ಕ್ರಿಸ್ಮಸ್‌ಜಾಂವ್‌, ಯಾ ಪಾಸ್ಕಾಚಿ ಪರಬ್ ಜಾಂವ್‌, ತ್ಯಾ ದಿಸಾಚೆಂ ಮಿಸಾಚೆಂ ಬಲಿದಾನ್‌ಮ್ಹಳ್ಳ್ಯಾರ್‌ಅಧ್ಯಾತ್ಮಿಕತಾ ಮಾತ್ರ್ ನಂಯ್, ಸಂಭ್ರಮ್‌ಯೀ ಆಸ್ತಾ. ಪುಣ್ ಮೀಸ್ ಮುಗ್ದೊನ್‌ ಯೆತಾನಾ ಏಕ್ ಶ್ರೇಣೀಕೃತ್‌ ಬಂಡವಾಳ್‌ವಾದಿ ಸಮಾಜೆಚಿ ಸರ್ವ್ ಲಕ್ಶಣಾಂ ಇಗರ್ಜೆಂತ್ ದಿಸೊನ್‌ ಯೆತಾತ್. ಮೀಸ್ ಚಲೊವ್ನ್‌ ವೆಲ್ಲೊ ಪಾದ್ರ್ಯಾಬ್ ಥೊಡೊ ವೇಳ್ ವಿಶೆವ್‌ ಘೆತಾ ಆನಿ ತ್ಯಾ ವೆಳಿಂ ಫಿರ್ಗಜೆಚೊ ಉಪಾಧ್ಯಕ್ಷ್ ಯಾ ಕಾರ್ಯದರ್ಶಿ ವೆದಿಕ್‌ ಚಡ್ತಾ ಆನಿ ಫೆಸ್ತಾವೆಳಿಂ ಇಗರ್ಜೆಕ್ ದಾನ್ ದಿಲ್ಲ್ಯಾಂಚೆಂ ನಾಂವ್ ವಾಚುನ್ ಸಾಂಗ್ತಾ. ತೆದಾಳಾಚ್‌ ಸುರು ಜಾತಾ ಇಗರ್ಜೆಚಿ ಆರ್ಥಿಕ್‌ ಸಮೀಕ್ಷಾ! ತ್ಯಾ ಇಗರ್ಜೆಂತ್ ಕೋಣ್‌ ತಾಂಕಿವಂತ್‌ ಆಸಾತ್, ಕೋಣ್‌ ಉದಾರಿ ಮನಾಚೆ ದಾನಿ ಆಸಾತ್, ಆನಿ ಕಷ್ಟಾಂನಿ ಶೆಂಬೊರ್‌ – ದೊನ್ಶಿ ರುಪಯ್‌ ದಿಂವ್ಚೆ ದುಬ್ಳೆ ಮನಿಸ್ ಆಸಾತ್ – ಹೆಂ ಸಕ್ಕಡ್ ಹ್ಯಾ ವೆಳಿಂ ಕಳೊನ್‌ ಯೆತಾ. ಆದ್ಲ್ಯಾ ಥೊಡ್ಯಾ ವರ್ಸಾಂನಿ ಮ್ಹಜ್ಯಾ ಲಾಗ್ಶಿಲ್ಯಾ ದೋನ್‌ ಇಗರ್ಜಾಂನಿ ಜಾಲ್ಲ್ಯಾ ಅನ್ಭೊಗಾಚೆರ್ ಹೆಂ ಹಾಂವ್‌ ಬರವ್ನ್‌ ಆಸಾಂ.
ದಾನಿಂಚಿ ಪಟ್ಟಿ ಅಶೆಂ ಸುರು ಜಾತಾ … ಪಯ್ಲೆಂ ಲಾಕಾಂನಿ ದಿಲ್ಲೆ. ಹಾಂಚಿ ಪಟ್ಟಿ ಲ್ಹಾನ್. ಹ್ಯಾ ಮಟ್ಟಾರ್ ದಾನ್ ದಿಲ್ಲೆ ಥೊಡೆಚ್‌ ಅಸ್‌ಲ್ಲ್ಯಾನ್‌ ಪಟ್ಟಿ ವಾಚುನ್ ಸಾಂಗ್ಚೊ ಮಾನೆಸ್ತ್‌ಯೀ ಭೋವ್‌ ಉರ್ಬೆನ್‌ ವಾಚುನ್ ವೆತಾ. ಉಪ್ರಾಂತ್ ಧಾ ಹಜಾರ್‌, ಪಾಂಚ್ ಹಜಾರ್‌ ರುಪಯ್‌ ದಿಲ್ಲ್ಯಾಂಚಿಂ ನಾಂವಾಂ … ಆಮ್ಚಿ ಆರ್ಥಿಕ್‌ಸ್ಥಿತಿ ಇಲ್ಲಿಶಿ ಬರಿ ಆಸ್‌ಲ್ಲ್ಯಾನ್‌ ಹಿಂ ನಾಂವಾಂ ಹ್ಯಾ ದಿಸಾಂನಿ ಚಡ್‌ಚ್‌ ಆಸ್ತಾತ್‌. ಪುಣ್ ಸಕ್ಕಡ್ ಕಡೆ ಅಶೆಂಚ್‌ ಆಸ್ಚೆಂ ನಾ. ಆನಿ ನಿಮಾಣೆ ಯೆತಾತ್ ಶೆಂಭರ್‌, ದೊನ್ಶಿ ರುಪಯ್‌ ದಿಲ್ಲೆ ಭಾವ್ಡೆ. ಹಾಂಚಿಂ ನಾಂವಾಂ ವಾಚ್ತಾನಾ, ಹಾಂಕಾಂ ಅಕ್ಮಾನ್ ಕರುಂಕ್‌ಚ್‌ ಉಪಾಧ್ಯಕ್ಷ್/ ಕಾರ್ಯದರ್ಶಿ ಪಟ್ಟಿ ವಾಚುನ್ ಆಸಾ ಮ್ಹಣೊನ್ ಮ್ಹಾಕಾ ಭೊಗ್ತಾ. ಎದೊಳ್‌ಚ್‌ ಪಾಂಚ್-ಧಾ ಹಜಾರ್‌ ರುಪಯ್‌ ದಿಲ್ಲ್ಯಾಂಚಿ ಪಟ್ಟಿ ವಾಚ್‌ಲ್ಲ್ಯಾ ತಾಚೊ ಗಳೊ ಎದೊಳ್‌ಚ್‌ ಸುಕೊನ್‌ ಆಸ್ತಾ. ಸುಮಾರ್‌ ದೋನ್‌ ವರಾಂಚೆಂ ಮೀಸ್ ಆಯ್ಕಾಲ್ಲ್ಯಾವರ್ವಿಂ ತ್ರಾಣ್‌ಯೀ ಉಣೆ ಜಾವ್ನ್ ಆಸ್ತಾ. ತ್ಯಾ ದೆಕುನ್‌ಚ್‌ ಶೆಂಭರ್‌ – ದೊನ್ಶಿ ರುಪಯ್‌ ದಾನ್ ದಿಲ್ಲ್ಯಾಂಚೆಂ ನಾಂವ್ ವಾಚ್ತಾನಾ ತಾಚ್ಯಾ ಉತ್ರಾಂನಿ ಬಳ್‌ ಆಸಾನಾ. ಲಾಕಾಂನಿ ಪಯ್ಶೆ ದಿಲ್ಲ್ಯಾಂಚೆಂ ನಾಂವ್ ವಾಚ್ತಾನಾ ಆಸ್‌ಲ್ಲಿ ತಿ ಹುಮೆದ್‌ ಬಿಲ್ಕುಲ್‌ ದಿಸಾನಾ. ಏಕ್ ಪಾವ್ಟಿಂ ಪಟ್ಟಿ ವಾಚುನ್ ಮುಗ್ದಿಜೆ ಮ್ಹಳ್ಳ್ಯಾ ಉದ್ದೇಶಾನ್‌, ನಿತ್ರಾಣ್‌ ಜಾಲ್ಲ್ಯಾ ಆವಾಜಾನ್‌ ತೊ/ತೆಂ ಪಟ್ಟಿ ಧಾಂವ್ಡಾಯ್ತಾ. ತ್ಯಾ ದೆಕುನ್‌ಚ್‌ ಹಾಂಕಾಂ ಅಕ್ಮಾನ್ ಕರುಂಕ್ ಪಟ್ಟಿ ವಾಚ್ತಾತ್ ಮ್ಹಣ್ ಮ್ಹಾಕಾ ಭೊಗ್ಚೆಂ ಆಸಾ.
ಜೆಜು ಕ್ರೀಸ್ತ್‌ ಖಾವ್ಣೆರ್‌ ಜಲ್ಮಾಲೊ, ದುಬ್ಳೊ ಜಾವ್ನ್ ಜಲ್ಮಾಲೊ ಮ್ಹಣೊನ್ ಸುರ್ವೆರ್‌ ಪಾದ್ರ್ಯಾಬ್ ವ್ಹಡಾ ತಾಳ್ಯಾನ್‌ ಮ್ಹಣ್ತಾ. ಆನಿ ಮೀಸ್ ಅಕೇರ್‌ ಜಾತಾನಾ ಫಿರ್ಗಜೆಚ್ಯಾ ದುಬ್ಳ್ಯಾಂಕ್‌ ತ್ಯಾಚ್‌ ಖಾವ್ಣೆಕ್‌ ಫಿಚಾರ್‌ ಕರ್ನ್ ಸೊಡ್ತಾತ್‌. ವ್ಹಯ್, ಹೆಂ ಭಾಗ್‌(ನಿರ್ಭಾಗ್) ದುಬ್ಳ್ಯಾಂಕ್‌ ಮಾತ್ರ್ ಫಾವೊ! ಹಾಂವೆಂ ಲ್ಹಾನ್‌ಆಸ್ತಾನಾ ಹಿಂದಿ ಪಾಠ್‌ಬುಕಾಂತ್‌ ವಾಚ್‌ಲ್ಲೆಂ ಉಡಾಸ್‌ ಯೆತಾ. ಗೌತಮ ಬುದ್ಧ ಗಾಂವ್‌ ಭೊಂವೊನ್‌ ಯೆತಾಲೊ. ಸಕ್ಡಾಂನಿ ತಾಂಚ್ಯಾ ಖುಶೆ ಫರ್ಮಾಣೆ ದಾನ್ ದಿಲೆಂ. ಪುಣ್ ಎಕಾ ಮ್ಹಾಲ್ಘಡ್ಯಾ ಸ್ತ್ರೀಯೆನ್‌ ಅರ್ಧೆಂ ಖೆಲ್ಲೆಂ ದಾಳಿಂಬ್‌ ದಿಲೆಂ. ಆನಿ ಹೆಂ ದಾಳಿಂಬ್‌ ತೊ ಸಂತೊಸಾನ್‌ ದೊನೀ ಹಾತಾಂನಿ ಘೆತಾ. ಸಕ್ಡಾಂಚೆಂ ದಾನ್ ಎಕಾ ಹಾತಾಂತ್‌ ಘೆತ್‌ಲ್ಲ್ಯಾ ತಾಣೆ ಹ್ಯಾ ಸ್ತ್ರೀಯೆಚೆಂ ದಾನ್ ದೋನ್‌ ಹಾತಾಂನಿ ಕಿತ್ಯಾಕ್ ಘೆತ್ಲೆಂ ಮ್ಹಣೊನ್ ದುಸ್ರ್ಯಾಂನಿ ಸವಾಲ್ ಕರ್ತಾನಾ ತೊ ಅಶೆಂ ಮ್ಹಣಾಲೊ: ʻʻಸಕ್ಡಾಂನಿ ಆಪ್ಣಾ ಲಾಗಿಂ ಭರೊನ್‌ ಒಮ್ತುಂಚ್ಯಾ ಸಂಪತ್ತೆ ಥಾವ್ನ್ ದಾನ್ ದಿಲೆಂ, ಆನಿ ಹ್ಯಾ ಮಾಲ್ಘಡ್ಯಾ ಸ್ತ್ರೀಯೆನ್‌ ಆಪ್ಣಾ ಕಡೆ ಜೆಂ ಕಿತೆಂ ಆಸಾ ತೆಂಚ್‌ ದಾನ್‌ದಿಲೆಂ, ತೆಂಯೀ ಕಿತೆಂಚ್‌ ಪ್ರತಿಫಳ್‌ ಅಪೇಕ್ಷಾ ಕರಿನಾಸ್ತಾನಾ…” ಕಾಣಿ ಕಿತ್ಲಿ ಬರಿ ಆಸಾ ನೈಂಗೀ?
ಘರಾಕ್‌ ದುಕ್ರಾಮಾಸ್‌ ಯಾ ಕೇಕ್‌ ಹಾಡ್ತಾನಾ ಇಲ್ಲೆಶೆಂ ಸಾಕ್ರಿಫಿಸ್‌ ಕರ್ನ್ ಇಗರ್ಜೆಕ್ ಲ್ಹಾನ್ ಮಟ್ಟಾರ್ ದಾನ್ ದಿಲ್ಲ್ಯಾಂಚಿಂ ಪರಿಗತ್‌ ಮಾತ್ರ್ ಉಳ್ಟಿ. ಕೊಣೀ ಹಾಂಚೆಂ ದಾನ್ ದೋನ್‌ ಹಾತಾಂನಿ ಘೆನಾ. ಬದ್ಲಾಕ್‌ ನಿಮಾಣ್ಯಾಚಾ ನಿಮಾಣೆ ಹಾಂಚೆಂ ನಾಂವ್ ವಾಚುನ್ (ತೆಂಯೀ ಅರ್ಧ್ಯಾ ಮನಾನ್) ಫಿರ್ಗಜೆಂತ್ ತಾಂಚೆಂ ಸ್ಥಾನ್‌ ಕಿತೆಂ ಮ್ಹಣೊನ್ ಸಗ್ಳ್ಯಾಂ ಮುಕಾರ್ ಸಾದರ್ ಕರ್ತಾತ್. ಏಕ್ ಖರೆಂ ಸಯ್ತ್ ಸುವಿಯೆಚ್ಯಾ ಬಿಡ್ಡ್ಯಾನ್‌ ಪಾಶಾರ್‌ ಜಾಯ್ತ್‌, ಪುಣ್ ಗ್ರೇಸ್ತ್‌ ಮನಿಸ್ ನ್ಹಂಯ್‌ ಮ್ಹಣೊನ್ ಆಮಿ ತ್ಯಾಚ್‌ ಇಗರ್ಜೆಂತ್ ಆಯ್ಕಾತಾಂವ್. ಪುಣ್ ಹಾಂಗಾಸರ್‌ ಗ್ರೇಸ್ತ್‌ ಮನಿಸ್ ಸುಲಭಾಯೆನ್‌ ಸುವಿಯೆಚ್ಯಾ ಬಿಡ್ಡ್ಯಾಂತ್ಲ್ಯಾನ್‌ ಪಾಶಾರ್‌ ಜಾವ್ನ್ ಆಸಾ. ದುಬ್ಳೊ ಮಾತ್ರ್ ಸರ್ಗಾಚೆಂ ಸೊಪೊಣ್‌ ಪಳೆವ್ನ್ ಆಸಾ.
ಥೊಡ್ಯಾ ಕಡೆ ಹಾಂವೆಂ ಆಶೆಂಯೀ ಪಳೆಲಾಂ. ಫೆಸ್ತಾಕ್‌ ದಾನ್ ದಿಲ್ಲ್ಯಾಂಚೆಂ ಫಕತ್ ನಾಂವಾಂ ವಾಚ್ತಾತ್. ವಯಕ್ತಿಕ್‌ ರಿತಿನ್ ಕೊಣೆ ಕಿತ್ಲೆ ದಿಲೆ ಮ್ಹಣೊನ್ ವಾಚುನ್ ಸಾಂಗಾನಾಂತ್. ಕೊಣಾಲಾಗಿಂ ಕಿತ್ಲೆಂ ಆರ್ಥಿಕ್‌ ಬಳ್‌ ಆಸಾ, ಕೋಣ್‌ ತ್ಯಾ ಫಿರ್ಗಜೆಂತ್ ವ್ಹಡ್‌ ದಾನಿ ಜಾವ್ನಾಸಾತ್‌ ಆನಿ ಹ್ಯಾ ಫಿರ್ಗಜೆಚೆ ನಿಮಾಣೆ ಮನಿಸ್ ಕೋಣ್‌ (ಶೆಂಭರ್‌- ದೊನ್ಶಿ ರುಪಯ್‌ ದೀವ್ನ್‌ ಅಕ್ಮಾನ್ ಸೊಸ್ಚೆ!) ಮ್ಹಣೊನ್ ಭಾಯ್ಲ್ಯಾನ್‌ ಕಳಾನಾ. ಥೊಡ್ಯಾ ಫಿರ್ಗಜಾಂನಿ ಅಜೂನೀ ಹಿ ವೆವಸ್ತಾ ಆಸೊಂಕ್‌ ಪುರೊ. ತರೀ ಹಿ ವೆವಸ್ತಾ ಮುಗ್ದೊನ್‌ ಶ್ರೇಣೀಕರಣಾಚಿ ವೆವಸ್ತಾ ಕಿತ್ಯಾಕ್ ಆಯ್ಲಿ ಮ್ಹಣೊನ್ ಕಳಾನಾ.
