ಆಂಡ್ರ್ಯೂ ಎಲ್. ಡಿ’ ಕುನ್ಹಾ

ಪಾಟ್ಲ್ಯಾ 40 ವರ್ಸಾಂ ಥಾವ್ನ್ ಕೊಂಕ್ಣೆಂತ್ ಸಾಹಿತ್ಯ್ ರಚುನ್ ಆಸ್ಚ್ಯಾ ಆಂಡ್ರ್ಯೂ ಎಲ್ ಡಿ ಕೂನ್ಹಾ ಏಕ್ ಲೊಕಾಮೊಗಾಳ್ ಕವಿ ಜಾವ್ನ್ ನಾಂವ್ ವೆಲಾಂ. ತೊ ಜಲ್ಮಾಲ್ಲೊ ಗುರ್ಪುರ್ ಫಿರ್ಗಜೆಚ್ಯಾ ಕಿನ್ನಿಕಂಬ್ಳಂತ್ September 23, 1966 ವೆರ್, ದೆವಾಧಿನ್ ಡೆನಿಸ್ ಆನಿ ಮೇರಿ ಡಿ ಕೂನ್ಹಾಚ್ಯಾ ಸಾತ್ ಭುರ್ಗ್ಯಾಂ ಪಯ್ಕಿ ನಿಮಾಣೊ. ವೃತ್ತೆನ್ ತೊ ಆರ್ಥಿಕ್ ಸಲಹಾದಾರ್. ಮಂಗ್ಳುರಾಂತ್ WINWIN ಸಂಸ್ಥೊ ತೊ ಚಲವ್ನ್ ವರ್ತಾ . ಆಪ್ಲಿ ಪತಿಣ್ ಶಾಂತಿ ಅನಿ ಪೂತ್ ಆಸ್ಟಿನ್ ಹಾಂಚೆ ಸಂಗಿಂ ಇಜಯ್ಂತ್ ಜಿಯೆವ್ನ್ ಆಸಾ. ತಾಣೆಂ 700 ವರ್ನಿ ಚಡ್ ಕವಿತಾಂ ಲಿಖ್ಲ್ಯಾಂತ್. ತಾಚೆ ತೀನ್ ಕವಿತಾ ಸಂಗ್ರಹ್ ಪ್ರಕಟ್ ಜಾಲ್ಯಾತ್. . ವ್ಹಳೂ ವ್ಹಳು ವ್ಹಾಳ್ ವ್ಹಾಳ್ಯಾ( 2004 - ಆಶಾವಾದಿ ಪ್ರಕಾಶನ್), ಅಂಜುರಾಚೆಂ ಪಾನ್ (2013 - ಕವಿತಾ ಟ್ರಸ್ಟ್ ) ಆನಿ ಆಯೆರಾಚೊ ಬೂಕ್ (2014 - ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ). ತಾಚ್ಯಾ ಅಂಜುರಾಚೆಂ ಪಾನ್ ಪುಸ್ತಕಾನ್ ಕೊಂಕ್ಣೆಚೆ ಚಾರ್ ಪ್ರಶಸ್ತ್ಯೊ ಜೊಡ್ನ್ ದಾಖ್ಲೊ ಜೊಡ್ಲಾ. ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ, ಅಖಿಲ್ ಭಾರತ್ ಕೊಂಕಣಿ ಬರೊವ್ಪ್ಯಾಂಚೊ ಎಕ್ತಾರ್ ಪುರಸ್ಕಾರ್, ವಿಮಲಾ ವಿ ಪೈ ವಿಶ್ವ್ ಕೊಂಕಣಿ ಕವಿತಾ ಪುರಸ್ಕಾರ್ ಅನಿ ಡಾ ಟಿ. ಎಮ್ ಎ ಪೈ ಪುರಸ್ಕಾರ್ ಅಂಡ್ರ್ಯೂಚ್ಯಾ ಅಂಜುರಾಚೆಂ ಪಾನ್ ಪುಸ್ತಕಾಕ್ ಲಾಬ್ಲ್ಯಾತ್. 