ಎಡ್ಡಿ ಸಿಕೇರ್

ವೃತ್ತೆನ್ ಎಕ್ ಚಿತ್ರ್ ಕಲಾಕಾರ್, ಪ್ರವತ್ತೆನ್ ಕೊಂಕ್ಣಿ ಕವಿ, ಗಾವ್ಪಿ, ಬರವ್ಪಿ, ನಟ್, ನಿರ‍್ದೇಶಕ್ ಆನಿ ಕಾರ್ಯೆಂ ನಿರ್ವಾಹಕ್ ಎಡ್ವರ್ಡ್ ಫ್ರಾನ್ಸಿಸ್ ಅಗೊಸ್ತಿನ್ ಸಿಕೇರಿಚೊ ಜಲ್ಮ್ 1951 ಅಗೋಸ್ತಾಚಾ 28 ತಾರ್ಕೆರ್ ಮಂಗ್ಳುರ್ ಇಜಯ್ ಫಿರ್ಗಜೆಂತ್ ಜಾಲೊ. ಧಾವಿ ಪರ‍್ಯಾಂತ್ ಮಂಗ್ಳುರ್ ಸಾಂ ಲುವಿಸ್ ಇಸ್ಕೊಲಾಂತ್ ಶಿಕಪ್. ಉಪ್ರಾಂತ್ ಚಾರ್ ವರ್ಸಾಂ ಬಿ ಜಿ ಎಮ್ ಕಲಾ ಇಸ್ಕೊಲಾಂತ್ ಚಿತ್ರ್ ಕಲಾ ಶಿಕಪ್. ತೆಲ್ತ್ಯಾ ಆಕರ್ಶಿತ್ ತಾಳ್ಯಾಚಾ ಎಡ್ಡಿನ್ 1976 ಇಸ್ವೆ ಥಾವ್ನ್ 1990 ಇಸ್ವೆಂತ್ ಗಾಂವ್ ಸೊಡ್ನ್ ಖತಾರ್ ವೆತಾ ವರೇಗ್, ಕಾರ್ಯೆಂ ನಿವಾಹಕ್ ಜಾವ್ನ್ ಆಪ್ಲ್ಯಾ ಸಾದ್ಯಾ, ಜೊಕ್ತ್ಯಾ ಉತ್ರಾಂ ಆನಿ ಫೊಕಾಣಾಂನಿ ಶೆಂಬರಾಂವಯ್ರ್ ’ವಿಲ್ಫಿ ನಾಯ್ಟ್’ ಸಂಗೀತ್ ಸಾಂಜ್ ಅನಿ ಶೆಂಭರಾಂನಿ ಸಬಾರ್ ಹೆರ್ ಸಾಮಾಜಿಕ್ ಕಾರ್ಯಿಂ ಸೊಭಯ್ಲ್ಯಾಂತ್. ನಟ್ ಜಾವ್ನ್ ಆಪ್ಲ್ಯಾ ಆಪ್ಲ್ಯಾ ಮೋಡಿಚ್ಯಾ ತಾಳ್ಯಾನ್ ಅನಿ ತೀಕ್ಷ್ಣ್ ಅಬಿನಯನಾನ್ ಕಸಲ್ಯಾಯ್ ಪಾತ್ರಾಂತ್ ಜೀವ್ ಭರ್ಚಿ ಸಕತ್ ತಾಚಿ. ಅಬಿನಯ್, ಸಂಗೀತ್, ಉಜ್ವಾಡ್ ಹ್ಯಾ ಸರ್ವಾಂಚಾ ಕಲಾತ್ಮಕ್ ಮಿಲನಾಚೆಂ ನವೆಂಪೊಣ್ ಕೊಂಕ್ಣಿ ನಾಟಕ್ ನಿರ್ದೆಶನಾಂತ್ ಹಾಡುನ್ ಫಾಮಾದ್ ಕವಿ ನಾಟಕಿಸ್ತ್ ಚಾಫ್ರಾ ದೆಕೋಸ್ತಾಚೆ ಆನಿ ಹೆರಾಂಚೆ ಸಬಾರ್ ನಾಟಕ್ ಆಪ್ಲ್ಯಾ ಕಲಾತ್ಮಕ್ ನಿರ್ದೇಶನಾನ್ ತಾಣೆ ರಂಗಯಿಲ್ಲೆ. ನಾಟಕ್ ಸ್ಪರ್ದ್ಯಾಂನಿ ನಟನಾಕ್ ಆನಿ ನಿರ್ದೇಶನಾಕ್ ಸಬಾರ್ ಬಹುಮಾನಾಂ ತಾಣೆಂ ಆಪ್ಣಾಯಿಲ್ಲಿಂ. ನವ್ಯಾಚ್ ಶೈಲೆಚೆ ’ವರ್ಸಾಕ್ ಎಕ್ ಪಾವ್ಟಿಂ’ ’ತೆಂ ತೊ ಅನಿ ಹಾಂವ್’ ಬಾರಿಚ್ ಯಶಸ್ವಿ ಜಾಲ್ಲೆ ತಾಚೆ ಮಟ್ವೆ ನಾಟಕ್. 