ಸಪ್ತೆಂಬರ್ 2 ವೆರ್ ಮಂಗ್ಳುರಾಂತ್ ‘ಲಕ್ಕಿ ಡ್ರಾ 777’ ಪ್ರೀಮಿಯರ್

ತೇಗ್ ಈಷ್ಟಾಂಕ್ ಲಕ್ಕಿ ಡಿಪ್ ಉಟ್ಲ್ಯಾ ಉಪ್ರಾಂತ್, ಐವಜ್ ಅಪ್ಣಾಂವ್ಚ್ಯಾ ಖಾತಿರ್ ಜಾಂವ್ಚಿ ಉಡ್ಡಾಉಡ್ಡಿ ಪಿಂತ್ರಾಂವ್ಚೆಂ ರಾಯನ್ ಮ್ಯಾಗ್ನೆಟೊಚೆ ಪಯ್ಲೆಂ ಕೊಂಕ್ಣಿ ಪಿಂತುರ್ ‘ಲಕ್ಕಿ ಡ್ರಾ 777’ ಸಪ್ಟೆಂಬರ್ 2 ತಾರ್ಕೆರ್ ಸಾಂಜೆರ್ 4:15 ವರಾರ್ ಕೊಡ್ಯಾಳ್ಚ್ಯಾ ಭಾರತ್ ಸಿನೆಮಾಂತ್ ಪ್ರೀಮಿಯರ್ ಜಾತೆಲೆಂ. ಪಿಂತುರಾಚೊ ಫಕತ್ ಏಕ್ ಪ್ರಿಮಿಯರ್ ಶೋ ಆಸುನ್, ಉಪ್ರಾಂತ್ ವಿವಿಧ್ ಫಿರ್ಗಜಾಂನಿ ಖಾಸ್ಗಿ ಶೋ ಮಾತ್ರ್ ಆಸ್ತೆಲೆ ಮ್ಹಣ್ ನಿರ್ದೇಶಕ್, ನಿರ್ಮಾಪಕ್ ರಾಯನಾನ್ ತಿಳ್ಸಿಲಾಂ.

ಹ್ಯಾ ಫಿಲ್ಮಾಚೆಂ ಮೂಹೂರ್ತ್ ಕಾರ್ಯೆಂ 10 ದಶೆಂಬರ್ 2022 ವೆರ್ ಕಿರೆಂ ದೇವ್ ತೆಂಪ್ಲಾಂತ್ ಮಾ| ಬಾ| ಸುನಿಲ್ ಜೊರ್ಜ್ ಡಿಸೊಜಾ ಹಾಂಚ್ಯಾ ಹಸ್ತುಕಿಂ ಜಾಲ್ಲೆಂ ಅಸೊನ್ ತ್ಯಾಚ್ ವರ್ಸಾಚ್ಯಾ ಅಖೇರಿ ಭಿತರ್ ಶೂಟಿಂಗಾಚೆಂ ಪಯ್ಲೆಂ ಹಂತ್ ಸಂಪಯಿಲ್ಲೆಂ. ತ್ಯಾ ಉಪ್ರಾಂತ್ ಅಯ್ತಾರಾಚೆಂ ಮಾತ್ರ್ ಶೂಟ್ ಕರ್ನ್ ಹ್ಯಾ ವರ್ಸಾ ಮಾರ್ಚ್ ಅಕೆರಿ ಭಿತರ್ ಪಿಂತುರಾಚೆಂ ನಿರ್ಮಾಣ್ ಕಾರ್ಯೆಂ ಸಂಪಯಿಲ್ಲೆಂ.

ರಾಯನ್ ಅಪ್ಲ್ಯಾ ಯೂಟ್ಯೂಬ್ ಚಾನೆಲ್ ‘ಟ್ರೆಂಡಿಂಗ್ ಶೀಲ್ಡ್’ ಖಾತಿರ್ ಫಾಮಾದ್ ತರ್, ಕೆಲ್ವಿನ್ ಸಲ್ಡನ್ಹಾ ತಾಚೊ ಸಾಂಗಾತಿ ಹ್ಯಾ ವಾವ್ರಾಂತ್ ಪರಿಣತ್ ಆನಿ ಏಕ್ ಅಪ್ರತಿಮ್ ನಟ್, ಯೂಟ್ಯೂಬಾರ್ ಜಾಯ್ತೊ ಫಾಮಾದ್ ತೊ ಜಾಲ್ಲೊ ಆಸಾ. ಫಾಂಕಿವಂತ್ ಆನಿ ಫಾಮಾದ್ ಆನ್ಯೇಕ್ಲಿ ನಟಿ ಮಾನೇಸ್ತಿಣ್ ಲೂಸಿ ಲೋಬೊ ಗುರ್ಪುರ್ ಹಿಚೊ ಹ್ಯಾ ಫಿಲ್ಮಾಂತ್ ಬರೊ ಪಾತ್ರ್ ಆಸಾ ಮಾತ್ರ್ ನಯ್, ಬರಯ್ಣಾರ್‍, ಕಾರ್ಯೆಂ-ನಿರ್ವಾಹಕ್ ಆನಿ ನಟ್ ಜಾವ್ನಾಸ್ಚೆ ಆಲ್ವಿನ್ ದಾಂತಿ ಪೆರ್ನಾಲ್, ಪ್ರೀತಮ್ ಫಜೀರ್ ಆನಿ ಮೆಲ್ವಿನ್ ಪೆರ್ನಾಲ್‍ಯ್ ಹ್ಯಾ ಫಿಲ್ಮಾಚೆ ಪ್ರಮುಖ್ ಆಕರ್ಷಣ್. ರಿಶಲ್ ಪೆರ್ಮನ್ನೂರ್, ಜೊಯ್ಲಿನ್ ಡಿಸೋಜಾ ನಿಡ್ಡೊಡಿ, ಲೆಸ್ಟನ್, ಆರೋನ್ ಪ್ರಿನ್ಸ್, ಜೊನೀಶಾ ಡಿಸೋಜಾ, ಲುಯಿಸ್ ಪಿಂಟೊ ಕಟೀಲ್, ಪ್ರಿನ್ಸನ್ ಮಥಾಯಸ್ ಕಿರೆಂ, ವಿನ್ಸನ್ ಮಥಾಯಸ್ ಕಿರೆಂ, ಪ್ರೀತಿ ಮಥಾಯಸ್ ಕಿರೆಂ ಆನಿ ಕಾರ್ಮಿಣ್ ಸಿಕ್ವೇರಾ – ಹಾಣಿಂಯ್ ಹ್ಯಾ ಪಿಂತುರಾಂತ್ ನಟನ್ ಕೆಲಾಂ. ಹಾಂಚೆ ಸಾಂಗಾತಾ ಫಾಮಾದ್ ಗಾವ್ಪಿಣ್ ವೆಲಿಟಾ ಲೋಬೊಯ್ ಮೆಳ್ಳ್ಯಾ.

