ಪಯ್ಲೆಪಾವ್ಟಿಂ ಸುತ್ತುಪುದೆಲಾಂತ್ ಹ್ಯಾ ಪಾವ್ಟಿಂ ಸಪ್ತೆಂಬರ್ ಆಟ್ ತಾರಿಕೆರ್ ಸಕ್ಕಡ್ ಲೋಕ್ ಮೊಂತಿ ಫೆಸ್ತ್ ನ್ಹಯ್ ಬಗಾರ್ ’ಮೊಂತು’ ಫೆಸ್ತ್ ಆಚರ‍್ಸುಂಕ್ ವ್ಹಡಾ ಅತ್ರೆಗಾನ್ ರಾಕೊನ್ ರಾವ್ಲ್ಯಾತ್. ಅತಾಂ ಮೊಂತು ಕಾಂಯ್ ಮೊಂತಿಚೊ ಜೊವ್ಳೊ ಭಾವ್‌ಗೀ ಮ್ಹಣ್ ತುಮ್ಚ್ಯಾ ಮತಿಂತ್ ಸವಾಲ್ ಉದೆತ್ ಜಾಲ್ಯಾರ್ ಜಾಪ್ ದೀಂವ್ಕ್ ಹಾಂವ್ ಕಾಂಯ್ ಜೊಕಿ ನ್ಹಯ್. ಪೂಣ್ ಸತ್ ಗಜಾಲ್ ಕಿತೆಂಗೀ ಮ್ಹಳ್ಯಾರ್ ಸುತ್ತುಪುದೆಲ್ ಫಿರ್ಗಜೆಚ್ಯಾ ರಾಂದ್ವಯ್ ವಾಡ್ಯಾಂತ್ಲ್ಯಾ ಮೊಂತುಗೆರ್ ಹ್ಯಾ ಪಾವ್ಟಿಂ ಜಾಯ್ತ್ಯಾ ವರ್ಸಾಂ ಉಪ್ರಾಂತ್ ತಾಚೆಂ ಪಯ್ಸ್ ಪಾವ್‌ಲ್ಲೆಂ ಕುಟಮ್ ಸಾಂಗಾತಾ ಮೆಳ್ಳಾಂ. ತ್ಯಾ ಲ್ಹಾನ್ಶೆ ಹಳ್ಳೆಂತ್ ರಾಂದ್ವಯ್ ವಾಡ್ಯಾಂತ್ ಸಾಟ್ ಎಕ್ರೊ ಜಾಗೊ ಮೊಂತುಚೊಚ್. ಬಾಕಿ ಉರ್‌ಲ್ಲಿಂ ಕಾಂಯ್ ಪಾಂಚ್ ಘರಾಂ ಹೆರಾಂಚಿಂ. ಮೊಂತುನ್ ಹ್ಯಾ ಜಾಗ್ಯಾರ್ ರಾಂದ್ವಯ್‌ಚ್ ಕರ‍್ಚಿ ಆನಿ ವಾಡ್ಯಾಚೊ ಚಡಿತ್ ವಾಂಟೊ ಮೊಂತುಚೊ ಜಾಲ್ಲ್ಯಾನ್ ಹ್ಯಾ ವಾಡ್ಯಾಕ್ ರಾಂದ್ವಯ್ ವಾಡೊ ಮ್ಹಣ್ ನಾಂವ್ ದವರ‍್ಚ್ಯಾಕ್ ಫಿರ್ಗಜ್ ವಿಗಾರಾನ್‌ಯೀ ಮಧೆಂ ದೆಂಟೊ ರಿಗಂವ್ಕ್ ನಾ. ನಾಂ ತರ್ ಆಯ್ತಾರಾ ಕಾಣಿಕೆ ಮುಕಾಂತ್ರ್ ಯೆಂವ್ಚಿಂ ತೆಂಡ್ಲಿಂ, ಗೊಸಾಳಿಂ, ತೊವ್ಶಿಂ, ಬೆಂಡಾಂ ಶೀದಾ ವಿಕ್ಚ್ಯಾಕ್ ಸಾಂತೆಕ್‌ಚ್ ಗೆಲಿಂ ತರ್ ಥಂಯ್‌ಥಾವ್ನ್ ಮೊಲಾಕ್ ಹಾಡುಂಕ್ ಕಾಣಿಕೆಚ್ಯಾ ಇಜ್ಮೊಲಾಚಿ ವಾಟ್ಲಿಚ್ ಖಾಲಿ ಜಾತೆಲಿ ಮ್ಹಣ್ ತೊ ಜಾಣಾ.
ಅತಾಂ ಮೊಂತು ಫೆಸ್ತ್ ಮ್ಹಣ್ ಮೊಂತಿ ಫೆಸ್ತಾಕ್ ಆಕ್ಮಾನ್ ಜಾಲೆಂ ಮ್ಹಣ್ ಥೊಡೆ ಕ್ರಿಸ್ತಾಂವ್ ಪ್ರತಿಭಟನಾಕ್ ದೆಂವ್ಚ್ಯಾ ಪಯ್ಲೆಂ ಹಾಂವ್ ನೀಜ್ ಗಜಾಲ್ ಸಾಂಗೊನ್ ಸೊಡ್ತಾಂ. ಮೊಂತಾಮಾಕ್ ತೆಗಾಂ ಭುರ್ಗಿಂ. ಮಾಲ್ಘಡೊ ಪೂತ್ ಕೆನಡ, ಮಧ್ಲೆಂ ಧುವ್ ಅಸ್ಟ್ರೇಲಿಯಾ ಆನಿ ನಿಮಾಣೊ ಪೂತ್ ಲಂಡನ್ ಅಪ್ಲ್ಯಾ ಕುಟ್ಮಾ ಸಮೇತ್ ವಸ್ತಿ ಕರ‍್ತಾತ್. ಪೂಣ್ ಹ್ಯಾ ಪಾವ್ಟಿಂ ಮೊಂತಿ ಫೆಸ್ತಾಕ್‌ಚ್ ಮ್ಹಣ್ ಗಾಂವಾಕ್ ದೆಂವ್ಲ್ಯಾಂತ್. ಹಾಕಾ ಕಾರಣ್ ಕಿತೆಂಗೀ ಮ್ಹಳ್ಯಾರ್ ಅಪ್ಣಾಚೊ ಸಾಟ್ ಎಕ್ರೊ ಜಾಗೊ ತಾಣೆಂ ಅಪ್ಣಾಚ್ಯಾ ಭುರ್ಗ್ಯಾಂಕ್ ಸಮಾನ್ ರಿತಿನ್ ವಾಂಟುನ್ ದಿತಾಂ ಮ್ಹಳಾಂ. ಜಾಯ್ತ್ಯಾ ವರ್ಸಾ ಉಪ್ರಾಂತ್ ಮೊಂತಾಮಾಚೆಂ ಕುಟಮ್ ಸಾಂಗಾತಾ ಮೆಳ್ತಾ ಜಾಲ್ಲ್ಯಾನ್ ಅಖ್ಖಿ ಫಿರ್ಗಜ್ ತಾಂಚ್ಯಾ ಫೆಸ್ತಾಚೊ ದಬಾಜೊ ಪಳೆಂವ್ಕ್ ರಾಕೊನ್ ರಾವ್ಲ್ಯಾಂತ್.
