ಸ್ಟೇನ್ ಅಗೇರಾಚ್ಯಾ ‘ಕ್ಯಾಟ್‌ಹಿಲ್ಲಾಚೊ ಅನಾಮಿಕ್’ ಬುಕಾಕ್ ಡೊ| ಟಿ.ಎಂ. ಎ. ಪೈ ಪ್ರಶಂಸಾ ಪುರಸ್ಕಾರ್

ನಾಮ್ಣೆಚೊ ಕೊಂಕ್ಣಿ ಕಾಣಿಯಾಂಗಾರ್, ಎಮಿರೆತಾಂತ್ಲ್ಯಾ ಕೊಂಕ್ಣಿ ಬರಯ್ಣಾರಾಂಚೆಂ ಸಂಗಟನ್ ದಾಯ್ಜಿ ದುಬಯ್ ಹಾಚೊ ಆದ್ಲೊ ಅಧ್ಯಕ್ಷ್ ಸ್ಟೆನ್ ಅಗೇರಾ, ಮುಲ್ಕಿ ಹಾಚ್ಯಾ ಕ್ಯಾಟ್‌ಹಿಲ್ಲಾಚೊ ಅನಾಮಿಕ್  ಕಾಣಿಯಾಂ ಜಮ್ಯಾಕ್ 2021 ವ್ಯಾ ವರ್ಸಾಚೊ ಡೊ| ಟಿ.ಎಂ. ಎ. ಪೈ ಉತ್ತೀಮ್ ಪುಸ್ತಕ್ ಪ್ರಶಂಸಾ ಪುರಸ್ಕಾರ್ ಫಾವೊ ಜಾಲಾ. ಪುರಸ್ಕಾರ್ ಪ್ರಶಂಸಾ ಪತ್ರ್ ಆನಿ ನಗ್ದೆನ್ ರುಪಯ್ ಧಾ ಹಜಾರ್ ಆಟಾಪ್ತಾ.

ಕೊಂಕ್ಣೆಂತ್ ಮಾತ್ ನಯ್, ಇಂಗ್ಲಿಶಾಂತೀ ಗದ್ಯ್ ಸಾಹಿತ್ಯ್ ರಚ್ಚ್ಯಾ ಸ್ಟೆನ್ ಅಗೇರಾಚೆ, ಆಜ್ ಮೆರೆನ್ 18 ಕಾದಂಬರಿ ಅನಿ 250 ಪ್ರಾಸ್ ವಯ್ರ್ ಮಟ್ವ್ಯೊ ಕಾಣಿಯೊ ಫಾಯ್ಸ್ ಜಾಲ್ಯಾತ್. ತಾಚ್ಯೊ 50 ವಯ್ರ್ ಕಾಣಿಯೊ ಕನ್ನಡ, ಇಂಗ್ಲಿಶ್ ಆನಿ ತೆಲುಗು ಭಾಸಾಂನಿ ಅನುವಾದ್ ಜಾಲ್ಯಾತ್. ಪಾಟ್ಲ್ಯಾ 20 ವರ್ಸಾಂ ಪಾಸುನ್ ಡೆಲ್ಲಿ ಥಾವ್ನ್ ಫಾಯ್ಸ್ ಜಾಂವ್ಚ್ಯಾ ‘ವುಮನ್ಸ್ ಇರಾ’ ನೆಮಾಳ್ಯಾರ್ ತಾಚ್ಯೊ ಮಟ್ವ್ಯೊ ಕಾಣಿಯೊ ಸರಾಗ್ ಫಾಯ್ಸ್ ಜಾವ್ನ್ ಆಸಾತ್. ತಾಚ್ಯಾ ವಿಂಚ್ಣಾರ್ ಇಂಗ್ಲಿಶ್ ಕಾಣಿಯಾಂಚೊ ಜಮೊ ಅಮೆರಿಕಾಚ್ಯಾ ರೈಡರ್ ಪ್ರಕಾಶನಾನ್ ‘ಚಾ ಕಾಫಿ ಆನಿ ಚೀಜ್ ಕೇಕ್’ ಮ್ಹಳ್ಳ್ಯಾ ನಾಂವಾಖಾಲ್ ಫಾಯ್ಸ್ ಕೆಲಾ. ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ, ದಾಯ್ಜಿ ದುಬಯ್ ಧರುನ್, ತಾಕಾ ಜಾಯ್ತೆ ಪ್ರಶಸ್ತ್ಯೊ / ಪುರಸ್ಕಾರ್ ಫಾವೊ ಜಾಲ್ಯಾತ್.

