ಹ್ಯಾ 2025 ದಸೆಂಬ್ರ್ 4-ವ್ಯೆರ್ USD/INR ವಿನಿಮಯ್ ರೇಟ್ 90.0171 ಜಾಲಿ. ಅಶೆಂ ಚರಿತ್ರೆಂತ್ ಪೈಲ್ಯೆ ಪಾಟಿಂ ರುಪೈ ಇತ್ಲೊ ಅಸ್ಕತ್ ಜಾಂವ್ಚೊ. ವೆಗಿಂಚ್, ಸೆಂಚುರಿ ಮಾರಿತ್ ತೆಂ ಖಂಡಿತ್.
ಚಿಂತ್ಯಾಂ, ಮೋದಿ ಪ್ರಧಾನ್ ಮಂತ್ರಿ ನಾತ್ಲೊ. ಭಾಜಪಾ ವಿರೋಧಿ ಪಕ್ಷ್ ಆಸ್ತಿ. ಜಶೆಂ 2014 ಮಾಯ್ ಮಹಿನ್ಯಾಚ್ಯಾ ಪೈಲೆಂ. ಮೋದಿ ಕಿತೆಂ ಮ್ಹಣ್ತೊ? ಹೆಂ ಕಾಲ್ಪನಿಕ್ ಸವಾಲ್ ನಹಿಂ. ಖರೆಂಚ್, 2013 ಅಗೋಸ್ತಾಂತ್ ತವಳ್ ಗುಜರಾತ್ ರಾಜ್ಯಾಚೊ ಮುಖೆಲ್ ಮಂತ್ರಿ ನರೆಂದ್ರ್ ಮೋದಿಕ್ ಭಾಜಪಾನ್ ಆಪ್ಲೊ ಪ್ರಧಾನ್ ಮಂತ್ರಿ ಉಮೇದ್ವಾರ್ ಮ್ಹಣ್ ನೆಮ್ತಚ್, ತಾಣೆಂ ಹ್ಯಾ ವಿನಿಮಯ್ ರೇಟಿ ವಿಷಿಂ ಕಿತೆಂ ಟ್ವೀಟ್ ಕೆಲ್ಲೆಂ? ಉಗ್ಡಾಸ್ ಆಸಾ-ಗೀ? ತ್ಯಾ ದೀಸಾ, ಹಿ ರೇಟ್ 64.11 ಜಾಲ್ಲಿ:
“ದೇಶಾಂತ್ ಅಸಲಿ ಆರ್ಥಿಕ್ ಸಂಕಶ್ಟಾಚಿ ಪರಿಸ್ಥಿತಿ ಯೆತೆಲಿ ಮ್ಹಣ್ ಚಿಂತುಂಕ್ ಲೆಗುನ್ ನಾಂ. ಜೆದ್ನಾಂ ಸಂಕಶ್ಟಾ ವೆಳಾರ್, ದೇಶಾಚ್ಯೆಂ ಫುಡಾರ್ಪಣ್ ದಿಶಾಹೀನ್ ಆಸ್ತಾ, ತೆದ್ನಾಂ ಪರ್ಜ್ಯೆನ್ ನಿರಾಶಾ ಶಿವಾಯ್ ಕಿತೆಂ ಕರುಂಕ್ ಜಾತಾ?” – 19 ಅಗೋಸ್ತ್ 2013, ನರೆಂದ್ರ ಮೋದಿ, ಪ್ರಧಾನ್ ಮಂತ್ರಿ ಪದ್ವೆಚೊ ಭಾಜಪಾ ಉಮೇದ್ವಾರ್.
ವಯ್, ಮೋದಿ! ಚವ್ದಾ ವರ್ಸಾಂ ಸಂಪ್ಲಿಂ. ದೇಶಾಚ್ಯೆಂ ಫುಡಾರ್ಪಣ್ ತುಜ್ಯಾ ಹಾತಿಂ ಯೇವ್ನ್. ಆತಾಂ ತುಜ್ಯಾ ತೊಂಡಾಕ್ ಕಿತ್ಯಾಕ್ ಬೀಗ್ ಮಾರ್ಲಾಂ? the nation wants to know, ತುಜ್ಯಾ ಕುಡ್ಡ್ಯಾ ಭಕ್ತ್ ಆರ್ನಾಬ್ ಗೋಸ್ವಾಮಿಚಿ ಭಾಸ್ ವಾಪ್ರುಂಚಿ ತರ್!
