ಪಳೆಂವ್ಕ್ ಮಟ್ವೊ ಆನಿ ಸುಡ್ಸುಡಿತ್ ಸ್ವಭಾವಾಚೊ ತರೀ, ರೊನಿನ್ ಉಲಯ್ತಾನಾ ಜಾಂವ್ಚಿ ಘುಸ್ಪಡ್ ಸಾರ್ಕಿ ಕರುಂಕ್ ತಾಚಿ ಆವಯ್ ಮಾತ್ ನ್ಹಯ್, ಈಷ್ಟ್ಯೀ ಸಕೊಂಕ್ ನಾಂತ್. ಖಂಚಾ ವೆಳಾರ್ ಕಿತೆಂ ಉಲಯ್ಜಾಯ್ ತೆಂ ಸಮ್ಜೊಂಕ್ ನಾತ್ಲ್ಲ್ಯಾ ತಾಚಾ ಜಿಣಿಯೆಂತ್ ಹೆರಾಂಕ್ ಹಾಸೊಂಕ್, ಶಿಣ್ ಜಾಂವ್ಕ್ ಆನಿ ರಾಗ್ ಸೈತ್ ಯೇಂವ್ಕ್ ಕಾರಾಣ್ ಜಾಲ್ಲ್ಯೊ ಸಂಗ್ತಿ ಉಲಂವ್ಚ್ಯೊ ತರ್, ತಾಚಿ ಜಿಣಿ ಏಕ್ ಬೂಕ್ಚ್ ಜಾಯ್ತ್ ಕೊಣ್ಣಾ!
ಲ್ಹಾನ್ ಪ್ರಾಯೆರ್, ರೊನಿ ಆಪ್ಲ್ಯಾ ಭಾವ್-ಭಯ್ಣ್ಯಾಂಬರಿ, ವೆಗಿಂಚ್ ಚಲೊಂಕ್ ಆನಿ ಉಲಂವ್ಕ್ ಶಿಕೊಂಕ್ ನಾತ್ಲ್ಲೊ ತರೀ, ತಾಚಾ ಆವಯ್ನ್ ತೊ ಆಪ್ಲೊ ನಿಮಾಣೊ ಪೂತ್ ಮ್ಹಣ್ ಕೊಂಡಾಟ್ಯಾನ್ ವಾಡಯಿಲ್ಲೊ. ಕಶೆಂಯ್ ಒದ್ದಾಡೊನ್, ಉಲಂವ್ಕ್ ಶಿಕ್ತಾನಾ ತಾಚಾ ಉತ್ರಾಂನಿ ಘುಸ್ಪಡ್ ಜಾಂವ್ಚಿ ಸಕ್ಡಾಂಚಾ ಗಮನಾಕ್ ಗೆಲ್ಲಿ ತರೀ, ಕೊಣೆಂಯ್ ತ್ಯಾ ವಿಶಿಂ ಚಡಿತ್ ಖಂತ್ ಕರುಂಕ್ ನಾತ್ಲ್ಲಿ.
ಏಕ್ ದೀಸ್, ಮಿಸಾಕ್ ಗೆಲ್ಲ್ಯಾ ವೆಳಾರ್ ಬಾಪಾಯ್ ಸಾಂಗಾತಾ ಬಸ್ಲ್ಲ್ಯಾ, ಪಾಂಚ್ ವರ್ಸಾಂಚಾ ರೊನಿನ್ ವ್ಹಡ್ಲ್ಯಾನ್ ಮ್ಹಳ್ಳೆಂ:
“ಡ್ಯಾಡಿ, ಡ್ಯಾಡಿ, ಅಳೆ ಪಾದ್ರ್ಯಾಬಾನ್ ಕೆದಿ ವ್ಹಡ್ಲಿ ತೊಪಿ ಘಾಲ್ಯಾ ಪಳೆ!”
