ಭಾಯ್ಲ್ಯಾಂತ್ರಳಾ ಸೊಧ್ನಾಂ ಮನ್ಶಾಕುಳಾಚೆಂ ವರ್ತೆಂ ಸಾಹಸ್ ಆನಿ ಸಾಧನ್. ನವೆ ಸಂಸಾರ್ ಸೊಧುನ್ ಕಾಡುನ್ ಹ್ಯಾ ಸಂಸಾರಾಂತ್ ಆಮ್ಚೊ ಜಾಗೊ ಕಸಲೊ ಮ್ಹಳ್ಳೆವಿಶಿಂ ಆಮ್ಚ್ಯೊ ಜಾಣ್ವಾಯೆಚ್ಯೊ ಗಡಿ ವಿಸ್ತಾರಾಂವ್ಕ್ ಸುರ್ವೆಥಾವ್ನ್ ಆಮ್ಚೆಂ ಪ್ರೇತನ್ ಖಳಾನಾಸ್ತಾಂ ಚಾಲು ಆಸಾ. ವಯ್ರ್ ರಾತ್ಚ್ಯಾ ಮಳ್ಬಾಕ್ ಪಳೆವ್ನ್ ಥಂಯ್ ಕಿತೆಂ ಆಟಾಪ್ಲಾಂಗಾಯ್ ಮ್ಹಣ್ ಸವಾಲ್ ಉದೆಂವ್ಚೆವಿಶಿಂ ಚಿಂತಾ – ಹೆಂಚ್ ತೆಂ ಕಿಟಾಳ್ ವಿಗ್ಯಾನಿಂಕ್, ಇಜ್ನೆರಾಂಕ್ ಆನಿ ಮಳ್ಬಾಪಯ್ಣಾರ್ಯಾಂಕ್ ರೊಕೆಟಾಂ, ಉಪಘರಾಂ ಆನಿ ಸ್ಪೇಸ್ ಕ್ರಾಫ್ಟಾಂ ಬಾಂದುಂಕ್ ಕರ್ತಾ. 1957 ವರ್ಸಾ ವಯ್ರ್ ಸೊಡ್ಲ್ಲ್ಯಾ ಪಯಿಲ್ಲ್ಯಾ ಉಪಘರಾಥಾವ್ನ್ ಆಜ್ ಮಂಗಳಾಘರಾಚ್ಯಾ ಆಂಗ್ಣಾಂತ್ ಭಂವೊನ್ ಆಸ್ಚ್ಯಾ ರೊಬೋಟಾಂ ಪರ್ಯಾಂತ್ಲ್ಯಾ ಹ್ಯಾ ಭಾಯ್ಲ್ಯಾಂತ್ರಳಾ ಸಂಸೊಧಾಂನಿ ಆಮ್ಕಾಂ GPS ಹವ್ಯಾವಿಶಿಂ ಫುಡ್ಲಿ ಜಾಣ್ವಾಯ್, ವಯ್ಜಾಕೀ ಶೆತಾಂತ್ಲ್ಯಾ ಕಿತ್ಲೆಶ್ಯಾ ಸಾಧನಾಂ ತಸಲ್ಯಾ ಥೊಡೆಶ್ಯಾ ತಂತ್ರ್ಗ್ಯಾನಾಂಚಿ ದೆಣ್ಗಿ ಮೆಳ್ಳ್ಯಾ. ಪುಣ್ ಹ್ಯಾ ಸರ್ವಾಂಪ್ರಾಸ್ ವರ್ತೆಂ ಮ್ಹಳ್ಯಾರ್ ಹ್ಯಾ ಸೊಧ್ನಾಂ ಪಾಸತ್ ಮನ್ಶಾಂಕ್ಚ್ ಭಾಯ್ಲ್ಯಾಂತ್ರಳಾಕ್ ಧಾಡ್ಚೆಂ.
