ಪ್ರತಿಭಾನ್ವಿತ್ ಕೊಂಕ್ಣಿ ಕವಯಿತ್ರಿ ವಿಲ್ಮಾ ಬಂಟ್ವಾಳ್ ಹಿಣೆ ಸಪ್ತೆಂಬರ್ ಮಹಿನ್ಯಾಂತ್ ಗಣಿತ್ ಶಾಸ್ತ್ರಾಂತ್ ಬೆಳ್ಗಾಂವ್ಚ್ಯಾ ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾಲಯಾ ಥಾವ್ನ್ ಪಿ.ಎಚ್.ಡಿ. ಶಿಕಾಪ್ ಆಕೇರ್ ಕರ್ನ್ ಯಶಸ್ವಿ ರಿತಿನ್ ಡೊಕ್ಟರೆಟ್ ಪದ್ವಿ ಜೊಡ್ಲ್ಯಾ. ಹ್ಯಾ ಪದ್ವೆ ಲಾಗೊನ್ ತಿಣೆ ಕೊಂಕ್ಣಿ ಸಂಸಾರಾಂತ್ ಆಪ್ಲಿ ಒಳೊಕ್ ಶಾಸ್ವಿತ್ ಕೆಲ್ಲ್ಯಾ ಆಪ್ಲ್ಯಾ ಮೊಗಾಚ್ಯಾ ಸಾಹಿತ್ಯಾಕ್ ಥೊಡೊ ಕಾಳ್ ಪಯ್ಸ್ಯೀ ದವರಿಲ್ಲೆಂ. ಜಾಯ್ತೆ ಸಾಕ್ರಿಫಿಸ್ ಆಪ್ಲ್ಯಾ ಕುಟ್ಮಾ ಸಾಂಗಾತಾ ತಿಣೆ ಕೆಲ್ಯಾತ್ ಆಸೊಂಕ್ ಪುರೊ. ಆನಿ ಹ್ಯಾ ಕಷ್ಟಾಂಚೊ ಪ್ರತಿಫಳ್ ಜಾವ್ನ್ ತಿಣೆಂ ಹಕ್ಕಾನ್ ಮುಣ್ಚ್ಯಾಬರಿ ಡಾಕ್ಟರೇಟ್ ಪದ್ವಿ ಜೊಡ್ಲ್ಯಾ. ತ್ಯಾ ದೆಕುನ್ ತಿಕಾ ಸರ್ವ್ ಉಲ್ಲಾಸ್ ಫಾವೊ. ಮ್ಹಾಕಾ ಕಳಿತ್ ಆಸ್ಲ್ಲ್ಯಾ ಪ್ರಮಾಣೆ ಕೊಂಕ್ಣಿ ಸಂಸಾರಾಂತ್ ಗಾವ್ಪಿಣ್ ವೆಲಿಟಾ ಲೊಬೊ , ಕಾರ್ಯ ನಿರ್ವಾಹಕಿ ಕೋಮಲ್ ಡಿ’ಸೋಜಾ ಹಾಣಿ ಸಯ್ತ್ ಜಾಯ್ತಿ ಮ್ಹಿನತ್ ಕಾಡ್ನ್ ಹಿ ಪದ್ವಿ ಜೊಡ್ಲ್ಯಾ ಮಾತ್ರ್ ನಂಯ್ ಆಸ್ತಾಂ ಮ್ಹಜೊ ಆನ್ಯೇಕ್ ಮಿತ್ರ್ ಗ್ಲ್ಯಾನಿಷ್ ಮಾರ್ಟಿಸ್ ಆಲಂಗಾರ್ ಹಿ ಪದ್ವಿ ಆಪ್ಣಾಂವ್ಕ್ ದೀಸ್ ರಾತ್ ಎಕ್ ಕರುನ್ ಶಿಕೊನ್ ಆಸಾ. ಆಶೆಂ ಜಾಯ್ತೆ ಸಾಕ್ರಿಫಿಸ್ ಕರುನ್, ಶಿಕ್ಪಾಂತ್ ಎಕೀನ್ಪಣಿ ಮಗ್ನ್ ಜಾವ್ನ್ ಡಾಕ್ಟರೇಟ್ ಪದ್ವಿ ಜೊಡ್ಲ್ಲೆ ತಶೆಂಚ್ ಜೊಡುಂಕ್ ಶಿಕೊನ್ ಆಸ್ಚೆ ಆಮ್ಚೆ ಜಾಯ್ತೆ ಕಥೊಲಿಕ್ ವಿದ್ಯಾರ್ಥಿ ಆಸೊಂಕ್ ಪುರೊ. ತಾಂಕಾಂ ಸರ್ವಾಂಕ್ ಉಲ್ಲಾಸ್ ಫಾವೊ.
