ಪಾಟ್ಲ್ಯಾ ಚಾಳೀಸ್ ವರ್ಸಾಂ ಪಾಸುನ್ ಕೊಂಕ್ಣೆಂತ್ ಖಳಾನಾಸ್ತಾನಾ ಬರವ್ನ್ ಆಯಿಲ್ಲ್ಯಾ ಮ್ಹಜ್ಯಾ ಸಾಹಿತೀಕ್ ವಾವ್ರಾಕ್, ಹ್ಯಾ ದೇಶಾಂತ್ ಸಾಹಿತ್ಯಾ ಖಾತಿರ್ ಆಸ್ಚೊ , ಭಾರತ್ ಸರ್ಕಾರಾಚೊ ಸರ್ವ್ಶ್ರೇಷ್ಠ್ ಸಾಹಿತ್ಯ ಅಕಾಡೆಮಿ ಪುರಸ್ಕಾರ್ ಲಾಭ್ಚೆಸವೆಂ ಏಕ್ ಸಾರ್ಥಕತಾ ಆಯ್ಲಿ ಮ್ಹಣ್ ಮ್ಹಾಕಾ ಭೊಗ್ತಾ. ಭಾರತ್ ಸರ್ಕಾರಾಚ್ಯಾ ಸಂಸ್ಕೃತಿ ಮಂತ್ರಾಲಯಾಖಾಲ್ ಸ್ವಾಯತ್ತೆನ್ ಕಾಮ್ ಕರ್ಚಿ, ಕೇಂದ್ರ ಸಾಹಿತ್ಯ ಅಕಾಡೆಮಿ ಮ್ಹಣ್ ಆಮ್ ಲೊಕಾಕ್ ಒಳ್ಕೆಚಿ, ಸಾಹಿತ್ಯ ಅಕಾಡೆಮಿ, ಭಾರತಾಚ್ಯಾ 22 ಅನುಸೂಚಿತ್ ಭಾಸೊ, ಇಂಗ್ಲಿಷ್ ಆನಿ ರಾಜಸ್ಥಾನಿ ಅಶೆಂ ಎಕುಣ್ ಚೊವೀಸ್ (24) ಭಾಸಾಂನಿ ಫಾಯ್ಸ್ ಜಾಲ್ಲೆ ಪಯ್ಕಿ, ಅತ್ಯುತ್ತಮ್ ಸಾಹಿತ್ಯ್ ಕೃತಿ ವಿಂಚುನ್ ವರ್ಸಾವಾರ್ ‘ಸಾಹಿತ್ಯ ಅಕಾಡೆಮಿ ಪುರಸ್ಕಾರ್’ ದಿತಾ. ಹೊ ಪುರಸ್ಕಾರ್ ತಾಂಬ್ಯಾಚೆಂ ಫಲಕ್ ಆನಿ ರುಪಯ್ ಏಕ್ ಲಾಕ್ ಮಾನ್ಧನ್ ಆಟಾಪ್ತಾ.
ಕೊಂಕ್ಣಿ ಭಾಸ್ ಏಕ್ ಸ್ವತಂತ್ರ್ ತಶೆಂ ಸಾಹೀತೀಕ್ ಭಾಸ್ ಮ್ಹಣ್ ಸಾಹಿತ್ಯ್ ಅಕಾಡೆಮಿನ್ ಮಾನುನ್ ಘೆತ್ಲ್ಲೆಂಚ್ 1975 ವ್ಯಾ ವರ್ಸಾ ಆನಿ 1977 ವ್ಯಾ ವರ್ಸಾ ಪಾಸುನ್ ಹೆರ್ ಭಾಸಾಂಕ್ ದಿಂವ್ಚೆ ಪರಿಂ ಸಾಹಿತ್ಯ ಅಕಾಡೆಮಿ ವರ್ಸಾವಾರ್ ಕೊಂಕ್ಣೆಂತ್ಲೆಂ ಬರ್ಯಾಂತ್ಲೆಂ ಬರೆಂ ಪುಸ್ತಕ್ ವಿಂಚೂನ್ ಪುರಸ್ಕಾರ್ ದೀತ್ ಆಯ್ಲ್ಯಾ. ಆಜ್ ಮೆರೆನ್ 47 ಸಾಹಿತ್ಯ ಅಕಾಡೆಮಿ ಪುರಸ್ಕಾರ್ ಕೊಂಕ್ಣಿ ಭಾಶೆಕ್ ಲಾಭ್ಲ್ಯಾತ್ ತರೀ , ಕರ್ನಾಟಕಾಂತ್ಲ್ಯಾ ತೆಗಾಂಕ್ ಮಾತ್ ಹೊ ಮಾನ್ ಫಾವೊ ಜಾಲಾ. 1989 ವ್ಯಾ ವರ್ಸಾ ಚಾ. ಫ್ರಾ. ದೆ ಕೊಸ್ತಾಚ್ಯಾ ‘ಸೊಂಶಾಚೆ ಕಾನ್’ ಕವಿತಾ ಸಂಗ್ರಹಾಕ್, 22 ವರ್ಸಾಂ ಉಪ್ರಾಂತ್ 2011 ವ್ಯಾ ವರ್ಸಾ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಂಚ್ಯಾ ‘ಪ್ರಕೃತಿಚೊ ಪಾಸ್’ ಕವಿತಾ ಸಂಗ್ರಹಾಕ್ ಆನಿ 2016 ವ್ಯಾ ವರ್ಸಾ ಎಡ್ವಿನ್ ಜೆ ಎಫ್ ಡಿಸೊಜಾಚ್ಯಾ ‘ಕಾಳೆಂ ಭಾಂಗಾರ್’ ಕಾದಂಬರೀಕ್ ಹೊ ಪುರಸ್ಕಾರ್ ಲಾಭ್ಲಾ. ಎಕಾ ಸಾಹಿತಿಕ್ ಸಾಹಿತ್ಯ ಅಕಾಡೆಮಿ ಥಾವ್ನ್ ಹೊ ಪುರಸ್ಕಾರ್ ಜಿವಿತಾವ್ಧೆಂತ್ ಏಕ್ ಪಾವ್ಟಿಂ ಮಾತ್ ಲಾಭ್ತಾ ಜಾಲ್ಲ್ಯಾನ್, ಹ್ಯಾ ಪುರಸ್ಕಾರಾಕ್ ರಾಷ್ಟ್ರೀಯ್ ತಶೆಂ ಅಂತರಾಷ್ಟ್ರೀಯ್ ಮಟ್ಟಾರ್ ಬೋವ್ ವ್ಹಡ್ ಮರ್ಯಾದ್ ಆಸಾ. ಮುಂಬಯ್ಚೆ ಖಾಯಂ ನಿವಾಸಿ ಆಸ್ಲೆಲ್ಯಾ ಮಂಗ್ಳುರಿ ಮುಳಾಚ್ಯಾ ಜೆ ಬಿ ಮೊರಾಯಸ್ ಆನಿ ಜೆ ಬಿ ಸಿಕ್ವೇರಾ ಹಾಂಕಾ, ಸಾಹಿತ್ಯ ಅಕಾಡೆಮಿಚೊ ಹೊ ಪುರಸ್ಕಾರ್ ಲಾಬ್ಲಲೊ ಆಸಾ, ಅನುಕ್ರಮಾನ್ ತಾಂಚ್ಯಾ ‘ಭಿತರ್ಲೆಂ ತುಫಾನ್’ (1985) ಆನಿ ಅಶಿಂ ಅಯ್ಲಿಂ ಲ್ಹಾರಾಂ (1998) ಕವಿತಾ ಪುಸ್ತಕಾಂಕ್. ಪಾಟ್ಲ್ಯಾ ಸಬಾರ್ ವರ್ಸಾಂ ಪಾಸುನ್ ಮಂಗ್ಳುರಾಂತ್ ಜಿಯೆಂವ್ಚ್ಯಾ ಕೊಚ್ಚಿಚ್ಯಾ ಗೋಕುಲದಾಸ ಪ್ರಭುಕ್ 1994 ವ್ಯಾ ವರ್ಸಾ ತಾಚ್ಯಾ ‘ಅಂತರ್ಯಾಮಿ’ ಕಥಾ ಸಂಗ್ರಹಾಕ್ ಹೊ ಪುರಸ್ಕಾರ್ ಲಾಬ್ಲ್ಲೊ ಆಸಾ.