ತ್ಯಾ ದೀಸ್ ಭಿಸ್ಪಾಚೆಂ ಮೀಸ್ ಆಸ್ಲ್ಲೆಂ ಆನಿ ಭಿಸ್ಪ್ ಲಾಂಬ್ ತೊಪಿಯೆ ಸಂಗಿಂ, ಆಪ್ಲೆಂ ಸಾಂಪ್ರದಾಯಿಕ್ ನ್ಹೆಸಾಣ್ ನ್ಹೆಸೊನ್ ಮೀಸಾಚಾ ಸಂಭ್ರಮಾಕ್ ಆಲ್ತಾರಿರ್ ರಾವ್ಲ್ಲೊ. ರೊನಿಚಿಂ ಉತ್ರಾಂ ಆಯ್ಕೊನ್ ಭಂವ್ತಣಿಂಚಾ ಸಕ್ಡಾಂನಿ ಘುಂವೊನ್ ಪಳೆತಾನಾ, ಬಾಪಾಯ್ಚೆಂ ಹಳ್ತಾಚೆಂ ಥಾಪಾಡ್, ರೊನಿಚಾ ತಕ್ಲೆಕ್ ಆಪ್ಟಾಲ್ಲೆಂ.
ಅಶೆಂ ವ್ಹಡ್ ಜಾವ್ನ್ ಶಾಳಾಕ್ ಪಾವ್ಲ್ಲ್ಯಾ ರೊನಿನ್ ಕೆಲ್ಲಿಂ ಅತರ್ವಣಾಂ ಆಯ್ಕಾಲ್ಯಾರ್ ಹಾಸಾನಾತ್ಲ್ಲ್ಯಾಂಕ್ ಹಾಸೊ ಯೆತಿತ್.
ಏಕ್ ದೀಸ್ ತಿಸ್ರ್ಯಾ ಕ್ಲಾಸಿಚಾ ಟಿಚರಾನ್, ಭುರ್ಗ್ಯಾಂಕ್ ಲ್ಹಾನ್-ಲ್ಹಾನ್ ಕ್ರಿಮಿ-ಕೀಟಾಂಚಿ ಒಳೊಕ್ ಕರುನ್ ದಿಂವ್ಚಾಕ್, ಘರಾ ಥಾವ್ನ್ ಕಸಲಿಂ ಪುಣಿ ಲ್ಹಾನ್ ಕೀಟಾಂ, ಆರ್ಸ್ಯಾಚಾ ಜಾರಾಂತ್ ಘಾಲುನ್ ಹಾಡುಂಕ್ ಸಾಂಗ್ಲ್ಲೆಂ. ಹರ್ಯೆಕಾ ಭುರ್ಗ್ಯಾಕ್ ಹಿ ಏಕ್ ಕುತೂಹಲಾಚಿ ಗಜಾಲ್ ಜಾಲ್ಲಿ. ಥೊಡ್ಯಾಂನಿ, ಪಿಸೊಳಿಂ ಜಾರಾಂತ್ ಘಾಲುನ್ ಹಾಡ್ಲ್ಲಿಂ, ಥೊಡ್ಯಾಂನಿ, ಮುಯೊ ಆನಿ ಹೆರ್ ಥೊಡ್ಯಾಂನಿ ನಾಕ್ಕುರ್ ಹಾಡ್ಲ್ಲೆ ತರ್, ರೊನಿನ್ ಹಾಡ್ಲ್ಲೆಂ ಜಾರ್ ಪಳೆವ್ನ್ ಭುರ್ಗಿಂ ಕಿಂಕ್ರಾಟ್ ಮಾರ್ನ್ ಧಾಂವ್ಲ್ಲಿಂ.
ರೊನಿಚಾ ಜಾರಾಂತ್, ಜರ್ಲೆ ಆಸ್ಲ್ಲೆ! ತೆಂ ಜಾರ್ ತಾಣೆಂ ಉಗ್ತೆಂ ಕರ್ಚಾ ಪಯ್ಲೆಂ ಟಿಚರಾನ್ ಆಡಾಂವ್ಕ್ ನಾತ್ಲ್ಲೆಂ ತರ್, ರಂಬಾರೊಟ್ ಆನಿಕೀ ವ್ಹಡ್ಲಿ ಜಾತಿ.
ಆನ್ಯೇಕ್ ಪಾವ್ಟಿಂ, ’ಆವಯಾಂಚಾ ದಿಸಾಕ್’ ಏಕ್ ಸೊಭಿತ್ ಕಾರ್ಡ್ ಕರುಂಕ್ ಟಿಚರಾನ್ ಭುರ್ಗ್ಯಾಂಕ್ ಸಾಂಗ್ಲ್ಲ್ಯಾ ವೆಳಾರ್, ರೊನಿನ್ ಸೊಡಯಿಲ್ಲೆಂ ಚಿತ್ರ್ ಆನಿ ಬರಯಿಲ್ಲಿಂ ಉತ್ರಾಂ ಪಳೆವ್ನ್, ಟಿಚರಾಕ್ ಹಾಸ್ಚೆಂಗೀ ರಡ್ಚೆಂ ತೆಂ ಕಳೊಂಕ್ ನಾ.
