ನಜ್ವಾನ್ ದಾರ್ವಿಶ್
ಮರಣ್ ಏಕ್ ಮಾತ್ ಜಿಣ್ಯೆಚೆಂ ಸತ್ ಆನಿ ಮೊಡೆಂ ಹ್ಯಾ ಸತಾಚಿ ಏಕ್ ಮಾತ್ ಸಾಕ್ಸ್. ಸಾಕ್ಶಿ ವಿಕುನ್ ವೆಚ್ಯಾ ಆನಿ ತಟಸ್ಥ್ ಜಾಂವ್ಚ್ಯಾ ಸತಾಚ್ಯಾ ಬಜಾರಾಂತ್ ಆಜ್ ಮೊಡಿಂ ಕೆದಾಳಾ ಪಡ್ತಾತ್? ಮ್ಹಣ್ ಗೀದ್ ರಾಕುನ್ ಆಸಾತ್.
ನಜ್ವಾನ್ ದಾರ್ವಿಶ್ ಪ್ಯಾಲೆಸ್ತಿನಾಂತ್ಚ್ ರಾಂವ್ಚೊ ಥಂಯ್ಚೊಚ್ ಕವಿ. ಆಪ್ಣೆಂ ಸದಾಂ ಪಳೆವ್ನ್ ಆಯಿಲ್ಲ್ಯಾ ಜಿಣ್ಯೆಸಂಘರ್ಶಾಂಕ್ ಸೂಕ್ಷೀಮ್ ಸ್ಪಂದನ್ ದಿಂವ್ಚೊ ನಜ್ವಾನ್ ಏಕ್ ಅಂತರ್ರಾಷ್ಟ್ರೀಯ ಕವಿ ಜಾವ್ನ್ ವೆಗ್ಳ್ಯಾಚ್ ಪಾಂವ್ಡ್ಯಾರ್ ಆಸಾ.ತಾಚ್ಯೊ ಕವಿತಾ ಸಂಸಾರಾಭರ್ ಕಾಂಯ್ ತೀಸಾಂ ಪ್ರಾಸ್ ಚಡ್ ಭಾಶೆಕ್ ತರ್ಜಣ್ ಜಾಲ್ಯಾತ್.
ಶೀತಳ್ ಥಾಪ್ಡಾಬರಿಂ ಕೊಶೆಡ್ದಾಕ್ ಆಪ್ಟೊಂಚ್ಯಾ ದಾರ್ವಿಶಾಚ್ಯಾ ಪ್ರಸ್ತುತ್ ಕವಿತೆಂತ್ ಚಾರ್ ಮೊಡಿಂ ಆಸಾತ್. ಪತ್ರಾಚ್ಯಾ ಸಂಪಾದಕಾಕ್ ವಾಚ್ಪಿ ಕಾಮ್ರೇಡ್ ಮ್ಹಣ್ ಸಂಭೋದಿತ್ ಕರ್ತಾ. ದೋನ್ ಮೊಡಿಂ ದೊಳ್ಯಾಂಕ್ ದಿಸ್ತಾತ್. ಉರ್ಲೆಲಿಂ ದೋನ್ ?
