ಕೊಂಕಣಿ ಸಾಹಿತ್ಯ-ಕಲೆ-ಸಂಸ್ಕೃತಿ ಸಂಭ್ರಮ ಪಾವಚೆ ದೋನಿ ದಿವಸಾಚೆ ಉತ್ಸವ “ವಿಶ್ವಕೊಂಕಣಿ ಸಮಾರೋಹ” ಸಮಾರಂಭ ಮೇ 17 ಆನಿ 18, 2026 ತಾರ್ಕೆರ ವಿಶ್ವ ಕೊಂಕಣಿ ಕೇಂದ್ರ ಹಾಂಗಾ ಭಾರೀ ವಿಜೃಂಭಣೇರಿ ಚಲ್ಲೆಂ. ಕೊಂಕಣಿ ಕುಡುಬಿ ಸಮುದಾಯಾಚೆ ಸಾಂಪ್ರದಾಯಿಕ ಲೋಕವೇದ ನೃತ್ಯ ವಾದ್ಯ ಸಂಗೀತ ಮೆಳೊವನು ಮುಖೇಲ ಸೊಯರೆಂಕ ಸ್ವಾಗತ ಕೆಲೆಂ. ನಂತರ ಗೋಂಯ್ ಕಲಾ-ಸಂಸ್ಕೃತಿ- ಶಿಕ್ಷಣ ಪೋಷಕ ಮಾನೆಸ್ತಿಣ್ ಸುಲಕ್ಷಣಾ ಸಾವಂತ್ ಹಾನ್ನಿ ದಿವೊ ಲಾವನ ಸಮಾರೋಹ ಕಾರ್ಯಾವಳ ಉಗ್ತಾವಣ ಕೆಲೆಂ. ವಿಶ್ವ ಕೊಂಕಣಿ ಕೇಂದ್ರಾಚೆ ಅಧ್ಯಕ್ಷ ಸಿ ಎ ನಂದಗೋಪಾಲ ಶೆಣೈ ಹಾನ್ನಿ ಸಮಾರೋಹ ಬದ್ದಲ ಪರಿಚಯ ದಿವನು ಅತಿಥಿಂಕ ಸ್ವಾಗತ ಕೆಲೆಂ. ಡಾ. ಕಸ್ತೂರಿ ಮೋಹನ ಪೈ ಹಾನ್ನಿ ಮುಖೇಲ ಸೊಯರೆಂಕ ಫುಲ್ಲಾಂ ತುರೊ ದೀವನು ಯೆವಕಾರ ಕೆಲೆಂ. ಶ್ರೀಮತಿ ಸುಲಕ್ಷಣಾ ಸಾವಂತ ಹಾನ್ನಿ ತಾಂಗೆಲೆ ಸಂದೇಶಾಂತ ಕೊಂಕಣಿ ಭಾಷೆಚೊ ಬೆಳವಣಿಗಾ ತಂತ್ರಜ್ಞಾನಾಚೆ ಬಳವಣಿಗಾ, ಉಪಭಾಷೆಚೆ ಮಹತ್ವ, ಗೋವಾ ಕರ್ನಾಟಕಾಚೆ ಮಧ್ಯೆ ಆಸುಚೆ ಮೋಗ ಆನಿ ವಿಶ್ವ ಕೊಂಕಣಿ ಕೇಂದ್ರಾಚೆ ವಿಶೇಷ ಪ್ರಯತ್ನ ಬದ್ದಲ ಉಲಯಿಲೆಂಚಿ. ಸಾಹಿತ್ಯ ಆಕಾಡೆಮಿ ದಿಲ್ಲಿ, ಹಾಜೆ ಸದಸ್ಯ ಹೆಚ್ ಎಮ್ ಪೆರ್ನಾಳ್ ಹಾನ್ನಿ ಆಕಾಡೆಮಿಚೆ ವೆವೆಗಳೆ ಚಟುವಟಿಕಾ ಬದ್ದಲ ಪರಿಚಯ ದಿಲ್ಲೆಂ.