ರೊನಿನ್ ಆಪ್ಲ್ಯಾ ಆವಯ್ಕ್ ಚಾರ್ ಪಾಯಾನಿ ಚಲ್ಚಾ ಗಾಯ್ಬರಿ ಸೊಡವ್ನ್, ಪಾಟಿರ್ ಆಪುಣ್ ಬಸ್ಲ್ಲೆಂ ಚಿತ್ರ್ ಕೆಲ್ಲೆಂ ಆನಿ ಅಶೆಂ ಬರಯಿಲ್ಲೆಂ: ’ಮಮ್ಮಿ, ಪೋಯ್ರ್ ಬೊಶಿ ಪುಟಯಿಲ್ಲ್ಯಾಕ್ ಮ್ಹಾಕಾ ಗೊವ್ಜಿ ಕರುಂಕ್ ನಾತ್ಲ್ಲ್ಯಾಕ್, ಥೇಂಕ್ಸ್. ದೆಕುನ್, ತುಂವೆಂ ಡ್ಯಾಡಿಚೆ ಪಯ್ಶೆ ಕಾಡ್ಲ್ಲೆ ತೆ, ಹಾಂವೆಂ ಡ್ಯಾಡಿಕ್ ಸಾಂಗೊಂಕ್ ನಾ.’
ಏಕ್ ದೀಸ್ ಫೆಸ್ತಾಕ್ ಘರಾ ಆಯಿಲ್ಲ್ಯಾ ಸೈರ್ಯಾಂ ಪಯ್ಕಿ, ಮೊರ್ಲುಕೆಚಿ ಪಿಡಾ ಆಸ್ಲ್ಲೊ ರೊನಿಚೊ ಮಾಮ್ ಚಲ್ತಾಂ ಚಲ್ತಾನಾ ಲಕೊನ್, ಉದಾರೊಚ್ ಪರ್ತಾಲೊ ಆನಿ ಧರ್ಣಿರ್ ದಡ್ಬಡೊಂಕ್ ಲಾಗ್ಲೊ. ಸಕ್ಡಾಂಕೀ ಆಕಾಂತ್. ಕೊಣೆಂಗೀ ಚಾವಿ ದಿಯಾ ಮ್ಹಳೆಂ ಆನಿ ಆನ್ಯೆಕ್ಲ್ಯಾನ್ ಉದಾಕ್ ಹಾಡುಂಕ್ ಸಾಂಗ್ತಾನಾ ರೊನಿಚಿ ಜೀಬ್ ಹುಳ್ವುಳ್ಳಿ. “ಮಮ್ಮಿ, ಮಾಮ್ ಕಿತೆಂ ಪಿಯೆವ್ನ್ ಟಾಯ್ಟ್ ಜಾಲಾಗೀ?”
ಆವಯ್ಚ್ಯೊ ಕುಟಿ ಪಡ್ತಾನಾ, ಕಿತ್ಯಾಕ್ ತಿಣೆಂ ಮಾರ್ಲೆಂ ಮ್ಹಳ್ಳೆಂ ರೊನಿಕ್ ಸುಸ್ತಾಲೆಂಚ್ ನಾ.
ಚಿಂತುನ್ ಪಳೆವ್ನ್ ಉಲಂವ್ಚಾಂತ್ ಪಾಟಿಂ ತರೀ, ಶಿಕ್ಪಾಂತ್ ಹುಷಾರ್ ಆಸ್ಲ್ಲ್ಯಾ ರೊನಿನ್, ಡಿಗ್ರಿ ಆಪ್ಣಾಯ್ಲಿ.
ಏಕ್ ಕಾಮಾಚೊ ಅವ್ಕಾಸ್ ಆಪ್ಣಾಂವ್ಚಾ ದಿಶೆನ್ ಇಂಟರ್ವ್ಯೂಕ್ ಹಾಜರ್ ಜಾಲ್ಲ್ಯಾ ರೊನಿಲಾಗಿಂ, ಇಂಟರ್ವ್ಯೂ ಕರ್ತೆಲ್ಯಾ ಮಾನೆಸ್ತಾನ್ ಗಂಭೀರಾಯೆನ್ ವಿಚಾರ್ಲೆಂ:
“ಹೆಂ ಕಾಮ್ ಮೆಳ್ಳೆಂ ತರ್, ಮುಕ್ಲ್ಯಾ ಪಾಂಚ್ ವರ್ಸಾಂನಿ ತುಕಾ ಕಿತೆಂ ಜಾಂವ್ಚಿ ಅಬಿಲಾಶಾ ಆಸಾ?”
