ಡಾ| ಎವ್ಜಿನ್ ಡಿ’ಸೋಜಾ, ಬೊಳಿಯೆ ಹಾಣೆ 58 ವರ್ಸಾಂ ಆದಿಂ ಬರಯಿಲ್ಲಿ ‘ಚಂದ್ರಾವಯ್ಲೆಂ ಮೋಡ್’ ಕಾದಂಬರಿ ಸನ್ವಾರಾ, ಫೆಬ್ರೆವರಿ 14, 2026 ವೆರ್ ‘ಪರಿಚಯ ರಂಗೋತ್ಸವ 2026’ ಸಮಾರೋಪ್ ವೆದಿರ್ ಮೊಕ್ಳಿಕ್ ಜಾಲಿ.
ಕಿಟಾಳ್ ಪ್ರಕಾಶಾನಾನ್ ಪ್ರಗಟ್ ಕೆಲ್ಲಿ ಹಿ ಕಾದಂಬರಿ ಕೆನಾಡಾ ಥಾವ್ನ್ ಪರಿಚಯ ರಂಗೋತ್ಸವ್ ಕಾರ್ಯಾಕ್ ಹಾಜರ್ ಆಸ್ಲ್ಲ್ಯಾ ಮಾ| ಬಾ| ಹೆನ್ರಿ ಆಲ್ವ, ಕಾಪುಚಿನ್ ಹಾಣಿ ಮೊಕ್ಳಿಕ್ ಕೆಲಿ.
ಹ್ಯಾ ಕಾದಂಬರೆಕ್ ಸವಿಸ್ತಾರ್ ಪ್ರಸ್ತಾವನ್ ಬರವ್ನ್, ಮೊಕ್ಳಿಕ್ ಕಾರ್ಯಕ್ರಮಾಕ್ ಹಾಜರ್ ಆಸ್ಲ್ಲ್ಯಾ ಉಡುಪಿ ದಿಯೆಸಿಜಿಚಾ ಸಾರ್ವಜಣಿಕ್ ಸಂಪರ್ಕ್ ಅಧಿಕಾರಿ ಆನಿ ತೊಟ್ಟಮ್ ಸಾಂತ್ ಆನ್ನಾ ಮಾಯೆಚಾ ಫಿರ್ಗಜೆಚೆ ವಿಗಾರ್ ಮಾ| ಬಾ| ಡೆನಿಸ್ ಡೆಸಾ ಹಾಣಿ ಕಾದಂಬರಿಂತ್ ಉಲ್ಲೇಖ್ ಕೆಲ್ಲ್ಯಾ ಪಾತ್ರಾಂ ಆನಿ ಸನ್ನಿವೇಶಾಂ ವಿಶ್ಯಾಂತ್ ತಶೆಂಚ್ ದುಸ್ರ್ಯಾ ಮಹಾಝುಜಾಚಾ ಪಾಠ್ತಳಾರ್ ವಿಣ್ಲ್ಲ್ಯಾ ಹ್ಯಾ ಕಾದಂಬರಿಚಾ ಮಹತ್ವಾ ವಿಶ್ಯಾಂತ್ ಮಾಹೆತ್ ದಿಲಿ.