ಸಾಹಿತ್ಯ ಆಕಾಡೆಮಿ ವತೀನ ಆಯೋಜನ ಕೆಲೆಲೆ ಪರಿಚರ್ಚಾ ಸತ್ರಾ “ಸಾಹಿತ್ಯ ವಿಶ್ಲೇಷಣೆಚೆ ಮಹತ್ವ ಆನಿ ವಿಧಾನ” ಬದ್ದಲ ಕೇಂದ್ರ ಸಾಹಿತ್ಯ ಅಕಾಡೆಮಿ ಕೊಂಕಣಿ ವಿಭಾಗಾಚೆ ಸಂಚಾಲಕ ಮೆಲ್ವಿನ್ ರೊಡ್ರಿಗಸ್ ಹಾನ್ನಿ ಮಾಹಿತ ದಿಲೆಂ. ಮಾಗಿರಿ ಹೆಂ ವಿಚಾರ ಸತ್ರಾಂತ ವಿಶ್ವ ಕೊಂಕಣಿ ಕೇಂದ್ರಾಚೆ ಉಪಾದ್ಯಕ್ಷ ಡಾ ಕಿರಣ್ ಬುಡ್ಕುಳೆ ಹಾನ್ನಿ ಪ್ರಾಸ್ತಾವಿಕ ಉತ್ರಂ ಉಲಯಿಲಿಂಚಿ. ನಂತರ ಗೋಕುಲದಾಸ ಪ್ರಭು ಅಧ್ಯಕ್ಷಪಣಾರಿ ಚಲ್ಲೆಲ ಗೋಷ್ಟಿ “ಸಾಹಿತ್ಯ ಪ್ರಕಾರಾಂಚೆ ಮಧ್ಯೆ ಸಮತೋಲಿತ ಬೆಳವಣಿಗಾ- ಏಕ ವಿಶ್ಲೇಷಣ” ಹೆಂ ವಿಚಾರಾಂತ ಡಾ ಬಿ ದೇವದಾಸ ಪೈ ಹಾನ್ನಿವಿಚಾರ ಮಂಡನ ಕೆಲೆಂ. ಕೇಂದ್ರ ಸಾಹಿತ್ಯ ಅಕಾಡೆಮಿ ಕೊಂಕಣಿ ಸಲಹಾ ಮಂಡಳಿಚೆ ಸದಸ್ಯ ಹೆಚ್ ಎಮ್ ಪೆರ್ನಾಳ್ ಅಧ್ಯಕ್ಷತೇರಿ ಚಲ್ಲೆಲೆ ಗೋಷ್ಟಿ “ಸಾಹಿತ್ಯ ವಿಶ್ಲೇಷಣಾಂತ ಮಹತ್ವಾಚೆ ಅಂಶ” ಹೆಂ ವಿಷಯಾಂತ ಡಾ ಹನುಮಂತ ಚೊಪಡೆಕರ್ ಆನಿ ಪ್ರೊ ರಮಿತಾ ಗುರವ್ ಹಾನ್ನಿ ಪ್ರಬಂಧ ಮಂಡನ ಕೆಲೆಂ.
ದನಪಾರಾ ಕವಿತಾ ಟೃಸ್ಟ್ ಸಹಯೋಗಾನ ಕೊಂಕಣಿಚೆ ಮಹಾನ ಕವಿ ಕೇರಳಚೆ ಪಿ ಜಿ ಕಾಮತ್ ಜನ್ಮ ಶತಾಬ್ದಿ ಆಚರಣ ಚಲ್ಲೆಂ. ತಾಂಗೆಲೆ ಪೂತ ಆನಂದ ಕಾಮತ್ ಆನಿ ಕುಟುಂಬಾಚೆ ಸದಸ್ಯ ಉಪಸ್ಥಿತ ಆಶಿಲಿಂಚಿ. ದೆ. ಪಿ ಜಿ ಕಾಮತ್ ಹಾಂಗೆಲೆ “ಕಾವ್ಯಾತ್ಮಕ ಜೀವನಾಚೆ ಕವಿ ಪರಿಚಯ” ಕಾರ್ಯಕ್ರಮಾಂತ ಸ್ಮಿತಾ ಶೆಣೈ, ಎಮ್. ಆರ್. ಕಾಮತ್, ಡಾ ವೆಂಕಟೇಶ ನಾಯಕ್, ಕು. ನಿನಿಶಾ ಮೊಂತೆರೊ ಹಾನ್ನಿ ಕವಿತಾ ವಾಚನ ಕೆಲೆಂ. ಸಿ ಎ ನಂದಗೋಪಾಲ್ ಶೆಣೈ ಅಧ್ಯಕ್ಷತೇರಿ ಮೆಲ್ವಿನ್ ರೊಡ್ರಿಗಸ್ ಆನಿ ಹೆಚ್ ಎಮ್ ಪೆರ್ನಾಳ್ ಹಾನ್ನಿ ದೆ. ಪಿ ಜಿ ಕಾಮತ್ ಹಾಂಗೆಲೆ ಸಾಹಿತ್ಯ ಸೇವಾ ಯಾದ ಕರನು ಪ್ರಶಂಶಾ ಕೆಲೆಂ.
