ಕ್ರಿಸ್ಬೆನ್ ಮ್ಯೂಜಿಕ್ ಪಾಟ್ಲ್ಯಾ ಪಾಂಚ್ ವರ್ಸಾಂ ಥಾವ್ನ್ ಕೊಂಕ್ಣಿ ಪದಾಂ ಆನಿ ವಿಡಿಯೊ ರಚುನ್ ಕೊಂಕ್ಣಿ ಭಾಸ್ ಆನಿ ಸಂಸ್ಕ್ರತಿ ಜಿವಾಳ್ ದವರುಂಕ್ ಆಪ್ಲ್ಯಾ ತಾಂಕಿ ಭಿತರ್ಲಿ ಸೆವಾ ದೀವ್ನ್ ಆಸಾ. ಕೊಂಕ್ಣಿ ಭಾಸ್ ಜಿವಾಳ್ ಉರೊಂಕ್ ಜಾಯ್ ತರ್ ತಿ ಆಮಿ ಉಲಂವ್ಕ್ ಜಾಯ್, ಗಾಂವುಂಕ್ ಜಾಯ್, ನಾಟಕ್, ಸಿನೆಮಾ ಆನಿ ಹೆರ್ ಕೊಂಕ್ಣಿ ಸಾಂಸ್ಕ್ರತಿಕ್ ಕಾರ್ಯವಳಿ ಸರಾಗ್ ಚಲೊಂಕ್ ಜಾಯ್. ಆಮ್ಚ್ಯಾ ಕಾಜಾರಾಂ ಸೊಭಾಣಾಂನಿ ಕೊಂಕ್ಣಿ ಪದಾಂ ಗಾವುಂಕ್ ಜಾಯ್.
ಕೊಂಕ್ಣಿ ಭಾಶೆಂತ್ ಕಾಜಾರಾಂಕ್ ಜೊಕ್ತಿಂ ಮ್ಹಳ್ಳಿಂ ಥೊಡಿಂಚ್ ಪದಾಂ ಆಸಾತ್, ಆನಿ ಭೋವ್ ಥೊಡಿಂಚ್ ಜಣಾಂ ತಿಂ ಕಾಜಾರಾಂಕ್ ಗಾಯ್ತಾತ್ ವಾ ಪ್ಲೇ ಕರ್ತಾತ್. ಹ್ಯಾ ದಿಶೆನ್ ಕ್ರಿಸ್ಬೆನ್ ಮ್ಯೂಜಿಕಾನ್ ಏಕ್ ದಾಕ್ಟೆಂ ಮೇಟ್ ಕಾಡ್ಲಾಂ ಆಸುನ್ ಕೊಂಕ್ಣಿ ಪದಾಂಕ್ ಕಾಜಾರಾಂನಿ ಪ್ಲೇ ಕರುಂಕ್ ಉತ್ತೇಜನ್ ದಿಂವ್ಚ್ಯಾ ಖಾತಿರ್ ಏಕ್ ಸ್ಪರ್ಧೊ ಆಸಾ ಕೆಲಾ.
