ಸುಮಾರ್ ಶೆಂಬರ್ ವರ್ಸಾಂ ಆದ್ಲೆಂ ಮಂಗ್ಳುರಿ ಕ್ರೀಸ್ತಾಂವಾಂಚೆಂ ಫಾಮಾದ್ ‘ಪಿರೇರಾಮಾಚೆಂ ಹೊಟೆಲ್’ ಜುಲಾಯ್ 27 ವೆರ್ ಸನ್ವಾರಾ ಬಂದ್ ಜಾಲೆಂ ಮ್ಹಣ್ ಆಯ್ಕಾತಾನಾ ಇನಾಸಾಮಾಚ್ಯಾ ಹೊಟ್ಲಾ ಸಾಂಗಾತಾ ಜೊಡ್ಲೆಲೆ ಮ್ಹಜ್ಯಾ ವಿದ್ಯಾರ್ಥಿಪಣಾಚೆ ಆನಿ ಉಪ್ರಾಂತ್ಲೆಂ ಉಡಾಸ್ ಜಿವೆ ಜಾಲೆ.
ಸಾಮಾನ್ಯ್ ತಶೆಂ ಮಧ್ಯಮ್ ವರ್ಗಾಂಚಾಂ ಲೊಕಾಕ್ ಉಂಚ್ಲೆಂ ಜೆವಾಣ್ ಸಾಮಾನ್ಯ್ ದರಿರ್ ಮೆಳ್ಚ್ಯಾ ಇನಾಸಾಮಾಚ್ಯಾ ಹೊಟೆಲಾಚೆಂ ಶೆಟ್ಟರ್ ವೊಡ್ಲೆಂಲೆಂ ತೆಂ ದೃಶ್ಯ್, ಮತಿಪಟಲಾರ್ ಪಾಶಾರ್ ಜಾತಾನಾ, ಏಕ್ ಘಡಿ ಹಾಂವ್ ನಿರಾಶಿಯೀ ಜಾಲೊಂ.
ಮಂಗ್ಳುರಿ … ಕ್ರೀಸ್ತಾಂವಾಚ್ಯಾ ಹಾತಿಂ ಆಸ್ಲೆಲೆ ನಳ್ಯಾ ಕಾರ್ಖಾಂನೆ, ಕ್ಲೋತ್ ಸ್ಟೊರಾಂ, ಹೊಟೆಲಾಂ, ಜಿನ್ಸಾಚಿ ಬೊನ್ಸಾಳಾಂ … ಅಶೆಂ ಚಡಾವತ್ ದುಖಾನಾಂ … ಉದ್ಯಮಾಂ ಬಂದ್ ಜಾತೇ ಗೆಲಿಂ. ಆನಿ ಅಶೆಂ ಉದೆಂತಿಚೆಂ ರೋಮ್ ಮ್ಹಣ್ ಮಂಗ್ಳುರ್ ಶೆಹರಾಕ್ ವೊಲಾಯಿಲ್ಲೆಂಯ್ ತೆಂ ಸಗ್ಳ್ಯಾಂಕ್ ವಿಸ್ರೊನ್ ವೆತೇ ಆಸಾ.
ಪ್ರತುತ್ ಮಾದ್ಯಮಾಂನಿ ಪ್ರಸಾರ್ ಜಾಲ್ಲಿ ಹಿ ಇನಾಸ್ ಪಿರೇರಿಚೆಂ ಹೊಟೆಲ್ ಬಂದ್ ಜಾಲ್ಲಿ ಖಬರ್, ಶೆಹರಾಚ್ಯಾ ತಶೆಂ ಹಳ್ಳೆ ಹಳ್ಳೆಂಚ್ಯಾ ಘರಾಂನಿಂ ಆದ್ಲೊ ಉಡಾಸ್ ಕಾಡ್ನ್ ಉಲಂವ್ಚಿ ಪ್ರಾಮುಖ್ ಖಬರ್ ಜಾಲ್ಯಾ.