ಸಾಹಿತ್ಯ ಅಕಾಡೆಮಿ ಪುರಸ್ಕಾರ್ ಜೊಡುನ್ ದಿಲ್ಲೊ ಬೂಕ್
ಹೆರ್ ಭಾರತೀಯ್ ಭಾಸಾಂನಿ ಸಮೀಕ್ಷಾ ಸಾಹಿತ್ಯಾಚಾ ಬುಕಾಂಕ್ ಜಾಯ್ತೆ ಪುರಸ್ಕಾರ್ ಲಾಬ್ಲ್ಲೆ ಆಸಾತ್ ತರೀ , ಆಜ್ ಮೆರೆನ್ ಕೊಂಕ್ಣಿ ಭಾಶೆಂತ್ ಸಾಹಿತ್ಯ್ ವಿಮರ್ಶೆಚ್ಯಾ ಪುಸ್ತಕಾಕ್ ಹೊ ಪುರಸ್ಕಾರ್ ಫಾವೊ ಜಾಲ್ಲೊ ನಾ. ಆಧುನಿಕ್ ಕೊಂಕ್ಣಿ ಕಾವ್ಯಾಂತ್ಲಿಂ ವೆಗ್ಳಿಂ ಆನಿ ಸಾಮ್ಕಿಂ ರುಪಾಂ ಘೆವ್ನ್, ಮಂಗ್ಳುರ್, ಗೊಂಯ್, ಮುಂಬಯ್ ಮ್ಹಣ್ ಪ್ರಾಂತೀಯ್ ಬೆಧ್ ಕರಿನಾಸ್ತಾನಾ, ಸಮಗ್ರ್ ಕೊಂಕ್ಣಿ ಕಾವ್ಯೆಂ ಘೆವ್ನ್, ತವ್ಲಾನಿಕ್ ಅಭ್ಯಾಸ್ ಕರುನ್ ಹಾಂವೆ ಬರಯಿಲ್ಲ್ಯಾ ‘ಕೊಂಕ್ಣಿ ಕಾವ್ಯೆಂ ರುಪಾಂ ಆನಿ ರೂಪಕಾಂ’ ಬುಕಾಕ್ ಸಾಹಿತ್ಯ ಅಕಾಡೆಮಿ ಪುರಸ್ಕಾರ್ ಲಾಬ್ಲ್ಲಿ ಗಜಾಲ್ ಕೊಂಕ್ಣಿ ಸಾಹಿತ್ಯಾಂತ್ ‘ಸಮೀಕ್ಷಾ ಸಾಹಿತ್ಯಾಂ’ತ್ ಕಾಮ್ ಕರುಂಕ್ ಆಶೆತೆಲ್ಯಾಂಕೀ ಫುಡಾರ್ ಆಸಾ ಮ್ಹಳ್ಳೊ ಏಕ್ ಭರ್ವಸೊ ದಿತಾ. ಮ್ಹಜ್ಯಾ ಹ್ಯಾಚ್ ಪುಸ್ತಕಾಕ್ 2021 ವ್ಯಾ ವರ್ಸಾ ಕರ್ನಾಟಕ ಸರ್ಕಾರಾಚ್ಯಾ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಥಾವ್ನ್ ಆನಿ 2023 ವ್ಯಾ ವರ್ಸಾ ಗೊಂಯ್ ಸರ್ಕಾರಾಚ್ಯಾ ಗೋವಾ ಕೊಂಕ್ಣಿ ಅಕಾಡೆಮಿ ಥಾವ್ನ್ಯೀ ಉತ್ತೀಮ್ ಪುಸ್ತಕ್ ಪುರಸ್ಕಾರ್ ಫಾವೊ ಜಾಲಾ ಆಸ್ತಾಂ ಕರ್ನಾಟಕ, ಗೊಂಯ್ ಆನಿ ಆತಾಂ ಭಾರತ್ ಸರ್ಕಾರಾ ಥಾವ್ನ್ ಪ್ರೋತ್ಸಾಹನ್ ಲಾಭ್ಲಾಂ ಮ್ಹಳ್ಳಿ ಗಜಾಲ್ ಸಂತೃಪ್ತೆಚಿ.
ಮುಳಾನ್ ಹಾಂವೆ ಬರಂವ್ಕ್ ಸುರು ಕೆಲ್ಲೆಂ ಕನ್ನಡ ಭಾಶೆಂತ್; ಉದಯವಾಣಿ, ತರಂಗ, ಸಂಕ್ರಮಣ, ಶೂದ್ರ, ಸುದ್ದಿ-ಸಂಗಾತಿ ತಸಲ್ಯಾ ಸಾಹಿತೀಕ್ ನೆಮಾಳ್ಯಾಂನಿಂ. ಹಾಂವ್ ವಿದ್ಯಾರ್ಥಿ ಅಸ್ತಾನಾ ಕನ್ನಡಾಂತ್ ಬರಯ್ತಾಲೊಂ ಆತಾಂಯ್ ಕನ್ನಡ ಭಾಶೆಂತ್ ವಿಶೇಸ್ ಅಂಕ್ಯಾಂಕ್ ವಾ ವಿಶೇಸ್ ಸಂದರ್ಭಾಂನಿ ಬರಯ್ತಾಂ. ಕನ್ನಡಾಂತ್ ಉಲಯ್ತಾಂ, ಸಭೆಂನಿ ಮ್ಹಜೆ ವಿಚಾರ್ ಮಾಂಡ್ತಾಂ. ಮ್ಹಾಕಾ ಕೊಂಕ್ಣೆಕ್ ಹಾಡ್ಲ್ಲೆಂ ಎಚ್. ಆರ್. ಆಳ್ವಾನ್. ತೋ ‘ಯುವಕ್’ ( ಆರ್.ಎನ್.ಐಂತ್ ನೊಂದಾಯ್ತಾನಾಂ, ‘ಯುವಕ್’ ಆಸ್ಲ್ಲೆಂ ‘ಆಮ್ಚೊ ಯುವಕ್’ ಜಾಲೆಂ) ಪತ್ರಾಚೊ ಸಂಪಾದಕ್ ಆಸ್ತಾನಾ. ಸುರ್ವಾತೆರ್ ವ್ಯೆಂಗ್ಯ್ ಚಿತ್ರಾಂ, ಉಪ್ರಾಂತ್ ಮಟ್ವಿಕಾಣಿ, ಕವಿತಾ, ಲೇಖನಾಂ ಮ್ಹಣೊನ್ ಉದೆವ್, ರಾಕ್ಣೊ, ಸೆವಕ್, ಉಮಾಳೊ ಪತ್ರಾಂನಿಂ ಮ್ಹಜೆಂ ಬರಪ್ ಮುಕಾರುನ್ ಗೆಲೆಂ. ಮ್ಹಜ್ಯಾ ಬರ್ಪಾಕ್ ಘಟಾಯ್ ದಿಲ್ಲಿ ವಾಚನಾನ್ ತರ್, ದಿಶಾ ದಿಲ್ಲಿ ಮ್ಹಜ್ಯಾ ಸಾಹಿತ್ಯಾಚಾ ಮೆಸ್ತ್ರಿಂನಿ. ವಿದ್ಯಾರ್ಥಿ ಆಸ್ತಾನಾ, ಯುವಕ್ ಆನಿ ಸೆವಕ್ (ಫಾ| ಪ್ರಶಾಂತ್ ಕುವೆಲ್ಹೊ ಸಂಪಾದಕ್ ಆಸ್ತಾನಾ) ಸಂಪಾದಕೀಯ್ ಮಂಡಳೆಚೊ ಸಾಂದೊ ಜಾವ್ನ್ ಹಾಂವ್ ವಾವುರ್ಲಲೊಂ ಆಸಾಂ.
‘ಆಮ್ಚೊ ಯುವಕ್’ ಪತ್ರಾರ್ ಕಾರ್ಟೂನ್ ಕೊಲಮ್
1989 ವ್ಯಾ ವರ್ಸಾ ಪದ್ವೆ ಶಿಕಪ್ ಜಾತಕೂಚ್ ನವ್ಕರಿ ಸೊಧುನ್ ಹಾಂವೀ ಮ್ಹಜ್ಯಾ ಪುರ್ವಜಾಂಪರಿಂ ಬೊಂಬಯ್ ಗೆಲೊಂ. ಮುಂಬಯ್ ಜಾವ್ನ್ ಬದ್ಲಾನಾತ್ಲ್ಯಾ ಬೊಂಬಯ್ ಮ್ಹಾ ಶೆರಾಂತ್; ಪಯ್ಲೆಂ ಕುಡಾಂತ್, ಉಪ್ರಾಂತ್ ಚಾಲಿಂತ್, ಕೊಟ್ರೆಂತ್ ಆನಿ ಕ್ವಾರ್ಟರ್ಸಾಂತ್ ಹಾಂವ್ ಜಿಯೆಲಾಂ. ವಾಟೆ ವಯ್ಲೆಂ ಜಿವಿತ್ ಬೋವ್ ಲಾಗ್ಶಿಲ್ಯಾನ್ ಹಾಂವೆ ಭೊಗ್ಲಾಂ ಆನಿ ತೆಂ ಜಿಯೆಲಾಂ. 2005 ವರ್ಸಾಚ್ಯಾ ಆವ್ರಾಂತ್ ‘ಮರ್ಣಾ’ಕ್ ಆಪಡ್ನ್ ಪಾಟಿಂ ಆಯ್ಲಾಂ. ಜೊಡ್ಲಲೆಂ ಸಗ್ಳೆಂ ಹೊಗ್ಡಾವ್ನ್ ‘ನಿರ್ವಸಿತ್’ ಜಾವ್ನ್ ಪರತ್ ಗಾಂವಾಂಕ್ ಯೇವ್ನ್, ಭಾಡ್ಯಾಚ್ಯಾ ಘರಾಂನಿ ಬಿಡಾರಾಂ ಬದ್ಲುನ್ – ಬದ್ಲುನ್; ಜಿವಿತ್ ನವ್ಯಾನ್ ಬಾಂದುನ್ ಹಾಡ್ಲಾಂ.