ಮಾ| ಬಾ| ಹೆನ್ರಿ ಆಲ್ವನ್ ಆಪ್ಲ್ಯಾ ಸಂದೇಶಾಂತ್ ಡಾ| ಎವ್ಜಿನ್ ಡಿಸೋಜಾಕ್ ಪರ್ಬಿಂ ಪಾಟೊವ್ನ್, ಆಜ್-ಕಾಲ್ ಲೊಕಾಂ ಥಂಯ್ ಪುಸ್ತಕ್ ವಾಚ್ಚಿ ಸವಯ್ ಆಧುನಿಕ್ ಕಾಳಾಚಾ ತಾಂತ್ರಿಕ್ ಸುವಿಧಾಂ ವರ್ವಿಂ ಉಣಿ ಜಾವ್ನ್ ಆಯ್ಲ್ಯಾ ಮ್ಹಳ್ಳಿ ಖಂತ್ ಉಚಾರ್ಲಿ. ಕಾದಂಬರಿ ವ ಹೆರ್ ಖಂಯ್ಚೇಯೀ ಬೂಕ್ ವಾಚ್ಲ್ಲ್ಯಾನ್ ಸ್ಮರಣ್ ಸಕತ್ ಅಸ್ಕತ್ ಜಾಯ್ನಾ ಆನಿ ವಾಚಾಪ್ ಮತಿಚೆ ಒತ್ತಡ್ ಹಾಳೂ ಕರ್ತಾ ದೆಕುನ್ ‘ಚಂದ್ರಾವಯ್ಲೆಂ ಮೋಡ್’ ತಸಲ್ಯೊ ಕಾದಂಬರಿ ವಾಚಿಜಾಯ್ ಮ್ಹಳ್ಳೊ ಸಂದೇಶ್ ದಿಲೊ.
ಡಾ| ಎವ್ಜಿನ್ ಡಿಸೋಜಾನ್ ‘ಚಂದ್ರಾವಯ್ಲೆಂ ಮೋಡ್’ ಕಾದಂಬರಿ ಪ್ರಕಾಶಿತ್ ಕರ್ನ್ ಮೊಕ್ಳಿಕ್ ಜಾಂವ್ಚಾ ಪರ್ಯಾಂತ್ ಸಹಕಾರ್ ದಿಲ್ಲ್ಯಾ ಸರ್ವ್ ಮಾನೆಸ್ತಾಂಚೊ ಉಪ್ಕಾರ್ ಭಾವುಡ್ಲೊ.
ಹ್ಯಾ ಸಂಧರ್ಬಾರ್ ಪರಿಚಯ ಪಾಂಬೂರ್ ಹಾಚೊ ಮ್ಯಾನೆಜಿಂಗ್ ಟ್ರಸ್ಟಿ, ಡಾ| ವಿನ್ಸೆಂಟ್ ಆಲ್ವ, ಅಧ್ಯಕ್ಷ್ ಅನಿಲ್ ಡೆಸಾ, ಖಜಾನ್ದಾರ್ ಐವನ್ ಪೀಟರ್ ವೆದಿರ್ ಹಾಜರ್ ಆಸ್ಲೆ. ತ್ಯಾ ಶಿವಾಯ್ ಎರ್ಮಾಳ್ ಫಿರ್ಗಜೆಚೆ ವಿಗಾರ್ ಮಾ| ಬಾ| ಜೊಸ್ವಿ ಫೆರ್ನಾಂಡಿಸ್ , ಪಾಂಬೂರ್ ಫಿರ್ಗಜೆಚೆ ವಿಗಾರ್ ಮಾ| ಬಾ| ರೊಶನ್ ಡಿ’ಸೋಜಾ, ಬೊಳಿಯೆ ಫಿರ್ಗಜೆಚೆ ವಿಗಾರ್ ಮಾ| ಬಾ| ಜೊರ್ಜ್ ಡಿ’ ಸೋಜಾ ಆನಿ ಸಹಾಯಕ್ ವಿಗಾರ್ ಮಾ| ಬಾ| ರಿಕ್ಸನ್ ಮೊಂತೆರೊ, ಬ್ರದರ್ ಕೆವಿನ್ ಡಿ’ಸೋಜಾ, ಪರಿಚಯ ಸಂಸ್ಥ್ಯಾಚೊ ಕಾರ್ಯದರ್ಶಿ ಪ್ರಕಾಶ್ ನೊರೊನ್ಹಾ ಆನಿ ಇತರ್ ಟ್ರಸ್ಟಿ ಹಾಜರ್ ಆಸ್ಲೆ.
ಕು| ಪ್ರಿಯಾಂಕಾ ನೊರೊನ್ಹಾನ್ ಕಾದಂಬರಿ ಮೊಕ್ಳಿಕ್ ಕಾರ್ಯೆಂ ಚಲವ್ನ್ ವೆಲೆಂ.
