ಕೊಂಕ್ಣಿ ಪಿಂತುರಾಂ ನಾಂತ್ , ಕೊಂಕ್ಣಿ ಪಿಂತುರಾಂ ನಾಂತ್ ಮುಳ್ಳ್ಯಾ ಧಾವೆಂತ್ ಕೊಂಕ್ಣಿ ಮನೋರಂಜನ್ ಸಂಸಾರ್ ಶಿಜೊನ್ ಆಸ್ತಾನಾ ಥಂಡಾಯ್ ಘೆವ್ನ್ ಆಯಿಲ್ಲೆಂ ಪಿಂತುರ್ ಜಾವ್ನಾಸಾ ಮಾಂಡ್ ಸೊಭಾಣ್ ಸಂಸ್ಥ್ಯಾನ್ ನಿರ್ಮಾಣ್ ಕೆಲ್ಲೆಂ ಕೊಂಕ್ಣಿ ಪಿಂತುರ್ “ಆಸ್ಮಿತಾಯ್”.ಹ್ಯಾ ಸಂಸ್ಥ್ಯಾಚ್ಯಾ ಹ್ಯಾ ಪ್ರಯತ್ನಾಕ್ ಖಂಡಿತ್ ಜಾವ್ನ್ ಶಾಭಾಸ್ಕಿ ಫಾವೊ.
ಮಾಂಡ್ ಸೊಭಾಣ್ ಸಂಸ್ಥ್ಯಾಚ್ಯಾ ಕಾರ್ಬಾರ‍್ಯಾಂ ಥಂಯ್ ಮೊಜ್ಯಾ ಆನಿ ಮೊಜ್ಯಾ ತಸಲ್ಯಾಂಚಿಂ ಚಿಂತ್ನಾಂ ತಾಳ್ ಪಡಾನಾಸ್ತಾನಾ ( ಹೊ ಮೊಸೊರ್ ಖಂಡಿತ್ ನ್ಹಂಯ್ ಬಗಾರ್ ಭಿನ್ನ್ ಆಭಿಪ್ರಾಯೊ ) ಆಸೊಂಕ್ ಪುರೊ ಪುಣ್ ಮಾಂಡ್ ಸೊಭಾಣ್ ಸಂಸ್ಥ್ಯಾನ್ ತಶೆಂಚ್ ಮಾನೇಸ್ತ್ ಎರಿಕ್ ಒಝೆರಿಯೊ ಹಾಣೆ ಕೆಲ್ಲ್ಯಾ ಕೊಂಕ್ಣಿ ವಾವ್ರಾಕ್ ಖಂಡಿತ್ ಜಾವ್ನ್ ನೆಗಾರ್ ಕರುಂಕ್ ಜಾಯ್ನಾ ಆನಿ ತ್ಯಾ ಪಾಸೊತ್ ಗೌರವಾಚೊ ಮಾನ್ ಮಾಂಡ್ ಸೊಭಾಣ್ ಸಂಸ್ಥ್ಯಾಕ್ ಸದಾಂಚ್ ಆಸ್ತಾಲೊಚ್ಚ್. ತೊ ಕೊಣೆ ಕಿತೆಂ ಸಾಂಗ್ಲ್ಯಾರೀ ಆಮ್ಚೆ ಥಾವ್ನ್ ವೋಡ್ನ್ ಕಾಣ್ಘೆಂವ್ಕ್ ಜಾಯ್ನಾ.
ಉಂಚ್ಲೆಂ ಮಾರ್ಕೆಟಿಂಗ್ ಕರುನ್ ಲೊಕಾ ಪರ್ಯಾಂತ್ ಎಕ್ ಪಿಂತುರ್ ಕಶೆಂ ಪಾವೊವ್ಯೆತ್ ಮುಣ್ಚ್ಯಾಕ್ ಏಕ್ ಸೂಕ್ತ್ ಉದಾಹರಣ್ – ಅಸ್ಮಿತಾಯ್! ತ್ಯಾ ದೆಕುನ್ ಮಾಂಡ್ ಸೊಭಾಣ್ ಪಂಗ್ಡಾಕ್ ಪಯ್ಲ್ಯಾನ್ ಪಯ್ಲೆಂ ಚೆಪೆಂ ಉಕ್ಲುಂಕ್ ಫಾವೊ. “ಆಸ್ಮಿತಾಯ್” ಪಿಂತುರಾಚಿ ಜಾಣ್ವಾಯ್ ಹರ್ಯೆಕಾ ಕೊಂಕ್ಣಿ ಘರಾಣ್ಯಾಂನಿ ಪಾಂವ್ಚ್ಯಾಬರಿ ಕೆಲ್ಯಾ ಮಾಂಡ್ ಸೊಭಾಣ್ ಪಂಗ್ಡಾನ್ ಮುಣೊನ್ ಸಾಂಗೊಂಕ್ ದೋನ್ ಉತ್ರಾಂ ನಾಂತ್.