ಅಶೆಂ ಕಶೆಂ ಜಾಲೆಂ?
ಹಾಂತು ಕಾಂಯ್ ನವಾಲ್ ನಾಂ. ಅಶೆಂಚ್ ಜಾಂವ್ಕ್ ಆಸ್ಲೆಂ. ಆರ್ಥಿಕ್ ತಜ್ಞಾಂನಿಂ ಅಂದಾಜ್ ಪರ್ಗಟುನ್ ವರ್ಸ್ ಉತರ್ಲಾಂ. ಸಕಯ್ಲ್ ಚಿಟ್ಕಾಯಿಲ್ಲೆ ಗ್ರಾಫ್ ಪಳೆಯಾಂ:
Graph 2 ಪಿಂತುರಾಂತ್ ಕಾಳ್ಯಾ ರಂಗಾಚಿ ಲಾಯ್ನ್ Balance of Payments (BOP) ದಾಕಯ್ತಾ. ಹಾಚಿ ದಿಶಾ ಲಗಾತರ್ ನೆಗೆಟಿವ್ಹ್ ಆಸಾ.
ಮಾಲ್ ವ್ಯಾರಾಚ್ಯೆಂ ಉಣೆಂಪಣ್ (Merchandise Trade Deficit):
ಸಕಯ್ಲ್ ಚಿಟ್ಕಾಯಿಲ್ಲೆಂ ಪಿಂತುರ್ ಪಳೆಯಾಂ. ನಿರ್ಯಾತಿ ಪ್ರಾಸ್ ಚಡ್ ಮಾಲ್ ಆಮಿಂ ಆಯಾತ್ ಕರ್ತಾಂವ್. ಆಮ್ಚೆಂ ಮಾಲ್ ವ್ಯಾರ್ ಉಣೆಂಪಣ್ ವರ್ಸಾನ್ ವರ್ಸಾ ವಾಡತ್ತ್ ವೆತಾ. 2025-26 ಆರ್ಥಿಕ್ ವರ್ಸಾಚ್ಯಾ ಅಪ್ರೆಲ್-ಒಕ್ತೊಬ್ರ್ ಅವ್ಧೆಂತ್, ಹೆಂ ಉಣೆಂಪಣ್ 197 ಬಿಲಿಯನ್ ಡೊಲರ್ ಜಾಲಾಂ. ಒಕ್ತೊಬ್ರ್ ಮಹಿನ್ಯಾಂತ್ 41.7 ಬಿಲಿಯನ್ ಉಣೆಂಪಣ್ ಜಾಲಾಂ ತೆಂ ಯೆದೊಳ್ಚೆಂ ರೆಕೊರ್ಡ್!
ಮಾಲ್ ವ್ಯಾರಾಚ್ಯೆಂ ಉಣೆಂಪಣ್ ಕಿತ್ಯಾಕ್?
1. ಕಚ್ಚಾ ತೇಲ್ (Crude Oil): ಆಮ್ಚಾ ಘರ್ಜ್ಯೆಚೊ ಕೇವಲ್ 10-12% ವಾಂಟೊ ಮಾತ್ರ್ ಆಮಿಂ ಉತ್ಪಾದನ್ ಕರ್ತಾಂವ್. 88-90% ವಿದೇಶಿ ತೇಲ್ ಆಯಾತ್ ಜಾತಾ. ಹೊ ಅಂತರ್-ರಾಶ್ಟೀಯ್ ವ್ಯಾರ್ ಡೊಲರ್ ಆಧಾರಿತ್ ಮಾತ್ರ್. ರಶಿಯಾ ಲೆಗುನ್ ರೂಬಲ್ ವ ರುಪೈ ಘೆನಾಂ.
2. ಬಾಂಗಾರ್, ರುಪೆಂ, ವಜ್ರಾಂ ಆನಿಂ ಹೆರ್ ನಗ್: ಆಮಿಂ ವರ್ಸಾಕ್ 700-800 ಟನ್ ಬಾಂಗಾರ್ ಆನಿಂ 7000-8000 ಟನ್ ರುಪೆಂ ಆಯಾತ್ ಕರ್ತಾಂವ್. ಥಳಿಕ್ ಉತ್ಪಾದನ್ ಭಾರಿಚ್ ಉಣೆಂ. ಬಾಂಗಾರ್ ಶಿಂಗಾರ್ ಆಮ್ಚಿ ಅಸ್ಕತ್ಕಾಯ್. ಆಜ್-ಕಾಲ್ ಖಾಸ್ಗಿ ಉಪ್ಯೋಗಾ ಶಿವಾಯ್, ಓದ್ಯೋಗಿಕ್ ಡಿಮಾಂಡ್ ವಾಡೊನ್ ಆಯ್ಲಾ.
