ಕೊಂಕ್ಣಿ ಲೇಖಕ್, ಕವಿ ಆನಿ ಪತ್ರ್ ಕರ್ತ್ ಶ್ರೀ ಆವಿಲ್ ರಸ್ಕೀನ್ಹಾ ಹಾಣೆಂ ಲಿಖ್ಲೆಲ್ಯಾ ಕನ್ನಡ ಕವಿತಾಂಚೊ ಸಂಗ್ರಹ್ “ಬಣ್ಣಗಳ ಚಿತ್ತಾರ” ಪುಸ್ತಕಾಚೆಂ ಮೊಕ್ಳಿಕ್ ಕಾರ್ಯೆಂ ಹ್ಯಾಚ್ಚ್ ಮೇ 31ವೆರ್ ಮಂಗ್ಳುರಾಂತ್ ಎಂ.ಸಿ.ಸಿ. ಬ್ಯಾಂಕ್ ಸಭಾಂಗ್ಣಾಂತ್ ಸಾಂಜೆಚಾ 4.30 ವರಾರ್ ಚಲ್ಲೆಂ.
ಕರ್ನಾಟಕ ರಾಜ್ಯೋತ್ಸವ ಕನ್ನಡ ಸಾಹಿತ್ಯ ಪ್ರಶಸ್ತಿ ವಿಜೇತ್ ಮಾ|ಬಾ ಪ್ರಶಾಂತ್ ಮಾಡ್ತ ಎಸ್.ಜೆ. ಹಾಣಿಂ ಪುಸ್ತಕ್ ಮೊಕ್ಳಿಕ್ ಕರ್ನ್ ಅಶೆಂ ಸಾಂಗ್ಲೆಂ: “ಗೆಲೆತ್ಯಾ ಥೊಡ್ಯಾ ವರ್ಸಾಂ ಥಾವ್ನ್ ಕವಿತಾಂ ಬರಂವ್ಚ್ಯಾ ರಿತಿಂತ್ ಬದ್ಲಾವಣ್ ಜಾತೇಚ್ ಆಯ್ಲ್ಯಾ. ಆದಿಂ ಪ್ರಾಸ್ ಆನಿ ಅಲಂಕಾರ್ ನಾಸ್ತಾನಾ ಕವಿತಾಂ ಬರಯ್ ನಾತ್ಲೆ. ಪುಣ್ ಆಯ್ಲೆವಾರ್ ಪ್ರಾಸ್ ವ ಅಲಂಕಾರ್ ನಾಸ್ತಾಂನಾಯೀ ಪರಿಣಾಮಕಾರಿ ರಿತಿನ್ ಕವಿತಾಂ ವಿಣ್ತಾತ್. ಕವಿತಾಂ ಮ್ಹಳ್ಳಿಂ ತಿಂ ಮನ್ಶಾಚ್ಯಾ ಕಾಳ್ಜಾಕ್ ಆಪಡ್ಚೆ ತಸಲಿಂ ಜಾಲಿಂ ತರ್ ತಿಂ ಸಕ್ಕಡ್ ಪಸಂದ್ ಕರ್ತಾತ್. ಕವಿ ಆವಿಲ್ ರಸ್ಕೀನ್ಹಾನ್ ಮನ್ಶಾ ಜಿವಿತ್ ಆನಿ ಪ್ರಕೃತೆ ವಿಶಿಂ ಆರ್ಪುಬಾಯೆನ್ ಕವಿತಾಂ ರಚ್ಲ್ಯಾಂತ್”.
ಮೊಕ್ಳಿಕ್ ಸಂಭ್ರಮಾಕ್ ಮುಖೆಲ್ ಸಯ್ರೆ ಜಾವ್ನ್ ಆಯಿಲ್ಲ್ಯಾ ಡಾ| ಎಂ.ಪಿ. ಶ್ರೀನಾಥ್ (ಅಧ್ಯಕ್ಷ್: ಕನ್ನಡ ಸಾಹಿತ್ಯ ಪರಿಷತ್ ದ.ಕ.) ಶೀ ಸ್ಟೇನಿ ಆಲ್ವಾರಿಸ್ (ಅಧ್ಯಕ್ಷ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ) ಶ್ರೀ ಅನಿಲ್ ಲೋಬೊ (ಅಧ್ಯಕ್ಷ್: ಎಂ.ಸಿ.ಸಿ. ಬ್ಯಾಂಕ್ ಲಿ. ಮಂಗ್ಳುರ್) ಹಾಣಿಂ ಕವಿ ಆವಿಲ್ ರಸ್ಕೀನ್ಹಾಕ್ ಉಲ್ಲಾಸಿಲೆಂ ಆನಿ ಫುಡ್ಲ್ಯಾ ತಾಚ್ಯಾ ಸಾಹಿತಿಕ್ ವಾವ್ರಾಕ್ ಜಯ್ತ್ ಮಾಗ್ಲೆಂ.
ಸುರ್ವಾತೆರ್ ಕು| ಮೆಲಿಶಾ ಫೆರ್ನಾಂಡಿಸ್ ಹಿಣೆಂ ಪ್ರಾರ್ಥನ್ ಗೀತ್ ಗಾಯ್ಲೆಂ. ಕವಿ ಆವಿಲ್ ರಸ್ಕೀನ್ಹಾನ್ ಸರ್ವಾಂಕ್ ಸ್ವಾಗತ್ಸಿಲೆಂ. ಶ್ರೀಮತಿ ಫೆಲ್ಸಿ ಲೋಬೊ ಹಿಣೆಂ ಪುಸ್ತಕಾಚಿ ವಳಕ್ ಕರ್ನ್ ದಿಲಿ. ಶ್ರೀ ಜಿಯೊ ಆಗ್ರಾರ್ ಹಾಣೆಂ ಕಾರ್ಯೆಂ ನಿರ್ವಾಹಣ್ ಕೆಲೆಂ. ನಿಮಾಣೆಂ ಶ್ರೀಮತಿ ಮಾರಿಯೆಟ್ ರಸ್ಕೀನ್ಹಾನ್ ಧಿನ್ವಾಸ್ ಪಾಟಯ್ಲೆ.
‘ಬಣ್ಣಗಳ ಚಿತ್ತಾರ ‘ ಪುಸ್ತಕಾಕ್ ವಿಮರ್ಶ್ಯಾ ಸಾಹಿತ್ಯಾಕ್ ಕೇಂದ್ರ್ ಸಾಹಿತ್ಯ್ ಅಕಾಡೆಮಿಚೊ ಪುರಸ್ಕಾರ್ ಜೊಡ್ಲೆಲ್ಯಾ ಶ್ರೀ ಎಚ್.ಎಮ್. ಪೆರ್ನಾಲ್ ಹಾಣೆಂ ಪ್ರಸ್ತಾವನ್ ಬರಯ್ಲಾಂ.
