“ಕೊಂಕ್ಣಿ ಭಾಶೆಚೊ ಪೋಸ್ ಆನಿ ಪ್ರಸಾರ್ ಕರ್ಚ್ಯಾಂತ್ ಮ್ಹಜೊ ವಾಂಟೊ ಫಕತ್ ಧಾ ಠಕ್ಕೆ ಮಾತ್. ನೊವೊದ್ ವಾಂಟ್ಯಾಚಿ ವಾಂವ್ಟ್ ಆನಿ ಮಿನತ್ ಬರಯ್ಣಾರಾಂಚಿಂ,ಕಲಾಕಾರಾಂಚಿಂ ಆನಿ ವಾಚ್ಪಿ ತಶೆಂ ಪ್ರೇಕ್ಶಕಾಂಚಿಂ” ಮ್ಹಣಾಲೊ ವಿಶನ್ ಕೊಂಕಣಿ ಸ್ಥಾಪಕ್ / ಪ್ರವರ್ತಕ್ ಮಾನೆಸ್ತ್ ಮೈಕಲ್ ಡಿ ಸೊಜಾ. ತೋ ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚ್ಯಾ ಎಲ್. ಸಿ. ಆರ್. ಐ. ಸಭಾಂಗ್ಣಾಂತ್ ಮಾ| ದೊ| ಆಲ್ವಿನ್ ಸೆರಾವೊ ಹಾಣಿ ಬರಯಿಲ್ಲ್ಯಾ ಚಿರಿ ನಾಟಕಾಚ್ಯಾ ಪ್ರಥಮ್ ಪರೋಗಾಕ್ ಚಾಲನ್ ದಿಂವ್ಚ್ಯಾ ಸುವಾಳ್ಯಾರ್ ದೇವ್ಸ್ತುತಿಚೊ ಪ್ರಾಧ್ಯಾಪಕ್ ಆನಿ ಜೆಪ್ಪು ಸಾಂ. ಜುಜೆ ಸೆಮಿನರಿಚೊ ಆದ್ಲೊ ರೆಕ್ಟರ್ ಮಾ| ದೊ| ರೊನಾಲ್ಡ್ ಸೆರಾವೊ ಹಾಣಿ ಬರಯಿಲ್ಲ್ಯಾ ಪಾಂಚ್ ಧಾರ್ಮಿಕ್ ನಾಟಕಾಂಚೊಂ ಪುಂಜೊ ಭಾವಾಡ್ತಾಚೆಂ ಜಯ್ತ್ ಲೊಕಾರ್ಪಣ್ ಕರುನ್ ಉಲಯ್ತಾಲೊ.
“ಹಾಂವ್ ಆನಿ ಮ್ಹಜೆಂ ಕುಟಮ್ ಮೈಕಲ್ ಡಿ ಸೊಜಾ ವಿಶನ್ ಕೊಂಕಣಿ (MDVK) ಕಾರ್ಯಕ್ರಮಾಖಾಲ್ ಕೊಂಕಣಿ ಲೇಖಕಾಂಕ್ ಬೂಕ್ ಪರ್ಗಟ್ ಕರುಂಕ್ ಪ್ರಕಾಶನ್ ಅನುದಾನ್ ದಿತಾ, ನಾಟಕಾಂಕ್, ಸಿನೆಮಾಂಕ್ ಕುಮಕ್ ಕರ್ತಾ. ಪುಸ್ತಕ್ ಪ್ರಕಾಶನಾಚಿ ಯೆವ್ಜಣ್ ಮೆಲ್ವಿನ್ ರೊಡ್ರಿಗಸ್, ಎಚ್ಚೆಮ್ ಪೆರ್ನಾಳ್ ಆನಿ ಟೈಟಸ್ ನೊರೊನ್ಹಾ ಹೆ ಸಾಂಬಾಳ್ತಾತ್. ದಾಯ್ಜಿವಲ್ಡಾನ್ ಸಿನೆಮಾಚಿ ಜವಾಬ್ದಾರಿ ಘೆತ್ಲ್ಯಾ. ಫುಡ್ಲದ್ ಸಿನೆಮಾ ಬಾಪಾಚೆ ಪುತಾಚೆ ನಾಂವಿ (BPN) ಸಿನೆಮಾಂತ್ ಸಮಾಜೆಕ್ ಏಕ್ ಬರೊ ಸಂದೇಶ್ ಆಸಾ. ಜಶೆಂ ಬಾ| ಆಲ್ವಿನ್ ಸೆರಾವೊಚ್ಯಾ ನಾಟಕಾಂನಿ ಆಸಾ. ಪೂಣ್ ಏಕ್ ಸಿನೆಮಾ ವಾ ನಾಟಕ್ ಯಶಸ್ವಿ ಕರ್ಚೊ ಪ್ರೇಕ್ಶಕಾಂನಿ. ಆಜ್ ಹಾಂಗಾಸರ್ ಭರ್ಲ್ಲೆಂ ಸಾಲ್ ಪಳಯ್ತಾನಾ ಹೆಂ ರುಜು ಜಾತಾ. “ಬಾಪಾಚೆ ಪುತಾಚೆ” ನಾಂವಿ ಸಿನೆಮಾಕೀ ತುಮಿ ಅಸಲೊಚ್ ಪಾಟಿಂಬೊ ದೀಜೆ” ಮ್ಹಣ್ ಮಾನೆಸ್ತ್ ಮೈಕಲ್ ಡಿ ಸೊಜಾ ಹಾಣಿ ಮ್ಹಳೆಂ.
