ಡಿಸೆಂಬರ್ ಮಹಿನೊ ಆಪ್ಲೆಂ ಮೇಟ್ ಕಾಡುನ್ ಆಸ್ತಾನಾಂ, ಪ್ರಥ್ವೆರ್ ಹಿಂವ್ ಪಡೊಂಕ್ ಆರಂಭ್ತಾ. ಆನಿ ಅಸಲ್ಯಾ ಥಂಡಿಯೆವೆಳಾ ದೈವೀಕ್ ಊಬ್ ದಿತಾ, ಜೆಜು ಬಾಳ್ಕಾಚೆಂ ಜಲ್ಮಾಫೆಸ್ತ್ , ನತಾಲ್!
ಹ್ಯಾ ಪರ್ಬೆಜೊ ಯಾದ್ ಸಂಸಾರ್‌ಭರ್ ಉಮಾಳೊಂಕ್ ಸುರ್ವಾತಾನಾಂ, ನತಾಲಾ ಸಂಭ್ರಮ್ ಜಿವಾಳ್ತಾ. ಆನಿ ನತಾಲಾಂ ಆಚರಣೆಂಚೊ ತಶೆಂ ಕಾಂತಾರಾಂಚೊ ಸುಮಧುರ್ ನಾದ್ ಪ್ರಸಾರುನ್ ಆಸ್ತಾ. ಕ್ರಿಸ್ಮಸ್ ಯಾ ನತಾಲ್, ಜೆಜುಚಾ ಜಲ್ಮಾದಿಸಾಚೊ ಆನಂದ್, ಭಕ್ತಿಪಣ್ ಆನಿ ಜೆಜುಚೆಂ ಖಾಲ್ತೆಂಪಣ್ ಉಗ್ಡಾಸಾಕ್ ಹಾಡುನ್, ಸಂಭ್ರಾಮಾನ್ ಆಚರಣ್ ಕರ್ಚೆಂ ಏಕ್ ಲೊಕಾಮೊಗಾಳ್ ಫೆಸ್ತ್ ಜಾವ್ನಾಸಾ. ಸಂಸಾರಾಚಾ ಚಡಾವತ್ ಮ್ಹಳ್ಯಾರ್ ಸರ್ವ್- ಸಾಧಾರಣ್ ಸಂಸಾರಾಚೊ ಮುಕ್ಕಾಲ್ ವಾಂಟೊ ಲೊಕಾನ್ ಆಚರಣ್ ಕರ್ಚೆಂ ಏಕ್ ಮಾತ್ ಫೆಸ್ತ್ ಜಾವ್ನಾಸಾ – ಕ್ರಿಸ್ಮಸ್ ವಾ ನತಾಲ್ !
ಕ್ರೀಸ್ತಾಚಿ ತಶೆಂ ಕ್ರೀಸ್ತೀ ಸಮಡ್ತೆಚಿ ವಳಕ್ ಅಖ್ಯಾ ಸಂಸಾರಾಕ್ ಹೆಂ ಫೆಸ್ತ್ ಕರುನ್ ದಿತಾ. ಮರಿ ಪವಿತ್ರ್ ಅತ್ಮ್ಯಾವರ್ವಿಂ ಗರ್ಭೆಸ್ತ್ ಜಾಲ್ಲೊ ಮಿಸ್ತೆರ್ ಜ್ಯಾರಿ ಕರ್ಚೆ ಖಾತಿರ್, ‘ದೇವ್ ಮನಿಸ್ ಜಾಲೊ’…ಮ್ಹಳ್ಳೊ ಮಿಸ್ತೆರ್ ಆಮಿ ಭವಾರ್ಥಾನ್ ಪಾತ್ಯೆಂವ್ಕ್ ಆನಿ ಭಕ್ತೆನ್ ಸಂಭ್ರಮುಂಕ್ ಹೆಂ ಫೆಸ್ತ್ ಆಮ್ಕಾಂ ಆಪವ್ಣೆಂ ದಿತಾ.