2018 ವ್ಯಾ ವರ್ಸಾ ಉಡುಪಿಚ್ಯಾ ಉಜ್ವಾಡ್ ಪ್ರಕಾಶನಾನ್ ಕ್ಯಾಟ್‌ಹಿಲ್ಲಾಚೊ ಅನಾಮಿಕ್ ಕಾಣಿಯಾಂ ಜಮೊ ಫಾಯ್ಸ್ ಕೆಲ್ಲೊ ಆಸುನ್, ಹ್ಯಾ ಜಮ್ಯಾಂತ್ ಸ್ತೇನ್ ಅಗೇರಾಚ್ಯೊ 26 ಕಾಣಿಯೊ ಆಸಾತ್. ಜಮ್ಯಾಕ್ ಮಾಲ್ಘಡೊ ಪತ್ರ್‌ಕರ್ತ್ ಗೇಬ್ರಿಯಲ್ ವಾಜ್, ಬೆಂಗ್ಳುರ್ ಹಾಣೆ ಪಯ್ಲೆಂ ಉತರ್ ಬರಯಿಲ್ಲೆ ಆಸುನ್ “ಬರ‍್ಪಾಚಿ ಶೈಲಿ ಆನಿ ಮುಕಾರ್ ಕಿತೆಂ ಜಾತಾ ಮ್ಹಣ್ ಜಾಣಾ ಜಾಂವ್ಕ್ ವಾಚ್ಪ್ಯಾಚೆಂ ಕುತೂಹಲ್ ಬಾಂದುನ್ ಹಾಡ್ಚಿ ರೀತ್ ಆನಿ ಕ್ಲೈಮ್ಯಾಕ್ಸ್ ಗಮಾನಾಂತ್ ಘೆತ್ಲ್ಯಾರ್ ಸ್ಟ್ಯಾನ್ ಏಕ್ ‘ವಿಶಿಶ್ಟ್ ಕಾಣಿಯೆಗಾರ್’ ಕಶೆಂ ಝಳ್ಕತಾ” ಮ್ಹಣ್ ಪಯ್ಲ್ಯಾ ಉತ್ರಾಂನಿ ಗೇಬ್ರಿಯಲ್ ವಾಜ್ ಹಾಣೆ ಬರಯ್ಲಾಂ.

ಕೊಂಕ್ಣಿ ಭಾಸ್ ಆನಿ ಸಂಸ್ಕೃತೆಕ್ ಪಾಟಿಂಬೊ ದಿಂವ್ಚ್ಯಾ ಇರಾದ್ಯಾನ್, ಮಹಾನ್ ಕೊಂಕ್ಣಿ ಮನಿಸ್ ಡೊ| ಟಿ. ಎಮ್. ಎ. ಪೈ ಹಾಂಚ್ಯಾ ಉಡಾಸಾಕ್ ಉಬಾರ್ಲೆಲೆಂ ಡೊ| ಟಿ.ಎಮ್.ಎ. ಪೈ. ಫೌಂಡೇಶನ್,  1981 ವ್ಯಾ ವರ್ಸಾ ಪಾಸುನ್ ಕೊಂಕ್ಣೆಂತ್ ಫಾಯ್ಸ್ ಜಾಂವ್ಚ್ಯಾ ಉತ್ತೀಮ್ ಬುಕಾಕ್ ಹರ್ ವರ್ಸಾ ಪುಸ್ತಕ್ ಪುರಸ್ಕಾರ್ ದೀವ್ನ್ ಆಯ್ಲಾಂ. ಪಾಟ್ಲ್ಯಾ ವರ್ಸಾಂನಿ ಶಿಕೇರಾಮ್ ಸುರತ್ಕಲ್ ಹಾಚ್ಯಾ ‘ಗರ್ಜೆಕ್ ಪಡತ್’ ಕಾಣಿಯಾಂ ಜಮ್ಯಾಕ್ ಆನಿ ರೋಶು, ಬಜ್ಪೆ ಹಾಚ್ಯಾ ‘ತೀಂತ್ ಜಾಲೆಂ ರಗತ್’ ಕವಿತಾ ಜಮ್ಯಾಕ್ ಡೊ| ಟಿ.ಎಂ. ಎ. ಪೈ ಉತ್ತೀಮ್ ಪುಸ್ತಕ್ ಪ್ರಶಂಸಾ ಪುರಸ್ಕಾರ್ ಫಾವೊ ಜಾಲ್ಲೆ ಆಸಾತ್.