ಕಾವ್ಯಾಂತ್ ‘ಗೊಬ್ರಾ’ ಚೆಂ ರೂಪಕ್ ದೊಡ್ಯಾ ಧಾರಿಚ್ಯಾ ತಲ್ವಾರಿಪರಿಂ. ಗೊಬ್ರಾಂತ್ ಸಗ್ಳೆಂ ಅಂತ್ಯ್ ಜಾತಾ ಆನಿ ಗೊಬ್ರಾಥಾವ್ನ್ ನವಿ ಅಂಕ್ರಿ ಉದೆಂವ್ಚಿ ಸಾಧ್ಯತಾಯ್ ಆಸಾ. ಕಥೊಲಿಕ್ ಪಾತ್ಯೆಣೆಂತ್ ಗೊಬ್ರಾಂತ್ ಸುರು ಜಾಂವ್ಚೆಂ ಉಜ್ಯಾಂತ್ ಅಕೇರ್ ಜಾತಾ. ಕಾಂಯ್ ಹೆರ್ ಥೊಡ್ಯಾ ಪಾತ್ಯೆಣೆಂನಿ ಉಜ್ಯಾಂತ್ ಸುರು ಜಾಂವ್ಚೆಂ ಗೊಬ್ರಾಂತ್ ಸಂಪ್ತಾ.
ಜ್ಯಾ ದಿಸಾ ಹೊ ದೇಶ್ ಸ್ವತಂತ್ರ್ ಜಾಲಾ, ತೆಚ್ ದಿಸಾ ಪಾಸುನ್ ಹ್ಯಾ ದೆಶಾಂತ್ ಗೊಬ್ರಾಚಿಂ ‘ಲೆಕಾಂ’ ಸುರು ಜಾಲ್ಯಾಂತ್ ಮ್ಹಳ್ಯಾರ್ ಚೂಕ್ ನಾ. ಗಡಿ ಥಾವ್ನ್ ಗೋದ್ರಾ ಪರ್ಯಾಂತ್ – ಪೆಟವ್ನ್, ಜಳವ್ನ್, ಗೊಬೊರ್ ಕರ್ಚೆಂಚ್ ಆಪ್ಲೆಂ ‘ಕೊಮನ್ ಮಿನಿಮಮ್ ಪ್ರೋಗ್ರಾಂ’ ಕರುನ್ ಘೆತ್ಲಲೆ ಆನಿ ಹ್ಯಾಚ್ ಲೆಕಾಂಚೇರ್ ಪ್ರಭುತ್ವಾಚಿ ಗಾದಿ ಚಡ್ಲಲೆ ಆಜ್ ದೇಶ್ಚ್ ವಿಕುನ್ ಖಾಂವ್ಚೆ ಪರ್ಯಾಂತ್ ಪಾವ್ಲ್ಯಾತ್. ತೆಂ ತಾಂಚೆಂ ಸಾಧನ್ ಮ್ಹಣ್ಚೆಪ್ರಾಸ್ ತಾಂಚ್ಯಾ ಲೆಕಾಂಕ್ ಪಿಸ್ವಾಲ್ಲ್ಯಾಂಚೆಂ ಕುಡ್ಡೆಂಪಣ್ ಮ್ಹಳ್ಯಾರ್ ಚಡ್ ಸಾರ್ಕೆಂ. ತಾಣಿ ಹಾಂಚ್ಯಾ ಕಪಾಲಾಕ್ ಗೊಬೊರ್ ಲಾಯ್ತಾನಾ, ಹಾಣಿ ಭುಲ್ಚ್ಯಾ ಬದ್ಲಾಕ್ ಭಕ್ತೆನ್ ಧಾಂಪ್ಲ್ಲೆ ದೊಳೆ ಉಗ್ತೆ ಕೆಲ್ಲೆ ತರ್ ?
ದೇಶಾಭಿಮಾನಾಚ್ಯಾ ನಾಂವಾನ್ ದುಸ್ಮಾನ್ಕಾಯೆಚೊ ಉಜೊ ಲಾವ್ನ್ ಪ್ರಭುತ್ವಾಚೆಂ ಸುಖ್ ಭೊಗ್ತೆಲ್ಯಾಂಚಿಂ ಭುರ್ಗಿಂ ಆಜ್ ವಿದೇಶಾಂನಿ ಸುಶೆಗಾಚೆಂ ಜಿವಿತ್ ಸಾರುನ್ ಆಸ್ತಾನಾ, ಕಪಾಲಾರ್ ಲಾಯಿಲ್ಲ್ಯಾ ಗೊಬ್ರಾಂತ್ ಸೆಜಾರ್ಚ್ಯಾ ಘರಾಂಕ್ ಉಜೊ ದೀಂವ್ಕ್ ಗೆಲ್ಲೆ ಆನಿ ತಾಂಚಿ ಸಂತತಿ ಬಂದ್ಕಣೆಂತ್ ಕುಸೊನ್ ಆಸಾ. ಆನಿ ಜೆಸಿಬಿ ಲಾವ್ನ್ ಖೊಂಡ್ಲೆಲಿಂ ತಾಂಚ್ಯಾ ಭಾಟಾಂತ್ಲಿಂ ಮಾತಿ ಭಾಂಗ್ರಾಮೊಲಾಕ್ ದರ್ಯಾವಾಟೆನ್ ವಿದೇಶಾಂನಿ ಪಾವ್ತಾ, ಉದ್ಕಾಚಿ ಝರ್ ಸುಕೊನ್ ಯೆತಾ, ನಂಯೊ ಗುಂವ್ತಾತ್, ರಾನಾಂ ಪೆಟ್ತಾತ್.
ದ್ವೇಶಾಚ್ಯಾ ಜಯ್ಲಾಂತ್ಲಿ ಸುಟ್ಕಾ ಜೊಡುನ್ ಭಾಯ್ರ್ ಯೆತಾನಾ, ಗೊಬ್ರಾಚ್ಯಾ ಲೆಕಾಂನಿ ಪ್ರಭುತ್ವಾಚೆ ಗಾದಿಯೆರ್ ಚಡೊನ್, ಮಾತಿ, ರಾನ್ ಆನಿ ಉದಕ್ ಸಯ್ತ್ ಸೊಡಿನಾಸ್ತಾನಾ ವಿಕ್ಲಲೆ ವಿಲಾಸಿ ನಿವೃತ್ತ್ಪಣಾಕ್ ವಿದೇಶಾಕ್ ಪಾವ್ತಲೆ. ಉರ್ತಲೊ ಫಕತ್ ಗೊಬೊರ್ ಮಾತ್ರ್.
ರಗ್ತಾಂಚೊಂ ಖೆಳ್ ತಸಲಿ ನಿರ್ಲಿಪ್ತ್ ಸುರಾಚಿ ಕವಿತಾ ಬರಯಿಲ್ಲ್ಯಾ ಕವೀಕ್ ನಿಮಾಣೆಂ ” ತುಮ್ಕಾಂ . . . ಪಾತ್ಯೆಂವ್ಚಿ ಗರ್ಜ್ ತರೀ ಕಿತೆಂ ಆಸ್ಲ್ಲಿ!?” ಮ್ಹಳ್ಳೊ ಪ್ರಶ್ನ್ ವಿಚಾರುಂಕ್ ಮುಕ್ಲಿ ಪಿಳ್ಗಿ ತರೀ ಆಸ್ತೆಲಿ ಮ್ಹಳ್ಳೊ ವಿಶ್ವಾಸ್ ಆಸಾ, ಮ್ಹಾಕಾ ತೋಯ್ ನಾ.
ಕಾರಣ್ – ಏಕ್ ಪಾವ್ಟಿಂ; ಭುಕೆಚ್ಯಾ ತಾಟಾಂತ್ ದ್ವೇಶ್ ಭರುನ್ ದಿತೆಲ್ಯಾಂಚಿಂ, ಉದ್ಕಾಪ್ರಾಸ್ ಸಾಂಗಾತಾ ಬುಡ್ತೆಲ್ಯಾಕ್ ಭಿಯೆಂವ್ಕ್ ಕರ್ತೆಲ್ಯಾಂಚಿಂ, ಉಜ್ವಾಡ್ ಮಾಗ್ಲೆಲ್ಯಾಂಚಿಂ ಘರಾಂ ಜಳಯ್ತೆಲ್ಯಾಂಚಿಂ, ಪಿಡೆಸ್ತಾಂಕ್ ಮರ್ತೆಲ್ಯಾಂಚೆರ್ ದೂರ್ ಘಾಲುಂಕ್ ಶಿಕಯ್ತೆಲ್ಯಾಂಚಿಂ – ಸಂತತೆಚಿ ಡಿಎನ್ಎ ನಿರ್ನಾಮ್ ಜಾವ್ನ್ ತೊ ಗೊಬೊರ್ ದರ್ಯಾಂತ್ ವಾಳ್ಳ್ಯಾ ಶಿವಾಯ್ – ಗೊಬ್ರಾಚಿಂ ಲೆಕಾಂ ರಾವ್ತೆಲಿಂ ಮ್ಹಳ್ಳೊ ವಿಶ್ವಾಸ್ ಮ್ಹಾಕಾ ತರೀ ಸದ್ದ್ಯಾಕ್ ನಾ!
ಹಾಂವೆ ಸುರ್ವಾತೇಕ್ ಸಾಂಗ್ಲಲೆಪರಿಂ ಕಾವ್ಯಾಂತ್ – ಗೊಬ್ರಾಚೆಂ ‘ರೂಪಕ್’ ದೊಡ್ಯಾ ಧಾರಿಚ್ಯಾ ತಲ್ವಾರಿಪರಿಂ.
■ ಎಚ್ಚೆಮ್, ಪೆರ್ನಾಲ್
ತುಂವೆಂ ಸಗ್ಳೆಂ ಸಮಾ ಕರ್ತಾಂ ಮ್ಹಳ್ಳೆಂಯ್
‘ To make great again’
ಪೂಣ್ ಕಿತೆಂ ಆನಿ ಕೊಣಾಕ್ ಮ್ಹಣ್ ಸಾಂಗ್ಲೆಂನಾಂಯ್.
