ಉಡುಪಿ ದಿಯೆಸೆಜಿಕ್ ನವೊ ಯಾಜಕ್ – ಸ್ಟೇಫಾನ್ ರೊಡ್ರಿಗಸ್

“ಪಿಕಾವಳ್ ಯಥೇಷ್ಟ್ ಆಸಾ , ಪುಣ್ ವಾವ್ರಾಡಿ ಥೊಡೆಚ್” [ ಮಾತೆವ್ 9 : 37 ] ಹಿಂ ಉತ್ರಾಂ ಜೆಜುಕ್ರೀಸ್ತಾನ್ ಆಪ್ಲ್ಯಾ ಶಿಸಾಂಕ್ ಕಾಂಯ್ 2000 ವರ್ಸಾಂ ಆದಿಂ ಸಾಂಗ್‍ಲ್ಲಿಂ ತಿಂ ವಾಚ್ತಾನಾ ಆತಾಂಚ್ಯಾ ಪರಿಸ್ಥಿತೆಂತ್ ಜೆಜು ಕ್ರೀಸ್ತಾಚಿ ದೂರ್‌ದ್ರಶ್ಟಿ ಕಿತ್ಲಿ ತೀಕ್ಷ್ಣ್ ಜಾವ್ನಾಸ್‍ಲ್ಲಿ ತಿ ಆಮ್ಕಾಂ ಸಮ್ಜಾತಾ. ಮಟ್ವಿಂ ಜಾಲ್ಲಿಂ ಕುಟ್ಮಾಂ , ಸರ್ವ್ ಥರಾಂಚ್ಯೊ ವೊಡ್ಣಿ ಹಾಡ್ಚೊ ಬಾಹ್ಯ್ ಸಂಸಾರ್ ಆನಿ ಮಾಧ್ಯಮಾಂಚಿ ಸಾಧನಾಂ ಹಾಂಕಾಂ ಸರ್ವ್ ಆತಾಂಚಿ ತರ್ನಿ ಪಿಳ್ಗಿ ಮಾಲ್ವಾತಾನಾ ಆಮ್ಚ್ಯಾ ಹರ್ಯೆಕ್ ದಿಯೆಸಿಜೆನಿ ಯಾಜಕ್ ನಾಂತ್ ಮುಳ್ಳಿ ಬೆಜಾರಾಯ್ ಖಂಡಿತ್ ಜಾವ್ನ್ ಆಮ್ಚ್ಯಾ ಧಾರ್ಮಿಕ್ ವ್ಹಡಿಲಾಂಕ್ ಆಧಿಕ್ ಮಾಪಾನ್ ದೊಸುನ್ ಆಸಾ.

ಆಸಲ್ಯಾ ಎಕಾ ಸಂಧಿಗ್ಧ್ ಪರಿಸ್ಥಿತೆಂತ್ ಮರುಭೂಮಿಂತ್ ಓಯಸಿಸ್ ಮೆಳ್‍ಲ್ಲ್ಯಾ ಬರಿ ಆಮ್ಚ್ಯಾ ಉಡುಪಿ ದಿಯೆಸೆಜಿಚಿ ಧಾರ್ಮಿಕ್ ಸೆವಾ ಭೆಟೊಂವ್ಕ್ ಎಕ್ ಯುವಕ್ ಸಂಪೂರ್ಣ್ ಥರಾನ್ ಆಯ್ತೊ ಜಾಲಾ. ದಿಯಾಕೊನ್ ಸ್ಟೇಫಾನ್ ರೊಡ್ರಿಗಸ್ ಆಪ್ಲಿ ಯಾಜಕ್ಪಣಾಚಿ ತರ್ಭೆತಿ ಸಂಪೊವ್ನ್ ತೊಟ್ಟಾಮ್ ಸಾಂತ್ ಆನ್ನಾ ಮಾಯೆಚ್ಯಾ ಫಿರ್ಗಜೆಂತ್ ಎಪ್ರಿಲ್ 23 , 2024 ವೆರ್ ಉಡುಪಿ ದಿಯೆಸೆಜೆಚೊ ಗೊವ್ಳಿ ಬಾಪ್ ಭೊವ್ ಮಾನಾಧಿಕ್ ದೊ.ಜೆರಾಲ್ಡ್ ಐಸಾಕ್ ಲೊಬೊ ಹಾಂಚೆ ಥಾವ್ನ್ ಆಪ್ಲಿ ಯಾಜಕಿ ದಿಕ್ಷೆಚೊ ಪವಿತ್ರ್ ಸಾಕ್ರಾಮೆಂತ್ ಜೊಡುಂಕ್ ಸಂಪೂರ್ಣ್ ಥರಾನ್ ತಯಾರ್ ಜಾವ್ನ್ ಆಪ್ಲ್ಯಾ ಭಾಗಿ ದಿಸಾಕ್ ಆತ್ರೇಗಾನ್ ಮುಕಾರ್ ಪಳೆವ್ನ್ ಆಸಾ.