ಅಪ್ಣಾಚೆಂ ಪಯ್ಸ್ ಪಾವ್‌ಲ್ಲೆಂ ಕುಟಮ್ ಸಾಂಗಾತಾ ಮೆಳ್ತಾ ತರೀ ಹೆಂ ಫೆಸ್ತ್ ರಾಂದ್ವಯೆಚೆಂ ಫೆಸ್ತ್ ಜಾಲ್ಲ್ಯಾನ್ ಮೊಂತಾಮ್ ವ್ಹಡ್ ಜಯ್ತ್ ಪಾಡ್ಕೊ ಮಾರ‍್ಚೆಬರಿ ನಾ ವಾ ಬೊಕ್ರ್ಯಾಚಿ ಬಲಿ ಭೆಟಂವ್ಚ್ಯಾಬರಿ ನಾ. ಹ್ಯಾ ಖುಶೆನ್ ಮೊಂತಾಮಾಚೊ ಬೊಕ್ರೊಯೀ ಅಪ್ಣಾಚೆಂ ಆವ್ಕ್ ವಾಡ್ಲೆಂ ಮ್ಹಣೊನ್ ಬೊಕ್ಡೆಕ್ ಘೆವ್ನ್ ಶೀದಾ ದೋನ್ ದೀಸ್ ಗುಡ್ಯಾರ್ ಎಂಜಾಯ್ ಕರುಂಕ್ ಗೆಲಾ. ಹೆವ್ಶಿಲ್ಯಾನ್ ಮೊಂತಾಮ್ ಫೆಸ್ತಾಕ್ ಮ್ಹಣ್ ರಾಂದ್ವಯ್ ಖುಂಟ್ತಾನಾ ಇತ್ಲೆ ದೀಸ್ ಮ್ಹಾಕಾಚ್ ರಾಂದ್ವಯ್ ಆಸ್‌ಲ್ಲಿ ಅತಾಂ ತುಂಯೀ ರಾಂದ್ವಯ್ ಖಾ ಮ್ಹಣ್ ತೊಚ್ ಬೊಕ್ರೊ ಮೊಂತಾಮ್ ರಾಂದ್ವಯ್ ಖಾಂವ್ಚೆಂ ಪಳೆವ್ನ್ ಭಾಯ್ರ್‌ಥಾವ್ನ್ ಎಬೇ ಮ್ಹಣ್ ಹೆಡಾಂವ್ಕ್ ಲಾಗ್ಲಾ. ಪೂಣ್ ಬೊಕ್ರ್ಯಾಕ್ ಕಿತೆಂ ಗೊತ್ತು ನತಾಲಾಂ ಫೆಸ್ತಾಕ್ ಚಡ್ ದೀಸ್ ನಾಂತ್ ಮ್ಹಣೊನ್. ಕಿತೆಂ ಮ್ಹಳ್ಯಾರೀ ತೊ ಬೊಕ್ರೊಚ್ ಪಳೆ. ತಶೆಂ ಮೊಂತಾಮ್ ಹೆರಾಂಕ್ ಬೊಕ್ರೊ ಕರ‍್ಚ್ಯಾಂತ್ ಮಾಹಿರ್ ಮ್ಹಣ್ ಗಾಂವ್ ಸಾಂಗ್ತಾ.
ಪೂಣ್ ಅಶೆಂ ಹೆರಾಂಕ್ ಬೊಕ್ರೊ ಕರ‍್ಚೊ ಮೊಂತಾಮ್ ಅಪ್ಲ್ಯಾ ಖುದ್ಧ್ ಭುರ್ಗ್ಯಾಂಕ್ ಬೊಕ್ರೊ ಕರಿತ್‌ಗಾಯ್. ಅಶೆಂ ಲೋಕ್ ಉಲಯ್ತಾಲೊ. ಕಿತ್ಯಾಕ್ ಮ್ಹಳ್ಯಾರ್ ಲೊಕಾಂಕ್ ಬೊಕ್ರ್ಯಾಚಿ ಬಲಿ ಭೆಟಂವ್ಚೆಂ ಪಳೆಂವ್ಚೆಂ ಮ್ಹಳ್ಯಾರ್ ಭಾರಿಚ್ ಖುಶಿ. ಪೂಣ್ ಮೊಂತಾಮಾನ್ ತಶೆಂ ಕೆಲೆಂ ನಾ. ತಾಚೆಲಾಗಿಂ ಬಾಪಾಯ್ಚೆಂ ಕಾಳಿಜ್ ಆಸ್‌ಲ್ಲೆಂ. ತಾಣೆಂ ಭುರ್ಗ್ಯಾಂಕ್ ಅಪ್ಣಾಚೊ ಸಾಟ್ ಎಕ್ರೊ ಜಾಗೊ ಸಮಾನ್ ರಿತಿನ್ ವಾಂಟುನ್ ದಿಂವ್ಚ್ಯಾಕ್ ದಸ್ತಾವೇಜಾಂ ತಯಾರ್ ಕರುಂಕ್ ಘಾಲ್ಲಿಂ. ಅಪ್ಣಾಕ್ ಬಾಪಯ್ ಕೆದಾಳಾ ಆಪಯ್ತಾ ಮ್ಹಣ್ ಕೆನಡಾಚ್ಯಾ ಹಿಂವಾಂತ್ ಖಾನಾಂತ್ಲ್ಯಾನ್ ದುಂವೊರ್ ಸೊಡ್ಚೊ ಮಾಲ್ಘಡೊ ಪೂತ್ ವೀಸ್ ಎಕ್ರೊ ಜಾಗೊ ಮೆಳ್ತಾ ಮ್ಹಳ್ಳಿ ಖಬರ್ ಆಯ್ಕಾಲ್ಲಿಚ್ ಏಕ್‌ಪಾವ್ಟಿಂ ಅಪುಣ್ ಕೆನಡ ಗೆಲ್ಲ್ಯಾ ಘಡಿಯೆಕ್ ಶಿರಾಪ್ಲೊ ಆನಿ ಅಪ್ಲ್ಯಾ ಕುಟ್ಮಾಕ್ ಘೆವ್ನ್ ವೀಸಾ ಕ್ಯಾನ್ಸಲ್ ಕರ‍್ನ್ ಕೆನಡಾಥಾವ್ನ್ ಕೆನರಾ ಪಾವ್ಲೊಚ್. ಮಾಲ್ಘಡೊ ಪೂತ್ ಕೆನಡಾಥಾವ್ನ್ ಪಾವ್ಲೊ ಆನಿ ವಾಂಟ್ಯಾಂತ್ ಕಾಂಯ್ ಗಡ್ಬಡ್ ಕರಿತ್ ಮ್ಹಣ್ ಚಿಂತುನ್ ಸಾರ್ಕಿ ನೀದ್ ನಾಸ್ತಾಂ, ಜೆವಣ್ ರುಚಾನಾಸ್ತಾಂ ಅಪ್ಣಾಚಿಯೀ ವೀಸಾ ಕ್ಯಾನ್ಸಲ್ ಕರ‍್ನ್ ಆಸ್ಟ್ರೇಲಿಯಾಚೆಂ ಧುವ್ ತಾಚ್ಯಾಯೀ ಕುಟ್ಮಾಕ್ ಘೆವ್ನ್ ಗಡ್ಬಡೆನ್ ಗಾಂವಾಕ್ ದೆಂವ್ಲೆಂ. ಇಲ್ಲೆಂ ವಕಾಲತ್ ಶಿಕ್‌ಲ್ಲೊ ಲಂಡನ್ಚೊ ಪೂತ್ ಮಾತ್ರ್ ಅಪ್ಣಾಚಿ ದಸ್ಕತ್ ನಾಸ್ತಾಂ ಕಿತೆಂಚ್ ಕರುಂಕ್ ಸಾಧ್ಯ್ ನಾ ಆನಿ ಕರಿತ್‌ಬಿ ಜಾಲ್ಯಾರ್ ತೆಂ ಕೊಡ್ತಿಂತ್ ಪಳೆವ್ನ್ ಘೆವ್ಯೆತ್ ಮ್ಹಳ್ಳ್ಯಾ ಧಯ್ರಾನ್ ತೊಯೀ ವೀಸಾ ಕ್ಯಾನ್ಸಲ್ ಕರ‍್ನ್ ಇಂಗ್ಲೆಡಾಥಾವ್ನ್ ಆರಾಮಾಯೆರ್ ಮದರ್‌ಲೆಂಡಾಕ್ ಪಾವ್ಲೊ.
ಅಪ್ಣಾಚೆಂ ಸಗ್ಳೆಂ ಕುಟಮ್ ಘರಾ ಪಾವ್‌ಲ್ಲೆಂಚ್ ಮೊಂತಾಮಾನ್ ಸಯ್ತ್ ಅಪ್ಣಾಚೆಂ ಸ್ಟೇಟಸ್ ಎಗ್ರಿಕಲ್ಚರಾಥಾವ್ನ್ ಎನ್ನಾರೈಕ್ ಚಡಯ್ಲೆಂ. ಮೊಂತಾಮಾಚಿಂ ನಾತ್ರಾಂ ದಾಲಿನಿಂ ಫುಲಾಂ ಘೆವ್ನ್ ಸದಾಂಯ್ ನೊವೆನಾಕ್ ವಚೊಂಕ್ ಸುರು ಜಾಲಿಂ. ತ್ಯಾ ಎನ್ನಾರೈ ಭುರ್ಗ್ಯಂಕ್‌ಚ್ ಪಳೆವ್ನ್ ಗಾಂವ್ಚಿಂ ಭುರ್ಗಿಂ ಎಕಾಮೆಕಾ ಆದ್ಳೊನ್ ಪಡ್ಲಿಂ. ಥೊಡಿಂ ಭುರ್ಗಿಂ ತಾಂಕಾಂ ಪಳೆವ್ನ್ಂಚ್ ಮರ‍್ಯೆಕ್ ಉಡಂವ್ಚಿಂ ಫುಲಾಂ ಸಿಸ್ಟರಾಂಕ್ ಪಾದ್ರ್ಯಾಬಾಕ್ ಉಡೊಂಕ್ ಲಾಗ್ಲಿಂ. ಮೊಂತಾಮಾಚ್ಯಾ ಎನ್ನಾರೈ ಭುರ್ಗ್ಯಾಂಕ್ ಆನಿ ನಾತ್ರಾಂಕ್‌ಚ್ ಮ್ಹಣ್ ಪಳೆಂವ್ಚ್ಯಾಕ್ ಮಿಸಾಕ್ ಯೆಂವ್ಚ್ಯಾ ಲೋಕಾಂಚೊ ಸಂಖೊ ಚಡ್ಲೊ ಆನಿ ಭುರ್ಗ್ಯಾಂಕ್ ಮೆಳ್ಚಿ ಮಿಠಾಯ್ ಉಣಿ ಪಡೊಂಕ್ ಲಾಗ್ಲಿ. ದಿಸಾನ್‌ದೀಸ್ ಚಡ್ಚ್ಯಾ ಲೋಕಾಂಚಿ ಖೆಟ್ ಪಳೆವ್ನ್ ವಿಗಾರ್ ಮಾತ್ರ್ ಲೋಕಾಂಕ್ ಮರ‍್ಯೆಚಿ ಭಕ್ತ್ ಚಡ್ಲ್ಯಾ ಮ್ಹಣ್ ಖುಶ್ ಪಾವ್ಲೊ.