ಪೂಣ್ ವಾಚನಾಚೊ ಆನಿ ಬರ್ಪಾಚೊ ಸಾಂಗಾತ್ ಸೊಡುಂಕ್ ನಾ. ಮುಂಬಯ್ ಆಸ್ತಾನಾಂಯ್ ಹಾಂವ್ ಕಾಣಿಕ್, ಮಿತ್ರ್ ಪತ್ರಾಂಕ್ ಅಂಕಣಾಂ ಬರವ್ನ್ ಪೋಸ್ಟ್ ಕರ್ತಾಲೊಂ. ಮ್ಹಜೊ ಪಯ್ಲೊ ಕವಿತಾ ಸಂಗ್ರಹ್, ‘ಚಲ್ಯಾಂಕ್ ಚತ್ರಾಯ್’ ಆನಿ ಉಪ್ರಾಂತ್ಲಿಂ ದೋನ್ ಪುಸ್ತಕಾಂ ‘ದೆವಾಕ್ ಸೊಡ್ಲ್ಲೊ ಪಾಡೊ’ (ಕಥಾ ಸಂಗ್ರಹ್) ಆನಿ ‘ಕಯ್ದ್ಯಾಚ್ಯೊ ಕವಿತಾ’ (ಕವಿತಾ ಸಂಗ್ರಹ್) ಹಾಂವ್ ಮುಂಬಯ್ ಆಸ್ತಾನಾಂಚ್ ಫಾಯ್ಸ್ ಜಾಲ್ಲೆ. ‘ಭಾಮುಣಾಂಚೆಂ ಚೆಡುಂ’ ಕವಿತಾ ಸಂಗ್ರಹ್ ಹಾಂವ್ ಗಾಂವಾಂಕ್ ಆಯಿಲ್ಲ್ಯಾ ಸುರ್ವೇರ್ ಆನಿ ಉಪ್ರಾಂತ್ಲಿಂ ತೀನ್ ಪುಸ್ತಕಾಂ ‘ಬೀಗ್ ಆನಿ ಬಿಗಾತ್’ (ಕಥಾ ಸಂಗ್ರಹ್) ‘ಕೊಂಕ್ಣಿ ಕಾವ್ಯೆಂ : ರುಪಾಂ ಆನಿ ರೂಪಕಾಂ’ (ಸಾಹಿತ್ಯ್ ಸಮೀಕ್ಶೆಚೆ ಪ್ರಬಂದ್) ಆನಿ ‘ಜನೆಲ್’ (ಕವಿತಾ ಸಂಗ್ರಹ್) ಪಾಟ್ಲ್ಯಾ ವರ್ಸಾಂನಿ ಫಾಯ್ಸ್ ಜಾಲ್ಲೆ.
‘ಚಲ್ಯಾಂಕ್ ಚತ್ರಾಯ್’ ಪುಸ್ತಕ್ ವಿಮೋಚನ್ ವರ್ದಿ – ರಾಕ್ಣೊ, 4 ಮಾರ್ಚ್ 1999
‘ಕಾಣಿಕ್’ ಪತ್ರಾರ್ ಆಸ್ಚೆಂ ಆಸಾ ತಶೆಂ … ಅಂಕಣ್
ಹಾಂವ್ ಗಾಂವಾಂತ್ ವಾವ್ರಾಕ್ ಲಾಗ್ತಾ ಪರ್ಯಾಂತ್ ‘ಹಾಂವ್ ಜಾಲೆಂ ಆನಿ ಮ್ಹಜೆಂ ಬರಪ್’ ಮ್ಹಣ್ ಮ್ಹಜೆ ಇತ್ಲ್ಯಾಕ್ ‘ಅಂತರ್ಮುಖಿ’ ಕಶೆಂ ಜಿಯೆವ್ನ್ ಆಸ್ಲೆಲ್ಯಾ ಮ್ಹಾಕಾ, ಮ್ಹಜ್ಯಾ ಎಕಾ ಮಿತ್ರಾನ್ ಲೇಖಕಾಂಚ್ಯಾ ಎಕ್ವಟಾಂತ್ ಸಾಂದೊ ಕೆಲೊ. ಪ್ರಾಮಾಣಿಕ್ಪಣಿ ಕೊಂಕ್ಣೆಚೆಂ ಕಾಮ್ ಕರ್ತೆಲ್ಯಾಂಕ್ ಖಂಯ್ಚ್ಯಾಯ್ ಸಂಘ್ – ಸಂಸ್ತ್ಯಾಚಿ ಗರ್ಜ್ ನಾ – ಮ್ಹಣ್ ಜ್ಯಾ ದಿಸಾ ಮ್ಹಾಕಾ ಸ್ಪಶ್ಟ್ ಗಮ್ಲೆಂ, ತೆ ದಿಸಾ ಥಾವ್ನ್, ಸಗ್ಳ್ಯಾಂ ಥಾವ್ನ್ ಹಾಂವ್ ಪಯ್ಸ್ ರಾವ್ಲೊಂ. ಆಜ್ಯೀ ಹಾಂವ್ ಖಂಯ್ಚ್ಯಾಯ್ ಕೊಂಕ್ಣಿ ಸಂಗ್ – ಸಂಸ್ಥ್ಯಾಂತ್ ಸಾಂದೊ ನಾ. ಕೊಂಕ್ಣೆಚ್ಯಾ ನಾಂವಾನ್ ಚಲ್ಚ್ಯಾ ಖಂಯ್ಚ್ಯಾಯ್ ವಾಟ್ಸಪ್ ಪಂಗ್ಡಾಂತ್ ನಾ. ಕಾರ್ಯಕ್ರಮಾಂಕ್ ಆಪಯ್ಲ್ಯಾರ್ ವೆತಾಂ. ಉಲಂವ್ಕ್ – ವಿಚಾರ್ ಮಾಂಡುಂಕ್ ಸಾಂಗ್ಲ್ಯಾರ್ ಉಲಯ್ತಾಂ. ವಿಚಾರ್ಲೆಲ್ಯಾಂಕ್ ಬರವ್ನ್ ದಿತಾಂ. ಸಮಾದಾನೆನ್ ಆಸಾಂ. ಮ್ಹಜೆ ಇತ್ಲ್ಯಾಕ್ ಮ್ಹಜೆಂ ಕಾಮ್ ಕರೂನ್ ಆಸಾಂ.
ಕೊಂಕ್ಣಿ ಲೇಖಕ್ ಸಂಘಾಚೆಂ ಕಾರ್ಯಕ್ರಮ್, ವರ್ದಿ : ಉದಯವಾಣಿ ದಸೆಂಬರ್ 20, 2012
ಕೊಂಕ್ಣಿ ಸಾಹಿತ್ಯ್ ಡಿಜಿಟಲ್ ಸಂಸಾರಾಂತ್ ದಿಮ್ಕುರಿಂ ಪಾವ್ಲಾಂ ಕಾಡ್ಚ್ಯಾ ಸಂಕ್ರಮಣ್ ಕಾಳಾರ್, 2011 ವ್ಯಾ ವರ್ಸಾ ಹಾಂವೆ ‘ಕಿಟಾಳ್’ ಸಾಹಿತೀಕ್ ಜಾಳಿ ಜಾಗೊ ಸುರು ಕೆಲ್ಲೊ. 15 ವರ್ಸಾಂ ಆದಿಂ. ಸಮಗ್ರ್ ಕೊಂಕ್ಣಿ ಸಾಹಿತ್ಯಾ ಖಾತಿರ್ ಸಮರ್ಪಿತ್ ಎಕಾ ಜಾಳಿ ಜಾಗ್ಯಾಚೆಂ ಉಣೆಂಪಣ್ ತವಳ್ ಕೊಂಕ್ಣೆಂತ್ ಉಟೊನ್ ದಿಸ್ತಾಲೆಂ. ಕವಿತಾ ಟ್ರಸ್ಟಾಚೊ ‘ಕೊಂಕಣಿ ಪೊಯೆಟ್ರಿ’ ಮ್ಹಳ್ಳೊ ಆಪುರ್ಬಾಯೆಚೊ ಜಾಳಿ ಜಾಗೊ ಆಸ್ಲೊ. ಪೂಣ್ ತೋ ಫಕತ್ ಕೊಂಕ್ಣಿ ಕವಿತೆ ಖಾತಿರ್ ಸಮರ್ಪಿತ್. ‘ಮಾಂಯ್ ಭಾಸ್’ ಆನಿ ‘ದಾಯ್ಜ್’ ಮ್ಹಳ್ಳೆ ದೋನ್ ಜಾಳಿ ಜಾಗೆ ಕಾಂಯ್ ಥೊಡಿಂ ವರ್ಸಾಂ ಚಲೊನ್ ಸ್ಥಗಿತ್ ಜಾಲ್ಲೆ. ಕನ್ನಡ ಭಾಶೆಂತ್ಲೊ ‘ಕೆಂಡ ಸಂಪಿಗೆ’ ತಸಲೊ ಸಂಪೂರ್ಣ್ ಸಾಹಿತ್ಯಾಕ್ ಸಮರ್ಪಿತ್ ಸುಂದರ್ ಜಾಳಿಜಾಗೊ ಪಳಯ್ತಾನಾ ಮ್ಹಾಕಾ ಆಶಾ ಜಾಲ್ಲಿ ಸಹಜ್. ತ್ಯಾ ಉರ್ಭೆನ್ ಹಾಂವೆ ‘ಕಿಟಾಳ್’ ಜಾಳಿ ಜಾಗೊ ಸುರು ಕೆಲ್ಲೊ.