ಆತಾಂ ಮನ್ಶಾಂಚ್ಯಾ ಭಾಯ್ಲ್ಯಾಕಾಸಾ ಪಯ್ಣಾಂಚ್ಯಾ ಭಾಂಗ್ರಾಳ್ಯಾ ತೆಂಪಾಂಕ್ ಪಳೆವ್ಯಾಂ: ಸಾಧಾರಣ್ 1968 – 1972 ಪರ್ಯಾಂತ್ ಮನ್ಶಾಕ್ ಚಂದ್ರಾಚೆರ್ ದೆಂವೊಂವ್ಚಿಂ ಹಿಂ ಆಪೋಲ್ಲೊ ಮಿಸಾಂವಾಂ, ನಾಸಾಚಿಂ ಧಯ್ರಾಧಿಕ್ ಮೆಟಾಂ. ಚಂದ್ರಾಚೆರ್ ಮನ್ಶಾಮಿಸಾಂವಾಂನಿ ಆಖ್ರೇಚೆಂ ಆಪೋಲ್ಲೊ 17, 1972 ಡಿಸೆಂಬ್ರಾಂತ್. ಖಗೋಳ್ ಪಯ್ಣಾರಿ ಯೂಜಿನ್ ಸರ್ನಾನ್, ಹ್ಯಾರಿಸನ್ ಶ್ಮಿಟ್ ಆನಿ ರೊನಾಲ್ಡ್ ಇವ್ಯಾನ್ಸ್ ಸ್ಯಾಟರ್ನ್ಗಿ ರೊಕೆಟಾಚೆರ್ ಥಂಯ್ಸರ್ ಪಾವ್ಲ್ಲೆ. ಸರ್ನಾನ್ ಆನಿ ಶ್ಮಿಟ್ ತೀನ್ ದೀಸ್ ಚಂದ್ರಾಚೆರ್ ಆಸ್ಲ್ಲೆ ಆನಿ ತವಳ್ ತಾಣಿಂ ಲೂನಾರ್ ರೋವರ್ ಥಂಯ್ಸರ್ ಚಲೊವ್ನ್, ಥಂಯ್ಚಿ ಮಾತಿ, ಫಾತರ್ ಆರಾವ್ನ್ ಜಾಯ್ತೆ ಸಂಸೊಧ್ ಕೆಲ್ಲೆ. ತ್ಯಾ ಗೊಬ್ರಾಳ್ಯೆ ಧುಳಿಚ್ಯೆ ಧರ್ಣಿರ್ ತೆ ಚಲ್ಲೆ, ಅಮೆರಿಕಾಚೊ ಬಾವ್ಟೊ ಪುರ್ಲೊ ಆನಿ ಗಾಣಾಂ ಲೆಗೂನ್ ಗಾಯ್ಲಿಂ! ಹೆಂ ಜಾಲೆಂ ಅಂತ್ ಆಪೋಲ್ಲೊ ಮಿಸಾಂವಾಂಚೆಂ ಜೆಂ ಸುರ್ವಾತ್ಲ್ಲೆಂ 1969 ವರ್ಸಾಂತ್ ಆಪೋಲ್ಲೊ 11 ಥಾವ್ನ್. ತಾಂತುಂ ನೀಲ್ ಆರ್ಮ್ಸ್ಟ್ರೊಂಗ್ ಆನಿ ಬಜ್ ಆಲ್ಡ್ರಿನ್ ಚಂದ್ರಾಚೆರ್ ಪಾಂಯ್ ದವರುಂಕ್ ಪಾವ್ಲ್ಲೆ ಪಯಿಲ್ಲೆ ಮನಿಸ್ ಜಾಲ್ಲೆ. ಒಟ್ಟುಕ್ ಸ ಮಿಸಾಂವಾಂನಿ ಬಾರಾ ಭಾಯ್ಲ್ಯಾಂತ್ರಳಾ ಪಯ್ಣಾರಿ ಚಂದ್ರಾಚೆರ್ ಪಾಂಯ್ ತೆಂಕುನ್ ಚಲ್ಲೆ. ಹಿಂ ಪಯ್ಣಾಂ ಫಕತ್ ದೆಕಿಕ್ ಮಾತ್ರ್ ನ್ಹಯ್ ಆಸ್ಲ್ಲಿಂ, ಬಗಾರ್ ತಾಣಿಂ ಮನ್ಶಾಕುಳಾಕ್ ವರ್ತಿ ಮ್ಹಾಯೆತ್ ದಿಲಿ. ಚಂದ್ರಾಚ್ಯೆ ಧರ್ಣಿವಿಶಿಂ, ಆದ್ಲ್ಯಾ ತೆಂಪಾಂಚ್ಯಾ ಲಾವಾ ವ್ಹಾಳ್ಯಾನ್ ತೊ ಬುಡ್ಲಾ ಆನಿ ಎಸ್ಟ್ರೋಯ್ಡ್ಸ್ ಆಪ್ಟೊನ್ ತೊ ಕಸೊ ಜಯ್ತ್ ತಳಿಂ ಆನಿ ಫೊಂಡ್ಕುಲಾಂನಿ ಭರೊನ್ ಗೆಲಾ ಮ್ಹಳ್ಳೆವಿಶ್ಯಾಂತ್ಲಿ ಭರ್ಪೂರ್ ಜಾಣ್ವಾಯ್ ಆಮ್ಕಾಂ ಮೆಳ್ಳ್ಯಾ.