ಫೆಸ್ತಾ ದಿಸಾ ಮೊಂತಾಮಾನ್ ಫುಲಾಂ ಹಾಡ್‌ಲ್ಲ್ಯಾ ಭುರ್ಗ್ಯಾಂಕ್ ಅಪ್ಣಾ ತರ್ಫೆನ್ ಕೊಬು ದಿತಾಂ ಮ್ಹಣ್ ಭಾಸಾಯ್ಲೆಂ. ಮೊಂತಾಮಾಚ್ಯಾ ಘರಾ ತಾಚೆಂ ಎನ್ನಾರೈ ಕುಟಮ್ ಆಯ್ಲಾಂ ಆನಿ ಹ್ಯಾ ಪಾವ್ಟಿಂ ವ್ಹಡಾ ಸಂಭ್ರಮಾನ್ ತಿಂ ಕುಟ್ಮಾ ಫೆಸ್ತ್ ಆಚರಣ್ ಕರ‍್ತಾತ್ ಮ್ಹಳ್ಳಿ ಖಬರ್ ವಾಡ್ಯಾಥಾವ್ನ್ ಸುರು ಜಾವ್ನ್, ಫಿರ್ಗಜೆಚ್ಯಾ ಹರ‍್ಯೇಕಾ ಸಂಘ್‌ಸಂಸ್ಥ್ಯಾ ಮಾರಿಫಾತ್ ವಚೊನ್ ಕಡೇಕ್ ವಿಗಾರಾಕ್ ಮೆಳ್ಳಿ. ಆಯ್ಕೊನ್ ವಿಗಾರಾನ್ ಬಾಕಿ ಆಸ್‌ಲ್ಲ್ಯಾ ಕಾಮಾಚ್ಯಾ ಯೋಜನಾಚೆಂ ಫೈಲ್ ಭಾಯ್ರ್ ಕಾಡ್ಲೆಂ. ಮೊಂತಾಮಾಕ್ ಮೆಳೊನ್ ಕಶೆಂಯ್ ಪುಣೀ ಏಕ್ ವಾ ದೋನ್ ಯೋಜನಾಂ ತರೀ ಹ್ಯಾ ಪಾವ್ಟಿಂ ಸುಫಳ್ ಕರಿಜೆ, ನಾಂ ತರ್ ಯೆಂವ್ಚ್ಯಾ ಮಯ್ನ್ಯಾಂತ್ ಗೊವ್ಳಿ ಭೆಟೆ ವೆಳಾರ್ ಬಿಸ್ಪಾಕ್ ತೋಂಡ್ ಕಶೆಂ ದಾಕಂವ್ಚೆಂ ಮ್ಹಳ್ಳ್ಯಾ ಆಲೋಚನೆಂತ್ ಬುಡ್ಲೊ. ಹ್ಯಾ ಮದ್ಗಾತ್ ತಾಕಾ ವಾರೆಂ ಘಾಲ್ಚ್ಯಾಬರಿಂ ಕೆದ್ನಾಂಯ್ ಪೊಲಿಟಿಕ್ಸಾಂತ್‌ಚ್ ವ್ಯಸ್ತ್ ಆಸ್ಚೊ ಉಪಾಧ್ಯಕ್ಷ್ ಮ್ಹಣಾಲೊ ತುಮಿಂ ಕಶೆಂಯ್ ಕರ‍್ನ್ ತಾಂಕಾಂ ಭೆಟೊನ್ ಏಕ್ ವಿಶೇಸ್ ಮಾಗ್ಣೆಂ ಭೆಟಯಾ ಫಾದರ್, ತಾಂಚ್ಯಾ ಮಾತ್ಯಾ ವಯ್ರ್ ಹಾತ್ ಧರ‍್ನ್ ಮಾಗಾ, ತಾಂಚೆಂ ಘರ್ ಬೆಂಜಾರ್ ಕರಾ ಆನಿ ಗರ್ಜ್ ಪಡ್ಲ್ಯಾರ್ ಯೆಂವ್ಚ್ಯಾ ವರ್ಸಾ ಮೊಂತಾಮಾಕ್ ಮಾನ್ ಕರ‍್ನ್ ಫಿರ್ಗಜೆ ಲೆವೆಲಾರ್ ಮೊಂತಿ ಫೆಸ್ತಾ ಬದ್ಲಾಕ್ ಮೊಂತು ಫೆಸ್ತ್‌ಚ್ ಆಚರಣ್ ಕರ‍್ತಾಂವ್ ಮ್ಹಣ್ ಸಾಂಗಾ. ಉಪಾಧ್ಯಕ್ಷಾಚೆಂ ಸಕ್ಕಡ್ ಸಮಾ ತರೀ ಮೊಂತಿ ಆಸ್‌ಲ್ಲೆಂ ಮೊಂತು ಕರುಂಕ್ ತಾಚೆಂ ಸಂಯ್ಭ್ ಆಯ್ಕಾಲೆಂ ನಾ. ಅಶೆಂ ಕೆಲೆಂ ತರ್ ಮಾಗಿರ್ ಕ್ರಿಸ್ಮಸಾ ವೆಳಾರ್ ಕೊಣೀ ನತಾಲ್ ಆಸ್‌ಲ್ಲೆಂ ನತಾನಾಯೆಲ್ ಕರಾ ವಾ ಪಾಸ್ಖ್ ಆಸ್‌ಲ್ಲೆಂ ಪಾಸ್ಕಿನ್ ಕರಾ ಮ್ಹಣ್ ದಬಾವ್ ಘಾಲಿತ್ ಮ್ಹಣ್ ಭಿಯೆಲೊ ಆನಿ ’ಮೊಂತು’ ಫೆಸ್ತಾಚೊ ಪ್ರಸ್ತಾಪ್ ತಾಣೆಂ ಪಾಟಿಂ ದವರ‍್ಲೊ.