ಸಾಂಜೆವೆಳಾ ಚಲ್ಲೆಲೆ ಸಾಂಸ್ಕೃತಿಕ ಕಲಾ ಪ್ರದರ್ಶನಾಂತ ಕುಮಟಾಚೆ ಲಕ್ಶ್ಮೀನರಸಿಂಹ ಕಲಾಮಂಡಳಿ ಹಾನ್ನಿ ಪ್ರಸ್ತುತ ಕೆಲೆಲೆ ‘ನರಸಿಂಹ ಅವತಾರ’ ನೃತ್ಯ ರೂಪಕ, ಸಾಧನಾ ಬಳಗ ಥಾವನ ಹಾಸ್ಯ ರಸಾಯನ ಕಾರ್ಯಕ್ರಮ ಆನಿ ಅಂಕಿತಾ ಕಾಮತ ಪಂಗಡಾ ಥಾವನ ಬಾಲ ಕಲಾವಿದಾಂಗೆಲೊ ‘ವೀರನಾರಿ ಅಹಲ್ಯಾಬಾಯಿ ಹೋಳ್ಕರ’ ನಾಟಕ ಪ್ರದರ್ಶನ ಪ್ರೇಕ್ಷಕಾಂಗೆಲೊ ಮನ ಜಿಕ್ವಲೆಂ.
ಸಮಾರೋಹಾಚೆ ದುಸರೆ ದಿವಸ ಸಕಾಳಿ ತೀನಿ ಜನಪದ ಗೋಷ್ಟಿಚೆ ಉದ್ಘಾಟನ ಕಾರ್ಯಾವಳ ಚಲ್ಲೆಂ. ಜನಪದ ಚಿಂತಕ ಆನಿ ಗೋಂಯ ವಿಶ್ವವಿದ್ಯಾನಿಲಯಾಚೆ ವೈಸ್-ಡೀನ್ ಡಾ ಪ್ರಕಾಶ್ ಪರಿಯೆಂಕರ್ ಹಾನ್ನಿ ಚಲಾಯಸುನ ದಿಲ್ಲೆಂ. ಮಹಾದಾನಿ ಆನಿ ಎಮ್ ಡಿ ವಿ ಕೆ ವಿಶನ್ ಕೊಂಕಣಿ ಶತ ಕೊಂಕಣಿ ಪುಸ್ತಕ ಪ್ರಕಟಣಾ ಯೋಜನಾಚೆ ಪ್ರವರ್ತಕ ಮೈಕೆಲ್ ಡಿ ಸೊಜ಼ಾ ಆನಿ ವರ್ಧನಿ ಪ್ರತಿಷ್ಟಾನಾಚೆ ನಿರ್ದೇಶಕ ಉಷಾ ಎನ್ ಶೆಣೈ ಹಾನ್ನಿ ಕಾರ್ಯಾವಳೀಂತ ಭಾಗಿ ಆಸುನು ಶುಭ ಸಾಂಗಲೆಂ.