ಆದಿಂ, ಫಿರ್ಗಜೆಚೆ ಪ್ರಮುಖ್‌ ವೆಕ್ತಿ ಬಾಂಕಾರ್ ಬಸ್ತೆಲೆ. ಬಾಂಕಾರ್ ತಾಂಚೆಂ ನಾಂವ್‌ಯೀ ಆಸ್ತೆಲೆಂ. ಆನಿ ಉರ್‌ಲ್ಲೆ ಸಾದೆ ಮನಿಸ್ ಸಕಯ್ಲ್‌ ಧರ್ಣಿರ್ ಬಸ್ತೆಲೆ ಖಂಯ್. (ಹ್ಯಾ ವಿಶಿಂ ಮಾನೆಸ್ತ್‌ ಸ್ಟೀವನ್‌ ಕ್ವಾಡ್ರಸಾನ್‌ ಕಿಟಾಳಾರ್ ಬರಯಿಲ್ಲ್ಯಾ ಲೇಖನಾಂತ್‌ ಭರ್ಪೂರ್‌ ವಿವರ್‌ ದಿಲಾ) ತೀ ಪರಿಗತ್‌ ಆಜ್ ಬದ್ಲಾಲ್ಯಾ. ಎಕಾ ಲೆಕಾರ್‌ ಹೆಂ ಸುಧಾರಣ್‌ಚ್‌ ಸಯ್. ತರೀ ಹ್ಯಾ ದಾನ್ – ಧರ್ಮಾಚ್ಯಾ ಪಟ್ಟೆ ವಿಶ್ಯಾಂತ್ ಆಮಿ ಪಾಟಿಂ ವಚೊನ್‌ ಆಸಾಂವ್‌ಗೀ ಮ್ಹಣೊನ್ ಮ್ಹಾಕಾ ಭೊಗ್ತಾ. ತೆಂಯೀ ಎಕುಣಿಸಾವ್ಯಾ ಶೆಕ್ಡ್ಯಾರ್… ದಿಯೆಸೆಜಿಚ್ಯಾ ವ್ಹಡಿಲಾಂನಿ ಹೆ ವಿಶ್ಯಾಂತ್ ಚಿಂತಪ್ ಆಟವ್ನ್, ಜೊಕ್ತೆಂ ಮೇಟ್ ಕಾಡ್ಲ್ಯಾರ್ ಬರೆಂ ಮ್ಹಣ್ ಮ್ಹಾಕಾ ಬೊಗ್ತಾ.
► ಮೆಲ್‌ಕ, ಮಿಯಾರ್
4 comments
ಗ್ರೇಸ್ತಾನಿಂ ದಾನ್ ದಿಂವ್ಚೆಂ ನಹಿಂ. ಸ್ಪೋನ್ಸರ್ ಕರ್ಚೆಂ. ಭೊರೊನ್ ಒಂಪ್ತಾ ತಾಂತ್ಲೆಂ. ಸ್ಪೋನ್ಸರ್ ಕರ್ಚೆ ಧರ್ಮಾಕ್ ಕರಿನಾಂತ್. ಕಶೆ ಕೆಲ್ಲ್ಯಾಂತ್ ಫಾಯ್ದೊ ಜಾತಾ ಜಾಲ್ಯಾರ್ ಮಾತ್ರ್ ಕರ್ತಾತ್. ಥೊಡೆ ಮುಖ್ಲ್ಯಾ ಜೀವಿತಾಂತ್ ಮ್ಹುಳ್ಳ್ಯಾರ್ ಹೊ ಸಂಸಾರ್ ಸೊಡ್ಲ್ಯಾ ಉಪ್ರಾಂತ್ ಲಾಬ್ ಮೆಳ್ಚಾ ಆಶೆನ್ ಯಾ ಉಜ್ಯಾಂತ್ ಲಾಸ್ಚಾ ಭಿಯಾನ್ ಪೂನ್ ಜೊಡುಂಕ್ ದಾನ್ ದೀತಾತ್. ಹೆಂ ಭೆಂ ನಾತ್ಲೆಂ ತರ್ ಇಗರ್ಜೆಚಾ ಕೊಂಡ್ಯಾನಿಂ ಚಿಲ್ಲರ್ ಪೊಯ್ಶೆಯೀ ಪೊಡ್ಚೆನಾಂತ್. ಪಾದ್ರಿಂಕ್ ಗೊತ್ತು ಗುಟಾಂತ್ ಪೊಡ್ಚಾ ಇಜ್ಮೊಲಾಕ್ ಪಾತ್ಯೆಲ್ಯಾರ್ ಸರ್ಗಾಚೆಂ ಬಾಗಿಲ್ ಉಗ್ತೆಂ ಜಾಂವ್ಚೆಂ ಅವ್ಕಾಸ್ ಆಸಾತ್ ಪೂನ್ ಬೇಂಕಾಚೆಂ ಬಾಗಿಲ್ ಉಗ್ತೆಂ ಜಾಂವ್ಚೆಂ ಕಷ್ಟ್. ದೆಕುನ್ ವರ್ಸಾ ವರ್ಸಾ ನವಿಂ ಪ್ರಾಜೆಕ್ಟಾಂ ಆನಿಂ ದಾನಿಂಚೆಂ ಪಬ್ಲಿಕ್ ಶಾಭಾಸ್ಕಯ್. ಸಕ್ಕಡ್ ಬಿಜ್ನೆಸ್. ಮೀಸ್ ಮಾಸ್ ದುತೊರ್ನ್ ದುಕೊರ್
ಮೆಲ್ಕಾನ್ ಆಜ್ ಯೇಕ್ ನಾಗ್ಡೆ೦ ಸತ್ ಸಕ್ಡಾ ಮುಕಾರ್ ಉಗ್ತ್ಯಾಕ್ ಹಾಡ್ಲ್ಯಾ. ಆಜ್ ಥೊಡ್ಯೊ ಫ಼ಿರ್ಗಜ್ಯೊ ಗ್ರೇಸ್ತಾ೦ಕ್ ಮಾತ್ರ್ ಸೀಮಿತ್ ಜಾಲ್ಲೆ ಬರಿ ಮಾಕಾಯ್ ಭ್ಹೊಗ್ಲೆ೦ ಅಸಾ. ಗಿರಸ್ತ್ಕಾಯೆಕ್ ಲಾಗುನ್ ಲೋಕ್ ವಾಟುನ್ ಕೆಲ್ಲೊಯ್ ಹಾವೆ೦ ಫೊಳೆಲಾ೦ ಧಾಕ್ಲ್ಯಾಕ್ ಏಸ್ಟೇಟ್ವಾಲೆ, ಗಿರೆಸ್ತ್ವಾಲೆ ಆಲೊಷಿಯಸ್ ಚಾಪ್ಲಾಕ್, ಫ಼ಾತಿಮಾ ರೆತಿರ್ ಮ೦ದಿರಾಕ್ ಇ೦ಗ್ಲಿಶ್ ಮೀಸಾಕ್ ಮಾತ್ರ್ ವೆತಾತ್. ಹ್ಯಾ ಇ೦ಗ್ಲಿಶ್ ಮಿಸಾ ವರ್ವಿ ಥೊಡ್ಯಾ ಪಿರ್ಗಜೆನಿ೦ ಇ೦ಗ್ಲೀಶ್ ಮೀಸ್ ಸುರು ಕರಿಜೆ ಪೊಡುಲ್ಲೆ೦ ತೇ೦ ಗುಪಿತ್ತ್ ನೈ೦.
ತಾ೦ಚಾ ಕಾರ್ಯಾ೦ತ್ ಏಸ್ಟೇಟ್ವಾಲೆ ಸೊಡ್ನ್ ಹೆರ್ ಕೊಣಾಕಿ ಅಪೊವ್ಣೆ ಅಸಾನಾ. ಯೆಕಾ ರೊಸಾ೦ತ್ ಗೆಲ್ಲ್ಯಾ ಕಡೆ ರೊಸ್ ಫಕತ್ ಯೆಕಾ ಭೊಟಾ೦ತ್ ಗಾಲಾಕ್ ಪುಸು೦ಕ್ ಮಾತ್ರ್ ಅವ್ಕಾಸ್ ತೇ೦ಯ್ ಅವಯ್ ಅನಿ ಬಾಪಾಯ್ಕ ಮಾತ್ರ್ ಹೆರಾ೦ಕ್ ಅವ್ಕಾಸ್ ನಾ. ೫ ಹಾಜಾರ್ ರುಪ್ಯಾಚೆ ಮೆಕ್ಅಪ್ ಪಾಡ್ ಜಾತಾ ಮುಣ್ ಜವಾಬ್. ಹ್ಯಾ ಸಕ್ಕಡಿ ರೊಸಾ೦ಕ್ ಮಾಗ್ಣೆ೦ ಶಿಕೊ೦ವ್ಕ್ ಯೆಕಸ್ ರಿಲಿಜಿಯಸ್ ಪಾದ್ರಾಬ್ ತಾಣೆ೦ ಗ್ರೆಸ್ತಾ೦ಚಾ ಘರಾ ಮಾತ್ರ್ ವೆಚೆ೦ ತೊ ಹ್ಯಾ ಕ್ಯಾಟಗರಿಚಾ ಜಣಾ೦ಸೊ ಕಾಯಾ೦ ಪಾದ್ರಿ. ತಾಕಾ ಥೊಡೆ ಸ೦ಸ್ಕ್ರಥ ಮತ್ರಾ೦ಯ್ ಯೆತಾತ್ ವೆಳಾ ಕಾಳಾ ಪರ್ಮಾಣೆ೦ ತೀ೦ ಭಾರ್ಯ್ ಯೆತಾತ್. ಆತಾ೦ ತೊ ದಿಸಾನಾ.
ಯೆಕಾ ಇಗರ್ಜೆ೦ತ್ ತಾ೦ಚಾ ಕುಟ್ಮಾ೦ನಿ ದಾನ್ ದಿಲ್ಲ್ಯಾ ಬಾ೦ಕಾನಿ ತಾ೦ನಿ ಮಾತ್ರ್ ಬೊಸಜೆ ಮುಳ್ಳಿ ಸ೦ಪ್ರದಾಯ್ ಹೆರಾ೦ನಿ ಬೊಸ್ಲ್ಯಾರ್ ತಾ೦ಕಾ ಜಾಯ್ನಾ. ಫಿರ್ಗಜೆಕ್ ನೊವೊ ಭ್ಹಾಡ್ಯಾಗಾರ್ ಜಾವ್ನ್ ಗೆಲ್ಲ್ಯಾ ಮಕಾ ಹೆ೦ ಗೊತ್ತು ನಾಸ್ತಾ೦ ಸಕಾಳಿ೦ಚಾ ೭ ವರಾಚಾ ಮಿಸಾಕ್ ಹಾ೦ವ್ ಪಾವುಲ್ಲೊ. ಲೊಕ್ ಕಿತ್ಯಾಕ್ ಉಣೊ ಮುಣ್ ಮಾ೦ಡೊ ಕೊರ್ಪುನ್ ಆಸ್ಲ್ಯಾ ಮಾಕಾ ಯೇಕ್ ಬಾ೦ಕಾರ್ ೨ ಜಣ್ ಮಾತ್ರ್ ಅಸಲ್ಲೆ ಪೊಳೆವ್ನ್ ಹಾ೦ವ್ ದೆಗೆನ್ ಬೊಸುಲ್ಲೊ ತಿತ್ಲೆ೦ಸ್ ಮಾಕಾ ಪೊಳೆವ್ನ್ ತಿ ಸಟ್ಕ್ ಕರ್ನ್ ಉಟೊನ್ ಅನ್ಯೆಕಾ ಭಾ೦ಕಾರ್ ಬಸ್ಲಿ. ಹೆ೦ ಪೊಳೆಲ್ಲ್ಯಾ ಮಿರ್ನ್ಯಾಮಾನ್ ಮೀಸ್ ಜಾಲ್ಲೆ೦ಸ್ ಮಾಕಾ ಕುಸಿಕ್ ಅಪೊವ್ನ್ ಲೊವ್ ಕಾನಾ೦ತ್ ವಿಸಾರಿ “ ತೂ೦ ಹ್ಯಾ ಪಿರ್ಗಜೇಕ್ ನೊವೊ ದಿಸ್ತಾ ತೊ ಬಾ೦ಕ್ ತಾ೦ಚ್ಯಾ ಮಾಲ್ಗ್ ಡ್ಯಾ೦ನಿ ದಾನ್ ದಿಲಾ ತಾ೦ತು ಹೆರಾ೦ನಿ ಬಸ್ಲ್ಯಾರ್ ತಾ೦ಕಾ ಜಾಯ್ನಾ. ಅನೀಕ್ ಜಾಗ್ರುತ್ ಕರ್ “ ಮಾಕಾ ತೆದಾಳಾಸ್ ಗೊತ್ತು ಶೆರಾ೦ನಿ ಅಶೆ೦ಯ್ ಅಸಾ ಮುಣ್. ವಿಗಾರಾನ್ ಮಾಕಾ ಮಿಸಾ ವೆಳಾರ್ ಮಾಗ್ಣ್ಯಾಕ್ ಜವಾಬ್ ದಿಲ್ಲ್ಯಾಕ್ ಶಭಾಸ್ಕಿ ಪಾಟಯ್ಲಿ. “ ಸದಾ೦ಯ್ ಹಾವೆ೦ತ್ ಮಾಗ್ಣೆ೦ ಶಿಕೊವ್ಚೆ೦ ಅನಿ ಹಾವೆ೦ತ್ ಜಾಪ್ ದಿ೦ವ್ಚೆ ಆಜ್ ಮಾಕಾ ತುಜಿ ಜಾಪ್ ಆಯ್ಕೊನ್ ಸ೦ತೊಸ್ ಜಾಲೊ ಮುಣಾಲೊ ವಿಗಾರ್.