ನತಾಲಾಂ ಫೆಸ್ತ್, ಸಂಸಾರ್‌ಭರ್ ವಿವಿಧ್ ಥರಾಂಚ್ಯಾ ಆಚರಣಾಂನಿ, ನಮುನ್ಯಾವಾರ್ ಸಂಭ್ರಮ್ ವೈಭವಾನ್ ಆಚರಣ್ ಕರ್ತಾತ್. ಆನಿ ಹ್ಯಾ ವಿವಿಧ್ ಆಚರಣಾಂದ್ವಾರಿಂ ಸಂಸಾರ್ ಭರ್ ಅಕ್ರೀಸ್ತಾಂವಾಂಕ್ ಕ್ರೀಸ್ತೀ ಒಳಕ್ ದಿಂವ್ಚೊ, ತಶೆಂ ಕ್ರಿಸ್ತಾಚಿ ಶಿಕೊವ್ಣ್ ಪ್ರಸಾರುಂಚೊ ಸುಯೋಗ್ ಆಮ್ಕಾಂ ಲಾಭ್ತಾ. ಲೌಕಿಕ್ ತಶೆಂ ಲಿತುರ್ಜಿಕ್ ಥರಾನ್ ಸುಮಾರ್ ಏಕ್ ಮಹಿನೊಭರ್ ಆಚರಣ್ ಜಾಂವ್ಚೆಂ ಏಕ್ ಮಾತ್ರ್ ಫೆಸ್ತ್ – ನತಾಲ್ ಮ್ಹಳ್ಯಾರೀ ಚೂಕ್ ನಾ. ಹ್ಯಾ ಸಂಧರ್ಭಾರ್, ಕುಟ್ಮಾಚಿಂ ಸರ್ವಾಂ ಸಾಂಗಾತಾ ಮೆಳುನ್ ಕುಸ್ವಾರ್ ಕರ್ಚೊ, ತೊ ಈಶ್ಟ್-ಮಂತ್ರ್, ಸೆಜ್ – ಸಾಂಬಾರಾ ಎಕಾಮೆಕಾ ವಿನಿಮಯ್ ಕರುನ್, ಕುಟ್ಮಾಚೊ, ಪೆಲ್ಯಾಚೊ ತಶೆಂ ಸೆಜಾರ್ಚೊ ಮೋಗ್ ವಾಡೊಂವ್ಚೊ ಸುಯೋಗ್ ಕ್ರೀಸ್ತೀ ಲೊಕಾಕ್ ಲಾಭ್ತಾ.
ಹ್ಯಾ ಸಂಧರ್ಭಾರ್, ಕ್ರಿಸ್ಮಸ್ ಕಾರ್ಡಾಂ, ತಶೆಂ ಆಧುನಿಕ್ ‘ವಾಟ್ಸಪ್’ ತಸಲ್ಯಾ ಸಮಾಜಿಕ್ ಮಾಧ್ಯಮಾಂ ದ್ವಾರಿಂ ಕುಟ್ಮಾಕ್, ಇಶ್ಟಾಂಕ್, ಸಯ್ರ್ಯಾಂ – ಧಯ್ರ್ಯಾಂಕ್ ತಶೆಂ ಅಕ್ರೀಸ್ತಾಂವ್ ಭಾವ್ – ಭಯ್ಣಿಂಕ್ ಎಕಾಮೆಕಾ ಶುಭಾಶಯ್ ಪಾಟಾಯ್ತಾತ್. ಆನಿ ಹ್ಯಾ ಮುಕಾಂತ್ರ್ ಜೆಜುನ್ ಶಿಕಯಿಲ್ಲೊ ಮೋಗ್ ಹುಸ್ಕೊ, ಭಾವ್ ಭಾಂದವ್ಪಣ್ ಜಿವೊ ದವರುನ್, ತೊ ಮುಂದರುನ್ ವ್ಹರ್ಚೆಂ ಪ್ರೇತನ್ ಚಾಲು ಆಸಾ.
ನೆಕೆತ್ರಾಂ, ಕ್ರಿಸ್ಮಸ್ ಟ್ರೀ , ನಾಚ್, ಗರ್ದಾನಾಚೊ ಗೊಟೊ , ಸಾಂತಾಕ್ಲೋಸಾ ಥಾವ್ನ್ ಭುಗ್ಯಾಂಕ್ ಗುಪಿತ್ ಕಾಣಿಕೊ ಪಾಟೊಂವ್ಚೊ – ಅಸಲ್ಯಾ ಸರ್ವ್ ವಿವಿಧ್ ನಮುನ್ಯಾಂಚ್ಯಾ ಆಚರಣಾಂನಿ ಫೆಸ್ತಾಚೊ ಸಂಬ್ರಮ್ ಚಲ್ತಾ. ಅಸಲ್ಯಾ ವಿವಿಧ್ ಆಚರಣಾಂನಿ, ಸರ್ವ್ ಕ್ರೀಸ್ತೀ ಲೊಕಾಕ್ ಏಕ್ ಕರ್ಚೊ, ತಶೆಂಚ್ಚ್ ಸಂಸಾರ್ ಭರ್ ಅಕ್ರೀಸ್ತಾಂವ್ ಭಾವಾಂಕ್ ಕ್ರೀಸ್ತಾಚಿ ವಳಕ್ ಆನಿ ಕ್ರೀಸ್ತೀ ಶಿಕೊವ್ಣ್ ಮೆಳಾಶಿ ಕರುಂಕೀ ನತಾಲಾಂಚೆಂ ಫೆಸ್ತ್ ಆಮ್ಕಾಂ ಏಕ್ ಅವ್ಕಾಸ್ ಕರುನ್ ದಿತಾ.
