ಕೊಂಕಣ್ ಕರಾವಳೆರ್ ಕ್ರೀಸ್ತಾಂವ್ ಕುಟ್ಮಾಂಚ್ಯಾ ಕಾಳ್ಜಾ ದಾಲಿಯೆಂತ್ ಫುಲ್ಚೆಂ, ಫೆಸ್ತ್ ಮ್ಹಳ್ಯಾರ್ ಮೊಂತಿ ಫೆಸ್ತ್. ಮರ್ಯೆಕ್ ಫುಲಾಂ ಅರ್ಪುನ್ ಹೊಗಳ್ಸೊನ್…ಭಾತಾ ಕಣ್ಶೆಂ ಸವೆಂ ರಾಂದ್ವಯ್ ಜೆವ್ಣಾನ್ ಕುಟ್ಮಾ ಎಕ್ವೊಟಾಂತ್, ಆಚರ್ಸುಂಚೆಂ ಫೆಸ್ತ್ ; ಮರಿಯೆಚ್ಯಾ ಜಲ್ಮಾಚೆಂ ಮೊಂತಿ ಫೆಸ್ತ್.
ಹೆಂ ಫೆಸ್ತ್…ಗಾದ್ಯಾಂತ್ ಭಾತ್ ಪಿಕೊನ್ ಕುಮೆರಾಂನಿಂ ರಾಂದ್ವಯ್ ಫುಲ್ತಾನಾಂ ಫುಲ್ತಾ. ಹ್ಯಾ ಮೊಂತಿ ಫೆಸ್ತಾ ದಿಸಾ…ಕುಟ್ಮಾಚಾ ಸರ್ವ್ ಸಾಂದ್ಯಾಂನಿಂ ಏಕ್ ಕುಟಾಮ್ ಜಾವ್ನ್ ಎಕ್ವೊಟೊನ್, ಎಕಾ ಮನಾನ್ ಸಾಂಗಾತಾ ರಾಂದ್ಚೆಂ, ಆನಿ ದೆವಾನ್ ದಿಲ್ಲ್ಯಾ ಬೆಳ್ಯಾ ಖಾತಿರ್ ದೆವಾಕ್ ಹರ್ಸುನ್ ಅರ್ಗಾಂ ದಿಂವ್ಚೆಂ ಆನಿಂ ನವೆಂ ಜೆಂವ್ಚೆಂ ಜಾವ್ನಾಸಾ ಹ್ಯಾ ಫೆಸ್ತಾಚಿ ವಿಶೇಶತಾ.
ಸಾಂಗಾತಾ ಪರ್ಗಾವಾಂತ್ ಆಸ್ಲೆಲ್ಯಾ ಕುಟ್ಮಾ ಸಾಂದ್ಯಾಂ ಖಾತಿರ್ ಆನಿ ಕುಟ್ಮಾಂತ್ ದೆವಾಧೀನ್ ಜಾಲ್ಲೆಲ್ಯಾ ಸಾಂದ್ಯಾಂಚೊ ಉಗ್ಡಾಸ್ ಕಾಡುನ್ ತಾಂಚೆ ಖಾತಿರ್ ಮಾಗುನ್ ಆಚರ್ಸುಂಚೆಂ ಏಕ್ ಆಪುರ್ಬಾಯೆಚೆಂ ಫೆಸ್ತ್ ಹೆಂ ಜಾವ್ನಾಸಾ.
ಕುಟ್ಮಾನ್ ಜಿಣಿಭರ್ ಸಾಂಗಾತಾ ಮಾಗುಂಕ್, ಸಾಂಗಾತಾ ಜೇಂವ್ಕ್ , ತಶೆಂ ಎಕ್ವೊಟ್ ಸಹಕಾರಾನ್ ಮೊಗಾಮಯ್ಪಾಸಾಚ್ಯಾ ಎಕಾ ಮನಾನ್ ಜಿಯೆಂವ್ಕ್ ಪ್ರೇರಣ್ ದಿತಾ – ಮರಿಯೆಚೆಂ ಜಲ್ಮಾಚೆಂ ಹೆಂ ಮೊಂತಿ ಫೆಸ್ತ್. ಹೆಂ ಕುಟ್ಮಾ ಆಚರಣ್; ಹೆರ್ ಫಿರ್ಗಜ್ ಕುಟ್ಮಾಂಕ್ ತಶೆಂ ಸಮಾಜೆಕ್ ತ್ಯಾಚ್ಚ್ ಪ್ರಮಾಣೆಂ ಅಕ್ರೀಸ್ತಾಂವಾಂಕೀ ಏಕ್ ದೇಖ್ ದಿತಾ.