ಹಿಂ ಭುರ್ಗಿಂ ದೀಸ್ ರಾತ್ ಮ್ಹಳ್ಳ್ಯಾಬರಿ ಮ್ಹಿನತ್ ಕರುನ್ ಆಸ್ತಾನಾ ಆಮ್ಚೆ ಥೊಡೆ ವಿಂಚುನ್ ಕಾಡ್ಲ್ಲ್ಯಾ ಪರ್ಜೆಂತ್ಲೆ ಕುಳ್ವಾರ್ ಪಯ್ಶೇ ದೀವ್ನ್ ಹ್ಯೊ ಡಾಕ್ಟರೇಟ್ ಪದ್ವ್ಯೊ ಮೊಲಾಕ್ ಘೆತಾತ್. ಗೌರವ್ ಡಾಕ್ಟರೇಟ್ ( Honorary Doctorate) ರುಪಿಂ ಮೆಳ್ಚ್ಯಾ ಹ್ಯಾ ಪದ್ವ್ಯಾಂಕ್ ಕಿತೆಂಚ್ ಪ್ರಬಂದ್ ಬರಯ್ಜೆ ಮ್ಹಣ್ ನಾ , ಕಸಲೆಂಚ್ ವಿಶೇಸ್ ಸಾಧನ್ ಕರಿಜೆ ಮುಣೊನ್ ನಾ. ಫಕತ್ ದುಡು ಆಸ್ಲ್ಯಾರ್ ಪುರೊ! ಪಯ್ಶಾಂಚ್ಯಾ ಬಳಾನ್ ಹ್ಯಾ ಲೋಕಾಂನಿ ಡಾಕ್ಟರೇಟ್ ತಶೆಂಚ್ ಗೌರವ್ ಡಾಕ್ಟರೇಟ್ ಹಾಚಿ ಮರ್ಯಾದ್ ಕಾಡುನ್ ಸೊಡ್ಲ್ಯಾ.
ಪ್ರಖ್ಯಾತ್ ಕನ್ನಡ ಚಿತ್ರ್ ನಟ್ ರಾಜ್ಕುಮಾರ್ ಹಾಕಾ ಮೈಸೂರ್ ವಿಶ್ವವಿದ್ಯಾಲಯಾನ್ ಗೌರವ್ ಡಾಕ್ಟರೇಟ್ ದಿಂವ್ಚ್ಯಾ ಪಯ್ಲೆಂ ತಾಣೆ 202 ಪಿಂತುರಾಂನಿ ಪ್ರಮುಖ್ ಪಾತ್ರ್ ಖೆಳ್ಳ್ಯಾತ್ , ತಾಚೊ ಪೂತ್ ಶಿವರಾಜ್ಕುಮಾರ್ ಹಾಣೆ ವಿಜಯನಗರ ಶ್ರೀ ಕ್ರಷ್ಣದೇವರಾಯ ವಿಶ್ವವಿದ್ಯಾಲಯ ಬಳ್ಳಾರಿ ಹಾಣಿ ಗೌರವ್ ಡಾಕ್ಟರೇಟ್ ದಿಂವ್ಚ್ಯಾ ಪಯ್ಲೆಂ 103 ಪಿಂತುರಾಂನಿ ಪ್ರಮುಖ್ ಪಾತ್ರಾಂನಿ ಕಾಮ್ ಕೆಲಾಂ , ಪುನಿತ್ ರಾಜ್ಕುಮಾರಾನ್ ಲಗ್ಭಗ್ 40 ಯಶಸ್ವಿ ಪಿಂತುರಾಂನಿ ಕಾಮ್ ಕರ್ನ್ , ಕೊರೊಡಾಂನಿ ದಾನ್ ಆನಿ ಸಮಾಜ್ ಸೇವಾ ಕೆಲ್ಲಿ ಮಾನುನ್ ಘೆವ್ನ್ ಮೈಸೂರ್ ವಿಶ್ವವಿದ್ಯಾಲಯಾನ್ ತಾಕಾ ಗೌರವ್ ಡಾಕ್ಟರೇಟ್ ದಿಲ್ಯಾ ತರ್ , ಪ್ರಖ್ಯಾತ್ ಕ್ರಿಕೆಟ್ ಖೆಳ್ಗಾಡಿ ರಾಹುಲ್ ಡ್ರಾವಿಡ್ ಹಾಣೆ ಬೆಂಗ್ಳೂರ್ ವಿಶ್ವವಿದ್ಯಾಲಯನ್ ದೀಂವ್ಕ್ ನಿರ್ಧಾರ್ ಕೆಲ್ಲ್ಯಾ ಗೌರವ್ ಡಾಕ್ಟರೆಟ್ ಪದ್ವೆಕ್ ಆಪುಣ್ ಖೆಳಾ ವಯ್ರ್ ಶೈಕ್ಷಣಿಕ್ ಸಂಶೋಧನ್ ಕರುನ್ ತಿ ಜೊಡ್ತಾಂ ಮ್ಹಣೊನ್ ಮೊಗಾನ್ಚ್ ‘ನಾಂ’ ಮ್ಹಳಾಂ.
ತುಮ್ಕಾಂ ಜರ್ ಆಸಲ್ಯೊ ಗೌರವ್ ಡಾಕ್ಟರೇಟ್ ಜಾಯ್ ತರ್ ಹಾಚ್ಯಾ ಖಾತಿರ್ಚ್ ಉಬ್ಜಾಲ್ಲ್ಯೊ ಜಾಯ್ತ್ಯೊ ಎಕ್ಸ್ಕ್ಲೂಸಿವ್ ಕಂಪ್ಣ್ಯೊ ಆಸಾತ್ , ವಿಶ್ವವಿದ್ಯಾಲಯ್ ಮ್ಹಳ್ಳೊ ಬಿಲ್ಲೊ ಚಿಡ್ಕಾವ್ನ್ ಹ್ಯೊ ಖಾಸ್ಗಿ ಕಂಪ್ಣ್ಯೊ ಕಾಮ್ ಕರ್ತಾತ್. ಆಸಲ್ಯಾ ಕಂಪ್ಣ್ಯಾಂಕ್ ಸಂಪರ್ಕ್ ಕೆಲ್ಯಾರ್ ಜಾಲೆಂ. ವಿಶೇಷ್ ಜಾವ್ನ್ ದುಬಾಯಾಂತ್ ಆಸಲ್ಯೊ ಪದ್ವ್ಯೊ ಆಮ್ಚ್ಯಾ ಮಹಾನುಭಾವಾಂನಿ ಖಂಯ್ಚ್ಯಾ ಕಂಪ್ಣೆ ಥಾವ್ನ್ ಜೊಡ್ಲ್ಯಾತ್ ಮ್ಹಣೊನ್ ಸೊದುನ್ ಕಾಡಾ ಆನಿ ತ್ಯಾ ಕಂಪ್ಣೆಕ್ ಏಕ್ ಇ-ಮೆಯ್ಲ್ ಧಾಡಾ. ದುಸ್ರ್ಯಾಚ್ಚ್ ದಿಸಾ ಥಾವ್ನ್ ತುಮ್ಕಾಂ ಇ-ಮೆಯ್ಲಾಂಚಿ ಖತಡ್ ಜಾತಾಲಿ. ತುಮಿ ಕಿತೆಂಚ್ ಕರಿಜೆ ಮುಣೊನ್ ನಾ. ಫಕತ್ ವಿಚಾರಿಲ್ಲೆ ಪಯ್ಶೆ ದಾಡ್ಲ್ಯಾರ್ ಪುರೊ. ಡಾಕ್ಟರೇಟ್ ಖಂಚಾಯ್ ಎಕಾ ಬೊರ್ಯಾ ಹೊಟೆಲಾಂತ್ ಪಾರ್ಟಿ ದವರ್ನ್ ವಾಂಟ್ತಾಲೆ. ಉಗ್ಡಾಸ್ ಆಸೊಂ ಹ್ಯಾ ಪಾರ್ಟೆಂತ್ ಆಶೆ ಪಯ್ಶೆ ದೀವ್ನ್ ಡಾಕ್ಟರೇಟ್ ಮೊಲಾಕ್ ಘೆತ್ಲ್ಲೆ ಆನಿ ಪಯ್ಶೆ ಕಾಣ್ಘೆಲ್ಲೆ ಮಾತ್ರ್ ಆಸ್ತಾಲೆ ಶಿವಾಯ್ ಕುಟ್ಮಾ ಸಾಂದ್ಯಾಂಕ್ ಯ್ಯಾ ಹೆರಾಂಕ್ ಯೆಂವ್ಕ್ ಆವ್ಕಾಸ್ ನಾ.
ಆತಾಂ ಆಸಲ್ಯಾ ಗೌರವ್ ಡಾಕ್ಟರೇಟ್ ಪದ್ವೆಂ ವರ್ವಿಂ ಸಮಾಜೆಕ್ ಜಾಂವ್ಚ್ಯಾ ಬರೆಪಣಾಚೊ ತಜ್ವೀಜ್ ಕೆಲ್ಯಾರ್
ಗೌರವ್ ಡಾಕ್ಟರೇಟ್ ಎಕಾ ವ್ಯಕ್ತಿಚೆಂ ಆಸಾಧಾರಣ್ ಸಾಧನ್ ಆನಿ ಸಮಾಜೆ ವಯ್ರ್ ತಾಣೆ ಘಾಲ್ಲೊ ಪರಿಣಾಮ್ ಆಧಿಕೃತ್ ರಿತಿನ್ ಒಳ್ಕೊನ್ ಘೆತಾ. ಡಾಕ್ಟರೇಟ್ ಪದ್ವಿ ದಿಂವ್ಚಿ ಮ್ಹಳ್ಳ್ಯಾರ್ ತಿ ಪದ್ವಿ ದಿಲ್ಲ್ಯಾ ಸಂಸ್ಥ್ಯಾಚ್ಯಾ ಧೊರಣಾಂಕ್ ಧರ್ಲ್ಲೊ ಆರ್ಸೊ ತಸೊ ಜಾವ್ನಾಸಾ. ಉದಾಹರಣಾಂ ದಿಂವ್ಚಿಂ ತರ್ ಸುಧಾರಣ್, ಮುಖೆಲ್ಪಣ್, ಸೆವಾ ಆನಿ ಕಲಾತ್ಮಾಕ್ ಶ್ರೇಷ್ಠತಾಯೆ ವಯ್ರ್ ತ್ಯಾ ವ್ಯಕ್ತಿ ಮುಖಾಂತ್ರ್ ಸಂಸ್ಥ್ಯಾಚೆಂ ನಾಂವ್ ಆನಿ ಉದ್ದೇಶ್ ಪ್ರತಿಫಲಿತ್ ಕರ್ತಾ.
