1990 ದಶಕಾಚೊ ಇಂಟರ್-ನೆಟ್ ಡೊಟ್-ಕೊಮ್ ಪುಗ್ಗೊ ಉಡಾಸ್ ಆಸಾ? ತೊ Y2K ತಾಪ್. ಸಾಮಾನ್ಯ್ ಕಂಪ್ಯೂಟರ್ ಸೊಪ್ಟ್-ವೇರ್ ಪ್ರೊಗೆಮ್ (ಕೊಡ್) ಬರಂವ್ಕ್ ವರಾಕ್ 75 ಡೊಲರ್ ವೇತನ್. BPO ನಾಂವಾಚಿ ಏಕ್ ನವಿಚ್ ಇಂಡಸ್ಟ್ರಿ. ರಾತಿಂ ದಂಧೊ ಚಲಂವ್ಚಿಂ ಕೋಲ್ ಸೆಂಟರಾಂ. (ಮ್ಹಜೊ ಮತ್ಲಬ್ “ತೊ” ನಹಿಂ!) ಅಂತರ್-ಜಾಳ್ ಮ್ಹಳ್ಳೊ ನವೊ ಸೊಬ್ದ್ ಡಿಕ್ಶನರಿಂತ್. ವಿಂಡೊವ್ಸ್ (ಜನೆಲಾಂ ನಹಿಂ), ನೆಟ್-ಸ್ಕೇಪ್ ಆನಿ ಕಿತೆಂ ಕಿತೆಂ…
9 ಅಗೋಸ್ತ್ 1995 ತ್ಯಾ ದಿಸಾ, ನೆಟ್-ಸ್ಕೇಪಾಚ್ಯಾ IPOನ್ ಹಿಷ್ಯಾ ಬಾಜಾರಾಂತ್ ವಾದಾಳ್ ಉಟಯ್ಲೆಂ. ಹ್ಯಾ web browser technologyನ್ ಡೊಟ್-ಕೊಮ್ ಬಿಸ್ನೆಸಾಂಚೊ ಉಜೊ ಪೆಟಯ್ಲೊ. ಘರ್-ಘರಾಂನಿಂ ಡೆಸ್ಕ್-ಟೊಪ್ PC ನಿಂ ವಿಂಡೊವ್ಸ್ ಬಸ್ಲೆಂ, ನೆಟ್-ಸ್ಕೇಪ್ ಠಿಕ್ಲೆಂ ಆನಿ ಇಂಟರ್-ನೆಟ್ ಜಿಣ್ಯೆಂತ್ ಅನಿವಾರ್ಯ್ ಜಾಲೆಂ. ನೆಟ್-ಸ್ಕೇಪ್ ಹಿಷ್ಯಾ ಬಾಜಾರಾಂತ್ ಎಂಟ್ರಿ ಕೆಲ್ಲಿ 14 ಡೊಲರಾಕ್; ಘಡಿಯೆ ಭಿತರ್ 28 ಡೋಲರ್ ಆನಿ ಬಜಾರ್ ಬಂಧ್ ಜಾತಾನಾಂ 75 ಡೊಲರ್! ಆಜ್ ಖಂಯ್ ಆಸಾ ನೆಟ್-ಸ್ಕೇಪ್? ನೆಟ್-ಸ್ಕೇಪ್ ವೆಬ್ ಬ್ರವ್ಸರ್ ಕೊಸ್ಳೊನ್ ಗೆಲಾಂ.
