ಕೊಮಿಡಿ ಕಂಪೆನಿ(ರಿ.) ಮಂಗ್ಳುರ್ ಆಪ್ಲ್ಯಾ ವೀಸಾವ್ಯಾ ವರ್ಸುಗೆಚ್ಯಾ ಸಂದರ್ಬಾರ್ ಆಸಾ ಕರ್ಚ್ಯಾ ‘ಮೆಲ್ಲ್ಯಾಂಚೆ ಉಪಾದ್ರ್’ ನಾಟಕಾಚೆಂ ಮುಹೂರ್ತ್ ಕಾರ್ಯೆಂ ಮೇಯಾಚ್ಯಾ 18 ತಾರಿಕೆರ್ ಸೊಮಾರಾ ಮಂಗ್ಳುರ್ಚ್ಯಾ ಡೊನ್ ಬೊಸ್ಕೊ ಸಭಾಸಾಲಾಂತ್ ಚಲ್ಲೆಂ.
NRI ಉದ್ಯಮಿ, ಮಹಾದಾನಿ, ‘ವಿಶನ್ ಕೊಂಕಣಿ’ ಸಂಸ್ಥಾಪಕ್ ಶ್ರೀಮಾನ್ ಮೈಕಲ್ ಡಿಸೋಜಾನ್ ಕಾರ್ಯಾಚ್ಯಾ ಅಧ್ಯಕ್ಷ್ ಸ್ಥಾನಾ ಥಾವ್ನ್ ಪೋಸ್ಟರ್ ಅನಾವರಣ್ ಕರ್ಚ್ಯಾ ಮಾರಿಫಾತ್ ಸಾಂಕೇತಿಕ್ ರಿತಿನ್ ನಾಟಕಾಚೆಂ ಮುಹೂರ್ತ್ ಕಾರ್ಯೆಂ ಚಲವ್ನ್ ವ್ಹೆಲೆಂ.
‘ದಾಯ್ಜಿ ವರ್ಲ್ಡ್’ ಸಂಸ್ಥಾಪಕ್, ಪ್ರೈವೆಟ್ ಚಾಲೆಂಜ್ ರೂವಾರಿ ಶ್ರೀಮಾನ್ ವಾಲ್ಟರ್ ನಂದಳಿಕೆ ಮುಖೆಲ್ ಸಯ್ರೆ ಜಾವ್ನ್ ಹಾಜರ್ ಆಸುಲ್ಲೆ. ಕವಿ, ಉದ್ಯಮಿ ಶ್ರೀಮಾನ್ ಟೈಟಸ್ ನೊರೋನ್ಹಾನ್ ಪ್ರಾಸ್ತಾವಿಕ್ ಉಲವ್ಪ್ ದಿಲೆ. ಸಯ್ರೆ ಜಾವ್ನ್ ‘ಗ್ರ್ಯಾಮಿ ಪುರಸ್ಕಾರ್’ ವಿಜೇತ್ ಸಂಗೀತ್ ನಿರ್ದೇಶಕ್ ಶ್ರೀಮಾನ್ ವನಿಲ್ ವೇಗಸ್, ‘ಅಸ್ತಿತ್ವ’ ಪಂಗ್ಡಾಚೊ ಮುಖೆಲಿ, ನಟ್ – ನಿರ್ದೇಶಕ್ ಶ್ರೀಮಾನ್ ಕ್ರಿಸ್ಟಿ ನೀನಾಸಂ, ಮಾಲ್ಘಡೊ ನಟ್ – ನಿರ್ದೇಶಕ್ ಶ್ರೀಮಾನ್ ಡೆನಿಸ್ ಮೊಂತೇರೊ ಆನಿ ‘ಕೊಮಿಡಿ ಕಂಪೆನಿ’ ತರ್ಫೆನ್ ಜಾಸ್ಮಿನ್ ಡಿಸೋಜ ವೆದಿರ್ ಹಾಜರ್ ಆಸುಲ್ಲಿಂ.
‘ಮೆಲ್ಲ್ಯಾಂಚೆ ಉಪಾದ್ರ್…!’ ನಾಟಕಾಚೆಂ ರಚನ್ ಆನಿ ನಿರ್ದೇಶನ್ : ನೆಲ್ಲು ಪೆರ್ಮನ್ನೂರ್, ಸಂಗೀತ್ : ರವೀನ್ ಮಾರ್ಟಿಸ್, ಸಾಹಿತ್ಯ್ : ವಿಲ್ಸನ್ ಕಟೀಲ್, ಪದಾಂಕ್ ತಾಳೆ ಆನಿ ಸಂಗೀತ್ ವನಿಲ್ ವೇಗಸಾಚೆಂ.
ಕಾರ್ಯಾ ಮಧೆಂ ದೆ| ಚಾಫ್ರಾ ದೆಕೋಸ್ತಾಚ್ಯಾ ‘ವಿಶೆಂತಿಚೆ ಭಾವ್’ ನಾಟಕಾಚೆಂ ಮುಹೂರ್ತ್ ಕಾರ್ಯೆಂಯ್ ಚಲ್ಲೆಂ.
ಕಾರ್ಯಾಂತ್ ಡೊಲ್ಲಾ ಮಂಗ್ಳುರ್, ‘ಕೊಂಕ್ಣಿ ನಾಟಕ್ ಸಭಾ’ ಅಧ್ಯಕ್ಷ್ ಫ್ಲೊಯ್ಡ್ ಡಿಮೆಲ್ಲೊ ಕಾಸ್ಸಿಯಾ, ಲೂಸಿ ಲೋಬೊ ಆರಾನ್ಹಾ ಆನಿ ಹೆರ್ ಕಲಾಕಾರ್ ಹಾಜರ್ ಆಸುಲ್ಲೆ. ನೆಲ್ಲು ಪೆರ್ಮನ್ನೂರಾನ್ ಕಾರ್ಯೆಂ ಚಲವ್ನ್ ವ್ಹೆಲೆಂ.
