ನ್ಯೂಯೊರ್ಕಾಚಿ ದುಬ್ಳಿಕಾಯ್ ಆನಿ ಮೇಯರ್ ಝೋರಾನ್

18

ತೀನ್ ವರ್ಸಾಂ ಆದಿಂ, ಅಮೇರಿಕಾಚ್ಯೆ ಭೊಂವ್ಡೆ ವೆಳಾ, ಹಾಂವ್ ನ್ಯೂಯೊರ್ಕ್ ಮ್ಹಾ-ಶೆರಾಂತ್ ಹಫ್ತೊ-ಭರ್ ಆಸ್ಲೊಂ. ಹೊಟ್ಲಾಂ ಭಿರಾಂಕುಳ್ ಮಾರಗ್ ದೆಕುನ್ serviced apartment ತಸ್ಲ್ಯಾ homestay ಂತ್ ರಾವ್ಲಾಂ. ಮಧ್ಲೆಂ ಮೆನ್-ಹೆಟ್ಟನ್ ವಠಾರಾಂತ್, ಪರ್ನಿಂ ಆನಿ ದಾಕ್ಟುಲಿಂ ಫ್ಲೆಟಾಂ ವಾಜ್ಬಿ ದರಿರ್ ಮೆಳ್ತಾತ್. ಮ್ಹಜ್ಯೆ ವಸ್ತೆ ಸಾಮ್ಕೊರ್, ಏಕ್ ಕತೊಲಿಕ್ ಇಗರ್ಜ್ ಆಸ್ಲಿ. ಇಗರ್ಜಿಚ್ಯಾ ಗೇಟಿ ಸಮೊರ್ ನಿರಾಶ್ರಿತ್, ಭಿಕಾರಿ ಆನಿ ದುಬ್ಳೊ ಲೋಕ್ ಜಮ್ತಲೊ. ಕಿತ್ಯಾಕ್, ಎಕ್ ಪಾವ್ಟಿಂಚ್ಯೆಂ ಜೆವಾಣ್ ತಾಂಕಾಂ ಮೆಳ್ತಾಲೆಂ. ಪಾಂವ್, ಕೆಳಿಂ ಆನಿಂ ಹೆರ್ ಫಳ್-ವಸ್ತು ಭುತಿ ಬಾಂದುನ್ ದಿತಾಲೆ.

ಸಂಸಾರಾಂತ್ಲ್ಯಾ ಚಡ್ಡ್ ಗ್ರೇಸ್ತ್ ದೇಶಾಂತ್ಲ್ಯಾ ಚಡ್ಡ್ ಗ್ರೇಸ್ತ್ ಶೆರಾಂತ್ ಅಸಲೆಂ ದೃಶ್ಯ್ ಪಳೆಂವ್ಕ್ ಮೆಳ್ತಾಗೀ ಮ್ಹಣ್ಶಾತ್. ಹಾಂವ್ ಸಗ್ಳೊ ಮೆನ್-ಹೆಟ್ಟನ್ barough ಪಾಂಯ್ ವಾಟೆನ್ ಭೊಂವ್ಲಾಂ. ಹರ್ಯೇಕಾ ಇಗರ್ಜಿಂನಿಂ feed-the-hungry ಸ್ಕೀಮಾಂ ದ್ವಾರಿಂ ಭುಕೆಲ್ಲ್ಯಾಂಕ್ ಖಾಣ್-ಜೆವಾಣ್ ಮೆಳ್ತಾ. ಚಕ್ಚಕಿತ್ ಆನಿ ಗ್ಲಾಮರಾ ಮಧೆಂ ಕಠಿಣ್ ಗರೀಬ್ ವಠಾರಾಂ ಆಸಾತ್. ಪಾಟ್ಲ್ಯಾ ಗಲ್ಲೆಂನಿಂ ಫುಟ್-ಪಾತಿರ್ ನಿರಾಶ್ರಿತ್ ಲೋಕ್ ನಿದ್ತಾ. ಪಾರ್ಕಾಂನಿ ಹಾತ್ ಉದಾರೆ ಕರ್ನ್ ಮಾಗ್ತೆಲೆ ಭಿಕಾರಿ ಆಸಾತ್. ಹ್ಯಾ ಶೆರಾಂತ್ ದಿಸ್ತಾ ತಿತ್ಲಿ ಆರ್ಥಿಕ್ ಅಸಮಾನತಾ ಕಿತ್ಯಾಕ್ ಮ್ಹಣ್ ಸವಾಲ್ ಉಠ್ಚೆಂ ವಾಜ್ಬಿ.

ನ್ಯೂಯೊರ್ಕ್ ಮ್ಹಾ-ಶೆರಾಚ್ಯಾ ದುಬ್ಳ್ಯಾ ವಠಾರಾಂನಿ ದರ್ಜೆದಾರ್ ಶಿಕ್ಪಾಕ್ ಆವ್ಕಾಸ್ ನಾಂ. ಭಲಾಯ್ಕಿ ಸೆವೆಚಿ ಸವ್ಲತ್ ನಾಂ. ಬೆಕಾರ್ಪಣ್ ಅಧಿಕ್ ಪ್ರಮಾಣಾರ್ ಆಸಾ. ಇತ್ಲೆಂಚ್ ನಹಿಂ, ಗುನ್ಯಾಂವಾಂಚ್ಯೆಂ ಪ್ರಮಾಣ್ ಹಾಂಗಾಚ್ಯಾ ನಿವಾಸಿಂಕ್ ತಶೆಂ ಲೋಕಲ್ ಅಧಿರಾರಿಂಕ್ ವ್ಹಡ್ ತಕ್ಲೆಫಡಾಪಡೆಚಿ ಗಜಾಲ್ ಜಾವ್ನಾಸಾ.

ಹ್ಯಾ ಹಾರ್ಲೆಮ್ ವಠಾರಾಂತ್ ಬಹುಮತ್ ಅಫ್ರಿಕನ್-ಅಮೆರಿಕನ್ ವಸ್ತಿ ಕರ್ತಾತ್. ನಿವಾಸಿಂಕ್ ಘರಾಂ ಘೆಂವ್ಚಿ ಶಾಥಿ ನಾಂ. ತಿಂ ತಾಂಚ್ಯಾ ಬಜೆಟಿಂತ್ ಮೆಳಾನಾಂತ್. housing affordability ಎಕ್ ಮಹತ್ವಾಚೊ ಮುದ್ದೊ. ಬೇಕಾರ್ಪಣ್ ಜಾಲೆಂ-ಮೂ, ಶಿಕ್ಪಾ-ಭಲಾಯ್ಕೆಚ್ಯಾ ಮೂಳಾವ್ಯಾ ಸವ್ಲತೆಂಚೊ ಅಭಾವ್ ಧೊಸ್ತಾ.

ನ್ಯೂಯೊರ್ಕಾಚ್ಯಾ ಸರ್ವ್ ದುಬ್ಳ್ಯಾ ವಠಾರಾಂನಿಂ, ಕ್ರಿಮಿನಲ್ ಗೇಂಗಾಂ ಆಪ್ಲೆಂ ರಾಜ್ ಚಲಯ್ತಾತ್. ಮಾದಕ್ ವಕ್ತಾಂಚ್ಯೆ ವ್ಯಾಪಾರಿ ನಿವಾಸಿಂಕ್ ಧೊಸ್ತಾತ್.

ಜೆಕ್ಸನ್ ಹೈಟ್ಸ್ ಭಾರತೀ ಉಪ-ಖಂಡಾಚ್ಯಾ ಸ್ತಳಾಂತರ್ ಲೋಕಾನ್ ಭರೊನ್ ಗೆಲಾಂ. ಹೆಂ ವಠಾರ್ ಜೆ.ಎಫ್.ಕೆ ಅಂತರ್‌ರಾಷ್ಟ್ರೀಯ್ ವಿಮಾನ್-ಥಳಾ ಥಾವ್ನ್ ಚಡ್ ಪಯ್ಸ್ ನಾಂ. ಧಾ ವರ್ಸಾಂ ಪೈಲೆಂಚ್ಯಾ ಮ್ಹಜ್ಯೆ ಎಕ್ಯೆ ಭೆಟೆವೆಳಾ, ಹಾಂವ್ ಲಾಗ್ಸಿಲ್ಯಾ ಕ್ವಾಲಿಟಿ ಇನ್ನ್ ಮ್ಹಳ್ಳ್ಯಾ ಹೊಟ್ಲಾಂತ್ ರಾವ್ಲಾಂ. ಜೆಕ್ಸನ್ ಹೈಟ್ಸಾನ್ ಭೊಂವೊನ್ ಆಯ್ಲಾಂ. ಪಾನ್ ಖಾವ್ನ್ ತಾಂಬ್ಡಿ ಥಿಂಪಿ ರಸ್ತ್ಯಾರ್ ಥುಕ್ಚಿ ಸವಯ್ ಹ್ಯಾ ಬಂಗಾಲಿ-ಬಿಹಾರಿ-ಯು.ಪಿ ಲೋಕಾಚಿ ಆಜೂನ್ ಜಿವಿತ್ ಆಸಾ. ಇತ್ಲಿಂ ಖತಾಂ ಹಾಂವೆಂ ಬೋಂಬಯ್ತ್ ಲೆಗುನ್ ಪಳೆಂವ್ಕ್ ನಾಂತ್!