ಫಿರ್ಗಜ್ ಕುಟ್ಮಾಂ ಮ್ಹಣ್ತಾಂ ಸಟ್ಟ್ ಕರುನ್ ವಾಡ್ಯಾ ಜಮಾತೆಚೊ ಉಗ್ಡಾಸ್ ಯೆತಾ. ಕ್ರೀಸ್ತೀ ಸಮಾಜೆಚಾ ಬರೆಪಣಾಕ್, ಎಕ್ವೊಟಾಕ್, ಶಾಂತ್ ಸಮಧಾನೆಕ್, ಎಕಾಮೆಕಾ ಆದಾರ್ ಜಾಂವ್ಚಿ, ವಾಡ್ಯಾಗಾರಾಂಚೆ ಸಹಮಿಲನ್ ಜಾವ್ನಾಸಾ, ಏಕ್ ಯೋಗ್ಯ್ ಕ್ರೀಸ್ತೀ ಜಮಾತ್. ಹ್ಯಾ ಖಾತಿರ್ ಫಿರ್ಗಜೆಂತ್ಲ್ಯಾ ಸರ್ವ್ ವಾಡ್ಯಾಗಾರಾಂನಿ ಹ್ಯಾ ವಾಡ್ಯಾ ಜಮಾತೆಂತ್ ಉರ್ಬೆನ್ ಪಾತ್ರ್ ಘೆಂವ್ಕ್‌‌‌ಯೀ ಹೆಂ ಕುಟ್ಮಾಫೆಸ್ತ್ ಜಾಗಯ್ತಾ.
ಜಾಕೊಬಾಚ್ಯಾ “ಪ್ರೊಟೊ ಇವಾಂಜಿಸಮ್ ” ಹಾಂತುನ್ ಮರಿಯೆಚೆಂ ಜನನ್, ಬಾಳ್ಪಣ್, ಖರಾರ್, ಜೆಜುಚೆಂ ಜನನ್ ಇತ್ಯಾದಿ ಮರಿಯೆಚಿಂ ಮಹತ್ವ್ ಪೂರ್ಣ್ ಘಡಿತಾಂ ಆಟಾಪುನ್ ಆಸಾತ್ ಮ್ಹಣ್ ಹಾಂವೆಂ ಮ್ಹಾಕಾ ವಾಚ್‌ಲ್ಲೊ ಉಗ್ಡಾಸ್.
ಸೈಂಬಾಚೆಂ ಪಾತಾಕ್ ನಾಸ್ತಾಂ ಜಲ್ಮಾಲ್ಲ್ಯಾ, ತಶೆಂ ಕುಡಿ-ಅತ್ಮ್ಯಾ ಸಮೇತ್ ಸರ್ಗಿಂ ಪಾವ್ಲೆಲ್ಲ್ಯಾ ಆಂಕ್ವಾರ್ ಸಾಯ್ಬಿಣಿಚೆಂ ಜಲ್ಮಾ ಫೆಸ್ತ್, ಮೆಕ್ಸಿಕೊಂತ್ ಆನಿ ಇಟೆಲಿಂತ್ ಗಡ್ದೆನ್ ಆಚರ್ಸಿತಾತ್. ಥಂಯ್ಸರ್ ಬಾಳಕ್ ಮರಿಯೆಚೆಂ ಭಕ್ತಿಪಣ್ ವಿಶೇಶ್ ಥರಾನ್ ಚಲ್ತಾ.
ಮಂಗ್ಳುರಾಂತ್ ಮರಿಯೆಚೆಂ ಜಲ್ಮಾಫೆಸ್ತ್, ಫರಂಗಿಪೆಟೆಂತ್ಲ್ಯಾ ಮೊಂತೆ ಮರಿಯೋನಾಂತ್ ಆರಂಭ್ ಜಾಲ್ಲೆಂ ನಿಮ್ತಿಂ, ಹ್ಯಾ ಫೆಸ್ತಾಕ್ ‘ಮೊಂತಿ ಫೆಸ್ತ್’ ಮ್ಹಳ್ಳೆಂ ನಾಂವ್ ಪಡ್ಲೆಂ. ಆನಿ ಹೆಂ ಫರಂಗಿಪೆಟೆಂತ್ ಸುಮಾರ್ 1763 ಇಸ್ವೆಂತ್ ಬಾಪ್ ಜೊಕಿಮ್ ಮಿರಾಂದಾನ್ ಸುರ್ವಾತ್ ಕೆಲಿ ಮ್ಹಳ್ಳಿ ಮಾಹೆತ್ ಆಸಾ. ಹ್ಯಾ ಫಿಗರ್ಜೆಕ್ 1762 ಇಸ್ವೆಂತ್ ಗಂಗೊಳ್ಳಿ ಥಾವ್ನ್ ವರ್ಗ್ ಜಾವ್ನ್ ಆಯಿಲ್ಲೊ, ಬಾಪ್ ಜೊಕಿಮ್ ಮಿರಾಂದ್, ಇಟೆಲಿಂತ್ಯಾ ಫ್ರಾನ್ಸಿಸ್ಕೊನ್ ಮಾದ್ರಿಂನಿಂ ತಯಾರ್ ಕೆಲ್ಲ್ಯಾ ಬಾಳಕ್ ಮರಿಯೆಚೆಂ ‘ಮರಿಯಾ ಬೊಂಬಿನೊ’ ಇಮಾಜಿಚೆರ್ ಆಕರ್ಶಿತ್ ಜಾವ್ನ್, ಬಾಳಕ್ ಮರಿಯೆಚ್ಯಾ ವಿಶೇಶ್ ಭಕ್ತಿಪಣಾಕ್ ಪ್ರೇರಿತ್ ಜಾಲ್ಲೊ.