“ಆಸ್ಮಿತಾಯ್” ಪಿಂತುರ್ ಕೆದಾಳಾ ಥಾವ್ನ್ ಆರಂಭ್ ಜಾಲ್ಲೆಂ ತ್ಯಾ ದಿಸಾ ಥಾವ್ನ್ ಮಾಂಡ್ ಸೊಭಾಣ್ ಸಂಸ್ಥೊ ಘೊಷಿತ್ ಕರ್ನ್ ಆಯ್ಲಾಕೀ ಹೆಂ ಪಿಂತುರ್ ಕೊಂಕ್ಣಿ ಲೊಕಾಚ್ಯಾ ಆಸ್ಮಿತಾಯೆಚ್ಯಾ ಸೊದ್ನೆರ್ ಮುಣೊನ್ ಆನಿ ಹೆಂಚ್ ವಾಕ್ಯ್ ಪಿಂತುರ್ ಆರಂಭ್ ಜಾತಾನಾ ಪಯ್ಲೆಂಚ್ ಪಡ್ದ್ಯಾರ್ ವಾಚುಂಕ್ ಮೆಳ್ತಾ. ಖಂಚೊಯಿ ಏಕ್ ಇತಿಹಾಸ್ ಆಮಿಂ ದಾಕಯ್ತಾಂವ್ ಮುಣ್ತಾನಾ ತಿ ಎಕ್ Fact Based Documentary ಜಾತಾ ಶಿವಾಯ್ ಖಂಚಾಯ್ ಕೊನ್ಶಾ ಥಾವ್ನ್ Entertaining Film ಜಾಯ್ನಾ. ಪುಣ್ ಆಜ್ಯಾಪ್ ಮುಳ್ಳ್ಯಾಬರಿ ಜಾಣಾರ‍್ಯಾಂನಿ ಪಿಂತುರಾಚ್ಯಾ ಕಾಣಿಯೆಂತ್ ಜಾಯ್ತ್ಯೊ ಚುಕಿ ಉಜ್ವಾಡಾಕ್ ಹಾಡ್‌ಲ್ಲ್ಯಾ ಉಪ್ರಾಂತ್ ಹೊ ನಾರೊ ಬದ್ಲುನ್ ಹೆಂ ಏಕ್ Film ಫಕತ್ತ್ Entertainment ದ್ರಷ್ಟಿನ್ ಪಳೆಂವ್ಕ್ ಜಾಯ್ ಮುಣೊನ್ ಬದ್ಲಾಲೊ. ತುಮಿಂ ಇತಿಹಾಸ್ ದಾಕಯ್ತಾನಾ ತೆಂ Documentary ಚ್ ಆಸ್ತಾ ಶಿವಾಯ್ ವರ್ಸಾಂ ಆನಿ ಕಾಂಯ್ 2000 ಪಾಶಾರ್ ಜಾಲ್ಯಾರಿ ಜೆಜುಕ್ ವಿಕ್ರಿತ್ ಕೆಲ್ಲೆಂ ಜುದಾಸಾನ್ಂಚ್ ಶಿವಾಯ್ ಪೆದ್ರುನ್ ವಿಕ್ರಿತ್ ಕೆಲ್ಲೆಂ ಮುಣೊನ್ ದಾಕೊವ್ನ್ ತೆಂ Documentary ನ್ಹಂಯ್ ಫಕತ್ತ್ Film ಜಾವ್ನ್ ಪಳೆಯಾ ಮುಣೊನ್ ಸಾಂಗೊಂಕ್ ಜಾಯ್ನಾ. ಹಾಕಾ ಪೂರಕ್ ಜಾವ್ನ್ ಕೊಂಕ್ಣೆಂತ್ಲೊ ಎಕ್ಲೊ ಮಾನೇಸ್ತ್ ಆಪ್ಣಾಕ್ ಏಕ್ ವೇದಿ ಮೆಳ್ಳಿ ಆನಿ ಹಾತಾಂತ್ ಎಕ್ ಮೈಕ್ ಮೆಳ್ಳೊ ಮುಣೊನ್ “ಆಸಲ್ಯಾ ಲೋಕಾಂನಿ ಕೊಂಕ್ಣೆಂತ್ ಕಿತೆಂಚ್ ಕೆಲ್ಲೆಂ ನಾ , ಆಪ್ಣೆ ಎಕ್ಲ್ಯಾನ್ಂಚ್ ಪಾಶಾರ್ ಜಾಲ್ಲ್ಯಾ 40 ವರ್ಸಾಂನಿ ಕೊಂಕ್ಣೆಕ್ ಸಾಂಬಾಳ್ಳಾಂ ಮುಳ್ಳ್ಯಾಬರಿ ಉಲಾಯ್ಲಾಗ್ಲೊ. ಕರೆಕ್ಟ್ ಸರ್…..ಕೊಂಕ್ಣೆಕ್ ತುಮ್ಚಿ ಕಾಣಿಕ್ ಕೊಣಿಂ ವಿಸ್ರೊಂಕ್ ಜಾಯ್ನಾ.ತೊ ಮ್ಹಾನ್ ತುಮ್ಕಾಂ ಸದಾಂಚ್ ಆಸ್ತಾಲೊಚ್ಚ್. ತಶೆಂ ಮುಣೊನ್ ಪ್ರೇಕ್ಷಕಾಂಕ್ ಯ್ಯಾ ಸಾದ್ಯಾ ಲೊಕಾಕ್ ತಾಂಚಿ ಆಭಿಪ್ರಾಯ್ ಸಾಂಗ್ಚೆಂ ಹಕ್ಕ್ ನಾಂಗೀ ? ಸಾಧ್ಯ್ ತರ್ ತಸಲ್ಯಾಂನಿ ವಿಚಾರ್‌ಲ್ಲ್ಯಾ Genuine ಸವಾಲಾಂಕ್ ಜಾಪಿ ದಿಂವ್ಚೆಂ ಪ್ರಯತ್ನ್ ಕರಾ.
ಆಭಿಪ್ರಾಯ್ ದೀಂವ್ಕ್ ವರ್ಸಾಂಚಿ ಬಂದಡ್ ಖಂಡಿತ್ ನಾ. ಇತ್ಲ್ಯಾಚ್ ವರ್ಸಾಂ ಥಾವ್ನ್ ಕೊಂಕ್ಣೆಂತ್ ಆಸಾಜೆಚ್ಚ್ ಮುಣೊನ್ ನಾ. ತುಮಿಂ ಸಾಂಗ್‌ಲ್ಲೆಂಚ್ ಸತ್ ಆನಿ ತೆಂಚ್ ಲೊಕಾನ್ ಆಯ್ಕಾಜೆ ಆನಿ ಪಾತ್ಯೆಜೆ ಮುಳ್ಳ್ಯಾರ್ ಹೆಂ ಎಕಾ ನಮೂನೆಚೆಂ ಇಂಕ್ವಿಸಿಸಾಂವ್ ನಾಸ್ತಾನಾ ಆನಿ ಕಿತೆಂ ? ಆಪ್ಣೆ ಸಾಂಗ್‌ಲ್ಲೆಂಚ್ ಸತ್ , ತೆಂಚ್ ಲೊಕಾನ್ ಆಯ್ಕಾಜೆ , ಕೊಣಿಂ ಸವಾಲಾಂ ಕರುಂಕ್ ನಜೊ ಮುಳ್ಳ್ಯಾ ಸುಕ್ಯಾ ಸಂಸಾರಾಂತ್ ಜಿಯೆತೆಲ್ಯಾಂಕ್ ಮುಕಾರಿಂ ಆಮ್ಚೊ ಲೋಕ್ “ಕೊಂಕಣಿ ರಾಂಪ” ಮುಳ್ಳೆಂ ಬಿರುಧ್ ದೀಂವ್ಕ್ ಸಯ್ತ್ ಪಾಟಿಂ ಮುಕಾರ್ ಪಳೆಂವ್ಚೊ ನಾ. ಆಶೆಂ ಕಿತ್ಯಾಕ್ ಘಡ್ಲೆಂ ? ಕಾಂಯ್ ಮಾಂಡ್ ಸೊಭಾಣ್ ಸಂಸ್ಥ್ಯಾಕ್ ಆಪ್ಲ್ಯಾ Product ವಯ್ರ್ ಭರ್ವಾಸೊ ನಾಸ್ತಾನಾ ಫಳಾಫಳಿಚೆಂ ಪ್ರಯತ್ನ್ ಚಲ್ಲಾಂಗೀ ?
