ಸಾಹಿತ್ಯ ಅಕಾಡೆಮಿ, ನವಿ ಡೆಲ್ಲಿ – ಕೊಂಕ್ಣಿ ಸಾಹಿತಿ ಆನಿ ಕಲಾಕಾರಾಂಚೆಂ ಸಂಘಟನ್, ಮಂಗ್ಳುರ್ ಹಾಂಚ್ಯಾ ಸಹಯೋಗಾನ್, ಮಂಗ್ಳುರ್ಚ್ಯಾ ಸಾಂ. ಲುವಿಸ್ ಕೊಲೆಜಿಚ್ಯಾ ಗೆಲ್ಗೆ ಹೊಲಾಂತ್, ಸನ್ವಾರಾ, ಸಪ್ತೆಂಬರ್ 2 ವೆರ್, ಸಾಂಜೆಚ್ಯಾ 3.30 ವರಾರ್, ಕೊಂಕ್ಣೆಚೆಂ ಪಯ್ಲೆಂ ಪತ್ರ್, ಕೊಂಕ್ಣಿ ದಿರ್ವೆಂ ಹಾಚೊ ಸ್ಥಾಪಕ್ ‘ಲುವಿಸ್ ಕಣ್ಣಪ್ಪ’ ನಾಂವಾನ್ ಫಾಮಾದ್ ಎಲೋಶಿಯಸ್ ಉಚ್ಚಿಲ ಕಣ್ಣಪ್ಪ ಹಾಚ್ಯಾ ಜಿವಿತಾಚೆರ್ ಆನಿ ಕೊಂಕ್ಣಿ ವಾವ್ರಾಚೆರ್ ಭಿತರ್ಲಿ ದೀಶ್ಟ್ ಘಾಲ್ಚೆಂ ವಿಶಿಷ್ಠ್ ಕಾರ್ಯೆಂ ಮ್ಹಜ್ಯೆ ನದ್ರೆಂತ್ಲ್ಯಾನ್ ( Through My Window . . .) ಮಾಂಡುನ್ ಹಾಡ್ಲಾಂ ಆಸುನ್, ಲುವಿಸ್ ಕಣ್ಣಪ್ಪಾಚ್ಯಾ ಧಾಕ್ಟ್ಯಾ ಭಾವಾಚಿ ನಾತ್, ಪ್ರಸ್ತುತ್ ಮುಂಬಯ್ತ್ ವಸ್ತಿ ಕರುನ್ ಆಸ್ಚಿ, ಶ್ಯಾಮಲಾ ಮಾಧವ್ ಹಿ ‘ಕಣ್ಣಪ್ಪಜ್ಜ’ ವಿಶ್ಯಾಂತ್ ಉಲಯ್ತೆಲಿ ಆನಿ ಅನ್ಭೊಗ್ ವಾಂಟುನ್ ಘೆತೆಲಿ.
ಸೋಮೇಶ್ವರ ಉಚ್ಚಿಲಾಂತ್ ಜಲ್ಮಾಲ್ಲ್ಯಾ ಶ್ಯಾಮಲಾ ಮಾಧವ್ ಹಿಣೆ ಮಂಗ್ಳುರ್ಚ್ಯಾ ಬೆಸೆಂಟ್ ಆನಿ ಸಾಂ. ಆಗ್ನೆಸ್ ಕೊಲೆಜಿಂತ್ ಶಿಕಪ್ ಜೊಡ್ಲಾಂ. ಕಥಾ, ಜಿಣ್ಯೆಕಥನ್, ಪ್ರಬಂದ್ ಲೇಖನ್ ಆನಿ ಅನುವಾದ್ ಶೆತಾಂತ್ ಕನ್ನಡ ಸಾಹಿತ್ಯಾಂತ್ ಫಾಮಾದ್ ಶ್ಯಾಮಲಾ ಮಾಧವ್, ಹಿಣೆ ಮುಂಬಯ್ತ್ ಸೃಜನಾ ಕನ್ನಡ ಲೇಖಕಿಯರ ಬಳಗ ಹಾಚಿ ಸಂಚಾಲಕಿ ಜಾವ್ನ್ ಜಾಯ್ತೊ ವಾವ್ರ್ ಕೆಲಾ ಆಸುನ್, ಕರ್ನಾಟಕ ಸಾಹಿತ್ಯ ಅಕಾಡೆಮಿ ಆನಿ ಕುವೆಂಪು ಭಾಷಾ ಭಾರತಿ ಸಂಸ್ಥ್ಯಾಂ ಥಾವ್ನ್ ಮಾನ್ ಆಪ್ಣಾಯ್ಲಾ. ‘ನಾಳೆ ಇನ್ನೂ ಕಾದಿದೆ’ (ಜಿಣ್ಯೆಕಥನ್) ‘ಆ ಲೋಕ’ ( ಕಥಾ ಜಮೊ) ‘ಬದುಕು ಚಿತ್ರ ಚಿತ್ತಾರ’ (ಪ್ರಬಂದ್ ಸಂಗ್ರಹ್) – ತಿಚಿಂ ಪರ್ಗಟಿತ್ ಪುಸ್ತಕಾಂ. ಕ್ಯಾನ್ಸರ್ ಪಿಡೆಕ್ ಹೊಗ್ಡಾಯಿಲ್ಲ್ಯಾ ಪೂತಾವಿಶ್ಯಾಂತ್ ತಿಣೆ ಬರಯಿಲ್ಲೊ ಬೂಕ್ ‘ತುಷಾರ ಹಾರ – ಇದು ಒಡಲ ನೋವಿನ ಕಥನ’ – ಮಾರ್ಮಿಕ್ ಬೂಕ್. ತಿಣೆ ಆನಿ ಮಂಗ್ಳುರಾಂತ್ ವಸ್ತಿ ಕರುನ್ ಆಸ್ಚೊ ತಿಚೊ ಭಾವ್ ಎನ್. ಜಿ. ಮೋಹನ್ ಹಾಣಿ ಬರಯಿಲ್ಲ್ಯಾ ‘ಸತ್ಸಂಚಯ’ ಮ್ಹಳ್ಳ್ಯಾ ಪುಸ್ತಕಾಂತ್ ಲುವಿಸ್ ಕಣ್ಣಪ್ಪ ವಿಶ್ಯಾಂತ್ ಕೊಂಕ್ಣಿ ಲೊಕಾನ್ ಜಾಣಾ ಜಾಯ್ಜೆ ಜಾಲ್ಲ್ಯೊ ಥೊಡ್ಯೊ ಗಜಾಲಿ ಸಂಕ್ಷಿಪ್ತ್ ಥರಾನ್ ಬರಯ್ಲ್ಯಾತ್.
ಲುವಿಸ್ ಕಣ್ಣಪ್ಪ
ಮಂಗ್ಳುರ್ಚ್ಯಾ ಸಾಂ. ಲುವಿಸ್ ಕೊಲೆಜಿಕ್ ಲ್ಯಾಟಿನ್ ಆನಿ ಗಣಿತ್ ವಿಶಯಾಂತ್ ಪಯ್ಲೆಂ ರ‍್ಯಾಂಕ್ ಜೊಡುನ್ ದಿಲ್ಲ್ಯಾ ಉಚ್ಚಿಲ ಕಣ್ಣಪ್ಪಾನ್ ಕಿತ್ಯಾಕ್ ಕ್ರಿಸ್ತಾಂವ್ ಧರ್ಮ್ ಸ್ವೀಕಾರ್ ಕೆಲೊ ? ಆಪ್ಲೆಂ ನಾಂವ್ ಕಿತ್ಯಾಕ್ ತಾಣೆ ಉಚ್ಚಿಲ ಕಣ್ಣಪ್ಪ ಥಾವ್ನ್ ಲುವಿಸ್ ಕಣ್ಣಪ್ಪ ಮ್ಹಣ್ ಬದ್ಲಿಲೆಂ ? ಮಂಗ್ಳುರ್ಚ್ಯಾ ಸಾಂ. ಲುವಿಸ್ ಹೈಸ್ಕೂಲಾಂತ್ ಮೆಸ್ತ್ರಿ ಜಾವ್ನ್, ಸರ್ಕಾರಿ ಕೊಲೆಜಿಂತ್ (ಆತಾಂ ಯುನಿವರ್ಸಿಟಿ ಕೊಲೆಜ್) ಪ್ರಾಂಶುಪಾಲ್ ಜಾವ್ನ್, ದಕ್ಷಿಣ ಕನ್ನಡ ಜಿಲ್ಲ್ಯಾಚೊ ಡಿಸ್ಟ್ರಿಕ್ಟ್ ಎಜುಕೇಶನ್ ಆಪೀಸರ್ (ಡಿ.ಇ.ಒ) ಜಾವ್ನ್ ನಿವೃತ್ತ್ ಜಾತಚ್ ತಾಣೆ THE MANGALOREAN ಪತ್ರ್ ಸುರು ಕರುಂಕ್ ಕಾರಣ್ ಕಿತೆಂ ? ಕೊಂಕ್ಣೆಚೊ ವರಕವಿ ಲುವಿಸ್ ಮಸ್ಕರೇನ್ಹಸ್ ಆನಿ ಲುವಿಸ್ ಕಣ್ಣಪ್ಪಾಚೊ ಸಂಬಂದ್ ಕಿತೆಂ ? ತಾಣಿ ಕೊಂಕ್ಣಿ ದಿರ್ವೆಂ ಪತ್ರ್ ಸುರು ಕರುಂಕ್ ಕಾರಣ್ ಕಿತೆಂ ? ಲುವಿಸ್ ಕಣ್ಣಪ್ಪಾಕ್ ಆನಿ ಸಾಂ. ಲುವಿಸ್ ಕೊಲೆಜಿಕ್, ಕಥೊಲಿಕ್ ಎಸೋಶಿಯೇಶನ್ ಒಫ್ ಸೌತ್ ಕೆನರಾಕ್ (CASK), ಫಾ| ಮುಲ್ಲರ್ಸ್ ಸಂಸ್ಥ್ಯಾಂಕ್, ಎಂ.