3. ಇಲೆಕ್ಟ್ರೊನಿಕ್ಸ್ ಆನಿಂ ಯಂತ್ರ್ ಸಾಮಾಗ್ರಿ, ಸ್ಮಾರ್ಟ್ ಫೊನಾಂ, ಕಂಪ್ಯೂಟರಾಂ, ಆನಿಂ ಹೆರ್ ಚುಂಗ್ಡಿ ಮಾಲ್, ಕೆಮಿಕಲ್ಸ್, ಫರ್ಟಿಲೈಜರ್, ಪರಿವಾಹನಾಂ (ವಿಮಾನಾಂ, ಕಾರಾಂ, ಅಂತರಿಕ್ಶ್ ವಾಹನಾಂ, ಓಟೊ ಪಾರ್ಟ್ಸ್ ಇತ್ಯಾದಿ)
4. ರಕ್ಶಾ ಖಾತ್ಯಾಚ್ಯೊ ಸಾಮಗ್ರಿ (ವಾರ್ಸಿಕ್ ಆಯಾತ್ ಲಗ್ಬಗ್ 50 ಬಿಲಿಯನ್ ಡೊಲರ್)
5. ಜೆವ್ಣಾಚಿಂ ತೆಲಾಂ (edible oils) ಆನಿಂ ಹೆರ್ ಮೋಲಾಧಿಕ್ ಖಾಣ್ ಸಾಮಾಗ್ರಿ.
6. ವೀಜ್ ಉತ್ಪಾದನ್ ಯಂತ್ರಾಂ, ನ್ಯೂಕ್ಲಿಯರ್ ರೀಯೆಕ್ಟರಾಂ ಆನಿಂ ಘರ್ಜೊ, ಥರಾ ಥರಾಂಚಿಂ ಪ್ಲಾಸ್ಟಿಕ್ ಸಾಮಾಗ್ರಿ ಇತ್ಯಾದಿ.
7. ಗ್ಲೊಬಲೈಜೆಶನಾ ವರ್ವಿಂ ಗ್ರೇಸ್ತ್ ತಶೆಂ ಉಚ್ಚ್ ಮಧ್ಯಮ್ ವರ್ಗಾಂನಿಂ ವಾಪ್ರುಂಚ್ಯೊ ಲಕ್ಶರಿ ಸಾಮಾಗ್ರಿ.
8. ವಕ್ತಾಂ, ಶೆತ್ಕಿ ಉತ್ಪಾದನಾಂ, ರಿಫೈನರಿ ಉತ್ಪಾದನಾಂ ಆನಿಂ ಥೊಡಿ ಮಶಿನರಿ
9. ಹಿ ಸಂಪೂರ್ಣ್ ಪಟ್ಟಿ ನಹಿಂ.
ಸೇವಾ ವ್ಯಾರ್ ಅಧಿಶೇಶ್:
ಮಾಲ್ ವ್ಯಾರ್ ಉಣೆಂಪಣ್ ಕಾಯಾಮ್ ತರ್-ಯೀ, ವೆವೆಗ್ಳ್ಯಾ ಸೇವೆ ವ್ಯಾರಾಂತ್ ಆಮಿಂ ಆಯಾತಾ ಪ್ರಾಸ್ ಅಧಿಕ್ ನಿರ್ಯಾತ್ ಕರ್ತಾಂವ್. ವಾರ್ಶಿಕ್ ನಿರ್ಯಾತ್ ಲಗ್ಬಗ್ 400 ಬಿಲಿಯನ್; ವಾರ್ಶಿಕ್ ಆಯಾತ್ ಲಗ್ಬಗ್ 200 ಬಿಲಿಯನ್. ಅಶೆಂ, 200 ಬಿಲಿಯನ್ ಅಧಿಶೇಶ್ (services trade surplus) ಜೊಡ್ತಾಂವ್. ಹ್ಯಾ ಮಾನುಶಿಕ್ ಸೇವೆಂಚ್ಯಾ ವ್ಯಾರಾ ವರ್ವಿಂ, ಆಮಿಂ ಯೆದೊಳ್ ದಿವಾಳ್ಕೋರ್ ಜಾವ್ನಾಂವ್. IT, ITES, BPO ತಸ್ಲ್ಯಾಂ ಸೇವೆಂಕ್ ರುಪೈ ಅಸ್ಕತ್ ಜಾಲ್ಯಾರ್ ಫಾಯ್ದೊ ಜಾತಾ.