ಮುಖಾರಿ ನಾಮಾನೆಚೊ ಕಾಣಿ ಬರಯತಲೊ ವಿವೇಕಾನಂದ ಕಾಮತ ಹಾಂಗೆಲೆ ಅಧ್ಯಕ್ಷತೇರಿ “ಕೊಂಕಣಿ ನ್ಯಾನೊ ಕಾಣಿಯೊ” ಕಥಾ ವಾಚನ ಚಲ್ಲೆಂ. ಜಯಶ್ರೀ ಶೆಣೈ, ವಂದನಾ ನಾಯಕ, ಕಸ್ತೂರಿ ಪೈ, ಶಕುಂತಲಾ ಆರ್ ಕಿಣಿ, ಬಸ್ತಿ ಶೋಭಾ ಶೆಣೈ ಹಾನ್ನಿ ನ್ಯಾನೊ ಕಾಣಿಯೆಚೆ ವಾಚನ ಕೆಲೆಂ. ನಾಮಾನೆಚೊ ಯಕ್ಷಗಾನ ಕಲಾವಿದ ವಿಮರ್ಶಕ ಡಾ ಪ್ರಭಾಕರ ಜೋಶಿ ಹಾಂಗೆಲೆ ಮಾರ್ಗದರ್ಶನಾರಿ “ಯಕ್ಷಗಾನ ಆನಿ ಕೊಂಕಣಿ ಜನ” ವಿಚಾರ ಗೋಷ್ಟಿಂತ ಮ್ಹಾಲ್ಗಡೆ ಅರ್ಗೋಡು ಮೋಹನದಾಸ್ ಶೆಣೈ, ಎಂ ಆರ ಕಾಮತ್ ಶಾಂತಾರಾಮ ಕುಡ್ವ ಹಾನ್ನಿ ವಿಚಾರ ಮಂಡನ ಕೆಲೆಂ. ಶಕುಂತಲಾ ಕಿಣಿ ಹಾಂಗೆಲೆ ಅಧ್ಯಕ್ಷತೇರಿ ಚಲ್ಲೆಲೆ ಲೋಕವೇದ ಗೀತ ಗಾಯನಾಂತ ಮರೋಳಿ ಸಬಿತಾ ಕಾಮತ್, ಜೂಲಿಯೆಟ್ ಫೆರ್ನಾಂಡಿಸ್, ಡಾ. ವಿಜಯಲಕ್ಷ್ಮಿ ನಾಯಕ್, ನಾರಾಯಣ ನಾಯಕ್ ಹಾನ್ನಿ ತಾಂಗತಾಂಗೆಲೆ ಸಮುದಾಯಾಚೆ ಪರಂಪರಾ ಬದ್ದಲ ಲೋಕವೇದ ಗೀತ ಗಾಯನ ಪ್ರಸ್ತುತ ಕೆಲೆಂ.
ದನ್ಪಾರಾ ಸಾಹಿತ್ಯ ಅಕಾಡೆಮಿ, ನವದೆಹಲಿ ಸಹಯೋಗಾನ, ವಿಶ್ವ ಕೊಂಕಣಿ ಕೇಂದ್ರ ಆನಿ ಕವಿತಾ ಟ್ರಸ್ಟ್ ನ ಆಯೋಜನ ಕೆಲೆಲೆ ಯುವ ಕೊಂಕಣಿ ಬರಹಗಾರಾಂಗೆಲೊ ಚರ್ಚಾ ಗೋಷ್ಟಿ ಚಲ್ಲೆಂ. ಸ್ಟ್ಯಾನಿ ಡಿ ಸೋಜಾ ಹಾನ್ನಿ ಹೆಂ ಕಾರ್ಯಾವಳೀಚೆ ಅಧ್ಯಕ್ಷಪಣ ಘೆತಲೆಂ. ವಿಲ್ಮಾ ಡಿ ಸೋಜಾ ಬಂಟ್ವಾಳ, ಲವಿತಾ ಡಿ ಸೋಜಾ, ಡಾ. ವೆಂಕಟೇಶ್ ನಾಯಕ್, ಗ್ಲಾನಿಶ್ ಮಾರ್ಟಿಸ್, ಶ್ವೇತಾ ಪೈ ಎಂ ಹೆಂ ಯುವ ಕೊಂಕಣಿ ಬರಹಗಾರಾಂನಿ ತಾಂಗೆಲೆ ಕವಿತಾ ವಾಚನ ಮುಖಾಂತರ ಸಭಿಕಾಂಗೆಲೊ ಮನಾಕ ಖುಷೀ ಜಾಲೆಂ.