ಹೆಂ ಪಿಂತುರ್ ಕೊಂಕ್ಣೆಂತ್ ಎದೊಳ್ ಆಯಿಲ್ಲ್ಯಾ ಪಿಂತುರಾಂ ಪಯ್ಕಿ ಏಕ್ ಶ್ರೇಷ್ಟ್ ಪ್ರಯತ್ನ್. ಪುಣ್ ತಾಂತ್ರಿಕ್ ದ್ರಷ್ಟಿಕೋನಾಂತ್ ಮಾನೇಸ್ತ್ ಪ್ರದೀಪ್ ಬರ್ಬೊಜಾ ಪಾಲಡ್ಕಾ ಹಾಚ್ಯಾ ನಿರ್ದೇಶನಾಚೆಂ “ಏಕ್ ಆಸ್ಲ್ಯಾರ್ ಏಕ್ ನಾ” ಮೊಜ್ಯಾ ಬುಕಾಂತ್ ಪಯ್ಲೆಂ ಸ್ಥಾನ್ ಘೆತಾ.ತಶೆಂ ಮುಣೊನ್ ಆಸ್ಮಿತಾಯ್ ಪಿಂತುರ್ ಹರ್ಯೆಕಾ ವಿಭಾಗಾಂನಿ ಶ್ರೇಷ್ಟ್ ಮುಣೊನ್ ಸಾಂಗೊಂಕ್ ಹಾಂವ್ ತಯಾರ್ ನಾ. ಸವಾಲಾಂ ಜಾಯ್ತಿಂ ಆಸಾತ್ ಜಾಲ್ಲ್ಯಾನ್ ಪಯ್ಲೆಂ ಹಾಂವ್ ಇತಿಹಾಸಾಚ್ಯಾ ಕಾಣಿಯೆ ವಯ್ರ್ ವೆತಾಂ ಆನಿ ಆಖ್ರೇಕ್ ಪಿಂತುರಾಕ್ ಯೆತಾಂ.
ಕಾಣಿಯೆ ವಯ್ರ್ ವೆತಾನಾ ಏಕ್ ಲಾಂಭ್ ಕಾಣಿಯೆಕ್ ಚಿರ್ಡುನ್ ಮುರ್ಡುನ್ ಏಕ್ ಮಟ್ವಿ ಕಾಣಿ ಕೆಲ್ಯಾ ಮುಣೊನ್ ಘಡಿತಾಂಕ್ ಎಕಾಮೆಕಾ ಸಾರ್ಕೆಂ Link ಮೆಳಾನಾತ್‌ಲ್ಲೆಂ ಉಗ್ತ್ಯಾನ್ ದಿಸ್ತಾ ತರೀ ತಾಚ್ಯಾ ಪರಿಧೆ ಭಿತರ್ ಆಸೊನ್ ಸಂಭಾಷಣಾಂ ಬೊರವ್ನ್ ಲೊಕಾಕ್ ಸಮ್ಜಾ ಸಾರ್ಕೊ ಉಜ್ವಾಡ್ ಫಾಂಕಯಿಲ್ಲ್ಯಾ ಮಾನೇಸ್ತ್ ಜೊಯೆಲ್ ಪಿರೇರಿಚೆಂ ಕಾಮ್ ಹಾಂಗಾ ಉಟೊನ್ ದಿಸ್ತಾ. ಪರ್ಭಿಂ ತಾಕಾ. ಪುಣ್ ಆಮ್ಚ್ಯಾ ಇತಿಹಾಸಾಚೆರ್ ಹ್ಯಾ ಕಾಣಿಯೆನ್ ಸಂಪೂರ್ಣ್ ಉಜ್ವಾಡ್ ಫಾಂಕಯ್ಲಾ ಮುಣೊನ್ ಮ್ಹಾಕಾ ಬಿಲ್ಕುಲ್ ಭಗಾನಾ. ಹಾಚೊ ಪರಿಣಾಮ್ ಜಾವ್ನ್ ಎದೊಳ್ ಲೊಕಾನ್ ಕಿತೆಂ ವಾಚ್ಲಾಂ , ಸಮ್ಜಾಲಾಂ ತಾಚ್ಯಾಕೀ ಎಕ್ ದುಸ್ರೆಂಚ್ ಚಿತ್ರಣ್ ಪಳೆಂವ್ಕ್ ಮೆಳ್ಳಾಂ. ಮ್ಹಾಕಾಚ್ ಹಾವೆಂ ಸಮರ್ಥನ್ ಕರುನ್ ಘೆಂವ್ಕ್ ಆಸ್ಮಿತಾಯ್ ಪಿಂತುರ್ ಹಾವೆಂ ದೋನ್ ಪೌವ್ಟಿಂ ಪಳೆಲಾಂ. ಇತಿಹಾಸ್ ಕಿತೆಂ ವಾಚ್ಲಾ ಆನಿ ಪಿಂತುರಾಂತ್ ಕಿತೆಂ ದಾಕಯ್ಲಾಂ ತೆಂ ತಜ್ವೀಜ್ ಕರ್ತಾನಾ ಸವಾಲಾಂಚೊ ದಾಳೊಚ್ಚ್ ಉಗ್ತೊ ಜಾತಾ. ಹೆಂ ಪಿಂತುರ್ ಬಾರ್ಕಾಯೆನ್ ಆನಿ ವಿಮರ್ಶಾತ್ಮಾಕ್ ದಷ್ಟೆನ್ ತಜ್ವೀಜ್ ಕರುನ್ ಪಳೆತಾನಾ ಕೊಂಕ್ಣೆಚ್ಯಾ ನಾಂವಾನ್ , ಕೊಂಕ್ಣಿ ಕಥೊಲಿಕ್ ಲೊಕಾಕ್ ಸಿಂತಿಮೆಂತಾಳ್ ಜಾಳಾಂತ್ ಪಿಚಾರ್ ಕರುನ್ , ಎಕಾ ವರ್ಗಾಚ್ಯಾ ಲೊಕಾಕ್ ಖುಶಿ ಕರುಂಕ್ ಕೆಲ್ಲೆಂ ಪಿಂತುರ್ ಮುಣೊನ್ ಸಾಂಗ್ಚ್ಯಾಂತ್ ಮ್ಹಾಕಾ ಕಾಂಯ್ ದುಭಾವ್ ನಾ.