ಇನಾಸಾಮ್ 1975 ಇಸ್ವೆಂತ್ ಅಂತರ್ಲೊ ತರೀ ತೊ ಸರ್ಲ್ಯಾ ಉಪ್ರಾಂತ್ , ಥೊಡೊ ತೇಂಪ್ ತ್ಯಾ ಇನಾಸಾಮಾಚ್ಯಾ ನಮುನ್ಯಾಚೆಂಚ್ಚ್ ಜೆವಾಣ್ ಆಸ್‌ಲ್ಲೆಂ. ಮ್ಹಜ್ಯಾ ಅಬಿಪ್ರಾಯೆ ಪರ್ಮಾಣೆಂ…ಇನಾಸಾಮಾಚ್ಯಾ ಶೈಲಿಚೆಂ ಘರ್ಚ್ಯಾ ರುಚಿಚೆಂ ರಾಂದ್ಪಾ ಜೆವ್ಣಾ ರೀತ್ ಬದ್ಲುನ್ ಮೋಡರ್ನ್ ಶೈಲಿಚೆಂ ನವೀನ್ ರಿತಿಚೆಂ ಜೆವ್ಣಾರೀತ್ ಕೆಲ್ಲಿಚ್ಚ್ ಹೆಂ ಇನಾಸಾಮಾಚೆಂ ಹೊಟೆಲ್ ಬಂದ್ ಜಾಂವ್ಕ್ ಏಕ್ ಕಾರಣ್ ಆಸ್ಯೆತಾ.
ಮ್ಹಜ್ಯಾ ಘರಾ ಲಾಗ್ಸಾರ್ ಏಕ್ ಹಿಂದು ಹೊಟೆಲ್ ಅಸಲೆಂ ಘರ್ಚೆಂ ರುಚಿಚೆಂ ಸಾಮಾನ್ಯ್ ವರ್ಗಾಚ್ಯಾಂಕ್ ಲಗ್ತಿ ಜಾಲ್ಲೆಂ ಫಮಾದ್ ಜಾಲ್ಲೆಂ ಬರ‍್ಯಾ ಮುನಾಫೆಚೆರ್ ಚಲ್ತೇ ಆಸ್ಲೆಂ. ತಾಂಚೊ ಎಕ್ಲೊ ಪೂತ್ ಪರ್ಗಾಂವಾ ಥಾವ್ನ್ ಆಯ್ಲೊಲೊ … ತೆಂ ಹೊಟೇಲ್ ನವೀನ್ ಶೈಲೆಕ್ ಬದ್ಲುನ್ ಆದ್ಲಿ ಶೈಲಿ ಬಂದ್ ಕೆಲಿ. ಸಾಮಾನ್ಯ್ ವರ್ಗಾಂಚ್ಯಾಂಕ್ ಪುರೊ ಪಡಾನಾತ್ಲೆಂ ಹೆಂ ನವೀನ್ ಶೈಲಿಚೆಂ ಹೊಟೆಲ್ ಥೊಡ್ಯಾಚ್ಚ್ ತೆಂಪಾನ್ ಬಂದ್ ಜಾಲೆಂ.
ಸಾಂಗ್ಚೆಂ ತರ್ ಮಂಗ್ಳುಂರಾಂತ್ … ಘರ್ಚ್ಯಾ ರುಚಿಚೆಂ ನಾರಾಯಣ್ ಹೊಟೆಲ್, ವಣಸ್, ಮಚ್ಲಿ, ಗಿರಿಮಂಜಾಸ್, ಶೆಟ್ಟಿ ಲಂಚ್ ಹೋಮ್ ಅಸಲಿಂ ಸಬಾರ್ ಹೊಟೆಲಾಂ ಭರ್ಲೆಲ್ಯಾ ಗಿರಾಯ್ಕೆನಿಂ ಉಂಚ್ಲ್ಯಾ ಮುನಾಫೆರ್ ಚಲಾತ್ತ್ ಆಸಾತ್. ಆನಿ ಆಮ್ಚ್ಯಾ ಶಂಬರ್ ವರ್ಸಾಂ ಪ್ರಾಯ್ ಭರ್ಲೆಲ್ಯಾ ಇನಾಸಾಮಾಚ್ಯಾ ಹೊಟೆಲಾಚೆಂ ದಾರ್, ಜುಲಾಯ್ 27 ವ್ಯಾ ಸನ್ವಾರಾ ದಿಸಾ ನಿಮಾಣೆಂ ಪೋರ್ಕ್ ಪೆಪ್ಪರ್ ರಾಂದ್ಪಾ ಜೆವಾಣ್ ಕರುನ್, ಬಂದ್ ಜಾಲೆಂ!
