ನೆದರ್ಲ್ಯಾಂಡಾಂತ್ ಜಿಯೆಂವ್ಚ್ಯಾ ಮಂಗ್ಳುರ್, ಗೊಂಯ್ ಆನಿ ಮುಂಬಯ್ ಮುಳಾಚೊ ಕೊಂಕ್ಣಿ ಲೋಕ್ ಆದ್ವೆಂತ್ ಆನಿ ನತಾಲಾಂಚೊ ಸ್ಪಿರಿತ್ ಸಂಭ್ರಮ್ಚ್ಯಾ ಇರಾದ್ಯಾನ್, ಕೊಂಕ್ಣಿ ಸಮುದಾಯ್ ನೆದರ್ಲ್ಯಾಂಡ್ (KSN) ಆನಿ ಗೊಂಯ್ಕಾರ್ ನೆದರ್ಲ್ಯಾಂಡ್ (G-I-N) – ಹ್ಯಾ ಸಂಘಟನಾಚ್ಯಾ ಬೊಂದೆರಾಖಾಲ್ ಹೂಪ್ಡೂರ್ಟ್ ಸಾಂ. ಜುವಾಂವ್ ಬಾಪ್ತಿಜಾಚ್ಯಾ ಇಗರ್ಜೆಂತ್ ಗಾಂವ್ಚಿ ಸಂಸ್ಕೃತಿ ಜಗಂವ್ಚ್ಯಾ ಆನಿ ಮಾಂಯ್ಗಾಂವ್ಚೊ ಮೋಗ್ ಜಿವೊ ದವರ್ಚ್ಯಾ ಇರಾದ್ಯಾನ್ ಸಾಂಗಾತಾ ಮೆಳ್ಳೆ.
ಮಾ| ಬಾ| ನವೀನ್ ರೊಡ್ರಿಗಸ್ ಹಾಣಿ ಸಂಘಟನಾಚೊ ಆತ್ಮೀಕ್ ನಿರ್ದೇಶಕ್ ಮಾ| ಬಾ| ರಿಚರ್ಡ್ ಲೋಬೊ ಹಾಂಚೆ ಸಾಂಗಾತಾ ಸಂಭ್ರಮಿಕ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ.
ಮಿಸಾಚ್ಯಾ ಬಲಿದಾನಾ ಉಪ್ರಾಂತ್ ಮಾಂಯ್ ಗಾಂವ್ಚ್ಯಾ ಕೊಂಕ್ಣಿ ಸಂಸ್ಕೃತಿಚಿ ವ್ಹಡ್ವಿಕಾಯ್ ಪಾಚಾರ್ಚೆಂ ಸಾಂಸ್ಕೃತಿಕ್ ಕಾರ್ಯಕ್ರಮ್ ಚಲ್ಲೆಂ. ಉಪ್ರಾಂತ್ ಆಪಾಪ್ಲ್ಯಾ ಘರಾಂನಿ ರಾಂದುನ್ ಹಾಡ್ಲೆಲಿಂ ಪಕ್ವಾನಾಂ ವಾಂಟುನ್ ಜೆಂವ್ಚೆಸವೆಂ ಫೆಸ್ತಾಚೊ ಸ್ಪಿರಿತ್ ಆನಿ ಆಚರಣ್ ಅರ್ಥಾಭರಿತ್ ಕೆಲೆಂ. ಸಾಂಸ್ಕೃತಿಕ್ ಕಾರ್ಯಾವಳಿಂತ್ ತಶೆಂ ಖಾಣಾ – ಜೆವ್ಣಾಂತ್ ಮಂಗ್ಳುರ್, ಗೊಂಯ್ ಆನಿ ಮುಂಬಯ್ಚೊ ಫರ್ಮಳ್ ಆನಿ ಸ್ವಾದ್ ಆಸ್ಲೊ.