ಪೂಣ್ ಸಮಡ್ತೆ ಸ್ವತಂತ್ರಾಕ್ ಆನಿ ಆಚರಣಾಕ್ – ಅಪಾಯ್ ಅಡ್ಕಳ್ಯೊ ಉದೆವ್ನ್ ಆಸ್ಚ್ಯಾ ಪ್ರಸ್ತುತ್ ಕಾಳಾರ್, ಅಸಲ್ಯಾಂ ಕ್ರಿಸ್ಮಸ್ ಫೆಸ್ತಾಚ್ಯಾ ವಿವಿಧ್ ರಿತಿಂಚ್ಯಾ ಆಚರಣಾಂ ದ್ವಾರಿಂ, ಪರೋಕ್ಶ್ ಥರಾನ್ ಕ್ರೀಸ್ತೀ ಸಮಡ್ತೆಚಿ ಒಳಕ್ ಪ್ರಸಾರ್ ಕರ್ಚೆಂ ಪ್ರೇತನ್ ಥಿರಾಸಣೆನ್ ತಶೆಂ ಚತ್ರಾಯೆನ್ ಕರುಂಕ್ ಜಾಯ್! ಆಜ್ ಕಾಲ್ ಕ್ರೀಸ್ತೀ ಅಧ್ಯಾತ್ಮಿಕ್ ತಶೆಂ ಲೌಕಿಕ್ ಆಚರಣಾಂ ಥಂಯ್, ದುಬಾವಿ ನದರ್ ಚಡುನ್ ಆಸಾ. ಕ್ರೀಸ್ತೀ ಲೊಕಾಚೆರ್ ಬದ್ಲಾಮ್, ಸಮಡ್ತೆಚೆರ್ ಆಕ್ರಮಣ್ ಚಲಂವ್ಕ್ ಆವ್ಕಾಸ್ ಸೊಧುನ್ ಆಸ್ಚಾ ಸಂದಿಗ್ದ್ ಕಾಳಾರ್, ಮನಾಂ ಬದ್ಲುಂಚೆಂ ಕಾರಣ್ ಜಾಂವ್ಚೆಂ ತಸಲೆಂ ನತಾಲಾಂಚೆಂ ಆಚರಣ್ ಅತೀ ಗರ್ಜೆಚೆಂ ಜಾವ್ನಾಸಾ.