ಅಸಲ್ಯಾಂ ಗರೀಬ್ ವಠಾರಾಂ ಪೈಕಿಂ ಕ್ವೀನ್ಸ್ ಬರೋಂತ್ ಭಾಡ್ಯಾಚ್ಯಾ 1BHK ಫ್ಲೆಟಾಂತ್ ವಸ್ತಿ ಕರ್ಚೊ ಝೋರಾನ್ ಕ್ವಾಮೆ ಮಾಮ್ದಾನಿ ನಾಂವಾಚೊ ರಾಜಕಾರಣಿ ಹ್ಯಾಚ್ ನವೆಂಬ್ರ್ 4-ವ್ಯೆರ್ ಚಲ್ಲೆಲ್ಯಾ ನ್ಯೂಯೋರ್ಕ್ ಮೇಯರ್ ಚುನಾವೆಂತ್ ಜಿಕೊನ್ ಆಯ್ಲೊ.

ನೋವ್ ಮಹಿನ್ಯಾಂ ಪೈಲೆಂ ಝೋರನಾಕ್ ಚಡ್ ಲೋಕ್ ವಳ್ಕಾನಾತ್ಲೊ. ಪಾಟ್ಲ್ಯಾ ಪಾಂಚ್ ವರ್ಸಾಂ ಥಾವ್ನ್ ನ್ಯೂಯೊರ್ಕ್ ರಾಜ್ಯಾಚ್ಯಾ ಎಸೆಂಬ್ಲಿಂತ್ ತೊ ಕ್ವೀನ್ಸ್ ಉಪ-ಶೆರಾಂತ್ ಅಸ್ಟೊರಿಯಾ ವಠಾರಾಚೊ ಪ್ರತಿನಿಧಿ. ಹ್ಯಾ ವರ್ಸಾಚ್ಯಾ ಡಿಮೋಕ್ರೆಟಿಕ್ ಪಾಡ್ತಿಚ್ಯಾ ಮೇಯರ್ ಉಮೇದ್ವಾರಾಕ್ ವಿಂಚುಂಕ್ ಚಲ್ಲೆಲ್ಯಾ ಪೈಮರಿ ಎಲಿಸಾಂವಾಂತ್ ತೊ 1% ಮತ್ ಮೇಳೊನ್ ನಿಮಾಣ್ಯಾ ಸ್ಥಾನಾರ್ ಆಸ್ಲೊ. ಎಕಾ ವರ್ಸಾಚ್ಯೆ ಮಿನತೆ ಉಪ್ರಾಂತ್, ತೊ ಡಿಮೋಕ್ರೆಟಿಕ್ ಪಾಡ್ತಿಚೊ ಅಧಿಕೃತ್ ಉಮೇದ್ವಾರ್ ಜಾಲೊ ಮಾತ್ರ್ ನಹಿಂ, ಮೇಯರ್ ಚುನಾವೆಂತ್ ಜಿಕ್ಲೊ ಸಯ್ತ್. ಜಯ್ತಾಚ್ಯೆ ರಾತಿಂ, ಆಪ್ಲಿಚ್ ಪಾಟ್ ಥಾಪ್ಡುಂಕ್ ತೊ ಗೆಲೊನಾಂ. ಬದ್ಲೆಕ್, ನ್ಯೂಯೊರ್ಕ್ ಮ್ಹಾ-ಶೆರಾಚ್ಯಾ ಲೋಕಾಕ್ ಅಭಿನಂದನ್ ದೀವ್ನ್ ತಾಣೆಂ ಮ್ಹಳೆಂ: “New York, tonight you have delivered a mandate for change.” 2026 ಜನೆರ್ 1-ವ್ಯೆರ್ ಹೊ ಮೇಯರ್ ಪದ್ವೆಚೊ ಸೊಫುತ್ ಘೆತಲೊ.

