ನವ್ಯಾನ್ ಭಾಷಾಂತರ್ ಕರುನ್ ತಯಾರ್ ಕೆಲ್ಲೊ ‘ಕೊಂಕಣಿ ರೋಮಿ ಮಿಸಾಗ್ರಂಥ್’ ಬುದ್ವಾರಾ, 25 ಮಾರ್ಚ್ 2026 ವೆರ್ ದಿಯೆಸೆಜ್ ಹಂತಾರ್ ಅಧಿಕೃತ್ ರಿತಿನ್ ಮೊಕ್ಳಿಕ್ ಕೆಲೊ. ಮಂಗ್ಳುರ್ ದಿಯೆಸೆಜಿಚ್ಯಾ ದೋನ್ ದಿಸಾಂಚ್ಯಾ ವಾರ್ಷಿಕ್ ಗೊವ್ಳಿಕ್ ಸಮಾಲೋಚನಾಚ್ಯಾ ಸುರ್ವಿಲ್ಯಾ ಅಧಿವೇಶನಾವೆಳಿಂ ಜೆಪ್ಪುಚ್ಯಾ ಸಾಂತ್ ಅಂತೋನಿ ಆಶ್ರಮಾಂತ್ ಹಿ ಚಾರಿತ್ರಿಕ್ ಮೊಕ್ಳಿಕ್ ಚಲ್ಲಿ.
ಹ್ಯಾ ವರ್ಸಾಚ್ಯಾ ಫೆಬ್ರೆರ್ 3, 2026 ವೆರ್ ಬೆಂಗ್ಳುರಾಂತ್ ಚಲ್ಲೆಲ್ಯಾ ಸಿಸಿಬಿಐ ಜಮಾತೆಂತ್ ಅಪೊಸ್ತೊಲಿಕ್ ನುನ್ಸಿಯೊ ಹಾಣಿಂ ಹೊ ಮಿಸಾಗ್ರಂಥ್ ರಾಷ್ಟ್ರೀಯ್ ಹಂತಾರ್ ಮೊಕ್ಳಿಕ್ ಕೆಲ್ಲೊ. ತಾಂತ್ರಿಕ್ ರಿತಿರ್ ಮಂಗ್ಳುರಾಂತ್ ಚಲ್ಲೆಲ್ಯಾ ಹ್ಯಾ ಮೊಕ್ಳಿಕೆಚ್ಯಾ ಕಾರ್ಯಾಕ್ ಮಂಗ್ಳುರ್ ದಿಯೆಸೆಜಿಚೆ ಧರ್ಮಾಧ್ಯಕ್ಷ್ ಆನಿ ಕೊಂಕಣಿ ಲಿತುರ್ಜಿ ಆಯೋಗಾಚೆ ಗುರ್ಕಾರ್ ಅಧಿಕ್ ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಣಿಂ ಮುಖೇಲ್ಪಣ್ ಘೆತ್ಲೆಂ.
ಹ್ಯಾ ವೆಳಿಂ ದಿಯೆಸೆಜಿಚೆ ವಿಕಾರ್ ಜೆರಾಲ್ ಭೋವ್ ಮಾ| ಮೊನ್ಸಿಜ್ಞೊರ್ ಮ್ಯಾಕ್ಸಿಮ್ ಎಲ್. ನೊರೊನ್ಹಾ, ಚಾನ್ಸೆಲರ್ ಭೋವ್ ಮಾ| ವಿಕ್ಟರ್ ಜೋರ್ಜ್ ಡಿ’ಸೋಜಾ, ಯಾಜಕ್ ಮಂಡಳಿಚೆ ಕಾರ್ಯದರ್ಶಿ ಭೋವ್ ಮಾ| ಬಾಪ್ ಜೊಸೆಫ್ ಮಾರ್ಟಿಸ್, ಸೆಮಿನರಿಚೊ ಮಾಜಿ ರೆಕ್ಟರ್ ಮಾ| ದೊ ರೊನಾಲ್ಡ್ ಸೆರಾವೊ, ಬೈಬಲ್ ಆಯೋಗಾಚೆ ಕಾರ್ಯದರ್ಶಿ ಮಾ| ದೊ| ವಿನ್ಸೆಂಟ್ ಸಿಕ್ವೇರಾ, ಮಂಗಳ ಜ್ಯೋತಿಚೆ ನಿರ್ದೇಶಕ್ ಮಾ| ಬಾಪ್ ರೋಹಿತ್ ಡಿ’ಕೋಸ್ತಾ ಆನಿ ಜೆಪ್ಪು ಸಾಂತ್ ಅಂತೊನಿ ಆಶ್ರಮಾಚೆ ನಿರ್ದೇಶಕ್ ಮಾ| ಬಾಪ್ ಜೆ.ಬಿ. ಕ್ರಾಸ್ತಾ ಹಾಜರ್ ಆಸ್ಲ್ಲೆ.