ಖರ‍್ಯಾನ್ ದಸೆಂಬರಾಚಿ ಪಂಚ್ವೀಸಾವಿ ತಾರೀಕ್ ಜೆಜುಚಿ ಜಲ್ಮಾ ತಾರೀಕ್ ಮ್ಹಣ್ಚ್ಯಾಕ್ ದಾಕ್ಲೆ ನಾಂತ್ ಮ್ಹಣ್ ಸಂಸೊಧ್ ಸಾಂಗ್ತಾತ್. ಆದಿಂ ರೊಮಾಂತ್ ವರ್ಸಾಚ್ಯಾ ಸಗ್ಳ್ಯಾ 365 ದಿಸಾಂ ಪಯ್ಕಿ ಚಡ್ ಲಾಂಬ್ ಆಸ್ಚೆ, ದಿಸೆಂಬರಾಚೆ 24 ಆನಿ 25 ಹೆ ದೀಸ್, ತವಳ್ಚೊ ಲೋಕ್, ‘ಸುರ್ಯಾ’ ಕ್ ದೇವ್ ಮ್ಹಣ್ ಮಾನ್ ಕರ್ಚಾ ತ್ಯಾ ವೆಳಾ ಸುರ್ಯಾಚೆಂ ಫೆಸ್ತ್ ಜಾವ್ನ್ ಆಚರಣ್ ಕರ್ತೆಲೆ ಮ್ಹಣ್ಚ್ಯಾಕ್ ದಾಕ್ಲೆ ಆಸಾತ್. ಉಪ್ರಾಂತ್ ರೋಮಿ ರಾಯಾಚಾ ವೈಭವೀ ಕಾಳಾರ್, ಆಪ್ಲ್ಯಾ ಆವಯ್ ಹೆಲೆನ್ ಹಿಚ್ಯಾ ಪ್ರೇರಣ್ ಆನಿ ಪ್ರಭಾವಾನ್ ಕ್ರಿ.ಉ. 313 ಇಸ್ವೆಂತ್ ಕ್ರೀಸ್ತಾಂವ್ ಜಾಲ್ಲೊ ಕೊನ್ಸ್‌ತಾಂತಿನ್ ರಾಯಾನ್, ಕ್ರೀಸ್ತಾಂವ್ ಸಮಡ್ತೆಕ್ ಪೈಭವ್ ಹಾಡ್ಚಿಂ ಸಭಾರ್ ಕಾರ್ಯಿಂ ಮಾಂಡುನ್ ಹಾಡ್ಲೆಲಿಂ ಆಸಾತ್. ಆನಿ ಹ್ಯಾ ಪಯ್ಕಿ ಏಕ್ ಆಸಾ, ಸುರ್ಯಾಚೆಂ ಫೆಸ್ತ್ ಬದ್ಲುನ್, ದಸೆಂಬರ್ ಪಂಚ್ವೀಸಾವಿ ತಾರೀಕ್ ಜೆಜು ಕ್ರೀಸ್ತಾಚ್ಯಾ ಜಲ್ಮಾ ದಿಸಾಚೆಂ ಫೆಸ್ತ್ ಮ್ಹಣ್ ಪಾಚಾರ್ಲೆಲೆಂ ತೆಂ – ನತಾಲ್!
ದೇವ್ ಬಾಪ್, ದೇವ್ ಪೂತ್, ಆನಿ ಸ್ಪಿರಿತ್ ಸಾಂತಾಚೆಂ ದೈವಿಕ್ ಭಾಂದಾವ್ಪಣ್, ಮನ್ಶಾ ಸಂಭಂದಾಂತ್ ಮಿಸ್ಳೊನ್, ದೆವಾಚಿ ಒಳಕ್ ಮನ್ಶಾ ಕುಳಾಕ್ ಕರುನ್ ದಿಲಿ. ಆನಿ ಮನ್ಶಾಕುಳಾಚಿ ಸೊಡ್ವಣ್ ಕರುಂಕ್, ಬಾಪಾನ್ ಆಪ್ಲ್ಯಾ ಎಕ್ಲ್ಯಾಚ್ ಪುತಾಕ್ ಜೆಜುಕ್ರೀಸ್ತಾಕ್, ಮರಿಯೆಚಾ ಉದರಾ ಮುಕಾಂತ್ರ್ , ಮನ್ಶಾಕುಳಾಕ್ ಪರಿಚಯ್ ಕರುನ್ ದಿಲೆಂ. ಆನಿಂ ಅಶೆಂ ಜೆಜು ಕ್ರೀಸ್ತ್, ಗರೀಭ್‌ಪಣ್ ಆಪ್ಣಾವ್ನ್, ಶಾಂತಿ ಸಮದಾನ್ ಪಾಟವ್ನ್ ಜೆಜು ಬಾಳೊಕ್ ಜಾವ್ನ್, ಗೊರ್ವಾಂಚ್ಯಾ ಗೊಟ್ಯಾಂತ್ ಮರಿಯೆಚಾ ಉದರಿಂ, ಆಂಕುಡ್ಚಾ ಥಂಡಿಯೆಂತ್ ಜಲ್ಮಾಲೊ. ಆನಿ ಖಾಲ್ತೆಪಣಾಚೊ ಸಂದೇಶ್ ತಾಣೆ ಸಂಸಾರಾಕ್ ಪಾಟಯ್ಲೊ.