ಸ್ಪರ್ಧ್ಯಾಕ್ ಪದಾಂಚ್ಯಾ ನಿರ್ಮಾಪಕಾಂಕ್ ಪದಾಂ ದಾಖಲ್ ಕರುಂಕ್ ಆಪೊವ್ಣೆಂ ದಿಲ್ಲೆಂ. ಎದೊಳ್ ಪರ್ಯಾಂತ್ ರೆಜಿಸ್ಟರ್ ಕೆಲ್ಲಿಂ ಪದಾಂ ಹ್ಯಾ ಪರಿಂ ಆಸಾತ್ 1) ವಿಶ್ವಾಸಿ ಮೋಗ್- ನಿರ್ಮಾಪಕ್ ಪ್ರಜೋತ್ ಡೆಸಾ 2) ಭಾಗಿ ದಿಸಾ- ಕ್ರಿಸ್ಬೆನ್ ಮ್ಯೂಜಿಕ್ 3) ಲಗ್ನಾ ಭೆಸ್ – ಕ್ರಿಸ್ಬೆನ್ ಮ್ಯೂಜಿಕ್ 4) ಆಯ್ಲಾ ಹೊರ್- ಕ್ರಿಸ್ಬೆನ್ ಮ್ಯೂಜಿಕ್ 5) ಸೊಭ್ತಾ ಸಾಡ್ಯಾರ್ – ಕ್ರಿಸ್ಬೆನ್ ಮ್ಯೂಜಿಕ್. 6) ಸೊಭಾಯ್ ತುಜಿ- ಪ್ರಜೋತ್ ಡೆಸಾ. 7) ವೆಂಗುಂಕ್ ತುಕಾ – ಪ್ರಜೋತ್ ಡೆಸಾ.
ಹಿಂ ಸರ್ವ್ ಪದಾಂ ನಿರ್ಮಾಪಕಾಂಚ್ಯಾ ಯೂಟ್ಯೂಬ್ ಚಾನೆಲಾರ್ ಆಸಾತ್ ಆನಿ ಸಗ್ಳ್ಯಾ ಪದಾಂಚ್ಯಾ ವೀಡಿಯೊಂಚಿ ಲಿಂಕ್ ತಯಾರ್ ಕರುನ್ ಫಾಯ್ಸ್ ಕೆಲ್ಯಾ. https://lnk.bio/Krisben_Zoddem_2026_List_of_songs_for_contest
ಹೆರ್ ಪದಾಂ ನಿರ್ಮಾಪಕಾಂಕ್ ಆಪ್ಲಿಂ ಪದಾಂ ರೆಜಿಸ್ಟರ್ ಕರುಂಕ್ ಜಾಯ್ ತರ್ ವೆಗಿಂಚ್ ಕ್ರಿಸ್ಬೆನಾಕ್ ಸಂಪರ್ಕ್ ಕರುಂಕ್ ಉಲೊ ದಿಲಾ. ತಿಂ ವಯ್ಲ್ಯಾ ಪಟ್ಟೆಂತ್ ಮೆತೆರ್ ಜಾತೆಲಿಂ. ಹಿಂ ಪದಾಂ ಹೊಲಾಕ್ ಪ್ರವೇಶ್ ಕರ್ತಾನಾ, ಪಯ್ಲೊ ನಾಚ್, ಸಾಡೊ ನೆಸುನ್ ಪ್ರವೇಶ್ ಜಾತಾನಾ, ಒಪ್ಸುನ್ ದಿತಾನಾ ವಾ ಹೆರ್ ಖಂಯ್ಚಾಯ್ ರಿವಾಜಿ ವೆಳಾರ್ ಗಾಂವ್ಚೆ ತಸಲಿಂ ಆಸುಂಕ್ ಜಾಯ್. ಪದಾಂಚೆಂ ಹಕ್ಕ್ ಎಂಟ್ರಿ ದಾಖಲ್ ಕರ್ತೆಲ್ಯಾ ಲಾಗಿಂ ಆಸುಂಕ್ ಜಾಯ್. ದುಸ್ರ್ಯಾ ಭಾಶೆಂ ಥಾವ್ನ್ ತರ್ಜುಮೊ ಕೆಲ್ಲ್ಯಾ ಪದಾಂಕ್ ಆನಿ ಜನಪದ್ ಪದಾಂಕ್ ಹ್ಯಾ ಸ್ಪರ್ಧ್ಯಾಂತ್ ಆವ್ಕಾಸ್ ಆಸ್ಚೊ ನಾ.
