ಕರಾವಳಿ ಕೊಂಕಣಿ ಲೊಕಾಂ ಮಧೆಂ ಯಶಸ್ವಿ ಉದ್ಯೊಜಕ್ ಆಪ್ಲ್ಯಾ ಕಮಾಯಿಚೊ ಎಕ್ ಭಾಗ ‘ತಳ್ಯಾ ಉದ್ದಾಕ ತಳ್ಯಾಕಚ ಘಾಲ್ಲೆಂ’ ಮ್ಹಣ್ಚೆ ವರಿ ಸಮಾಜ ಸೆವೆ ಖಾತೀರ ಪರತ ದಿವ್ಚ್ಯಾಕ ವಿಸ್ರನಾತ. ಹೆಂಚಿ ಭಾವ್ನೆಚೆಂ ದಾಖಲೊ, ಚಾರ್ಟರ್ಡ್ ಅಕೌಂಟಂಟ್ ಜಾವ್ಚ್ಯಾಕ ಇಚ್ಛ್ ಪಾವ್ಚೆಂ ಸಗ್ಳ್ಯಾಂಕ ಪಕ್ಷಪಾತ ಕರೀನಾಶಿ ಫುಕಟ್ ದಿವ್ಪಿ ಉತ್ತಮ ಪ್ರಶಿಕ್ಷಣ್ “ಸಿ. ಎ. ಪವರ್ – 25” ಅಶೆಂ ಸಾಂಗ್ಲೆ, ದಕ್ಷಿಣ ಕನ್ನಡ ಜಿಲ್ಲೆಚ್ಯಾ ಅತಿರೀಕ್ತ್ ಪೊಲಿಸ್ ಅಧೀಕ್ಷಕ- ಅನಿಲ ಕುಮಾರ ಭೂಮ್ರೆಡಿ ಹಾನಿಂ. ಪರಿಕ್ಷಣೆಚ್ಯಾ ಉದ್ಘಾಟನ ಸಂದರ್ಭಾರ ಮುಖೆಲ ಸೊಯ್ರೆ ಜಾವ್ನ ತಾನಿ ಅಶೆಂ ಅಭಿಪ್ರಾಯ ವ್ಯಕ್ತ್ ಕೆಲೆಂ. ಕೆಂದ್ರಾಚೆ ಅಧ್ಯಕ್ಷ ಸಿ. ಎ. ನಂದಗೋಪಾಲ ಶೆಣೈ ಹಾನಿ ದಿವೊ ಲಾವ್ನ್ ಪ್ರಶಿಕ್ಷಣಾಚೆಂ ಉಗ್ತಾವಣ ಕೆಲ್ಲೆಂ ಆನಿ ಸೊಯ್ರೆಂಗಲೆಂ ಸ್ವಾಗತ ಕರತಚಿ ಅಶಿಂ ಸಾಂಗ್ಲೆಂ ಕಿ ಸಿ.ಎ. ಗೊಪಾಲಕೃಷ್ಣ್ ಭಟ್ ಯಾಂಚ್ಯಾ ಮುಖೇಲಪಣಾರಿ “ತ್ರಿಶಾ” ಸಂಸ್ಥಾನ್ ಯೊಗ್ಯ್ ಸಂಸಾಧನ ವ್ಯಕ್ತಿ ಉಪಲಬ್ಧ ಕರುನ ಪೂರ್ಣ್ ಪ್ರೊತ್ಸಾಹಾನ ಆನಿ “ಯು.ಕೆ. & ಕಂಪೆನಿ ” ಸಂಸ್ಥೆಚ್ಯಾ ಸಿ.ಎ. ಉಲ್ಲಾಸ ಕಾಮತ ಹಾಂಚ್ಯಾ ಪೂರ್ಣ್ ಪ್ರಾಯೊಜನ ಮೆಳತ ಆಸ.
ಗೆಲ್ಯಾ ಸವ್ಯಾ ಪ್ರಶಿಕ್ಷಣಾಂತು ಸಿ.ಎ. ಇಂಟರ್- ಆನಿ ಸಿ.ಎ. ಅಂತಿಮ ಪರೀಕ್ಷಾಂತ ಉತ್ತೀರ್ಣ್ ಜಾಲ್ಲ್ಯಾಂಚೊ ಸತ್ಕಾರ ಸಮ್ಮಾನ ಮುಖೇಲ ಸೊಯರೆಂನಿ ಕೆಲ್ಲೊ. ಪ್ರಾಚಾರ್ಯ್ ಪ್ರಾ. ಮಂ‍ಜುನಾಥ ಕಾಮತ ಆನಿ ಪ್ರಾ. ಗೌರಿ ಕಾಮತ ಹಾಂನಿ ಪ್ರಶಿಕ್ಷಣಾ ಬದ್ದಲ ಆಪ್ಲೆ ವಿಚಾರ ವ್ಯಕ್ತ್ ಕೆಲೆ. ವಿಶ್ವ ಕೊಂಕಣಿ ಕೆಂದ್ರಾಚೆ ಉಪಾಧ್ಯಕ್ಷ ರಮೆಶ್ ಡಿ ನಾಯ್ಕ್ ಆನಿ ಮುಕೆಲ್ ಆಡಳ್ತ್ಯಾ ಅಧಿಕಾರಿ ಡೊ. ಬಿ. ದೇವದಾಸ ಪೈ ಉಪಸ್ಥಿತ ಆಶಿಲ್ಲೆ. ಶೆನೆಲ್ ಡಿ’ಸೊಜಾ ಕಾರ್ಯಕ್ರಮಾಚೆ ಸತ್ರ್ ಸಂಚಾಲನ ಕೆಲ್ಲೆಂ, ಆನಿ ಹರ್ಷಿತಾ ಶೆಣೈ ಪ್ರಾರ್ಥನಾ ಗೀತ್ ಗಾಯ್ಲೆ.
ಎಕ್ವಿಸ್ ದೀಸ್ ಚಾಲ್ಪಿ ಹೆ ವಿಶೇಷ ಪ್ರಶಿಕ್ಷಣಾಂತ ಭಾಯ್ಲೆ ರಾಜ್ಯಾಂತ್ಲ್ಯಾನ ನಿಮಂತ್ರಿತ ಆನಿ ಅನುಭವಿ ಪ್ರಶಿಕ್ಷಕ ಭಾಗ ಘೆವ್ನ್ ಪ್ರಶಿಕ್ಷಣ ದಿತಾಂಚಿ. ಹೆಂ ಉಗ್ತಾವಣ ಕಾರ್ಯಾವಳ ನವೆಂಬರ್ 7 ವೆರ್ ವಿಶ್ವ ಕೊಂಕ್ಣಿ ಕೆಂದ್ರಾಂತ ಚಲ್ಲೆಂ.