ಹಂಪನ್‌ಕಟ್ಟೆಚ್ಯಾ ಗವರ್ನ್‌ಮೆಂಟ್ ಕೊಲೆಜೆ ಮುಕ್ಲ್ಯಾ ಇನಾಸಾಮಾಚ್ಯಾ ಹೊಟೆಲಾಕ್, ಶೆಹರಾಂತ್ಲೆ ತಶೆಂ ಶೆಹರಾ ಭಾಯ್ಲೊ ಲೋಕ್, ಸರ್ಕಾರಿ ಕಾಮಾಂಕ್, ಶೋಪಿಂಗಾಕ್, ಹಾಸ್ಪಿಟಲಾಂಕ್, ಡೊಕ್ಟರಾಲಾಗಿಂ, ಅಶೆಂ ವಿವಿಧ್ ತಾಂಚ್ಯಾ ಖಾಸ್ಗಿ ಕಾಮಾ ಖಾತಿರ್, ಮಂಗ್ಳುರ್ ಹಂಪನ್‌ಕಟ್ಟ್ಯಾಕ್ ಆಯ್ಲೆಲ್ಯಾ ವೆಳಾ, ದೊನ್ಪರಾಂ ಯಾ ಸಾಂಜೆಚ್ಯಾ ಜೆವ್ಣಾಕ್, ಇನಾಸಾಮಾಚ್ಯಾ ಹೊಟೆಲಾಕ್‌ಚ್ಚ್ ವೆತಾಲೆ.
ಥಂಯ್ಚೆಂ ದುಕ್ರಾಮಾಸ್, ಬೀಫ್, ತಶೆಂ ಮಾಸ್ಳೆಕಡಿ ಬೋವ್ ರುಚಿಚ್ಯಾ ಘರ್ಚ್ಯಾ ರಾಂದ್ಪಾ ಶೈಲೆರ್ ಆಸೊನ್, ಉಣ್ಯಾದರಿರ್ ಆಸ್ಲೆಲ್ಲ್ಯಾನ್, ಜಾತ್ ಕಾತ್ ಮ್ಹಣ್ ಲೆಕಿನಾಸ್ತಾಂ ಥಂಯ್ಚ್ ಜೆವ್ಣಾಕ್ ಯೆತಾಲೆ. ಆನಿ ತಸಲ್ಯಾ ಸಂಗ್ತೆಕ್‌ಚ್ ತೆಂ ಬೋವ್ ಫಾಮಾದ್.
ಶೆಹರಾಚ್ಯಾ ಹಾಸ್ಪಿಟಲಾಂನಿಂ ದಾಖಲ್ ಜಾಲ್ಲೆ … ಪ್ರತ್ಯೇಕ್ ಜಾವ್ನ್ ವೆನ್‌ಲೋಕ್ ಹಾಸ್ಪಿಟಲಾಚೆ ಸಬಾರ್ ಜಣ್, ಹಾಂಗಾಚೆಂಚ್ಚ್ ಜೆವಾಣ್ ವ್ಹರ್ತಾಲೆ. ಮ್ಹಜ್ಯಾ ಕುಟ್ಮಾಚೊ ಎಕ್ಲೊ ವೆನ್ಲೋಕಾಂತ್ ಎಡ್ಮಿಟ್ ಜಾಲ್ಲ್ಯಾವೆಳಾ, ತಾಕಾ ಹಾಂವೆಂ ಇನಾಸಾಮಾಚ್ಯಾ ಹೊಟೆಲಾಂತ್ಲ್ಯಾ ಜೆವ್ಣಾಚಿ ವೆವಸ್ಥಾಚ್ಚ್ ಕೆಲ್ಲಿ. ಹಾಂವ್‌ಯೀ ಮ್ಹಜ್ಯಾ ಕುಟ್ಮಾಂತ್ಲಿಂ ಹಾಸ್ಪಿಟಲಾಂನಿಂ, ಕಂಕ್ನಾಡಿ ಹಾಸ್ಪಿಟಲಾಂತ್ ದಾಖಲ್ ಜಾಲ್ಲೆ ವೆಳಾರ್‌ಯೀ, ಪಿರೆರಾಮಾಚ್ಯಾ ಹೊಟೆಲಾಂತ್ಲೆಂ ಜೆವಾಣ್‌ಚ್ಚ್ ಹಾಡಯ್ತಾಲೊಂ.
