ಮಂಗ್ಳುರ್ ದಿಯೆಸೆಜಿಂತ್, ಫಿರ್ಗಜ್ ತಶೆಂಚ್ ವಾರಾಡ್ಯಾ ಹಂತಾರ್ ನವ್ಯಾನ್ ರಚನ್ ಜಾಲ್ಲ್ಯಾ ಗೊವ್ಳಿಕ್ ಪರಿಷದೆಕ್ ತರ‍್ಭೆತ್ ಕರ‍್ಚ್ಯಾ ದಿಶೆನ್, ವಿಂಚ್ಲೆಲ್ಯಾ ಥೊಡ್ಯಾ ತರ‍್ಭೆತ್‌ದಾರಾಂಕ್ ದಿಯೆಸೆಜಿ ಹಂತಾರ್ ಅರ್ದ್ಯಾ ದಿಸಾಚಿ ತರ‍್ಬೆತಿ ಶಾಂತಿ ಕಿರಣ್ ಗೊವ್ಳಿಕ್ ಕೆಂದ್ರಾಂತ್ 2023 ಚ್ಯಾ ಮಾರ್ಚ್ 22 ವೆರ್ ಬುದ್ವಾರಾ ಚಲ್ಲಿ.
ದಿಯೆಸೆಜಿಚೊ ಗೊವ್ಳಿಬಾಪ್ ಆಧಿಕ್ ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ, ವಿಗಾರ್ ಜೆರಾಲ್ ಭೋವ್ ಮಾ| ಮ್ಯಾಕ್ಸಿಮ್ ನೊರೊನ್ಹಾ, ಚಾನ್ಸೆಲಾರ್ ಭೋವ್ ಮಾ| ದೊ| ವಿಕ್ಟರ್ ಜೋರ್ಜ್ ಸೋಜ್ ಹಾಂಚೆ ಸಾಂಗಾತಾ ದೆರೆಬಯ್ಲ್ ಫಿರ್ಗಜೆಚೊ ವಿಗಾರ್ ಭೋವ್ ಮಾ| ದೊ| ಜೋಸೆಫ್ ಮಾರ್ಟಿಸ್, ಸಾಂ ಜುಜೆ ಸೆಮಿನರಿಚೊ ಆಡಳ್ತೆದಾರ್ ಮಾ| ನವೀನ್ ಪೀಂತ್ ಆನಿ ಶಾಂತಿ ಕಿರಣ್ ಗೊವ್ಳಿಕ್ ಕೇಂದ್ರಾಚೊ ನಿರ್ದೇಶಕ್ ಮಾ| ಸಂತೋಷ್ ರೊಡ್ರಿಗಸ್ ಹಾಂಣಿಂ ಸಾಂಗಾತಾ ಮೆಳೊನ್ ಹಿ ತರ‍್ಬೆತಿ ಮಾಂಡುನ್ ಹಾಡ್‌ಲ್ಲಿ.
ಗೊವ್ಳಿಬಾಪಾಂನಿ ಪವಿತ್ರ್ ಸಭಾ ಮ್ಹಳ್ಯಾರ್ ಕಿತೆಂ? ಪವಿತ್ರ್ ಸಭೆಚೆಂ ಸ್ವರೂಪ್ ಆನಿ ಮಿಸಾಂವ್ ಕಿತೆಂ? ಮ್ಹಳ್ಳೆವಿಶಿಂ ಉಲೊವ್ಪ್ ದಿಲೆಂ. ಬಾಪ್ ನವೀನ್ ಪಿಂಟೊ ಹಾಂಣಿಂ ‘The Hierarchical Structure of the Church’ ಮ್ಹಳ್ಳೆವಿಶಿಂ ಸಮ್ಜಣಿ ದಿಲಿ.
ಬಾಪ್ ಜೋಸೆಫ್ ಮಾರ್ಟಿಸ್ ಹಾಂಣಿಂ ಫಿರ್ಗಜ್ ಮ್ಹಳ್ಯಾರ್ ಕಿತೆಂ? ಫಿರ್ಗಜೆಚೆಂ ಮಿಸಾಂವ್ ಕಿತೆಂ? ಗೊವ್ಳಿಕ್ ಪರಿಶದೆಚೊ ಸಾಂದೊ ಜಾವ್ನ್ ಕಶೆಂ ಫಿರ್ಗಜೆಚ್ಯಾ ಬಾಂದಾವಳೆಕ್ ಸೆವೆ-ಸ್ಪಿರಿತಾನ್ ಆಧಾರ್ ದಿವ್ಯೆತ್ ಮ್ಹಳ್ಳೆವಿಶಿಂ ವಿವರ್ ದಿಲೊ. ಹರೇಕ್ ವಿಶಯ್ ಮಂಡನ್ ಜಾಲ್ಯಾ ಉಪ್ರಾಂತ್ ಭಾಸಾ-ಭಾಸ್ ಚಲ್ಲಿ.
ಹರೇಕಾ ವಾರಾಡ್ಯಾಚ್ಯಾ ಗೊವ್ಳಿಕ್ ಪರಿಶದೆ ಬಾಬ್ತಿಂ ವಿಗಾರ್‌ವಾರ್, ದೋಗ್ ಯಾಜಕ್ ಆನಿ ದೋಗ್ ಲಾಯಿಕ್ ಭಾವಾಡ್ತಿ ಹ್ಯಾ ತರ‍್ಬೆತಿಕ್ ಹಾಜರ್ ಆಸ್‌ಲ್ಲಿಂ.
