ಫೆಡರೇಷನ್ ಆಫ್‌ ಕೊಂಕಣಿ ಕಥೋಲಿಕ್‌ ಅಸೋಸಿಯೇಷನ್‌ (FKCA) ಹಾಂಚ್ಯಾ ಸಂಸ್ಥಾಪನೆಚೊ ಪಂಚ್ವೀಸ್‌ ವರ್ಸಾಂಚೊ ಸಂಭ್ರಮ್‌ ಜೂನ್‌ 25 ಆಯ್ತಾರಾ ಬೆಂಗ್ಳುರ್ಚ್ಯಾ ಮಲ್ಲೇಶ್ವರಮಾಂತ್‌ ಆಸ್ಚ್ಯಾ ಚೌಡಯ್ಯ ಸ್ಮಾರಕ್‌ ಹೊಲಾಂತ್‌ ಚಲ್ತಾ ಅಶೆಂ ಸಂಘಟಕಾಂನಿ ಕಳಯ್ಲಾಂ.
ಆದ್ಲ್ಯಾ 25 ವರ್ಸಾಂಥಾವ್ನ್‌ ಫೆಡರೇಶನ್‌ ಕೊಂಕ್ಣಿ ಲೊಕಾಕ್‌ ಸಂಘಟಿತ್‌ ಕರ್ಚ್ಯಾಂತ್‌, ರಾಜ್ಯಾಚ್ಯಾ ವಿವಿಧ್‌ ಕೊನ್ಶ್ಯಾಂನಿ ಆಸ್ಚ್ಯಾ ಕೊಂಕ್ಣಿ ಸಂಘಟನಾಂ ಮಧೆಂ ಬರೊ ಸಂಬಂಧ್‌ ಆಸಾ ಕರ್ಚ್ಯಾಕ್‌ ವಾವ್ರ್‌ ದೀವ್ನ್ ಆಸಾ. ಕೊಂಕ್ಣಿ ಲೊಕಾಚ್ಯಾ ಸಾಮಾಜಿಕ್‌ ಆನಿ ಆರ್ಥಿಕ್‌ ಅಭಿವೃದ್ಧೆಂತ್‌ ಹ್ಯಾ ಸಂಘಟನಾನ್‌ ಮಹತ್ವಾಚಿ ಸೆವಾ ದಿಲ್ಯಾ. ತಶೆಂಚ್‌ ಸಮುದಾಯಾಕ್‌ ಮಹತ್ವಾಚಿ ದೆಣ್ಗಿ ದಿಲ್ಲ್ಯಾ ವೆಕ್ತಿಂಕ್‌ ಸನ್ಮಾನ್ ಕರ್ನ್‌ ಬರ‍್ಯಾ ಕಾಮಾಕ್‌ ಪಾಟಿಂಬೊ ದಿಲಾ.
ಆಂವ್ದುಂಚ್ಯಾ ಹ್ಯಾ ರುಪ್ಯೋತ್ಸವ್‌ ಸುವಾಳ್ಯಾಂತ್‌ ನಾಂವಾಡ್ದಿಕ್‌ ಅನಿವಾಸಿ ಉದ್ಯಮಿ ಆನಿ ಸಮಾಜ್‌ ಸೆವೆಂತ್‌ ಮೆತೆರ್‌ ಆಸ್ಚ್ಯಾ ಮಾನೆಸ್ತ್‌ ಮೈಕೆಲ್‌ ಡಿಸೋಜಾ, ಬಂಧಿಕಾಮೆಲ್ಯಾಂ ಖಾತಿರ್‌ ವ್ಹರ್ತಿ ಸೆವಾ ದಿಲ್ಲ್ಯಾ ಕಿರಣ್ ಕಮಲ್ ಪ್ರಸಾದ್ ತಶೆಂಚ್‌ ಕೊಂಕ್ಣಿ ಸಾಹಿತಾಕ್‌ ವಿಶೇಸ್ ಕರ್ನ್‌ ಅರ್ಥ್‌ಕೋಶ್‌ ವಾಡಾವಳಿಕ್‌ ತಶೆಂಚ್‌ ವಿಮರ್ಸೊ ಆನಿ ಮೀಮಾಂಸಾ ಸಾಹಿತಾಕ್‌ ವ್ಹರ್ತಿ ದೆಣ್ಗಿ ದಿಲ್ಲ್ಯಾ ಸ್ಟೀವನ್ ಕ್ವಾಡ್ರಸ್‌ ಪೆರ್ಮುದೆಕ್‌ ಪುರಸ್ಕಾರ್ ದೀವ್ನ್ ಮಾನ್‌ ಕರ್ತಲೆ.
ಹ್ಯಾ ಕಾರ್ಯಾಕ್‌ ಕರ್ನಾಟಕ್‌ ಸರ್ಕಾರಾಚೊ ಉಪ ಮುಖೆಲ್‌ ಮಂತ್ರಿ ಶ್ರೀ ಡಿ. ಕೆ. ಶಿವಕುಮಾರ್‌, ಕರ್ನಾಟಕ್‌ ವಿಧಾನ್‌ ಸಭೆಚೊ ಸಭಾಧ್ಯಕ್ಷ್‌ ಶ್ರೀ ಯು ಟಿ ಖಾದರ್‌, ಮಂತ್ರಿ ಶ್ರೀ ಕೆ. ಜೆ. ಜಾರ್ಜ್‌, ಆರ್ಚ್‌ ಬಿಸ್ಪ್‌ ಪೀಟರ್‌ ಮಚಾದೊ, ಬಿಸ್ಪ್‌ ಹೆನ್ರಿ ಡಿಸೋಜಾ ಆನಿ ಹೆರ್‌ ಮಾನೇಸ್ತ್‌ ಸಯ್ರೆ ಜಾವ್ನ್ ಹಾಜರ್‌ ಆಸ್ತಲೆ ಅಶೆಂ ಸಂಘಟಕಾಂನಿ ಕಳಯ್ಲಾಂ.
ಅನಿವಾಸಿ ಉದ್ಯಮಿ ಆನಿ ಸಮಾಜ್‌ ಸೆವಕ್ ಮಾನೆಸ್ತ್‌ ಮೈಕೆಲ್‌ ಡಿಸೋಜಾ ‘ವಿಶನ್ ಕೊಂಕಣಿ’ ಕಾರ್ಯಕ್ರಮಾಖಾಲ್ ಕೊಂಕ್ಣಿ ಬೂಕ್, ಸಂಗೀತ್ ಆನಿ ಸಿನೆಮಾಕ್ ವಿಶೇಸ್ ಪ್ರೋತ್ಸಾವ್ ಆನಿ ಮಾರ್ಗದರ್ಶನ್ ದೀವ್ನ್ ಆಸಾತ್. ಪ್ರೊ। ಸ್ಟೀವನ್ ಕ್ವಾಡ್ರಸ್‌ ಪೆರ್ಮುದೆ ಹಾಂಚಿ ವಿಶ್ಲೇಶಣಾತ್ಮಕ್ ಬರ್ಪಾಂ ‘ಕಿಟಾಳ್‌’ ಜಾಳಿ ಜಾಗ್ಯಾರ್‌ ನಿರಂತರ್‌ ಫಾಯ್ಸ್ ಜಾವ್ನ್ ಆಸಾತ್.