ಆನಿ ತೊ ಹಾಂಗಾಸರ್ ಪಾವ್ಲೆಲ್ಯಾವೆಳಾ, ನವ್ಯಾ ಬೆಳ್ಯಾಖಾತಿರ್ ದೆವಾಕ್ ಅರ್ಗಾಂ ದಿಂವ್ಚೆಂ ಫೆಸ್ತ್ ಮ್ಹಳ್ಳೆಂ ತೆಂ ಯೆದೊಳ್‌ಚ್ಚ್ ಆಚರಣೆರ್ ಆಸ್‌ಲ್ಲೆಂ. ಬಾಳಕ್ ಮರಿಯೆಚ್ಯಾ ವಿಶೇಶ್ ಭಕ್ತಿ ಪಣಾಚ್ಯಾ ಬಾಪ್ ಜೊಕಿಮಾನ್ ಹೆಂ ಫೆಸ್ತ್ ಮರಿಯೆಚ್ಯಾ ಜಲ್ಮಾಚೆಂ ‘ಮೊಂತಿ ಫೆಸ್ತ್’ ಮ್ಹಣ್ ಬದ್ಲಾವಣ್ ಕೆಲೆಂ.
ತ್ಯಾ ಕಾಳಾರ್ ಆರಂಭ್ ಜಾವುನ್ ಆತಾಂ ಹ್ಯಾ ಕಾಳಾರ್‌ಯೀ ಮುಂದರುನ್ ಆಸ್ಲೆಲ್ಯಾ ಹ್ಯಾ ಕುಟ್ಮಾಜಿವಿತಾಕ್ ಸ್ಪೂರ್ತಿ ದಿಂವ್ಚಾ, ಕುಟ್ಮಾ ಫೆಸ್ತಾ ಸಂಧರ್ಭಿ ಆಮಿ ಕುಟ್ಮಾ ಜಿಣ್ಯೆವಿಶಿಂ ಅವಲೋಕನ್ ಕರ್ಚೆಂ ಅತೀ ಗರ್ಜೆಚೆಂ ಜಾವ್ನಾಸಾ.
ಎಕಾ ಕುಟ್ಮಾಚಿ ಅತ್ಮೀಕ್ ಉರ್ಭಾ ತಶೆಂ ನೈತಿಕ್ ಭದ್ರತಿ, ಎಕ್ವಟ್, ಎಕಾಮೆಕಾ ಮೋಗ್ ಸಹಕಾರ್, ಕುಟ್ಮಾ ಸಾಂದ್ಯಾಂ ಥಂಯ್ ಆಸ್ಚ್ಯಾ ನೈತಿಕ್ ಮೌಲ್ಯಾಂ ವಯ್ರ್ ಹೊಂದುನ್ ಆಸಾ. ಆಧುನಿಕ್ ದಿಸಾಂನಿಂ, ಕುಟ್ಮಾಮೆಳಿಂತ್ ವೆಳಾಚೊ ಅಬಾವ್ ಚಡುನ್, ಎಕಾಮೆಕಾ ಸಂವಾದ್, ಸಾಂಗಾತಾ ಮಾಗ್ಣೆಂ, ಸಾಂಗಾತಾ ಜೆವಾಣ್ – ನಾಂಚ್ಚ್ ನಾಂ ಜಾಲಾಂ.
ವೊಂಟಾಂನಿಂ ಮಾಗ್ಣೆಂ ಆಸಾತರ್, ಕಾಳ್ಜಾ ಮತಿಂತ್ ಅನೈತಿಕ್ ಭೊಗ್ಣಾಂ. ಕುಟ್ಮಾಂತ್ ಎಕಾಮೆಕಾ ಸೊಡ್-ದೊಡ್, ಸಹಕಾರ್ ನಾಸ್ತಾಂ, ರಾಗ್ ಮಸರ್ ರೊಂಬುನ್ ಆಸ್ಲೆಲೆಂ ದಿಸ್ತಾ. ಕುಟ್ಮಾಂತ್ ಉಲೊಣೆಂ ಆಸಾ ತರೀ, ಫಕತ್ ಆಪಾಪ್ಲೆ ಗರ್ಜೆ ಖಾತಿರ್ ಮಾತ್ರ್.
ಕುಟ್ಮಾಂತ್ ಆಸ್ಚ್ಯಾ ಅಸಲ್ಯಾ ಮಾಯಾಮೋಗ್ ನಾತ್ಲೆಲ್ಯಾ ಅಕಾಂತೆ ಪರಿಗತೆವರ್ವಿಂ ಕುಟ್ಮಾಂತ್ ನಾನಾಂತಿಂ ಅನ್ವಾರಾಂ ಉದೆತಾತ್ . ಆನಿಂ ತ್ಯಾ ಪೈಕಿ ಮಾರೆಕಾರ್ ಜಾವ್ನಾಸಾ ಲಗ್ನಾ ಸಂಬಂದ್ ಭಿಗಡ್ಚೊ ಸಮಸ್ಸೊ! ಆನಿಂ ಹೆಂ ಅಶೆಂಚ್ಚ್ ಮುಂದರುನ್ ಗೆಲೆಂ ತರ್, ಏಕ್ ದೀಸ್ ಉದೆತಾ ಕುಟ್ಮಾ ಅನ್ವಾರ್-ಅನಾಹುತಾಚೆಂ – ಲಗ್ನಾ ವಿಚ್ಚೇದನ್ !.