1982 ಇಸ್ವೆಂತ್ ತಾಣೆಂ ಸುರ್ವಾತಲ್ಲ್ಯಾ ’ರಂಗ್-ತರಂಗ್’ ಬೊಂದೆರಾಕಾಲ್, ಕೊಡ್ಯಾಳ್ ಅನಿ ಸುತ್ತುರಾಂತ್ ಸಬಾರ್ ನಾಟಕ್ ಯಶಸ್ವೆನ್ ತಾಣೆ ಸಾದರ್ ಕೆಲ್ಲೆ. ತಾಣೆಂಚ್ ಬರವ್ನ್ ನಟನ್ ಆನಿ ನಿರ್ದೇಶನ್ ಕೆಲ್ಲ್ಯಾ ’ಪರತ್ ಎಕ್ ಪಾವ್ಟಿಂ’ ನಾಟಕಾನ್, ಉದಯವಾಣಿ ಅನಿ ರಂಗಭೂಮಿ ಉಡುಪಿ ಹಾಣಿ 1986 ಇಸ್ವೆಂತ್ ಚಲಯಿಲ್ಲ್ಯಾ ಪಯಿಲ್ಲ್ಯಾ ಅಖಿಲ್ ಭಾರತ್ ನಾಟಕ್ ಸ್ಪದ್ಯಾಂತ್, ನಾಟಕಾಕ್, ನಿರ್ದೇಶನಾಕ್ ಅನಿ ನಟನಾಕ್ ಪ್ರಥಮ್ ಬಹುಮಾನಾಂ ಆಪ್ಣಾವ್ನ್ ದಾಖ್ಲೊ ರಚಲ್ಲೊ. ಉಪ್ರಾಂತ್ ಬುಕಾ ರುಪಾರ್ ಪ್ರಕಟ್ ಜಾಲ್ಲ್ಯಾ ಹ್ಯಾ ನಾಟಕಾಕ್ ಕರ್ನಾಟಕ್ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ’ಅತುತ್ತಮ್ ನಾಟಕ್ ಪುಸ್ತಕ್’ ಪುರಸ್ಕಾರಯ್ ಲಾಬ್ಲಾ. 1990 ಥಾವ್ನ್ 2012 ಇಸ್ವೆ ಪರ್ಯಾಂತ್ ಖತಾರಾಂತ್ ಆಸ್ತಾನಾ, ಕೊಂಕ್ಣೆಚ್ಯಾ ಹರ್ ಕಾರ್ಯಾಂನಿ ಸಕ್ರೀಯ್ ಪಾತ್ರ್ ಘೆವ್ನ್ ಕೊಂಕ್ಣೆಚೊ ಆಪ್ಲೊ ವಾವ್ರ್ ತಾಣೆಂ ಕಾಯಾಮ್ ದವರಲ್ಲೊ. ದೆವಾದಿನ್ ಕೊಂಕಣ್ ಕೊಗುಳ್ ವಿಲ್ಫಿ ರೆಬಿಂಬಸ್ ಹಾಚ್ಯಾ ಮಾನಾಕ್ ಅನಿ ಉಡಾಸಾಕ್, ದೊಹಾ ಕತಾರಾಂತ್ ತಶೆಂ ಪಾಟಿಂ ಗಾಂವಾಕ್ ಆಯ್ಲ್ಯಾ ಉಪ್ರಾಂತ್ ಮಂಗ್ಳುರಾಂತ್ ಸಭಾರ್ ’ವಿಲ್ಫಿ ದೀಸ್’ ತಾಚ್ಯಾ ಮುಕೆಲ್ಪಣಾರ್ ಪ್ರಸ್ತುತ್ ಕೆಲ್ಯಾತ್. ವಿಲ್ಫಿಚ್ಯಾ ಪಾವಾಣ್ಶಾವ್ಯಾ ಜಲ್ಮಾ ದಿಸಾಚಾ ಸಂದರ್ಬಾರ್, ವಿಲ್ಫಿಚಾಚ್ ಪದಾಂದ್ವಾರಿಂ ತಾಚೆಂ ಜಿವಿತ್ ಪಿಂತ್ರಾಯಿಲ್ಲೆಂ ’ಗೀತ್ ಜಾಲೆಂ ಜಿವಿತ್’ ಕಾರ್ಯಾಚಾ ಯಶಸ್ವೆ ಪಾಟ್ಲ್ಯಾನ್, ಎಡ್ಡಿ ಸಿಕೆರಿಚೆಂ ಸ್ರಜನಾತ್ಮಕ್ ಚಿಂತಾಪ್ ಅನಿ ಕಲಾತ್ಮಕ್ ಸಾದರ್ಪಣ್ ಆಸಲ್ಲೆಂ. 