ತರ್ ಆಮಿ ಆಪೋಲ್ಲೊ 17 ಉಪ್ರಾಂತ್ ಚಂದ್ರಾಕ್ ವೆಚೆಂ ಕಿತ್ಯಾಕ್ ರಾವಯ್ಲೆಂ? ದುಡು, ರಾಜಕೀಯ್ ಆನಿ ಬದ್ಲಾತ್ಯೊ ವಿಂಚವ್ಣ್ಯೊ ಮ್ಹಣ್ ಜಾಯ್ತಿಂ ವೆವೆಗ್ಳಿಂ ನಿಬಾಂ ಆಸಾತ್. ಆಪೋಲ್ಲೊ ಯೆವ್ಜಣ್ ವಿಪ್ರೀತ್ ಮ್ಹಾರಗ್, ಸುಮಾರ್ ತ್ಯಾ ತೆಂಪಾಚೆ 25 ಬಿಲಿಯನ್ ಡೋಲರ್ (ಆತಾಂಚ್ಯಾ 150 ಬಿಲಿಯನ್ ಡೋಲರಾಂಪ್ರಾಸ್ ಚಡ್ಚ್!). ತಿ ಯೆವ್ಜಣ್ ಸುರ್ವಾತ್ಲ್ಲಿ ಅಮೆರಿಕಾ ಆನಿ ರಶ್ಯಾಚ್ಯಾ ಶೀತಳ್ ಝುಜಾವೆಳಾಚ್ಯಾ ಭಾಯ್ಲ್ಯಾಂತ್ರಳಾ ಧಾಂವ್ಣೆಂಪಂತಾಂತ್. ಹ್ಯೆ ಸರ್ತೆಂತ್ ದೊನೀ ದೇಶ್ ಆಪಾಪ್ಲೆಂ ತಂತ್ರ್ಗ್ಯಾನ್ ವರ್ತೆಂ ಮ್ಹಣ್ ದಾಕೊಂವ್ಕ್ ಝುಜೊನ್ ಆಸ್ಲ್ಲೆ. ಮನ್ಶಾಕ್ ಚಂದ್ರಾಚೆರ್ ದೆಂವೊವ್ನ್ ಏಕ್ ಪಾವ್ಟಿಕ್ ಅಮೆರಿಕಾ ಹಿ ಧಾಂವ್ ‘ಜಿಕ್ಲ್ಲೆಂಚ್’ ಲೊಕಾಚಿ ಉತ್ಸುಕಾಯ್ ನಿಂವ್ಲಿ, ಕೊಂಗ್ರೆಸಾನ್ ನಾಸಾಚೆರ್ ದುಡು ವಾಟಾಂವ್ಚೊ ಉಣೊ ಕೆಲೊ. ರಿಚರ್ಡ್ ನಿಕ್ಸನಾ ತಸಲ್ಯಾ ಅಧ್ಯಕ್ಶ್ಯಾಂನಿ ವಿಯೆಟ್ನಾಮ್ ಝುಜ್, ಆರ್ಥಿಕ್ ಸವಾಲಾಂತೆವ್ಶಿಂ ಆಪ್ಲೆಂ ಗುಮಾನ್ ಚಡಯ್ಲೆಂ. ಚಂದ್ರಾಪಯ್ಣಾಬದ್ಲೆಕ್ ನಾಸಾನ್ ಪರ್ತೆವಾಪಾರ್ಪಿ ಸ್ಪೇಸ್ ಶಟಲ್ ಆನಿ ಸ್ಕಾಯ್ಲ್ಯಾಬ್ ಸ್ಪೇಸ್ ಸ್ಟೇಶನಾ ತಸಲ್ಯಾ ಉಣ್ಯಾ ಖರ್ಚಾಚ್ಯಾ ಮಿಸಾಂವಾಂನಿ ಆಪ್ಲಿಂ ಸೊಧ್ನಾಂ ಮುಕಾರುನ್ ವ್ಹೆಲಿಂ. ಭದ್ರತೆಚ್ಯೊ ಗಜಾಲ್ಯೊಯ್ ಆಸ್ಲ್ಲ್ಯೊ. ಚಂದ್ರಾಪಯ್ಣಾಂ ಬೊವ್ ರಿಸ್ಕೆಚಿಂ ಜಾಲ್ಲ್ಯಾನ್ ಥೊಡ್ಯಾ ರಿಸ್ಕೆಚ್ಯಾ ಘಡಿತಾಂ ಉಪ್ರಾಂತ್ ಮುಕೆಲ್ಯಾಂನಿ ‘ಮನ್ಶಾಂಸಮೇತ್ ಗೂಂಡ್ ಅಂತ್ರಳಾಸೊಧ್ನಾಂ’ ಉಣೆಂ ಕರುಂಕ್ ಠರಾಯ್ಲೆಂ. ಉಪ್ರಾಂತ್ಲ್ಯಾ ಥೊಡ್ಯಾ ಧಾಕ್ಡ್ಯಾಂನಿ ಖಗೋಳ್ ಪಯ್ಣಾರಿ ಇಂಟರ್ನ್ಯಾಶನಲ್ ಸ್ಪೇಸ್ ಸ್ಟೇಶನಾಂತ್ ಸೊಧ್ನಾಂ ಮುಕಾರುನ್, ಸ್ಪೇಸ್ ಶಟಲಾಂನಿ ಭುಂಯ್ಕ್ ಭೊಂವಾಡೆ ಮಾರುನ್ ಘರಾ ಲಾಗ್ಸಾರ್ಚ್ ಆಪ್ಲಿಂ ಮಿಸಾಂವಾಂ ಸಾಂಬಾಳ್ಳಿಂ. ಇಂಟರ್ನ್ಯಾಶನಲ್ ಸ್ಪೇಸ್ ಸ್ಟೇಶನಾಂತ್ 2000 ವರ್ಸಾಂಥಾವ್ನ್ ಚುಕಾನಾಸ್ತಾಂ ಮನ್ಶಾಆಸ್ಪವ್ ಆಸಾ.
ಪುಣ್ ಆಯ್ಲೆವಾರ್ ಗೂಂಡಂತ್ರಳಾಮಿಸಾಂವಾಂನಿ ಆಸಕ್ತ್ ವರ್ತ್ಯೆ ರಿತಿನ್ ವಾಡೊನ್ ಆಯ್ಲ್ಯಾ! ಭಾಯ್ಲ್ಯಾಂತ್ರಳಾ ಖೆಳಾಂತ್ ನವ್ಯಾ ನವ್ಯಾ ಖೆಳ್ಗಾಡ್ಯಾಂನಿ ರೀಗ್ ಘೆತ್ಲ್ಯಾ. ಎಲೋನ್ ಮಸ್ಕಾಚಿ ಸ್ಪೇಸ್ ಎಕ್ಸ್, ಜೆಫ್ ಬೆಝೋಸಾಚಿ ಬ್ಲೂ ಒರಿಜಿನ್ ತಸಲ್ಯೊ ಖಾಸ್ಗಿ ಕಂಪ್ಣ್ಯೊ ಸವಾಯ್ ರೊಕೆಟಾಂ, ಆನಿ ಪರ್ತೆವಾಪಾರ್ಪಿ ತಂತ್ರ್ಗ್ಯಾನಾಂತ್ ದುಡು ವಾಟಾವ್ನ್ ಆಸಾತ್. ಹ್ಯಾ ವರ್ವಿಂ ಭಾಯ್ಲ್ಯಾಂತ್ರಳಾ ಪಯ್ಣ್ ಪಯ್ಲೆಪ್ರಾಸ್ ಜಾಯ್ತೆಂ ಸವಾಯ್ ಜಾಲಾಂ. ಸರ್ಕಾರಾಂಚಿಯ್ ಆಸಕ್ತ್ ವಾಡೊನ್ ಆಯ್ಲ್ಯಾ. ಚೀನಾನ್ 2019 ವರ್ಸಾ ಚಂದ್ರಾಚ್ಯೆ ಆನ್ಯೆಕೆ ಕುಶಿರ್ ರೋಬೊಟ್ಸಾಂಕ್ ದೆಂವಯ್ತಾನಾ ಇಂಡಿಯಾನ್ ಭೊಂವಾಡೊ ಮಾರ್ಚೆ ಒರ್ಬಾಯ್ಟರ್ಸ್ ಧಾಡ್ಲ್ಯಾತ್. ವೈಗ್ಯಾನಿಕ್ ಸಂಸೊಧಾಂನಿ ಚಂದ್ರಾಚ್ಯಾ ಧ್ರುವಾಂನಿ ಉದಕ್ ಆಸ್ಚೆವಿಶಿಂ ಭರ್ವಸೊ ದಿಲಾ. ಹ್ಯಾ ಉದ್ಕಾಕ್ ಫುಡಾರಾಚ್ಯಾ ಮಿಸಾಂವಾಂನಿ ಜಳೊವ್ ಜಾವ್ನ್ ವಾಪಾರ್ಚೆವಿಶಿಂ ಯೆವ್ಜಣ್ಯೊ ಆಸಾತ್. ತೆಂ ನಾಸ್ತಾಂ ಚಂದ್ರಾಕ್ ಪಾಂವ್ಚೆಂ ಆನಿ ತಾಚೆವಿಶಿಂ ಜಾಣಾ ಜಾಂವ್ಚೆಂ ಮುಕಾರ್ ಮಂಗಳಾಕ್ ಆನಿ ತಾಚ್ಯಾ ಪೆಲ್ಯಾನ್ ವಚೊಂಕ್ ಏಕ್ ಮೇಟ್. ಭುಂಯ್ಚ್ಯಾ ಭೊಂವಾರಾಂತ್ಲೊ ಬದ್ಲಾಪ್ ಆನಿ ಸಂಯ್ಬಿಕ್ ಸಂಪನ್ಮುಳಾಂಚೊ ತತ್ವಾರ್ ಲೊಕಾಕ್ ಚಂದ್ರಾಚೆರ್ ಆನಿ ಎಸ್ಟರೋಯ್ಡಾಂನಿ ಹ್ಯಾ ಸಂಪನ್ಮುಳಾಂ ಸೊಧುಂಕ್ ವೆಚೆವಿಶಿಂ ಚಿಂತುಂಕ್ ಲಾಯ್ತಾತ್.
ಅಶೆಂ 2017 ವರ್ಸಾ ನಾಸಾನ್ ಪರತ್ ಆರ್ಟೆಮಿಸ್ ಯೆವ್ಜಣ್ ಜಾಯ್ರ್ ಕೆಲಿ. 2030 ವರ್ಸಾ ಭಿತರ್ ಚಂದ್ರಾಚೆರ್ ಮನ್ಶಾಂಕ್ ಪರತ್ ಧಾಡ್ಚ್ಯಾ ಹ್ಯಾ ಮಿಸಾಂವಾಂಚೆಂ ನಾಂವ್ ಆರ್ಟೆಮಿಸ್, ಗ್ರೀಕ್ ಪುರಾಣಾಚ್ಯಾ ಆಪೋಲ್ಲೊಚ್ಯೆ ಜೊವ್ಳ್ಯೆ ಭಯ್ಣಿಚೆಂ. ಹಿ ಗಜಾಲ್ ಪುರ್ತಿ ಟಿಕಾವ್ಪಣಾಚಿ: ಚಂದ್ರಾಚೆರ್ ಏಕ್ ಠಾಣೆಂ ಬಾಂದುನ್ ಹಾಡ್ಚೆಂ, ಥಂಯ್ಚೆಂಚ್ ಸಂಪನ್ಮೂಳ್ ವಾಪಾರುನ್ ಮಂಗಳಾ ಆನಿ ತಾಚ್ಯಾ ಪೆಲ್ಯಾನ್ ನದರ್ ಠಿಕಾಂವ್ಚಿ, ಹ್ಯಾ ಪಾಸತ್ ವೆವೆಗ್ಳ್ಯಾ ಮುಳಾಚ್ಯಾ ಕಾಮೆಲ್ಯಾಂಕ್ ವಾಪಾರ್ಚೆಂ.