ಗೊರ್ವಾ ಖಾವ್ಣೆ ಮುಕಾಂತ್ರ್ ಮುನ್ಶಾಕುಳಾಕ್ ಮೆಳ್‌ಲ್ಲೊ ಹೊ ಸಂದೇಶ್, ಹ್ಯಾ ಸಂಸಾರಿ ಜಿವಂತ್ ದವರುಂಕ್ ಆಮಿ ಕ್ರಿಸ್ಮಸ್ ಫೆಸ್ತಾವೆಳಾ, ಗರ್ದಾನಾಚೊ ಗೊಟೊ ಕರುನ್ ಕ್ರಿಸ್ಮಸ್ ಆಚರ್ಸುಂಕ್ ಜಾಯ್. ಆನಿ ಹೆಂ ಆಚರಣ್ ಜೆಜು ಕ್ರೀಸ್ತಾಚಿ ಒಳಕ್ ತಶೆಂ ಶಿಕೊಣ್ ಅಕ್ರೀಸ್ತಾಂವಾಕ್ ಪರೋಕ್ಶ್ ಥರಾನ್ ದೀಂವ್ಕ್ ಏಕ್ ಪ್ರಮುಕ್ ಹಾತೆರ್ ಜಾವ್ನಾಸಾ.
ಗರ್ದಾನ್ಯಾ ಗೊಟ್ಯಾಚಿ ಸುರ್ವಾತ್ 1223 ಇಸ್ವೆಂತ್ ಇಟೆಲಿ ದೇಶಾಚಾ ಆಸ್ಸಿಸ್ಸಿ ಪ್ರಾಂತಾಚಾ ಎಕಾ ಹಳ್ಳೆಂತ್ ಜಾಲಿ. ಬಾಳೊಕ್ ಜೆಜುಚೊ ವ್ಹಡ್ ಭಕ್ತ್ ಜಾವ್ನ್ ಆಸ್ಲೊಲೊ ಅಸ್ಸಿಸಿಚ್ಯಾ ಸಾಂ ಫಾನ್ಸಿಸಾನ್ ತವಳ್ಚಾ ಪಾಪ್ ಸಾಯ್ಬಾಚಿ ಪರ್ವಣ್ಗಿ ಘೆವುನ್, ಜೆಜುಚಾ ಜಲ್ಮಾಚೆಂ ಘಡಿತ್ ಆಸ್ಸಿಸಿ ಪ್ರಾಂತಾಚಾ ಗೊವ್ಳ್ಯಾಂಕ್, ಬೊಕ್ರ್ಯಾಂಕ್, ಗಾಯಾಂಕ್, ಜಿವಾಳ್ ದಾಕವ್ನ್ ಪಯ್ಲೊ ಗರ್ದಾನಾಚೊ ಗೊಟೊ ಕೆಲೊ ಮ್ಹಣ್ತಾತ್. ಆನಿ ಹೆಂಚ್ಚ್ ಸಂಸಾರ್‌ಭರ್ ಫಾಮಾದ್ ಜಾವ್ನ್ ಗರ್ದಾನಾಚಾ ಗೊಟ್ಯಾಂಚಿಂ ಸುರ್ವಾತ್ ಜಾಲಿ.
ಅಂತ್ರಾಳಾ ವಯ್ಲ್ಯಾ ನೆಕೆತ್ರಾಂಕ್ ಸಂಸಾರಿ ಹಾಡುನ್, ಬಾಳೊಕ್ ಜೆಜುನ್ ಆಮ್ಕಾಂ ದಿಲ್ಲ್ಯಾ ಉಜ್ವಾಡಾಚಾ ಸಂಕೇತಾ ಮಾರಿಫಾತ್ ಮೋಗ್, ಶಾಂತ್ ಸಮಧಾನ್, ಸೊಡ್ – ದೊಡ್ ಹೆಂ ಸರ್ವ್ ಎಕಾಮೆಕಾ ಪಾಟಂವ್ಕ್, ಆಮ್ಚಾ ಘರಾ ಬಾಗ್ಲಾಂನಿಂ ನೆಕೆತ್ರಾಂ ಉಮ್ಕಾಳಾಯ್ತಾಂವ್. ಕ್ರಿಸ್ಮಸ್ ಟ್ರೀ ನೆಟವ್ನ್, ವಿವಿಧ್ ರಂಗಾಳ್ ದಿಂವ್ಯಾಂನಿಂ ಪೆಟಂವ್ಚ್ಯಾ ಉಜ್ವಾಡಾಂನಿಂ ಸಜಯ್ತಾಂವ್. ನತಾಲಾಂ ಫೆಸ್ತಾವೆಳಾ, ಕುಟ್ಮಾ ಎಕ್ವೊಟಾನ್ ಕೆಲ್ಲೊ ಕುಸ್ವಾರ್, ಕುಟ್ಮಾಂಚಾಕ್, ಸೆಜಾರ್ಚ್ಯಾಂಕ್, ವಾಂಟ್ಚೆಂ ವಾಂಟಾಪ್ ಪೆಲ್ಯಾ ಥಂಯ್ ಮೋಗ್ ದಾಕೊಂವ್ಚಿ ನಿಶಾನಿ ಜಾತಾ. ಅಸಲೆಂ ವಾಂಟಾಪ್ ಎಕಾಮೆಕಾ ರಾಗ್, ಹಗೆಂ, ಮನಸ್ತಾಪ್ ಪಯ್ಸ್ ಕರುನ್, ಮೊಗಾನ್ ಏಕ್ ಜಾಂವ್ಕ್ ಏಕ್ ಅವ್ಕಾಸ್ ಜಾತಾ. ಅಸಲೆಂ ಆಚರಣ್ ರಾಜಿ ಸಂಧಾನೆಕ್ ಸಯ್ತ್ ಏಕ್ ಅಪ್ರತಿಮ್ ಆವ್ಕಾಸ್ ಜಾವ್ನಾಸಾ.