ಮೊಂತಾಮಾಚ್ಯಾ ಘರಾ ತಾಚೆಂ ಕುಟಮ್ ಸಾಂಗಾತಾ ಮೆಳ್‌ಲ್ಲೆಂ ತರೀ ಭುರ್ಗಿಂ ಸಕ್ಕಡ್ ಬಾಬಾ ಮಾಂಯ್ ವಿಶ್ಯಾಂತ್ ಸೊಡ್ನ್ ಮೆಳ್ಚ್ಯಾ ಜಾಗ್ಯಾವಿಶ್ಯಾಂತ್‌ಚ್ ಚಡ್ ಉಲಯ್ತಾಲಿಂ ಸೊಡ್ಲ್ಯಾರ್ ಕೊಣೆಂಯ್ ಖುದ್ಧ್ ವಚೊನ್ ತೊ ಜಾಗೊ ಪಳಯ್ಲೊ ನಾ ವಾ ತಾಂತ್ಲ್ಯಾ ರಾಂದ್ವಯೆಕ್ ಹಾತ್ ಸಯ್ತ್ ಲಾಯ್ಲೊ ನಾ. ರಾಂದ್ವಯೆಕ್ ಹಾತ್ ಲಾಂವ್ಚೊ ಸೊಡ್ಯಾಂ ಮೊಂತಾಮಾಚ್ಯಾ ಘರಾ ಫಿಜ್ಜಾ ಬರ್ಗರ್, ಕೆಎಫ್‌ಸಿ ಮ್ಹಣೊನ್ ಆನ್‌ಲೈನ್ ಖಾಣಾ ಹಾಡ್ನ್ ಯೆಂವ್ಚೆಚ್ ಚಡ್ ಜಾಲೆ. ತರೀ ಮೊಂತಿ ಫೆಸ್ತಾಕ್ ಮಾತ್ರ್ ಸಕ್ಡಾಂನಿ ರಾಂದ್ವಯ್ ಖಾಯ್ಜಯ್ ಮ್ಹಣ್ ಮೊಂತಾಮಾಚಿ ತಾಕಿದ್ ಜಾಲ್ಲಿ. ಏಕ್‌ದೀಸ್ ಕುಟ್ಮಾಚಿಂ ಸಕ್ಕಡ್ ಸಾಂಗಾತಾ ಮೆಳ್ಳಿಂ, ಸಕ್ಕಡ್ ಲಾಗಿಂ ಸರ‍್ಲಿಂ, ತಾಂಚೆ ತಾಳೆ ಏಕ್ ಕರಿಲಾಗ್ಲಿಂ ಆನಿ ಮೆಳ್ಚ್ಯಾ ಜಾಗ್ಯಾಕ್ ಹೊಗೊಳ್ಸುಂಕ್ ಲಾಗ್ಲಿಂ.
ಮೊಂತಿ ಫೆಸ್ತಾಚೊ ದೀಸ್ ಉದೆಲೊ. ಮರ‍್ಯೆಕ್ ಫುಲಾಂ ಉಡವ್ನ್, ಮೀಸ್ ಭೆಟವ್ನ್ ಮೊಂತಾಮಾನ್ ದಿಲ್ಲ್ಯಾ ಕೊಬು ಸಾಂಗಾತಾ ಲೋಕ್ ತಾಚಿಚ್ ವ್ಹಡ್ವಿಕಾಯ್ ಉಲವ್ನ್ ವೊಡೊಲ್ ವೆತಾನಾ ಮಾರ್ಗಾರ್ ಉಡಯಿಲ್ಲ್ಯಾ ಫುಲಾಂಕ್ ಅತಾಂ ಗುಡ್ಡ್ಯಾವ್ನ್ ಚಲ್ತಾಲೊ. ಮೊಂತಾಮಾಗೆರ್ ಫೆಸ್ತಾಚಿ ತಯಾರಾಯ್ ಜಾಲ್ಲಿ. ಭರ‍್ತಿ ತೆರಾ ಬೊಗಾಂಚಿಂ ನಿಸ್ತಿಂ ಮೊಂತಾಮಾಚ್ಯಾ ಬಾಯ್ಲೆನ್ ತಯಾರ್ ಕೆಲ್ಲಿಂ. ಪೂಣ್ ರಾಂದ್ವಯೆಚೆಂ ಜೆವಾಣ್ ಪಳೆಯ್ತಾನಾಂಚ್ ಮೊಂತಾಮಾಚ್ಯಾ ಭುರ್ಗ್ಯಾಂಕ್ ವಾಯ್ ಭರ‍್ಲೊ. ಮಾಂದ್ರಿ ಸೊಡೊನ್ ಪಂಗ್ತಿ ಘಾಲ್ನ್ ಧರ‍್ಣಿರ್ ಉಕಾಟೆಂ ಬಸ್ತಾನಾ ಥೊಡ್ಯಾಂಚೊ ವಾಯ್‌ಯೀ ಸುಟ್ಲೊ. ಆಯಿನ್ನ್ ವೆಳಾರ್ ವಿಗಾರ್ ಥಂಯ್ಸರ್ ಪಾವ್ಲೊ. ಮೊಂತಾಮಾಚ್ಯಾ ಎನ್ನಾರೈ ಭುರ್ಗ್ಯಾಂಕ್ ಪಳೆವ್ನ್ ತಾಚೆಂ ತೋಂಡ್ ಸಾಳ್ಕಾಬರಿಂ ಫುಲ್ಲೆಂ. ಪೂಣ್ ತಿಂ ಸಕ್ಕಡ್ ವೀಸಾ ಕ್ಯಾನ್ಸಲ್ ಕರ‍್ನ್ ಆಯ್ಲ್ಯಾಂತ್ ಮ್ಹಣ್ತಾನಾ ವಿಗಾರಾಕ್ ಅಪುಣ್ ಆನಿಕೀ ಕೆದಾಂತ್‌ಚ್ ಆಸಾ ಮ್ಹಣ್ ಭೊಗ್ಲೆಂ. ಪೂಣ್ ಹ್ಯಾ ಫೆಸ್ತಾ ದಿಸಾ ಖಂಯ್ಚೆಂಚ್ ಲಿಪಯ್ನಾಸ್ತಾಂ ಅಪ್ಣೆಂ ತಾಂಕಾಂ ಆಸ್ತಿಂತ್ಲೊ ವಾಂಟೊ ದೀಂವ್ಕ್ ಹಾಂಗಾಸರ್ ಆಪಯಿಲ್ಲೆಂ ಮ್ಹಣ್ ಮೊಂತಾಮಾನ್ ಸಾಂಗ್ತಾನಾ ವಿಗಾರಾಚೆಂ ಸಾಳಕ್ ಪರತ್ ಫುಲ್ಲೆಂ. ಉಪ್ರಾಂತ್ ವಿಗಾರಾನ್ ಕಡಯಿಲ್ಲೆಂ ನೊವೆಂ ಬೆಂಜಾರ್ ಕರ‍್ನ್ ಮೊಂತಾಮಾಚ್ಯಾ ಭುರ್ಗ್ಯಾಂಕ್ ವಾಂಟ್ಲೆಂ. ತೆಂ ಪಿಯೆವ್ನ್ ಜಾಲ್ಲೆಂಚ್ ಅಪ್ಣಾಚೊ ಜಾಗೊ ಬರ‍್ಯಾ ಮೊಲಾಕ್ ವಿಕುನ್ ವಚಾತ್ ತರ್ ಕಮೀಶನ್ ಏಜೆಂಟಾಕ್ ದಿಂವ್ಚೆಂ ದೋನ್ ಪರ್ಸೆಂಟ್ ಇಗರ್ಜೆಕ್ ದಾನ್ ದಿತೆಲ್ಯಾಂವ್ ಮ್ಹಣ್ ತೆಗಾಂಯ್ ಭುರ್ಗ್ಯಾನಿಂ ವಿಗಾರಾಕ್ ಭಾಸಾಯ್ಲೆಂ. ಆಯ್ಕಾಲ್ಲೆಂಚ್ ವಿಗಾರಾನ್ ಮ್ಹಜ್ಯಾ ಭುರ್ಗ್ಯಾಂಕ್ ಕಸಲೆಂ ವೊಕಾತ್ ವಾಟ್ಲೆಗಾಂಯ್ ಮ್ಹಣ್ ಮೊಂತಾಮ್ ಏಕ್‌ಪಾವ್ಟಿಂಚ್ಯಾಕ್ ಭಿಯೆಲೊ ತರೀ ವಾಲಿರ್ ಉಮ್ಕಾಳ್ಚ್ಯಾ ಕುವಾಳ್ಯಾಬರಿಂ ಘಟ್ಟ್ ರಾವ್ಲೊ. ಧಾರ್ಮಿಕ್ ವ್ಹಡಿಲ್ ಜಾವ್ನ್ ಆಯಿಲ್ಲೊ ವಿಗಾರ್ ಕಮೀಶನ್ ಏಜೆಂಟ್ ಜಾವ್ನ್ ಪಾಟಿಂ ಪರ‍್ತಾಲೊ. ಇಗರ್ಜೆಕ್ ಪಾಟಿಂ ಪಾಂವ್ಚ್ಯಾ ಭಿತರ್ ಮೊಂತಾಮಾಚ್ಯಾ ಜಾಗ್ಯಾಚಿ ಮಾರ್ಕೆಟ್ ರೇಟ್ ಕಶಿ ಚಲ್ತಾ ಮ್ಹಣ್ ಖಬರ್ ಕಾಡುಂಕ್ ತೊ ವಿಸ್ರಾಲೊನಾ. ಜೆವ್ಣಾ ವೆಳಾರ್ ಫಕತ್ ಪಾಂಚ್ ಭೊಗಾಂ ನಿಸ್ತಿಂ ಆಸ್ಲ್ಯಾರೀ ಕಮಿಶನಾಚೆ ಪಯ್ಶೆ ಲೇಕ್ ಕರ‍್ನ್ ಕರ‍್ನ್ ತಾಕಾ ನಿಸ್ತ್ಯಾಂಚೆ ಲೇಕ್‌ಯೀ ಸಾರ್ಕೆಂ ಮೆಳ್ಳೆಂ ನಾ. ಒಟ್ಟಾರೆ ತಾಕಾ ಪಯ್ಶಾಂಚಿ ಆಶಾ ಕಾಂಯ್ ನಾ, ಬಿರ್ಮತ್, ತಾಚೆ ಹಾತ್ ಬಿಸ್ಪಾ ಮುಕಾರ್ ಭಾಂದ್ಲ್ಯಾತ್ ಆನಿ ಲೊಕಾಂ ಮುಕಾರ್ ಉಸಯ್ಲ್ಯಾತ್.
ಹೆವ್ಶಿನ್ ಸಬಾರ್ ವರ್ಸಾಂ ಉಪ್ರಾಂತ್ ಮೊಂತಾಮಾಗೆರ್ ಮೊಂತಿ ಫೆಸ್ತ್ ಗದ್ದಾಳಾಯೆನ್ ಚಲ್ಲೆಂ. ದುಸ್ರ್ಯಾ ದಿಸಾ ವಾಡ್ಯಾಂತ್ಲೊ ಲೋಕ್ ’ಮೊಂತು’ ಫೆಸ್ತಾಚಿಚ್ ಖಬರ್ ಉಲಯ್ತಾಲೊ. ತಾಂಗೆರ್ ಭಾರಿಚ್ ಗದ್ದಾಳಾಯೆನ್ ಫೆಸ್ತ್ ಚಲ್ಲೆಂ ಮ್ಹಣ್ತಾಲೊ. ಕಾರಣ್ ಕುಂಡ್ಲ್ಯಾ ಕುಂಡ್ಲ್ಯಾನಿಂ ಭರ್‌ಲ್ಲೆಂ ತೆರಾಂ ಭೊಗಾ ರಾಂದ್ವಯೆಚೆಂ ನಿಸ್ತಿಂ ಮಾಡಾಮುಳಾಕ್ ಉಡಯಿಲ್ಲ್ಯಾನ್ ವಾಡ್ಯಾಂತ್ಲೆ ಸಕ್ಕಡ್ ಪೆಟೆ ತಾಂಗೆರ್‌ಚ್ ಖಾವ್ನ್ ಆಸ್‌ಲ್ಲೆ ಕಂಯ್. ಮೊಂತುಗೆರ್ ಫೆಸ್ತ್ ಜಾಲ್ಲೆಂ ತರೀ ನೀಜ್ ಫೆಸ್ತ್ ಎಕಾ ಉಪ್ರಾಂತ್ ಜಾಲೆಂ. ಮೊಂತುನ್ ಆಪ್ಣಾಚೊ ಜಾಗೊ ಅಪ್ಲ್ಯಾ ಭುರ್ಗ್ಯಾಂಕ್ ವಾಂಟುನ್ ದಿಲೊ. ತ್ಯಾ ದೀಸ್ ಮೊಂತುಗೆರ್ ಪಾರ್ಟಿ ಜಾಲಿ. ಬೊತ್ಲಿಯ್ ಆಸ್‌ಲ್ಲ್ಯಾನ್ ಹ್ಯಾಪಾವ್ಟಿಂ ತೆರಾಂ ಭೊಗಾಚಿಂ ರಾಂದ್ವಯೆಚಿಂ ನ್ಹಯ್ ಬಗಾರ್ ಮಾಸಾಚಿಂ ಪಕ್ವಾನಾ ಜಾಲಿಂ. ಹಾಂತುನ್ ಕಾಂಯ್ ಉರೊಂಕ್ ನಾತ್‌ಲ್ಲ್ಯಾನ್ ಮಾಡಾಮುಳಾಕ್ ಉಡಂವ್ಚೆಂ ತಸಲೆಂ ಕಿತೆಂಚ್ ಮೆಳ್ಳೆಂನಾ. ದೆಕುನ್ ವಾಡ್ಯಾಂತ್ಲೆ ಪೆಟೆ ಉಪಾಶಿಂ ಘರಾ ಪಾಟಿಂ ವಚೊನ್ ವೊಗೆಚ್ ನಿದ್‌ಲ್ಲ್ಯಾನ್ ವಾಡ್ಯಾಗಾರಾಂಕ್‌ಯೀ ಹ್ಯಾ ಪಾರ್ಟಿಚಿ ಖಬರ್ ಪಾವ್ಲಿ ನಾ.