34 ವರ್ಸಾಂಚೊ ತರ್ನಾಟೊ ಮಾಮ್ದಾನಿ ಡಿಮೋಕ್ರೆಟಿಕ್ ಸೊಶಲಿಸ್ಟ್. ತೀವ್ರ್ ದಾವ್ಯಾ ಪಂಥಿಚೊ ಮ್ಹಣ್ಯೆತ್, ಬರ್ನಿ ಸ್ಯೇಂಡರ್ಸಾ ಪರಿಂ. ತಾಚ್ಯಾ ಉಲವ್ಪಾಕ್ ಲಾಗುನ್, ತೊ ಕಮ್ಯುನಿಸ್ತ್ ಮ್ಹಣ್ತಾ ಡೊನಾಲ್ಡ್ ಟ್ರಂಪ್.

ಹೊ ಆಫ್ರಿಕಾಚ್ಯಾ ಉಗಾಂಡಾಂತ್ ಕಂಪಾಲಾ ಶೆರಾಂತ್ ಜನ್ಮಾಲ್ಲೊ. ತಾಚೊ ಬಾಪುಯ್ ಫಾಮಾದ್ ಸ್ಕೊಲರ್ ಮಹ್ಮೂದ್ ಮಾಮ್ದಾನಿ. ಮಹ್ಮೂದ್ ಬೊಂಬಯ್ತ್ ಗುಜರಾತಿ ಮುಸ್ಲಿಮ್ ಘರಾಣ್ಯಾಂತ್ ಜನ್ಮಾಲ್ಲೊ. ಕುಟ್ಮಾಸವೆಂ ಉಗಾಂಡಾಕ್ ವಸ್ಣುಕ್ ಗೆಲ್ಲೊ ಆನಿ ಥಂಯ್ಚೊ ನಾಗ್ರಿಕ್ ಜಾಲ್ಲೊ. ಆತಾಂ ನ್ಯೂಯೊರ್ಕಾಂತ್ ವಸ್ತಿ ಕರ್ತಾ. ಉಗಾಂಡಾಚೊ ನಾಗ್ರಿಕ್. ಉಗಾಂಡಾಂತ್ ತಾಚಿಂ ಸಯ್ರಿಂ ಆಸಾತ್. ತಾಚಿ ಆವಯ್ ನಾಂವ್ ಗೆಲ್ಲಿ ಫಿಲ್ಮ್ ನಿರ್ಮಾತಾ, ಮಿರಾ ನಾಯರ್. ಹಿ ಇಂಡಿಯಾಂತ್ ರೂರ್ಕೆಲಾ ಶೆರಾಂತ್ ಜನ್ಮಾಲ್ಲಿ. ಸಲಾಮ್ ಬೊಂಬೈ, ಮಿಸಿಸಿಪಿ ಮಸಾಲಾ, ಕಾಮಸೂತ್ರ: ಆ ಲವ್ ಸ್ಟೋರಿ, ಆನಿ ನೇಮ್-ಸೇಕ್ ಹಿಂ ತಿಚಿಂ ನಾಂವಾಡ್ದಿಕ್ ಫಿಲ್ಮಾಂ.