ಸಂಜೆವೆಳಾ ಚಲ್ಲೆಲೆ ಸಮಾರೋಪ ಸಮಾರಂಭಾಂತ ಮುಖೇಲ ಸೊಯರೆ ಜಾವನು ಆಯಿಲೊ ಕರ್ನಾಟಕ ಹೈಕೋರ್ಟ್ ಹೆಚ್ಚುವರಿ ಸಾಲಿಸಿಟರ್ ಜನರಲ್ ಮಾನೆಸ್ತ್ ಕೆ ಅರವಿಂದ್ ಕಾಮತ್ ಹಾನ್ನಿ ಉಲಯತಚಿ “ಅಸಲೆ ಅಧ್ಬುತ ಜಾಲೆಲೆ ಭವ್ಯ ಸಭಾಗೃಹಾಂತ ಚಲಚೆ ವೆವೆಗಳೆ ಸಾಹಿತ್ಯಿಕ, ಸಾಂಸ್ಕೃತಿಕ, ಕಲಾ, ಶೈಕ್ಷಣಿಕ ಕಾರ್ಯಕ್ರಮ ಕ ಪ್ರಶಂಶಾ ವ್ಯಕ್ತ ಕೆಲೆಂ. ಸಭೆಂತ ವಿಶೇಷ ಜಾವನು ಆಯಿಲೊ ಮಾನಾಚೆ ಸೊಯರೊ ಮ್ಹಾಲ್ಗಡೆ ವಕೀಲ ಕೆ ಜಗದೀಶ್ ಕಾಮತ್ ಹಾನ್ನಿ “ಭಾರತ ಸಂವಿಧಾನಾಂತ ಭಾಷಾ ಅಲ್ಪಸಂಖ್ಯಾತಾಂಕ ಲಭ್ಯ ಆಸುಚೆ ಅವಕಾಶ” ಆನಿ ತಾಜೆ ಪೂರ್ಣಜಾವನು ಪ್ರಯೋಜನ ಘೇನಾ ನಾತ್ತಿಲೆ ವಿಚಾರಾ ಬದ್ದಲ ಬೋಟ ದಾಕೋವನು ಸಾಂಗುನ ದಿಲೆಂ. ವಿಶ್ವ ಕೊಂಕಣಿ ಕೇಂದ್ರ ಅಧ್ಯಕ್ಷ ಸಿಎ ನಂದಗೋಪಾಲ್ ಶೆಣೈ ಹಾನ್ನಿ ಮುಖೇಲ ಸೊಯರೆಂಕ ಯಾದಸ್ತಿಕಾ ದೀವನು ಮಾನ ದಿಲೆಂ. ವಿ ಕೊ ಕೇ ಖಜಾಂಚಿ ಬಿ ಆರ್ ಭಟ್, ಉಪಾಧ್ಯಕ್ಷ ಡಾ ಕಿರಣ ಬುಡ್ಕುಳೆ, ರಮೇಶ್ ಡಿ ನಾಯಕ, ಹಾನ್ನಿ ಉಪಸ್ಥಿತ ಆಶಿಲಿಂಚಿ. ಸಾಹಿತ್ಯ ಸಮಾರೋಹ ಕಾರ್ಯಾವಳೀಕ ಗೋಂಯ ವಿಶ್ವ ವಿದ್ಯಾನಿಲಯ ಆನಿ ವಿದ್ಯಾಕಲ್ಪಕ ವಿದ್ಯಾರ್ಥಿ ವೇತನಾಚೆ ವಿದ್ಯಾರ್ಥಿಂ ಆನಿ ಹೆರ ಕಾಲೇಜು ವಿದ್ಯಾರ್ಥಿಂ, ತರನಾಟೆ ಲೋಕ ಚಡ ಸಂಖ್ಯೆರಿ ಭಾಗಿ ಆಶಿಲಿಂಚಿ. ಉಪಾಧ್ಯಕ್ಷ ವಿಲಿಯಂ ಡಿಸೋಜಾ ಹಾನ್ನಿ ಧನ್ಯವಾದ ಸಮರ್ಪಣ ಕೆಲೆಂ.
ಸುಚಿತ್ರಾ ಶೆಣೈ ಆನಿ ವಿಜಯಲಕ್ಷ್ಮಿ ಕಾಮತ್ ಹಾನ್ನಿ ಕಾರ್ಯಕ್ರಮ ನಿರೂಪಣ ಕೆಲೆಂ. ಡಾ. ವೈಷ್ಣವಿ ಕಿಣಿ ನ ಕೊಂಕಣಿ ಅಭಿಮಾನ ಗೀತ ಗಾಯಲೆಂ.
