ಹೊಲೆಂಡಾಚ್ಯಾ ವಿವಿಧ್ ಶಹರಾಂತ್ ಶಿಂಪ್ಡೊನ್ ಆಸ್ಚಿಂ ಮಂಗ್ಳುರಿ ಕ್ರಿಸ್ತಾಂವಾಂನಿ, 16 ಸಪ್ತಂಬ್ರ್ 2023 ವೆರ್ ಕೊಂಕ್ಣಿ ಸಮುದಾಯ್ ಸಂಘಟಾನಾಚ್ಯಾ ಬೊಂದೆರಾಖಾಲ್ ಬ್ರೆದಾ ಶಹಾರಾಚ್ಯಾ ಸಾಂ. ಮಿಂಗೆಲಿಕ್ ಸಮರ್ಪಿಲ್ಲ್ಯಾ ಫಿರ್ಗಜೆಂತ್ ಸಾಂಗಾತಾ ಯೇವ್ನ್ ಎಕ್ ಕುಟಮ್ ಜಾವ್ನ್ ಮೊಂತಿ ಫೆಸ್ತ್ ಸಂಭ್ರಮ್ಲೆಂ.
ನವೆಂ ಬೆಂಜಾರ್ ಕರ್ಚ್ಯಾ ಸಂಗಿ ಆರಂಭ್ ಜಾಲ್ಲೊ ತ್ಯಾ ದಿಸಾಚೊ ಸಂಭ್ರಮ್, ಮರಿಯೆಕ್ ಫುಲಾಂ ಅರ್ಪುನ್, ಫೆಸ್ತಾಚೆಂ ಸಂಭ್ರಮಿಕ್ ಮಿಸಾಚ್ಯಾ ಬಲಿದಾನಾ ಸವೆಂ ಆಚರಣ್ ಕೆಲೊ. ಹೊಲೆಂಡಾಚ್ಯಾ ಕೊಂಕ್ಣಿ ಸಮುದಾಯಾಚೊ ಆತ್ಮೀಕ್ ದಿರೆಕ್ತೊರ್ ತಶೆಂಚ್ ಕೊಂಕ್ಣಿ ಸಮುದಾಯಾಚೊ ಸ್ಥಾಪಕ್ ಬಾಪ್ ರಿಚರ್ಡ್ ಲೋಬೊನ್ ಸಂಭ್ರಮಿಕ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಮಿಸಾಚ್ಯಾ ಬಲಿದಾನಾ ಉಪ್ರಾಂತ್ ಸರ್ವಾಂನಿ ಸಾಂಗಾತಾ ಮೆಳೊನ್ ಆಕರ್ಷಕ್ ಖೆಳ್ ಮಾಂಡುನ್ ಹಾಡ್ಲೆಲೆ. ತ್ಯಾ ನಂತರ್, ಸಾಂದ್ಯಾನಿಂ ಸಂಗಾತಾ ಮೆಳೊನ್ ರಾಂದ್ಲೆಲೆ ದುಕ್ರಾಚೆಂ ಭಾಫಾತ್, ಕುವಳ್ಯಾ ಕಡಿ, ಚಣೆ ಸುಕೆ, ಉಂಡೊ, ಸಲಾದ್, ಲೊಣ್ಚೆಂ, ಶಿತ್ ಆನಿ ನವಿ ಕಣ್ಶಿ ಭರ್ಶಿಲ್ಲ್ಯಾ ವೊರ್ನಾಂ ಸವೆಂ ರುಚಿಕ್ ನವೆಂ ಜೆವಣ್ ವಾಂಟುನ್ ಸೆವ್ಲೆಂ.
ಹೊಲೆಂಡಾಚ್ಯಾ ಚರಿತ್ರೆಂತ್ ಆಚರಣ್ ಜಾಲ್ಲ್ಯಾ ಪಯ್ಲ್ಯಾ ಮೊಂತಿ ಫೆಸ್ತಾ ವರ್ವಿಂ ಕೊಂಕ್ಣಿ ಸಮುದಾಯಾ ಮಧ್ಲೊ ಮೊಗಾ ಬಾಂಧ್ ಥಿರ್ ಜಾಲಾ ಆಸೊನ್ ಮುಕ್ಲ್ಯಾ ದಿಸಾಂನಿ ಅಸಲಿಂ ಹೆರ್ ಕಾರ್ಯಿಂ ಆನಿ ಫೆಸ್ತಾಂ ಸಾಂಗಾತಾ ಮೆಳೊನ್ ಸಂಭ್ರಮ್ಚೊ ಭರ್ವಸೊ ಸಂಘಟಕಾಂನಿ ಉಚಾರ್ಲಾ.
ನೆದರ್ಲ್ಯಾಂಡಾಂತ್ ವಾವ್ರ್ ಆನಿ ವಸ್ತಿ ಕರುನ್ ಆಸ್ಚ್ಯಾ ಕೊಣಾಯ್ಕೀ ಜರ್ ಕೊಂಕ್ಣಿ ಸಮುದಾಯ್ ಎಕ್ತಾರಾಂತ್ ಮೆಳೊಂಕ್ ಖುಶಿ ಆಸಾ ತರ್ ಸಂಘಟಾಕಾಂಕ್ ಹಾಂಗಾಸಾರ್ ದಿಲ್ಲ್ಯಾ ಫೆಸ್ಭುಕ್ ಗಾಂಚ್ / ಕ್ಯೂ ಆರ್ ಕೋಡಾ ಮುಕಾಂತ್ರ್ ಸಂಪರ್ಕ್ ಕರ್ಯೆತ್ ಮ್ಹಣ್ ಸಂಘಟಕಾಂನಿ ಕಳಯ್ಲಾಂ.
ಗಾಂಚ್ : https://www.facebook.com/groups/6840768085981572