ಕಾಜಾರ್ ಜಾಂವ್ಚ್ಯಾ ಜೊಡ್ಯಾಂನಿ ಕನಿಷ್ಟ್ ಏಕ್ ಆನಿ ಗರಿಷ್ಟ್ ಕಿತ್ಲೀಂಯ್ ಪದಾಂ ಆಪ್ಲ್ಯಾ ಕಾಜಾರಾಕ್ ವಾಪರುಂಕ್ ಆವ್ಕಾಸ್ ಆಸಾ. ಪದಾಂಚ್ಯಾ ಪಟ್ಟೆಂತ್ಲಿಂ ಪದಾಂ ಕಾಜಾರಾಕ್ ಡೀಜೆ ವಾ ಲಯ್ವ್ ಬೆಂಡಾಂ ದ್ವಾರಿಂ ಗಾಂವ್ಚಿಂ. ಪದಾಂ ಗಾಯ್ತಾನಾ ವೀಡಿಯೊ ಕಾಡುನ್ ಜಾತಾ ತಿತ್ಲ್ಯಾ ವೆಗಿಂ ಎಡಿಟ್ ಕರುನ್ ಕ್ರಿಸ್ಬೆನಾಕ್ email ಮುಖಾಂತ್ರ್ ಪಾವಿತ್ ಕರುಂಕ್ ಜಾಯ್. ರೆಜಿಸ್ಟರ್ ಕರ್ತಾನಾ ಎಕಾ ಪದಾ ಪಾಟ್ಲ್ಯಾನ್ ರುಪಯ್ ಏಕ್ ಹಜಾರ್ ಪಾವಿತ್ ಕರುಂಕ್ ಆಸ್ತೆಲೆ.
ಕ್ರಿಸ್ಬೆನ್ ಹೊ ವೀಡಿಯೊ ಪದಾಚ್ಯಾ ಓಒನರಾಕ್ ಪಾವಿತ್ ಕರ್ತಲೊ. ಪದಾಚ್ಯಾ ಓನರಾನ್ ತಾಂಚ್ಯಾ ಯೂಟ್ಯೂಬ್ ಚಾನಲಾರ್ ವೀಡಿಯೊ ಅಪ್ಲೋಡ್ ಕರುನ್ ತಾಚೊ ಲಿಂಕ್ ಕ್ರಿಸ್ಬೆನಾಕ್ ಪಾವಿತ್ ಕರ್ಚೊ. ಕ್ರಿಸ್ಬೆನ್ ತೊ ಕಾಜಾರಿ ಜೊಡ್ಯಾಕ್ ಪಾವಿತ್ ಕರ್ತಲೊ. ಕಾಜಾರಿ ಜೊಡ್ಯಾನ್ ಆಪ್ಲ್ಯಾ ಇಶ್ಟಾಂಕ್ ತೊ ವೀಡಿಯೊ ಲಾಯ್ಕ್ ಕರುಂಕ್ ಸಾಂಗ್ಚೊ.
ಸರ್ಧೊ ನವಂಬರ್ 2025 ಥಾವ್ನ್ ನವಂಬರ್ 2026 ಪರ್ಯಾಂತ್ ಚಲ್ತಲೊ, ತೆದೊಳ್ ಪರ್ಯಾಂತ್ ವೀಡಿಯೊ ಲಾಯ್ಕ್ ಕರುಂಕ್ ಆವ್ಕಾಸ್ ಆಸ್ತಲೊ. ನವಂಬರ್ 2025 ಥಾವ್ನ್ ನವಂಬರ್ 2026 ಪರ್ಯಾಂತ್ ಕಾಜಾರ್ ಜಾಂವ್ಚ್ಯಾ ಜೊಡ್ಯಾಂಕ್ ಹ್ಯಾ ಸ್ಪರ್ಧ್ಯಾಂತ್ ಭಾಗ್ ಘೆಂವ್ಕ್ ಆವ್ಕಾಸ್ ಆಸಾ.