ಆತಾಂ ಐಡಿಯಲ್, ಪಬ್ಬಾಸ್ ಐಸ್‌ಕ್ರೀಮ್ ಜಾಗೆ ಕಶೆಂ ಫಾಮಾದ್‌ಗೀ ತಶೆಂ ಇನಾಸಾಮಾಚೆ ಜೆವ್ಣಾ ಹೊಟೆಲ್ ಬೋವ್ ಫಾಮಾದ್ ಆಸ್ಲೆಂ. ದುಬ್ಳ್ಯಾಂ ಥಾವ್ನ್ ಗ್ರೇಸ್ತಾಂ ಪರ್ಯಾಂತ್ ಎಕಾಚ್ಚ್ ನಮುನ್ಯಾಚೆಂ, ಬೋವ್ ರುಚಿಚೆಂ ಮೆಳ್ಚ್ಯಾ ಜೆವ್ಣಾಕ್ ತೆ ಥಂಯ್ಸರ್ ಯೆತಾಲೆ. ಭಾಯ್ಲ್ಯಾ ಗಾಂವಾ ಥಾವ್ನ್, ಕೆನಾಡಾ, ದುಬಾಯ್ ಮಸ್ಕತ್ ಅಬುದಾಬಿ ಅಸಲ್ಯಾ ಸರ್ವ್ ಗಾಂವಾ ಥಾವ್ನ್ ರಜೆರ್ ಆಯ್ಲೆಲೆ ಸಬಾರ್ ಜಣ್ ಥಂಯ್ಸರ್ ಏಕ್ ಪಾವ್ಟಿಂ ಜೆವ್ಣಾಕ್ ವಚಾನಾಸ್ತಾಂ ಪಾಟಿಂ ವೊಚಾ ನಾತ್‌ಲ್ಲೆ.
1967-68 ಇಸ್ವೆಂತ್ ಹಾಂವ್ ಐ.ಟಿ.ಐ ಶಿಕ್ತಾಸ್ತಾಂ ಹಾಂವ್ ಥಂಯ್ಸರ್ ವೆತಾಲೊಂ. ಪ್ರಸ್ಥುತ್ ಪಿರೇರಾ ಹೊಟೆಲ್ ಮ್ಹಣ್ ನಾವಾಡ್ದಿಕ್ ಆಸ್ಚ್ಯಾ ಹೊಟೆಲಾಕ್, ತವಳ್ ಹಾಂವ್ ಮೇಟ್ ದವರ್ತಾಸ್ತಾನಾಂ, ತೆಂ ಇನಾಸಾಮಾಚೆಂ ಹೊಟೆಲ್ ಜಾವ್ನ್ ಆಸ್‌ಲ್ಲೆಂ.
ತವಳ್ ಸಾಂಜೆರ್ ಕ್ಲಾಸ್ ಜಾವುನ್ ಜಾವ್ನ್ ಹಪ್ತ್ಯಾಕ್ ದೋನ್ ತೀನ್ ಪಾವ್ಟಿಂ, ಹಾಂವ್ ಆನಿ ಮ್ಹಜೊ ಮಿತ್ರ್ ರಾಜಾ, ಥಂಯ್ಸರ್ ಹುನ್-ಹುನ್ ಬೀಫ್ ಕಡಿ ಆನಿ ಬ್ರೆಡ್ಡ್ ಖಾಂವ್ಕ್ ವೆತಾಲ್ಯಾಂವ್. ತವಳ್ ತಿತ್ಲ್ಯಾಕ್ ಫಕತ್ತ್ ಪಂಚ್ವೀಸ್ ಪೈಸೆ.