ಮೊಡೆಂ ನಾ ಬರೆಂ – ವಾಯ್ಟ್ ಪಳಂವ್ಕ್ ಸಕ್ತಾ, ನಾ ಉಲಂವ್ಕ್ ಸಕ್ತಾ. ದೊಳ್ಯಾಂ ಸಮೊರ್ ಜುಲುಮ್ ಜಾತಾನಾ ದಿಸಾನಾತ್ಲ್ಯಾರ್, ಉಲಯ್ನಾತ್ಲ್ಯಾರ್ ’ಮನಿಸ್’ ಮೊಡೆಂ ಜಾಲಾ ಮ್ಹಣ್ ಅರ್ಥ್. ಕಾಮ್ರೇಡ್ ಸಂಪಾದಕ್ ಆನಿ ಪತ್ರಾಚೊ ವಾಚ್ಪಿ – ದೋಗೂಯ್ ಮೊಡೆಂ ಜಾಲ್ಯಾತ್ಗಾಯ್ ? ಕೊಮ್ರೆಡ್ ಮ್ಹಣ್ ಸಂಪಾದಕಾಕ್ ಸಂಬೋದನ್ ಕೆಲ್ಲೆಥಾವ್ನ್ ಕವಿತೆಂತ್ಲ್ಯಾ ವಾಚ್ಪ್ಯಾಚೆರ್ ಸುರು ಜಾಲ್ಲೊ ಮ್ಹಜೊ ದುಬಾವ್ ಆಮಿ ಸಂಪಾದುಂಚ್ಯಾ ಪತ್ರಾಂತ್ ತೀನ್ ಮೊಡಿಂ ಆಸಾತ್ ಮ್ಹಣ್ಚ್ಯಾ ಠರಾವಣೆರ್ ಯೇವ್ನ್ ರೊಂಭ್ತಾ. ಜ್ಯಾ ಶಾಣೆಪಣಾನ್ ಕೊಮ್ರೇಡ್ ಸಂಪಾದಕ್, ಮೊಡ್ಯಾಂಚ್ಯೊ ತಸ್ವಿರ್ಯೊ ಛಾಪ್ತಾ ತಿತ್ಲ್ಯಾಚ್ ಆತುರಾಯೆನ್ ಕವಿತೆಂತ್ಲೊ ವಾಚ್ಪಿ ಮೊಡ್ಯಾಂಚೊಂ ತಸ್ವಿರ್ಯೊ ಪಳಯ್ತಾ ಆನಿ ಚಾಕ್ತಾ ಮ್ಹಣ್ ಮ್ಹಾಕಾ ಭೊಗ್ತಾ. ಪತ್ರಾಂತ್ಲ್ಯಾ ಮೊಡ್ಯಾಂನಿ ಎಕಾಮೆಕಾ ತಾಳ್ಯೊ ಪೆಟ್ಚೆಂ, ಬಡ್ಬಡ್ಚೆಂ, ಫುಗಾರ್ಚೆಂಯ್ ತಾಕಾ ದಿಸ್ತಾ.
ದುಸ್ರ್ಯಾ ಜಿಣಿಯಾಂಕ್ ಗೊಬೊರ್ ಕರ್ನ್ ತಸ್ವಿರ್ಯಾಂನಿ ಬದಲ್ಚ್ಯಾ ಕ್ರೂರ್ ಸತಾಚೆರ್ ದಾರ್ವಿಶಾಚಿ ಹಿ ಕವಿತಾ ಬೋಟ್ ಜೊಕ್ತಾ. ಕಾರಣ್, ವೆವಸ್ಥೆಕ್ ತಾಂಕಾ ಪ್ರದರ್ಶನಾರ್ ಘಾಲ್ಚಿ ಗರ್ಜ್ ಆಸಾ. ಫಾಲ್ಯಾಂಚಿ ಖಬರ್ ಛಾಪ್ಚ್ಯಾ ಮಶಿನಾಂಕ್ ಖಾಣಾಚಿ ಗರ್ಜ್ ಆಸಾ.
“ಸುಮಾರ್ ದೇಡ್ ಧಾಕ್ಡ್ಯಾ ಆದಿಂ ನಜ್ವಾನಾನ್ ಬರಯಿಲ್ಲಿ ಹಿ ಕವಿತಾ, ಭಿರಾಂಕೂಳ್ ಗಜಾಲಿ ಸಮ್ಜಾಯ್ನಾಂ — ಫಕತ್ ತಾಂಚೆ ಥಾವ್ನ್ ದೀಶ್ಟ್ ಚುಕಂವ್ಚ್ಯಾಕ್ ಇನ್ಕಾರ್ ಕರ್ತಾ.ಆತಾಂಯ್ ಹರ್ಯೆಕ್ ಸಕಾಳಿಂ ಹೆಂ ಖರೆಂ ಜಾಲ್ಲ್ಯಾಬರಿಂ ಘಾಂಟ್ ವಾಜಯ್ತಾ. ಆಜ್ ಸಕಾಳಿಂ ತಿ ಕೊಂಕ್ಣೆಕ್ ತರ್ಜಣ್ ಕರ್ತಾನಾ, ಆಯ್ಚೆ ಸಕಾಳಿಂಕ್ ಲೆಗೂನ್ ಹಿ ಕಿತ್ಲಿ ಪ್ರಸ್ತುತ್ ಮ್ಹಣ್ ಮ್ಹಾಕಾ ವಿಜ್ಮಿತ್ ದಿಸ್ತಾ.” ಮ್ಹಣ್ತಾ ತರ್ಜಣ್ದಾರ್ ಕಿಶೂ, ಬಾರ್ಕೂರ್, ಹ್ಯೆ ಕವಿತೆ ವಿಶ್ಯಾಂತ್.
