ವೆಗಾನ್ ಬದ್ಲೊನ್ ಆಸ್ಚ್ಯಾ ಪ್ರಸ್ತುತ್ ಕಾಳಾರ್ ಕ್ರಿಸ್ತೀ ಭಾವಾಡ್ತಿ ಲೊಕಾನ್ ಸತ್ ಆನಿ ಶಾಂತಿಚೆ ದೂತ್ ಜಾಂವ್ಚ್ಯಾಕ್ ಗೊಂಯ್ ಆನಿ ದಮನ್ ಆರ್ಚ್ ಬಿಸ್ಪ್ ಕಾರ್ಡಿನಲ್ ಫಿಲಿಪ್ ನೇರಿ ಫೆರಾವೊ ಹಾಣಿ ಉಲೊ ದಿಲೊ. ಸುಕ್ರಾರಾ, ದಶೆಂಬರ್ 5 ವೆರ್ ಮಂಗ್ಳುರ್ಚ್ಯಾ ಸಾಂತ್ ಅಂತೊನಿ ಆಸ್ರ್ಯಾಚಾ ಸಂಭ್ರಮ್ ಸಭಾಸಾಲಾಂತ್ ಬದಲ್ಚ್ಯಾ ಕಾಳಾರ್ ಕ್ರೀಸ್ತಾಚಿ ಸಾಕ್ಸ್ : ನತಾಲಾಂಚೊಂ ನಿಯಾಳ್ ಹ್ಯಾ ವಿಶಯಾಚೆರ್ ಮಾಂಡುನ್ ಹಾಡ್ಲೆಲ್ಯಾ ವಿಶೇಸ್ ಕಾರ್ಯಕ್ರಮಾಕ್ ಚಾಲನ್ ದೀವ್ನ್ ಮುಕೆಲ್ ಉಲವ್ಪ್ ತಾಣೆ ದಿಲೆಂ.
ಕೊಂಕಣಿ ಕಥೊಲಿಕ್ ವಕೀಲಾಂಚೊಂ ಸಂಘ್, ಮಂಗ್ಳುರ್ ಹಾಣಿ ಮಂಗ್ಳುರ್ ದಿಯೆಸೆಜಿಚ್ಯಾ ಲಾಯಿಕ್ ಅಯೋಗಾ ಸಾಂಗಾತಾ ಮೆಳುನ್ ಹೆಂ ಕಾರ್ಯೆಂ ಮಾಂಡುನ್ ಹಾಡ್ಲಲೆಂ.
ಆಪ್ಲ್ಯಾ ಉಲವ್ಪಾಂತ್ ಪಾಪಾ ಫ್ರಾನ್ಸಿಸಾಚಿಂ ಉತ್ರಾಂ ಆನಿ ಪತ್ರಾಂಚೊಂ ದರಬಸ್ತ್ ಉಲ್ಲೇಕ್ ಕೆಲ್ಲ್ಯಾ ಕಾಡ್ದಿನಲ್ ಫೆರಾವೋನ್ ಆಮ್ಕಾಂ ಶಾಂತಿಚೆ ಶಿಲ್ಪಿ ಜಾಂವ್ಚೆಂ ಆಪವ್ಣೆಂ ಮೆಳ್ಳಾಂ ಆಸ್ತಾ ಫಕತ್ ಸಮಡ್ತಿ ಭಿತರ್ ಮಾತ್ ನಯ್, ಹೆರ್ ಸಮಡ್ತಿಚ್ಯಾ ಲೊಕಾ ಸವೆಂಯ್ ಸದಾಂಚ್ ಸಂವಾದಾಂತ್ ಆಸೊಂಕ್ ತಾಣೆ ಉಲೊ ದಿಲೊ. ಸಾಂಗಾತಾ ವಕೀಲ್, ಉದ್ಯಮಿ, ಪತ್ರ್ಕರ್ತಾಂನಿ ಆಪ್ಲ್ಯಾ ವಾವ್ರಾತಳಾರ್ ಕ್ರೀಸ್ತಾಚಿಂ ಮೊಲಾಂ ಉಕಲ್ನ್ ಧರುಂಕ್ ಆನಿ ಅನ್ಯಾಯಾ ವಿರೋದ್ ಮೊನೆ ರಾವಾನಾಸ್ತಾನಾ ಸಮಾಜೆಂತ್ ಮೆರೆರ್ ಜಿಯೆತೆಲ್ಯಾಂ ತರ್ಫೆನ್ ತಾಳೊ ಉಬಾರುಂಕ್ ಉಲೊ ದಿಲೊ.
ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚೊ ಕುಲಪತಿ ಮಾ| ದೊ| ಪ್ರವೀಣ್ ಮಾರ್ಟಿಸ್ ಹಾಣಿ ಪ್ರತಿಕ್ರಿಯಾ ದೀವ್ನ್ ಮಂಗ್ಳುರ್ಚ್ಯಾ ಪ್ರಸ್ತುತ್ ಪರಿಗತೆಂತ್ ಬದ್ಲಾವಣ್ ಕಶಿ ಹಾಡುಂಯೆತಾ ಮ್ಹಳ್ಳೆ ವಿಶ್ಯಾಂತ್ ಆಪ್ಲೆ ಮತ್ ಮಾಂಡ್ಲೆ.
ಉಲವ್ಪಾಂಚೇರ್ ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚೊ ವಿಶ್ರಾಂತ್ ಕುಲಸಚಿವ್ ಡಾ. ಆಲ್ವಿನ್ ಡೆ ಸಾ ಹಾಣಿ ಸಂವಾದ್ ಚಲವ್ನ್ ವೆಲೊ.
ಮಂಗ್ಳುರ್ ದಿಯೆಸೆಜಿಚೊ ಬಿಸ್ಪ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಣಿ ಅಧ್ಯಕ್ಷೀಯ್ ಉಲವ್ಪಾಂತ್ ” ಸಮಾಜೆಚೇರ್ ಅನ್ಯಾಯ್, ಫಟ್ ಪ್ರಚಾರ್, ಅಕ್ರಮ್ ಜಾತಾನಾ ಮಾದ್ಯಮಾಂ ವಾಪಾರುನ್ ಆಮಿ ಪ್ರವಾದಿಪರಿಂ ಖಂಡನ್ ಕರುಂಕ್ ಜಾಯ್. ಸಾಂಗಾತಾ ಆಮ್ಚ್ಯಾ ಕಾಳ್ಜಾಂತ್ ಜಿಯೆಂವ್ಚೊ ಕ್ರೀಸ್ತ್ ಹರೇಕ್ಲ್ಯಾಚಾ ಕಾಳ್ಜಾಂತ್ ಜಿಯೆತಾ ಮ್ಹಣ್ ಪಾಚಾರುಂಕ್ ಜಾಯ್” ಮ್ಹಳೆಂ.
ಭಯ್ಣ್ ರೆನ್ಸಿ ಎಸ್.ಆರ್.ಎ. ಹಿಣೆ ಕಾರ್ಯೆಂ ಚಲವ್ನ್ ವೆಲೆಂ. ಕೊಂಕಣಿ ಕ್ಯಾಥೊಲಿಕ್ ವಕೀಲಾಂಚ್ಯಾ ಸಂಘಾಚೊ ಅಧ್ಯಕ್ಷ್ ಅಡ್ವೊಕೇಟ್ ಸುಶಾಂತ್ ಸಿ. ಎ. ಸಲ್ಡಾನಾ ಹಾಣಿ ಯೆವ್ಕಾರ್ ಮಾಗ್ಲೊ. ಕಾರ್ಯದರ್ಶಿ ಲೋಲಿನಾ ಡಿ ಸೊಜಾ ಹಿಣೆ ದಿನ್ವಾಸ್ ಪಾಟಯ್ಲೆ.
ಕಾರ್ಯಾಕ್ ವಿಶ್ರಾಂತ್ ಬಿಸ್ಪ್ ಅ| ಮಾ| ದೊ| ಲುವಿಸ್ ಪಾವ್ಲ್ ಸೊಜ್, ಲಾಯಿಕ್ ಆಯೋಗಾಚೊ ನಿರ್ದೇಶಕ್ ಮಾ| ಜೆ. ಬಿ. ಕ್ರಾಸ್ತಾ, ದಕ್ಷಿಣ ಕನ್ನಡ ಜಿಲ್ಲ್ಯಾಚೊ ಪ್ರಧಾನ್ ಸರ್ಕಾರಿ ವಕೀಲ್ ಎಂ. ಪಿ. ನೊರೊನ್ಹಾ, ಯಾಜಕ್ , ಧರ್ಮ್ ಭಯ್ಣಿ ಆನಿ ವಕೀಲ್ – ಲಾಯಿಕ್ ಮುಕೆಲಿ ಹಾಜರ್ ಆಸ್ಲೆ.