ಕಾರ್ಯಾಂತ್ ಕೊಂಕ್ಣೆಚೊ ಫುಡಾರ್ ಜಾವ್ನಾಸ್ಚ್ಯಾ ಭುರ್ಗ್ಯಾಂ ಖಾತಿರ್ ವಿಶೇಸ್ ಖೆಳ್ ಮಾಂಡುನ್ ಹಾಡ್ಲ್ಲೆ. ಭುರ್ಗ್ಯಾಂನಿ ಖೆಳ್ – ಕಾರ್ಯಾವಳಿಂತ್ ಉರ್ಬೆನ್ ವಾಂಟೊ ಘೆತ್ಲೊ ಆನಿ ಸಾಂಸ್ಕೃತಿಕ್ ಕಾರ್ಯಿಂ ಸಾದರ್ ಕೆಲಿ. ನತಾಲಾಂಚ್ಯಾ ಆಚರಣಾಚೊ ಪ್ರಮುಕ್ ವಾಂಟೊ ಜಾವ್ನ್ ಮಧುರ್ ಸಂಗೀತ್ ಆನಿ ಭಕ್ತಿಪಣಾನ್ ಭರ್ಲೆಲ್ಯಾ ಸಾಂಪ್ರಾದಾಯಿಕ್ ಕ್ಯಾರಲ್ ಗಾಯನಾಂನಿ ಉಲ್ಲಾಸಾಚೆಂ ವಾತಾವರಣ್ ರುತಾ ಕೆಲೆಂ. ಸಾಂಗಾತಾ ಕೊಂಕ್ಣಿ ತಶೆಂ ಹೆರ್ ಭಾಸಾಂನಿ ಪದಾಂಚೆಂ ಗಾಯನ್ ಚಲ್ಲೆಂ.
ಪಾಟ್ಲ್ಯಾ ಸುಮಾರ್ ಧಾಕ್ಡ್ಯಾ ಥಾವ್ನ್ ನೆದರ್ಲ್ಯಾಂಡಾಂತ್ ಜಿಯೆವ್ನ್ ಆಸ್ಚೊ ಕೊಂಕ್ಣಿ ಸಮುದಾಯ್ ಆದ್ವೆಂತ್ ಆನಿ ನತಾಲಾಂಚೊ ಕಾಳ್ ಸಂಭ್ರಮುನ್ ಆಯ್ಲಾ ಆಸುನ್, ಮಾಂಯ್ ಗಾಂವಾ ಥಾವ್ನ್ ಪಯ್ಸ್ ಜೆಯೆಂವ್ಚಿಂ ಮಂಗ್ಳುರ್, ಮುಂಬಯ್ ಆನಿ ಗೊಂಯ್ ಮುಳಾಚಿಂ ಕೊಂಕ್ಣಿ ಕುಟ್ಮಾಂ ಎಕಾಮೆಕಾ ಸಾಂಗಾತಾ ಮೆಳುನ್ ಕೊಂಕ್ಣಿ ಸಮುದಾಯ್ ಬಾಂದುನ್ ಆಸಾತ್. ಹ್ಯಾ ಮಾರಿಫಾತ್ ನೆದರ್ಲ್ಯಾಂಡ್ ತಸಲ್ಯಾ ಗಾಂವಾಂತ್ ಕೊಂಕ್ಣಿ ಭಾಸ್, ಸಂಸ್ಕೃತಿ ಆನಿ ಸಮುದಾಯಿಕ್ ಸ್ಪಿರಿತ್ ರಾಕೊನ್ ವರ್ಚೆಂ ಪ್ರೇತನ್ ಕೊಂಕ್ಣಿ ಸಮುದಾಯ್ (KSN) ಆನಿ ನೆದರ್ಲ್ಯಾಂಡ್ ಗೊಂಯ್ಕಾರ್ (G-I-N) ಸಂಘಟನಾಂ, ಆತ್ಮಿಕ್ ನಿರ್ದೇಶಕ್ – ಮಾ| ಬಾ| ರಿಚರ್ಡ್ ಲೋಬೊ ಆನಿ ಮಾ| ಬಾ| ನವೀನ್ ರೊಡ್ರಿಗಸ್ ಹಾಂಚ್ಯಾ ಮಾರ್ಗದರ್ಶನಾಖಾಲ್ ಕರುನ್ ಆಸಾತ್.
ನೆದರ್ಲ್ಯಾಂಡಾಂತ್ಲೆ ಗೊಂಯ್ಕಾರ್ (G-I-N) ಸಂಘಟನಾಕ್ 2026 ವ್ಯಾ ವರ್ಸಾ ಪಂಚ್ವೀಸ್ ವರ್ಸಾಂ ಭರ್ತಾನಾ, ರುಪ್ಯಾಳೊ ಸಂಭ್ರಮ್ ವ್ಹಡಾ ಗದ್ದಳಾಯೆನ್ ಆಚರುಂಕ್ ತಯಾರಾಯ್ ಭರಾನ್ ಚಲೊನ್ ಆಸಾ.