ಆತಾಂ, ಪರತ್ ಏಕ್ ತಂತ್ರ್-ಜ್ಞಾನ್ ಕೊಸಾಳ್ತೆಲೆಂ ಮ್ಹಣ್ ಭ್ಯೆಂ ಉಟ್ಲಾಂ. ಪಾಟ್ಲ್ಯಾ ಹಫ್ತ್ಯಾಂತ್ ಹಿಷ್ಯಾ ಬಜಾರಾಂತ್ IT ಕಂಪ್ಣೆಂಚ್ಯಾ ಶೇರಾಂಚಿಂ ಮೋಲಾಂ ಕ್ರೇಶ್ ಜಾಲಿಂ. ಫುಡಾರಾಂತ್ ಕೊರ್ಪೊರೇಟ್ ಕಂಪ್ಣ್ಯೊ, ಸಮಾಜಿಕ್ ಸಂಘಟನಾಂ ಆನಿ ಸರ್ಕಾರಿ ದಫ್ತರಾಂ AI ತಂತ್ರ್-ಜ್ಞಾನ್ ವಾಪ್ರಿತಲ್ಯೊ ಮ್ಹಳ್ಳೆಂ ಭ್ಯೆಂ ನಿವೇಷಿಂಕ್ ಧೊಸುಂಕ್ ಲಾಗ್ಲೆಂ ದೆಕುನ್. AI ತಂತ್ರ್-ಜ್ಞಾನ್ ಖಂಡಿತ್ ಜಾವ್ನ್ ಚಾಲ್ತ್ಯಾ ತೆಕ್ನೊಲೊಜಿಚ್ಯೆಂ ವಿಸ್ಕಳೀತ್ ಕೊಸ್ಳಾಪ್ (disruption) ಕರ್ತೆಲೆಂ ಮ್ಹಣ್ ತಜ್ಞ್ ಉಲಯ್ತಾತ್ ದೆಕುನ್.
ಭಾರತ್ ಆನಿಂ AI ತೆಕ್ನೊಲೊಜಿ :
ಜಾಗತಿಕ್ ಹಂತಾರ್ Global AI Summit ಆದ್ಲ್ಯಾ 2025 ವರ್ಸಾ ಥಾವ್ನ್ ಚಲೊನ್ ಆಯ್ಲ್ಯಾತ್. ಪಾಟ್ಲ್ಯಾ ಹಫ್ತ್ಯಾಂತ್, India AI Impact Summit 2026 ನಾಂವಿಂ ಸಮ್ಮೇಳನ್ ನವಿ ದಿಲ್ಲಿಂತ್ ಚಲ್ಲೆಂ. ಸ್ಪೆಶಲಿಸ್ಟ್ ಮಾತ್ರ್ ನಹಿಂ, ಜಾಗತಿಕ್ ಸರ್ಕಾರಿ ಮುಖೆಲಿ ಆನಿಂ ಪದ್ವೆದಾರ್ ಹ್ಯಾ ಸಮ್ಮೇಳಾನಾಂತ್ ವಾಂಟೆಲಿ ಜಾಲೆ. ಆಪಾಪ್ಲೊ ದೇಸ್ ಕಸಲಿಂ ತಾಂತ್ರಿಕ್ ಮೇಟಾಂ ಘೆತಲೊ ಮ್ಹಣ್ ವಿವರ್ ತಾಣಿಂ ದಿಲೊ. ಆಮ್ಚೊ ಪ್ರಧಾನ್ ಮಂತ್ರಿ ಮೋದಿ ಆಯ್ಲೊ ಆನಿ ಉಲಯ್ಲೊ. ತಾಚ್ಯಾ ಸರ್ಕಾರಾಚ್ಯೆಂ ವಿಕ್ಶಿತ್ ಭಾರತ್ AI ಮಿಶನಾಕ್ ಏಕ್ ನವೆಂ “ಮಾನವ್ (M.A.N.A.V)” ಮ್ಹಳ್ಳೆಂ ಸಂಕ್ಶಿಪ್ತ್-ರೂಪ್ ದಿಲೆಂ. ಸಂಕ್ಶಿಪ್ತ್ ರೂಪಾಂ ಘಡ್ಚ್ಯಾಂತ್ ತಾಚ್ಯೆ ಸ್ಪೀಚ್-ರೈಟರ್ ಮಾಹಿರ್! ಹಾಜರ್ ಜಾಲ್ಲ್ಯಾಂನಿಂ ತ್ಯಾ ಸಂಕ್ಶಿಪ್ತ್ ರೂಪಾಕ್ ಆನಿಂ ತಾಚ್ಯಾ ಉಲವ್ಪಾಚ್ಯೆ ಶೈಲೆಕ್ ಮೆಚ್ವೊನ್ ತಾಳಿಯಾಂಚೊ ಪಾವ್ಸ್ ವೊತ್ಲೊ.