ಹೊಗ್ಳಿಕ್ ಉಚಾರಿಲ್ಲ್ಯಾ ಆಮ್ಚ್ಯಾ ಸಭಾರ್ ಪಾದ್ರ್ಯಾಬಾಂಕ್ , ಸಿಸ್ಟರಿಂಕ್ ಸಾಂಗಾತಾ ಪಿಂತುರ್ ಪಳೆಯಿಲ್ಲ್ಯಾ ಆಭಿಮಾನಿಂಕ್ ಆಜ್ ಪಿಂತುರಾ ವಿಶಿಂ ವಿಚಾರ್ಲ್ಯಾರ್ ಕೇವಲ್ ಪಿಂತುರಾಂತ್ ಕಿತೆಂ ದಾಕಯ್ಲಾಂ ತೆಂ ಮಾತ್ರ್ ಸಾಂಗೊಂಕ್ ಆಸಾತ್ ಶಿವಾಯ್ ನೀಜ್ ಇತಿಹಾಸ್ ಕಿತೆಂ ತೊ ಮುಣೊನ್ ಸರಸ್ವತಿ ನ್ಹಂಯ್ ನಾಸ್ ಜಾಲ್ಲ್ಯಾಬರಿ ನಾಸ್ ಕರ್ಚೆಂ ಏಕ್ ಪ್ರಯತ್ನ್ ಚಲ್ಲಾಂ. ಹ್ಯಾ ವಿಶಿಂ ಮಾ|ಬಾ| ಜೇಸನ್ ಪಿಂತ್ ಉದ್ಯಾವರ್ ಹಾಣೆಂ ಭೊವ್ ಸುಂದರ್ ರಿತಿನ್ ಉಜ್ವಾಡ್ ಫಾಂಕಯ್ಲಾ. ( https://kittall.com/25557/ ).
ಆಮ್ಚ್ಯಾ ದೇಶಾಚ್ಯಾ ಉತ್ತರ್ ಭಾರತಾಚ್ಯಾ ಪ್ರದೇಶಾಂನಿ ಜಶೆಂ ಹಿಂದಿ ಭಾಸ್ ಶಾಸ್ತ್ರೀಯ್ ಜಾವ್ನ್ ಉರ್ಲ್ಯಾ ತಶೆಂ ದಕ್ಷಿಣ್ ಭಾರತಾಂತ್ಲ್ಯಾ ರಾಜ್ಯಾಂನಿ ಸಯ್ತ್ ಶಾಸ್ತ್ರೀಯ್ ಭಾಷೆಚೊ ಪರಿಣಾಮ್ ಜಾಯ್ತೊ ಆಸಾ. ತ್ಯಾ ದೆಕುನ್ ಆಂಧ್ರ ಪ್ರದೇಶಾಂತ್ ರಾವ್ತಾಲೊ ಲೋಕ್ ತೆಲುಗು , ತಮಿಳ್ನಾಡಾಂತ್ಲೊ ತಮಿಳಿಯನ್ , ಗೊವಾಂತ್ಲೊ ಗೊವಾನ್ಸ್ ಯ್ಯಾ ಗೊಂಯ್ಕಾರ್ ಮುಣೊನ್ಂಚ್ ಒಳ್ಕತಾ ಶಿವಾಯ್ ಕೊಂಕ್ಣಿ ಕೋಣ್ ಉಲಯ್ತಾ ತೊ “ಕೊಂಕಣಾಸ್” ಯ್ಯಾ “ಕೊಂಕಣ್ ಲೋಕ್” ಮುಣೊನ್ ಆಪ್ಲಿ ಆಸ್ಮಿತಾಯ್ ದಾಕಯ್ನಾ.ಆಜೂನಿ ಆಮ್ಚ್ಯಾ ಮಂಗ್ಳೂರಾಂತ್ ಜಾಲ್ಯಾರೀ ಆಮ್ಚೊ ಲೋಕ್ ಜಾತಿ-ಕಾತಿ ವಯ್ರ್ , ರಾಂವ್ಚ್ಯಾ ಪ್ರದೇಶಾಂ ವಯ್ರ್ ಥಾವ್ನ್ ಆಪ್ಲಿ ವ್ಹಳೊಕ್ ದಾಕಯ್ತಾ ಜಾಲ್ಲ್ಯಾನ್ ಹೆಂ ಪಿಂತುರ್ ಮಂಗ್ಳೂರ್ ಆನಿ ಆಸ್ಪಾಸ್ ರಾಂವ್ಚ್ಯಾ ಲೋಕಾಕ್ ತೆ ಕೊಂಕ್ಣಿ ಲೋಕ್ ಮುಣೊನ್ ದಾಕೊಂವ್ಚೆಂ ಏಕ್ ವ್ಯರ್ಥ್ ಪ್ರಯತ್ನ್ ಕರ್ತಾ.
ಹ್ಯಾ ಪಿಂತುರಾಂತ್ ದಾಕಯ್ಲೆಂ ಇಂಕ್ವಿಜಿಸಾಂವ್ ದ್ರಶ್ಯ್ ಇತಿಹಾಸಾ ಥಾವ್ನ್ ಚಡ್ ಆನಿ ಚಡ್ ಪಯ್ಸ್ ಆಸಾ ಆನಿ ಹೆಂ ಆಮ್ಚ್ಯಾ ಧಾರ್ಮಿಕ್ ವ್ಹಡಿಲಾಂಚ್ಯಾ ಆನ್ಭೊಗಿ ತಕ್ಲೆಕ್ ವಚನಾಸ್ತಾನಾ ಕಶೆಂ ತಾಣಿಂ ಒಪ್ವೊನ್ ಘೆತ್ಲೆಂ ಮುಳ್ಳೆಂ ವ್ಹಡ್ ಸವಾಲ್ ಮೊಜ್ಯಾ ಮುಖಾರ್ ಉಬೆಂ ಜಾಲಾಂ. ಆತಾಂಚ್ಯಾ ಹ್ಯಾ ಕ್ಲಿಷ್ಟ್ ಆನಿ ಸಂಕೀರ್ಣ್ ಪರಿಸ್ಥಿತೆಂತ್ ಆಶೆಂ ಏಕ್ Twisted Issue ಗರ್ಜ್ ಆಸ್ಲ್ಲೆಂಗೀ ? ಕೊಮುವಾದ್ ವಾಡೊನ್ ಗೆಲ್ಲ್ಯಾ ಹ್ಯಾ ಕಾಳಾರ್ , ಎಲಿಸಾಂವ್ ಆಮ್ಚ್ಯಾ ದೊಳ್ಯಾಂ ಮುಕಾರ್ ಆಸ್ತಾನಾ ಫಾಲ್ಯಾಂ ಆಮ್ಚ್ಯಾ ಸಮೊಡ್ತಿ ವಯ್ರ್ ಕಿತೆಂಚ್ ಆವ್ಘಡಾಂ ಘಡ್ಲ್ಯಾರ್ ( ಎದೊಳ್‌ಚ್ ಸಾರ್ಕಿ ಜಾಣ್ವಯ್ ನಾಸ್ತಾನಾ ಕ್ಶುಲ್ಲಕ್ ಕಾರಣಾಂ ಲಾಗೊನ್ ಜಾಯ್ತಿಂ ಘಡಿತಾಂ ಘಡ್ಲ್ಯಾಂತ್ ) ಹೇಚ್ ಧಾರ್ಮಿಕ್ ವ್ಹಡಿಲ್ ಸಮರ್ಥನ್ ದೀಂವ್ಕ್ ಸಕ್ತಿತ್‌ಗೀ ? ತ್ಯಾ ದೆಕುನ್ ಮ್ಹಾಕಾ ಕಿತೆಂಚ್ ದುಭಾವ್ ನಾ ಹ್ಯಾ ಉಜ್ವ್ಯಾ ಪಂಥಾಕ್ ( Right Wing ) ಸಮರ್ಥನ್ ದಿಂವ್ಚ್ಯಾ ಪಿಂತುರಾಕ್ “ಎರಿಕಾಚೊ ಇಕ್ರಾವೊ ಉಪಾದೇಸ್” ” ಕೊಂಕಣಿ ಫೈಲ್ಸ್ ” ಯ್ಯಾ “ಮಂಗ್ಳೂರಿಯನ್ ಫೈಲ್ಸ್” ಮುಣೊನ್ ಆಪೊಂವ್ಕ್.
