ವಲ್ಲಿ ಕ್ವಾಡ್ರಸಾಕ್ ಭಾರತೀಯ್ ಸಂಸ್ಕೃತಿ ಇಲಾಖ್ಯಾಚೆಂ ಸೀನಿಯರ್  ಫೆಲೋಶಿಪ್

ಭಾರತೀಯ್ ಸಂಸ್ಕೃತಿ ಇಲಾಖೊ ಭಾರತೀಯ್ ಭಾಸೆಂತ್ಲ್ಯಾ ವೆಗ್-ವೆಗಳ್ಯಾ ಶೆತಾಂನಿ (ಶಿಕ್ಷಣ್, ಕಲಾ, ಜಾನಪದ್, ಸಾಹಿತ್ಯ್, ರಂಗ್‌ಮಂಚ್…) ಜೂನಿಯರ್ ತಶೆಂಚ್ ಸೀನಿಯರ್ ಫೆಲೋಶಿಪಾಕ್ ಅರ್ಜ್ಯೊ ಆಪಯ್ತಾ. ಆನಿ ಜೊಕ್ತ್ಯಾಂಕ್ ಹೆಂ ಫೆಲೋಶಿಪ್ ಫಾವೊ ಕರ್ತಾ. ಸೀನಿಯರ್ ಫೆಲೋಶಿಪಾಂತ್ ದೋನ್ ವರ್ಸಾಂಚೊ ಸಂಸೋದ್ ಆಟಾಪ್ತಾ. ಹರ್ಯೇಕಾ ಸ ಮಯ್ನ್ಯಾಚ್ಯಾ ಸಂಸೋದ್ ವಾವ್ರಾಚೊ ರಿಪೋರ್ಟ್ ಧಾಡುಂಕ್ ಪಡ್ತಾ. ವಲ್ಲಿ ಕ್ವಾಡ್ರಸಾನ್ ಮುಂಡುಗೋಡ್, ಹಾನೆಗಳ್ಳಿ, ಎಲ್ಲಾಪುರ್ ಅಶೆಂ ಸಿದ್ದಿ ಲೊಕಾಂಚೆರ್ ಕೆಲ್ಲ್ಯಾ ಸಂಸೋಧಾಕ್ (ಸಿದ್ದಿ ಲೊಕಾಂಚಿ ಜಿಣಿ ಆನಿ ಸಂಸ್ಕೃತಾಯ್)  2019-20 ಚೊ ಸೀನಿಯರ್ ಫೆಲೋಶಿಪ್ ಫಾವೊ ಜಾಲಾ.

ಮುಂಬಂಯ್ತ್ ವಸ್ತಿ ಕರುನ್ ಆಸ್ಚ್ಯಾ ವಲ್ಲಿ ಕ್ವಾಡ್ರಸಾಕ್ – ದಿವೊ ಸಾಹಿತ್ಯಿಕ್ ಪುರಸ್ಕಾರ್ (2003), ತೀನ್ ಪಾವ್ಟಿಂ ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೆಂ ಉತ್ತೀಮ್ ಪುಸ್ತಕ್ ಪುರಸ್ಕಾರ್ (ಕವಿತಾಪಾಠ್, 2005, ದರ್ಭಾರಾಂತ್ಲಿ ಪಿಂರ್ಗೊಣ್, 2006, ಬಂಧ್, 2018), ಕವಿತಾ ಟ್ರಸ್ಟಾಚೊ ಮಥಾಯಸ್ ಕುಟ್ಮಾಚೊ ಪುರಸ್ಕಾರ್ (2019), ವಿಶ್ವ್ ಕೊಂಕಣಿ ಕೇಂದ್ರಾಚೊ ವಿಮಲಾ ವಿ. ಪೈ. ಫೌಂಡೇಶನಾಚೊ ಪುರಸ್ಕಾರ್ (ಭಿತರ್ಲೊ ಕವಿ, 2022) ಆನಿ ದಾಯ್ಜಿದುಭಾಯ್ ಸಾಹಿತ್ಯಿಕ್ ಪುರಸ್ಕಾರ್ (2023) ಲಾಭ್ಲ್ಯಾತ್. ಪ್ರಸ್ತುತ್ ಪಯ್ಣಾರಿ.ಕೊಮ್ ಚೊ ಸಂಪಾದಕ್ ಜಾವ್ನಾಸಾ.