ಆತಾಂ ಆಮಿ ಹ್ಯಾ ದಿಸಾಂನಿ ಖಬ್ರೊ ಕರುನ್ ಆಸ್ಚ್ಯಾ ಆರ್ಟೆಮಿಸ್ II ವಿಶಿಂ ಪಳೆವ್ಯಾಂ. ಹ್ಯಾಚ್ ಫೆಬ್ರವರಿಚ್ಯೆ 6 ತಾರಿಕೆ ಇತ್ಲ್ಯಾಕ್ ಉಡೊಂಕ್ ತಯಾರ್ ಆಸ್ಚೆಂ ಹೆಂ ಆರ್ಟೆಮಿಸ್ ವೊಳೆರಿಂತ್ಲೆಂ ಪಯಿಲ್ಲೆಂ ಮನ್ಶಾಸಮೇತ್ ಪಯ್ಣ್. ಆನಿ ಪಾಟ್ಲ್ಯಾ ಪನ್ನಾಸ್ ವರ್ಸಾಂನಿ, ಆಪೋಲ್ಲೊ 17 ಉಪ್ರಾಂತ್ ಪಯಿಲ್ಲೆಂ, ಭುಂಯ್ಚ್ಯಾ ಸಕಯ್ಲ್ಯಾ ವೊಳ್ಯಾಪೆಲ್ಯಾನ್ ಮನ್ಶಾಂನಿ ಕರ್ಚೆಂ ಪಯಣ್. ಹಾಂತುಂ ಚ್ಯಾರ್ ಭಾಯ್ಲ್ಯಾಂತ್ರಳಾ ಪಯ್ಣಾರಿ ‘ಓರಿಯೋನ್’ ರೊಕೆಟಿಚೆರ್ ಬಸೊನ್ ಫ್ಲೊರಿಡಾಂತ್ಲ್ಯಾ ಕೆನಡಿ ಭಾಯ್ಲ್ಯಾಂತ್ರಳಾ ಕೇಂದ್ರಾಥಾವ್ನ್ ಚಡ್ ತಾಂಕಿಚೆ ಸ್ಪೇಸ್ ಲೋಂಚ್ ಸಿಸ್ಟಮ್ (SLS) ವಾಪಾರುನ್ ವಯ್ರ್ ಉಡ್ತೆಲೆ. ಕಮಾಂಡರ್ ರೀಡ್ ವಾಯ್ಸ್ಮನ್, ಪಾಯ್ಲಟ್ ವಿಕ್ಟರ್ ಗ್ಲೋವರ್ (ತೊ ಚಂದ್ರಾಬಗ್ಲೆಚೊ ಪಯಿಲ್ಲೊ ಸಾವ್ಳೊ ಪಯ್ಣಾರಿ ಜಾಂವ್ಕ್ ಪಾವ್ತೊಲೊ), ಮಿಸಾಂವ್ ಸ್ಪೆಶಲಿಸ್ಟ್ ಕ್ರಿಸ್ಟೀನಾ ಕೊಚ್ (ಚಂದ್ರಾಬಗ್ಲಿ ಪಯಿಲ್ಲಿ ಸ್ತ್ರೀ) ಹಾಂಚೆಸಾಂಗಾತಾ ಕೆನಡಾಚೊ ಜೆರೆಮಿ ಹ್ಯಾನ್ಸೆನ್ (ಪಯಿಲ್ಲೊ ಅಮೆರಿಕಾಭಾಯ್ಲೊ) ಹ್ಯಾ ಪಯ್ಣಾಂತ್ ಭಾಗಿದಾರ್ ಆಸ್ತೆಲೆ. ಧಾ ದಿಸಾಂಚ್ಯಾ ಹ್ಯಾ ಪರೀಕ್ಶೆಪಯ್ಣಾಂತ್ ತೆ ಚಂದ್ರಾಭೊಂವ್ತಿಂ ಭೊಂವಾಡೊ ಕಾಡ್ತೆಲೆ. ಚಂದ್ರಾಚ್ಯೆ ಧರ್ಣಿಥಾವ್ನ್ ಫಕತ್ ಥೊಡ್ಯಾಚ್ ಹಜಾರ್ ಕಿಲೋಮೀಟರ್ ಪಯ್ಸ್ ತೆ ಆಸ್ತಲೆ ತರೀ ಥಂಯ್ಸರ್ ದೆಂವೊಂಕ್ ತೆ ಪ್ರೇತನ್ ಕರ್ಚೆನಾಂತ್. ಪಾಟಿಂ ಪಯ್ಣಾಕ್ ಚಂದ್ರಾಚ್ಯೆಚ್ ವೊಡ್ಣೆಸಕ್ತೆಚೊ ಫಾಯ್ದೊ ಉಟೊಂವ್ಚಿ ಬೊವ್ ಬುದ್ವಂತ್ಕಾಯೆಚಿ ಫ್ರೀ ರಿಟರ್ನ್ ಟ್ರ್ಯಾಜೆಕ್ಟರಿ ವಾಪಾರುಂಕ್ ತಾಣಿಂ ಯೆವ್ಜಿಲಾಂ ಆಸ್ತಾಂ ಕಿತೆಂಯ್ ಚಡುಣೆಂ ಘಡ್ಲೆಂ ತರೀ ತೆ ಶಾಬಿತ್ ಭುಂಯ್ಕ್ ಪಾಟಿಂ ಪಾವ್ತೆಲೆ ಮ್ಹಳ್ಳೊ ಭರ್ವಸೊ ಆಸಾ.
ಆತಾಂಚ್ಯೆ ಪಿಳ್ಗೆಚೊ ಖಂಯ್ಚೋಯ್ ಮನಿಸ್ ಗೂಂಡಂತ್ರಳಾಕ್ ವಚೊಂಕ್ ನಾತ್ಲ್ಲ್ಯಾ ಪಾಟ್ಥಳಾರ್ ಮನ್ಶಾಂಕ್ 2027 ವರ್ಸಾ ಇತ್ಲ್ಯಾಕ್ ಚಂದ್ರಾಚ್ಯಾ ತೆನ್ಕಾ ಧ್ರುವಾಲಾಗಿಂ ದೆಂವೊಂವ್ಚ್ಯಾ ಆರ್ಟೆಮಿಸ್ 3 ಯೆವ್ಜಣೆಫುಡೆಂಚೆಂ ಹೆಂ ಆರ್ಟೆಮಿಸ್ 2 ಬೊವ್ ಮ್ಹತ್ವಾಚೆಂ ಮೇಟ್. ಓರಿಯೋನ್ ಶಟಲಾಚ್ಯಾ ಜಿವಾಪಾಟಿಂಬ್ಯಾ ಮಾಂಡಾವಳ್, ಘಂಟ್ಯಾಕ್ ಸುಮಾರ್ 25000 ಮಯ್ಲಾಂಕ್ ಮಿಕ್ವೊಂಚ್ಯೆ ಸರಾಯೆಚಿ ಪರ್ತೆರಿಗಪಾಚೆರ್ ಉಬ್ಜೊಂಚ್ಯೆ ವಿಪ್ರೀತ್ ಹುನ್ಸಾಣೆಕ್ ಆಡಾಂವ್ಚಿ ಹೀಟ್ ಶೀಲ್ಡ್, ಗೂಂಡ್ ಅಂತ್ರಳಾಂತ್ಲಿಂ ವಿಕಿರಣ್ ಆನಿ ಎಕ್ಸುರ್ಪಣಾ ತಸಲ್ಯಾ ಜಾಯ್ತ್ಯಾ ಸವಾಲಾಂವಿಶಿಂ ಹ್ಯಾ ಮಿಸಾಂವಾರ್ ಸಂಸೊಧ್ ಚಲ್ತೊಲೊ. ಹಾಚೆಸಾಂಗಾತಾಚ್ ಹ್ಯಾ ಮಿಸಾಂವಾಂತ್ ಭಾಯ್ಲ್ಯಾಂತ್ರಳಾ ಭೊಂವಾರಾಚೆರ್ ವೈಗ್ಯಾನಿಕ್ ಸಂಸೊಧಾಚಿಂ ಥೊಡಿಂ ಉಪಘರಾಂಯ್ ಆಸ್ತಲಿಂ. ತಂತ್ರ್ಗ್ಯಾನಿಕ್ ಅಡ್ಚಣ್ಯಾಂಕ್ ಲಾಗೊನ್ ಥೊಡೊ ತಡೊವ್ ಜಾಲಾ ತರೀ ಆತಾಂ ಓರಿಯೋನ್ ಲೋಂಚ್ಪ್ಯಾಡಾರ್ ಆಯ್ತೆಂ ಉಬೆಂ ಆಸಾ ಆನಿ ಪಯ್ಣಾರಿ ಕ್ವಾರಂಟಾಯ್ನಾಂತ್.