ಇತಿಹಾಸಾಂತ್ ಮ್ಹಾಕಾ ಖಂಯ್ ವಾಚ್ಲೆಲೆಂ ಉಗ್ಡಾಸ್ ನಾ ಕಿ ಪೊರ್ಚುಗಿಸಾಂನಿ ಬಲಾತ್ಕಾರಾಂತ್ ಕೊಣಾಕೀ ಧರ್ಮ್ ಬದ್ಲುಂಕ್ ಕೆಲಾ ಮುಣೊನ್.ಕೋಣ್ ಕಥೊಲಿಕ್ ಆಸಾ , ಆನಿ ಕೋಣ್ ಎದೊಳ್‌ಚ್ ಕನ್ವೇಡ್ತರ್ ಜಾಲಾ ತಾಂಕಾಂ ಹೆರ್ ಧರ್ಮಾಂಚಿಂ ಆಚರಣಾಂ ಕರುಂಕ್ ನಿರ್ಬಂದ್ ಮಾತ್ರ್ ಘಾಲ್ಲೊ ತಾಣಿಂ. ಪುಣ್ ಹಾಂಗಾ ಜನಿವಾರ , ಗುಳಿಗಾ ಹಾಂಕಾಂ ಮದೆಂ ಹಾಡ್ನ್ ಕ್ರೀಸ್ತಾಂವಾಂನಿ ಹಿಂದ್ವಾಂಕ್ . . . ಪರ್ತ್ಯಾನ್ ಸಾಂಗ್ತಾಂ ಹಿಂದ್ವಾಂಕ್ ಜಬರ್ದಸ್ತೇನ್ ಕನ್ವೇಡ್ತರ್ ಕೆಲಾಂ ಮುಣ್ಚ್ಯಾಕ್ ಕ್ರೀಸ್ತಾಂವಾಂ ವಯ್ರ್ ದೊಳೊ ಆಸ್‌ಲ್ಲ್ಯಾಂಕ್ ಏಕ್ Documentary Evidence ತಯಾರ್ ಕರುನ್ ದಿಲಾಂ ಮುಣ್ಚ್ಯಾಕ್ ಮ್ಹಾಕಾ ಕಾಂಯ್ ದುಬಾವ್ ನಾ. ಇತ್ಲೆಂ ಪಾವಾನಾತ್ಲ್ಯಾಕ್ ಕಾಡ್ದಿನಲಾಕ್ ವ್ಹಡ್ಲೊ ಖುರಿಸ್ ಆಸ್‌ಲ್ಲೊ ಲೋಬ್ ಘಾಲ್ನ್ ಬಸೊವ್ನ್ ಪಾವಾನಾತ್ಲ್ಯಾಕ್ ವೊಣದಿ ದೆಗೆರ್ ಏಕ್ ವ್ಹಡ್ಲೊ ಖುರಿಸ್ ದವರುನ್ ಸಮೊಡ್ತಿಕ್ ಆಕ್ಮಾನ್ ಕರ್ಚ್ಯಾಕೀ ಏಕ್ ಪೊರ್ಚುಗಲ್ ಆಧಿಕಾರಿಕ್ ದಾಕೊವ್ಯೆತ್ ಆಸ್ಲ್ಲೆಂ. ತಶೆಂ ಇತಿಹಾಸ್ ಆನಿಕೀ ತೀಳ್ನ್ ಪಳೆಯ್ಲ್ಯಾರ್ ಪೊರ್ಚುಗೀಸ್ ಕೊಂಕ್ಣಿ ಉಲೊಂವ್ಕ್ ಬಿಲ್ಕುಲ್ ಸೊಡಿನಾತ್ಲೆ , ತಾಂಚಿಚ್ ಭಾಸ್ ಉಲೊಂವ್ಕ್ ಜಾಯ್ ಮುಣೊನ್ ಜಬರ್ದಸ್ತಿ ಕರ್ತೆಲೆ ಮುಣೊನ್ ಕಳ್ತಾ ತರೀ ಕಾಡ್ದಿನಲಾ ಲಾಗಿಂ ಹೆರಾಂಚಿಂ ಪಾತ್ಕಾಂ ಸಾಂಗ್ಚೊ ಆಧಿಕಾರಿ ಕೊಂಕ್ಣೆಂತ್‌ಚ್ ಉಲಯ್ತಾಲೊ. ತರ್ ತಾಕಾ ಕಿತ್ಯಾಕ್ ಸಜಾ ಜಾಂವ್ಕ್ ನಾ ? ಆನಿಕೀ ಗೂಂಡಾಯೆಂತ್ ಪಳೆಂವ್ಕ್ ಗೆಲ್ಯಾರ್ ಇಂಕ್ವಿಜಿಸಾಂವ್ ಜ್ಯಾರಿಯೆರ್ ಹಾಡುಂಕ್ ಪೊರ್ಚುಗೀಸ್ ಸರ್ಕಾರಾಕ್ ಬರಯ್ಲೆಂಚ್ ಸಾಂ ಫ್ರಾನ್ಸಿಸ್ ಸಾವೆರಾನ್ ಮುಣೊನ್ ಇತಿಹಾಸ್ ಸಾಂಗ್ತಾ. ತರ್ ಹೆಂ ಕಿತ್ಯಾಕ್ ದಾಕೊಂವ್ಕ್ ನಾ ? ಗೊಂಯ್ಕಾರಾಂಕ್ ರಾಗ್ ಹಾಡೊಂವ್ಚೊ ವಾ ತಾಂಚ್ಯಾ ಭಗ್ಣಾಂಕ್ ಘಾಯ್ ಕರ್ಚೊ ನ್ಹಾಕಾ ಮುಣೊನ್ ಗೀ ? ಹೆಂ ಸರ್ವ್ ಪಳೆಯ್ತಾನಾ ಥೊಡ್ಯಾ ವರ್ಸಾಂ ಆದಿಂ ಭಿಸ್ಪಾಚ್ಯಾ ಬೊಂಗ್ಲ್ಯಾಚ್ಯಾ ನಿಭಾನ್ ಉಟ್‌ಲ್ಲ್ಯಾ “ಘರ್ ವಾಪ್ಸಿ” ಭಗ್ಣಾಂಚಿ ಮುಂದರ್ಸಿಲ್ಲಿ ಕಾಣಿಗಾಯ್ ಹೆಂ ಪಿಂತುರ್ ಮುಣೊನ್ ಚಿಂತುಂಕ್ ಇಡೆಂ ಮೆಳ್ತಾ.