ಶಿವಮೊಗ್ಗ ಜಿಲ್ಲ್ಯಾಂತ್ಲ್ಯಾ ನಾಂವಾಡ್ದಿಕ್ ಪ್ರವಾಸಿ ಜಾಗೊ ಜಾವ್ನಾಸ್ಚ್ಯಾ ಜೊಗ್ ಫಾಲ್ಸ್ ಹಾಂಗಾಸರ್ ಜನೆರ್ 11 , 1996 ವೆರ್ ದೆ.ಸಾಲ್ವಾದೊರ್ ರೋಡ್ರಿಗಸ್ ಆನಿ ದೆ.ಝಿಟಾ ರೊಡ್ರಿಗಸ್ ಹಾಂಚ್ಯಾ 6 ಜಣಾಂ ಭುರ್ಗ್ಯಾಂ ಪಯ್ಕಿ ಪುಸುನ್ ಘಾಲ್ಲೊ ಪೊಳೊ ಯ್ಯಾ ನಿಮಾಣೊ ಜಾವ್ನ್ ಜಲ್ಮ್ ಘೆತ್‍ಲ್ಲ್ಯಾ ದಿಯಾಕೊನ್ ಸ್ಟೇಫಾನ್ ಹಾಣೆಂ ಯಾಜಕಿ ಭೆಸ್ ಆನಿ ಉಡುಪಿ ದಿಯೆಸೆಜ್ ವಿಂಚುಂಕ್ ತೊ ಲ್ಹಾನ್ ಆಸ್ತಾನಾ ಶಿವಮೊಗ್ಗಾಚೆ ಭಿಸ್ಪ್ ಜಾವ್ನಾಸ್‍ಲ್ಲೆ ಆತಾಂಚೆ ಉಡುಪಿ ದಿಯೆಸೆಜೆಚೆ ಭಿಸ್ಪ್ ಭೊವ್ ಮಾನಾಧಿಕ್ ದೊ.ಜೆರಾಲ್ಡ್ ಐಸಾಕ್ ಲೊಬೊ ಹಾಣಿಂ ಆಪ್ಣಾ ವಯ್ರ್ ಘಾಲ್ಲೊ ಪ್ರಭಾವ್ ಜಾಂವ್ದಿ ತೊ ಮಾಗ್ಣ್ಯಾಂತ್ ಆನಿ ಗರ್ಜೆವಂತಾಚಿ ಸೆವಾ ಕರ್ಚ್ಯಾಂತ್ ಪ್ರಮುಖ್ ಕಾರಣಾಂ ಪಯ್ಕಿ ಎಕ್ ಜಾವ್ನಾಸಾ ಮುಣೊನ್ ವ್ಹಡಾ ಗರ್ವಾನ್ ದಿಯಾಕೊನ್ ಸ್ಟೇಫಾನ್ ಸಾಂಗ್ತಾ.  ತಶೆಂ ಮುಣೊನ್ ತಾಚ್ಯಾ ಕುಟ್ಮಾಂತ್ ದೇವ್ ಆಪೊವ್ಣ್ಯಾಂಚೆಂ ಭಾಗ್ ಕಾಂಯ್ ನ್ಹವೆಂ ನ್ಹಂಯ್. ತಾಚ್ಯಾ ವ್ಹಡಿಲಾಂನಿ ಜೊಡ್‍ಲ್ಲ್ಯಾ ಭಾಗಿ ಕಾಜಾರಿ ಸಾಕ್ರಾಮೆಂತಾಂತ್ ಫುಲ್‍ಲ್ಲ್ಯಾ ಸ ಫುಲಾಂ ಪಯ್ಕಿ ತೆಗಾಂಕ್ ತಾಣಿಂ ದೆವಾಚ್ಯಾ ಶೆತಾಂತ್ ವಾವ್ರುಂಕ್ ದಾಡ್ನ್ ಆಮಾಂ ಸರ್ವಾಂಕ್ ಉತ್ತೀಮ್ ದೇಖ್ ದಿಲ್ಯಾ.