ಪ್ರಧಾನ್ ಮಿಸಾಗ್ರಂಥಾ ಸಾಂಗಾತಾ ಹೆರ್ ತೀನ್ ಮಹತ್ವಾಚೆ ಬೂಕ್ ಹ್ಯಾ ವೆಳಿಂ ಲೊಕಾರ್ಪಣ್ ಕೆಲೆ:
1. ಮಿಸಾಚ್ಯೆ ಸಂಭ್ರಮ್ಣೆಚಿ ಮಾಂಡಾವಳ್ -ಭಾವಾಡ್ತ್ಯಾಂಚ್ಯಾ ವಾಪರಾ ಪಾಸತ್: ಲೊಕಾಂಚ್ಯಾ ಜವಾಬಾಂಚೊ ಹೊ ಬೂಕ್ ಸಿಸಿಬಿಐ-ಚ್ಯಾ ಅಧಿಕಾರಾಖಾಲ್, ಆರ್ಚ್ ಬಿಸ್ಪ್ ಪೀಟರ್ ಮಚಾದೊ ಹಾಂಚ್ಯಾ ಇಂಪ್ರಿಮಾತುರಾ (Imprimatur) ಸವೆಂ ಪ್ರಕಟ್ ಕೆಲಾ.
2. ಆಮ್ಚೆಂ ಮೀಸ್ ತಾಚ್ಯಾ ಉಗ್ಡಾಸಾಕ್: ಮೀಸ್ ಆನಿ ಮಿಸಾಚ್ಯಾ ಭಾಗಾಂಚೊ ಅರ್ಥ್: ರೊಜಾರಿಯೊ ಕಾಥೆದ್ರಾಲಾಚೆ ಮಾ| ಬಾಪ್ ವಲೇರಿಯನ್ ಫೆರ್ನಾಂಡಿಸ್ ಹಾಣಿಂ ಬರಯಿಲ್ಲೊ ಹೊ ಬೂಕ್, ಭಾವಾರ್ಥಿ ಲೊಕಾಕ್ ಮಿಸಾಚೊ ಅರ್ಥ್ ಸಮ್ಜೊಂಚ್ಯಾಕ್ ಮಜತ್ ಕರ್ತಾ.
3. Together Forever in Christ: Reflections on the Sacrament of Marriage: ಕಾಜಾರಾಚ್ಯಾ ಮಿಸಾಂವೆಳಿಂ ಶೆರ್ಮಾಂವ್ ಆನಿ ಚಿಂತನ್ ದೀಂವ್ಕ್ ಮಜತ್ ಜಾಂವ್ಚೊ ಹೊ ಇಂಗ್ಲಿಷ್ ಬೂಕ್ ಕುಟ್ಮಾ ಆಯೋಗಾಚೆ ಕಾರ್ಯದರ್ಶಿ ಮಾ| ಬಾಪ್ ಆಲ್ವಿನ್ ರಿಚರ್ಡ್ ಡಿ’ಸೋಜಾ ಹಾಣಿಂ ಸಂಪಾದನ್ ಕೆಲಾ. ಮಂಗಳ ಜ್ಯೋತಿ ಆನಿ ಎಟಿಸಿ ಪಬ್ಲಿಷರ್ಸ್ ಹಾಣಿಂ ಹೊ ಪ್ರಕಟ್ ಕೆಲಾ.