ಗೌರವ್ ಡಾಕ್ಟರೇಟ್ ವಿದ್ಯಾರ್ಥಿಂಕ್ ಆನಿ ಸಮಾಜೆಕ್ ಪ್ರೇರಣಾಚೆಂ ಮೂಳ್ ಜಾವ್ನಾಸ್ತಾ. ಯಶಸ್ವಿ ಆನಿ ಸೆವಾ ಫಕತ್ ಶಿಕ್ಷಣಾ ಮುಖಾಂತ್ರ್ ಮಾತ್ರ್ ಕರ್ಚೆಂ ಸಾಧನ್ ನಂಯ್ ಬಗಾರ್ ಜಿವಿತಾಚ್ಯಾ ಆನ್ಭೊಗಾ ಮುಖಾಂತ್ರ್ ಸಯ್ತ್ ಸಾದ್ಯ್ ಮುಳ್ಳೊ ಸಂದೇಶ್ ದಿತಾ.ಆಸಲೆ ಪ್ರಶಸ್ತಿ ಜೊಡ್ಪಿ ಮುಖ್ಲ್ಯಾ ಆನಿ ನವ್ಯಾ ಜನಾಂಗಾಕ್ ಪ್ರೇರಿತ್ ಕರ್ಚೆ ಆದರ್ಶ್ ವ್ಯಕ್ತಿ ಜಾಂವ್ಕ್ ಪಾವ್ತಾತ್.
ಕಲಾ , ಸಮಾಜ್ ಸೇವಾ , ರಾಜಕೀಯ್ ವಾ ಉದ್ಯಮಾಂತ್ ಮೆತೆರ್ ಜಾಲ್ಲ್ಯಾ ವ್ಯಕ್ತಿಂಕ್ ಗೌರವ್ ಡಾಕ್ಟರೇಟ್ ದಿಂವ್ಚ್ಯಾ ಮುಖಾಂತ್ರ್ ಆಸಲೆ ಗೌರವ್ ದಿಂವ್ಚೆ ಸಂಸ್ಥೆ ಶಿಕ್ಷಣ್ ಪದ್ದತಿ ಆನಿ ಸಮಾಜೆ ಮದ್ಲೊ ಆಂತರ್ ಉಣೊ ಕರ್ತಾತ್. ಹೊ ಸಂಬಂದ್ ಎಕಾಮೆಕಾ ಥಂಯ್ ಸಮ್ಜೊಣಿ , ಜಾಣ್ವಯ್ ಆದ್ಲಿ ಬದ್ಲಿ ಕರುಂಕ್ ಆಧಾರ್ ಆನಿ ಪ್ರಾಯೋಗಿಕ್ ಜಾಣ್ವಾಯೆಕ್ , ಶೈಕ್ಷಣಿಕ್ ಸಂಶೋಧನಾಂ ಸಾಂಗಾತಾ ಹಾಡುಂಕ್ ಆಧಾರ್ ಜಾತಾ.
ಆಶೆಂ ಸಮಾಜೆಂತ್ಲ್ಯಾ ಪ್ರಮುಖ್ ವ್ಯಕ್ತಿಂಕ್ ಆಸಲ್ಯಾ ಪ್ರಶಸ್ತ್ಯಾಂ ಮುಖಾಂತ್ರ್ ಮಾನ್ ಕರ್ತಾನಾ ತ್ಯಾ ಸಂಸ್ಥ್ಯಾಚೊ ಮಾನ್ ಜಾಗತಿಕ್ ಮಟ್ಟಾರ್ ವಾಡ್ತಾ ಮಾತ್ರ್ ನಂಯ್ ಆಸ್ತಾಂ ಸರ್ವ್ ಥರಾಂಚ್ಯಾ ಸಾಮಾಜಿಕ್ ಮೌಲ್ಯಾಂಕ್ ಮಾನ್ ದಿಂವ್ಚೊ ಸಂಸ್ಥೊ ಮ್ಹಳ್ಳೊ ಮಾನ್ ತೊ ಸಂಸ್ಥೊ ಜೊಡುನ್ ಘೆತಾ.