ತಾಚ್ಯಾ ಭಾಂವ್ಡಾಂ ಪಯ್ಕಿ ಮಾಲ್ಘಡೆಂ ಭಯ್ಣ್ ಸಿ.ಸಂತಾನ್ ರೋಡ್ರಿಗಸ್ UFS ಮೈಸೂರ್ಚ್ಯಾ St.Mary’s Hospital , HD Kote ಹಾಂಗಾಸರ್ ಆಡಳ್ತೆಧಾರ್ನ್ ಜಾವ್ನ್ ಆಪ್ಲಿ ಸೆವಾ ದೀವ್ನ್ ಆಸಾ ತರ್ ದುಸ್ರಿ ಭಯ್ಣ್ ಶ್ರೀಮತಿ ಪರ್ಪೆಚ್ಯುವ ರೊಡ್ರಿಗಸ್ ಹೊನ್ನಾವರ್ ಹೊಸಾಡ್ ಫಿರ್ಗಜೆಂತ್ಲ್ಯಾ ಸಂತೊಷ್ ಪಿಂಟೊ ಲಾಗಿಂ ಲಗ್ನ್ ಜಾವ್ನ್ ಮಂಜೆಶ್ವರಾಂತ್ಲ್ಯಾ ಸ್ನೇಹಲಯಾಂತ್ ನರ್ಸ್ ಜಾವ್ನ್ ಆಪ್ಲಿ ಸೆವಾ ದೀವ್ನ್ ಆಸಾ ತರ್ ತಿಚೊ ನವ್ರೊ ಸಂತೊಷ್ ಪಿಂಟೊ ಆಪ್ಲೆಂ ಸ್ವಂತ್ ಉಧ್ಯಮ್ ಚಲೊವ್ನ್ ಆಸಾ , ತಿಸ್ರಿ ಭಯ್ಣ್ ಶ್ರೀಮತಿ ಸವಿತಾ ರೋಡ್ರಿಗಸ್ ಲೊರೆಟ್ಟೊಂತ್ಲ್ಯಾ ಸುಜಿತ್ ಪ್ರಶಾಂತ್ ರೋಡ್ರಿಗಸ್ ಲಾಗಿಂ ಲಗ್ನ್ ಜಾವ್ನ್ ಆಪ್ಲೆಂ ಕುಟಾಮ್ ಸಾಂಬಾಳುನ್ ಆಸಾ . ತಾಂಚ್ಯಾ ಲಗ್ನಾ ತೊಟಾಂತ್ ಸುಶ್ಮಿತಾ ಪ್ರಮಿತಾ ರೊಡ್ರಿಗಸ್ ಆನಿ ಸುಮಿತ್ ಪ್ರಜಿತ್ ರೊಡ್ರಿಗಸ್ ನಾಂವಾಂಚಿಂ ದೋನ್ ಸುಂದರ್ ಫುಲಾಂ ದೆವಾನ್ ಫಾವೊ ಕೆಲ್ಯಾಂತ್. ಸುಜಿತ್ ಪ್ರಶಾಂತ್ ರೋಡ್ರಿಗಸ್ ಆಬುದಾಬಿಂತ್ ಆಪ್ಲೊ ವಾವ್ರ್ ಕರುನ್ ಆಸಾ , ಚವ್ತಿ ಭಯ್ಣ್ ಲವಿಟಾ ರೋಡ್ರಿಗಸ್ ಸಾಂತ್ ಆಲೋಶಿಯಸ್ ಸಾಂಜೆಚ್ಯಾ ಕೊಲೆಜಿಂತ್ ಲೆಕ್ಚರಾರ್ ಜಾವ್ನ್ ವಾವ್ರ್ ದೀವ್ನ್ ಆಸ್‍ಲ್ಲಿ ಆಗೋಸ್ತ್ 20 , 2015 ವೆರ್ ದೆವಾಕ್ ಮೊಗಾಚಿ ಜಾವ್ನ್ ಸರ್ಗಿಂಚ್ಯಾ ಪಯ್ಣಾಕ್ ಭಾಯ್ರ್ ಸರೊನ್ ಗೆಲ್ಯಾ. ಹ್ಯಾ ಘಡಿಯೆ ತಿಚ್ಯಾ ಆತ್ಮ್ಯಾಕ್ ಹಾಂವ್ ಶಾಂತಿ ಮಾಗ್ತಾಂ.  ಪಾಂಚ್ವೊ ಆನಿ ಕುಟ್ಮಾಂತ್ಲೊ ಪಯ್ಲೊ ಚಲೊ ಮಾನಾಧಿಕ್ ಬಾಪ್ ಮಾರ್ಟಿನ್ ರೋಡ್ರಿಗಸ್ ಕೊಲ್ಕತ್ತಾಂತ್ಲ್ಯಾ ಆಸಾನ್‍ಸೊಲ್ ದಿಯೆಸೆಜೆಂತ್ ಆಪ್ಲಿ ಸೆವಾ ದೀವ್ನ್ ಆಸಾತ್ ತರ್ ಕುಟ್ಮಾಂತ್ ಸವೊ ಆನಿ ನಿಮಾಣೊ ಜಾವ್ನ್ ಜಲ್ಮಾಲ್ಲೊ ದಿಯಾಕೋನ್ ಸ್ಟೆಫಾನ್ ಹಾಣೆ ಪುತ್ತುರ್ಚ್ಯಾ ಸಾಂ.ಫಿಲೊಮೆನಾ ಕೊಲೆಜಿಂತ್ ಆಪ್ಲೆಂ ಪದ್ವೆ ಶಿಕಾಪ್ ಸಂಪೊವ್ನ್ , ಮಂಗ್ಳೂರ್ಚ್ಯಾ ಸಾಂ.ಜುಜೆ ಸೆಮಿನಾರಿಂತ್ Philosophy & Theology ಶಿಕಾಪ್ ಸಂಪಯ್ಲಾಂ. ಆಪ್ಲಿ ರಿಜೆನ್ಸಿ ದಿಯೆಸೆಜೆಚೆಂ ಎಸ್ಟೆಟ್ ಬೆಳ್ವೆ ಹಾಂಗಾಸರ್ ಕರ್ನ್ ಆಕ್ಟೊಬರ್ 14 , 2023 ಥಾವ್ನ್ ಆಮ್ಚ್ಯಾ ತೊಟ್ಟಾಮ್ ಸಾಂತ್ ಆನ್ನಾ ಮಾಯೆಚ್ಯಾ ಫಿರ್ಗಜೆಂತ್ ದಿಯಾಕೊನ್ ಜಾವ್ನ್ ಸೆವಾ ದೀವ್ನ್ ಆಸಾ.