ಆಯ್ಚ್ಯಾ ಜೊಡ್ಯಾಂ ಮಧೆಂ ಕ್ಶುಲ್ಲಕ್ ಕಾರಾಣಾಂ ಖಾತಿರ್ ಕಾಜಾರಿ ಜಿಣಿಯೆಂತ್ ತುಟ್-ಫುಟ್ ಉದೆತಾ. ಆನಿಂ ಹೆಂಚ್ಚ್ ಮುಕಾರ್ ಮೂಳ್ ಜಾತಾ ; ಲಗ್ನಾ ವಿಚ್ಚೇದನಾಕ್!
ಹೊ ವಿಶಯ್ ಚಿಂತ್ತಾಸ್ತಾಂ, ಹಾಕಾ ದೋನ್ ಮುಖ್ಯ್ ಕಾರಾಣಾಂ ಮತಿಕ್ ಧೊಸ್ತಾತ್. ಏಕ್… ನೈತಿಕ್ ಕುಟಾಮ್ ಬಾಂದುನ್ ಹಾಡ್ಚಿಂ ತಶೆಂ ಯೋಗ್ಯ್ ಬೂದ್-ಬಾಳ್ ದೀವ್ನ್ ಜಾಗ್ರುತ್ಕಾಯ್ ಘೆಂವ್ಚಿಂ ಮಾಲ್ಘಡಿಂ (ಪ್ರತ್ಯೇಕ್ ಜಾವ್ನ್ ಆಜೊ ಆಜಿ ) ಆಜ್ ಕುಟ್ಮಾಂತ್ ನಾಂ ಆಸ್ಚಿಂ. ದುಸ್ರೆಂ , ಲಗ್ನಾಚಾ ಮಹತ್ವಾವಿಶಿಂ ತಶೆಂ ಪವಿತ್‌ಪಣಾವಿಶಿಂ ಚಲಿ ಚಲ್ಯಾಕ್ ಆಸ್ಚೆಂ ಅತ್ಮೀಕ್ ತಶೆಂ ಲೌಕಿಕ್ ಘಂಭೀರ್ಪಣ್ ಆಜ್ ಮಾಯಾಗ್ ಜಾಲಾಂ! ಹ್ಯಾನಿಮ್ತಿಂ ತಾಂಚೆಮಧೆಂ ಗರ್ಜೆಚೆಂ ಜಾವ್ನ್ ಆಸ್ಚೆಂ … ಎಕಾಮೆಕಾ ಥಂಯ್ ಖಾಲ್ತೆಂಪಣ್ ಆನಿ ಸೊಡ್-ದೊಡ್ ನಾಂ ಜಾಲ್ಯಾ! ಆನಿ ಹ್ಯಾವರ್ವಿಂ ಎಕಾಮೆಕಾ ಮಾನ್, ಮೋಗ್ ಹುಸ್ಕೊ ಸಹಕಾರ್ ಮ್ಹಳ್ಳೊ ನಾಂ ಜಾಲಾಂ.
ತಶೆಂಚ್ಚ್ ಹಾಕಾ ಪೂರಕ್ ಮ್ಹಳ್ಳೆಪರಿಂ, ತಾಂಕಾ ತಾಂಕಾ ಆಸ್ಚಿ ಆದುನಿಕ್ ಆರ್ಥಿಕ್ ಭದ್ರತಿ. ತಾಂಚೆ ಥಂಯ್ ಜಿರೊನ್ ಆಸ್ಚಿ ಅಸಲಿ ಆರ್ಥಿಕ್ ವೆವಸ್ಥಾ … ತಾಂಚಾ ಎಕಾಮೆಕಾಚಾ ಭೆಫಿಕೆರೆಕ್ ಕಾರಣ್ ಜಾತಾ!
ತ್ಯಾಚ್ಚ್ ವೆಳಾ ಥೊಡ್ಯಾ ಕುಟ್ಮಾನಿಂ ಅಶೆಂಯೀ ಘಡ್ತಾಕೀ … ಅಸಲ್ಯಾ ಪತಿ ಪತಿಣೆಂಕ್, ತಾಂತಾಂಚಾ ಆವಯ್ ಬಾಪಾಯ್ನ್ ತಾಂಕಾ ಯೋಗ್ಯ್ ಸಮ್ಜಣಿಂ ದೀವ್ನ್ ಲಗ್ನಾಂ ಅನ್ವಾರಾವಿಶಿಂ ಜಾಗೃತ್ ದಿಂವ್ಚೆತೆಂ. ಆನಿ ತೆಂ ಸೋಡ್ನ್ ಆಪಾಪ್ಲಿ ಕುಟ್ಮಾ ಜವಾಬ್ದಾರಿ ವಿಸ್ರೊನ್, ಲಗ್ನಾ ವೆಗ್ಳಾಚಾರಾಕ್ ಪ್ರೋತ್ಸಾಹ್-ಧಯ್ರ್ ದಿಂವ್ಚೆಂ ಹ್ಯಾದಿಸಾಂನಿಂ ಚಡ್ ಆನಿ ಚಡ್ ದಿಸೊನ್ ಯೆತಾ.
ಖಂಡಿತ್ ಜಾವ್ನ್…ಕುಟ್ಮಾಂತ್ ಶಾಂತ್-ಸಮಧಾನ್ ಕರಿನಾಸ್ತಾಂ, ಪತಿ-ಪತಿಣೆ ಮಧೆಂ ಫುಟ್-ತುಟೆಕ್ ಪ್ರೋತ್ಸಾಹ್ ದಿಂವ್ಚೆಂ ತೆಂ…ಹಿ ಏಕ್ ದೆವಾಚಿ ಶಿಕ್ಶಾ ಮಾಗೊನ್ ಘೆಂವ್ಚಿ ಮಾರೆಕಾರ್ ಕರ್ನಿಂ ಜಾವ್ನಾಸಾ!