2016 ವರ್ಸಾಚೆ ಸುರ್ವೆರ್ ಪ್ರಖ್ಯಾತ್ ಜಯ್ತ್ ನಾಟಕ್ ’ಸಪ್ನ ಸಾರಸ್ವತ್’ ಜಿ ಎಸ್ ಬಿ ಸಮಾಜೆಚ್ಯಾ ಸುಮಾರ್ 50 ವಯ್ರ್ ಕಲಾಕಾರಂಕ್ ಘೆವ್ನ್, ನಿರ್ದೇಶನ್ ದೀವ್ನ್ ಯಶಸ್ವೆನ್ ರಂಗಮಂಚಾರ್ ಸಾದರ್ ಜಾಲ್ಲೊ. 2014 ಇಸ್ವೆಂತ್ ತಾಣೆಂ ಲಿಖಲ್ಲ್ಯಾ ’ಗಲ್ಫ್ ಸರ‍್ಗಾರ್ ಏಕ್ ಸುಕ್ರಾರ್’ ನವ್ಯಾಚ್ ನಾಟಕಾಕ್, ದಾಯ್ಜಿ ರಂಗ್ ಮಂದಿರ್ ದುಬಾಯ್ ಥಾವ್ನ್ ಅತ್ಯುತಮ್ ನಾಟಕ್ ಕ್ರತಿ ಪುರಸ್ಕಾರ್ ಲಾಬ್ಲಾ. ಪ್ರಸ್ತುತ್ ಚಿತ್ರ್ ಕಲಾಕಾರ್ ಜಾವ್ನ್ ’ಆರ್ಸೊ’ ಮಹಿನ್ಯಾಳೆಂ ಪತ್ರ್ ವಿನ್ಯಾಸ್ ತಶೆಂಚ್ ’ಬೆಂದುರ‍್ಚೊ ತಾಳೊ’ ಪತ್ರಾಚೊ ಸಂಪಾದಕ್ ಆನಿ ವಿನ್ಯಾಸ್‌ಕಾರ್ ಜಾವ್ನ್ ಸೆವಾ ದೀವ್ನ್ ಆಸಾ. 2024 ಅಗೋಸ್ತ್ 31 ತಾರಿಕೆರ್ ತಾಚೊ ನಾಟಕ್ ಆನಿ ಹೆರ್ ಲೇಖನಾಂಚೊ ಸಂಗ್ರಹ್ ’ನವ್-ರಂಗ್’ ನಾಟಕಾಂ ಪುಸ್ತಕ್, ಸಾಂ ಲುವಿಸ್ ಪ್ರಕಾಶನಾನ್ ಪ್ರಗಟ್‌ಲ್ಲೊ ಮೊಕ್ಳಿಕ್ ಜಾಲಾ. ಸದ್ದ್ಯಾಕ್ ’ರಂಗ್-ತರಂಗ್’ - ಶೆಂಭರ್ ಮಿನುಟಾಂ, ಪನ್ನಾಸ್ ರುಪಾಂ - ಅಭಿನಯ್ ಆನಿ ವಾಚನ್ ಏಕ್ ವ್ಯಕ್ತಿ ರಂಗ್ ಪ್ರದರ್ಶನ್ ಗಾವಾಂತ್ ತಶೆಂ ಪರ್ಗಾಂವಾಂತ್ ಪ್ರಸ್ತುತ್ ಕರ್ಚಿ ತಯಾರಾಯ್ ಕರುನ್ ತೊ ಆಸಾ. ಎಡ್ಡಿಚಿ ಪತಿಣ್ ಜೋಯ್ಸ್ ತಾಕಾ ತಾಚ್ಯಾ ಕಲಾ ವಾವ್ರಾಂತ್ ಸದಾಂಚ್ ಸಾಂಗಾತ್ ದಿತೇ ಆಸಾ. ತಾಚಿ ವ್ಹಡ್ಲಿ ಧುವ್ ಏಡಲ್ ಮಾರ್ಗರೆಟ್, ಪತಿ ಡೊ. ಪ್ರಣಯ್ ಜಿಂದಾಲ್ ಆನಿ ಭುರ್ಗಿಂ ಮಾನ್ಯಾ ಆನಿ ತಾನ್ಯಾ ಸಂಗಿಂ ದೋಹಾ ಖತಾರಾಂತ್ ವಸ್ತಿ ಕರ್ತಾತ್. ಧಾಕ್ಟಿ ಧುವ್ ಡೊ. ಜೊಏನ್ ಜುಲಿಯೆಟ್, ಮಂಗ್ಳುರ್ ಫಾ. ಮುಲ್ಲರ್ ಮೆಡಿಕಲ್ ಕೊಲೇಜಿಂತ್ ಜುನಿಯರ್ ರೆಸಿಡೆಂತ್ ಜಾವ್ನ್ ವಾವ್ರ್ ಕರ್ತಾ.