ಆಮ್ಚ್ಯಾ ವ್ಹಡಿಲಾಂ ಥಂಯ್ ಏಕ್ ಕಾವ್ಜೆಣಿ. ಆಮ್ಕಾಂ ಆಸ್ಚೊ ಎಕ್ ಚೆರ್ಕೊ ವಾ ಎಕ್ ಚೆಡುಂ ಭುರ್ಗೆಂ. ತಾಂಕಾಂಯ್ ಆಮಿಂ ದೆವಾಚ್ಯಾ ಶೆತಾಂತ್ ಧಾಡ್ಲ್ಯಾರ್ ಆಮ್ಚೆಂ ಕುಟಾಮ್/ಸಂತಾನ್ ಮುಖಾರ್ಸುನ್ ವ್ಹರುಂಕ್ ಕೊಣಿಂ ನಾಂತ್ ಮುಣೊನ್ ರಡ್ಚ್ಯಾ ಆಮ್ಕಾಂ ದಿಯಾಕೋನ್ ಸ್ಟೇಫಾನಾಚಿಂ ಜಲ್ಮ್ ದಾತಾರಾಂ ಏಕ್ ಆದರ್ಶ್ ಉದಾಹರಣ್. ಆಪ್ಲ್ಯಾ ದೊನೀ ಚೆರ್ಕ್ಯಾ ಭುರ್ಗ್ಯಾಂಕ್ ಹ್ಯಾ ಆಧುನಿಕ್ ಕಾಳಾಂತ್ ಸಯ್ತ್ ಭೊವ್‍ಚ್ಚ್ ದೇವ್ ಭಿರಾಂತಿನ್ ವಾಗೊವ್ನ್ ದೆವಾಚ್ಯಾ ಶೆತಾಂತ್ ವಾವ್ರುಂಕ್ ದಾಡ್ನ್ , ಜಾಯ್ನಾ ಮುಣೊನ್ ಚಿಂತುನ್ ಆಸ್ಚ್ಯಾ ಆಮ್ಕಾಂ ಜಾತಾ ಮುಣೊನ್ ದಾಕೋವ್ನ್ ದೀವ್ನ್ ಏಕ್ ದೇವ್ ಭಿರಾಂತೆಚಿಂ ತಶೆಂಚ್ ಏಕ್ ಮಾಧರಿ ವ್ಹಡಿಲಾಂ ತಿಂ ಆಮ್ಕಾಂ ಜಾಲ್ಯಾಂತ್.

ದಿಯಾಕೊನ್ ಸ್ಟೇಫಾನ್ ಆನಿ ಮ್ಹೊಜಿ ವ್ಹಳೊಕ್ ಕಾಂಯ್ ಭೊವ್ ಆದ್ಲಿ ನ್ಹಂಯ್. ರಜೆರ್ ಗಾಂವಾಂಕ್ ಪಾವ್‍ಲ್ಲ್ಯಾ ಮ್ಹಾಕಾ ತಾಚಿ ವ್ಹಳೊಕ್ ಆಮ್ಚೊ ಫಿರ್ಗಜ್ ವಿಗಾರ್ ಮಾನಾಧಿಕ್ ಬಾಪ್ ಡೆನಿಸ್ ಡೆಸಾ ಹಾಣಿಂ ಕರ್ನ್ ದಿಲ್ಲಿ. ಮೆಳ್‍ಲ್ಲ್ಯಾ ತಕ್ಷಣ್ ಆಮಿಂ ಕಾಂಯ್ ವರ್ಸಾಂ ಥಾವ್ನ್ ಎಕಾಮೆಕಾ ಲಾಗ್ಶಿಲ್ಯಾನ್ ಜಾಣಾಂವ್ ಆನಿ ಮೊಜ್ಯಾಚ್ಚ್ ಕುಟ್ಮಾಚೊ ಸಾಂದೊ ಮುಳ್ಳ್ಯಾಬರಿ ಆತ್ಮೀಯತಾ ತಾಣೆ ಆಮ್ಚ್ಯಾ ಮದೆಂ ಉಬಿ ಕೆಲ್ಯಾ. ತಾಕಾ ಜಾಣಾ ಜಾಲ್ಲ್ಯಾ ತಿತ್ಲೆಂ ತಾಚ್ಯಾ ಲಾಗಿಂ ಮ್ಹಾಕಾ ಪಾವೊಂಕ್ ಸಾಧ್ಯ್ ಜಾಲೆಂ. ಪರ್ತುನ್ ಪರ್ತುನ್ ತಾಕಾ ಮೆಳ್ಯಾಂ ಆನಿ ತಾಚ್ಯಾ ಲಾಗಿಂ ಉಲೊವ್ಯಾಂ ಮುಣೊನ್ ಮ್ಹಾಕಾ ಭಗ್ಲೆಂ. ಹಿಂ ಮೊಜ್ಯಾ ಎಕ್ಲ್ಯಾಚಿಂ ಮಾತ್ರ್ ಭಗ್ಣಾಂ ನ್ಹಂಯ್ ಬಗಾರ್ ಆಮ್ಚ್ಯಾ ಸರ್ವ್ ಫಿರ್ಗಜ್‍ಗಾರಾಂಚಿಂ ಸಾಮಾನ್ಯ್ ಭಗ್ಣಾಂ ಜಾವ್ನಾಸಾತ್.

