ಕಾರವಾರ್ ಶಹರಾಂತ್ ಸೇಂಯ್ಟ್ ಜೋಸೆಫ್ಸ್ ಹೈಸ್ಕೂಲಾಂತ್ ಶಿಕ್ಶಕ್ ಆನಿ ಕೊಂಕ್ಣಿ ತಶೆಂ ಕನ್ನಡ ಲೇಖಕ್, ಆಗಸ್ಟಿನ್ ಪ್ರಕಾಶ ಕುರಿಯನ್ ಹಾಂಚೊ ಕವಿತೆಂಚೊ ಪುಸ್ತಕ್ ‘ಒಲವಿನ ಗಾನ’ ಆನಿ ಚುಟುಕಾಂ ಪುಂಜೊ ‘ಹನಿಮುತ್ತು’ ಲೋಕಾರ್ಪಣ್ ಕಾರ್ಯೆಂ ಆಯ್ತಾರಾ, 17 ಮೇ ವೆರ್ ರಬಿಯಾ ಪ್ಲಾಜಾ, ಗ್ರೀನ್ ಸ್ಟ್ರೀಟ್, ಕಾರವಾರಾಂತ್ ಚಲ್ಲೆಂ.
ಸೇಂಯ್ಟ್ ಜೋಸೆಫ್ ಚರ್ಚ್ ಬಾಡ್, ಕಾರವಾರ್ ಫಿರ್ಗಜೆಚೊ ವಿಗಾರ್ ಆನಿ ಕಾರವಾರ್ ದಿಯೆಸಿಜ್ ಎಡ್ಯುಕೇಷನ್ ಸೊಸಾಯಿಟಿಚೊ ಆದ್ಲೊ ಕಾರ್ಯದರ್ಶಿ ಮಾ| ಬಾ| ಜೋನ್ ಫರ್ನಾಂಡಿಸ್ ಹಾಣಿ ಪುಸ್ತಕಾಂ ಉಗ್ತಾಯ್ಲಿಂ. ಆಪ್ಲ್ಯಾ ಸಂದೇಶಾಂತ್ ತಾಣಿ “ಪ್ರಕಾಶ್ ಹಾಣೆ ಇಸ್ಕೊಲಾಂತ್ ವಿದ್ಯಾರ್ಥಿಂಕ್ ಪಾಠ ಪ್ರವಚನಾ ಸಾಂಗಾತಾ, ತಾಚೆ ಥಂಯ್ ಆಸ್ಚ್ಯಾ ತಾಲೆಂತಾ ದ್ವಾರಿಂ ಹ್ಯೊ ದೋನ್ ಕೃತಿಯೊ ರಚ್ಲ್ಯಾತ್. ಹಾಂವ್ ತಾಂಕಾಂ ಶುಭಾಶಯ ದಿತಾಂ” ಮ್ಹಳೆಂ.
ಕಾರ್ಯಕ್ರಮಾಚೊ ಅಧ್ಯಕ್ಶ್, ಸೇಂಯ್ಟ್ ಮಿಲಾಗ್ರಿಸ್ ಸೊಸಾಯಿಟಿ ಲಿ. ಹಾಚೊ ಅಧ್ಯಕ್ಷ್ ಜೋರ್ಜ್ ಫೆರ್ನಾಂಡಿಸ್, ಹಾಣಿ “ಪುಸ್ತಕ್ ರಚನ್ ಖರೇಚ್ ಸಾಹಸಾಚೆಂ ಕಾಮ್, ತಾಂತುಯೀ ಮೊಗಾಚ್ಯಾನ್ ಪಯ್ಲ್ಯಾಚ್ ಪಾವ್ಟಿಂ ದೋನ್ ಕೃತಿ ಲೋಕಾರ್ಪಣ್ ಕರ್ಚೆಂ ಗೌರವಾಚೆಂ, ಕ್ರಿಸ್ತಾಂವ್ ಸಮುದಾಯಾಂತ್ ಕನ್ನಡ್ ಸಾಹಿತ್ಯ್ ಸೇವಾ ಕರ್ತಲ್ಯಾಂಚೊ ಸಂಖೊ ಭಾರಿ ಉಣೊ ಆಸಾ, ಅಸ್ಲ್ಯಾಂತ್ ತಾಚೊ ಸೇವಾ ಗಮನಾರ್ಹ್, ತಾಕಾ ಉಜ್ವಲ್ ಭವಿಷ್ಯ್ ಫಾವೊ ಜಾಂವ್ದಿ” ಮ್ಹಣ್ ಲೇಖಕಾಕ್ ಸಾಂಗ್ಲೆಂ.