1921 ಇಸ್ವೆಂತ್ ಮಿಲಾಗ್ರಿಸ್ ಇಗರ್ಜೆ ಮುಕಾರ್ ಆಪ್ಲೆಂ ಹೊಟೆಲ್ ಆರಂಭ್ ಕೆಲ್ಲೊ ಇನಾಸ್ ಪಿರೇರ್, ನಂತರ್ ಗವರ್ನ್‌ಮೆಂಟ್ ಕೊಲೆಜೆ ಮುಕಾರ್ 1966 ಇಸ್ವೆಂತ್ ಶಿಫ್ಟ್ ಕೆಲ್ಲೆಲ್ಲ್ಯಾ ವೆಳಾ, ಆಮಿ ತ್ಯಾ ಹೊಟೆಲಾಕ್ ವೆತೆಲ್ಯಾಂವ್.
ತವಳ್ ಥಂಯ್ಸರ್ ಫಕತ್ ಪಾಚ್ವಿ ಲುಂಗಿ ಆನಿ ಬನಿಯನ್ ಘಾಲ್ಲೊ ಸಾದೊ ಇನಾಸಾಮ್ ಥಂಯ್ಸರ್ ತೆಣೆಂ ಹೆಣೆಂ ಭಂವಾತ್ತ್ ಹೊಟೆಲಾಚಿ ಉಸ್ತುವಾರಿ ಸೂಕ್ಶ್ಮಾಯೆನ್ ಪಳೆತ್ತ್ ಆಸ್ತಾಲೊ. ಹ್ಯಾವೆಳಾ ತಾಚೆಂ ಕುಟಾಮ್‌ಚ್ಚ್ ಥಂಯ್ಸರ್ ಹೊಟೆಲ್ ಉದ್ಯಾಮಾಂತ್ ವೆವೆಗ್ಳೆ ಜವಾಬ್ದಾರಿ ಘೆವ್ನ್ ಆಸ್‌ಲ್ಲೆ.
ಇನಾಸಾಮಾಚೊ ಪೂತ್ ವಿಲಿಯಮ್ ಕ್ಯಾಶಿಯರ್. ಡೆನಿಸ್ ಮೆನೆಜ್ಮೆಂಟ್, ಇನಾಸಾಮ್ ಮೆನೇಜಿಂಗ್ ಆನಿ ಸುಪರ್ವೈಸಿಂಗ್. ಆನಿ ಆಲ್ಪೊನ್ಸ್ ಆನಿ ಎಡ್ವರ್ಡ್ ಕುಜ್ನಾಂತ್ ಹಾರ್-ಭರ್ ಪಳೆತ್ತ್ ಆಸ್‌ಲ್ಲೆ. ( ಹಾಂಚೆ ಪೈಕಿ ಆಲ್ಫೋನ್ಸಾಚೊ(ಆಲ್ಪಿ) ಪೂತ್ ನೈಜಿಲ್ ಆತಾಂ ಆಪ್ಲೆಂ ಹಿಲ್ಟನ್ ಕೇಟ್ರಿಂಗ್ ವೆವಹಾರ್ ಚಲೈತ್ತ್ ಆಸಾ. ನೀಜ್ ಜಾವ್ನ್ ತೊ ತಾಚೊ ಆಜೊ ಇನಾಸಾಮಾಚೆಂ ಆದರ್ಶ್ ಕಾಣ್ಘೆವ್ನ್ ಸುಮಾರ್ 75 ಗರ್ಜೆವಂತ್ ಕುಟ್ಮಾಂಕ್ (ಚಡಾವತ್ ಪ್ರಾಯೆವಂತಾಕ್) ಸದಾಂ ಜೆವಾಣ್ ಘರಾಬಾಗ್ಲಾರ್ ಪಾವೊಂವ್ಚಿ ಸೆವಾ ದೀವ್ನ್ ಆಸಾ )
ಮ್ಹಜೆಂ ಐ.ಟಿ ಐ. ಶಿಕಾಪ್ ಸಂಪ್ಲೆಲೆ ನಂತರ್, ಎಪ್ರೆಂಟಿಸ್ ಶಿಕ್ಪಾರ್ ಪ್ರ್ಯಾಕ್ಟಿಕಲ್ ಶಿಕಾಪ್ ಮುಂದರುನ್ ಆಸ್ತಾಂ, ದನ್ಪರಾಂ ಜೆವ್ಣಾಕ್ ಹಾಂವ್ ಆನಿ ಮ್ಹಜೊ ಈಶ್ಟ್ ರಾಜಾ ಇನಾಸಾಮಾಚ್ಯಾ ಹೊಟೆಲಾಕ್‌ಚ್ಚ್ ಜೆವ್ಣಾಕ್ ವೆತೆಲ್ಯಾಂವ್.