ಹೆಂ ತಾಚಾ ಜಿಣಿಯೆಂತ್ಲೆಂ ಪಯ್ಲೆಂ ಇಂಟರ್ವ್ಯೂ. ಕಿತೆಂ ವಿಚಾರ್ತಾ ಕೊಣ್ಣಾ ಮ್ಹಣ್ ಎದೊಳ್ಚ್ ಘುಸ್ಪಡ್ಲ್ಲೊ ರೊನಿ, ಆನಿ ಆತಾಂ ಕಿತೆಂ ಜಾಪ್ ದಿಂವ್ಚಿ ತೆಂ ಕಳಾನಾಸ್ತಾಂ ಕಂಗಾಲ್ ಜಾವ್ನ್ ಘಾಮೆಲೊ. ತಾಣೆಂ ಇಂಟರ್ವ್ಯೂ ಕರ್ತೆಲ್ಯಾಕ್ ಸಾರ್ಕೊ ಪಳೆಲೊ. ಶೆಂಬರೊಂ ಇಂಟರ್ವ್ಯೂ ಕೆಲ್ಲ್ಯಾ ತ್ಯಾ ಮಾನೆಸ್ತಾಚಾ ತೊಂಡಾರ್, ಹಾಸೊ ನಾತ್ಲ್ಲ್ಯೊ. ತಾಚೆ ದೊಳೆ, ರೊನಿನ್ ಎದೊಳ್ ಪಳೆಲ್ಲ್ಯಾ ಹೆರಾಂ ಬರಿ ನ್ಹಯ್ಂಚ್. ತೊ ಮಾನೆಸ್ತ್ ಕಿತೆಂ ವಿಚಾರ್ತಾ ತೆಂ ಪುರ್ತೆಂ ಸಮ್ಜನಾಸ್ತಾಂ, ರೊನಿನ್ ಮ್ಹಳ್ಳೆಂ:
“ಸರ್, ಕಾಂಯ್ ಭಿಯೆನಾಕಾತ್ ಸರ್, ಪಾಂಚ್ ವರ್ಸಾಂ ಭಿತರ್ ಖಂಡಿತ್ ಹಾಂವ್ ದುಸ್ರೆಂ ಕಾಮ್ ಪಳೆತಾಂ.”
ತೆಂ ಕಾಮ್ ಮೆಳ್ಳೆಂನಾ ತರೀ, ಉಪ್ರಾಂತ್ ರೊನಿಚಾ ಇಷ್ಟಾಂನಿ ಸಮ್ಜಣಿ ದೀವ್ನ್, ಕಶೆಂಯ್ ಏಕ್ ಕಾಮ್ ಮೆಳ್ಳೆಂ ಮ್ಹಣ್ಯಾಂ. ತ್ಯಾ ಕಾಮಾ ಸಂಗಿಂ ತಾಚಾ ಜೆವ್ಣಾ-ಖಾಣಾಚಿ ರೀತ್ಯೀ ಬದ್ಲೊನ್ ಆಯ್ಲಿ. ಘರಾ ಥಾವ್ನ್ ಕಿತೆಂಯ್ ಹಾಡ್ಚಾ ಬದ್ಲಾಕ್, ಹೊಟೆಲಾಂತ್ಲೆಂ ಖಾಣ್, ಚ್ಹಾ-ಕಾಫಿ ಪಿಯೆಂವ್ಚೆಂ ಸಧಾಂಚೆಂ ಜಾಲೆಂ. ಏಕ್ ದೀಸ್ ಚ್ಹಾ ಪಿಯೆತಾನಾ, ಹೆರ್ ಮೆಜಾಂ ಭರ್ಲ್ಲಿಂ ಪಳೆವ್ನ್, ಲಾಂಬ್ ಕಾಳ್ಯಾ ಕೆಸಾಂಚಿ ಏಕ್ ಸುಂದರ್ ಚಲಿ ತಾಚಾ ಮೆಜಾರ್ ಯೆವ್ನ್ ಬಸ್ಲಿ. ಆಪ್ಲ್ಯಾ ಫೊನಾಂತ್ ಮಗ್ನ್ ಜಾಲ್ಲ್ಯಾ ರೊನಿನ್ ತಕ್ಲಿ ಉಕಲ್ಲಿ. ಚಲಿಯೆನ್ ಹಾಸೊ ದಿಲ್ಯೊ.