ಮುಕೆಲ್ ಸಯ್ರೊ, ಸಾಹಿತಿ ಆನಿ ವಿಮರ್ಶಕ್ ರಾಮಕೃಷ್ಣ ಜಿ. ಗುಂದಿ ಹಾಣಿ , ಕ್ಯಾನ್ಸರ್ ಸಾರ್ಕ್ಯಾ ಪಿಡೆ ಸಾಂಗತಾ ಧಯ್ರಾನ್ ಝುಜ್ ಕರ್ನ್ ಜಯ್ತೆವಂತ್ ಜಾಲ್ಲೊ ಉರ್ಬೆವಂತ್ ಪ್ರಕಾಶ ಕುರಿಯನ್, ಹಾಂಚ್ಯಾ ವಿವಿಧ್ ಕವನಾಂತ್ ಸಮಾಜೆಕ್ ಬರೊ ಸಂದೇಶ್ ಆಸಾ. ತಾಂಕಾಂ ಬರೆಂ ಫುಡಾರ್ ಫಾವೊ ಜಾಂವ್ ಮ್ಹಣ್ ಸಾಂಗ್ಲೆಂ.ಆನ್ಯೇಕ್ ಮುಖೆಲ್ ಸಯ್ರೊ ಕನ್ನಡ್ ಸಾಹಿತ್ಯ್ ಪರಿಷತ್ ಕಾರವಾರ್ ಹಾಚೊ ಅಧ್ಯಕ್ಶ್ ಶ್ರೀ ರಾಮಾ ನಾಯ್ಕ ಹಾಣಿಂ, “ಕುರಿಯನ್ ಹಾಂಚಿ ಸಾಹಿತ್ಯ್ ಸೇವಾ ಕರ್ನಾಟಕಾಂತ್ ವಿಶಿಷ್ಟ್ ಜಾವ್ನಾಸಾ. ಪಯ್ಲ್ಯಾಚ್ ಪ್ರಯತ್ನಾಂತ್ ಜವ್ಳಿಂ ಜಶೆಂ ದೋನ್ ಕೃತಿಯೊ ತಾಣಿ ಲೋಕಾರ್ಪಣ್ ಕೆಲ್ಯಾಂತ್, ತಾಂಣಿ ಮುಕ್ಲ್ಯಾ ದಿಸಾನಿಂ ಆನಿ ಇತ್ಲಿಂ ಸಾಹಿತ್ಯ್ ರಚನ್ ಕರುಂದಿ” ಮ್ಹಳೆಂ.
ಶ್ರೀಮತಿ ಪ್ರೇಮಾ ಟಿ.ಎಂ.ಆರ್. ಆನಿ ಜೆ. ಪ್ರೇಮಾನಂದ ಹಾಂಣಿ ಪುಸ್ತಕಾಂಚಿಂ ಒಳಕ್ ಕರುನ್ ದಿಲಿ. ಲೇಖಕ್ ಆಗಸ್ಟಿನ್ ಪ್ರಕಾಶ ಕುರಿಯನ್ ಹಾಂಣಿ ಪ್ರಾಸ್ತಾವಿಕ್ ದಿಲೆಂ. ಇಸ್ಕೊಲಾಚೊ ಪಾಟ್ಲೊ ವಿದ್ಯಾರ್ಥಿ ಆನಿ ಪ್ರಸ್ತುತ್ ನ್ಯಾಯಾಧೀಶ್ ಜಾವ್ನ್ ವಿಂಚುನ್ ಆಯಿಲ್ಲ್ಯಾ ಆದಿತ್ಯ ವಿ. ಹೊಸಲ್ಕರ್ ತಶೆಂಚ್ ಕನ್ನಡ ವಿಷಯಾಂತ್ ಶೆಂಭೊರಾಂತ್ ಶೆಂಭೊರ್ ಅಂಕೆ ಆಪ್ಣಾಯಿಲ್ಲ್ಯಾ ಅಭಿಜ್ಞಾ ಎಸ್.ಕೆ., ಸಂಪದಾ ನಾಯ್ಕ, ಶ್ವೇತಾ ನಿಲೋಗಲ್ ಆನಿ ಸುಮಿತ್ ಮೇತ್ರಿ ಹಾಂಕಾಂ ಮಾನ್ ಕೆಲೊ.
ಶಿಕ್ಶಕ್ ವಿಷ್ಣು ಪಟಗಾರ ಹಾಣಿ ಕಾರ್ಯೆಂ ಚಲವ್ನ್ ವೆಲೆಂ. ದಿನೇಶ ಕಿನ್ನರಕರ್ ಹಾಣಿ ಯೆವ್ಕಾರ್ ಮಾಗ್ಲೊ. ಗಣಪತಿ ಗೌಡ ಹಾಣಿ ದಿನ್ವಾಸ್ ಪಾಟಯ್ಲೆ.