ಮಿಸಾ ವೆಳಾರಾ ದುಬ್ಲ್ಯಾ೦ಕ್ ಝಾ೦ವ್ಸೊ ತೊ ಭ್ಹೆದ್ ಭಾವ್ ಲೆಖಕಾನ್ ಸದ್ಯಾ ಉತ್ರಾ೦ನಿ ವಿವರಿಲಾ೦.
It is the most efficient sustainable business model in the world. They will tweak and fine tune their preaching/principles according to the situations. “One tenth give it to God” they say but who told they are the God?
” Your giving may be secret” they emphasize then why are they announcing?
They remained hippocrates because we let them.Poor and needy people’s faith , rich people’s donations keep this system balanced and strong.
ಭೊವ್‍ಚ್ ಸಕಾಲಿಕ್ ವಿಶಯ್ ಆಮಿಗ್ ಮೆಲ್ಕಾನ್ ವಿಂಚ್ಲಾ.ಹೆಂ Status Exhibition ಥೊಡ್ಯಾ ಫಿರ್ಗಜಾಂನಿ ಆಪವಾದ್ ಸೊಡ್ಲ್ಯಾರ್ ಹರ್ ಫಿರ್ಗಜಾಂನಿ ವ್ಯವಸ್ಥಿತ್ ರಿತಿಂನಿ ಚಲೊನ್ ಆಸಾ. ಹಿ ವ್ಯವಸ್ಥಾ ಇತ್ಲಿ ಆರ್ಥಪೂರ್ಣ್ ಜಾವ್ನಾಸಾ ಮುಳ್ಳ್ಯಾರ್ ಸರ್ಕಾರಿ ಆಧಿಕಾರಿಂನಿ ಕ್ರೀಸ್ತಾಂವ್ ಗರ್ಜೆವಂತಾಂಕ್ B.P.L Card ದಿಜೆ ತರ್ ಕೊರ್ಪೊರೇಶನ್/ಪಂಚಾಯಾತ್ ಮುಖಾಂತ್ರ್ ತ್ಯಾ ತ್ಯಾ ಕುಟ್ಮಾಚೆ ಸರ್ವೆ ಕರಿಜೆ ಮುಣೊನ್ ನಾ.ಫೆಸ್ತಾ ದಿಸಾ ಇಗರ್ಜೆಂತ್ ವಾತಿ ವಾಂಟ್ತಾನಾ ಇಗರ್ಜೆಂತ್ ಯೇವ್ನ್ ಬಸ್ಲ್ಯಾರ್ ಪಾವ್ತಾ.ಆನಿ ತ್ಯೊ ಮೊಟ್ಯೊ ವಾತಿ ಜಾಲ್ಯಾರೀ ಉಣೆಂ ಧಾನ್ ದಿಲ್ಲ್ಯಾ ವರ್ಗಾಕ್ ದಿತಾನಾ ತಾಂಕಾಂ ಪಳೆವ್ನ್ ಹಾಸ್ತಾತ್ ತಶೆಂ ಭಗ್ತಾ.ಥೊಡ್ಯಾ ಫಿರ್ಗಜಾಂನಿ ಹಾವೆಂ ಹೆಂ ಸಯ್ತ್ ವಿಕ್ಷಣ್ ಕೆಲಾಂಕಿ ಐವಜ್ ಉಣೊ ಜಾವ್ನ್ ಗೆಲ್ಲ್ಯಾಬರಿ ತೆಂ ವಾಚ್ತೆಲ್ಯಾಂಚ್ಯೊ ಪದ್ವ್ಯೊ ಸಯ್ತ್ ಉಣ್ಯೊ ಜಾವ್ನ್ ಯೆತಾತ್.
ಆಜ್-ಕಾಲ್ಚಿಂ ಫೆಸ್ತಾಂ Live ಪ್ರದರ್ಶನ್ ಜಾತಾತ್ ಜಾಲ್ಲ್ಯಾನ್ ಫಿರ್ಗಜೆಂಚೆಂ ಹೆಂ Status Exhibition ಕೇವಲ್ ತ್ಯಾ ಫಿರ್ಗಜೆಕ್ ಮಾತ್ರ್ ಸ್ಥಿಮಿತ್ ಜಾವ್ನ್ ಉರಾನಾಸ್ತಾನಾ ವಿಕ್ಷಣ್ ಕರ್ತೆಲ್ಯಾ ಸಗ್ಳ್ಯಾ ಸಂಸಾರಾಕ್ ತ್ಯಾ ಫಿರ್ಗಜೆಚಿ ಕಾನೆಷ್ಮಾರಿ ಕಾಡುಂಕ್ ಫಿರ್ಗಜ್ ವ್ಹಡಿಲ್ ಆನಿ ಆಧಿಕಾರಿ ಮಂಡಳಿ ಎಕ್ ಆವ್ಕಾಸ್ ಕರುನ್ ದಿತಾತ್.ಹಾಂಗಾ ಮ್ಹಾಕಾ ದೊಸ್ಚೆಂ ಏಕ್ ಸವಾಲ್.ಪಯ್ಶೆ ಎಕ್ಟಾಂಯ್ ಜಾಂವ್ಚೆ ಆಪ್ಲ್ಯಾ ಫಿರ್ಗಜೆಂತ್ ಜಾಂವ್ಚ್ಯಾ ಫೆಸ್ತಾಂಕ್.ಆಶೆಂ ಆಸ್ತಾಂ ಆಪ್ಲ್ಯಾ ಫಿರ್ಗಜೆಚ್ಯಾ ಕಾರ್ಯಾಂಕ್ , ಆಪ್ಲ್ಯಾ ಫಿರ್ಗಜೆಚ್ಯಾ ಲೊಕಾನ್ ಆಪ್ಲೆಂ ಕಾರ್ಯೆಂ/ಫೆಸ್ತ್ ಮುಣೊನ್ ದಿಂವ್ಚ್ಯಾಕ್ ವಾತಿಂಚಿ Publicity ಕಿತ್ಯಾಕ್ ????