ಇಂಕ್ವಿಜಿಸಾಂವಾಂ ನಾಂವಾರ್ ದಗ್ಧಿತಾನಾ “ವೊ ಗುಳಿಗಾ” ಮುಣೊನ್ ಉಲೊ ದಿತಾ. ಗುಳಿಗಾ ಜಾವ್ನಾಸಾ ದಕ್ಷಿಣ್ ಕನ್ನಡ ಆನಿ ದಕ್ಷಿಣ್ ಕನ್ನಡಾಚಿ ಗಡಿ ಕೇರಳಾಂತ್ಲ್ಯಾ ಥೊಡ್ಯಾ ಪ್ರದೇಶಾಂಚೊ ಧೈವ್. ತೊ ಗೊಂಯಾಂತ್ ಕೆದಾಳಾ ಪಾವ್ಲೊ ? ತರ್ ಎಕ್ಸುಡೊಸ್ ಮಂಗ್ಳುರ್ ಥಾವ್ನ್ ಗೊಂಯಾಂ ತೆವ್ಶಿಂ ಸಯ್ತ್ ಆಸ್ಲ್ಲೆಂ ಮುಣೊನ್ ಪಾತ್ಯೆಂವ್ ವಾ ಹಿಂದ್ವಾಂಚ್ಯಾ ಧಾರ್ಮಿಕ್ ಭಗ್ಣಾಂಕ್ ಚಾಳ್ವೊಂಕ್ ಕೆಲ್ಲೆಂ ಏಕ್ ಪ್ರಯತ್ನ್ ಮುಣೊನ್ ಹಾಂವ್ ಚಿಂತುಂ ? ಆನಿ ಹೆಂ ಎಕ್ಸುಡೊಸ್ ಕೇವಲ್ ಕೊಂಕ್ಣಿ ಲೊಕಾಂಕ್ ಧಗ್ದುಂಕ್ ಕೆಲ್ಲೆಂ ಪ್ರಯತ್ನ್ ಮುಣೊನ್ ಆಮಿಂ ಚಿಂತಿಜೆ ಮುಣೊನ್ಂಚ್ ನಾ. ಸಂಸಾರಾಂತ್ ಆಜೂನ್ ಜಾಲ್ಯಾರಿ ಎಕಾ ನಾ ಎಕಾ ನಮೂನ್ಯಾಚೆಂ ಎಕ್ಸುಡೊಸ್ ಚಲ್ತೆ ಆಸಾ. ಉದಾಹರಣ್ ದೀಂವ್ ತರ್ ಆಮ್ಚೊ ಲೋಕ್ ಕಾಮಾಂ ಸೊಧುನ್ ದುಬಾಯ್ ತಸಲ್ಯಾ ಶಹರಾಂಕ್ ವೆಚೆಂ, ಒರಿಸ್ಸಾಚೊ ಲೋಕ್ ಕಾಮಾಂ ಸೊಧುನ್ ಆಮ್ಚ್ಯಾ ತೆವ್ಶಿಂ ಯೆಂವ್ಚೆಂ, ಕೊರೊನಾ ಕಾಳಾರ್ ಉತ್ತರ್ ಪ್ರದೇಶ್, ಬಿಹಾರಾಂತ್ಲೊ ಲೋಕ್ ಪಾಟಿಂ ಪರ್ತಾಲ್ಲೊ ಹೆಂ ಸರ್ವ್ ಎಕ್ ನಹಿಂ ತರ್ ಎಕಾ ನಮೂನೆಚೆಂ ಎಕ್ಸುಡೊಸ್ ಆನಿ ಹಾಕಾ ಧರ್ಮಾಚೊ ರಂಗ್ ದಿಂವ್ಚಿ ಕಿತೆಂಚ್ ಗರ್ಜ್ ನಾ. ಆನಿ ಏಕ್ ಸಾಂಗೊಂ ತರ್ ಹೆಂ ಎಕ್ಸುಡೊಸ್ ಪೊರ್ಚುಗೀಸ್ ಭಾರತಾಕ್ ಪಾಂವ್ಚೆ ಪಯ್ಲೆಂ ಥಾವ್ನ್ ಚಲೊನ್ ಆಸ್ಲೆಂ.
ಆನ್ಯೇಕ್ ವಿಶಯ್ ಹಾಂಗಾ ಜಾಣಾ ಜಾಯ್ಜೆಕೀ ಪಿಂತುರಾಂತ್ ದಾಕಯ್ಲಿ ಸಾಂತೆರಿ ಮಾಂಯ್ ಆಧಿವಾಸಿಂಚಿ ದೇವಿ ಮುಣೊನ್ ಇತಿಹಾಸ್ ಸಾಂಗ್ತಾ. ಪುಣ್ ಹಾಂಗಾ ಶಾಂತೆರಿ ಮಾಂಯ್ ಗೌಡ್ ಸಾರಸ್ವತ್ ಬ್ರಾಹ್ಮಣಾಂಚಿ ದೇವಿ ಆನಿ ಪೊರ್ಚುಗಿಸಾಂಚ್ಯಾ ದಗ್ಧವ್ಣೆಕ್ ಬಲಿ ಜಾಲ್ಲಿ ದೇವಿ ತಶೆಂ ದಾಕಯ್ಲಾಂ. ಬ್ರಾಹ್ಮಣಾಂನಿ ಆಧಿವಾಸಿಂಕ್ ಆನಿ ನಿಮ್ನ್ ಜಾತಿಂಚ್ಯಾಂಕ್ ಲಾಗಿಂ ಕೆಲ್ಲೆಂ ( ಹ್ಯಾ ಆಧುನಿಕ್ ಕಾಳಾರ್ ಜಾಲ್ಯಾರೀ ) ಖಂಯ್ ವಾಚುಂಕ್ ಮೆಳಾನಾ. ಸಾಂಗಾತಾಚ್ ಗೊಂಯ್ಚೆ ಸಾಂತೆರಿ ಮಾಯೆಚೆ ಭಕ್ತ್ ಮಂಗ್ಳೂರಾಕ್ ಯೇವ್ನ್ ರುಜಾರ್ ಮಾಯೆಕ್ ಗೌರವ್ ದಿಂವ್ಚೆ ಕ್ರಿಸ್ತಾಂವ್ ಕಶೆಂ ಜಾಲೆ ಮುಣೊನ್ ಜವಾಬ್ ದೀಂವ್ಕ್ ಸಾಧ್ಯ್ ಆಸಾಗೀ ?
ಹಾಂಗಾ ಮ್ಹಾಕಾ ಚಾಪ್ರಾಚ್ಯಾ ಉತ್ರಾಂಚೊ ಉಗ್ಡಾಸ್ ಯೆತಾ. ಚಾಪ್ರಾ ಮುಣ್ತಾ “ಹ್ಯಾ ಗೊಂಯ್ಚ್ಯಾ ಸಾರಸ್ವತ್ ಲೊಕಾಚ್ಯಾ ರಗ್ತಾಂತ್ ವ್ಯಾಪಾರ್ ಆಸ್ಲೊ. ರಾವ್ಳೆರಾಚೊ ಪಾಟಿಂಬೊ ಆಸ್ಲೊ. ಗಿರೆಸ್ತ್ಕಾಯ್ ತಾಂಚ್ಯಾ ಮುಟಿಂತ್ ಆಸ್ಲಿ. ಹೆಂ ಸರ್ವ್ ಉರೊಂವ್ಚ್ಯಾ ಖಾತಿರ್ ತೆ ಗೊಂಯಾಂ ಸೊಡ್ನ್ ಧಾಂವ್ಲೆ ಶಿವಾಯ್ ಹೆರ್ ಖಂಚಾಯ್ ಮೊಗಾನ್ ನ್ಹಂಯ್. ಕನ್ವೆಡ್ತರ್ ತಾಂಕಾಂ ಜಾಂವ್ಚಿ ಗರ್ಜ್ ಆಸ್ಲಿ ತರ್ ಗೊಂಯಾಂತ್‌ಚ್ ಕನ್ವೆಡ್ತರ್ ಜಾವ್ನ್ ಥಂಯ್ಚ್ ರಾವ್ಯೆತ್ ಆಸ್ಲೆಂ ನ್ಹಂಯ್ಗೀ ? ಮಂಗ್ಳೂರ್ ಪಾವ್ಲ್ಯಾ ಉಪ್ರಾಂತ್ ಕನ್ವೆಡ್ತರ್ ಜಾಯ್ಜೆ ಮುಣೊನ್ ಕಿತ್ಯಾಕ್ ಭಗ್ಲೆಂ ?”
ಇಂಕ್ವಿಜಿಸಾಂವಾಂ ವಿಶ್ಯಾಂತ್ ಸಮ್ಜೊಂಕ್ ಆನಿ ಆರ್ಥ್ ಕರ್ನ್ ಕಾಣ್ಘೇಂವ್ಕ್ ಸಭಾರಾಚೆ ಸಭಾರ್ ವಿಶಯ್ ಆಸಾತ್ ತರೀ ಆಮ್ಚೆಂ ಧರ್ಮ್ ಶಾಸ್ತೀರ್ ಆಮ್ಕಾಂ ಶಿಕಯ್ತಾ ಆಂಕ್ವಾರ್ ಸಾಯ್ಭಿಣ್ , ದು:ಖಿ ಸಾಯ್ಭಿಣ್ , ಮಿಲಾರ್ ಸಾಯ್ಭಿಣ್ , ರುಜಾರ್ ಸಾಯ್ಭಿಣ್ , ಕೊಶೆಸಾಂವ್ ಸಾಯ್ಭಿಣ್ ಹಿಂ ಸರ್ವ್ ಆಂಕ್ವಾರ್ ಸಾಯ್ಭಿಣಿಚಿಂಚ್ಚ್ ವಿವಿಧ್ ರುಪಾಂ ಮುಣೊನ್. ತರ್ ಹೊ G.S.B. ಲೋಕ್ ಆಯ್ಲ್ಯಾ ಉಪ್ರಾಂತ್‌ಚ್ ಆಂಕ್ವಾರ್ ಸಾಯ್ಭಿಣಿಚೆಂ ಯೆಣೆಂ ಜಾಲ್ಲೆಂ ಮುಣೊನ್ ಪಾತ್ಯೆಜೆಗೀ ?
ಆಶೆಂ ತಜ್ವಿಜ್ ಕರುನ್ ಪಳೆಂವ್ಕ್ ಗೆಲ್ಯಾರ್ ತೆ ಫೊಳ್ನ್ ಧಾಂವ್‌ಲ್ಲೆ ಕೊಂಕ್ಣೆಚ್ಯಾ ಮೊಗಾನ್ ಯ್ಯಾ ಕೊಂಕ್ಣಿ ಮಾಯೆಚ್ಯಾ ಮೊಗಾನ್ ಖಂಡಿತ್ ನ್ಹಂಯ್ ಬಗಾರ್ ತಾಂಚ್ಯಾ ವ್ಯಾಪಾರಿ ಮನೋಭಾವಾಚ್ಯಾ ಮೊಗಾಂತ್ ಮುಣೊನ್ ಸಾಂಗೊಂಕ್ ಮ್ಹಾಕಾ ಕಾಂಯ್ ದಾಕ್ಷೆಣ್ ಭಗಾನಾ. ಆನ್ಯೇಕ್ ಸವಾಲ್ ಮ್ಹಾಕಾ ಉದೆತಾ. ತ್ಯಾ ಕಾಳಾರ್ ವೀಲ್ ಪದ್ದತಿ ಆಸ್‌ಲ್ಲಿಗೀ ? ಆಸ್‌ಲ್ಲಿ ತರ್ ತಾಚೊ ವಾಯ್ದೊ ಕಿತ್ಲೊ ? ಆನಿ ಸಗ್ಳೆಂ ಆಸ್ಲೆಂ ತರೀ ಪಿಳ್ಗ್ಯಾಂ ಉಪ್ರಾಂತ್ ಹಿ ಆಸ್ತ್ ಆಶಿ ಕಿತೆಂಚ್ ದಾಖ್ಲೊ ನಾಸ್ತಾನಾ ಹಸ್ತಾಂತರ್ ಕರುಂಕ್ ಸಾಧ್ಯ್‌ಗೀ ?