2011 ವ್ಯಾ ವರ್ಸಾ ಹಾಂವೆ ‘ಕಿಟಾಳ್’ ಸುರು ಕೆಲ್ಯಾ ಉಪ್ರಾಂತ್, ಕೊಂಕ್ಣೆಂತ್ ಕಾಂಯ್ 25 ವಯ್ರ್ ಜಾಳಿಜಾಗೆ ಆಯ್ಲೆ, ಸ್ಥಗಿತ್ ಜಾಲ್ಲೆ ನವ್ಯಾನ್ ಜಿವಾಳ್ಳೆ ಪೂಣ್ ಪಾಟ್ಲ್ಯಾ 15 ವರ್ಸಾಂ ಪಾಸುನ್ ‘ಕಿಟಾಳ್’ ಏಕ್ ಮಾತ್ ಸಾಹಿತೀಕ್ ಜಾಳಿಜಾಗೊ ಖಳಾನಾಸ್ತಾನಾ, ಬ್ರೇಕ್ ಘೆನಾಸ್ತಾನಾ ಕೊಂಕ್ಣೆಂತ್ ಚಾಲು ಆಸಾ. ಎಕಾದಾವೆಳಾ ಹೆಂಚ್ ಕಾಮ್ ಖಂಯ್ಚ್ಚ್ಯಾಯ್ ಸಂಗ್ ಸಂಸ್ಥ್ಯಾಖಾಲ್ ಹಾಂವೆ ಕೆಲ್ಲೆಂ ತರ್ ಆಜ್ ಹಾಂವ್ ‘ಬರ್ಬಾದ್’ ಜಾವ್ನ್ ವೆತೊಂ. ಎಕಾ ಅನಿವಾಸಿ ಉದ್ಯಮಿನ್ ಸಾಂಗ್ಲ್ಲೆಂ ಖರೋಖರ್ ಸತ್ ಮ್ಹಣ್ ಮ್ಹಾಕಾ ಆತಾಂಯ್ ಭೊಗ್ತಾ ‘Mangalorean Christians are individually excellent, collectively failure’
‘ಕಿಟಾಳ್’ ಲೊಕಾರ್ಪಣ್; 5 ಫೆಭ್ರೆರ್ 2011
‘ಆರ್ಸೊ’ ಲೊಕಾರ್ಪಣ್; 28 ನವೆಂಬರ್ 2013
ಗುಣಾಮೊಲಾಂಚೆಂ ಸಾಹಿತ್ಯ್ ಫಕತ್ ಡಿಜಿಟಲ್ ರುಪಾರ್ ಆಸ್ಲ್ಯಾರ್ ಪಾವಾನಾ , ಹಳ್ಳೆ ಗಾಂವಾಂನಿ ಜಾಯ್ತೊ ಕೊಂಕ್ಣಿ ಲೋಕ್ ಆಸಾ, ತಾಂಕಾಂಯ್ ಪಾಂವ್ಚೆಂ ಏಕ್ ‘ಪ್ರೇತನ್’ ಕರಿಜಾಯ್ ಮ್ಹಳ್ಳ್ಯಾ ಇರಾದ್ಯಾನ್ 2013 ವ್ಯಾ ವರ್ಸಾ ‘ಆರ್ಸೊ’ ಪಂದ್ರಾಳೆಂ ಪತ್ರ್ ಹಾಂವೆ ಸುರು ಕೆಲೆಂ. ಹರೇಕಾ ವರ್ಸಾ ಏಕ್ ದರ್ಜೆದಾರ್ ವಿಶೇಸ್ ಅಂಕೊ ದಿಂವ್ಚೆಂ ಪ್ರೇತನ್ ಆಮಿ ಕೆಲಾಂ, ಕವಿ ವಿಲ್ಸನ್ ಕಟೀಲಾಚ್ಯಾ ಸಂಪಾದಕ್ಪಣಾಖಾಲ್ ಹೆಂ ಪ್ರೇತನ್ ಆತಾಂಯ್ ಚಾಲು ಆಸಾ. ಹರ್ ವರ್ಸಾ ಫಾಯ್ಸ್ ಜಾಂವ್ಚ್ಯಾ ‘ಆರ್ಸೊ’ ವಿಶೇಸ್ ಅಂಕ್ಯಾಂನಿಂ ಕೊಂಕ್ಣಿ ಸಾಹಿತ್ಯ್ ಸಂಸಾರಾಂತ್ ಏಕ್ ಅತ್ವಿಚ್ ಮ್ಹೊರ್ ಮಾರ್ಲ್ಯಾ ತಿ ಗಜಾಲ್ ನೆಗಾರುಂಕ್ ಜಾಯ್ನಾ.
ಹೆ ಮಧೆಂ ಕಿಟಾಳ್ ಪ್ರಕಾಶನ್ (ಥೊಡೊ ತೇಂಪ್, ಕೆನ್ಯುಟ್ ಕೆಲರಾಯ್ ಸಾಂಗಾತಾ ಮೆಳೊನ್ ‘ಎವರ್ಶೈನ್ ಪ್ರಕಾಶನ್’) ಸುರು ಕರುನ್ ದರ್ಜೆದಾರ್ ಪುಸ್ತಕಾಂ ಫಾಯ್ಸ್ ಕರ್ಚೆಂ ಕಾಮ್ಯೀ ಹಾಂವೆ ಕೆಲೆಂ. ಹಾಂವೆ ಫಾಯ್ಸ್ ಕೆಲ್ಲ್ಯಾ ತೀನ್ ಪುಸ್ತಕಾಂನಿ; ಕವಿ ಮೆಲ್ವಿನ್ ರೊಡ್ರಿಗಸ್ ಹಾಂಚೊ ಕವಿತಾ ಜಮೊ ‘ದೇವಿ ನಿನ್ಕಾಸಿ’, ಕವಿ ವಿಲ್ಸನ್ ಕಟೀಲ್ ಹಾಚೊ ಕವಿತಾ ಜಮೊ – ‘ಎನ್ಕೌಂಟರ್’ ಆನಿ ಮ್ಹಜೋಚ್ ಕಥಾ ಜಮೊ ‘ಬೀಗ್ ಆನಿ ಬಿಗಾತ್’ – 2016 ಪಾಸುನ್ ಲಗಾತರ್ ವಿಶ್ವ ಕೊಂಕ್ಣಿ ಕೇಂದ್ರಾನ್ ದಿಂವ್ಚೊ ‘ವಿಮಲಾ ವಿ ಪಯ್ ಪುರಸ್ಕಾರ್’ ಜೊಡುನ್ ಹ್ಯಾಟ್ರಿಕ್ ಮಾರ್ಲ್ಲಿ ಆಸಾ. ಅಶೆಂ ಪ್ರಕಾಶನ್ ಶೆತಾಂತೀ ಮ್ಹಜ್ಯಾ ವಾವ್ರಾಕ್ ಮಾನ್ಯತಾಯ್ ಮೆಳ್ಳಿ. ಕಿಟಾಳ್ ಪ್ರಕಾಶನಾಚ್ಯಾ ಬುಕಾಂಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಉತ್ತೀಮ್ ಪುಸ್ತಕ್ ಪುರಸ್ಕಾರ್ ಆನಿ ಡೊ| ಟಿ.ಎಮ್.ಎ. ಪೈ ಫಾಂವ್ಡೇಶನ್ ಪ್ರಶಂಸಾ ಪುರಸ್ಕಾರ್ ಸಯ್ತ್ ಮೆಳುನ್ ಆಸಾತ್.
‘ಕಿಟಾಳ್ ಪ್ರಕಾಶನಾ’ ಚಿ ಸುರ್ವಾತ್
ಕೊಂಕ್ಣೆಂತ್ ಉದೆತ್ಯಾ ಬರವ್ಪ್ಯಾಂಕ್ ಉತ್ತೇಜನ್ ದೀಂವ್ಕ್ ಏಕೂಯ್ ಪುರಸ್ಕಾರ್ ನಾತ್ಲೊ. ಆಸ್ಲ್ಲೆ ಸಗ್ಳೆ ಮಾಲ್ಘಡ್ಯಾಂಕ್. ಪುರಸ್ಕಾರ್ ದಿತಲೆ ಸಾಹಿತ್ಯಾಚಾ ಗುಣಾಮೊಲಾಪ್ರಾಸ್ ಬರಯ್ಣಾರಾಚಿ ಪ್ರಾಯ್ ಪಳೆವ್ನ್ ಪುರಸ್ಕಾರ್ ದಿತಾಲೆ. ಹೆಂ ಪಳೆವ್ನ್ ಹಾಂವೆ 2012 ವ್ಯಾ ವರ್ಸಾ, ಫಕತ್ ಆನಿ ಫಕತ್ ಯುವ ಬರಯ್ಣಾರಾಂಕ್ ಪ್ರೋತ್ಸಾಹ್ ದಿಂವ್ಚ್ಯಾ ಎಕಾಚ್ ಇರಾದ್ಯಾನ್ ‘ಕಿಟಾಳ್ ಯುವ ಪುರಸ್ಕಾರ್’ ಸುರು ಕೆಲೊ ಆನಿ 2013 ಪಾಸುನ್ ಅಬುದಾಬಿಚೊ ಅನಿವಾಸಿ ಉದ್ಯಮಿ ಆನಿ ಕೊಂಕ್ಣಿ ಸಮರ್ಥಕ್ ಶ್ರೀ ಲಿಯೋ ರೊಡ್ರಿಗಸ್ ತಾಂಚ್ಯಾ ಕುಟ್ಮಾಚ್ಯಾ ನಾಂವಾರ್ ಹೊ ಪುರಸ್ಕಾರ್ ದೀವ್ನ್ ಆಸಾತ್.