ನೀಜ್ ಜಾವ್ನ್, ಆಪ್ಲ್ಯಾ ಲಗ್ನಾ ಜಿವಿತಾಂತ್ ಪತಿ-ಪತಿಣೆನ್, ನವ್ಯಾ ಕುಟ್ಮಾಥಂಯ್ ಖಾಲ್ತೆಂಪಣ್, ಮೋಗ್-ಮಯ್ಪಾಸ್, ಮಾನ್-ಮರ್ಯಾದ್ ದೀವ್ನ್, ಚಲೊಂಕ್ ಆಸಾ. ನವ್ಯಾ ಕುಟ್ಮಾಂತ್ ಚಲಿಯೆನ್ ‘ಸುನ್’ ಜಾವ್ನ್ ಮಾತ್ರ್ ನ್ಹಂಯ್…ಬಗಾರ್ ತಿಣೆಂ ‘ಧುವ್’ ಜಾವ್ನ್ ಜಿಯೆಂವ್ಕ್ ಜಾಯ್. ಆನಿ ತಶೆಂಚ್ಚ್ ಚಲ್ಯಾನ್ ಏಕ್ ‘ಜಾಂವಯ್’ ಮಾತ್ರ್ ನ್ಹಂಯ್ ಏಕ್ ‘ಪೂತ್’ ಜಾವ್ನ್ ಜಿಯೆಂವ್ಕ್ ಆಸಾ.
ಪತಿ-ಪತಿಣೆನ್ ಎಕಾಮೆಕಾ ಖಾಲ್ತೆಂಜಾವ್ನ್, ಸೊಡ್-ದೊಡ್, ಸಹಕಾರ್, ಮೋಗ್-ಹುಸ್ಕೊ, ವಿಶ್ವಾಸಾನ್, ಎಕಾಮೆಕಾ ಲೈಂಗಿಕ್ ಸುಡಾಳಾಯೆನ್ ಜಿಯೆಂವ್ಕ್ ಫಾವೊ. ಕುಟ್ಮಾಂ ಜಿಣಿಯೆಂತ್ ವಿಪರೀತ್ ಪಿಯೊಣೆಂ, ಲಗ್ನಾ ಭಾಯ್ಲೊ ಲಂಯ್ಗಿಕ್ ಸಂಭಂಧ್, ಕ್ರೂರತಾ, ರಾಗ್, ಜಿದ್ದ್, ಹಟ್, ಅವಿಶ್ವಾಸ್ಪಣ್…ಹೆಂ ಸರ್ವ್ ದೆವಾಚಿ ಕುರ್ಪಾ-ಬೆಸಾವಾಂ ಹೊಗ್ಡಾವ್ನ್ ಘೆಂವ್ಚಿಂ ಕರ್ನಿಂ ಜಾವ್ನಾಸಾತ್.
ಅಸಲ್ಯಾ ಅನೈತಿಕ್ ಜೀವಿತಾವಿಣೆಂ, ನೈತಿಕ್ ಸಂಗ್ತಿಂನಿಂ ಜಾಗ್ರೂತ್ ಆಸುನ್ ಜಿಯೆಂವ್ಚೆಂ ತೆಂ ಎಕಾ ಶಾಂತ್ – ಸಮಧಾನಿ, ಮಾಯಾಮೊಗಾಚ್ಯಾ ಕುಟ್ಮಾಕ್ ಗರ್ಜೆಚೆಂ ಜಾವ್ನಾಸಾ. ಆನಿಂ ಅಶೆಂ, ಅತ್ಮೀಕ್ ತಶೆಂ ನೈತಿಕ್ ಜವಾಬ್ದಾರಿನ್ ಜಿಯೆಂವ್ಚೆಂ ತೆಂ ಕುಟ್ಮಾಚ್ಯಾ ಆನಂದ್ ಸಮಧಾನ್ ಎಕ್ವೊಟಾಕ್, ಕಾರಾಣ್ ಜಾತೆಲೆಂ.
ಅಸಲ್ಯಾ ಸುಖಿ ಸುರಕ್ಶಿತ್ ಲಗ್ನಾ ಜಿವಿತಾಕ್, ಜಾಣ್ತ್ಯಾಂನಿಂ ಸಾಂಗ್ಲೆಲ್ಯಾ ಪರ್ಮಾಣೆಂ ಪತಿ ಪತಿಣೆನ್ ಸಕಾಳಿಂ ಸಾಂಗಾತಾ ಕಿಚಾನಾಕ್ ರಿಗೊನ್ ಎಕಾಮೆಕಾ ಕುಜ್ನಾಂ ಕಾಮಾಂತ್ ಸಹಕಾರ್ ದೀವ್ನ್ ರಾತಿಂ ಖಟ್ಲ್ಯಾರ್ ಆಡ್-ಪಡ್ಚ್ಯಾ ಪರ್ಯಾಂತ್, ಎಕಾಮೆಕಾಚಾ ಸುಖ್-ಸಹಕಾರಾಕ್ ಸ್ಪಂದನ್ ಜಾವ್ನ್ ಆಸೊಂಕ್ ಜಾಯ್. ನಂತರ್ ಖಟ್ಲ್ಯಾರ್ ತ್ಯಾದಿಸಾಚೊ ರಾಗ್ ಮೋಗ್ ಗಜಾಲಿಂಚೊ ಸಂವಾದ್ ಚುಕಾನಾತ್ಲೆಲ್ಯಾಪರಿಂ ಕರುನ್…ಎಕಾಮೆಕಾ, ಮೊಗಾ ಇಶ್ಟಾಗತೆನ್ ರಾತ್ ಪಾಶಾರ್ ಕರುಂಕ್ ಜಾಯ್.