ಘರ್ಚ್ಯ್ಯಾ ರುಚಿಚಿ ಮಾಸ್ಳೆ ಕಡಿ ಆನಿ ಶಿತಾಕ್ ಮ್ಹಣುನ್‌ಚ್ ಥೆಂಯ್ಸರ್ ಲೋಕ್ ಭರ್ತೊಲೊ ತರೀ, ಆಮಿ ಮಾತ್ರ್ ಕೆನ್ನಾಂಯೀ ಬೀಫ್ ಜೆವಾಣ್ ಆನಿ ಭೀಫ್ ಸುಕ್ಕಾ ಕಾಣ್ಘೆತೆಲ್ಯಾಂವ್.
ಹುನ್-ಹುನ್ ಜೆವ್ಣಾ ನಂತರ್, ಹುನ್ ನೀಸ್ ಪಿಯೆಂವ್ಚೆಂ ತೆಂ, ಥಂಯ್ಸರ್ಚಿ ಆನ್ಯೇಕ್‌ಚ್ಚ್ ಸ್ಪೆಶ್ಯಾಲಿಟಿ! ಜೆವ್‌ಲ್ಲೆಂಚ್ಚ್ ಲೋಕ್ ನಿಸಾ ಖಾತಿರ್ ಥಂಯ್ಚ್ಯಾ ಕುಂದ್ಯಾ ಮುಳಾಂತ್ ಜಮೊ ಜಾತೆಲೆ. ಮ್ಹಳ್ಯಾರ್ ಜೆವ್ಣಾ ಮೆಜಾ ಮುಕ್ಲ್ಯಾ ಬಾಂಕಾಂನಿಂ ಲಾಗಿಂ–ಲಾಗಿಂ ಜೇಂವ್ಕ್ ಬಸ್ಚಿ ವೆವಸ್ಥಾ ಆಸ್ಲೆಲ್ಯಾನ್, ಮೆಜಾರ್ ನೀಸ್ ‘ಸರ್ವ್’ ಕರಿನಾತ್-ಲ್ಲೆ. ಬಗಾರ್ ಥಂಯ್ಚ್ಯಾ ಕುಂದ್ಯಾ ಮುಳಾಂತ್ಲ್ಯಾ ಮೆಜಾರ್ ವ್ಹಡ್ಯಾ ಗ್ಲಾಸಾಂನಿಂ, ಟ್ರೇಯಾಂನಿಂ ನೀಸ್ ದವರುನ್, ಎಕಾಪಾಟ್ ಎಕ್ಲೊ ನೀಸ್ ಹಾಡ್ನ್ ದವರ್ತೇ ಆಸ್‌ಲ್ಲೆ.
ಆನಿ ಹಾಕಾ ಆಂಗಾರ್ ಪಡುನ್ ಮ್ಹಳ್ಳೆಪರಿಂ ಲೋಕ್ ಗ್ಲಾಸ್ ಘೆವ್ನ್ ದೆಗೆನ್ ಉಬೊ ರಾವುನ್ ನೀಸ್ ಪಿಯೆತಾಲೊ. ಆನಿ ಇನಾಸಾಮ್ ಪಯ್ಸ್ ರಾವುನ್, ಜೆವ್ಣಾಚ್ಯಾ ಸಪ್ಲೈಚೆರ್ ಸೂಕ್ಶ್ಮ್ ಗಮನ್ ದವರ್ನ್ ಆಸ್ಲೆಲೆಪರಿಂ, ನೀಸ್ ಹಾಡ್ನ್ ದವರ್ತಾಲೆಚ್ಯಾರ್‌ಯೀ ತೊ ದೊಳೊ ದವರ್ನ್ ಆಸ್ತಾಲೊ!