ಕೊಂಕ್ಣಿ ಲಿತುರ್ಜಿ ಆಯೋಗಾಚೆ ಕಾರ್ಯದರ್ಶಿ ಮಾ| ಬಾಪ್ ವಿಜಯ್ ಮಚಾದೊ ಹಾಣಿಂ ಹ್ಯಾ ಬೃಹತ್ ವಾವ್ರಾಚೊ ಸಂಪೂರ್ಣ್ ವಿವರ್ ದಿಲೊ. ಮಾ| ದೊ| ರೊನಾಲ್ಡ್ ಸೆರಾವೊ ಹಾಣಿಂ ನವ್ಯಾ ಮಿಸಾಗ್ರಂಥಾಂತ್ ಆಸ್ಚೆ ದೇವ್ಶಾಸ್ತ್ರೀಯ್ ಆನಿ ರಚನಾತ್ಮಕ್ ಬದ್ಲಾವಣ್ಯೆವಿಶಿಂ ಮಾಹೆತ್ ದಿಲಿ.
ಸಿಸಿಬಿಐ-ಚೆ ದೇವ್ ಸ್ತುತಿ ಆಯೋಗಾಚೊ ಚೇರ್ಮೆನ್ ಜಾವ್ನ್ ಬಿಸ್ಪ್ ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಣಿಂ ಉಲವ್ನ್, ಜೂನ್ 7, 2026 ವೆರ್, ಕೊರ್ಪುಸ್ ಕ್ರಿಸ್ತಿ ಫೆಸ್ತಾ ದಿಸಾ ಥಾವ್ನ್ ನವೊ ಮಿಸಾಗ್ರಂಥ್ ದಿಯೆಸೆಜಿಂತ್ ಅಧಿಕೃತ್ ರಿತಿನ್ ಜಾರಿ ಜಾತಲೊ ಆನಿ ಹ್ಯಾ ವಿಶಿಂ ಏಕ್ ಡಿಕ್ರಿ (Decree) ದಿತಲೆ ಮ್ಹಣ್ ಕಳಯ್ಲೆಂ.
ನವೊ ಮಿಸಾಗ್ರಂಥ್ ತಯಾರ್ ಕರ್ಚ್ಯಾಂತ್ ಥಕನಾಸ್ತಾನಾ ವಾವ್ರ್ ಕೆಲ್ಲ್ಯಾ ಮಾ| ದೊ ರೊನಾಲ್ಡ್ ಸೆರಾವೊ, ಮಾ| ಬಾಪ್ ವಲೇರಿಯನ್ ಫೆರ್ನಾಂಡಿಸ್ ಆನಿ ಮಾ| ಬಾಪ್ ವಿಜಯ್ ಮಚಾದೊ ಹಾಂಕಾಂ ಹ್ಯಾ ವೆಳಿಂ ಸನ್ಮಾನ್ ಕೆಲೊ.