ಅಸಲ್ಯಾ ಸವಯೆನ್ ಎಕಾಮೆಕಾಚಾ ಮನಸ್ಥಾಪಾಕ್, ಖಾಲ್ತ್ಯಾಪಣಾಚೊ ಲೇಪ್ ಉದೆವ್ನ್ … ಕುಟ್ಮಾಚಿ ಸುರಕ್ಶಿತಾಯ್ ರುತಾ ಜಾತೆಲಿ. ಅಸಲ್ಯಾ ಜಿವಿತಾಚೆರ್ ದೆವಾಚೆಂ ವರ್ತೆಂ ಬೆಸಾಂವ್ ತಸೊ ಸಹಕಾರ್ ಆಸ್ತೆಲೊ ಖಂಡಿತ್. ಕುಟ್ಮಾಂತ್, ಫುಡಾರಾವಿಶಿಂ ಪತಿ ಪತಿಣೆ ಮಧೆಂ ಎಕಾಮೆಕಾಚಾ ಜವಾಬ್ದಾರೆನ್ ಆಸೊನ್, ಆಪ್ಲ್ಯಾ ಭುರ್ಗ್ಯಾಂಚೆಂ ದೈವಿಕ್ ನೈತಿಕ್ ಮೌಲ್ಯಾಂನಿಂ ಮಿಸ್ಳಾಲ್ಲೆಂ ಜಿವಿತ್ ರೂಪಿತ್ ಕರ್ಚಿ ವರ್ತಿ ಜವಾಬ್ದಾರಿ ಆಸಾ ಮ್ಹಳ್ಳೆಂ ಮತಿಂತ್ ದವರುಂಕ್ ಜಾಯ್.
ಆಧುನಿಕ್ ಕಾಳಾರ್ ಫಕತ್ ಭುರ್ಗ್ಯಾಂಚೆಂ ಶಿಕಪ್ ತಶೆಂ ತಾಂಚಾ ಸಂಸಾರಿ ಗರ್ಜಾಂಕ್ ಸ್ಪಂದನ್ ಕರ್ಚಾಂತ್ ಉರ್ಬಾ ದಾಕಂವ್ಚೆಂ ಮಾತ್ರ್ ದಿಸೊನ್ ಯೆತಾ. ತಾಂಕಾ ಶೆಗುಣಾಂನಿಂ, ಆತ್ಮಿಕ್ ತಶೆಂ ನೈತಿಕ್ ಮೌಲ್ಯಾಂನಿ ಮಿಸ್ಳೊಂವ್ಚೆಂ ಆಸಕ್ತ್ ಬೋವ್ ಥೊಡ್ಯಾ ಕುಟ್ಮಾಂನಿಂ ದಿಸೊನ್ ಯೆತಾ. ಚಡಾವತ್ ಕುಟ್ಮಾನಿಂ ಭುರ್ಗ್ಯಾಂ ವಯ್ಲ್ಯಾ ಶಿಕ್ಪಾ ಆಸಕ್ತೆನ್ ಹಿಂ ಸರ್ವ್ ನೈತಿಕ್ ತಶೆಂ ಅತ್ಮೀಕ್ ಮೌಲ್ಯಾಂ ನಪೈಂಚ್ ಜಾಲಾಶೆಂ ಭೊಗ್ತಾ. ಅಸಲ್ಯಾ ಮಾರೆಕಾರ್ ಪರಿಗತೆವರ್ವಿಂ ಆವಯ್ ಬಾಪಯ್ ಆನಿಂ ಭುರ್ಗ್ಯಾಂ ಮದೆಂ ಮೊಗಾ-ಹುಸ್ಕೊ, ಕುಟ್ಮಾ ಸಂಭಂದ್, ತಾಣಿಂ ಉಗ್ತ್ಯಾ-ಸುಡಾಳಾಯೆನ್ ಭರ್ಸುಂಚೊ ಉಲಂವ್ಚೊ, ಹೊ ಅಭಾವ್ ಉಟೊನ್ ದಿಸ್ತಾ.