ಪಾಟ್ಲ್ಯಾ ಥೊಡ್ಯಾ ಮಹಿನ್ಯಾಂನಿ ಹಾಂವೆ ದಿಯಾಕೋನ್ ಸ್ಟೇಫಾನ್ ಹಾಣೆಂ ಫಿರ್ಗಜೆಚ್ಯಾ ಚಟುವಟಿಕ್ಯಾಂನಿ ಘೆಂವ್ಚೊ ಪಾತ್ರ್ ಭೊವ್ ಲಾಗ್ಶಿಲ್ಯಾನ್ ಪಳೆಲಾ. ಕಾರ್ಯಾಚ್ಯಾ ಪಯ್ಲೆಂ ತ್ಯಾ ಕಾರ್ಯಾಚಿ ಮೆಟಾಂ ಮೆಟಾಂನಿ ಕರ್ಚಿ ಮಾಂಡಾವಳ್ , ಸಂಬಂದ್ ಜಾಲ್ಲ್ಯಾ ಆಯೋಗಾಂಕ್ , ಸಂಸ್ಥ್ಯಾಂಕ್ ದಿಂವ್ಚಿಂ ಸೂಚನಾಂ ತಶೆಂಚ್ ಭೊವ್ ಮುಖ್ಯ್ ಜಾವ್ನ್ ವೇಳಾಕ್ ದಿಂವ್ಚೊ ಮಹತ್ವ್ ಮಾನ್ವೊಂಚ್ಯಾ ತಸಲೊ.ತಾಚ್ಯಾ ಆದ್ರಷ್ಟನ್ಂಚ್ ಮುಣಾಜೆ ಬಾಪ್ ಡೆನಿಸ್ ಡೆಸಾ ರುಪಿಂ ತಾಕಾ ಏಕ್ ಭೊವ್‍ಚ್ ಸಂಘಟಿತ್ ಗುರು ಮೆಳ್‍ಲ್ಲ್ಯಾನ್ ತಾಚ್ಯಾ ವ್ಯಕ್ತಿತ್ವ್ ವಿಕಾಸನಾಕ್ ಹಸ್ತಿಚೆಂ ಬಳ್ ಮೆಳ್ಳೆಂ ಮುಣೊನ್ ಖಂಡಿತ್ ಸಾಂಗ್ಯೇತ್.