ಹಾಂವೆ ಬರಂವ್ಕ್ ಧರ್ತಾನಾ, ಕನ್ನಡ ಆನಿ ಹೆರ್ ಭಾಸಾಂನಿ ಉದೆತ್ಯಾ ಬರವ್ಪ್ಯಾಂಕ್ ಪ್ರೊತ್ಸಾಹನ್ ದಿಂವ್ಚಿ ಜಾಯ್ತಿಂ ಉಪಕ್ರಮಾಂ ಚಾಲು ಆಸ್ಲಿಂ. ಪೂಣ್ ಕೊಂಕ್ಣೆಂತ್ – ಯುವ ಬರವ್ಪ್ಯಾಂಕ್ ಪ್ರೋತ್ಸಾಹನ್, ಉತ್ತೇಜನ್ ದಿಂವ್ಚಿಂ ಕಾಂಯ್ಚ್ ಉಪಕ್ರಮಾಂ ನಾತ್ಲಿಂ. ಹಿ ಖಂತ್ ಮ್ಹಾಕಾ ಕೆದಾಳಾಯ್ ಧೊಸ್ತಾಲಿ. ಹೆಂ ಮನಾಂತ್ ಘೆವ್ನ್ ಹಾಂವೆ ‘ಕಿಟಾಳ್ ಯುವ ಪುರಸ್ಕಾರ್’ ಸುರು ಕೆಲ್ಲೊ. ಕಿಟಾಳ್ ಯುವ ಪುರಸ್ಕಾರ್ ಜೊಡ್ಪಿ; ಎಕಾ ಕಾಳಾಚೆ ಯುವ ಬರಯ್ಣಾರ್, ಆಜ್ – ಕೊಂಕ್ಣಿ ಸಾಹಿತ್ಯಾಂತ್ ಭರ್ವಸ್ಯಾಚಿಂ ನೆಕೆತ್ರಾಂ ಜಾವ್ನ್ ಪರ್ಜಳ್ಚೆಂ ಪಳೆಂವ್ಕ್ ಖುಶಿ ಜಾತಾ. ತಾಂಚ್ಯಾ ಸಾಮರ್ಥೆನ್ ಆಜ್ ಹಿಂ ನೆಕೆತ್ರಾಂ ಪರ್ಜಳುನ್ ಆಸಾತ್, ಕಾಂಯ್ ವರ್ಸಾಂ ಆದಿಂ ಆಮಿ ಫಕತ್ ತಾಂಚಿಂ ಪ್ರತಿಭಾ ಒಳ್ಕೊನ್ ಪ್ರೋತ್ಸಾಹನ್ ದಿಂವ್ಚೆಂ ಕಾಮ್ ಮಾತ್ ಕೆಲ್ಲೆಂ.
ಪಯ್ಲೊ ‘ಕಿಟಾಳ್ ಯುವ ಪುರಸ್ಕಾರ್’ 2012
ಕೊಂಕಣೀಕ್ ಮ್ಹಣೂನ್ಚ್ ಏಕ್ ವಿಶ್ವವಿದ್ಯಾಲಯ್ ಆಸುಂಕ್ ಜಾಯ್ ಮ್ಹಣ್ ಸಪಣ್ ಪಳಯಿಲ್ಲ್ಯಾ ಬಸ್ತಿಮಾಮಾನ್, ವಿಶ್ವ ಕೊಂಕ್ಣಿ ಕೇಂದ್ರಾಂತ್ ಸಾಹಿತ್ಯಾಚೊ ಅಭ್ಯಾಸ್ ಕರ್ತೆಲ್ಯಾಂಕೂಚ್ ಮ್ಹಣೊನ್ ಜೂನಿಯರ್ ಆನಿ ಸೀನಿಯರ್ ರಿಸರ್ಚ್ ಫೆಲೊಶಿಫ್ ಜಾಹೀರ್ ಕೆಲ್ಲೆಂ, ಕಾಂಯ್ 2008 ವಾ 2009 ವ್ಯಾ ವರ್ಸಾ ಆಸುಂಯೆತಾ. ತವಳ್ ಹಾಂವ್ ಎಕಾ ಖಾಸ್ಗಿ ಬಾಂದ್ಕಾಮ್ ಕಂಪ್ಣೆಂತ್ ಲೆಕಾಂ ಬರೊಂವ್ಚೆಂ ಕಾಮ್ ಕರ್ತಾಲೊಂ, ಮ್ಹಳ್ಯಾರ್ ಎಕಾಂವ್ಟೆಂಟ್. ಹಾಂವೆ ‘ಪಾರಿಜಾತಾಚೆಂ ಶೆತ್ – ಕೆನರಾ ಕೊಂಕ್ಣಿ ಕಾವ್ಯಾಚೆಂ ಅಧ್ಯಯನ್’ ಮ್ಹಳ್ಳ್ಯಾ ನಾಂವಾನ್ ಏಕ್ ಪ್ರಬಂದ್ ಬರಯ್ತಾಂ ಮ್ಹಣ್ ಪ್ರಸ್ತಾಪ್ ದಾಡ್ಲ್ಲೊ. ಗುರು ಬಾಳಿಗಾನ್ ಮ್ಹಾಕಾ ಫೊನ್ ಕರುನ್ ‘ಯೋ’ ಮ್ಹಣ್ ಆಪಯ್ಲೊ ಆನಿ ಬೋರ್ಡ್ ರೂಮಾಕ್ ದಾಡ್ಲೊ.
ಥಂಯ್ಸರ್ ದೊ| ತಾನಾಜಿ ಹರ್ಲಣ್ಕರ್, ದೊ| ಸುನೀತಿ ಬಾಯಿ, ದೊ| ರೊಕಿ ಮಿರಾಂದಾ, ದೊ| ಪ್ರಕಾಶ್ ವಾಜ್ರೀಕರ್ ತಸಲ್ಯಾ ವಿದ್ವಾಂಸಾಂ ಸಾಂಗಾತಾ ಬಸ್ತಿಮಾಮ್ ಬಸುನ್ ಆಸ್ಲೊ. ಮ್ಹಜೊ ಪ್ರಸ್ತಾಪ್ ಆಯ್ಕೊನ್ ತಾನಾಜಿ ಬಾಬಾನ್ ಏಕೂಚ್ ವಿಚಾರ್ಲೆಂ “ತುಜಿ ನೊಲೆಜ್ ಆನಿ ಪ್ರೊಜೆಕ್ಟ್ ಖೂಪ್ ಬರೊ ಆಸಾ. ಕೊಂಕ್ಣಿ ಕಾವ್ಯಾಚೆಂ ಅಧ್ಯಯನ್ ಖೊಲಾಯೇನ್ ಜಾಂವ್ಚಿ ಗರಜ್ ಆಸಾ. ಪೂಣ್ ಸ್ಕೋಪ್ ಕೆನರಾ ವಾ ಕರ್ನಾಟಕ ಪರ್ಯಾಂತ್ ಮರ್ಯಾದೀತ್ ಕಿತ್ಯಾಕ್? ಗೊಂಯ್, ಮಹಾರಾಷ್ಟ್ರ, ಕೇರಳ ಅಶೆಂ ಸಗ್ಳೆ ಪ್ರಾಂತ್ ತುಂವೆ ತುಜ್ಯಾ ಅಭ್ಯಾಸ್ ಕಕ್ಶೆಂತ್ ಘೆಜಾಯ್. ಸಾಹಿತ್ಯಾಚೊ ಅಭ್ಯಾಸ್ ಮ್ಹಣ್ತಾನಾ ಕೆನ್ನಾಂಚ್ ಸ್ಕೋಪ್ ಮರ್ಯಾದಿತ್ ದವರ್ಚೊ ನ್ಹಯ್. ವಿಸ್ತಾರ್ ಕರ್ಪಾಚೊ” ತಾನಾಜಿ ಬಾಬಾಚ್ಯಾ ಹ್ಯಾ ಎಕಾ ಉತ್ರಾನ್ ಮ್ಹಜೆ ದೊಳೆ ಉಘಡ್ಲೆ. ಪೂಣ್ ಕಾಮಾಚ್ಯಾ ದಬಾವಾನ್ ಮ್ಹಜ್ಯಾನ್ ಖೊಲಾಯೆಚೊ ಅಭ್ಯಾಸ್ ಸಾಧ್ಯ್ ಜಾಲೊ ನಾ. ಪೂಣ್ ಕೋವಿಡ್ ಲೊಕ್ ಡಾವ್ನಾ ವೆಳಾರ್ ಮೆಳ್ಲ್ಲೊ ಅವ್ಕಾಸ್ ವಾಪರ್ಲೊ ಆನಿ ಕವಿತಾ ಟ್ರಸ್ಟಾನ್, ಪ್ರತ್ಯೇಕ್ ಜಾವ್ನ್ ಮೆಲ್ವಿನ್ ರೊಡ್ರಿಗಸ್ ಆನಿ ಕಿಶೂ, ಬಾರ್ಕೂರ್ ಹಾಣಿ ಮ್ಹಜಿ ಹುಮೆದ್ ನಿವೊಂಕ್ ಸೊಡ್ಲಿ ನಾ. ಬೋವ್ಶಾ ಕವಿ ಮೆಲ್ವಿನ್ ರೊಡ್ರಿಗಸ್ ಮ್ಹಜ್ಯಾ ಪಾಟಿಕ್ ಪಡಾನಾತ್ಲೆ ತರ್ ಹೆಂ ಕಾಮ್ ವೆಳಾರ್ ಜಾತೆಂ ನಾ.