ಜೆಜು ಬಾಳ್ಕಾನ್ ಆಪ್ಲ್ಯಾ ಖಾವ್ಣೆದ್ವಾರಿ ಆಮ್ಕಾಂ ದಿಲ್ಲೆಂ ಮಿಸಾಂವ್ ಇಗರ್ಜ್ ಮಾತೆಚೆಂ ಪಾಳ್ಣೆಂ ಜಾವ್ನ್ ಆಸ್ಚ್ಯಾ ಕುಟ್ಮಾದ್ವಾರಿಂ, ಆಮ್ಚೆಂ ಮಿಸಾಂವ್ ಆರಂಭ್ ಕರುಂಕ್ ಉಲೊ ದಿತಾ. ಕುಟಾಮ್ ಜಾವ್ನ್ ಆಸಾ ಸಮಾಜೆಚೊ ದೊಳೊ. ಬಳ್ವಂತ್ ಕ್ರೀಸ್ತೀ ಭಕ್ತಿಪಣ್, ಮೋಗ್-ಹುಸ್ಕೊ ತಶೆಂ ಸೆವಾ ಮನೋಭಾವ್, ಖಾಲ್ತೆಂಪಣ್ ತಶೆಂ ಭೊಗ್ಸಾಣೆಂ – ಹೆ ಸರ್ವ್ ಕ್ರೀಸ್ತೀ ವಿಚಾರ್ ಸಮಾಜೆಂತ್ ರೂಪಿತ್ ಕರುನ್, ಕ್ರೀಸ್ತಾಚಿ ಒಳಕ್ ಸಮಾಜೆಂತ್ ಛಾಪುಂಕ್, ಕ್ರೀಸ್ತೀ ಕುಟಾಮ್ ಏಕ್ ಬುನ್ಯಾದ್ ಜಾವ್ನ್ ಆಸಾ.
ದೆಕುನ್ ಜೆಜು ಬಾಳ್ಕಾಚೆ ಜಲ್ಮಾ ಆಚರಣ್ ಆನಿ ಕ್ರೀಸ್ತೀ ಶಿಕೊಣೆದ್ವಾರಿಂ, ಆಮ್ಚ್ಯಾ ಕುಟ್ಮಾಂತ್ ಬೊಗ್ಸಾಣೆ, ಅಹಿಂಸಾ, ಸೊಡ್-ದೊಡ್, ಖಾಲ್ತೆಂಪಣ್ ಅಸಲಿಂ ಸರ್ವ್ ಅತ್ಮೀಕ್ ತಶೆಂ ನೈತಿಕ್‌ಪಣ್, ಜಿರವ್ನ್ , ಆಮ್ಚ್ಯಾ ಕುಟ್ಮಾಕ್, ಕ್ರೀಸ್ತೀ ಸಮಡ್ತೆಚಾ ಅನ್ವಾರಾಂ ಆಕಾಂತಾಂ ವಿರೋಧ್ ಏಕ್ ಬಳ್ವಂತ್ ಹಾತೆರ್ ಜಾವ್ನ್ ರೂಪಿತ್ ಕರುಂಕ್ ನತಾಲಾಂ ಫೆಸ್ತ್ ಆಮ್ಕಾಂ ಉಲೊ ದಿತಾ.