AI ತೆಕ್ನೊಲೊಜಿಂತ್ ಭಾರತ್ ಜಾಗತಿಕ್ ಫುಡಾರ್ಪಣ್ ಘೆತೆಲೆಂ, ಮ್ಹಣಾಲೊ ತೊ. ತಸ್ಲಿ ಕ್ಶಮತಾ ಆಮ್ಕಾಂ ಆಸಾ. ಹ್ಯಾ ಸಮ್ಮೇಳನಾಂ ಮುಖಾಂತ್ರ್ ಸಂಸಾರಾಕ್ ಭಾರತಾನ್ ದಿಂವ್ಚೊ ಸಹಕಾರ್ ಸಕ್ಟಾಂಕ್ ಸಮ್ಜಾಲೊ. ಭಾರತ್ AI ಮಿಶನ್ ಸರ್ವಾಂಕ್ ಏಕ್ ದೇಕ್ ಜಾಂವ್ಕ್ ಸರ್ಕಾರಾಚೊ ಉದ್ದೇಸ್ ಸಫಳ್ ಜಾತಲೊ ಮ್ಹಣಾಲೊ ಮೋದಿ.
ಭಾರತಾಂತ್ AI ವಿಸ್ಕಳೀತ್:
1. ಸೊಪ್ಟ್-ವೇರ್ ಶೆತ್ ಸಮಾಯೋಜನ್: ಪಾರಂಪರಿಕ್ IT ಸೆವೆಂಕ್ AI ವಿಸ್ಕಳೀತ್ ಕರ್ತೆಲೆಂ. ಉಣ್ಯಾ ಮೋಲಾಚ್ಯಾ ರೂಟಿನ್ ಕಾಮಾಂಚೊ ಡಿಮಾಂಡ್ ಪಡ್ತಲೊ. AI specialized roles ಡಿಮಾಂಡಾಂತ್ ಯೆತೆಲೆ. ದೆಕುನ್ ನವಿಂ ಕುಶಳ್ಟಾಯ್ ಘರ್ಜೆಚಿ ಜಾತೆಲಿ. ಹ್ಯೆ ದಿಶೆನ್ reskilling ಮಿನತ್ ಕರಿಜೆ ಪಡ್ತೆಲಿ. ಹೆಂ ಸರ್ಕಾರಿ ತಶೆಂ ಖಾಸ್ಗಿ IT ಶೆತಾಂತ್ ತ್ವರಿತ್ ಹಂತಾರ್ ಹಾತಿಂ ಘೆಜೆ.
2. ಟೆಲೆಂಟ್ ಗೆಪ್ ಆನಿಂ ಡಿಮಾಂಡ್: ಚಡಿತ್ ಡಿಮಾಂಡ್ ಆಸೊನ್-ಯೀ, ತೀನಾಂತ್ ದೋನ್ IT ಕಂಪ್ಣ್ಯೊಂ ಫಾವೊತೆಂ ಟೆಲೆಂಟ್ ಸೊಧುಂಕ್ ವಿಫಳ್ ಜಾಲ್ಯಾತ್. ತ್ಯಾ ವರ್ವಿಂ AI specialized roles ಖಾತಿರ್ ಚಡ್ ಪಗಾರ್ ದೀಜೆಂ ಪಡ್ಲಾಂ.
3. ಸಾರ್ವಬೌಮತ್ವ್ ಆನಿಂ ಮೂಳಾವ್ಯೊ ಸುವಿಧಾ: ಭಾರತ್ ಏಕ್ “ಡೇಟಾ ಕೊಲೊನಿ” ಜಾಂವ್ಕ್ ನಜೊ. ವಿದೇಶಿ ಪ್ಲೆಟ್-ಫೊರ್ಮಾಂಚ್ಯೆರ್ ಅವಲಂಬಿತ್ ಜಾಂವ್ಕ್ ನಜೊ. ಥಳೀಯ್ ಸಾಧನ್-ಸುವಿದಾ ಉಬಾರುಂಕ್ ಜಾಯ್. ಹ್ಯೆ ದಿಶೆನ್ ಭಾರತಾಚ್ಯೆಂ AI mission ಘರ್ಜ್ಯೆಚಿ ಪುಂಜಿ ದಿತೆಲಿ ಮ್ಹಣ್ ಸರ್ಕಾರ್ ಭಾಸಯ್ತಾ.