ಲೇಕಾಚಾರ್ ಕೆನ್ನಾಂಯ್ ಸೊಂಪೊಚ್ ಆಸ್ಲ್ಲೊ-
ಭುಕೆಲ್ಲ್ಯಾಂಕ್ ವಿಂಗಡ್ ಕರ್ ಲಾಲ್ಹಾನ್ ಕುಡ್ಕ್ಯಾಂತ್,
ರಾಗಾಕ್ ಗುಣ್ಸಿ, ಜಳ್ತಾಪರ್ಯಾಂತ್.
ಹೆ ರಿತಿಂ ತಾಟಾಂ ಘೇವ್ನ್ ಆಯಿಲ್ಲೆ
ಪೋಟ್ ಭರುಂಕ್,
ತುಂವೆಂ ತಾಂತು ನಾಂವಾಂ ಭರ್ಲಿಂಯ್,
ದ್ವೇಶ್ ಕರುಂಕ್.
ಸೆಜಾರ್ಯಾಂಕ್ ದುಸ್ಮಾನ್ ಕೆಲೆಂಯ್.
ಬುಡ್ತೆಲ್ಯಾನ್ ಉದ್ಕಾಪ್ರಾಸ್, ಸಾಂಗಾತಾ
ಬುಡ್ತಲ್ಯಾಕ್ ಭಿಂಯೆಶೆಂ ಕೆಲೆಂಯ್.
ತುಂ ಹಾಂಚೊ ಸಾಂಗಾತಿ ಮ್ಹಳೆಂಯ್.
ಪೂಣ್ ತುಜಿಂ ಭುರ್ಗಿಂ ರೇಶನಾಲಾಯ್ನಿರ್ ರಾವ್ಲಿಂನಾಂತ್,
ಭಾಡೆಂ ಆನಿ ಜೆವ್ಣಾಂಮಧೆಂ ವಿಂಚ್ಚೆ ಸ್ಥಿತೆಕ್
ಕೆನ್ನಾಂಚ್ ಪಾವ್ಲಿಂನಾಂತ್.
ಎಕಾ ಹಾತಿಂ ಬಾವ್ಟೊ ಹಾಲಯ್ತ್
ಆನ್ಯೇಕಾ ಹಾತಾಂತ್ ಬಲ್ಸಾಂ ಫಾರ್ಲೆಂಯ್.
ಹಾಂಕಾಂ ಸಿನೊಲ್ ದಾಕಯ್ತ್ ದಾಕಯ್ತ್
ಪಾಂಯಾಪಂದ್ಲಿ ಧರ್ಣ್ ಖೊಂಡ್ಲೆಂಯ್.
ಹಾಂಕಾಂ ತುಂವೆಂ ಜಾಪಿಂ ಬದ್ಲೆಕ್
ದುಸ್ಮಾನ್ ದಿಲೆಯ್.
ಸಾಂಖ್ಯಾಂ ಬದ್ಲೆಕ್ ದೊರೆ,
ಉಜ್ವಾಡ್ ಮಾಗ್ಲ್ಲ್ಯಾ ಹಾಂಕಾ
ಹಾಂಚಿಂಚ್ ಘರಾಂ ಜಳಂವ್ಕ್ ಕೆಲೆಂಯ್.
ತುಜಿ ಚಲಾಕಿ ಇತ್ಲಿಚ್:
ಲುಟುನ್ ಗೆಲ್ಲ್ಯಾಕ್
ಖಜಾನ್ ರಾಕುಂಕ್ ನಮ್ಯಾರ್ಚೆಂ
ಪಿಡೆಸ್ತಾಂಕ್, ಮರ್ತೆಲ್ಯಾಂಚೆರ್
ದೂರ್ ಘಾಲುಂಕ್ ಶಿಕಂವ್ಚೆಂ.
ತುಂ ಎಕ್ಲೊ ಮಾತ್ ನಂಯ್,
ತುಜೆ ತಸ್ಲೆ ಜಾಯ್ತೆ ಯೇವ್ನ್ ಗೆಲೆ-
ಕ್ರೂರ್ಪಣಾಕ್ ಬಳ್ ಮ್ಹಣ್ ಲೆಕ್ತಲೆ,
ಸತಾಚಾ ತಾಳ್ಯಾಕ್ ಪರ್ಜೆಗಾಝ್ ಮ್ಹಣ್ ಚಿಂತ್ಲೆಲೆ.
ಮುಕ್ಲಿ ಪಿಳ್ಗಿ ಅಜ್ಯಾಪ್ಚಿ ನಾಂ
ತುಮಿಂ ಹಾಂಕಾ ಕಶೆಂ ಬನಾಯ್ಲಿಂ
ಬಗಾರ್ ತಕ್ಲಿ ಧಾಡಾಯ್ತಲಿ
ತುಮ್ಕಾ ಪಾತ್ಯೆಂವ್ಚಿ ಗರ್ಜ್ ತರೀ
ಹಾಂಕಾ ಕಿತೆಂ ಆಸ್ ಲ್ಲಿ!?
■ ಕಿಶೂ, ಬಾರ್ಕುರ್.