ಹ್ಯಾ ಕಾರಣಾನ್, ಭುರ್ಗ್ಯಾಂಚಾ ಜಿವಿತಾಂತ್ ಎಕ್ಸುರ್ಪಣ್, ಜಿಗುಪ್ಸಾ, ಮಾನಸಿಕ್ ದಬಾವ್, ಹೆಂಸರ್ವ್ ಉಬ್ಜೊನ್, ತಿಂ ಡ್ರಗ್ಸ್, ಆಮಾಲ್ ಅಸಲ್ಯಾ ವಿವಿಧ್ ಮಾರೆಕಾರ್ ವಾಯ್ಟ್ ಸವಯಾಂಕ್ ಬಲಿ ಜಾತಾತ್. ಆನಿ ಕುಟ್ಮಾಂನಿಂ ಜಿವ್ಘಾತಾಂಚೊ ಅಪಾಯ್ ಉದೆಲ್ಲೊಯೀ ದಿಸೊನ್ ಯೆತಾ. ಆದಿಂ ಕುಟ್ಮಾಂತ್ಲಿ ಮಾಲ್ಘಡಿಂ, ಕುಟ್ಮಾಚಿ ಆತ್ಮಿಕ್ ತಶೆಂ ನೈತಿಕ್ ಜವಾಬ್ದಾರಿ ಘೆವ್ನ್ ಜಾಗೃತ್ ಆಸ್ತಾಲಿಂ. ತಾಂಚಾ ಉಸ್ಕ್ಯಾರಿ, ತಾಂಚಾ ವೊಂಟಾಂ-ಉತ್ರಾಂ ತಶೆಂ ಕರ್ನ್ಯಾಂನಿ, ಭುರ್ಗಿಂ, ಅತ್ಮೀಕ್ ಗೂಣ್-ಶೆಗುಣ್ ತಶೆಂ ನೈತಿಕ್ ಮೌಲ್ಯಾಂ ಶಿಕ್ತಾಲಿಂ. ಅಶೆಂ ಕುಟ್ಮಾಂತ್ ತಿಂ ಏಕ್ ನಿತಿ-ಪ್ರಮಾಣಿಕ್ಪಣಾಚೊ ಬಳಾಧೀಕ್ ಕುಟ್ಮಾ ಖಾಂಬೊ ಜಾವ್ನ್ ಆಸ್ ಲ್ಲಿಂ. ಆಜ್ ತಸಲಿಂ ಮಾಲ್ಘಡಿಂ ಕುಟ್ಮಾಂತ್ ಘರಾ ಕೊನ್ಶಾಚಿ ಸಾರೊಣ್ ಜಾವ್ನ್ ಗೆಲ್ಯಾಂತ್!
ಹಾಂಗಾಸರ್ ಏಕ್ ಹಾಂವ್ ಸಾಂಗೊಂಕ್ ಆಶೆತಾಂ ಕೀ ; ತುಮಿಂ ಕುಟ್ಮಾಚಿಂ ವ್ಹಡಿಲಾಂ, ಜರ್ ಆಪ್ಲ್ಯಾ ವ್ಹಡಿಲಾಂಕ್ ಆಪ್ಲ್ಯಾ ಭುರ್ಗ್ಯಾ ಮುಕಾರ್ ಸಸಾರ್ ಕರುನ್. ತಾಂಚಿಂ ಬೆಪರ್ವಾ ಕರ್ತಾತ್ ತರ್ ತುಮ್ಚಿ ತಿಂ ಭುರ್ಗಿಂ, ತುಮ್ಕಾಂಯೀ ಕೊನ್ಶಾಂತ್ ಲೊಟುನ್ ಘಾಲುಂಕ್ ವೇಳ್ ಲಾಗ್ಚೊನಾಂ. ತ್ಯಾಚ್ಚ್ ಪರ್ಮಾಣೆಂ, ತುಮ್ಚ್ಯಾ ಭುರ್ಗ್ಯಾಂಕೀ, ತಾಂಚಾ ಉತರ್ ಪ್ರಾಯೆರ್, ತಸಲಿಚ್ಚ್ ಪರಿಗತ್, ಫುಡಾರಾಂತ್ ರಾಕೊನ್ ಆಸ್ತೆಲಿ ಮ್ಹಳ್ಳೆಂಯೀ ಖಂಡಿತ್ !
ಲಗ್ನಾಂ ಜಿವಿತಾಂತ್ ಪತಿಪತಿಣೆನ್, ಅತ್ಮೀಕ್ ಜಾಗರಣೆನ್, ತಶೆಂ ನಿತಿನ್, ಪ್ರಾಮಾಣಿಕ್ಪಣಿಂ ಜಿಯೆವ್ನ್, ಆಪ್ಲ್ಯಾ ಭುರ್ಗ್ಯಾಂಕ್ ತಶೆಂ ಸೆಜಾರ್ಚ್ಯಾಂಕೀ ಆದರ್ಶ್ ಜಾವ್ನ್ ಜಿಯೆಂವ್ಕ್ ಜಾಯ್. ತವಳ್ ಆಪ್ಲ್ಯಾ ಕುಟ್ಮಾಸವೆಂ, ಸಮಾಜೆಂತ್ಲಿಂ ಹೆರ್ ಕುಟ್ಮಾಂಯೀ ಉದ್ದಾರ್ ಜಾತೆಲಿಂ. ಆಪ್ಲ್ಯಾ ಭುರ್ಗ್ಯಾಂಸಂಗಿಂ…ಸಾಂಗಾತಾ ಜೆವಾಣ್, ಮಾಗ್ಣೆಂ, ತಾಂಚೆ ಸಂಗಿ ಉಲೊವ್ಣ್ಯಾಂತ್ ವೇಳ್ ಖರ್ಸುಂಚೆ ಹೆಂ ಕುಟ್ಮಾಹಿತಾಕ್ ಬೋವ್ ಗರ್ಜೆಚೆಂ!