ಹ್ಯಾ ಗೌರವ್ ಡಾಕ್ಟರೆಟ್ ಪದ್ವೆ ಲಾಗೊನ್ ಜಾಂವ್ಚ್ಯಾ ವಾಯ್ಟ್ ಪರಿಣಾಮಾಂಚೆರ್ ಉಜ್ವಾಡ್ ಪಾಂಕೊಂವ್ಚೊ ತರ್ :
ಗೌರವ್ ಡಾಕ್ಟರೇಟ್ ಶೈಕ್ಷಣಿಕ್ ಪ್ರಾಮಾಣಿಕತಾ ಲಾಗೊನ್ ಠಿಕಾಂಕ್ ವ್ಹಳಗ್ ಜಾತಾ. ಹಿ ಪದ್ವಿ ಶೈಕ್ಷಣಿಕ್ ಆಧ್ಯಯನ್ ವ ಖಂಯ್ಚ್ಯಾಯ್ ಸಂಶೋಧನಾಂ ಮುಖಾಂತ್ರ್ ಉಪಲಬ್ದ್ ಕೆಲ್ಲಿ ನಂಯ್ ಆಸ್ತಾಂ ವರ್ಸಾಂಭರ್ ಶಿಕೊನ್ , ಪ್ರಬಂದ್ ಬರೊವ್ನ್ , ಸಂಶೋಧನಾಂ ಕರ್ನ್ ನ್ಯಾಯ್ಯುತ್ ಜಾವ್ನ್ ಗಳ್ಶಿಲ್ಲ್ಯಾ ಪದ್ವೆಂಚೆಂ ಮಾನ್ ಉಣೊ ಕರ್ತಾ.
ಸಭಾರ್ ಪೌವ್ಟಿಂ ಆಶೆಂ ಗೌರವ್ ಡಾಕ್ಟರೆಟ್ ಜೊಡ್ಲ್ಲ್ಯಾಂನಿ ವೃತ್ತಿಪರ್ ಆನಿ ಸಾರ್ವಜನಿಕ್ ಸಂದರ್ಭಾಂನಿ ಹ್ಯಾ “ಡಾಕ್ಟರ್” ಮ್ಹಳ್ಳ್ಯಾ ಪದ್ವೆಕ್ ಆಯೋಗ್ಯ್ ರಿತಿನ್ ವಾಪ್ರುನ್ ನೈತಿಕ್ ಆಸ್ಪಷ್ಟತಾಯ್ ಆನಿ ಚುಕಿಚೆಂ ವರ್ಣನ್ ಕೆಲಾಂ. ಆಶೆಂ ಹೆಂ ಗಯ್ರ್ಪಣಿ ಕರ್ಚೆಂ ಪ್ರದರ್ಶನ್ ಗೌರವ್ ಡಾಕ್ಟರೇಟ್ ಆನಿ ಜಾಯ್ತಿ ತಯಾರಾಯ್ ಕರ್ನ್ ಮಾನಾನ್ ಜೊಡ್ಲ್ಲ್ಯಾ ಡಾಕ್ಟರೇಟ್ ಪದ್ವ್ಯಾಂ ಮದೆಂ ಗೊಂದೊಳಾಕ್ ಕಾರಣ್ ಜಾಲಾಂ.ಆನಿ ಹೆಂ ಶೈಕ್ಷಣಿಕ್ ಪ್ರಾಮಾಣಿಕ್ಪಣಾಕ್ ವ್ಹಡ್ಲೆಂ ಸವಾಲ್ ಜಾವ್ನಾಸಾ
ಜಾಯ್ತ್ಯಾ ಸಂದರ್ಭಾಂನಿ ಹ್ಯೊ ಗೌರವ್ ಡಾಕ್ಟರೆಟ್ ಪದ್ವ್ಯೊ ರಾಜಕಿಯ್ ಫಾಯ್ದ್ಯಾಚ್ಯಾ ಕಾರಣಾಂ ಲಾಗೊನ್ , ಸಂಸ್ಥ್ಯಾಚ್ಯಾ ಆಧಾರಾಕ್ ಲಾಗೊನ್ ಆನಿ ಆರ್ಥಿಕ್ ಫಾಯ್ದ್ಯಾ ಲಾಗೊನ್ ದಿತಾತ್. ಆಸಲ್ಯೊ ಪದ್ವ್ಯೊ ವಾಂಟ್ಚ್ಯೊ ಸಂಸ್ಥೆ ಆಪ್ಲ್ಯಾ ನೈತಿಕ್ ಆನಿ ಬೌದ್ಧಿಕ್ ಸ್ವಾತಂತ್ರ್ಯಾಚೆರ್ ಸೊಡ್ದೊಡ್ ಕರ್ತಾತ್. ತ್ಯಾ ವರ್ವಿಂ ಆಸಲ್ಯಾ ಪದ್ವ್ಯಾಂಕ್ ಆನಿ ಪುರಸ್ಕಾರಾಂಕ್ ಮೋಲ್ ನಾ ಜಾವ್ನ್ ಗೆಲಾಂ.