2023 ವರ್ಸಾಚಿ ರಾಜ್ಯ್ ಮಟ್ಟಾಚಿ “ಸಂದೇಶ ಕೊಂಕ್ಣಿ ಸಾಹಿತ್ಯ್ ಪ್ರಶಸ್ತಿ” ತಾಕಾ ಲಾಬ್ಲ್ಯಾ. ಸುಮಾರ್ ತೀಸ್ ಮಟ್ವ್ಯೊ ಕಾಣಿಯೊ ಆನಿ ಶೆಂಬರಾಂ ವಯ್ರ್ ಲೇಕನಾಂ ಪ್ರಕಟ್ ಜಾಲ್ಯಾಂತ್. ರಾಕ್ಣೊ ಪತ್ರಾರ್ “ ಕಾಸ್ ಸಂಸಾರ್” ಅಂಕಣ್ ಬರಯ್ತಾ. ಮಂಗ್ಳುರ್ ಆಕಾಶ್ವಾಣಿ ಥಾವ್ನ್ ಸುಮಾರ್ 40 ಕೊಂಕ್ಣಿ ಕಾರ್ಯಕ್ರಮಾಂ ತಾಣೆಂ ಸಾದರ್ ಕೆಲ್ಯಾಂತ್. ದಾಯ್ಜಿಟಿವಿರ್ “ಭಲಾಯ್ಕೆ ದಾಯ್ಜ್” ಕಾರ್ಯೆಂ ಚಲವ್ನ್ ವೆಲಾಂ. ಸುಮಾರ್ 38 ವರ್ಸಾಂ ಪಯ್ಲೆಂ ರಾಕ್ಣೊ ಪತ್ರಾರ್ ‘ಆಂದ್ರು ಮಾಮ್’ ಲಿಖ್ಣೆ ನಾಂವಾನ್ ಭುರ್ಗ್ಯಾಂಚೊ ಸಂಸಾರ್ ತಾಣೆಂ ಚಲವ್ನ್ ವೆಲಾ. ಆಮ್ಚೊ ಯುವಕ್ ಪತ್ರಾರ್ ನಿರ್ವಾಹಕ್ ಸಂಪಾದಕ್ ಜಾವ್ನ್ ಥೊಡೊ ತೇಂಪ್ ವಾವ್ರ್ ದಿಲಾ. ಮಾಯ್ಭಾಸ್.ಕೊಮ್ ಜಾಳಿ ಜಾಗ್ಯಾರ್. ರಾಕ್ಣೊ, ದಿರ್ವೆಂ, ಉಜ್ವಾಡ್ ಪತ್ರಾಂತ್ ಕವಿತಾ ಅಂಕಣ್ ತಾಣೆಂ ಚಲಯ್ಲಾಂ, ಜಾಳಿಜಾಗ್ಯಾರ್ ಪ್ರಕಟ್ ಜಾಂವ್ಚ್ಯಾ ಕವಿತೆಂಕ್ ತೋ ಸಂಪಾದಕೀಯ್ ಬರಯ್ತಾ. ಸಾತ್ ಕವಿತಾಂ ಪುಸ್ತಕಾಂಕ್ ತಾಣೆ ಪ್ರಸ್ತಾವನ್ ಬರಯ್ಲಾಂ. ವೆವೆಗ್ಳ್ಯಾ ಕೊಂಕ್ಣಿ ಕವಿತಾಂ ಸ್ಪರ್ದ್ಯಾಂಚ್ಯೊ, ತಶೆಂಚ್ ಕೊಂಕ್ಣಿ ಕವಿತಾ ಸಾದರ್ ಸರ್ತೆಂಚೊ ವರಯ್ಣಾರ್ ಜಾವ್ನ್ ವಾವ್ರ್ ದಿಲಾ ತಶ್ಂಚ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚ್ಯಾ ಪುಸ್ತಕ್ ಪ್ರಶಸ್ತೆಚೊ ವ್ಹರಯ್ಣಾರ್ ಜಾವ್ನ್ ವಾವ್ರ್ ದಿಲಾ ಗಾಂವಾಂತ್ ಆನಿ ಪರ್ಗವಾಂತ್ ಸಬಾರ್ ಕವಿತಾಗೋಶ್ಟಿ ತಾಣೆ ಚಲವ್ನ್ ವೆಲ್ಯಾತ್. ಕವಿತಾಂ ವಿಶಿಂ ಸಬಾರ್ ಪ್ರಬಂಧ್ ಮಂಡನ್ ಕೆಲ್ಯಾತ್ ಅನಿ ಉಪನ್ಯಾಸ್ ದಿಲ್ಯಾತ್. ಕೊಂಕ್ಣಿ ಕವಿತೆ ಖಾತಿರ್ ವಾವುರ್ಚ್ಯಾ ಕವಿತಾ ಟ್ರಸ್ಟ್ ಹಾಚೊ ತೊ ಟ್ರಸ್ಟಿ ಜಾವ್ನಾಸಾ.