ವಿಮಲಾ ವಿ ಪೈ ವಿಶ್ವ ಕೊಂಕಣಿ ಸಾಹಿತ್ಯ ಪುರಸ್ಕಾರ್ 2017
ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ 2018
ಹ್ಯಾ ಬುಕಾಕ್ ಪ್ರಸ್ತಾವನಾ ಬರಯಿಲ್ಲ್ಯಾ ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತ್ ದಾಮೋದರ್ ಮಾವ್ಜೋ ಹಾಂಚ್ಯಾ ಎಕಾ ವಾಕ್ಯಾನ್ ಮ್ಹಜಿ ವಾಂವ್ಟ್ ಸಾರ್ಥಕ್ ಜಾಲಿ ಮ್ಹಣ್ ಮ್ಹಾಕಾ ಸದಾಂಚ್ ಭೊಗ್ತಾ. “ಕೆನಾರಾ ಕೊಂಕ್ಣಿ ಆನಿ ಗೊಂಯ್ಚಿ ಕೊಂಕ್ಣಿ ವಾ ಇತರ್ ಕೊಂಕ್ಣಿ ಅಸೊ ಭೆದಾಭೆದ್ ಮಾನಿನಾಸ್ತಾನಾ ವಿಶಯಾಪ್ರಮಾಣ್ ನಿಯಾಳ್ ಕೆಲಾ. ತಾಂತುಲ್ಯ್ಲ್ಯಾನ್, ಆಯ್ಜ್ವೆರ್ ಜಾಂವ್ಕ್ ನಾಸ್ಲೊ ಅಸೊ, ತುಲನಾತ್ಮಕ್ ಅಭ್ಯಾಸ್ ಜಾಲಾ ಹೆಂ ಭೊವ್ ಮ್ಹತ್ವಾಚೆಂ.” ಮ್ಹಜ್ಯಾ ವಾಂವ್ಟೀಕ್ ಮೆಳ್ಲ್ಲಿ ಬೋವ್ ವ್ಹಡ್ ಸರ್ಟಿಫಿಕೇಟ್ (ಪ್ರಮಾಣ್ ಪತ್ರ್) ಹಿ ಮ್ಹಣ್ ಹಾಂವ್ ಖರ್ಯಾನ್ ಲೆಕ್ತಾಂ.
2021 ವ್ಯಾ ವರ್ಸಾ ಹ್ಯಾಚ್ ಬುಕಾಕ್ ಕರ್ನಾಟಕ ಸರ್ಕಾರಾಚ್ಯಾ ಕೊಂಕಣಿ ಸಾಹಿತ್ಯ ಅಕಾಡೆಮಿನ್, 2023 ವ್ಯಾ ವರ್ಸಾ ಪರ್ತ್ಯಾನ್ ಗೊಂಯ್ ಸರ್ಕಾರಾಚ್ಯಾ ಗೋವಾ ಕೊಂಕಣಿ ಅಕಾಡೆಮಿನ್ ಹ್ಯಾಚ್ ಬುಕಾಕ್ ಉತ್ತೀಮ್ ಪುಸ್ತಕ್ ಮ್ಹಣ್ ಪುರಸ್ಕಾರ್ ದೀವ್ನ್ ಮಾನ್ ಕೆಲಾಂ. ಆನಿ ಆತಾಂ, ಭಾರತ್ ಸರ್ಕಾರಾಚ್ಯಾ ಸಂಸ್ಕೃತಿ ಮಂತ್ರಾಲಯಾಖಾಲ್ ಕಾಮ್ ಕರ್ಚೊ ಸ್ವಾಯತ್ತ್ ಸಂಸ್ಥೊ ‘ಸಾಹಿತ್ಯ ಅಕಾಡೆಮಿನೀ’ ಹ್ಯಾ ಬುಕಾಕ್ ಪುರಸ್ಕೃತ್ ಕೆಲ್ಲ್ಯಾನ್, ಮ್ಹಜ್ಯಾ ಮ್ಹಜ್ಯಾ ಕೊಂಕ್ಣಿ ವಾವ್ರಾಕ್ ಅಖಿಲ್ ಭಾರತೀಯ್ ಮಾನ್ಯತಾಯ್ ಮೆಳ್ಳ್ಯಾ ಮ್ಹಣ್ ಹಾಂವ್ ಲೆಕ್ತಾಂ. ಅಸಲೊ ಏಕ್ ಅವ್ಕಾಸ್ ನಶೀಬಾನ್ ಫಾವೊ ಜಾತಾ ಮ್ಹಣ್ ಹಾಂವ್ ಲೆಕ್ತಾಂ. ಕೊಂಕ್ಣೆಂತ್ ಕವಿ, ಕಾಣಿಯಾಂಗಾರ್, ಸಮೀಕ್ಷಕ್, ಸಂಪಾದಕ್, ಪ್ರಕಾಶಕ್ ಆನಿ ಸಂಘಟಕ್ ಮ್ಹಣೂನ್ ಪಾಟ್ಲ್ಯಾ ಚಾಳೀಸ್ ವರ್ಸಾಂಚ್ಯಾ ಮ್ಹಜ್ಯಾ ಪಯ್ಣಾಕ್ ಆಜ್ ಸಾರ್ಥಕತಾ ಲಾಭ್ಲ್ಯಾ ಮ್ಹಣ್ ಮ್ಹಾಕಾ ಭೊಗ್ತಾ.
ಮ್ಹಜೆ ಭಿತರ್ ಏಕ್ ತಾರ್ಕಿಕ್ ಚಿಂತ್ಪಿ ಆನಿ ಪ್ರಾಯೋಗಿಕ್ ಸಮೀಕ್ಷಕಾಚೊ ಆಸ್ಪಾವ್ ಆಸಾ ಆನಿ ಹಾಂವ್ ಆಸ್ಲ್ಲೆಂ ಆಸಾ ತಸೆಂ ಉಲಯ್ತಾಂ ವಾ ಬರಯ್ತಾಂ ಮ್ಹಳ್ಳೆ ದೆಕೂನ್ ಮ್ಹಾಕಾ ಅಭಿಮಾನಿ ಪ್ರಾಸ್ ವಿರೋಧಿ ಚಡ್ ಆಸಾತ್ ಮ್ಹಳ್ಳೆಂ ಹಾಂವ್ ಬರ್ಯಾನ್ ಜಾಣಾಂ. ವೈಚಾರಿಕ್ ಆನಿ ಸೈದ್ದಾಂತಿಕ್ ವಿರೋದ್ ಆಸ್ಲ್ಯಾರ್ ಮಾತ್, ಎಕಾ ಬರವ್ಪ್ಯಾಕ್ ವಾಡೊಂಕ್ ಸಾಧ್ಯ್ ಜಾತಾ.
ಮ್ಹಜ್ಯಾ ಚಾಳಿಸ್ ವರ್ಸಾಂಚ್ಯಾ ಕೊಂಕ್ಣಿ ಸಾಹಿತೀಕ್ ಪಯ್ಣಾಂತ್ ಮ್ಹಾಕಾ ಮಾರ್ಗದರ್ಶನ್ ದಿಲ್ಲ್ಯಾಂಚೊಂ ಆನಿ ಎಚ್ಚೆಮ್ ಮ್ಹಳ್ಯಾರ್ ಅಸೋಚ್ ಮ್ಹಣೊನ್ ಪಕ್ಕಾ ಕಳಿತ್ ಆಸೋನೀ ಬೇಶರ್ತ್ ಸಾಂಗಾತ್ ದಿಲ್ಲ್ಯಾಂಚೊಂ ಹ್ಯಾ ಸಂದರ್ಭಾರ್ ಮನಾ ಕಾಳ್ಜಾ ಪಾಸುನ್ ಉಪ್ಕಾರ್ ಭಾವುಡ್ತಾಂ.
ಖಾಲ್ತೆ ಪಣಿಂ ತುಮ್ಚೊ
ಎಚ್ಚೆಮ್, ಪೆರ್ನಾಲ್
15 comments
Congratulations! We are so proud of you HM! Let the flame keep on burning!
ಹೆಚ್ಚೆಮ್, ತುಕಾ ಕೇಂದ್ರ್ ಸಾಹಿತ್ಯ್ ಅಕಾಡೆಮಿಚೊ ಪುರಸ್ಕಾರ್ ಲಾಬ್ಲ್ಲೊ ಆಯ್ಕೊನ್ ಮಸ್ತು ಖುಷಿ ಜಾಲಿ. ತಡವ್ ಜಾವ್ನ್ ತರೀ ಕರ್ನಾಟಕಾ ಕೊಂಕ್ಣಿ ಸಾಹಿತಿಂಕ್ ದೇಶಿಯ್ ಮಟ್ಟಾರ್ ಒಳ್ಕೊಂಕ್ ಲಾಗ್ಲ್ಯಾತ್ ತೆಂ ಆಶಾದಾಯೆಕ್ ಸಂಗತ್.
What a beautiful and insightgul journey! As I read biographical details as an individual and a writer, many parts of the narrative were a revelation. The journey is truly inspirational and overwhelming. The roller-coster life journey of H M informs his writings.