ಗೌರವ್ ಡಾಕ್ಟರೇಟ್ ಪ್ರಶಸ್ತೆಕ್ ನಿಯುಕ್ತ್ ಕರ್ತಾನಾ ಸಂಸಾರ್ಭರ್ ಮಾನುನ್ ಘೆತ್ಲ್ಲ್ಯಾ ನೇಮಾಂಕ್ ಲೇಖಾಕ್ ಘೆನಾಂತ್. ಪ್ರಾಮಾಣಿತ್ ಮೌಲ್ಯಾಮಾಪಾನ್ ಆಸಾನಾ. ಆಶೆಂ ಜಾಲ್ಲ್ಯಾನ್ ವ್ಯಕ್ತಿನಿಷ್ಟ್ ತೀರ್ಮಾನ್ ಘೆಂವ್ಕ್ ಆನಿ ಆಸಂಬದ್ದಾತಾಯೆಕ್ ವಾಟ್ ಕರುನ್ ದಿತಾ. ಮಾತ್ರ್ ನ್ಹಂಯ್ ಆಸ್ತಾಂ ಆರ್ಹ್ ಆಭ್ಯರ್ಥಿ ಆಪ್ಣಾಕ್ ನ್ಯಾಯ್ಯುತ್ ಜಾವ್ನ್ ಮೆಳಾಜೆ ಆಸ್ಲ್ಲ್ಯಾ ಗೌರವಾ ಥಾವ್ನ್ ವಂಚಿತ್ ಜಾತಾತ್.
ಗೌರವ್ ಡಾಕ್ಟರೇಟ್ ಪದ್ವ್ಯೊ ತಾತ್ಕಾಲಿಕ್ ಪ್ರತಿಷ್ಟಾ ಜೊಡ್ನ್ ದೀಂವ್ಕ್ ಪುರೊ. ಪುಣ್ ತಾಚೊ ಪ್ರಭಾವ್ ದೀರ್ಘ್ ಕಾಳಾಕ್ ಉರ್ಚೊ ನಾ. ತ್ಯಾ ಪಾಸೊತ್ ಹ್ಯಾ ಸನದ್ ಜೊಡ್ಪ್ಯಾನ್ ನಿರಂತರ್ ಸಮಾಜೆಕ್ ಆಪ್ಲಿ ಸೆವಾ ದೀಜೆ ಪಡ್ತಾ. ಹಿ ಪದ್ವಿ ಶೈಕ್ಷಣಿಕ್ ಆಧ್ಯಯನಾ ಮುಖಾಂತ್ರ್ ಮೆಳ್ಲ್ಲ್ಯಾ ಪದ್ವೆಬರಿ ಶಾಸ್ವತ್ ವೃತ್ತಿಪರ್ ಮೌಲ್ಯ್ ದೀಂವ್ಕ್ ಸಕ್ಚಿನಾ.