ಮೆಲ್ಕಾನ್ ಬಾಂಕಾಂಚೊ ವಿಶಯ್ ಉಲ್ಲೇಖ್ ಕೆಲ್ಲೊ.ವ್ಹಯ್ ಆಮಿಂ ಲ್ಹಾನ್ ಆಸ್ತಾನಾ ಆಮ್ಚ್ಯಾ ಫಿರ್ಗಜೆಂತ್ಲಿ ವಿಂಚ್ಣಾರ್ ಪರ್ಜಾ ಆಮ್ಕಾಂ ನಿಮ್ನ್ ವರ್ಗಾಚ್ಯಾನಿ ಕೀಳ್ ಜಾವ್ನ್ ಪಳೆತಾಲಿಂ.ಹ್ಯಾಚ್ ದೆಕುನ್ ಮ್ಹಾಕಾ ಭಗ್ತಾ ಕುಮ್ಸಾರಾಂ ಹರ್ಯೆಕಾ ಹಪ್ತ್ಯಾಂತ್ ಜಾತಾಲಿಂ.ತಾಣಿ ಆನಿ ತಾಂಚ್ಯಾ ಕುಟ್ಮಾನ್ ಆಮಾನತ್ ಕೆಲ್ಲ್ಯಾ ಬಾಂಕಾರ್ ಚುಕೊನ್ ಕೊಣಿಂ ಫಿರ್ಗಜ್‍ಗಾರಾಂ , ಪ್ರಾಯೆಸ್ತಾಂ ಯ್ಯಾ ಪಿಡೆಸ್ತಾಂ ಬಸ್ಲ್ಯಾರ್ ಹಿ ವಿಂಚುನ್ ಕಾಡ್‍ಲ್ಲಿ ಪರ್ಜಾ ವೇಳ್ ಕರ್ನ್ ಮಿಸಾಕ್ ಆಯ್ಲ್ಯಾರಿ , ತಾಂಚೆಂ ನಾಂವ್ ಖಂಚಾಯಿಲ್ಲ್ಯಾ ಬಾಂಕಾರ್ ಬಸ್‍ಲ್ಲ್ಯಾಂಕ್ ಉಟೊಂವ್ಕ್ ಪಾಟಿಂ ಮುಕಾರ್ ಪಳೆನಾತ್‍ಲ್ಲಿಂ.8-10 ಜಣಾಂನಿ ಬೊಸ್ಚ್ಯಾ ಬಾಂಕಾರ್ ಎಕೆಕ್ಲಿಂ ಬಸ್ತಾಲಿಂ ತರೀ ಹೆರಾಂಕ್ ಬಸೊಂಕ್ ಆಸ್ಪದ್ ದಿನಾತ್‍ಲ್ಲಿಂ.ಹಿ ಎಕ್ ತುಚ್ಚ್ ರಿವಾಜ್ ರದ್ದ್ ಕೆಲ್ಲ್ಯಾ ದೆವಾಧಿನ್ ಭಿಸ್ಫ್ ಬಾಜಿಲ್ ಸೊಜಾಕ್ ಆಮಿಂ ಆಬಾರಿ ಜಾಂವ್ಕ್ ಜಾಯ್.
ಹಾಂಗಾ ಮ್ಹಾಕಾ ಆನ್ಯೇಕ್ ವಿಶಯ್ ಕಾಡಿಜಾಯ್.ಆಮ್ಚ್ಯಾ ಫಿರ್ಗಜಾಂಚಿಂ Audited Financial Statements ಹರ್ಯೆಕಾ ವರ್ಸಾ ಇಗರ್ಜೆಂತ್ ವಾಚುನ್ ಸಾಂಗ್ತಾತ್ ಆನಿ ಫಿರ್ಗಜೆಚ್ಯಾ Notice Board ರ್ ಉಮ್ಕಾಳಾಯ್ತಾತ್.ಮೊಜಿ ಫಿರ್ಗಜ್ ಧರುನ್ ಚಡ್ತಿಕ್ ಫಿರ್ಗಜಾಂನಿ ಹ್ಯಾ Financial Statements ಂತ್ ಜಮೊ ಜಾಲ್ಲೊ ಐವಜ್ ಚಡೊನ್ಂಚ್ ವೆತಾ ಆನಿ ಖರ್ಚಾಚೊ ಐವಜ್ ಉಣೊ ಆಸ್ತಾ.ಹಾಕಾ ಮುಖ್ಯ್ ಕಾರಣ್ ಜಾವ್ನಾಸಾ ಫಿರ್ಗಜೆಂತ್ ಜಾಂವ್ಚ್ಯಾ ಹರ್ಯೆಕ್ ಯೋಜನಾಂಕ್ ವೆಗ್ಳೊಚ್ ದುಡು ಜಮೊ ಜಾತಾ ಆನಿ ಆಸೊ ಜಮೊ ಜಾಲ್ಲೊ ದುಡು ತ್ಯಾ ತ್ಯಾ ಯೋಜನಾಂ ಪಾಟ್ಲ್ಯಾನ್ ಖರ್ಚ್ ಜಾತಾ ಆನಿ ದೆವಾಚ್ಯಾ ದಯೆನ್ , ಸಾಯ್ಭಿಣ್ ಮಾಯೆಚ್ಯಾ ಕುರ್ಪೆನ್ ಆನಿ ಲೋಕಾಂಚ್ಯಾ ವಿಶಾಲ್ ಮ್ಹನಾಂತ್ ಚಡ್ತಿಕ್ ಯೋಜನಾಂಕ್ ಖರ್ಚಾ ವರ್ವಿಂ ಚಡ್ ಐವಜ್ ಜಮೊ ಜಾತಾ ಆನಿ ತೊ ಉರ್‌ಲ್ಲೊ ಐವಜ್ ಫಿರ್ಗಜೆಚ್ಯಾ Financial Statements ಂತ್ ಕುಡ್ಸಿತಾತ್. ಮಾತ್ರ್ ನಂಯ್ ಆಸ್ತಾಂ ಇತರ್ ದೇಶಾಂಚೆ , ಇತರ್ ಶಹರಾಂಚೆ ತಶೆಂಚ್ ಕುಟ್ಮಾಂತ್ ಬೊರೆಂ ಪಾಲೆಂ ಜಾತಾನಾ ಫಿರ್ಗಜೆ ಲಾಗೊನ್ ಆಮ್ಚೊ ಲೋಕ್ ಉದಾರ್ಪಣ್ ದಾಕಯ್ತಾತ್ ಆನಿ ಆಮ್ಚೆ ಪಾದ್ರ್ಯಾಬ್ ಖಾಲ್ತ್ಯಾ ಕಾಳ್ಜಾನ್ ತೆ ಸ್ವಿಕಾರ್ ಕರ್ತಾತ್.