ವಿಶೇಶ್ ಕಿತೆಂ ಮ್ಹಳ್ಯಾರ್ ಇನಾಸಾಮಾಕ್ ಪೈಶೆ ಯಾ ಬಿಲ್ ಪೇ ಕರ್ತೆಲೆಂಚ್ಯಾರ್ ಗಮನ್ ನಾತ್‌ಲ್ಲೆಂ. ಬಗಾರ್ ಆಪ್ಲ್ಯಾ ಗಿರಾಯ್ಕೆಂಕ್ ಸಾರ್ಕಿ ತೃಪ್ತಿ ಜಾಲೆಂಗೀ ಮ್ಹಳ್ಳೆಂ ತಾಕಾ ಮುಖ್ಯ್ ಜಾವ್ನ್ ಆಸ್‌ಲ್ಲೆಂ. ( ಇನಾಸಾಮ್ ವ್ಹೆವಾರಾ ಸಾಂಗಾತಾ ದುಬ್ಳ್ಯಾಂಕ್ ಕುಮಕ್ ಕರ್ಚೊ ಗೂಣ್ ಆಸ್ಲೊ) ಅಸಲಿಂ ಘಡಿತಾಂ ಫಕತ್ ಇನಾಸಾಮಾಚ್ಯಾ ಹೊಟೆಲಾಂತ್ ಮಾತ್ರ್ ತವಳ್ ಪಳೆಂವ್ಕ್ ಮೆಳ್ತೆಲಿಂ!
ತ್ಯಾ ಮಧೆಂ ಮ್ಹಜ್ಯಾ ಕಾಳ್ಜಾಕ್ ನಾಟ್ವಾಲ್ಲಿ ಏಕ್ ವಿಶಿಶ್ಟ್ ಗಜಾಲ್ ಮ್ಹಳ್ಯಾರ್, ಕರೆಜ್ಮಾಂತ್ ಏಕ್ ದೀಸ್ ದನ್ಪರಾಂ ಹರ್ಶೆಂಪರಿಂ ಹಾಂವ್ ಜೆವ್ಣಾಕ್ ಬಸ್ಲೆಲ್ಯಾ ವೆಳಾರ್ ಇನಾಸಾಮಾಚೊ ಪೂತ್ ಡೆನಿಸ್ ಮ್ಹಜ್ಯಾ ಸರ್ಶಿಂ ಆಯ್ಲೊ. ಆನಿ ಕಾನಾಲಾಗಿಂ… “ಅಳೆಬಾ ಆಜ್ ಕರೆಜ್ಮಾಂತ್ಲೊ ಸುಕ್ರಾರ್. ಮಾಸ್ ಕಾಣ್ಘೆನಾಕಾ.” ಮ್ಹಣ್ ಪುಸ್ಪುಸುಂಕ್ ಲಾಗ್ಲೊ. ಆನಿ ಮ್ಹಾಕಾ ಮಾಸ್ಳೆಚೆಂ ಸ್ಟೂ ಜೆವಾಣ್ ಹಾಡುಂಕ್ ಸಪ್ಲಾಯರಾಲಾಗಿಂ ಸಾಂಗಿಲಾಗ್ಲೊ. ಇನಾಸಾಮಾಕ್ ವೆವ್ಹಾರಾ ಸಂಗಿ ಆತ್ಮೀಕ್ ಜಾಗ್ವಣಿ ದಿಂವ್ಚಿ ಕಾಲೆತ್ ತಶೆಂ ದೆವಾಸ್ಪಣ್‌ಯೀ ಆಸ್ಲೆಂ ಮ್ಹಣ್ಚ್ಯಾಕ್ ಹಿ ಗಜಾಲ್ ಸಾಕ್ಸ್!
ತ್ಯಾನಂತರ್ ಥೊಡಿಂ ವರ್ಸಾಂ ಮ್ಹಜ್ಯಾ ಉದ್ಯಮ್ ವೆವಹಾರಾನಿಮ್ತಿಂ ಮ್ಹಜ್ಯಾ ಆನಿ ಪಿರೇರಾ ಹೊಟೆಲಾಚ್ಯಾ ಸಂಬಂದಾಕ್ ಥೊಡ್ಯಾ ತೆಂಪಾಚೊ ವಿರಾಮ್ ಪಡ್ಲೊ.