ವಿದೇಶಿ ಶಿಕಾಪ್, ಪರ್ಯಟನ್ ಆನಿಂ ತಾತ್ಕಾಲಿಕ್ ನಿವಾಸ್ ಅಸಲ್ಯಾಂ ಸೇವೆಂ ಖಾತಿರ್ ಆಮ್ಚೊ ಗ್ರೇಸ್ತ್ ಆನಿಂ ಉಚ್ಚ್ ಮಧ್ಯಮ್ ವರ್ಗಾಚೊ ಲೋಕ್ ದುಡು ದೇಶಾ ಭಾಯ್ರ್ ಧಾಡ್ತಾ. ಹರ್ಯೆಕ್ಲ್ಯಾಭಾರತೀಯ್ ನಾಗ್ರಿಕಾಕ್ ಸವಾಲಾಂ ವಿಚಾರಿನಾಸ್ತನಾಂ, ವರ್ಸಾಕ್ 250,000 ಡೊಲರ್ ವಿದೇಶಾಕ್ ಧಾಡ್ಯೆತ್, ನಾಬಲಿಕ್ ಬಾಳ್ಶಾಕ್ ಲೆಗುನ್. ಆಮ್ಚೊ ಲೋಕ್ ಹಾಂಗಾಂ ಗ್ರೇಸ್ತ್ ಜಾತಾ, ವಿದೇಶಾಂತ್ ಬೊಂಗ್ಲೆ ಘೆತಾ, ನಿವಾಸ್ ಕರ್ತಾ, ಮರ್ಜ್ಯೆ ಪ್ರಮಾಣೆಂ ಭೊಂವ್ತಾ. ಹ್ಯಾ Liberalized Remittance Scheme ಸಕ್ಲಾ ವಾರ್ಶಿಕ್ ಲಗ್ಬಗ್ 30-35 ಬಿಲಿಯನ್ ಡೊಲರ್ ದುಡು ವಿದೇಶಾಕ್ ವೆತಾ ತೊ ಪಾಟಿಂ ಯೇನಾ. ಆಮ್ಚೆ ದುಬ್ಳೆ ಆನಿಂ ಬೇಕೂಪ್ ಅನಿವಾಸಿ Non Resident Indian (NRI) 140-145 ಬಿಲಿಯನ್ ಡೊಲರ್ ದೇಶಾಕ್, ಆಪ್ಲೆಂ ಕರ್ತವ್ಯ್ ವ ಘರ್ಜ್ ಮ್ಹಣಾಂ, ಧಾಡ್ತಾ. ಹ್ಯಾ ದುಡ್ವಾ ವಿಣೆಂ, ರುಪೈ ಕೆದ್ನಾಂ ಬುಡ್ತೊ ಕೊಣ್ಣಾ! .
ವಿದೇಶಿ ಸಂಘಟಿತ್ ನಿವೇಷ್:
ಗ್ಲೋಬಲೈಜೇಶನಾಚಿ ಅನ್ಯೇಕ್ ಕೂಸ್ ಮ್ಹಳ್ಯಾರ್ ವಿದೇಶಿ ಸಂಘಟಿತ್ ನಿವೇಷಿ (Foreign Institutional Investors, FII). ಹ್ಯಾ 2024-25 ಆರ್ಥಿಕ್ ವರ್ಸಾ, ಯೆದೊಳ್ ಲಗ್ಬಗ್ 20 ಬಿಲಿಯನ್ ಡೊಲರ್ ಆಮ್ಚಾ ಶೇರ್ ಬಜಾರಾ ಥಾವ್ನ್ ಪಲಾಯಣ್ ಜಾಲಾ. ಹೊ hot money! ಖೈಂ ಅಧಿಕ್ ಮುನಾಫೊ ಜೊಡುಂಕ್ ವಾಟ್ ಆಸಾ ಥೈಂ ವೆತಾ.