ಅಶೆಂ, ಝೋರಾನಾಚಿಂ ಅವಯ್-ಬಾಪಯ್ ಭಾರತೀ ಮೂಳಾಚಿಂ ತರ್‌ಯೀ, ಉಗಾಂಡಾ, ಟಾಂಜನೀಯಾ, ದಕ್ಶಿಣ್ ಆಫ್ರಿಕಾ, ಬ್ರಿಟನ್ ಆನಿ ಅಮೇರಿಕಾಂತ್ ಜಿಯೆಲ್ಯಾಂತ್. ಝೋರಾನ್ ಸಾತ್ ವರ್ಸಾಂಚೊ ಭುರ್ಗೊ ಆಸ್ತಾನಾಂ ತಿಂ ನ್ಯೂಯೊರ್ಕಾಂತ್ ವಸ್ತಿ ಕರುಂಕ್ ಲಾಗ್ಲಿಂ. ನ್ಯೂಯೊರ್ಕಾಚ್ಯಾ ಉಪ-ಶೆರಾಂನಿಂ ತಾಚ್ಯೆಂ ಶಿಕಾಪ್ ಜಾಲೆಂ. 2018 ವರ್ಸಾ ತೊ ಅಮೇರಿಕನ್ ನಾಗ್ರಿಕ್ ಜಾಲೊ. Naturalized Citizen ಜಾಲ್ಯಾರ್‌ಯೀ ತೊ ರಾಜಕಾರಣಾಂತ್ ಪಾಟಿಂ ಪಡ್ಲೊನಾಂ. 2020 ನವೆಂಬ್ರಾಂತ್ ಚಲ್ಲಲೊ ನ್ಯುಯೊರ್ಕ್ ರಾಜ್ಯ್ ಎಸೆಂಬ್ಲಿ ಚುನಾವ್ ತೊ ವಿರೋದಿ ನಾಸ್ತಾನಾಂ ಜಿಕ್ಲೊ. ದೋನ್ ವರ್ಸಾಂತ್ ಏಕ್ ಪಾವ್ಟಿಂ ಎಸೆಂಬ್ಲಿ ಚುನಾವ್ ಜಾತಾತ್. ತಶೆಂ 2022 ಆನಿಂ 2024 ಚುನಾವಾಂನಿಂ ತೊ ಪರತ್ ಜಿಕ್ಲೊ. ಪ್ರಸ್ತುತ್ ತಾಚಿ ಸೀಟ್ ದಸೆಂಬ್ರ್ 31-ವ್ಯೆರ್ ಖಾಲಿ ಕರ್ನ್, 2026 ಜನೆರ್ 1 ಥಾವ್ನ್ ಮೇಯರ್ ಪದ್ವಿಚೊ ಸೊಫುತ್ ತಾಣೆಂ ಘೆಂವ್ಕ್ ಆಸಾ.

ಪ್ರಧಾನ್ ಮಂತ್ರಿ ನರೇಂದ್ರ ಮೋದಿಚಿ ಠೀಕಾ ಕರುನ್ ತಾಣೆಂ ಮ್ಹಳಾಂ: ಮೋದಿ ಎಕ್ಲೊ ಝುಜಾ ಕ್ರಿಮಿನಲ್. ದೆಕುನ್, ಮೋದಿನ್ ಝೋರಾನ್ ಮಾಮ್ದಾನಿಚ್ಯೆಂ ಜಯ್ತ್ ಸ್ವೀಕಾರ್ ಕರುಂಕ್ ನಾಂ. ರಾಜಕಾರಣಿ ಪ್ರೊಟೊಕೊಲ್ ಪ್ರಮಾಣೆ ಎಕಾ ಮೇಯರಾಕ್ ಪ್ರಧಾನ್ ಮಂತ್ರಿನ್ ಶುಭಾಶಯ್ ಪಾಟಂವ್ಚಿ ಘರ್ಜ್ ನಾಂ. ಪೂಣ್, ಸುಣ್ಯಾ-ಮಾಜ್ರಾಂಕ್ ಸಯ್ತ್ ಸೊಡಿನಾಸ್ತಾನಾಂ, ಟ್ವೀಟ್ ಕರ್ಚೊ ಮೋದಿ ಎಕಾ ಭಾರತೀಯ್ ಮೂಳಾಚ್ಯಾ ರಾಜಕಾರಣಿಕ್ ಬರೆಂ ಮಾಗೊನ್ ಟ್ವೀಟ್ ಕರುಂಕ್ ಪಾಟಿಂ. ಹೆಂ ಮೋದಿಚ್ಯೆಂ ಅಶೀರ್ ಮನ್ ಉಕ್ಲುನ್ ದಾಕಯ್ತಾ.

ನ್ಯುಯೊರ್ಕ್ ಏಕ್ ಭಿರಾಂಕೂಳ್ ಯೆಮ್ಕೊಂಡ್. ಬಾಲ್ಟಿಮೊರ್ ಯೆಮ್ಕೊಂಡ್. ಚಿಕಾಗೊ ಮ್ಹಾ-ಯೆಮ್ಕೊಂಡ್. ಹ್ಯಾ ದೇಶಾಚಿ ಭದ್ರತಿ ಮ್ಹಜಿ ಜವಾಬ್ದಾರಿ: ಅಶೆಂ ಮ್ಹಳಾಂ ಟ್ರಂಪಾನ್. ದೆಕುನ್, ನೇಶನಲ್ ಗಾರ್ಡ್ಸ್ ಆಪುಣ್ ನ್ಯೂಯೊರ್ಕಾಕ್ ಧಾಡ್ತಲೊ ಮ್ಹಣ್ ಟ್ರಂಪಾನ್ ಮ್ಹಳಾಂ.