ದಿಯಾಕೋನ್ ಸ್ಟೆಫಾನಾಚೆ ಸೆರ್ಮಾಂವ್ ಚೀತ್ ದೀವ್ನ್ ಆಯ್ಕೊಂಕ್ ಕರ್ತಾತ್. ಪ್ರಚಲಿತ್ ವಿಶಯಾಂಕ್ ಸಾಂಗಾತಾ ಕಾಣ್ಘೇವ್ನ್ , ಪವಿತ್ರ್ ಪುಸ್ತಕಾಂತ್ಲ್ಯಾ ಉತ್ರಾಂಕ್ ತಾಳ್ ಕರ್ಚಿ ರೀತ್ ಮಾನ್ವೊಂಚ್ಯಾ ತಸಲೆ.ಭುರ್ಗ್ಯಾಂ ಸಾಂಗಾತಾ ಮೆಳ್ತಾನಾ ತೊ ಏಕ್ ಲ್ಹಾನ್ ಭುರ್ಗೊಚ್ಚ್ ಜಾತಾ.ಭುರ್ಗ್ಯಾಂಚ್ಯಾ ಮಿಸಾವೆಳಿಂ ತಾಣೆಂ ದಿಂವ್ಚೆ ಶೆರ್ಮಾಂವ್ ಭುರ್ಗ್ಯಾಂಕ್ ಚೀತ್ ದೀವ್ನ್ ಆಯ್ಕೊಂಕ್ ಕರ್ತಾತ್ ಆನಿ ವಿಶೇಸ್ ಜಾವ್ನ್ ಹರ್ ಭುರ್ಗ್ಯಾಂಕ್ ತೊ ಶೆರ್ಮಾಂವ್ ದಿತಾನಾ ಮೆತೆರ್ ಕರ್ತಾ. ತಾಚ್ಯಾಕಿ ವರ್ತೆಂ ತಾಕಾ ಆಯ್ಕೊಂಕ್ ಕರ್ತಾ ತಾಣೆಂ ಸದಾಂ ಮಿಸಾರ್ ದಿಂವ್ಚ್ಯೊ ಲ್ಹಾನ್ ಲ್ಹಾನ್ ಶಿಕವ್ಣ್ಯೊ. ಕೇವಲ್ 2-3 ಮಿನುಟಾಂನಿ ಸಗ್ಳೆಂ ಆಟಾಪ್ಚ್ಯಾ ರಿತಿನ್ ತೊ ಶಿಕವ್ಣ್ ದಿತಾ ತೆಂ ಆಯ್ಕೊಂಕ್ ಆನಂದ್ ಭೊಗ್ತಾ ಆನಿ ಪರ್ತುನ್ ಪರ್ತುನ್ ಆಯ್ಕೊವ್ಯಾಂ ಮುಣೊನ್ ಭಗ್ತಾ. ಹಾವೆಂ ತಾಕಾ ಕೆದಾಳಾಯ್ ಮೊಗಾನ್ ಸಾಂಗ್ಚೆಂ ಬ್ರದರ್ ತುಮ್ಚೆ “ಚಿಕ್ಣಿ ಸೆರ್ಮಾಂವ್” ಆಯ್ಕೊಂಕ್ ಬೊರೆ ಲಾಗ್ತಾತ್ ಮುಣೊನ್. ತಾಕಾ ತೊ ತಿತ್ಲೊಚ್ ಖಾಲ್ತೆಪಣಿ ಜವಾಬ್ ದಿತಾ ಹೆಂ ಸರ್ವ್ ಮೊಜ್ಯಾ ವ್ಹಡಿಲಾಂಚೆಂ ಮಾಗ್ಣೆಂ ಆನಿ ದೆವಾನ್ ಮೊಜ್ಯಾ ವಯ್ರ್ ವೊತ್‍ಲ್ಲ್ಯಾ ಆಶಿರ್ವಾದಾಂಚೊ ಪರಿಣಾಮ್ ಮುಣೊನ್. ಕಿತೆಂಯ್ ಜಾಂವ್ , ಇತ್ಲೆಂ ಮಾತ್ರ್ ಹಾಂವ್ ಖಂಡಿತ್ ಸಾಂಗ್ತಾಂ ಸ್ಟೇಫನ್ ರೋಡ್ರಿಗಸಚ್ಯಾ ರುಪಿಂ ಆಮ್ಚ್ಯಾ ಉಡುಪಿ ದಿಯೆಸೆಜೆಕ್ ಎಕ್ ಬೊರೊ ಯಾಜಕ್ , ಏಕ್ ಆತ್ಯುತ್ತಮ್ ಪ್ರಸಂಗ್‍ಧಾರ್ ಮೆಳ್ತಾ ಮುಣ್ಚ್ಯಾಕ್ ಕಿತೆಂಚ್ ದುಭಾವ್ ನಾ.