“ಹಾಯ್!” ತಿ ಮ್ಹಣಾಲಿ, “ಹ್ಯಾ ಮೆಜಾರ್ ಬಸ್ಲ್ಯಾರ್ ಬೆಜಾರ್ ನಾಮೂ? ತುಜೆ ಕೊಣೀ ಈಷ್ಟ್ ಯೆಂವ್ಚೆ ಆಸಾತ್?”
“ನಾ-ನಾ,” ಚಲಿಯಾಂಲಾಗಿಂ ಸುಡಾಳ್ ಉಲವ್ನ್ ಸವಯ್ ನಾತ್ಲ್ಲೊ ರೊನಿ, ಅಂವ್ಸರಿಂ ಆಪ್ಲ್ಯಾ ಚ್ಹಾಯೆಚೊ ವ್ಹಡ್ಲೊ ಘೊಟ್ ಕಾಡುನ್ ಮ್ಹಣಾಲೊ. “ಮ್ಹಜೆಂ ಜಾಲೆಂ, ಹಾಂವ್ ಚಲ್ತಾಂ.”
“ರಾವ್, ಕಿತ್ಯಾಕ್ ಅಂವ್ಸರ್? ವೇಳ್ ಆನಿಕೀ ಆಸಾ…”
ತಾಚೆಂ ದಫ್ತರ್ ಆಸ್ಲ್ಲ್ಯಾಚ್ ಬಾಂದ್ಪಾಂತ್ ಕಾಮ್ ಕರ್ಚಿ ತಿ ಚಲಿ, ಆಪ್ಣಾಲಾಗಿಂ ಉಲಂವ್ಕ್ ಆಶೆತಾಲಿ ಮ್ಹಳ್ಳೊ ಕುಸ್ಕುಟ್ ದುಬಾವ್ ನಾತ್ಲ್ಲೊ ರೊನಿ, ವಚೊನೀ ಜಾಲ್ಲೊ.
ಏಕ್ ದೀಸ್ ರೊನಿ ಕಾಮಾ ಥಾವ್ನ್ ಘರಾ ವಚೊಂಕ್ ತಯಾರ್ ಜಾತಾನಾಂಚ್, ಪಾವ್ಸ್ ವೊತೊಂಕ್ ಸುರು ಜಾಲೊ. ಆವಯ್ಚಾ ಒತ್ತಾಯೆಕ್ ಲಾಗೊನ್ ಸತ್ರಿ ಘೆವ್ನ್ ಆಯಿಲ್ಲ್ಯಾ ರೊನಿನ್, ಆಪ್ಲಿ ಸತ್ರಿ ಉಸವ್ನ್ ಬಸ್ಸ್ ಸ್ಟೇಂಡಾ ಕುಶಿನ್ ಮೆಟಾಂ ಕಾಡ್ಲಿಂ. ತ್ಯಾಚ್ ವೆಳಾರ್, ಕೆದ್ನಾಂಯೀ ತ್ಯಾಚ್ ಬಸ್ಸ್-ಸ್ಟೇಂಡಾಕ್ ವೆಚಿ ತಿ ಲಾಂಬ್ ಕೆಸಾಂಚಿ ಚಲಿ, ಪಾವ್ಸಾಕ್ ಭಿಜೊನ್ ಚಲೊನ್ ಆಸ್ಲ್ಲಿ.
“ಬರೊ ಪಾವ್ಸ್, ನೇ?” ರೊನಿ ಮ್ಹಣಾಲೊ ತಿಚೆ ಲಾಗ್ಶಿಲ್ಯಾನ್ ಪಾಶಾರ್ ಜಾತಾಸ್ತಾನಾ.
“ಹ್ಯಾಚ್ಚ್ ವೆಳಾರ್ ಯೇಜಾಯ್ಗಿ!” ತಿ ಮ್ಹಣಾಲಿ ಭುಜಾಂ ಹಾಲವ್ನ್. ತಿಚಾ ಕೆಸಾಂ ಥಾವ್ನ್ ಪೊವ್ಳೆ ದೆಂವ್ತಾಲೆ.