ಟ್ರಂಪ್ ಎಕ್ಲೊ “ಅತ್ಯಾಚ್ಯಾರಿ” ಆನಿಂ ಫೆಸಿಸ್ಟ್ ಮ್ಹಣ್ ಝೋರಾನಾನ್ ಟ್ರಂಪಾಚಿ ನಿಂದಾ ಕೆಲ್ಲಿ ಆಸಾ. ಝೋರಾನ್ ಜಿಕೊನ್ ಯೆಂವ್ಕ್ ನಜೊ ಮ್ಹಣ್ ಟ್ರಂಪಾಚ್ಯಾ ಇಶ್ಟಾಂನಿಂ ಮಿಲ್ಲಿಯನ್ ಘಟ್ಲೆ ದುಡು ಮೇಯರ್ ಚುನಾವಿ ಪ್ರಚ್ಯಾರಾಂತ್ ವೊತ್ಲಾ. ನಾಮ್ಣೆಚೊ ಡಿಮೋಕ್ರೆಟ್ ರಾಜಕಾರಣಿ ಆನಿ ನ್ಯೂಯೊರ್ಕ್ ರಾಜ್ಯಾಚೊ ಮಾಜಿ ಗವರ್ನರ್ ಆಂಡ್ರು ಕ್ಯುಮೊ ಝೋರನಾ ವಿರುದ್ದ್ ಪಕ್ಶಾತೀತ್ ಉಮೇದ್ವಾರ್ ಜಾವ್ನ್ ಝುಜ್ಲಲೊ. ತಾಕಾ ಟ್ರಂಪಾನ್ ಸಮರ್ಥ ನ್ ದಿಲ್ಲೆಂ. ಝೋರಾನ್ ಜಿಕೊಂಕ್ ನಜೊ ಮ್ಹಣ್ ಟ್ರಂಪ್, ತಾಚ್ಯೆ ಗ್ರೇಶ್ತ್ ಮಗಾ ಇಸ್ಟ್ ಆನಿ ರಿಪಬ್ಲಿಕನ್ ಪಾಡ್ತಿಚ್ಯೆ ಝುಜಾರಿ ಹಾಣಿಂ ಭಾರಿಚ್ ಮಿನತ್ ಕಾಡ್ಲಿ. ತರ್‌ಯಿ, ಝೋರಾನ್ ಜಿಕೊನ್ ಆಯ್ಲೊ. ಕಿತ್ಯಾಕ್ ಮ್ಹಳ್ಯಾರ್, ನ್ಯೂಯೊರ್ಕಾಚ್ಯಾ ದುಬ್ಳಾಂತ್ಲ್ಯಾಂ ದುಬ್ಳ್ಯಾಂ ಖಾತಿರ್ ಆಪುಣ್ ಝುಜ್ತಲೊಂ ಮ್ಹಣ್ ತಾಣೆಂ ಭಾಸಯ್ಲಾಂ.