ಸಿನೆಮ್ಯಾಟೊಗ್ರಾಫಿ ಸ್ಟ್ಯಾನಿ ನಿಡ್ಡೋಡಿ ಆನಿ ಆಲ್ವಿನ್ ಸಿಕ್ವೇರಾ ಹಾಣಿಂ ಕೆಲ್ಯಾ ತರ್ ಡ್ರೋನ್ ನೈಜಿಲ್ ರೊಡ್ರಿಗಸ್, ಜೀವನ್ ಡಿಕೊಸ್ಟಾ ಆನಿ ಹ್ಯಾನ್ಸನ್ ರೊಡ್ರಿಗಸ್ ಹಾಣಿಂ ಸಾಂಬಾಳ್ಳಾಂ.

ಬ್ಯಾಕ್-ಗ್ರೌಂಡ್ ಸಂಗೀತ್ ರಸ್ಸೆಲ್ ರೊಡ್ರಿಗಸ್ ನ್ ದಿಲಾಂ ಆನಿ ಡಬ್ಬಿಂಗ್ ಜೈಸನ್ ಸಿಕ್ವೇರಾಚ್ಯಾ ಡೆನ್ನನಾ ಸ್ಟುಡಿಯೊಂತ್ ಚಲ್ಲಾಂ. ಸಗ್ಳೆಂ ಪಿಂತುರ್ ಕಿರೆಂ ಆನಿ ಮಂಗ್ಳುರ್ ಅಸ್-ಪಾಸ್ಚ್ಯಾ ಜಾಗ್ಯಾಂನಿ ಶೂಟ್ ಕೆಲ್ಲೆಂ ಆಸೊನ್ ಜಾಯ್ತ್ಯಾ ಉಣ್ಯಾ ಬಜೆಟಿರ್ ಹೆಂ ಉಭೆಂ ಜಾಂವ್ಕ್ ಕಾರಣ್ ಹ್ಯಾ ಪಿಂತುರಾಚೊ ಪ್ರಮುಖ್ ನಟ್, ಬರಯ್ಣಾರ್, ಡೈರೆಕ್ಟರ್ ಆನಿ ಎಡಿಟರ್ ರಾಯನ್ ಮ್ಯಾಗ್ನೆಟೊ.

ಪಿಂತುರಾಚೊ ಫಕತ್ ಏಕ್ ಪ್ರಿಮಿಯರ್ ಶೋ ಸಪ್ಟೆಂಬರ್ 2 ತಾರ್ಕೆರ್ ಸಾಂಜೆರ್ 4:15 ವರಾರ್ ಕೊಡ್ಯಾಳ್ಚ್ಯಾ ಭಾರತ್ ಸಿನೆಮಾಂತ್ ಆಸ್ತಲೊ ಆನಿ ಉಪ್ರಾಂತ್ ವಿವಿಧ್ ಫಿರ್ಗಜಾಂನಿ ಖಾಸ್ಗಿ ಶೋ ಮಾತ್ರ್ ಆಸ್ತೆಲೆ ಮ್ಹಣ್ ರಾಯನಾನ್ ತಿಳ್ಸಿಲಾಂ.

ಕೊಂಕ್ಣಿ ಮೊಗಿಂನಿ ಹ್ಯಾ ಪ್ರಿಮಿಯರ್ ಶೋಕ್ ಟಿಕೆಟ್ ಘೆವ್ನ್ ಯೆಂವ್ಚ್ಯಾಕ್ ಹ್ಯಾ ನಂಬ್ರಾಕ್ ಸಂಪರ್ಕ್ ಕರ್ಚೊ: +91- 8660 021 779.