ನಂತರ್ 2004 ಇಸ್ವೆಂತ್ ಜಾಲ್ಲ್ಯಾ ಮ್ಹಜ್ಯಾ ಮಾಲ್ಘಾಡ್ಯಾ ಧುವೆಚ್ಯಾ ಕಾಜಾರಾಕ್, ಇನಾಸಾಮಾಚೊ ನಾತು ಒಲಿವರ್ ಪಿರೇರಾಚ್ಯಾ ಮುಕೇಲ್ಪಣಾರ್ ಚಲವ್ನ್ ಆಸ್ಲೆಲ್ಯಾ ಪಿರೇರಾ ಕ್ಯಾಟಾರಿಂಗಾ ಥಾವ್ನ್ ಜೆವ್ಣಾಚಿ ವೆವೆಸ್ಥಾ ಕೆಲ್ಲಿ. ರುಚಿಕ್ ಆನಿ ಉಂಚ್ಲ್ಯಾ ಮಟ್ಟಾಚಿ ವಿವಿಧ್ ನಮುನ್ಯಾಂಚ್ಯಾ ಮಾಸಾಚ್ಯಾ ಜೆವ್ಣಾ ರಿತಿಂನಿಂ ವೆವಸ್ಥಾ ಜಾಲ್ಲಿ.
ಮ್ಹಜ್ಯಾ ಧುವೆಚ್ಯಾ ಕಾಜಾರಾಕ್ ಪಿರೇರಾ ಕೆಟರಿಂಗ್ – 2004
ಹೆಂ ಪಳೆವ್ನ್ ಹೆರ್ ಸಬಾರಾಂಚಿ ಆಮ್ಕಾಂ ಫೊನಾಂ ಆಯಿಲ್ಲಿಂ. ಆನಿ ಥೊಡ್ಯಾಂನಿಂ ತಾಂಕಾ ತಾಂಚ್ಯಾ ಕಾಜಾರಾಚೆಂ ಜೆವ್ಣಾ ಒರ್ಡರ್ ದೀಂವ್ಕ್ ಪಳಯ್ಲೆಂ. ಪೂಣ್ ದುರದೃವಶಾತ್ ತಾಣಿಂ ಆಮ್ಚೆಂ ಕೆಲ್ಲೆಂ ಕಾಜಾರಾಚೆಂ ಕೇಟರಿಂಗ್‌ಚ್ಚ್ ನಿಮಾಣೆಂ ಮ್ಹಣ್ ತಾಂಕಾ ತಿಳ್ಸಿಲ್ಲೆಂ! ಹ್ಯಾವೆಳಾಚ್ಚ್ ಮ್ಹಾಕಾ ತಾಂಚ್ಯಾ ಹೊಟೆಲ್ ವೆವಹಾರ್ ಮುಂದರುನ್ ವೆಚ್ಯಾವಿಶಿಂ ದುಬಾವ್ ಉದೆಲ್ಲೊ.!
ಪೂಣ್ ದೆವಾದಾಯೆನ್ ಲಗ್ಭಗ್ ವೀಸ್ ವೊರ್ಸಾಂ ನಂತರ್ ಆತಾಂ ತ್ಯಾ ಹೊಟೆಲಾಚೆಂ ದಾರ್ ಧಾಂಪ್ಲೆ! ಮ್ಹಾಕಾ ಮಾತ್ ನಯ್ ಸಬಾರಾಂಕ್ ಹಿ ದುಕಿಚಿ ಗಜಾಲ್. ಆತಾಂಯ್ ಆಮ್ಚೆ ಮಾಗ್ಣೆಂ ಜಾವ್ನ್ ಆಸಾಕೀ, ಪರತ್ ಹೆಂ ಇನಾಸಾಮಾಚೆಂ, ‘ಪಿರೇರಾ ಹೊಟೆಲ್’ ಚಾಲು ಜಾಂವ್ ಮ್ಹಳ್ಳೆಂ!
■ ರೋನ್ ರೋಚ್ ಕಾಸ್ಸಿಯಾ
3 comments