The critical thinking, sharp observation, non-negotiable principles and empathetic sensibility is obviously the outcome of the deeper experiences and steadfast commitment to the lived values. H M deserves this accolade, recognition at the national level. It is only fitting that H M Pernal gets this award. The Konkani world expects many more literary contributions from him and wishes him the best of outcomes from his mindful sensibility.
I wish that H M continues to be an inspirational voice and a engaging mentor to all aspiring young literary voices. We look forward to his contributions in the field of training our youth and enable and empower them.
Kudos! H M Pernal!
Reading your life journey was indeed enriching.
Abhinanadan….
Dear HM, you have portrayed your literary and personal journey through this heartfelt article. You deserve the Sahitya Akademi Award for your great work. Congratulations and wish you many more years of fruitful journey in Konkani literature.
ಹಿ ಪ್ರಶಸ್ತಿ ಖರೆಂಚ್ well deserved. ವ್ಹಾ, ವ್ಹಾ, ಎಚ್ಚೆಮ್. ಪರ್ಬಿ!
This bio write up from school days till now shows how much you struggled for the konkani and kannada literature. Your journey From village to New Delhi to fetch the prestigious award is highly commendable. May God bless all your future assignments.
Hearty Congratulations dear Sri Henry Mendonca Pernal. I am reminded of the joy the Israelites felt when they reached the promised land after 40 years of relentless pursuit of their dream. Your contribution to nurturing our beloved konkani and the cultural heritage of our people is praiseworthy.
We look forward to your literary works winning accolades overseas too
Best wishes
Though I know you from last several years, came to know more today through your this article… Your revelation would certainly inspire many… that there is light at the end of tunnel…
The old newspaper clippings along with the article have helped revive old memories…
Congratulations once again and wish you all the best in all your endeavours.
Congratulations Sir! You are an asset to our Konkani Literature. We are proud of you 👏
Congratulations HM Sir!!
ಹಳ್ಳೆ ಥಾವ್ನ್ ಪೆಂಟೆಕ್ ರೊಮಾಂಚಕ್ ಪ್ರಯಾಣ್… Filled with strips and tribulations and yet successful journey. You have struggled and toiled hard to contribute immensely to up lift Konkani literature and have never compromised in your principals when it comes to literature whoever it is wherever it is you have stood firm. As you said you have more enemies than friends because you have questioned them when they are faulted and left them red faced.
Anyways finally fruits of your hard work and dedication entitled to you for this prestigious Central Sahitya Akademy Award for Literature for your book of Critical essays on poetry Roopa and Roopakam.
Congratulations my friend. March ahead and let your literature journey continue successfully.
ಸಾಹಿತ್ಯ ಅಕಾಡೆಮಿಚೊ ಪುಸ್ತಕ್ ಪುರಸ್ಕಾರ್ ವಿಜೇತ್ ಪೆರ್ನಾಲ್ಚಾ ಹೆನ್ರಿ ಮೆಂದೊಸ್ (ಎಚ್. ಎಂ. ಪೆರ್ನಾಲ್) ಹಾಕಾ ಉಲ್ಲಾಸಿತಾಂ. ಹ್ಯಾ ತಾಚಾ ವ್ಹಡ್ ಸಾಧನಾಚಾ ವಾಟೆರ್ ಮ್ಹಜೊ ಸುರ್ವಿಲೊ ಪಾತ್ರ್ ಆಸ್ಲಲೊ ಮ್ಹಣ್ ತಾಣೆ ತಾಚಾ ಬರ್ಪಾಂತ್ ಕಳಯ್ಲಾಂ. ಹೆಂ ತಾಚೆಂ ವ್ಹಡ್ ಮನ್ ದಾಕಯ್ತಾ. ವ್ಹಡ್ ಹಂತಾಕ್ ಪಾವ್ತಾನಾ ಜಾಯ್ತ್ಯಾಂಕ್ ಸುರ್ವಿಲ್ಯಾ ಮೆಟಾಂಚೊ ಉಡಾಸ್ ಯೇನಾ. ಪೂಣ್ ಹೆನ್ರಿನ್ ತಾಣೆ ಜಾವ್ನ್ ಉಡಾಸ್ ಕೆಲಾ. ಹ್ಯಾ ಖಾತಿರ್ ತಾಚೊ ಉಪ್ಕಾರ್ ಆಟಯ್ತಾಂ.
ಮಂಗ್ಳುರ್ ದಿಯೆಸೆಜಿಚೆಂ ಕಥೊಲಿಕ್ ಯುವ ಸಂಚಾಲನ್ (ಸಿವೈಎಂ) 1961 ಥಾವ್ನ್ ಇಂಗ್ಲಿಷ್ ಆನಿ ಕೊಂಕಣಿ ಭಾಸೆಂತ್ “ಭಾವಾಡ್ತಿ ಯುವಕ್” ಪತ್ರ್ ಕಾಡ್ತಾಲೆಂ ತರೀ ಮಂಗ್ಳುರ್ ದಿಯೆಸೆಜಿಂತ್ 1960ವ್ಯಾ ದಶಕಾಚಾ ನಿಮಾಣ್ಯಾ ವರ್ಸಾಂ ಥಾವ್ನ್ ಘಡೊನ್ ಆಯ್ಲಲ್ಯಾ ವಾವ್ರಾಡ್ಯಾಂಚಾ ಸಂಘರ್ಶ್ಯಾಚೊ ಪರಿಣಾಮ್ ಸಿವೈಎಂ-ಚೆರ್ ಪಡ್ತಾನಾ 1970 ದಶಕಾಚಾ ಸುರ್ವಿಲ್ಯಾ ವರ್ಸಾಂ ಥಾವ್ನ್ “ಭಾವಾಡ್ತಿ ಯುವಕ್” ಸಾಸ್ಣಾಚಾ ಸುಖಾಕ್ ಗೆಲ್ಲೆಂ. ಭಾವಾಡ್ತಿ ಯುವಕಾಚಿ ಏಕ್ ಪುಣಿ ಆದ್ಲಿ ಪ್ರತಿ ಪಳೆಂವ್ಕ್ ಆಶೆಲ್ಲೊಂ ತರೀ ತಿ ಸಯ್ತ್ ಮ್ಹಾಕಾ ಮೆಳ್ಳಲಿ ನಾ.
ಸಿವೈಎಂ ಕೇಂದ್ರಿಕ್ ಸಮಿತಿ ಅಧ್ಯಕ್ಷ್ ಜಾವ್ನ್ ವಾವುರ್ಲೆಲ್ಯಾ ಹಾಂವೆಂ, ತಿಸ್ತ್ರ್ಯಾ ಆವ್ದೆಂತ್ ಮ್ಹಣ್ಜೆ 1983 ಸಪ್ಟೆಂಬರಾಂತ್ ಯುವಜಣಾಂಚಾ ಚಟುವಟಿಕಾಂಕ್ ಪ್ರೋತ್ಸಾಹಿತ್ ಕರುಂಕ್ ಆನಿ ತಾಂಚಾ ಥಂಯ್ ಆಸ್ಚಿಂ ಬರ್ಪಾಂ ಸಂಬಂಧಿ ದೆಣಿಂ ಊರ್ಜಿತ್ ಕರುಂಕ್ ಕೊಂಕ್ಣಿ ಮಹಿನ್ಯಾಳೆಂ “ಯುವಕ್” ಪತ್ರ್ ಪೂರ್ಣ್ ನವ್ಯಾನ್ ಆರಂಭ್ ಕೆಲೆಂ. ನವೆಂಚ್ ಆರ್.ಎನ್.ಐ. ರೆಜಿಸ್ಟ್ರೇಶನ್ ಕರ್ತಾನಾ “ಆಮ್ಚೊ ಯುವಕ್” ಕರಿಜಾಯ್ ಪಡ್ಲೆಂ.
ಸುರ್ವಿಲಿಂ ತೀನ್ ವರ್ಸಾಂ ಹಾಂವ್ ಸ್ಥಾಪಕ್ ಸಂಪಾದಕ್ ಆಸ್ಲೊಂ. ತ್ಯಾ ವೆಳಾರ್ ಶೆಂಬರಾಂವಯ್ರ್ ಯುವಜಣಾಂಚಿ ತಾಂತುಂ ಉಣ್ಯಾನ್ ಕಾಲ್ದ್ಯಾ ವಾಂಟ್ಯಾನ್ ಪುಣಿ ಚಲಿಯಾಂಚಿ – ಸ್ತ್ರೀಯಾಂಚಿ ಬರ್ಪಾಂ (ಬರವ್ಪ್ಯಾಂ ಪಯ್ಕಿಂ ಥೊಡ್ಯಾಂಚಿ ಸರಾಗ್) ಫಾಯ್ಸ್ ಜಾಲ್ಯಾಂತ್ (ಕಥಾ, ಕವನಾಂ, ವಿನೋದ್, ಸಂವಾದ್, ವ್ಯಕ್ತಿ ಪರಿಚಯ್ ಇತ್ಯಾದಿ – ಖಬ್ರೊ, ಸಂಪಾದಕಾಕ್ ಪತ್ರಾಂ ಇತ್ಯಾದಿ ವೆಗ್ಳಿಂ). ಸುಮಾರ್ ಪಂಚ್ವೀಸ್ ವರ್ಸಾಂ ಚಲ್ಲಲೆಂ ಪತ್ರ್ ಆನಿಕೀ ಆಸ್ಲೆಂ ತರ್ ಕೊಂಕ್ಣೆಂತ್ ಆನಿ ತಿತ್ಲೆಂ ಬೊರೆಂಪಣ್ ಜಾತೆಂ ತೆಂ ನಖ್ಖಿ.