4. ಸುರಕ್ಶಾ ಆನಿಂ ನಿಯಂತ್ರಣ್: ಥೊಡ್ಯೊ ತೆಕ್ನೊ-ಲೀಗಲ್ ರೀತಿ ಸರ್ಕಾರಾನ್ ಆಪ್ಣಾಂವ್ಕ್ ಜಾಯ್. ಡೀಪ್-ಫೇಕ್ ಆನಿಂ ಪ್ರಯ್ವೆಶಿ ರಿಸ್ಕ್ಸ್ ಆಸಾತ್. ತಸಲ್ಯಾ ಅಪಾಯಾಂ ವಿರುದ್ಧ್ ರಕ್ಶಾತ್ಮಕ್ ಕ್ರಮಾಂ ಸ್ಪಷ್ಟ್ ಥರಾನ್ ರಚುಂಕ್ ಜಾಯ್. ಅಶೆಂ ಕರ್ತನಾಂ, “ನವೀಕರಣ್” (innovations) ಕರ್ಪಾಚ್ಯೆರ್ ಮನ್ ದೀಜೆ.
ಭಾರತಾಚ್ಯಾ IT services supply ವಯ್ರ್ ಯೆದೊಳ್-ಚ್ ಮಾರ್ ಬಸ್ಲಾ ತೆಂ ಹಿಷ್ಯಾ ಬಜಾರಾಂತ್ ಕಳೊನ್ ಯೆತಾ. ದೆಕುನ್, ಭಾರತಾಚ್ಯಾ IT ಕಂಪ್ಣೆಂನಿಂ ಆನಿಂ ತಾಂಚ್ಯಾ ಕರ್ಮಚ್ಯಾರಿಂನಿಂ ತ್ವರಿತ್ ವೇಗಾನ್ ನವಿ ತರ್ಕೀಬ್ ಶಿಕೊಂಕ್ ಆಸಾ. business as usual ಕರುಂಕ್ ನಜೊ. ಹಿ ಮಿನತೆಚಿ ವಾಟ್ ಪುಣ್ ಅಸಾಧ್ಯ್ ನಹಿಂ, ಮ್ಹಣ್ತಾ ರಘುರಾಮ್ ರಾಜನ್, ನಾಮ್ಣೆಚೊ ಇಕೊನೊಮಿಸ್ಟ್.
Citrini Research ವರ್ದಿ, ‘The 2028 Global Intelligence Crisis’:
ಫೆಬ್ರವರಿ 2026 ಅಖ್ರೆಕ್ ಆಯಿಲ್ಲಿ ಹಿ ಮಾಹೆತಿಚಿ ವರ್ದಿ ವೇಗಾನ್ ಚಲ್ಚ್ಯಾ AI-ಚಾಲಿತ್ ಸ್ವಯಂಚಾಲನೆ ವರ್ವಿಂ ಭಾರತೀಯ್ ಐಟಿ ಕಂಪ್ಣ್ಯಾಂಚ್ಯೆ ಜೊಡಿ ವಯ್ರ್ ಮಹತ್ವಾಚೊ ದಬಾವ್ ಘಾಲುಂಕ್ ಸಾಧ್ಯ್ ಆಸಾ ಮ್ಹಣ್ತಾ. ಭಾರತೀಯ್ ಐಟಿ ಸೇವೆಂಚಿಂ ಪಾರಂಪರಿಕ್ ಕಾಮಾಂ ‘ಶ್ರಮಿಕ್ ಅರ್ಬಿಟ್ರಾಜ್’ ಮಾದರಿರ್ (labour arbitrage model) ಹೊಂದ್ವೊನ್ ಆಸಾತ್. AI ಕೋಡಿಂಗ್ ಸಾಧನಾಂ ಚಡ್ ಪರಿಣಾಮಕಾರಿ ಆನಿಂ ಉಣ್ಯಾ ಖರ್ಚಾರ್ ಜಾತಾತ್. ದೆಕುನ್, ಭಾರತೀಯ್ ಐಟಿ ಸೆವೆಂಚ್ಯೆ ಅಸ್ತಿತ್ವಾಕ್-ಚ್ ಧಕ್ಕೊ ಬಸ್ತಲೊ (ಸೂಚನ್: ಮ್ಹಜೊ ಪೂತ್ ಜೊ ಅಮೆರಿಕಾಂತ್ ಎಕ್ಯೆ IT Consulting ದಂಧ್ಯಾಂತ್ CTO ಜಾವ್ನಾಸಾ; ತಾಣೆಂ ಬಾರತೀಯ್ ಐಟಿ ಕಂಪ್ಣೆಂಕ್ ಕೊಡಿಂಗ್ outsource contracts ದಿಲ್ಲಿಂ ತಿಂ ಕೆನ್ಸಲ್ ಕೆಲ್ಯಾಂತ್. AI ಕೋಡಿಂಗ್ ಏಜೆಂಟ್ ಸವಾಯೆನ್ ಆನಿಂ ವೇಗಾನ್ ಹಿಂ ಕಾಮಾಂ ಕರ್ತಾತ್ ಖಂಯ್!)