ಆರ್ಟೆಮಿಸ್ 2 ಫಕತ್ ಚಂದ್ರಾವಿಶಿಂ ನ್ಹಯ್, ಬಗಾರ್ ಮನ್ಶಾಕುಳಾಚ್ಯಾ ದಾಂಬುನ್ ದವರುಂಕ್ ಜಾಯ್ನಾಸ್ಚ್ಯಾ ಜಮ್ಯಾಸ್ಪಿರಿತಾಚೊ ಪಡ್ಸಾದ್. ಏಕ್ ಪ್ರೇರಣ್ ನವ್ಯೆ ಪಿಳ್ಗೆಕ್. ಫುಡಾರಾಂತ್ ಹಿ ಆಮ್ಚಿ ವಸ್ತಿ ವಿಸ್ತಾರುನ್ ಮಂಗಳಾ ಆನಿ ಮಂಗಳಾಪೆಲ್ಯಾನ್ ವೆಚ್ಯಾ ಸಪ್ಣಾಬುನ್ಯಾದಿಕ್ ಥಿರ್ ಕರ್ಚಿ ಮ್ಹಾಯೆವ್ಜಣ್. ಹಿಂ ಭಾಯ್ಲ್ಯಾಂತ್ರಳಾ ಮಿಸಾಂವಾಂ ಆಮ್ಕಾಂ ಜಮ್ಯಾಕಾಮ್, ನವಿಂ ಸೊಧ್ನಾಂ ಆನಿ ಸೊಸ್ಣಿಕ್ತಾಂಕ್ ಶಿಕಯ್ತಾತ್. ಭುಂಯ್ಗೋಳಿಕ್ ಸವಾಲಾಂ ಸತಾಯ್ತಾನಾ ಭುಂಯ್ಪೆಲ್ಯಾನ್ ಜಾಪಿ ಸೊಧಪ್ ಆಮ್ಕಾಂ ಮನ್ಶಾಕುಳಾಚ್ಯೆ, ಕರುಂಕ್ ಜಾಯ್ಚ್ ನಾ ಮ್ಹಣ್ ದಿಸ್ಚೆಂ ಕರುನ್ ದಾಕೊಂವ್ಚ್ಯೆ ತಾಂಕಿಚೊ ಉಡಾಸ್ ಕರ್ನ್ ದಿತಾ. ಕೋಣ್ ಜಾಣಾಂ? ಆರ್ಟೆಮಿಸ್ 2 ಜಯ್ತಾಥಾವ್ನ್ ಆಯ್ಚಿ ಪಿಳ್ಗಿ ಏಕ್ ದೀಸ್ ಮನ್ಶಾನ್ ಮಂಗಳಾಚೆರ್ ಮೆಟಾಂ ಕಾಡ್ಚೊ ಶೀದಾ ಪ್ರಸಾರ್ ಪಳೆಂವ್ಕ್ ಪಾವ್ತಿತ್.
ನಕ್ತಿರಾಂ ಉಲೊ ಮಾರುನ್ ಆಸಾತ್- ಆಮಿ ಜಾಪ್ ದಿವ್ಯಾಂ!
■ ಕಿಶೂ ಬಾರ್ಕೂರ್
Reusable – ಪರ್ತೆವಾಪಾರ್ಪಿ
Sustainability – ಟಿಕಾವ್ಪಣ್
Life Support System – ಜಿವಾಪಾಟಿಂಬ್ಯಾ ಮಾಂಡಾವಳ್
Re entry – ಪರ್ತೆರಿಗಪ್
Teamwork – ಜಮ್ಯಾಕಾಮ್
Innovation- ನವಿಂ ಸೊಧ್ನಾಂ
Resilience – ಸೊಸ್ಣಿಕ್ತಾಂಕ್