ಪುಣ್ ಆಸೊ ಜಮೊ ಜಾಲ್ಲೊ ದುಡು ಚಡ್ತಿಕ್ ಜಾವ್ನ್ ಫಿರ್ಗಜಾಂಕ್ ಗರ್ಜ್ ಆಸ್ತಾನಾ ಉಪಯೋಗ್ ಜಾಯ್ನಾ.ವಿಶೇಸ್ ಜಾವ್ನ್ ಫಿರ್ಜೆಂತ್ ನಾಸ್ತಾನಾ ಆಮ್ಚಿಂ ವ್ಹಡ್ಲಿಂ ಫೆಸ್ತಾಂ ಆಚರಣ್ ಜಾತಾನಾ ಆಮ್ಚ್ಯಾ ಇಗರ್ಜಾಂಕ್ ಪೆಂಯ್ಟ್ ಕರ್ಚಿ ಗರ್ಜ್ ಉದೆನಾ , ಡೆಕೊರೆಶನ್ ಆನಿ ಲಾಯ್ಟಿಂಗ್ ಇಲ್ಲೆಶೆಂ ಪಾವ್ತಾ , ಧಾರುಂ ಲಾಸಿಜೆ ಮುಣೊನ್ ನಾ , ಇಗರ್ಜೆಕ್ ಕಿತೆಂಯ್ Gift ಹಾಡಿಜೆ ಮುಣೊನ್ ನಾ ಆನಿ ಹೆರ್ ಆನಾವಶ್ಯಕ್ ಖರ್ಚ್ ಕರಿಜೆ ಮುಣೊನ್ ನಾ.ಪುಣ್ ಫಿರ್ಜೆಂತ್ ಆಸ್‍ಲ್ಲ್ಯಾ ವೆಳಾರ್ ಸರ್ವ್ ಬೊರ‍್ಯಾಂತ್ಲೆಂ ಬೊರೆಂ ಜಾಯ್ಜೆ.
ಹೊಚ್ಚ್ ವಿಶಯ್ ಥೊಡ್ಯಾ ವರ್ಸಾಂ ಆದಿಂ ಮೊಜ್ಯಾ ಫಿರ್ಗಜೆಚ್ಯಾ ವಿಗಾರಾ ಸಂಗಿಂ ಹಾವೆಂ ಪ್ರಸ್ತಾಪ್ ಕಾಡ್‍ಲ್ಲ್ಯಾ ವೆಳಾರ್ ತೊ ಮುಣಾಲಾಗ್ಲೊ ಸಾಂಗ್ಚೆಂ ಸಮಾ ನಾನು ಪುಣ್ ಸಾಯ್ಭ್ ಪರ್ವಣ್ಗಿ ದಿನಾ.ಆತಾಂ ಪರಿಸ್ಥಿತಿ ಕಶಿ ಆಸಾ ಕಳಿತ್ ನಾ.
ಆಖೆರ್ಸುಂಚ್ಯಾ ಆದಿಂ ಮೊಜಿ ಆಭಿಪ್ರಾಯ್ ಕಿತೆಂಗಿ ಮುಳ್ಳ್ಯಾರ್ ಇಗರ್ಜೆಚ್ಯಾ ಬುಕಾಂತ್ ಆಸ್ಚೆ ಪಯ್ಶೆ ತೆ ಆಮ್ಚೆ ಪಯ್ಶೆ , ಆಮ್ಚ್ಯಾ ಫಿರ್ಗಜೆಚ್ಯಾ ಗರ್ಜಾಂಕ್ ಪಾಂವ್ಚೆ ಪಯ್ಶೆ.ಹರ್ಯೆಕ್ ಫಿರ್ಗಜೆಂತ್ Financial Commitee ಆಸ್ತಾ.ಫಿರ್ಜೆಂತ್ ನಾತ್‍ಲ್ಲ್ಯಾ ಫೆಸ್ತಾಂ ಬೊರ‍್ಯಾ ಆನಿ ಸಂಭ್ರಮಿಕ್ ರಿತಿನ್ ಆಚರಣ್ ಕರುಂಕ್ ಎಕ್ ಐವಜ್ ನಿಘಂಟ್ ಕರುಂದಿ.ಲೋಕ್ ಕಿತೆಂ ಖುಶೆನ್ ವಂತಿಗೆ ದಿತಾ ತೆಂ ಇಗರ್ಜೆಚ್ಯಾ Account ಕ್ ಜಮೊ ಜಾಂವ್ದಿ ಆನಿ ಹಿ ವಾತಿಂಚಿ ಸಂಸ್ಕ್ರತಿ ಬಂದ್ ಜಾಂವ್ದಿ.
ಆಮ್ಚ್ಯಾ ಫಿರ್ಗಜಾಂಚ್ಯಾ Bank Balance ಥಾವ್ನ್ ಆಮ್ಚಿ ಗ್ರೇಸ್ತ್‌ಕಾಯ್ ತುಕ್ಚಿ ನಾಕಾ.ಆಮ್ಚೆ ಪಯ್ಶೆ ಆಮ್ಚ್ಯಾ ಗರ್ಜಾಂಕ್ ಉಪಯೋಗ್ ಜಾಂವ್ದಿತ್.