ವರ್ದೆಂತ್ಲಿ ಮಹತ್ವಾಂಚಿ ಮಾಹೆತ್ ಆನಿ ಸಂಭಾವ್ಯ್ ಪರಿಸ್ತಿತಿ:
1. ಮಾರ್ಜಿನಲ್ ಖರ್ಚ್ ದೆಂವ್ತಲೊ: AI ಕೋಡಿಂಗ್ ಏಜೆಂಟ್ ಹಾಂಚೊ ಮೂಳಾವೊ ಖರ್ಚ್ ವೀಜ್ ಬಿಲ್ಲ್. ವೀಜ್ ಸವಾಯ್ ಜಾಲ್ಯಾರ್ ಸಹಜ್ ಜಾವ್ನ್ ಮಾನುಶಿಕ್ ಶ್ರಮಾ ಪ್ರಾಸ್ ಉಣೊ ಖರ್ಚ್ ಮ್ಹಣ್ತಾ ಹಿ ವರ್ದಿ. ಗ್ಲೋಬಲ್ ಗ್ರಾಯ್ಕಾಂನಿಂ ಆಂತರಿಕ್ AI ಸಾಧನಾಂಚಿ ವಾಟ್ ಧರ್ಲ್ಯಾ ದೆಕುನ್ outsource contracts ರದ್ದ್ ಜಾತೆಲಿಂ. ದೆಕುನ್, TCS, Infosys, Wipro ತಸ್ಲ್ಯೊ ಪ್ರಮುಖ್ ಕಂಪ್ಣ್ಯೊಂ 2027 ವರ್ಸಾ ಭಿತರ್ ಕಾಮೆಲಿ ಉಣೆ ಕರ್ತೆಲ್ಯೊ.
2. ‘ಘೋಸ್ಟ್ GDP’ ಅಪಾಯ್: Citrini ವರ್ದೆಂತ್ ‘ಘೋಸ್ಟ್ GDP’ ದೃಶ್ಯಾವಳಿ ವಿಷ್ಯಾಂತ್ ಅಶೆಂ ಮ್ಹಣ್ತಾ: AI ಪೇಪರ್ ಉತ್ಪಾದಕತಾ ವಾಡಯ್ತಾ ತರ್-ಯೀ, ಪ್ರಮುಖ್ ಪರಿಣಾಮ್ ಧೊವ್ಯೆ-ಕಾಮೆಲಿಂಚೊ ಉದ್ಯೋಗ್ ನಾಸ್ ಕರ್ತಲೊ. ಹ್ಯಾ ವರ್ವಿಂ ಗ್ರಾಯ್ಕ್ ಆಪ್ಲೊ ಖರ್ಚ್ ದೆಂವಯ್ತೆಲೆ.
3. ಸಾರ್ವಭೌಮ್ ಆರ್ಥಿಕ್ ತಾಣ್: ಮುಖ್ಲ್ಯಾ ಚ್ಯಾರ್ ಮಹಿನ್ಯಾಂನಿಂ ಭಾರತೀಯ್ ರುಪೈ ಡೋಲರಾ ಬರೋಬರ್ 18% ಕೊಸ್ಳಾತಲೊ. ಸೆವೆಂಚೊ ರಫ್ತ್ ಪಡ್ಲೆಲ್ಯಾ ವರ್ವಿಂ ಭಾರತಾಚ್ಯಾ services trade surplus ಮಾಯಕ್ ಜಾತಲೊ. ಪರತ್ IMF ರೀಣ್ ಮಾಗ್ಚಿ ಪರಿಸ್ಥಿತಿ ಯೆಂವ್ಚಿ ಸಾಧ್ಯತಾ ಆಸಾ.
4. ಹಿಷ್ಯಾ ಬಜಾರಾಚ್ಯೆರ್ ಪ್ರಭಾವ್: ಭರತೀಯ್ ಐಟಿ ಶೇರಾಂಚೊ ತೀವ್ರ್ ವಿಕ್ರೊ ಜಾತಲೊ. Nifty IT index 2026 ಫೆಬ್ರೆರಾಕ್ ತುಲನ್ ಕೆಲ್ಯಾರ್ 20% ಕೊಸ್ಳಾತಾ ಮ್ಹಣ್ ಅಂದಾಜ್ ಆಸಾ.