ಜೆಜು ಬಾಳೊಕ್, ಆಮ್ಚೆ ಥಾವ್ನ್ ಲಾಂಬ್ ಲಾಂಬ್ ಮಾಗ್ಣಿಂ, ವಿಪರೀತ್ ದೆವಾಸಾಂವ್ ಆಶೆ ನಾ. ಚೀತ್ ದೀವ್ನ್ ಧ್ಯಾನಾನ್, ನಿತಳ್ ಕಾಳ್ಜಾನ್ ಕೆಲ್ಯಾರ್ ಬರೆಂಚ್ಚ್. ಪೂಣ್ ಜೆಜು ಮಾಗ್ಣ್ಯಾಂ ಬರಾಬರ್ ಆಪ್ಣಾಚಾ ಶಿಕೊಣೆಚಿ ಜಿಣಿ, ತಶೆಂ ಕ್ರೀಸ್ತೀ ಸಮಡ್ತ್ ಪ್ರಸಾರಾಚಿಂ ಆಚರಣಾಂಯ್ ಆಶೆತಾ. ಖಾವ್ಣೆರ್ ನಿದೊನ್ ಆಸ್ಲೆಲ್ಯಾ ಜೆಜು ಬಾಳ್ಕಾಚೆ ಉಸವ್ನ್ ಧರ್ಲೆಲೆ ಹಾತ್, ಮೋಗ್, ಸೆವಾ, ಸಹಕಾರ್, ಭಾಂದಾವ್ಪಣ್, ಶಾಂತಿ ಸಮಧಾನಾನ್ ಭರ್ಲಲೆಂ ಕ್ರೀಸ್ತೀ ಜಿವಿತ್ ಆಮ್ಚೆ ಥಾವ್ನ್ ಆಶೆತಾತ್. ತ್ಯಾ ದೆಕುನ್ ತಾಚ್ಯಾ ಶಿಕೊವ್ಣೆ ದಿಶಿಂ ಜಿಯೆಂವ್ಚಾಂತ್ ಆಮಿಂ ಕಾಂಯ್ ‘ಚುಕೊನ್ ಪಡ್‌ಲ್ಲಿ ಶೆಳಿ’ ಜಾವ್ನ್ ಜಿಯೆವ್ನ್ ಆಸಾಂವ್ ತರ್, ಜೆಜು ಬಾಳ್ಕಾಚಾ ಹ್ಯಾ ಜಲ್ಮಾ ಪರ್ಬೆ ವೆಳಾ, ನತಾಲಾಂ ಆಚರಣಾ ಸವೆಂ, ಆಮಿ ಜಿಣ್ಯೆಚೆಂ ಪರಿವರ್ತನ್ ಕರುನ್ ಘೆಂವ್ಚೆಂಯ್ ಗರ್ಜೆಚೆಂ.
ಆಮ್ಚ್ಯಾ ಜಿವಿತಾಚೆರ್, ಗರ್ದಾನಾಚ್ಯಾ ಗೊಟ್ಯಾಂತ್ ಗೊವ್ಳ್ಯಾಂನಿ ದೆಕ್‌ಲ್ಲೊ ಬಾಳ್ಕಾ ಜೆಜುಚೊ ಉಜ್ವಾಡ್ ಫಾಂಕುನ್, ಆಮ್ಕಾಂ ಸಾಸ್ಣಿಕ್ ಸುಖಾಚೊ ಉಜ್ವಾಡ್ ದೀಂವ್. ತೆಗಾಂ ರಾಯಾಂಕ್ ದಿಶ್ಟಿಕ್ ಪಡ್‌‌‌‌‌‌ಲ್ಲೆಂ ನೆಕೆತ್ರ್, ಆಮ್ಕಾಂ ಸರ್ಗಿಂಚೆಂ ವಾಟ್ ದಾಕೊಂವ್ ಮ್ಹಣ್, ಹ್ಯಾ ನತಾಲಾಂ ಫೆಸ್ತಾವೆಳಾ ಜೆಜುಬಾಳ್ಕಾಚಿ ದಯಾ ಆನಿ ಆಶಿರ್ವಾದ್ ಮಾಗ್ಯಾಂ.
■ ರೋನ್ ರೋಚ್ ಕಾಸ್ಸಿಯಾ