ಸಿ.ಸಿ. ಬ್ಯಾಂಕಾಕ್, ಕಥೊಲಿಕ್ ಕ್ಲಬ್ಬಾಕ್ ಆಸ್‌ಲ್ಲೊ ಸಂಬಂದ್ ಕಿತೆಂ? ಪಾಪ್ ಸಾಯ್ಬಾನ್ ಲುವಿಸ್ ಕಣ್ಣಪ್ಪಾಕ್ ಕಿತ್ಯಾಕ್ Knighthood of St Gregory (K.S.G) ಉಪಾದಿ ದೀವ್ನ್ ಮಾನ್ ಕೆಲೊ ? ಲುವಿಸ್ ಕಣ್ಣಪ್ಪ ಆಸ್ಲಲೊ ಕಸೊ ಸರ್ದಾರ್ ಲುವಿಸ್ ಕಣ್ಣಪ್ಪ ಜಾಲೊ? ಅಶೆಂ ಜಾಯ್ತ್ಯಾ ಗಜಾಲಿಂಚೆರ್ ಶ್ರೀಮತಿ ಶ್ಯಾಮಲಾ ಮಾಧವ್ ಆಪ್ಲ್ಯಾ ಉಲವ್ಪ್ಪಾಂತ್ ಉಜ್ವಾಡ್ ಫಾಂಕಯ್ತೆಲಿ.
ಶ್ಯಾಮಲಾ ಮಾಧವ್
ಕಾರ್ಯಕ್ರಮಾಕ್ ಸಾಂ. ಲುವಿಸ್ ಕೊಲೆಜಿಚೊ ಪ್ರಾಂಶುಪಾಲ್ ಮಾ|ದೊ| ಪ್ರವೀಣ್ ಮಾರ್ಟಿಸ್ ಚಾಲನ್ ದಿತೆಲೆ. ಶ್ರೀಮತಿ ಶ್ಯಾಮಲಾ ಮಾಧವ್ ಹಿಚೊ ಭಾವ್ ಆನಿ ಕನ್ನಡ ಲೇಖಕ್ ಎನ್. ಜಿ. ಮೋಹನ್ ಕಾರ್ಯಾಕ್ ಹಾಜರ್ ಆಸ್ತಲೊ.
ಕಾರ್ಯೆಂ ಸಾಂಜೆಚ್ಯಾ 3.30 ವರಾಂಚೆರ್ ಕಾಫಿ – ಫಳ್ಹಾರಾಸವೆಂ ಸುರ್ವಾತುನ್ 5.00 ವ್ಹರಾಂಚೆರ್ ಸಂಪ್ತೆಲೆಂ. ಲುವಿಸ್ ಕಣ್ಣಪ್ಪ ಆನಿ ತಾಣೆ ಕೊಂಕ್ಣಿ ಭಾಶೆಕ್ ದಿಲ್ಲ್ಯಾ ಸೆವೆ ವಿಶ್ಯಾಂತ್, ತಾಚ್ಯಾ ಜಿವಿತಾ ವಿಶ್ಯಾಂತ್ ಚಡಿತ್ ಸಮ್ಜೊಂಕ್ ಶ್ಯಾಮಲಾ ಮಾಧವ್ ಹಿಚೆಸವೆಂ ಸಭಿಕಾಂಕ್ ಸಂವಾದಾಕ್ ಅವ್ಕಾಸ್ ಆಸ್ತಲೊ.
ಕವಿ ಮೆಲ್ವಿನ್ ರೊಡ್ರಿಗಸ್ ಆನಿ ಶ್ಯಾಮಲಾ ಮಾಧವ್
ಸರ್ವ್ ಕೊಂಕ್ಣಿ ಮೊಗಿಂಕ್ ಹ್ಯಾ ಕಾರ್ಯಾಕ್ ಸಾಹಿತ್ಯ ಅಕಾಡೆಮಿ, ನವಿ ಡೆಲ್ಲಿ ಕೊಂಕ್ಣಿ ಸಲ್ಹಾಗಾರ್ ಸಮಿತಿಚೊ ನಿಮಂತ್ರಕ್ ಕವಿ ಮೆಲ್ವಿನ್ ರೊಡ್ರಿಗಸ್, ಕೊಂಕ್ಣಿ ಸಾಹಿತಿ ಆನಿ ಕಲಾಕಾರಾಂಚೆಂ ಸಂಘಟನ್ ಹಾಚೊ ಅಧ್ಯಕ್ಷ್ ಶಿಕೇರಾಮ್, ಸುರತ್ಕಲ್, ಕಾರ್ಯದರ್ಶಿ ಶ್ರೀಮತಿ ಫ್ಲೋರಿನ್ ರೋಚ್ – ಹಾಣಿ ಮಾಯೆಮೊಗಾಚೊ ಯೆವ್ಕಾರ್ ಮಾಗ್ಲಾ.