ಉದ್ಯಮಿ ಪ್ರತಿಕ್ರಿಯಾ ಆನಿ ಚಿಂತಾಪ್:
ಹಿ ವರ್ದಿ “ಅತಿರೇಕ್” (doomsday scenario) ಮ್ಹಣ್ತಾತ್ ಐಟಿ ಉದ್ಯಮಿ. ತರ್-ಯೀ, ನಿವೇಷಿ ಗಾಬ್ರೊನ್ ಗೆಲ್ಯಾತ್. AI disruption ಖಚಿತ್ ವಯ್ ಪುಣ್ ಹಿಂ ಉಪಕರಣಾಂ ವೆವಸ್ತೆಂತ್ ಸಮೀಕರಣ್ ಕರುಂಕ್ ಮಾನುಶಿಕ್ ಸಂಪನ್ಮೂಳಾಂ ಅವಶ್ಯ್. ಜಶೆಂ ನಂದನ್ ನಿಲೇಕಣಿ ಮ್ಹಣ್ತಾ: AI ಉತ್ಪಾದಕತಾ ವಾಡವ್ಪಿ (productivity booster) ವಯ್ ಪುಣ್ ವಿಧ್ವಂಶಕ್ (destroyer) ನಹಿಂ. ಬಾರತೀಯ್ ಐಟಿ ಕಂಪ್ಣ್ಯೊಂ ಯೆದೊಳ್ಚ್ ಆಪ್ಲ್ಯಾ ಬಿಸ್ನೆಸಾಂತ್ AI ಉಪಕರಣಾಂ ಸ್ವೀಕಾರುನ್ ಮುನಾಪೊ ವಾಡವ್ನ್ ಆಸಾತ್.
ಅಂತರ್-ರಾಷ್ಟ್ರೀಯ್ ಚಿಂತಾಪ್:
ಸಿಸ್ಕೊ ಸಿಸ್ಟಮ್ಸ್ ಹಾಚೊ ಮಾಜಿ CEO ಜೊನ್ ಚೆಂಬರ್ಸಾಕ್ AI ಬುಡ್ಬುಳ್ಯಾ ವಿಷಿಂ ಚಡ್ ಕಾಳ್ಜಿ ನಾಂ. “there will be train wrecks” in the frenzy over artificial intelligence, ಮ್ಹಣ್ತಾ ತೊ. Expensify ಕಂಪ್ಣೆಚೊ CEO ಡೇವಿಡ್ ಬ್ಯಾರೆಟ್ ಸಯ್ತ್ ಅಸಲಿಚ್ ಅಭಿಪ್ರಾಯ್ ಉಚಾರ್ತಾ. AI ತೆಕ್ನೊಲೊಜಿಂತ್ ಚಡ್ಡ್ ದುಡು ಘಾಲ್ಚೊ ಜುಗಾರ್ ಬರೋಬರ್ ಮ್ಹಣ್ತಾ ತೊ. “You can make a lot of money gambling. You can also lose a lot of money.” He compared the AI frenzy to a “house of cards.”