ಆಪ್ಣಾಚಿ ಸತ್ರಿ ತಿಚೆಲಾಗಿಂ ವಾಂಟುನ್ ಘೆಂವ್ಚೊ ಸಂದ್ರಾಪ್ ಆಸ್ಲ್ಲೊ ತರೀ, ರೊನಿಕ್ ತೆಂ ಮತಿಕ್ ಗೆಲೆಂನಾ.
“ಚತ್ರಾಯೆನ್ ಚಲ್ ಹಾಂ, ಆಂವ್ಸರ್ ಕರ್ನಾಕಾ, ದಾಂಟೊನ್ ಪಡ್ಶಿ!” ಇತ್ಲೆಂ ಮ್ಹಣೊನ್ ತೊ ಚಲ್ತೆಚ್ ರಾವ್ಲೊ.
ಅಶೆಂ ಆಪಾಲಿಪಾ, ಥಂಯ್-ಹಾಂಗಾ ತಾಂಚಿ ಭೆಟ್ ಜಾಲ್ಯಾರೀ, ತ್ಯಾ ಚಲಿಯೆಚಾ ಆಶೆ ಪರ್ಮಾಣೆ, ರೊನಿಲಾಗಿಂ ಸಳಾವಳ್ ಜಾಲಿಚ್ ನಾ.
ತಶೆಂಚ್ ದೀಸ್ ಪಾಶಾರ್ ಜಾಲೆ ಆನಿ ಬರ್ಯಾ ಪಾವ್ಸಾಚೊ ಆನ್ಯೇಕ್ ದೀಸ್ ಉದೆಲೊ. ತ್ಯಾ ದಿಸಾ ರೊನಿನ್ ಸತ್ರಿ ಹಾಡುಂಕ್ ನಾತ್ಲ್ಲಿ. ಭಿಜೊನ್ ಬಸ್ಸ್ ಸ್ಟೇಂಡಾಕ್ ಧಾಂವ್ಚಾ ರೊನಿಕ್, ಸತ್ರಿ ಧರ್ನ್ ಚಲ್ಚಿ ತಿಚ್ ಚಲಿ ಭೆಟಾಜಾಯ್ಗೀ!
“ಧಾಂವ್ತಾಯ್ ಕಿತ್ಯಾಕ್, ಮ್ಹಜಿ ಸತ್ರಿ ವ್ಹಡ್ಲಿ ಆಸಾ, ದೊಗಾಂಕ್ ಖಂಡಿತ್ ಪುರೊ…” ತಿ ಮ್ಹಣಾಲಿ ತಾಕಾ ಆಹ್ವಾನ್ ದೀವ್ನ್.
ಪಾವ್ಸಾಚೆ ಥೆಂಬೆ ದೊಳ್ಯಾಂತ್ಲೆ ಪುಸುನ್, ರೊನಿ ಎಕಾಚ್ಚಾಣೆ ರಾವ್ಲೊ. ಪಳೆತಾನಾ, ತಿಚ್ಚ್, ತಾಕಾ ತವಳ್-ತವಳ್ ಮೆಳ್ಚಿ ಚಲಿ.
“ಛೆ-ಛೆ!” ತೊ ಮ್ಹಣಾಲೊ ಅಂವ್ಸರಿಂ. “ತುಕಾ ಕಿತ್ಯಾಕ್ ರಗ್ಳೆ?”
“ರಗ್ಳೆ-ಬಿಗ್ಳೆ ಕಾಂಯ್ ನಾಂತ್.” ತಿಣೆ ಮ್ಹಳೆಂ ತಾಚಾ ಮಾತ್ಯಾಕ್ ಸತ್ರಿ ಧರುನ್. “ಮ್ಹಜೆಂ ನಾಂವ್ ರಿತಾ, ತುಜೆಂ?” ಮೆಳ್ಲ್ಲೊ ಅವ್ಕಾಸ್ ಸೊಡುಂಕ್, ತಿಕಾಯೀ ನಾಕಾ ಆಸ್ಲ್ಲೊ.
“ರೊ-ರೊನಿ,” ತೊ ಮ್ಹಣಾಲೊ ದಾಕ್ಷೆಣೆನ್. “ಮಾರಿಚೊ ಪಾವ್ಸ್ ಹ್ಯಾಚ್ ವೆಳಾರ್ ಯೇಜೆಗಿ?”