ಬೋವ್ ಪ್ರಮುಖ್ ಜಾವ್ನ್ The University Grants Commission (UGC) ಪ್ರಕಾರ್ ಗೌರವ್ ಡಾಕ್ಟರೆಟ್ ಸನದ್ ಜೊಡ್ಪ್ಯಾಂನಿ ಆಪ್ಲ್ಯಾ ನಾಂವಾಂ ಸಾಂಗಾತಾ Doctor ವ Dr ಮುಳ್ಳೆ Prefix ಘಾಲುಂಕ್ ಆಧಿಕಾರ್ ನಾ ಕಿತ್ಯಾಕ್ ಮ್ಹಳ್ಳ್ಯಾರ್ ಹ್ಯೊ ಪದ್ವ್ಯೊ ಶೈಕ್ಷಣಿಕ್ ಆರ್ಹತಾ ವಯ್ರ್ ಜೊಡ್ಲ್ಲ್ಯೊ ನಂಯ್. ಕೋಣ್ ಬರೊಂವ್ಕ್ ಆಶೆತಾ ತರ್ ತಾಣಿಂ Dr. (h.c.) [Name] ವ [Name], [Degree] (honoris causa) ಆಶೆಂ ಬೊರಯ್ಜೆ ಪಡ್ತಾ.
ಆಕೇರ್ ಕರ್ಚೆ ಅದಿಂ ಕೋಣ್ ಆಪ್ಣೆಂ ಬೊರೆಂ ಕಾಮ್ ಕೆಲ್ಲ್ಯಾನ್ ಆಪ್ಣಾಕ್ ಡೊಕ್ಟರೇಟ್ ಮೆಳ್ಳಿ ಮುಣೊನ್ ಸಾಂಗ್ತಾ ತರ್ ಹಾವೆಂ ಸಾಂಗ್ಚೆಂ ಇತ್ಲೆಂಚ್ “ಭಾವಾ-ಭಯ್ಣಿ ಆಮಿ ಕೊಣಿ ಕಾನಾಂಚೆರ್ ಫುಲಾಂ ದವರುಂಕ್ ನಾಂತ್. ಬೊರೆಂ ಕಾಮ್ ಕೆಲ್ಯಾರ್ ಕಂಪೆನಿ ತುಮ್ಕಾಂ ಸಾಂಬಾಳ್ ವಾಡಯ್ತಾ, ಪ್ರೊಮೊಶನ್ ದಿತಾ , ಬರ್ಯೊ ಸವ್ಲಾತಾಯೊ ದಿತಾ ಪುಣ್ ಡೊಕ್ಟರೇಟ್ ದಿತಾತ್ ಮ್ಹಣೊನ್ ಲೊಕಾಕ್ ಮಾಂಕೊಡ್ ಕರುಂಕ್ ವಚಾನಾಕಾತ್ ಆನಿ ಖಂಚೊಯ್ ಸಂಸ್ಥೊ ಮಾನ್ ಕರ್ತಾ ತರ್ ಪರ್ಗಟ್ ಮಾನ್ ಕರ್ತಾತ್. ಫುಲಾಂ ಆನಿ ಶೊಲಾಂ ಕೊಣಾಚ್ಯಾ ಘರಾ ಘೇವ್ನ್ ವಚೊನ್ ತ್ಯಾ ಕುಟ್ಮಾ ಸಂಗಿಂ ಫೊಟೊ ಕಾಡ್ನ್ ಸಂಸ್ಥ್ಯಾನ್ ಮಾನ್ ಕೆಲಾ ಮ್ಹಣೊನ್ ಸಾಂಗಾನಾಕಾತ್”
ಹೆಂ ‘ಟ್ರೆಂಡ್’ ಆಶೆಂಚ್ ಮುಕಾರುನ್ ಗೆಲ್ಯಾರ್ ಸುಣ್ಯಾ ಮಾಜ್ರಾಂಕ್ ಗೌರವ್ ಡಾಕ್ಟರೆಟ್ ದೀವ್ನ್ Dr Tomy ಆನಿ Dr Pussy ಮ್ಹಣ್ಚೆ ದೀಸ್ ಪಯ್ಸ್ ಆಸ್ಚೆನಾಂತ್ ಮ್ಹಣ್ ಮ್ಹಜಿ ಅಭಿಪ್ರಾಯ್.
■ ನಾನು ಮರೋಲ್ , ತೊಟ್ಟಾಮ್