ಜರ್, AI ಖಂಡಿತ್ ಏಕ್ ಬುಡ್ಬುಡೊ ಜಾತಲೊ ತರ್ ತೊ ಕಸೊ ಫುಟ್ತಲೊ? ಪಾಟ್ಲ್ಯಾಂ ತೀನ್ ವರ್ಸಾಂನಿಂ S&P 500 ಲಗ್ಬಗ್ 70% ವಯ್ರ್ ಗೆಲಾಂ. ಅಮೇರಿಕಿ ಹಿಷ್ಯಾ ಬಜಾರಾಂತ್ ಕಸಲಿಂ ಖುಣಾಂ ದಿಸೊನ್ ಯೇತಾತ್? ಡೊಟ್-ಕೊಮ್ ಸ್ಟೊಕ್ ದುರಂತ್ ಕಸಲಿಂ ಲಿಸಾಂವಾಂ ಶಿಕಯ್ತಾ? ಚೇಂಬರ್ಸ್ ಆನಿಂ ಬ್ಯಾರೆಟ್ ತಂತ್ರಜ್ಞಾನಾನ್ ಸಂಸಾರಾಕ್ ಹ್ಯಾ ಅದಿಂ ದಿಲ್ಲ್ಯಾ ಅನ್ಯೇಕಾ ಹೊಟ್ ಟ್ರೆಂಡಾನ್ ಕಸಲೊ ಅನ್ಬೋಗ್ ತಾಂಕಾಂ ದಿಲ್ಲೊ ತ್ಯಾ ವಿಷಿಂ ಉಲವ್ನ್ ಮ್ಹಣ್ತಾತ್: ತೆಂ ಟ್ರೆಂಡ್ ಆಖ್ರೆಕ್ 2000-ಇತ್ಲ್ಯಾಕ್ ಡಾಟ್-ಕಾಮ್ ಸ್ಟೊಕ್ ಬಜಾರ್ ದುರಂತ್ ಜಾಂವ್ಕ್ ಪಾವ್ಲೆಂ ಆನಿಂ ಅತ್ಯಂತ್ ಅದ್ಭುತ್ ತಂತ್ರಜ್ಞಾನ್ ಕೊಸ್ಳಾಪ್ ಜಾಂವ್ಕ್ ಪಾವ್ಲೆಂ. ಚೇಂಬರ್ಸ್ಕ್ ತೊ ಕಠಿಣ್ ಕಾಳ್ ಜಾಲ್ಲೊ. ಕೊಸ್ಳಾಪಾಚಿಂ ಖುಣಾಂ ತಾಣೆಂ ಗುಮಾನ್ ಕರುಂಕ್ ನಾಂತ್. ಸಿಸ್ಕೋ ಸಿಸ್ಟಮ್ಸ್ (CISCO) ಕಾಮೆಲ್ಯಾಂಕ್ ವ್ಹಡ್ ಮಟ್ಟಾರ್ ಲೇ-ಒಪ್ಫ್ ಕರ್ಚಿ ಪರಿಸ್ಥಿತಿ ತಾಣೆಂ ಫುಡ್ ಕರುಂಕ್ ಪಡ್ಲಿ. ಬ್ಯಾರೆಟ್, ಆಪ್ಲಿ ತಂತ್ರಜ್ಞಾನ್ ವೃತ್ತಿ ಸುರ್ವಾತ್ತಲೊ ಮಾತ್ರ್. ತಾಕಾ ಬಜಾರ್ ಕೊಸ್ಳಾಪ್ ವಡ್ ಆಚರ್ಯೆಂ ತಶೆಂ ಭಗ್ಲೆಂ. “Holy shit, everything is collapsing!” ತೊ ಉದ್ಗಾರ್ಲೊ.
ಅನ್ಯೇಕ್ ತಂತ್ರಜ್ಞಾನ್ ಕೊಸ್ಳಾಪಾಚ್ಯೆಂ ಭ್ಯೆಂ ಚಡ್ತಾ ಕಿತ್ಯಾಕ್ ಜಾಯಿತ್ತೆ ತಜ್ಞ AI boom ಆನಿಂ 1990 ದಶಕಾಂಚ್ಯೆಂ ಇಂಟರ್ನೆಟ್ ಬುಡ್ಬುಡ್ಯಾ ಮಧೆಂ ಸಮಾನತಾ ದಾಕಯ್ತಾತ್.
ಅಂತ್ರೊಪಿಕ್, ಚಾಟ್-ಜಿಪಿಟಿ, ಗೂಗಲ್ ಜೆಮಿನಿ ಇಸ್ತ್ಯಾದಿ ತಸ್ಲಿಂ AI ಮೊಡೆಲಾಂ ಕಶಿಂ AI bubble ನಿರ್ಮುಂಕ್ ಲಾಗ್ಲ್ಯಾಂತ್. ಮುಖಾರ್ ಕಿತೆಂ ಜಾಂವ್ಕ್ ಆಸಾ? ಹ್ಯಾ ವಿಷಿಂ ವಿಸ್ತಾರುನ್ ವಿವರುಂಕ್ ಆಸಾ. ಮುಖ್ಲ್ಯಾ ಅವಸ್ವರಾಕ್ ರಾಕೊನ್ ರಾವ್ಯಾಂ.
(ಮುಂದರುಂಕ್ ಆಸಾ)
■ ಫಿಲಿಪ್ ಮುದಾರ್ಥ್