ಡಿಸೆಂಬರ್ 2026ತ್ ಚಡ್ ಲಾಯ್ಕ್ ಮೆಳ್’ಲ್ಲ್ಯಾ ಕಾಜಾರಿ ಜೊಡ್ಯಾಕ್ ಕ್ರಿಸ್ಬೆನ್ ಜೊಡೆಂ 2026 ಬಿರುದ್ ಮೆಳ್ತೆಲೆಂ ಆನಿ ನಗದ್ ಇನಾಮ್ ರುಪರ್ ತೀಸ್ ಹಜಾರ್ ಮೆಳ್ತೆಲೆ. ವಿಜೇತ್ ವಿಡಿಯೊಂತ್ ಪದ್ ಗಾಯಿಲ್ಲ್ಯಾ ಬೇಂಡಾಕ್ ವ ಡೀಜೆಕ್ ರುಪಯ್ ವೀಸ್ ಹಜಾರ್ ಮೆಳ್ತೆಲೆ. ವಿಜೇತ್ ಪದಾಚ್ಯಾ ನಿರ್ಮಾಪಕಾಕ್ ರುಪಯ್ ಪಾಂಚ್ ಹಜಾರ್ ಮೆಳ್ತೆಲೆ.
ಸ್ಪರ್ಧ್ಯಾಂತ್ ಏಕ್ ಹಜಾರ್ ಎಂಟ್ರಿ ಫೀ ದವರ್ಲ್ಯಾ. ಜಮೊ ಜಾಲ್ಲೆ ಪಯ್ಶೆ ಇನಾಮಾಂಚ್ಯಾ ರಖಮಾಕ್ ಮಿಕ್ವಲ್ಯಾರ್ ತೆ ಸಗ್ಳೆ ಭುರ್ಗಾಂಚ್ಯಾ ಚಾರಿಟಿಕ್ ದಿತೆಲ್ಯಾಂವ್ ಮ್ಹಣ್ ಕ್ರಿಸ್ಬೆನಾನ್ ಸಾಂಗ್ಲಾಂ. ಆಶೆಂ ಸಂಸ್ಕ್ರತಿಚಿ ಗ್ರೇಸ್ತ್ಕಾಯ್ ಪಾಚಾರ್ತಾನಾ, ಗರ್ಜೆವಂತಾಂಚ್ಯಾ ಗರ್ಜೆಕ್ ಪಾಂವ್ಚೆಂ ಬರೆಂ ಕಾಮ್ಯೀ ಜಾತೆಲೆಂ ಮ್ಹಣ್ ಕ್ರಿಸ್ಬೆನಾಚೊ ಮಾಲಕ್ ಕ್ರಿಸ್ಟೊಫರ್ ಸಾಂಗ್ತಾ.
ಕ್ರಿಸ್ಟೊಫರ್ ಮ್ಹಣ್ತಾ, ಜರ್ ತರ್ ಸಗ್ಳೆಂ ವರ್ಸ್ ಪಾಂಚ್ ಠಕ್ಕೆ ಕಾಜಾರಾಂನಿ ಕೊಂಕ್ಣಿ ಪದಾಂ ವಾಪಾರ್ಲಿಂ ತರೀ, ಲೊಕಾಕ್ ಹ್ಯಾ ಪದಾಂ ವಿಶಿಂ ಕಳ್ತೆಲೆಂ ಆನಿ ಮುಖ್ಲ್ಯಾ ವರ್ಸಾಂನಿ ದುಸ್ರ್ಯಾಂಕ್ ಕಾಜಾರಾ ವೆಳಾರ್ ಕೊಂಕ್ಣಿ ಪದಾಂ ವಾಪಾರುಂಕ್ ಪ್ರೇರಣ್ ಮೆಳ್ತೆಲೆಂ. ಹ್ಯಾ ಬದ್ಲಾವಣೆ ವಿಶಿಂ ಕ್ರಿಸ್ಟೊಫರಾಕ್ ಭರ್ವಸೊ ಆಸಾ.
