ಕವಿತಾ ಟ್ರಸ್ಟ್ ಹಾಂಣಿ ದಿಂವ್ಚೊ 2023 ವ್ಯಾ ವರ್ಸಾಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ಕವಿ ಪ್ರಕಾಶ್ ದತ್ತಾರಾಮ್ ನಾಯ್ಕ್ ಹಾಂಕಾಂ ಫಾವೊ ಜಾಲಾ. ಹೊ ಪುರಸ್ಕಾರ್ ರು. 25,000, ಯಾದಸ್ತಿಕಾ ಆನಿ ಪ್ರಮಾಣ್ ಪತ್ರ್ ಆಟಾಪ್ತಾ. ಜನೆರ್ 14, 2024 ತಾರಿಕೆರ್ ಮಂಗ್ಳುರ್ ಲಾಗ್ಸಾರ‍್ಚ್ಯಾ ಪುತ್ತೂರಾಂತ್ ಚಲ್ಚ್ಯಾ ಆಟ್ರಾವ್ಯಾ ಕವಿತಾ ಫೆಸ್ತ್ ಸಂದರ್ಭಾರ್ ಹೊ ಪುರಸ್ಕಾರ್ ತಾಂಕಾಂ ಭೆಟಯ್ತಲೆ.
ಪ್ರಕಾಶ್ ದತ್ತಾರಾಮ್ ನಾಯ್ಕ್ ಗೊಂಯ್ಚ್ಯಾ ರಾಯ್‌ಬಂದರಾಂತ್ 1962 ದಶೆಂಬರ್ 22 ತಾರಿಕೆರ್ ಜಲ್ಮಲೊ. ಮುಂಬಯ್ ವಿಶ್ವವಿದ್ಯಾಲಯ ಥಾವ್ನ್ ಬಿ.ಎ. ಪದ್ವಿ ಜೊಡ್ತಚ್ ಶಿಕ್ಷಕ್ ಜಾವ್ನ್ ತಾಣೆ ವಾವ್ರ್ ಕೆಲೊ ಆನಿ ಆತಾಂ ನಿವೃತ್ತ್ ಜಿಣಿ ಜಿಯೆತಾ.
ತಾಂಣಿ 1979 ವರ್ಸಾಥಾವ್ನ್ ಕವಿತಾ ಬರೊಂವ್ಕ್ ಧರ‍್ಲ್ಯೊ. ತಾಂಚಿ ‘ಚೈತರ್’ (1987), ‘ಕಸ್ತೂರ್ ಗಂಧ್’ (2005), ‘ಕುತಲ್ಲ್’ (2015), ‘ಮೊಡ್ಕುಳ್’ (2022) – ಅಶೆಂ ಚ್ಯಾರ್ ಕವಿತಾ ಸಂಗ್ರಹ್ ಪರ್ಗಟ್ ಜಾಲ್ಯಾತ್. ಹ್ಯಾ ಭಾಯ್ರ್ ‘ಅಸ್ತುರಿ -ಶಿಮೆಭಾಯ್ಲೆಂ ಮಳಬ್’ (2014), ‘ಸಾಗ್ರ್‌ಸಂಗೀತ್’ (2022), ‘ತಾಂಬ್ ಸುರ್ಯಾ ಹಾಂವ್’ (ಡಿಜಿಟಲ್ ಈ ಬುಕ್ – 2022) – ಅಶೆಂ ಗದ್ಯ್ ಲೇಖನಾಂಚಿಂ ಪುಸ್ತಕಾಂ ತಾಂಚಿಂ ಪರ್ಗಟ್ ಜಾಲ್ಯಾಂತ್. ತಾಂಣಿ ನಾಟಕಾಂ, ಮಟ್ವ್ಯೊ ಕಥಾ, ಗಿತಾಂ, ವಿಜ್ಞಾನ್ ನಾಟಕಾಂ ಲಿಖ್ಲ್ಯಾಂತ್. ತಾಂಚ್ಯೊ ಕವಿತಾ ಗೊಂಯ್ಚ್ಯಾ ಸೆಕೆಂಡರಿ ತಶೆಂ ಹೈಯರ್ ಸೆಕೆಂಡರಿ ಶಾಳೆಂನಿ ಶಿಕಯ್ತಾತ್.