ಬಾಪ್ ವಿಜಯ್ ಮಚಾದೊ ಹಾಣಿಂ ಉಪ್ಕಾರ್ ಆಟಯ್ಲೊ. 2010 ಮಾರ್ಚ್ ಮ್ಹಯ್ನ್ಯಾಂತ್ ಹ್ಯಾ ವಾವ್ರಾಕ್ ಬುನ್ಯಾದ್ ಘಾಲ್ನ್ ನಿರಂತರ್ ಪಾಟಿಂಬೊ ದಿಲ್ಲ್ಯಾ ನಿವೃತ್ತ್ ಬಿಸ್ಪ್ ಆಧಿಕ್ ಮಾ| ದೊ| ಅಲೋಶಿಯಸ್ ಪಾವ್ಲ್ ಡಿ’ಸೋಜಾ ಹಾಂಚೊ ತಾಣಿಂ ವಿಶೇಶ್ ರಿತಿನ್ ಉಪ್ಕಾರ್ ಬಾವುಡ್ಲೊ. ಮಂಗ್ಳುರ್, ಕಾರವಾರ್, ಉಡುಪಿ, ಗೊಂಯ್ ಆನಿ ಸಿಂಧುದುರ್ಗ್ ಪ್ರಾಂತ್ಯಾಚ್ಯಾ ಕಮಿಟಿ ಸಾಂದ್ಯಾಂಚೊ ಆನಿ ಯಾಜಕಾಂಚೊ ವಾವ್ರ್ ತಾಣಿಂ ವಾಖಣ್ಲೆಂ.
ಭಾರತಾಂತ್ಲ್ಯಾ ಆನಿ ಸಂಸಾರ್ಭರ್ ಆಸ್ಚ್ಯಾ ದಿಯೆಸೆಜಿಂಕ್ ಹೆ ಪವಿತ್ರ್ ಮಿಸಾಗ್ರಂಥ್ ಪಾವಿತ್ ಕರ್ಚಿ ವ್ಹಡ್ ಜವಾಬ್ದಾರಿ ಮಂಗಳ ಜ್ಯೋತಿಚೆ ನಿರ್ದೇಶಕ್ ಬಾಪ್ ರೋಹಿತ್ ಡಿ’ಕೋಸ್ತಾ ಆನಿ ಸಹ-ನಿರ್ದೇಶಕ್ ಬಾಪ್ ವಿನ್ಸೆಂಟ್ ಸಿಕ್ವೇರಾ ಹಾಂಚ್ಯಾ ಮುಖೇಲ್ಪಣಾರ್ ಚಲ್ತೆಲೆಂ.
ಮಿಸಾಗ್ರಂಥಾಚೆಂ ಪ್ರೂಫ್ರೀಡಿಂಗ್ (proofreading) ಕೆಲ್ಲ್ಯಾ ಯಾಜಕಾಂಚ್ಯಾ ಪಂಗ್ಡಾಕ್: ಮೊನ್ಸಿಜ್ಞೊರ್ ಮ್ಯಾಕ್ಸಿಮ್ ನೊರೊನ್ಹಾ, ಬಾಪ್ ವಿನ್ಸೆಂಟ್ ಸಿಕ್ವೇರಾ, ಬಾಪ್ ಪ್ರಕಾಶ್ ಲೋಬೊ ಒಎಫ್ಎಮ್, ಬಾಪ್ ವಿಲಿಯಮ್ ಬಾರ್ಬೋಜಾ, ಬಾಪ್ ಜೇಸನ್ ಎಸ್ಡಿಬಿ, ಆನಿ ಬಾಪ್ ಡುಮಿಂಗ್ ಗೊನ್ಸಾಲ್ವಿಸ್ (ಸಿಸಿಬಿಐ) ಹಾಂಕಾಂ ವಿಶೇಸ್ ಧನ್ಯವಾದ್ ಪಾಟಯ್ಲೆ. ಶ್ರೀಮತಿ ಜ್ಯೋತಿ ಪಿಂಟೊ ಆನಿ ಕು| ಲೂರ್ಡಾ ಪಿರೇರಾ ಹಾಂಚ್ಯಾ ವಾವ್ರಾಚೊ ಸ್ಮರಣ್ ಕೆಲೊ. ಕಾರ್ಯೆಂ ಮಾಂಡುನ್ ಹಾಡ್ಲ್ಲ್ಯಾ ಮಾ| ದೊ| ಜೊಸೆಫ್ ಮಾರ್ಟಿಸ್ ಹಾಂಚೊಯ್ ಉಪ್ಕಾರ್ ಆಟಯ್ಲೊ.
