ಆರ್ವಾ ಸಾಂ. ಪೆದ್ರು ಕ್ಲೇವರ್ ಇಸ್ಕೊಲಾಚ್ಯಾ ಸಭಾಂಗ್ಣಾಂತ್ ಸಾಹಿತ್ಯ ಅಕಾಡೆಮಿ, ನವಿ ದಿಲ್ಲಿ ಆನಿ ಆರ್ವಾ ಭಾರತೀಯ್ ಕಥೊಲಿಕ್ ಯುವ ಸಂಚಾಲನಾಚ್ಯಾ ಜೋಡ್ ಅಸ್ರ್ಯಾಖಾಲ್ ಗ್ರಾಮಲೋಕ ಕಾರ್ಯಾವಳ್ ಸಾದರ್ ಜಾಲಿ.
ಸಾಂ. ಪೆದ್ರು ಕ್ಲೇವರ್ ಫಿರ್ಗಜೆಚೊ ವಿಗಾರ್ ಮಾ| ಬಾ| ಎಲಿಯಾಸ್ ಸೊಜ್ ಹಾಣಿ ಪಣ್ತಿ ಪೆಟವ್ನ್ ಕಾರ್ಯಾವಳ್ ಉಗ್ತಾಯ್ಲಿ ಆನಿ “ಕೊಂಕ್ಣಿ ತಾಲೆಂತಾಂ ಆರ್ವಾ ತಸಲ್ಯಾ ಗಾಂವಾಂನಿ ಖೂಬ್ ಆಸಾತ್. ಆರ್ವಾ ಫಿರ್ಗಜೆಚ್ಯಾ ಗುಮ್ಟಾಂ ಗಾಯನ್ ಪಂಗ್ಡಾನ್ ದಿಯೆಸೆಜಿ ಹಂತಾರ್ ಚಲ್ಲೆಲ್ಯಾ ಸ್ಪರ್ಧ್ಯಾಂತ್ ಇನಾಮ್ ಜೊಡುನ್ ಫಿರ್ಗಜೆಕ್ ಆನಿ ಆಮ್ಚ್ಯಾ ಗಾಂವಾಂಕ್ ಕೀರ್ತ್ ಹಾಡ್ಲ್ಯಾ. ಆರ್ವಾಂತ್ ರೇಶ್ಮಾ ತಸಲಿಂ ತರುಣ್ ಕವಯತ್ರಿಯ್ ಆಸಾತ್. ತಾಂಚೆಥಂಯ್ ಸಾಹಿತ್ಯಾಚಿ ಪ್ರತಿಭಾ ಆಸಾ. ಪ್ರೋತ್ಸಾವ್ ಆನಿ ಮಾರ್ಗದರ್ಶನಾಚಿ ಗರ್ಜ್ ಆಸಾ. ಸಾಹಿತ್ಯ ಅಕಾಡೆಮಿ ತಸಲೊ ರಾಷ್ಟ್ರೀಯ್ ಪಾಂವ್ಡ್ಯಾಚೊ ಸರ್ಕಾರಿ ಸಂಸ್ಥೊ ಡಿಲ್ಲಿ ಥಾವ್ನ್ ಸಾಹಿತ್ಯ್ ಆನಿ ಕಲೆಕ್ ಪ್ರೋತ್ಸಾವ್ ದಿಂವ್ಚ್ಯಾ ಇರಾದ್ಯಾನ್, ಪ್ರತೇಕ್ ಜಾವ್ನ್ ಯುವಜಣಾಂಕ್ ಉರ್ಭೆನ್ ಭರುಂಕ್ ಮ್ಹಣ್ ಆರ್ವಾ ತಸಲ್ಯಾ ಗ್ರಾಮ ಕ್ ಯೆತಾ ಮ್ಹಣ್ಚಿ ಗಜಾಲ್ಚ್ ಆಮ್ಕಾಂ ವರ್ತ್ಯಾ ಅಭಿಮಾನಾಚಿ ಆನಿ ದಾದೊಸ್ಕಾಯೆಚಿ. ಹ್ಯಾ ಖಾತೀರ್ ಹೆಂ ಕಾರ್ಯೆಂ ಸಂಘಟನ್ ಕೆಲ್ಲ್ಯಾ ಡೊ| ವಿಲ್ಮಾ ಬಂಟ್ವಾಳ್ ಹಿಕಾ ಆನಿ ಸಾಹಿತ್ಯ ಅಕಾಡೆಮಿ ನವಿ ದಿಲ್ಲಿ ಕೊಂಕ್ಣಿ ಸಲ್ಹಾಗಾರ್ ಸಮಿತಿಚೊ ನಿಮಂತ್ರಕ್ ಕವಿ ಮೆಲ್ವಿನ್ ರೊಡ್ರಿಗಸ್ ಆನಿ ಭಾಷಾ ಸಲ್ಹಾಗಾರ್ ಸಮಿತಿಚೊ ಸಾಂದೊ ಎಚ್ಚೆಮ್, ಪೆರ್ನಾಲ್ ಹಾಂಕಾ ಆಮಿ ಅಭಾರಿ ಜಾವ್ನಾಸಾಂವ್” ಮ್ಹಣಾಲೊ.