ಭುರ್ಗ್ಯಾಂಚಾ ಗರ್ಜೆಚ್ಯಾ ಗರ್ಜಾಂಕ್ ಸ್ಪಂದನ್ ಕರುಂಕ್ ಜಾಯ್ ಖರೆಂ. ಪೂಣ್ ನೈತಿಕ್ ಜವಾಬ್ದಾರೆನ್ ತ್ಯೊ ವಿಂಚೊಂಕ್ ಜಾಯ್. ಆಟ್ರಾ ವರ್ಸಾಂ ಆದಿಂ ಭುರ್ಗ್ಯಾಂಚಾ ಕಸಲ್ಯಾಯೀ ನಿಬಾಂಕ್ ಕಾನ್ ಹಾಲೈನಾಸ್ತಾಂ, ತಾಂಕಾ ಕುಟ್ಮಾ ಭಾಯ್ರ್ ಸ್ವತಂತ್ರೆನ್ ಭವೊಂಕ್, ತಶೆಂಚ್ಚ್ ಬೈಕ್ ಮೊಬಾಯ್ಲ್ ಯಾ ಲ್ಯಾಪ್ ಟೋಪ್ ವದಗ್ಸುಂಚಾ ಚಿಂತ್ಪಾಕ್ ಕೆದಿಂಚ್ಚ್ ಹಾತ್ ಘಾಲಿನಾಕಾತ್. ಯೆಕಾದಾವೆಳಾ ತಾಂಚ್ಯಾ ಶಿಕ್ಪಾಖಾತಿರ್ ‘ಇಂಟರ್ ನೆಟ್ಟ್’ ಯಾ ‘ಮೊಬಾಯ್ಲ್’ ತಾಂಕಾ ಗರ್ಜೆಚೆಂ ಮ್ಹಣ್ ದಿಸ್ತಾತರ್ ತಾಂಕಾ ತೆಂ ಒದಗ್ಸುಂಕ್ ಜಾಯ್-ಪಡ್ತಾ. ತರೀ ತಸಲ್ಯಾ ತಾಂಚ್ಯಾ ಶಿಕ್ಪಾವೆಳಾ ತಿಂ ತುಮ್ಚ್ಯಾ ದೊಳ್ಯಾಭಾಯ್ರ್ ಯಾ ಬಾಗ್ಲಾ ಭಿತರ್ ಆಸ್ತಾತ್ ತರ್… ತ್ಯಾ ವೆಳಾ ತುಮಿಂ ತಾಂಚೆರ್ ನಿಗಾ ದವ್ರುಂಕ್ ಆಳ್ಸಾಯ್ ಕರಿನಾಕಾತ್. ಹಿಚ್ಚ್ ಆಳ್ಸಾಯ್ ತುಮ್ಕಾಂ ತುಮ್ಚಿಂ ಭುರ್ಗಿಂ ತುಮ್ಚಾ ಹಾತಾ ಥಾವ್ನ್ ನಿಸ್ರೊನ್ ತುಮಿಂ ಜಿವಿತಾಭರ್ ಕರ್ಗುಂಚಾ ಕರ್ಗೊವ್ಣೆಚೆಂ ಕಾರಾಣ್ ಜಾಯ್ತ್!
ನಿಮಾಣೆಂ ಹ್ಯಾ ಕುಟ್ಮಾ ಫೆಸ್ತಾವೆಳಾ, ಕುಟ್ಮಾಚಾ ಅವಲೋಕನಾದ್ವಾರಿಂ ಕುಟ್ಮಾಂತ್ ಮರಿಮಾಯೆಕ್ ಆದರ್ಶ್ ಜಾವ್ನ್ ಘೆವ್ಯಾಂ. ಕುಟ್ಮಾಂತ್ ತಶೆಂ ಸೆಜಾರಾ ಎಕ್ವೊಟಾನ್ ಮೊಗಾನ್, ಭೊಗ್ಸಾಣೆಚ್ಯಾ ಮನೋಭಾವಾನ್, ಸೊಡ್ದೊಡೆಚೆಂ ಜೀವಿತ್ ಜಿಯೆಂವ್ಕ್ ದೆವಾಚಿ ಕುರ್ಪಾ ಮಾಗ್ಯಾಂ. ತಶೆಂಚ್ಚ್ ಕುಟ್ಮಾಕ್ ಅನ್ವಾರಾಂ ಥಾವ್ನ್ ರಾಕೊಂಕ್, ತಶೆಂ ಸಮಧಾನ್-ಪ್ರಮಾಣಿಕ್ಪಣಾಚ್ಯಾ ಕುಟ್ಮಾ ಖಾತಿರ್, ಸದಾಂ ಮರಿಯೆಚಿ ಮಜತ್ ಮಾಗ್ಯಾಂ. ತಶೆಂ ಕ್ರೀಸ್ತೀ ವಾಟೆರ್ ಚಲೊನ್, ಸಮಾಜೆಂತ್ ಕ್ರೀಸ್ತಾಚಿ ವಳಕ್ ವಿಸ್ತಾರುಂಕ್ ಕುಟ್ಮಾಂತ್ ಸದಾಂ ಮರಿಯೆಚೊ ತೇರ್ಸ್ ಜರೂರ್ ಕರ್ಯಾಂ.
■ ರೋನ್ ರೋಚ್ ಕಾಸ್ಸಿಯಾ