1. ಸುಂಕ್ ನಾತ್ಲೆಲಿಂ ಪಬ್ಲಿಕ್ ಸಿಟಿ ಬಸ್ಸಾಂ. free city busses.
2. ಉಣಿಂ ಜೋಡ್ ಆಸ್ಲೆಲ್ಯಾ ಲೋಕಾಚ್ಯಾ ವಸ್ತಿ-ಘರಾಂಚ್ಯೆಂ ಭಾಡೆಂ ಸ್ಥಗಿತ್ ಕರಪ್. rent freeze on low cost housing.
3. ನ್ಯೂಯೊರ್ಕಾಚ್ಯಾ borough ವಠಾರಾಂನಿಂ ಎಕೆಕ್ ಲೇಕಾರ್ ಪಾಂಚ್ ಸರ್ಕಾರಿ ಸುಫರ್-ಮಾರ್ಕೆಟ್ (ಕಿರಾಣಾ ದುಕಾನ್) city run groceries.
4. ಲ್ಹಾನ್ ಭುರ್ಗ್ಯಾಂಚಿ ಕಾಳ್ಜಿ ಘೆಂವ್ಕ್ ಸಾರ್ವಜನಿಕ್ ಫುಕಾಟಾಚಿ ವೆವಸ್ತಾ. free child care
5. ದೋನ್ ಲಾಖಾಂಕ್ ಮಿಕ್ವೊನ್ ವಾಜ್ಬಿ ಮೋಲಾಂಚಿಂ ವಸ್ತಿ-ಘರಾಂ. affordable housing.
6. ಪೊಲಿಸ್ ಸುದ್ರಾಪ್, ಸಾರ್ವಜನಿಕ್ ರಾಕ್ವಲಿ ಕರ್ಪಾಕ್. police reforms for public safety.
7. 2030 ಇಸ್ವೆ ಪೈಲೆಂ ಕನಿಸ್ಟ್ ಮಜ್ದೂರಿ ತೀಸ್ ಡೊಲರ್. USD 30 per hour minimum wages by 2030.
8. ಕೊರ್ಪೊರೇಶನಾಂಚ್ಯೆಂ ಇನ್ಕಮ್ ಟೆಕ್ಸ್ ವಾಡವ್ಪ್. Corporate Income Tax Increase by 2%.
9. ವಾರ್ಶಿಕ್ ಜೋಡ್ ಏಕ್ ಮಿಲಿಯನ್ ಡೊಲರ್ ವಯ್ರ್ ಆಸ್ಲೆಲ್ಯಾಂ ಗ್ರೇಸ್ತಾಂಚ್ಯೆಂ ಇನ್ಕಮ್ ಟೆಕ್ಸ್ ವಾಡವ್ಪ್. Tax the rich by 2% on annual incomes above $ 1million.
10. ಏಕ್ದಮ್ ಬಾಯ್ಲ್ಯಾ ವಠಾರಾಂತ್ಲ್ಯಾ ಘರಾಂಕ್ ಪ್ರೊಪರ್ಟಿ ಟೆಕ್ಸ್ ಉಣೊ ಕರಾಪ್. Reduction in property tax in peripheral neighbourhoods (Like described earlier in this article).
11. ನ್ಯೂಯೊರ್ಕ್ ಪ್ರೊಪರ್ಟಿ ಟೆಕ್ಸ್ ಸುದ್ರಾಪ್. City Property Tax Reforms.

ಹ್ಯಾಚ್ ಸುಕ್ರಾರಾ, ಟ್ರಂಪ್ ಆನಿ ಝೋರಾನ್ ವೈಟ್ ಹವ್ಸಾಂತ್ ಒವಲ್ ಅಫಿಸಾಂತ್ ಭೆಟ್ಲೆ. ಏಕ್ಲೊ ಮಗಾ ರಿಪಬ್ಲಿಕನ್, ಝೊರಾನಾಕ್ “ಫೇಸಿಸ್ಟ್”; ದುಸ್ರೊ ಡಿಮೋಕ್ರೆಟ್ ಸೊಶಲಿಸ್ಟ್, ಟ್ರಂಪಾಕ್ “ಕಮುನಿಸ್ತ್”. ಹ್ಯಾ ಮೀಟಿಂಗಾ ಉಪ್ರಾಂತ್ಲೆಂ ಪ್ರೆಸ್ ಕೊನ್ಫರೆನ್ಸ್ ಲೈವ್ ಟೆಲೆಕಾಸ್ಟ್ ಜಾಲೆಂ. ದೋಗ್ ಪರ್ನೆ ಇಸ್ಟ್ ಪರತ್ ಮೆಳ್ತಾತ್ ತಶೆಂ ಟ್ರಂಪಾನ್ ಝೋರಾನಾಚಿ ಪಾಟ್ ಥಾಪುಡ್ಲಿ.

ತಾಂಚಿ body language relax ಆಸ್ಲಿ. ಪ್ರತ್ಯೇಕ್ ಜಾವ್ನ್ ಟ್ರಂಪ್ ಖುಶಾಲ್ ದಿಸ್ಲೊ. ಝೊರಾನಿಚ್ಯೆರ್ ಹಲ್ಲೊ ಕರ್ಚ್ಯೆಂ ಸೊಡ್, ತಾಚಿ ತಾರಿಫ್ ಕೆಲಿ: ಹೊ ಖರೆಂಚ್ ಮಹಾನ್ ಮೇಯರ್ ಜಾತಲೊ ಮ್ಹಣ್ ಟ್ರಂಪಾನ್ ಹೊಗ್ಳಿಕ್ ದಿಲಿ.