ಎಚ್.ಎಂ.ಚೊ ಆನ್ ಆನಿ ಮ್ಹಜೊ ಆನ್ ಬೊಂಬಂಯ್ತ್ ಎಕಾಚ್ ಕುಡಾಂತ್ (ಫೊರ್ಟಾಂತ್ ಸೈಂಟ್ ಪಾವ್ಲ್ ಅಸೋಸಿಯೇಶನ್) ವಸ್ತಿ ಕರ್ತಲೆ. ಎಚ್.ಎಂ. ಕೊಲೆಜ್ ಶಿಕ್ಪಾ ಹಂತಾರ್ ಬೊಂಬೈ ಗೆಲ್ಲ್ಯಾವೆಳಿಂ ಮ್ಹಜ್ಯಾ ಆನಾನ್ ಯುವಕ್ ಪತ್ರಾಚಿ ವ್ಹಳಕ್ ಕರ್ನ್ ದಿಲ್ಲಿ. ತೆದೊಳ್ ಕನ್ನಡ ಭಾಸೆಂತ್ ಬರವ್ನ್ ಆಸ್ಲಲ್ಯಾ .ಎಚ್.ಎಮ್. ಹಾಣೆ ಆಮ್ಕಾಂ ಪಯ್ಲೆಂ ಪಯ್ಲೆಂ ಕಾರ್ಟೂನಾಂ, ಉಪ್ರಾಂತ್ ಕಥಾ, ಕವಿತಾ ಆನಿ ಹೆರ್ ಪ್ರಕಾರಾಚಿಂ ಬರ್ಪಾಂ ದಾಡ್ಲಿಂ ಆನಿ ಆಮಿ ತಿಂ ಸರಾಗ್ ಫಾಯ್ಸ್ ಕೆಲಿಂ. ಥಂಯ್ ಥಾವ್ನ್ ಎಚ್.ಎಂ. ಆಜ್ ರಾಷ್ಟ್ರ್ ಹಂತಾಕ್ ಪಾವ್ಲಾ ಮ್ಹಣ್ತಾನಾ ವ್ಹಡ್ ಸಂತೊಸ್ ಜಾತಾ.
ಎಚ್ಎಮ್. ಹಾಕಾ ಪರತ್ ಉಲ್ಲಾಸಿತಾಂ ಆನಿ ಫುಡೆಂ ತಾಕಾ ಆನಿ ತಾಚಾ ಕುಟ್ಮಾಕ್ ಸರ್ವ್ ಬೊರೆಂ ಮಾಗ್ತಾಂ. ತಾಚಾ ಥಾವ್ನ್ ಕೊಂಕ್ಣಿ ವಾಡೊನ್, ಫುಲೊನ್ ಯೆಂವ್ದಿ ಆನಿ ಹ್ಯಾ ಖಾತಿರ್ ದೇವ್ ಬಳ್ – ಭಲಾಯ್ಕೆನ್ ಸಾಂಬಾಳುಂ ಮ್ಹಣ್ ಆಶೆತಾಂ.
Hearty Congratulations H.M.
ಎಚ್ಚೆಮ್, ತುಜ್ಯಾ ಕೊಂಕ್ಣಿಂ ಸಾಹಿತ್ಯ್ ಸೆವಾ ಪಯ್ಣಾರ್ ತುಜ್ಯಾ ಕೃತಿಯೆಕ್ ಫಾವೊ ಜಾಲ್ಲ್ಯಾ ಕೇಂದ್ರ್ ಸಾಹಿತ್ಯ್ ಅಕಾಡಮಿ ಪುರಸ್ಕಾರಾಕ್ ಪರ್ಭಿಂ ಪಾಟಾಯ್ತಾಂ.
ವ್ಯಂಗ್ ಚಿತ್ರಾಂ ಥಾವ್ನ್ ಆರಂಭ್ ಜಾಲ್ಲಿ ತುಜಿ ಸಾಹಿತ್ಯ್ ವೋಡ್ ಸಾಮಾಜಿಕ್ ತಶೆಂ ಸಾಹಿತ್ಯ್ ಕ್ಶೇತ್ರಾಂತ್ ಜಾಂವ್ಚ್ಯಾ ವಿವಿಧ್ ಗಜಾಲಿಂಕ್ ತಶೆಂ ತುಜಿ ಅರ್ಥಾಭರಿತ್ ವಿಮರ್ಶಾ ಆನಿ ಕವಿತಾ ಕಥಾ ಲೇಖನಾಂ ತಶೆಂ ಹೆರ್ ಬರ್ಪಾಂ ಬರವ್ವ್ನ್ ಹ್ಯಾ ಮುಕಾಂತರ್ ಹೆರ್ ಬರಯ್ಣಾರಾಂಕ್ ದಿಲ್ಯಾ ಹುಮೆದ್ ಪ್ರೋತ್ಸಾಹ್ ನಿಮ್ತಿಂ ಆಜ್ ತುಂ ಹ್ಯಾ ಪಾಂವ್ಡಾಕ್ ಪಾವ್ಲೆಲ್ಯಾಕ್ ಹಾಂವ್ ತುಜೆ ಥಂಯ್ ಅಭಿಮಾನ್ ಪಾವ್ತಾಂ. Congrats H.M.
Congratulations HM, well deserved.
ಹೆನ್ರಿ ಪೆರ್ನಾಲ್ ಸರ್ ಕೊಂಕ್ಣಿ ಸಾಹಿತ್ಯ ಕ್ಷೇತ್ರಾಂತ್ ನಾವಾಡ್ದಿಕ್ ನಾಂವ್. ತಾಣಿಂ ಕನ್ನಡ್ ಶೆತಾಂತ್ ಬರವ್ಣೆಂಚೊ ವಾವ್ರ್ ಶುರು ಕೆಲ್ಲೆಂ ವೆತಾಂ ವೆತಾಂ ತಾಂಚೆ ಆಸಕ್ತ್ ಕೊಂಕ್ಣಿಚಾ ಶೇತಾ ವಾಟೆನ್ ಪರ್ತಾತಾ ತೆ ಆಮ್ಚೆಂ ಭಾಗಚ್ ಮ಼ಳ್ಯಾರ್ ಚುಕ್ ನಾಂ. ಜೀವಿತಾಂತ್ ಸಂಘರ್ಷ್ ಪೂರ್ಣ್ ಜೀವಿತ್ ಝರಲ್ಲ್ಯಾರೀ ಬರ್ಪಾಚೊ ಸಂಗಾತ್ ಮಾತ್ರ್ ಸೊಡುಂವ್ಕ ನಾ. ವಿವಿಧ್ ಸ್ಥರಾಚೆಂ ಬರಾಪ್ ತಾಂಕಾ ಸಾವ್ಕಾಸ್ ಸಾವ್ಕಾಸ್ ಫಾಮಾದ್ ಜಾಂವ್ಕ್ ಕಾರಣ ಜಾತಾ.ತ್ಯಾ ಪಯ್ಕಿ ಕಿಟಾಳ್ ಸಾಹಿತಿಕ್ ಜಾಳಿನಿಂ 15 ವರ್ಸಾ ಥಾಂವ್ನ್ ನಿರಂತರ್ ಸೇವಾ ಕರ್ನಚ್ ಆಯಿಲ್ಲೆಂ ಮಹಾನ್ ಕಾರ್ಯೆಂ ಮ಼ಣ್ಯೆತ್. ತಾಂಚೆಂ ಕೊಂಕ್ಣಿ ಶೇತಾಂತ್ಲೆಂ ನಿಸ್ವಾರ್ಥ್ ವಾವ್ರಾಚೊ ಫಳ್ ಆಜ್ ಕಿತೆಂ ಪಳೆಯ್ತಾಂವ್ ತೆಂ ತಾಚೆಂ ಚಾಳಿಸ್ ವರ್ಸಾಂಚೊ ಸಮರ್ಪಣ್ ಜಾವ್ನಾಸಾ. ಆತಾಂ ತೆಂ ಭಾರತ ಸರ್ಕಾರಾಚೊ ಸರ್ವ ಶ್ರೇಷ್ಠ ಸಾಹಿತ್ಯ ಅಕಾಡಮಿಚೊ ಪುರಸ್ಕಾರ್ ಗೌರವಾಚೆಂ ಹಂತಾಕ್ ಪಾವ್ಲಾ. ಹೆಂ ಸಗ್ಳ್ಯಾ ಕೊಂಕ್ಣಿಂ ಮೊಗಿಂಕ್ ಏಕ್ ಕುರೊವ್ ತಶೆಂ ಭೋಗ್ತಾ.
ಮೊಗಾಳ್ ಹೆಚ್. ಎಮ್. ಸರ್ ಫುಡ್ಲ್ಯಾ ದಿಸಾಂನಿ ದೇವ್ ತುಂಮ್ಕಾ ಬರಿ ಬಲಾಯ್ಕಿ ದಿಂವ್ದಿ ಆನಿಂ ಕೊಂಕ್ಣಿ ಬಾಸೆಂಚಿ ಸೇವಾ ಫಳಾದಿಕ್ ಜಾಂವ್ದಿ ಮ಼ಣ್ ಮಾಗ್ತಾಂ.Heartly congratulations dear H. M. Sir