ಲಗ್ಬಗ್ 200 ಬಿಲಿಯನ್ ಡೊಲರ್ ಫುಂಜಿ ಆಮ್ಚಾ ಆರ್ಥಿಕ್ ವೆವಸ್ತೆಂತ್ ನಿವೇಷ್ ಜಾಲ್ಯಾ. ನಾಂವಾಕ್ ವಿದೇಶಿ; ಗೂಂಡ್ ಖೊಂಡುಂಕ್ ಗೆಲ್ಯಾರ್, ಹಿ ಫುಂಜಿ ಅಧಿಕ್ ಮಟ್ಟಾರ್, ಆಮ್ಚಾಚ್ ಕಾಳ್ಯಾ ಬಾಜಾರಿ ಲೋಕಾಚಿ. ಸೆಕುಂಡಾಂ ಭಿತರ್ ಹ್ಯಾ ನಿವೇಷಿಂಕ್ ಆಪ್ಲಿ ಫುಂಜಿ ಖೈಂ ವರ್ಯೆತಾ.
ಮೋದಿ ಕಾಳಾಂತ್ ರುಪೈ ಡೊಲರಾಕ್ ಶೆಂಭೊರ್ ಮಿಕ್ವೊನ್!
2013 ಮೋದಿನ್ ಜಾಯ್ ತಶೆಂ ಜೀಭ್ ಹಾಲಯ್ಲಿ ತರ್, ಆತಾಂ ಕೊಂಗ್ರೆಸ್ ಪಾಡ್ತಿಚ್ಯೆ ದೀಸ್. ಮೋದಿಚಿ ಠಿಕಾ ಕರುನ್, ಹ್ಯಾಚ್ ಸುಕ್ರರಾ ಕೊಂಗ್ರೆಸ್ ಪ್ರವರ್ತಾನ್ ವ್ಯಂಗ್ ಭಾಶೆನ್ ಮ್ಹಳಾಂ: ಪಾಟ್ಲ್ಯಾ ಧಾ ವರ್ಸಾಂನಿಂ ರುಪೈ 50% ಪಡ್ಲಾ. ಮೋದಿನ್ ಸೆಂಚುರಿ ಮಾರುಂಕ್ ನಿರ್ಧಾರ್ ಕೆಲಾ ಮ್ಹಣ್ ದಿಸ್ತಾ!
“ಪದ್ವೆರ್ ಯೇತಚ್ ರುಪೈ ರೇಟ್ ಡೊಲರಾಕ್ 34 ಕರ್ತಾಂ, ಕಿತ್ಯಾಕ್ ಮ್ಹಳ್ಯಾರ್ ಹಿ ರೇಟ್ ಪ್ರಧಾನ್ ಮಂತ್ರಿಪಣಾಚಿ ಗರಿಮಾ ದಾಕಯ್ತಾ ಮ್ಹಳ್ಳೊ ಮೋದಿ ಆಜ್ ಮೌನ್ ಮುನಿ ಜಾಲಾ. ಬಹುಶಾ ನೆಹ್ರುಚಿ ಚೂಕ್ ಮ್ಹಣೊಂಕ್ ನೀಬ್ ಸೊಧುನ್ ಆಸಾ ಕೊಣ್ಣಾ” ಅಶೆಂ ವ್ಯಂಗ್ ಠಿಕಾ ಕೆಲ್ಯಾ.
ಉಡ್ಪಿ ಚಿಕ್-ಮಂಗ್ಳೂರು ಲೋಕ್ ಸಭಾ ಶೆತಾಂತ್ ಶೊಭಾ ಕರಂದ್ಲಾಜೆಚಿ ರುಪೈ ರೇಟ್:
2014 ಲೋಕ್ ಸಭೆಚ್ಯಾ ಚುನಾವಿ ಪ್ರಚಾರಾಂತ್, ಉಮೇದ್ವಾರ್ ಶೊಭಾ ಕರಂದ್ಲಾಜೆನ್ ಉಡುಪಿ ವಠಾರಾಂತ್ ಮೋದಿ ಡೋಲರ್ ರುಪೈ ರೇಟ್ 34 ಕರ್ತಲೊ ಮ್ಹಣ್ ಇಸ್ತಿಹಾರಾಂ ಉಬಾರ್ಲೆಲಿಂ.