ಯಾಜಕ್ ಹಾವೆಂ ಸಭಾರ್ ಪಳೆಯ್ಲ್ಯಾತ್. ಪುಣ್ ದಿಯಾಕೊನ್ ಸ್ಟೇಫನಾ ಥಂಯ್ ಎಕ್ ವಿಶೇಸ್ ಕಳಾ ಹಾಂವ್ ದೆಖ್ತೆಂ ಆಸಾಂ. ಮಾಲ್ಘಡ್ಯಾಂ ಥಂಯ್ ಲ್ಹಾನ್ ಜಾವ್ನ್ ತಾಣೆ ತಾಂಕಾಂ ದಾಕೊಂವ್ಚೊ ವಿಶೇಸ್ ಮೋಗ್. ತರ್ನಾಟ್ಯಾಂ ಥಂಯ್ ತಾಂಚೆ ಸಮಸ್ಯೆ ಸಮ್ಜೊನ್ ತಾಂಕಾಂ ಸಮ್ಜೊಂವ್ಚೆಂ , ತಾಂಚ್ಯಾ ಸಂಗಿಂ ಏಕ್ ಜಾವ್ನ್ ತಾಂಚೆಂ ಮನೋಬಲ್ ವಾಡೊಂವ್ಚೆಂ ತಶೆಂಚ್ ಲ್ಹಾನ್ ಭುರ್ಗ್ಯಾಂ ಸಂಗಿಂ ಲ್ಹಾನ್ ಭುರ್ಗ್ಯಾ ಬರಿ ಭರ್ಸೊಂಚೆ ತಾಚೆ ವಿಶಿಷ್ಟ್ ಗೂಣ್ ತಾಕಾ ಏಕ್ ಸಂಪೂರ್ಣ್ ಯಾಜಕ್ ಕರುಂಕ್ ಸಕ್ತಾತ್ ಆನಿ ಆಶೆಂ ಆಮ್ಚ್ಯಾ ಉಡುಪಿ ದಿಯೆಸೆಜೆಕ್ ಎಕ್ ಉಂಚ್ಲೊ ಯಾಜಕ್ ಆನಿ ನ್ಯಾಯ್‍ಭರಿತ್ ಆಡಳ್ತೆಧಾರ್ ಫಾವೊ ಜಾತೊಲೊ ಮುಣ್ಚ್ಯಾಕ್ ದೋನ್ ಉತ್ರಾಂ ನಾಂತ್.

ಯಾಜಕೀ ದೀಕ್ಷಾ ಜೊಡುಂಕ್ ಆಯ್ತೊ ಜಾಲ್ಲ್ಯಾ ದಿಯಾಕೋನ್ ಸ್ಟೇಫಾನ್ ರೊಡ್ರಿಗಸ್ ಹಾಕಾ ಹಾಂವ್ ಸರ್ವ್ ಬೊರೆಂ ಮಾಗ್ತಾಂ. ತಾಣೆ ಕಿತೆಂ ಸರ್ವ್ ಆಶೆಲಾಂ ತೆಂ ಸರ್ವ್ ತಾಕಾ ಫಾವೊ ಜಾಂವ್ದಿ ತಾಣೆ ಕಿತೆಂ ಸರ್ವ್ ಚಿಂತ್ಲಾಂ ತೆಂ ಸರ್ವ್ ಸತ್ ಜಾಂವ್ದಿ ಮುಣೊನ್ ಆಶೇವ್ನ್ ತಾಕಾ ಉಲ್ಲಾಸುನ್ ಬೊರೆಂ ಮಾಗ್ತಾಂ.

■ ನಾನು ಮರೋಲ್ ತೊಟ್ಟಾಮ್