‘ತುಂ ಆನಿ ಹಾಂವ್’ (ಕೊಂಕಣಿ), ‘ಸಂಘರ್ಷ್’ (ಹಿಂದಿ), ‘ಸುಲೂಸ್ ಮುಖಾವೆಲ್ಯಾ ತ್ಸುನಾಮಿಚಿ’ (ಕೊಂಕಣಿ), ‘ದಿ ಸರ್ವೈವಲ್’ (ಇಂಗ್ಲಿಷ್) – ಲಘು ಸಿನೆಮಾ ತಾಂಣಿ ನಿರ್ಮಾಣ್ ಕೆಲ್ಯಾಂತ್. ತಾಂಚಿಂ ಹಿಂ ಫಿಲ್ಮಾಂ ಅಂತರಾಷ್ಟ್ರೀಯ್ ಫಿಲ್ಮ್ ಫೆಸ್ಟಿವಲಾಂನಿ ಪ್ರದರ್ಶಿತ್ ಜಾಲ್ಯಾಂತ್.
ಅಖಿಲ್ ಭಾರತೀಯ್ ಕೊಂಕಣಿ ಸಾಹಿತ್ಯ್ ಸಮ್ಮೇಳನ್, ಆಕಾಶ್‌ವಾಣಿ, ಗೊಂಯ್ ದೂರದರ್ಶನ್, ಇನ್‌ಸ್ಟಿಟ್ಯೂಟ್ ಮಿನೇಜಸ್ ಬ್ರಗಾಂಜಾ, ಕಲಾ ಅಕಾಡೆಮಿ, ಕೊಂಕಣಿ ಅಕಾಡೆಮಿ, ಸಾಹಿತ್ಯ ಅಕಾಡೆಮಿ – ಅಶೆಂ ವೆವೆಗ್ಳ್ಯಾ ಸಂಸ್ಥ್ಯಾಂನಿ ಮಾಂಡುನ್ ಹಾಡಲ್ಲ್ಯಾ ಕವಿಗೋಷ್ಟಿಂನಿ, ಸೆಮಿನಾರಾಂನಿ ತಾಣೆ ವಾಂಟೊ ಘೆತ್ಲಾ.
ತಾಂಕಾಂ ಕೊಂಕಣಿ ಭಾಷಾ ಮಂಡಳ್, ಗೊಂಯ್ ಪುರಸ್ಕಾರ್ (ಚೈತರ್-1988), (ಕುತಲ್ಲ್ – 2016), ವಿ. ಎಮ್. ಸಾಳ್ಗಾಂವ್ಕಾರ್ ಪುರಸ್ಕಾರ್ (1990) – ಅಶೆಂ ಜಾಯ್ತೆ ಪುರಸ್ಕಾರ್ ಲಾಭ್ಲ್ಯಾತ್.
ಕವಿತಾ ಟ್ರಸ್ಟಾಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ಮೆರಿಟ್ ಫ್ರೈಟ್ ಸಿಸ್ಟಮ್ಸ್, ದುಬಾಯ್ ಹಾಚೊ ಆಡಳ್ತ್ಯಾ ನಿರ್ದೇಶಕ್ ಜಾವ್ನಾಸ್ಚ್ಯಾ ಕುಪ್ಪೆಪದವುಚ್ಯಾ ಜೋಸೆಫ್ ಮಥಾಯಸಾನ್ ಆಪ್ಲ್ಯಾ ಕುಟ್ಮಾಚ್ಯಾ ನಾಂವಾನ್ ದಿಂವ್ಚೊ ಜಾವ್ನಾಸಾ. ಹಾಚೆ ಆದಿಂ ಹೊ ಪುರಸ್ಕಾರ್ ಗೊಂಯ್, ಕರ್ನಾಟಕ, ಕೇರಳ, ಮುಂಬಯ್ ಪ್ರದೇಶಾಂತ್ಲ್ಯಾ ಪಂದ್ರಾ ಕವಿಂಕ್ ಫಾವೊ ಜಾಲಾ. ಹ್ಯೆ ವಳೆರಿಂತ್ ಪ್ರಕಾಶ್ ದತ್ತಾರಾಮ್ ನಾಯ್ಕ್ ಸೊಳಾವೊ.