ಝೋರಾನ್ ಆನಿ ಟ್ರಂಪ್ ಮಧೆಂ ಸಾಮ-ರಸ್ ಆಸಾ. ದೋಗ್‌ಯೀ ನ್ಯೂಯೊರ್ಕರ್, ದೋಗ್‌ಯೀ ಕ್ವೀನ್ಸ್ ಬರೋಂತ್ಲೆ. ಟ್ರಂಪ್ ಜಮೈಕಾ ಎಸ್ಟೇಟ್ಸ್ ವಠಾರಾಂತ್ ಜನ್ಮಾಲ್ಲೊ. ಝೊರಾನ್ ಅಸ್ಟೋರಿಯಾಂತ್ ವಸ್ತಿ ಕರ್ತಾ. ದೊಗಾಂಕೀ ಶೆರಾಚೊ ಮೋಗ್ ಆನಿ ಕಾಳ್ಜಿ ಆಸಾ. ಟ್ರಂಪಾಚಿಂ ದೋನ್ ಮಹಾ skyscraper “Trump Towers” ಮಧ್ಯ್ ಮೆನ್-ಹಟ್ಟನಾಂತ್ ಆಸಾತ್ ಥಂಯ್ ತೊ ಥೊಡೆ ದೀಸ್ ರಾವ್ತಾ ತರ್‌ಯೀ ಪ್ರೆಸ್ ಕೊನ್ಫರೆನ್ಸಾಂತ್ ಜಮೈಕಾ ಎಸ್ಟೇಟ್ಸ್ ವಿಷಿಂ ಮಾತ್ರ್ ಉಲಯ್ಲೊ. ಮ್ಹಣ್ಜೆ affordable housing ಎಕ್ ಮಹತ್ವಾಚೊ ರಾಜಕೀ ಮುದ್ದೊ ಮ್ಹಣ್ ಶಾಣೊ ಟ್ರಂಪ್ ಸಮ್ಜಲಾ.

ಝೋರಾನಾಕ್ ಟ್ರಂಪಾಚಿ ಅಸ್ಕಾತ್ಕಾಯ್ ಸಮ್ಜಲ್ಯಾ: “ತಾಚ್ಯೆ ಕಡೆಂ ವಚ್, ತಾಕಾ ಮಸ್ಕೊ ಲಾಯ್; ಹೊಗಳ್ಸಿ. ಕಿತೆಂ common ಆಸಾ ತ್ಯಾ ಬಾಬ್ತಿಂ ಮಾತ್ರ್ ಉಲಯ್. ಕಿತ್ಲೆ ಮತ್-ಭೇಧ್ ಆಸಾತ್ ತೆ ಉಕಲ್ನ್ ದಾಕಂವ್ಚೆ ನಹಿಂ. ಪಾಟಿಂ ಘರಾ ಗೆಲ್ಯಾ ನಂತರ್, ಜಾಯ್ ತರ್ ಬರೆಂ ಕರ್ನ್ ಹಾತ್ ಧು!” ಟ್ರಂಪಾಚೆಂ ಬೆಸಾಂವ್ ಆಸ್ಲ್ಯಾರ್, ಝೋರಾನ್ ಖಂಡಿತ್ ಜಾವ್ನ್ ಮೇಯರಾಚ್ಯೆಂ ಕಾಮ್ ಬರ‍್ಯಾನ್ ಚಲವ್ನ್ ವರ್ತಲೊ.

ಟ್ರಂಪಾ ಕಡೆ ಝುಜ್ ಮಾಂಡುನ್ ಜಾಂವ್ಚೆ ಕಾಂಯ್ ನಾಂ. ಹಿ ಸಮ್ಜಣಿ ಪ್ರಧಾನಿ ಮೋದಿಕ್ ಲೆಗುನ್ ಆಸಾ ಮ್ಹಣ್ ದಿಸ್ತಾ. ದೆಕುನ್, ತೊ ಚುಕಾರಿ ಮಾರ್ತೆ ಆಸಾ. ಪುಣ್, ಕೆದೊಳ್ ಪರ್ಯಾಂತ್? ಏಕ್ ನಾ ಏಕ್ ದೀಸ್, ಟ್ರಂಪ್ ಮೋದಿಕ್ ವೈಟ್ ಹಾವ್ಸಾಕ್ ಆಪಯ್ತಲೊಚ್. ಟ್ರಂಪಾಕ್ ಹೊಗ್ಳಿಕ್ ದೀಜೆ ಪಡ್ತೆಲಿಚ್.

■ ಫಿಲಿಫ್ ಮುದಾರ್ತ್