ರಿತಾ ಹಾಸ್ಲಿ ಆನಿ ಕಿತೆಂಗೀ ಘುಸ್ಪಡೆಚೆಂ ಉಲಂವ್ಕ್ ರೊನಿಚಿ ಜೀಬ್ ಹುಳ್ವುಳ್ತಾಲಿ ತರೀ, ತ್ಯೊ ಸುಂದರ್ ಹಾಸೊ ಪಳೆವ್ನ್ ಉತ್ರಾಂ ಭಾಯ್ರ್ ಯೇನಾ ಜಾಲಿಂ. ದೆವಾನ್ ಬರ್ಯಾಕ್ಚ್ ಕೆಲೆಂ ಆಸ್ತೆಲೆಂ. ತೊ ಸತ್ರೆ ಪಂದಾ ಘುಸ್ಲೊ.
ಪಾವ್ಸಾನ್, ತಾಂಚೆ ಮಧೆಂ ಕೆಲ್ಲಿ ಒಳೊಕ್, ಎಕಾ ವರ್ಸಾಂ ಉಪ್ರಾಂತ್, ರೊನಿಚಾ ಆನಿ ರಿತಾಚಾ ಕಾಜಾರಾಂತ್ ಸಂಪ್ಲಿ.
ಕಾಜಾರಾಚಾ ಸಂದರ್ಭಾರ್, ರೊನಿ ಉಟೊನ್ ಆಯಿಲ್ಲ್ಯಾಂಚೊ ಉಪ್ಕಾರ್ ಬಾವ್ಡುಂಕ್ ಉಲಯ್ಲೊ. ಪುಣ್ ಹೆ ಪಾವ್ಟಿಂ, ಉಲಂವ್ಚಾಂತ್ ರೊನಿ ಘುಸ್ಪಡ್ಲೊನಾ.
“ತುಮ್ಕಾಂ ಸರ್ವಾಂಕ್, ಮ್ಹಜೊ ಘುಸ್ಪಡಿ ಸ್ವಭಾವ್ ಕಾಂಯ್ ನವೊ ನ್ಹಯ್!” ರೊನಿನ್ ಮ್ಹಳೆಂ ಬಾರೀಕ್ ಹಾಸ್ಯಾ ಸಂಗಿಂ.
ತಾಚೊ ಸ್ವಭಾವ್ ಜಾಣಾಸ್ಲ್ಲ್ಯಾ ಸರ್ವಾಂನಿ ತಾಳಿಯೊ ಪೆಟ್ಲ್ಯೊ.
ಉಪ್ರಾಂತ್ ತಾಣೆಂ ಮಟ್ವ್ಯಾನ್, ಪಾವ್ಸಾಚಿ ಕಾಣಿ ಸಾಂಗ್ಲಿ. “ತ್ಯಾ ದಿಸಾ ರಿತಾನ್ ಸತ್ರೆ ಪಂದಾ ದಿಲ್ಲೊ ಆಸ್ರೊ, ಮ್ಹಜಾ ಜಿಣಿಯೆಂತ್ ಏಕ್ ಘುಂವ್ಡಿ ಆಸಾ ಕೆಲ್ಲೊ ನವೊ ರಸ್ತೊ ಜಾಲೊ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ ಕೊಣ್ಣಾಂ! ರಿತಾ ಪುಣಿ ನ್ಹಯ್ ಜಾಲ್ಲೆಂ ತರ್, ಹಾಂವ್ ಆಜುನೀ ತಸೊಚ್ಚ್ ಆಸ್ತೊಂ!” ತಿತ್ಲೆಂ ಮ್ಹಣೊನ್ ತಾಣೆಂ ಆಪ್ಲೊ ಗ್ಲಾಸ್ ಉಕಲ್ಲೊ.
“ಮ್ಹಜಾ ಹಿರೊಯಿಣಿಕ್, ರಿತಾಕ್…”
ಸರ್ವಾಂನಿ ಅವಾಜ್ ಕರ್ನ್ ಶಾಭಾಸ್ಕಿ ದಿತಾನಾ ರಿತಾ ಹಾಸೊನ್ ಉಟ್ಲೆಂ ಆನಿ ತಾಕಾ ಆಧಾರ್ ದೀಂವ್ಕ್ ಮ್ಹಳ್ಳೆಬರಿ, ಮೊಗಾನ್ ಕೀಸ್ ದೀಲಾಗ್ಲೆಂ.
■ ಸುನಂದ್
