ಪರೀಕ್ಶಾ ಬರಂವ್ಚ್ಯಾ ವಿದ್ಯಾರ್ಥಿಂ ಖಾತಿರ್, ಶಿಕಪ್ ಆನಿ ಫುಡಾರಾಚೆರ್ ದೆವಾಚೆಂ ಬೆಸಾಂವ್ ಮಾಗ್ಚ್ಯಾ ಇರಾದ್ಯಾನ್ ಕಾರ್ಮೆಲ್ ಗುಡ್ಯಾರ್, ಫೆಬ್ರೆರ್ 21 ವೆರ್ ವಿಶೇಸ್ ಮಾಗ್ಣ್ಯಾವಿಧಿ ಮಾಂಡುನ್ ಹಾಡ್ಲ್ಲಿ.
ಮಾ| ಬಾ| ಜೊನ್ ಪಿಂಟೊ ಹಾಣಿ ಮಿಸಾಚೆಂ ಪವಿತ್ ಬಲಿದಾನ್ ಭೆಟಯ್ಲೆಂ. ಆಪ್ಲ್ಯಾ ಪ್ರಸಂಗಾಂತ್ “ಪರೀಕ್ಶೆಚೊ ವೇಳ್ ಫಕತ್ ವಿದ್ಯಾರ್ಥಿಂ ಖಾತೀರ್ ಮಾತ್ ನಯ್, ಪೋಶಕಾಂಕೀ ದಬಾವಾಚೊ ಆಸ್ತಾ. ವಿದ್ಯಾರ್ಥಿಂನಿ ಅಭ್ಯಾಸಾಚಿ ಏಕ್ ವೆಳಾವಳೆರಿ ತಯಾರ್ ಕರುನ್ ತೆ ಪರ್ಮಾಣೆ ಅಧ್ಯಯನ್ ಕೆಲ್ಯಾರ್ ಶಿಕಪ್ ಸುಲಭ್ ಜಾತಾ. ನಿಯಮಿತ್ ಅಭ್ಯಾಸ್ ಆನಿ ಪರಿಕ್ಶೆಚ್ಯಾ ವೆಳಾರ್ ಮತ್ ಶಾಂತ್ ದವರ್ಚೆವರ್ವಿಂ ಬರೆಂ ಫಳಿತಾಂಡ್ ಜೊಡುಂಯೆತಾ” ಮ್ಹಣ್ ತಾಣಿ ಸಲಹಾ ದಿಲಿ.
ಮಿಸಾ ಉಪ್ರಾಂತ್ ಪವಿತ್ ಸಾಕ್ರಾಮೆಂತಾಚೆಂ ಆರಾಧನ್ ಚಲ್ಲೆಂ. ಹ್ಯಾ ಸಂದರ್ಭಿಂ ವಿದ್ಯಾರ್ಥಿ, ಪೋಶಕ್ ಆನಿ ಶಿಕ್ಶಕಾಂ ಖಾತೀರ್ ವಿಶೇಸ್ ಮಾಗ್ಣೆಂ ಕೆಲೆಂ. ಉಪ್ರಾಂತ್ ಪರೀಕ್ಶಾ ಬರಂವ್ಚ್ಯಾ ಭುರ್ಗ್ಯಾಂಕ್ ತೆಲಾಚೊ ಅಭಿಶೇಕ್ ಕರುನ್ ಬೆಸಾಂವ್ ದಿಲೆಂ.
ಹ್ಯಾ ಸಂದರ್ಭಾರ್ ಪೂನ್ಶೆತಾಚೊ ನಿರ್ದೇಶಕ್ ಮಾ| ಬಾ| ಸ್ಟೀವನ್ ಪಿರೇರಾ ಹಾಣಿ ವಿದ್ಯಾರ್ಥಿಂಕ್ ಪರೀಕ್ಶೆಂತ್ ಯಶಸ್ವಿ ಆನಿ ಬರ್ಯಾ ಭವಿಶ್ಯಾ ಖಾತೀರ್ ಶುಭಾಶಯ್ ಪಾಟಯ್ಲೆ.
ಚಾಲು ವರಸ್ ಮಂಗ್ಳುರ್ ದಿಯೆಸೆಜಿನ್ ‘ಭುರ್ಗ್ಯಾಂಚೆಂ ವರಸ್ ಮ್ಹಣ್ ಪಾಚಾರ್ಲೆಲ್ಯಾ ಪಾಟಿಥಳಾರ್ ಹಿ ಮಾಗ್ಣ್ಯಾವಿಧಿ ಮಹತ್ವಾಚಿ ಠರ್ತಾ ಆಸುನ್, ಕಾರ್ಮೆಲ್ ಗುಡ್ಯಾಚೆಂ ಬಾಳೊಕ್ ಜೆಜೆಚೆಂ ಪೂನ್ಶೆತ್ ಹರೇಕಾ ವರ್ಸಾ ಶಿಕ್ಪಾ ವರಸ್ ಸುರು ಜಾತಾನಾ ಆನಿ ಪರೀಕ್ಶೆಂಚ್ಯಾ ವೆಳಾರ್ ಅಸಲಿಂ ಕಾರ್ಯಕ್ರಮಾಂ ಮಾಂಡುನ್ ಹಾಡ್ಚೆ ಬರಾಬರ್ ವಿದ್ಯಾರ್ಥಿಂಕ್ ಆತ್ಮೀಕ್ ಬಳ್ ದಿಂವ್ಚೆಂ ಕಾಮ್ ಕರುನ್ ಆಸಾ.
