ ಆಯ್ಲಾ. ಹೊ ಚುನಾವ್ ಜಿಕಾಜೆಚ್ ಮ್ಹಣ್ ಮೋದಿನ್ ಸೊಫುತ್ ಕೆಲಾ. ರೇಲಿ ಪಾಟ್ಲ್ಯಾನ್ ರೇಲಿ ಕರ್ತಾ. ಅಭಿವ್ರದ್ದೆಚಿಂ ಯೋಜನಾಂ ಮಂಜೂರ್ ಕರ್ತಾ. ರೆವ್ಡಿ (freebies) ವಾಂಟ್ತಾ. ಹರ್ಯೆಕ್ ಸ್ತ್ರೀಯೆಕ್ ಧಾ ಹಜಾರ್ ರುಪಯ್ ಗ್ರಾಂಟ್ ದಿಲಾಂ. ನವೆಂಬ್ರ್ 14 ತಾರಿಕ್ ಯೇಂವ್ದಿ. ಪರತ್ NDA ಸರ್ಕಾರ್ ಸೊಫುತ್ ಘೆತಲೊ.” ಬೊಲ್ಮೆಂ ಸಾಂಗ್ಲೆಂ ಯೆಜ್ಮಾನಿನ್.
“ಅತಾಂ ತುಂ ಬೊಲ್ಮೆಂ ಸಾಂಗ್ತಾಯ್. psephologists ಆಂಕ್ಡೆ ಜಮಯ್ತಾತ್. ಆಂಕ್ಡೆವಾರಿ ಅಂದಾಜ್ (statistical projections) ಲಾಯ್ತಾತ್. ತುಜ್ಯಾ ಬೊಲ್ಮ್ಯಾಂತ್ ಮಾತ್ರ್ ಮ್ಹಕಾ ಪಕ್ಶ್-ಪಾತ್ ದಿಸ್ತಾ.” ಮುಕಾರುನ್ ಹಾಂವೆಂ ಮ್ಹಳೆಂ: “ಆಜ್-ಕಾಲ್ Gen-Z ಯುವಕ್/ಯುವಕಿ ರಸ್ತ್ಯಾರ್ ದೆಂವ್ಲ್ಯಾಂತ್. ಕ್ರಾಂತಿಚ್ಯೆಂ ಲ್ಹಾರ್ ನಹಿಂ ಸುನಾಮಿ ಉಠ್ತಾಲಿ ಖಂಡಿತ್. ಅಮ್ಚ್ಯಾ ವಠಾತಾಂತ್ ಶ್ರೀ ಲಂಕಾ, ಬಂಗ್ಲಾದೇಸ್, ನೇಪಾಲ್, ಮಡಗಾಸ್ಕರ್ ಇತ್ಯಾದಿ ದೇಶಾಂನಿಂ ಯುವ-ಕ್ರಾಂತಿ ವರ್ವಿಂ ಸರ್ಕಾರ್ ಪಡ್ಲ್ಯಾತ್! ಬಿಹಾರಾಂತ್ ಹೆ ನವೆ ಮತದಾರ್ ನೊವೊ ಫುಡಾರ್ ಘಡುಂದಿ”.
ತಿತ್ಲ್ಯಾರ್ ವರಾಂ ಸಾಂಜ್ಯೆಚಿಂ ಸಾಡೆ-ಆಟ್ ವಾಜ್ಲಿಂ. ತಿಚೊ ’ತುಮ್ ಸೆ ತುಮ್ ತಕ್’ ಹಿಂದಿ ಸೀರಿಯಲಾಚೊ ವೇಳ್ ಆಯ್ಲೊ. ಜಶೆಂ ರಾಜಕಾರಣಾಂತ್ ತಿ “ದಳ್ ಬದ್ಲು ಜಾವ್ನ್ ಮೋದಿ-ಭಕ್ತ್ ಜಾಲ್ಯಾ”, ತಶೆಂ ಟಿವಿ ಸೀರಿಯಲ್ ಲೆಗುನ್ ಬದ್ಲಿಲಾಂ. OUT ತಾರಕ್ ಮೆಹ್ತಾ ಕಾ ಉಳ್ಟಾ ಚಸ್ಮಾ, IN ‘ತುಮ್ ಸೆ ತುಮ್ ತಕ್’ . ಹ್ಯಾ ವಗ್ತಾ, ತಿಚ್ಯೆಂ ಸಕ್ಕಡ್ multi-tasking ಕೆನ್ಸಲ್ ಕೆನ್ಸಲ್ ಕೆನ್ಸಲ್!
■ ಫಿಲಿಫ್ ಮುದಾರ್ಥ