ತೆಣೆಂ ವಿಗಾರ್ ತಾಚಿಂ ಯೋಜನಾಂ ತಯಾರ್ ಕರ‍್ತಾಲೊ ತರ್ ಹೆಣೆಂ ಮೊಂತಾಮಾಚಿಂ ಭುರ್ಗಿಂ ಜಾಗ್ಯಾಕ್ ಗಿರಾಯ್ಕ್ ಸೊಧ್ತಾಲಿಂ. ಆನಿ ಏಕ್ ದೀಸ್ ತಾಂಚ್ಯಾ ಜಾಗ್ಯಾಕ್ ಕವರಾ ಭಿತರ್ ಲಿಪೊನ್ ಏಕ್ ವಿಶೇಸ್ ಗಿರಾಯ್ಕ್ ಆಯ್ಲೊ. ಆನಿ ತೊ ಜಾವ್ನಾಸ್‌ಲ್ಲೊ ಸರ್ಕಾರಿ ಗಿರಾಯ್ಕ್. ಮೊಂತುಚೊ ಜಾಗೊ ಸರ್ಕಾರಿ ಕಾರ್ಖಾನೆ ಬಾಂಧ್ಚ್ಯಾಕ್ ಸರ್ಕಾರ್ ಸ್ವಾಧೀನ್ ಕರ‍್ತಾ ಮ್ಹಣ್ ಮೊಂತುಚ್ಯಾ ತೆಗಾಂಯ್ ಭುರ್ಗ್ಯಾಂಕ್ ನೋಟೀಸ್ ಆಯ್ಲೆಂ. ನೊಟೀಸಾಂ ಪಳೆವ್ನ್ ಮೊಂತುಚಿಂ ಭುರ್ಗಿಂ ಸಂತೊಸಾನ್ ನಾಚ್ಲಿಂ. ಕಿತ್ಯಾಕ್ ಸರ್ಕರ್ ತಾಂಕಾಂ ತೀನ್ ವಾಂಟ್ಯಾನಿಂ ಚಡಿತ್ ಮೋಲ್ ದೀಂವ್ಕ್ ತಯಾರ್ ಜಾಲ್ಲೊ. ನೋಟಿಸಾಂ ಘೆವ್ನ್ ತಿಂ ಶೀದಾ ವಿಗಾರಾ ಸರ್ಶಿಂ ಗೆಲಿಂ ಆನಿ ತಾಕಾ ತಿ ಖಬರ್ ಸಾಂಗ್ಲಿ. ತೀನ್ ವಾಂಟ್ಯಾನಿಂ ಜಾಗ್ಯಾಕ್ ಮೋಲ್ ಮೆಳ್ತಾ ಜಾಲ್ಲ್ಯಾನ್ ಕಮೀಶನ್ ದೋನ್ ನ್ಹಯ್ ಬಗಾರ್ ಚಾರ್ ಪರ್ಸೆಂಟ್ ದಿತಾಂ ಮ್ಹಣ್ ಬಾಸಾಯ್ಲಾಗ್ಲಿಂ. ಆಯ್ಕೊನ್ ವಿಗಾರ್ ತೀನ್ ಪುಟಿಂ ಲಾಂಬ್ ಜಾಲೊ. ಪೂಣ್ ತ್ಯಾಚ್ ವಗ್ತಾ ಸುತ್ತುಪುದೇಲಾಂತ್ಲೊ ಲೋಕ್ ಹಾರಿಹಾರಿನಿಂ ವಿಗಾರಾಚ್ಯಾ ಘರಾ ಜಮ್ಲೊ. ಕಾರಣ್ ಮೊಂತುಚ್ಯಾ ಭುರ್ಗ್ಯಾಂಬರಿಂಚ್ ತಾಂಕಾಂಯ್ ನೋಟಿಸಾಂ ಆಯಿಲ್ಲಿಂ. ಸುತ್ತುಪುದೆಲಾಂತ್ಲೊ ಸಕ್ಕಡ್ ಲೋಕ್ ಕೃಷಿ ಆನಿ ಸಾಗೊಳಿ ಕರ‍್ತಾಲೊ ಜಾಲ್ಲ್ಯಾನ್ ಸರ್ಕಾರ್ ಸ್ವಾಧೀನ್ ಕರಿತ್ ತರ್ ತಿ ನಿರ್ಗತಿಕ್ ಜಾತೆಲಿಂ ಮಾತ್ರ್ ನ್ಹಯ್ ದಿಸ್ಪಡ್ತೊ ಗ್ರಾಸ್ ಸಯ್ತ್ ಹೊಗ್ಡಾಂವ್ಕ್ ಪಾವ್ತೆಲಿಂ ಮ್ಹಣ್ ಅಪ್ಣಾಚೆಂ ದೂಖ್ ಆನಿ ವಿಳಾಪ್ ಘೆವ್ನ್ ವಿಗಾರಾಚಿ ಮಜತ್ ಮಾಗಾಲಾಗ್ಲೊ. ಕಶೆಂಯ್ ಕರ‍್ನ್ ಆಮ್ಚೊ ಕೃಷಿ ಜಾಗೊ ಸರ್ಕಾರಾನ್ ಸ್ವಾಧೀನ್ ಕರಿನಾಶೆಂ ತುಮಿಂ ರಾಕೊನ್ ವರಾಜಾಯ್ ಆನಿ ಏಕ್ ವ್ಹಡ್ ಪ್ರತಿಭಟನ್ ಕರಿಜಾಯ್ ಮ್ಹಣ್ ವಿಗಾರಾಚ್ಯಾ ಪಾಯಾಂಕ್‌ಚ್ ಪಡ್ಲೊ. ವಿಗಾರ್ ಮಾತ್ರ್ ಪೋರ್ ಜಾಲ್ಲ್ಯಾ ಮೊಂತಿ ಫೆಸ್ತ್ ಆನಿ ದಸೆಂಬ್ರಾಂತ್ ಯೆಂವ್ಚ್ಯಾ ನತಾಲಾಂ ಫೆಸ್ತಾ ಮಧೆಂ ಯೆಂವ್ಚ್ಯಾ ಮೆಲ್ಲ್ಯಾಂಚ್ಯಾ ಫೆಸ್ತಾಂತ್ ಶಿರ್ಕಾಲ್ಲ್ಯಾಬರಿಂ ಶಿರ್ಕಾಲ್ಲೊ. ಅಸಲೆಂ ಏಕ್ ನೋಟೀಸ್ ತಪ್ಪಾಲ್ ಪೆದ್ಯಾನ್ ವಿಗಾರಾಕ್ ಹಾಡ್ನ್ ದಿತಾನಾ ತಾಚ್ಯಾ ಮತಿಂತ್ ಇಗರ್ಜೆಚಿ ಘಾಂಟ್ ವಾಜ್ಲಿ. ಇಗರ್ಜ್‌ಚ್ ನಾಂ ತರ್ ಉಪ್ರಾಂತ್ ಯೋಜನಾಂ ಕೊಣಾ ಪಾಸತ್ ?
ಫಕತ್ ಎಕಾ ಹಫ್ತ್ಯಾ ಭಿತರ್ ಸುತ್ತುಪುದೆಲಾಂತ್ ವಿಗಾರಾಚ್ಯಾ ಮುಕೇಲ್ಪಣಾಖಾಲ್ ಏಕ್ ವ್ಹಡ್ ಪ್ರತಿಭಟನ್ ಚಲ್ಲೆಂ. ಜಾಗ್ಯಾ ಖಾತಿರ್ ಪ್ರತಿಭಟನ್ ಚಲ್ತಾ ಮ್ಹಣಾಸರ್ ಸರ್ಕಾರಾನ್ ದಬಾವಾಕ್ ಪಡೊನ್ ಭೂಸ್ವಾಧೀನ್ ಕರ‍್ಚೆಂ ಪಾಟಿಂ ಪಾಟಿಂ ಘಾಲೆಂ. ತೆವ್ಶಿಲ್ಯಾನ್ ವಿದೇಶಿ ಕರೆನ್ಸಿಯೀ ನಾ ಹೆವ್ಶಿಲ್ಯಾನ್ ದೇಶೀಯಿ ಕರೆನ್ಸಿ ನಾಸ್ತಾಂ ಮೊಂತಾಮಾಚಿಂ ಭುರ್ಗಿಂ ಕಷ್ಟಾಲಿಂ. ಉಪಾವ್ ನಾಸ್ತಾಂ ಖಂಚೆಯ್ ಇತ್ಯರ್ಥ್ ಜಾತಾ ಮ್ಹಣಾಸರ್ ಮೊಂತಾಮಾಚ್ಯಾ ಭುರ್ಗ್ಯಾನಿಂ ಅಪಾಪ್ಲ್ಯಾ ಜಾಗ್ಯಾರ್ ರಾಂದ್ವಯ್ ಕರುಂಕ್ ಸುರು ಕೆಲಿ. ಭೂಸ್ವಾಧೀನ್ ಜಾತಾ ಮ್ಹಣ್ ಮೊಂತಾಮಾಕ್ ಪಯ್ಲೆಂಚ್ ಖಬರ್ ಆಸ್‌ಲ್ಲಿ, ದೆಕುನ್ಂಚ್ ತಾಣೆಂ ಭುರ್ಗ್ಯಾಂಕ್ ಗಾಂವಾಕ್ ಆಪಯಿಲ್ಲೆಂ ಮ್ಹಣ್ ಥೊಡೊ ಲೋಕ್ ಉಲಯ್ತಾಲೊ ತರ್ ಅಪ್ಲ್ಯಾಚ್ ಭುರ್ಗ್ಯಾಂಕ್ ಬೊಕ್ರೊ ಕೆಲ್ಲೊ ಮೊಂತಾಮ್‌ಚ್ ಹ್ಯಾ ಗಾಂವ್ಚೊ ಶ್ರೇಷ್ಠ್ ಗೊವ್ಳಿ ಮ್ಹಣ್ ಬಾಕಿಚೆ ಮೊಂತಾಮಾಚಿಂ ಮಹಿಮಾ ಪರ್ಗಟ್ತಾಲೆ. ರಾಂದ್ವಯ್ ವಾಡಾಂತ್ಲ್ಯಾ ಮೊಂತಾಮಾಚೆಂ ಕುಟಮ್ ಪರತ್ ರಾಂದ್ವಯ್ ಕರುಂಕ್ ಲಾಗ್ಲೆಂ ಮ್ಹಳ್ಳ್ಯಾ ಸಂತೊಸಾನ್ ಮೊಂತಾಮ್ ಮಾತ್ರ್ ಎನ್ನಾರೈ ಸ್ಟೇಟಸಾಥಾವ್ನ್ ಪಾಟಿಂ ಎಗ್ರಿಕಲ್ಚರಲ್ ಸ್ಟೇಟಸಾಕ್ ಅಪಡೇಟ್ ಜಾಲೊ.
► ರೋಶು, ಬಜ್ಪೆ
1 comment