ಧಾರ್ಮಿಕ್ ನಾಟಕ್ ಬರಂವ್ಚ್ಯಾಂತ್ ವ್ಹಡ್ ಸಾಧನ್ ಕೆಲ್ಲ್ಯಾ ಮಾ| ದೊ| ರೊನಾಲ್ಡ್ ಸೆರಾವೊ ಹಾಂಕಾ ಬರೆಂ ಮಾಗೊನ್, ಫುಡಾರಾಂತೀ ತಾಂಚೆಥಾವ್ನ್ ಬರೆ ಧಾರ್ಮಿಕ್ ನಾಟಕ್ ಯೇಂವ್ದಿತ್ ಮ್ಹಣ್ ಮೈಕಲ್ ಡಿ ಸೊಜಾ ಹಾಣಿ ಸಾಂಗ್ಲೆಂ.
ಎಚ್ಚೆಮ್, ಪೆರ್ನಾಳ್ ಹಾಣಿ ಮೈಕಲ್ ಡಿ ಸೊಜಾ ವಿಶನ್ ಕೊಂಕಣಿ ಪುಸ್ತಕ್ ಪ್ರಕಾಶನ್ ಅನುದಾನ್ ಯೆವ್ಜಣೆ ವಿಶ್ಯಾಂತ್ ಮಟ್ವಿ ಝಳಕ್ ಆನಿ ಪುಸ್ತಕ್ ಬರಯ್ಣಾರ್ ಮಾ| ದೊ| ರೊನಾಲ್ಡ್ ಸೆರಾವೊ ಹಾಂಚಿ ಒಳಕ್ ಕರುನ್ ದಿಲಿ.
ಸಾಂ. ಲುವಿಸ್ ಕೊಲೆಜಿಚೊ ರೆಕ್ಟರ್ ಮಾ| ಬಾ| ಮೆಲ್ವಿನ್ ಪಿಂಟೊ, ಸಾಹಿತ್ಯ ಅಕಾಡೆಮಿ ಕೊಂಕ್ಣಿ ಭಾಷಾ ಸಲ್ಹಾಗಾರ್ ಸಮಿತಿಚೊ ನಿಮಂತ್ರಕ್ ತಶೆಂ ವಿಶನ್ ಕೊಂಕಣಿ ಪುಸ್ತಕ್ ಅನುದಾನ್ ಯೆವ್ಜಣೆಚೊ ಪ್ರಮುಕ್ ಸಲಹಾದಾರ್ ಕವಿ ಮೆಲ್ವಿನ್ ರೊಡ್ರಿಗಸ್ ಹ್ಯಾ ಸಂದರ್ಭಿಂ ಹಾಜರ್ ಆಸ್ಲೆ.
ಮಾ| ದೊ| ರೊನಾಲ್ದ್ ಸೆರಾವೊ ಭಾವಾಡ್ತಾಚೆಂ ದಾಯ್ಜ್ ಬುಕಾಂತ್ – ಭಾವಾಡ್ತಾಚೆಂ ದಾಯ್ಜ್, ಮ್ಹಜಿ ಧಾಂವ್ ಹಾಂವ್ ಧಾಂವ್ಲಾಂ (ಸಾಂ. ಪಾವ್ಲಾಚ್ಯೆ ಜಿಣಿಯೆ ಆಧಾರಿತ್) ಕಾಕುಳ್ತಿಚೆಂ ಹಾತೆರ್ (ಸಾಂ. ಜುವಾಂವ್ ವಿಯಾನ್ನಿ ಜಿಣಿಯೆ ಆಧಾರಿತ್) ಜೂಡಿತ್ ಆನಿ ವೆಲ್ಲಂಗಣಿ ಸಾಯ್ಭಿಣ್ ಅಶೆಂ ಪಾಂಚ್ ವಿಂಚ್ಣಾರ್ ಧಾರ್ಮಿಕ್ ನಾಟಕ್ ಆಟಾಪುನ್ ಆಸಾತ್. 140 ಪಾನಾಂಚ್ಯಾ ಬುಕಾಚೆಂ ಮೋಲ್ ರು. 150/- ಆಸುನ್, ಪುಸ್ತಕ್ – ಮೈಕಲ್ ಡಿ ಸೊಜಾ ವಿಶನ್ ಕೊಂಕಣಿ ಪುಸ್ತಕ್ ಪ್ರಕಾಶನ್ ಅನುದಾನ್ ಯೆವ್ಜಣೆಖಾಲ್ ಜೆಪ್ಪು ಸಾಂ. ಜುಜೆ ಸೆಮಿನರಿಚ್ಯಾ ಸಾಂ. ಜುಜೆ ವಾಜ್ ಕೊಂಕಣಿ ಅಕಾಡೆಮಿನ್ ಫಾಯ್ಸ್ ಕೆಲಾ.