ಸಂವೇದನಾಶೀಲ್ ಕವಿತಾ ಶೆಕ್ಡ್ಡ್ಯಾಂನಿ ಜಿಯೆತಾ ದಾರ್ವಿಶಾಚಿ ಹಿ ಕವಿತಾ ಸಾಕ್ಸ್.
ಕೊಮ್ರೇಡ್,
ಜರ್ ಹಾಂವೆಂ ಮ್ಹಳ್ಳೆಂ ಕೀ ಆಜ್ ಸಕಾಳಿಂ
ತುಂವೆಂ ಸಂಪಾದುಚ್ಯಾ ಪತ್ರಾಂತ್ ದೋನ್ ಮೊಡಿಂ ಪಳೆಲ್ಯಾಂತ್,
ತರ್ ಹಾಂವ್ ರಾಜಾಂವೀಕ್ ದಿಸ್ತೊಂ?
ಜರ್ ಹಾಂವೆಂ ವಿಚಾರ್ ಲ್ಲೆಂ
ಏಕ್ ಮೊಡೆಂ ಆನಿ ದುಸ್ರ್ಯಾ ಮೊಡ್ಯಾ ಮಧ್ಲ್ಯಾ ವೆಳಾರ್ ಹ್ಯಾ ಮೊಡ್ಯಾಂಚೊ ಕೊಂಡಾಟೊ ಕರ್ಚ್ಯಾ ತುಜ್ಯಾ ವಿಚಿತ್ರ್ ಶಾಣೆಪಣಾಂವಿಶಿಂ,
ತರ್ ಹಾಂವ್ ರಾಜಾಂವೀಕ್ ಲಾಗ್ತೊಂ?
ಯಾ ತುಂ ಜಾಣಾಂಯ್ ಕಿ ಮೊಡಿಂಚ್ ಸಂಸಾರಾರ್ ರಾಜ್ ಕರ್ತಾತ್, ದೆಕುನ್?
ವ ಏಕ್ ನಾಂ ತರ್ ಆನ್ಯೇಕ್ ಮೊಡೆಂ ತುಜ್ಯಾ ಸಮೃದ್ಧ್, ಸುಫಳ್ ಗೂಂಡಾಯೆಂತ್ ಕುಸ್ತಾ, ದೆಕುನ್?
ಹೆಂ ಕಾಂಯ್ ಶಾಣೆಪಣ್, ಕಾಂಯ್ ನಿರ್ಶೆಣ್, ಯಾ ಕಾಂಯ್ ಚಂಚಲ್ಪಣ್? …
ಕಿತೆಂ ಹೆಂ?
— ಹಾಂವ್ ಜಾಣಾ ಆಸ್ಲೊಂ ತರ್ ಬರೆಂ ಆಸ್ತೆಂ.
ಮೊಡಿಂ ತಾಂಚೆ ಫುಗಿಲ್ಲೆ ಪಾಂಯ್ ವೊಳಾಯ್ತಾತ್
ಎಕಾಮೆಕಾಕ್ ತಾಳ್ಯೊ ಪೆಟ್ತಾತ್
ಬಡ್ಬಡ್ತಾತ್
ಫುಗಾರ್ತಾತ್
ತೇಲಾದೇಶಾಂಚಿ ಉಪಘರಾಕೇಂದ್ರಾಂ ತಾಂಚೊ ಪಾಟ್ಲಾವ್ ಕರ್ತಾನಾ
(ಜಂಯ್ ಆಮ್ಚ್ಯೊ ಜಿಣ್ಯೊ ಕಾರ್ಬನ್ ಜಾತಾತ್) —
ಆಜ್ ಸಕಾಳಿಂ ಹಾಂವೆಂ ಆಮಿ ಸಂಪಾದುಚ್ಯಾ ಪತ್ರಾಂತ್ ತೀನ್ ಮೊಡಿಂ ಪಳೆಲಿಂ.
ಮೂಳ್: ನಜ್ವಾನ್ ದಾರ್ವಿಶ್
ಕೊಂಕ್ಣಿಕ್: ಕಿಶೂ, ಬಾರ್ಕುರ್