ತಿಕಾ ತಶೆಂ ತಿಚ್ಯಾ ವಿರೋಧಿಂಕ್ ಹ್ಯಾ ವಿಶಯಾಚಿ ಕಿತ್ಲಿ ಮಾಹೆತ್ ಆಸಾ ತೆಂ ನೆಣಾಂ. ಏಕಾ ಅಂದಾಜಾ ಪ್ರಮಾಣೆಂ, ಆಮ್ಚಾ ಘರಾಣ್ಯಾಂ ಕಡೆಂ ಲಗ್ಬಗ್ 28,000 ಟನ್ ಬಾಂಗಾರಾಚೆಂ ಭಂಡಾರ್ ಆಸಾ. ಆಮ್ಚಾ ದಿವ್ಳಾಂಚ್ಯಾ ಆನಿಂ ಗುರುದ್ವಾರಾಂಚ್ಯಾ ತಿಜೊರಿಂನಿಂ ಲಗ್ಬಗ್ 4,000 ಟನ್ ಬಾಂಗಾರ್ ಭರ್ನ್ ದವರ್ಲಾಂ. ಹೆಂ ಖಾಸ್ಗಿ ಭಂಡಾರ್ ವಾಡ್ತಾ ಶಿವಾಯ್ ಉಣೆಂ ಜಾಯ್ನಾಂ. ದಿವ್ಳಾಂನಿಂ ರುಪ್ಯಾಚ್ಯೊ ಮೂರ್ತಿ ಚಡ್ತಾತ್. ವರ್ಸಾಂತ್ 4000-5000 ಟನ್ ನವೆಂ ರುಪೆಂ ಆಮ್ಚಾ ಗ್ರೇಸ್ತ್ ಲೋಕಾಕ್ ಜೆವ್ಣಾಚಿ ಆಯ್ಧನಾಂ ಆನಿಂ ದಿವ್ಳಾಂಚ್ಯೊ ಮೂರ್ತಿ ಕರುಂಕ್ ಜಾಯ್ ಪಡ್ತಾ.
ಜರ್ ಹಿ ಮಾಹೆತ್ ತಿಚ್ಯಾ ವಿರೋಧಿಂಕ್ ಆಸ್ಲಿ; ತೆ ಅಪ-ಪ್ರಚ್ಯಾರ್ ಕರ್ತೆ: ರೇಟ್ 34 ಕರ್ಚ್ಯೆಂ ಬರೆಂ ಕಾಮ್. ಪೂಣ್, ಹೆಂ ಕರುಂಕ್ ಏಕ್ ಮಾತ್ರ್ ವಾಟ್. ಮೋದಿ ಪದ್ವೆರ್ ಯೇತಚ್, ಘರಾಳು ಆನಿಂ ದಿವ್ಳಾಂಚ್ಯೆಂ ಬಾಂಗಾರ್-ರುಪೆಂ ಬಂಡ್ವಾಳ್ ಜಪ್ತ್ ಕರ್ತಲೊ!
ಹೊ ಏಕ್ ಅಪ-ಪ್ರಚಾರ್ ಪಾವ್ತೊ ಆಸ್ಲೊ! ಮೋದಿ ಆನಿಂ ಭಾಜಪಾ ಜಿಣ್ಯೆಂತ್ ಜಿಕ್ತಿಂ ನಾತ್ಲಿಂ!!
1 comment
ಸದಾಂಚೆ ಬರಿ ಮುದಾರ್ಥಾಚೆಂ ವಾಚಾವ್ನ್ ವೆಚೆಂ ಲೇಖನ್. ಮೋದಿ- ಬಿಜೆಪಿನ್ ವಿರೋದಿಂಚೆರ್ ಪ್ರಿಎಂಪ್ಟಿವ್ ಸ್ಟ್ರೆಕ್ ಕೆಲ್ಲೆಂ – ಕೀ ಆಪ್ಲ್ಯಾ ಪಾರ್ಟಿ ಸರ್ಕಾರಾಕ್ ಘರಾಳು ಆನಿ ದಿವ್ಳಾಂಚೆಂ ಭಾಂಗಾರ್ ರುಪೆಂ ಜಪ್ತ್ ಕರುಂಕ್ ಬಿಲ್ಕುಲ್ ನಾಕಾ ಮ್ಹಣೊನ್. ಆಮ್ಚ್ಯಾ ಮಾಧ್ಯಮಾಂನಿ ಸಯ್ತ್ ತೆಂ ಪೆಂಪಾರೆಂ ಜಬರ್ದಸ್ತ್ ವಾಜಯಿಲ್ಲೆಂ! ಮುದಾರ್ಥಾಚೊ ತೀರ್ ಲಾಗ್ ಲ್ಲೊ ತರ್…