ಮಾ| ದೊ| ರೊನಾಲ್ಡ್ ಸೆರಾವೊ :
ಪ್ರಸ್ತುತ್ ಜೆಪ್ಪು ಸಾಂ ಜುಜೆ ಅಂತರ್ ದಿಯೆಸೆಜಿ ಸೆಮಿನರಿಂತ್ ದೇವ್ಸ್ತುತಿಚೊ ಪ್ರಾಧ್ಯಾಪಕ್ ಜಾವ್ನ್ ಸೆವಾ ದೀವ್ನ್ ಆಸ್ಚೆ ಮಾ| ರೊನಿ ಸೆರಾವೊ, ಹ್ಯೆಚ್ ಸೆಮಿನರಿಂತ್ ರೆಕ್ಟರ್ ಆನಿ ದೇವ್ಶಾಸ್ತ್ರ್ ವಿಭಾಗಾಚೊ ಮುಕೆಸ್ಥ್ ಜಾವ್ನ್ಯೀ ತಾಣಿ ಸೆವಾ ದಿಲ್ಯಾ. ರೊಮಾಂತ್ಲ್ಯಾ ಸಾಂ ಆನ್ಸೆಲ್ಮ್ ವಿಶ್ವವಿದ್ಯಾಲಯಾಂತ್ ಅಧ್ಯಯನ್ ಕರ್ನ್ ತಾಣಿ ದೇವ್ಸ್ತುತೆಂತ್ ದೊತೊರ್ ಸನದ್ ಆಪ್ಣಾಯ್ಲ್ಯಾ. ಬೆಂಗ್ಳುರ್, ಮೈಸೂರ್, ಗೊಂಯ್ ಆನಿ ಹೆರ್ ಜಾಗ್ಯಾಂನಿ ಯಾಜಕಾಂಕ್, ಧಾರ್ಮಿಕಾಂಕ್ ಆನಿ ಲಾಯಿಕಾಂಕ್ ತಾಣಿ ಜಾಯ್ತಿಂ ಶಿಕ್ಪಾ ಕಾಮಾಸಾಳಾಂ ಆನಿ ತರ್ಬೆತಿ ಶಿಬಿರಾಂ ಚಲಯ್ಲ್ಯಾಂತ್.
ಕೊಂಕ್ಣಿ ಆನಿ ಇಂಗ್ಲಿಷ್ ಭಾಸಾಂನಿ ತಾಂಚಿಂ ಲೇಖನಾಂ ಆನಿ ಪುಸ್ತಕಾಂ ಪರ್ಗಟ್ ಜಾಲ್ಯಾಂತ್. ದೇವ್ಸ್ತುತಿಚ್ಯಾ ಸಂಗೀತಾಂತ್ ತಾಣಿ ವಿಶೇಸ್ ಶಿಕಪ್ ಜೊಡ್ಲಾಂ.
ಕನ್ನಡ, ಕೊಂಕ್ಣಿ ಆನಿ ಇಂಗ್ಲಿಷ್ ಭಾಸಾಂನಿ ಜಾಯ್ತಿಂ ಲಿತುರ್ಜಿಕ್ ಆನಿ ಧಾರ್ಮಿಕ್ ಗಿತಾಂ ತಾಣಿ ಘಡ್ಲ್ಯಾಂತ್. ಪವಿತ್ರ್ ಪುಸ್ತಕ್ ಆಧಾರಿತ್ ಸಬಾರ್ ನಾಟಕ್ ಆನಿ ನಾಟ್ಕುಳೆ ತಾಣಿ ಬರಯ್ಲ್ಯಾತ್.
ಪುಸ್ತಕಾಚೆ ಪ್ರತಿಯಾಂ ಖಾತಿರ್ ಜೆಪ್ಪು ಸೆಮಿನರಿ ವಾ ಲೇಖಕಾಂಚ್ಯಾ ಮೊಬಾಯ್ಲಾಚೆರ್ 98805 39686 ಸಂಪರ್ಕ್ ಕರುಂಯೆತಾ.