ಸಾಹಿತ್ಯ ಅಕಾಡೆಮಿ, ನವೀ ಡೆಲ್ಲಿ ಕೊಂಕ್ಣಿ ಭಾಷಾ ಸಲ್ಹಾಗಾರ್ ಸಮಿತಿಚೊ ಸಾಂದೊ ಎಚ್ಚೆಮ್, ಪೆರ್ನಾಲ್ ಹಾಣಿ ಸಾಹಿತ್ಯ ಅಕಾಡೆಮಿ ವಾವ್ರಾ ವ್ಯಾಪ್ತ್, ಕೊಂಕ್ಣಿ ಭಾಷಾ ವಿಭಾಗಾನ್ ಎದೊಳ್ ಕೆಲ್ಲಿಂ ಆನಿ ಚಾಲು ಆಸ್ಚಿಂ ಕೊಂಕ್ಣೆಚಿಂ ಕಾಮಾಂ ಹೆ ವಿಶ್ಯಾಂತ್ ವಿವರ್ ದೀವ್ನ್ ಸಯ್ರ್ಯಾಂಚಿಂ ಒಳಕ್ ಕರುನ್ ದೀವ್ನ್ ಯೆವ್ಕಾರ್ ಮಾಗ್ಲೊ. ವಾಲ್ಟರ್ ಕ್ರಾಸ್ತಾ ಆನಿ ಪಂಗ್ಡಾನ್ ಗುಮ್ಟಾಂ ಪದಾಂತ್ ಪ್ರಾರ್ಥನಾ ಗೀತ್ ಸಾದರ್ ಕರುನ್ ಕಾರ್ಯಾಕ್ ಚಾಲನ್ ದಿಲೆಂ.
ಡೊ| ವಿಲ್ಮಾ ಬಂಟ್ವಾಳ್ ಹಿಚ್ಯಾ ಅಧ್ಯಕ್ಶ್ಪಣಾರ್ ಚಲ್ಲೆಲ್ಲ್ಯಾ ಕಾರ್ಯವಳಿಂತ್ ವಿದ್ಯಾ ನಾಯಕ್ ಹಿಣೆ ರಾಂದ್ಪಾ ವಿಶ್ಯಾಂತ್ ಮಾಹೆತ್ ಆನಿ ಗಾಣಾಂ, ವಾಲ್ಟರ್ ಕ್ರಾಸ್ತಾ ಹಾಣಿಂ ಗುಮ್ಟಾಂ ವಿಶ್ಯಾಂತ್ ಮಾಹೆತ್ ಆನಿ ಆರ್ವಾ ಫಿರ್ಗಜೆಂತ್ ಗುಮ್ಟಾಂ ಪದಾಂಚಿಂ ಪರಂಪರಾ ಜಗವ್ನ್ ದವರ್ಚೆ ದಿಶೆನ್ ಚಲೊನ್ ಆಸ್ಚೊ ವಾವ್ರ್ ಆನಿ ಜಾಸ್ಮಿನ್ ರೇಶ್ಮಾ ಕ್ರಾಸ್ತಾ ಹಾಣಿ ಕವಿತಾ ಸಾದರ್ ಕೆಲ್ಯೊ. ಡೊ| ವಿಲ್ಮಾ ಝುಜಾಚ್ಯಾ ಪಾಟಿಥಳಾರ್ ಬರಯಿಲ್ಲ್ಯೊ ಕವಿತಾ ವಾಚುನ್ ಕಾರ್ಯಾವಳಿಚೊ ಸಮಾರೋಪ್ ಕೆಲೊ.
ಕಾರ್ಯಾಕ್ ಆರ್ವಾ ಫಿರ್ಗಜ್ ಗೊವ್ಳಿಕ್ ಪರಿಷದೆಚೊ ಅಧ್ಯಕ್ಷ್ ಲಿಯೋ ಪಿರೇರಾ, ಕಾರ್ಯದರ್ಶಿ ಲಾರೆನ್ಸ್ ಫಾಯ್ಸ್, ಸಚೇತಕಿ ಅಶ್ಮಿತಾ ಪ್ರಿಯಾ ಡಿ ಸೊಜಾ ಆನಿ ಐಸಿವೈಎಮ್ ಕಾರ್ಯದರ್ಶಿ ಅಶ್ವಿನ್ ರೊಡ್ರಿಗಸ್ ಹಾಜರ್ ಆಸ್ಲೆ. ಐಸಿವೈಎಮ್, ಆರ್ವಾ ಘಟಕಾಚಿ ಅಧ್ಯಕ್ಷಿಣ್ ನತಾಶಾ ಮಸ್ಕರೇನ್ಹಸ್ ಹಿಣೆ ದಿವ್ನಾಸ್ ಪಾಟಯ್ಲೆ. ಆರ್ವಾ ಆನಿ ಆಸ್ಪಾಸ್ಚ್ಯಾ ವಠರಾಂತ್ಲೊ ಚಡುಣೆ ಶೆಂಭೊರ್ ಲೊಕಾನ್ ಗ್ರಾಮಲೋಕ ಕಾರ್ಯಾಂತ್ ಉರ್ಭೆನ್ ವಾಂಟೊ ಘೆತ್ಲೊ.
1 comment
Congratulations to Rev Fr Elias D Souza, ICYM Arva , Sri Melwyn Rodrigues of Sahitya Academy New Delhi, Dr Wilma ,Bantwal , Sri H.M Pernal , and all others responsible for the success of this beautiful program. Thanks to KITTAL for the nice pictures.