ಆಶೆಂ ಬೆಜಾರಾಯೆನ್ ಮ್ಹಾಕಾ ಸಾಂಗಾಜೆ ಪಡ್ತಾ ಹ್ಯಾ ಪಿಂತುರಾಚಿ ಕಾಣಿ ಏಕ್ ಸ್ಪಷ್ಟ್ ಉದ್ದೇಶ್ ಮುಖಾರ್ ದವರುನ್ ರಚ್‌ಲ್ಲಿ “ಪ್ರೊಪಾಗಾಂಡಾ ಫೈಲ್ಸ್” ಸೊಡ್ಲ್ಯಾರ್ ಹೆರ್ ಕಿತೆಂಚ್ ನ್ಹಂಯ್. ತರ್ Right Wings ಹಾಂಚ್ಯಾ ತತ್ವಾಂನಿ ಬೊರಯ್ಲಿ ಹಿ ಕಾಣಿ ಕೊಣಾಕ್ Impress ಕರುಂಕ್ ? ಕೇಸರಿ ಭಕ್ತಾಂಕ್ ? ತಾಂಚ್ಯಾ ಮುಖೆಲ್ಯಾಂಕ್ ಯ್ಯಾ ಖಾಡಿಯಾಳ್ಯಾಕ್ ? ವ್ಹಾ ಪ್ರಶಸ್ತೆಕ್ ಲಾಗೊನ್ ? ಪ್ರಶಸ್ತೆ ಲಾಗೊನ್ ತರ್ ಹಿ ಕುಸ್ತಿ ಕರ್ಚಿ ಕಿತೆಂಚ್ ಗರ್ಜ್ ನಾತ್ಲಿ. ಕಿತ್ಯಾಕ್ ಮುಳ್ಳ್ಯಾರ್ ಹ್ಯಾ ವರ್ಸಾ ಹೆರ್ ಕೊಂಕ್ಣಿ ಪಿಂತುರಾಂ ಪ್ರದರ್ಶಿತ್ ಜಾವ್ನಾಂತ್ ಆಸ್ತಾಂ ಕೊಂಕ್ಣಿ ವಿಭಾಗಾಂತ್ ಆತ್ಯುತ್ತಮ್ ಪ್ರಾದೇಶಿಕ್ ಪಿಂತುರ್ ಮುಳ್ಳಿ ಪ್ರಶಸ್ತಿ ಹಾಕಾಚ್ ಮೆಳ್ತಾ ತೆಂ ಶೆಂಭರ್ ಠಕ್ಕೆ ಸತ್ ಜಾವ್ನಾಸಾ. ಒಟ್ಟಾರೆ ಇತ್ಲೆಂ ಮಾತ್ರ್ ಸತ್ ಜಾವ್ನಾಸಾ ಕಿ ಕಥೊಲಿಕ್ ಭಾವಾಡ್ತ್ ಪಾಳ್ಚ್ಯಾ ಮುಖ್ಲ್ಯಾ ಪಿಳ್ಗೆಕ್ ಹೆಂ ಪಿಂತುರ್ ಮಾತ್ರ್ ಬೊರೊ ಸಂದೇಶ್ ದೀನಾ.
ಆತಾಂ “ಆಸ್ಮಿತಾಯ್” ಎಕ್ ಪಿಂತುರ್ ಜಾವ್ನ್ ಪಳೆತಾಂ. ಪಯ್ಲ್ಯಾನ್ ಪಯ್ಲೆಂ ಹ್ಯಾ ಪಿಂತುರಾಂತ್ ಕಲಾಕರಾಂಚಿ ರಾಸ್‌ಚ್ ಭರೊನ್ ಗೆಲ್ಯಾ. ಬಹುಷಾ: ಚಿತ್ರ್ ಪಂಗ್ಡಾನ್ ಸಕ್ಡಾಂಕ್ ಆವ್ಕಾಸ್ ದೀಜೆ ಮುಳ್ಳ್ಯಾ ಉದ್ದೇಶಾನ್ ಹೊ ಏಕ್ ಪ್ರಯೋಗ್ ಕೆಲಾ ಆಸೊಂಕೀ ಪುರೊ. ಪುಣ್ ಹ್ಯಾ ಪ್ರಯತ್ನಾಂತ್ ಯಶಸ್ವಿ ಜಾಂವ್ಕ್ ನಾ ಮುಣೊನ್ ಮ್ಹಾಕಾ ಭಗ್ತಾ. ನಿರ್ದೇಶಕಾಚಿ ಸಲ್ವೊಣಿ ಮ್ಹಾಕಾ ಉಟೊನ್ ದಿಸ್ತಾ ದೋನ್ ಕಾರಣಾಂ ಸಂಗಿಂ. ಪಯ್ಲೆಂ ತಾಕಾ ಚಲನ್ ಚಿತ್ರ್ ನಿರ್ದೇಶನಾಚೊ ಆನ್ಭೊಗ್ ನಾ ಯ್ಯಾ ಚಿತ್ರ್ ಪಂಗ್ಡಾನ್ ತಾಕಾ ಸಂಪೂರ್ಣ್ ಸ್ವಾತಂತ್ರ್ಯ್ ದೀಂವ್ಕ್ ನಾ. ಕಾಂಯ್ ನಟನ್ ಕಲಾಕರಾಂ ಥಾವ್ನ್ ಆಯ್ಲಾಂ ತರ್ ತೆಂ ತಾಂಚ್ಯಾ ಗ್ರೇಸ್ತ್ ನಾಟಕ್ ಆಭಿನಯಾಚ್ಯಾ ಆನ್ಭೊಗಾನ್ ಶಿವಾಯ್ ನಿರ್ದೇಶಕಾಚ್ಯಾ ಪ್ರಯತ್ನಾಂತ್ ಖಂಡಿತ್ ನ್ಹಂಯ್. ಡೆನಿಸ್ ಮೊಂತೆರೊಚೆಂ ನಟನ್ ಆನಿ ತಾಚೊ ಪಾತ್ರ್ ಉಂಚ್ಲೊ. ಪಿಂತುರಾಚೊ ನಾಯಕ್‌ಚ್ ತೊ ಮುಣೊನ್ ಸಾಂಗ್ಲ್ಯಾರ್ ಚೂಕ್ ಜಾಂವ್ಚಿ ನಾ ತರೀ ಆಮ್ಚೆ ಮಾಲ್ಘಡೆ ಕೊಂಕ್ಣಿ ಖಾತಿರ್ ಝುಜ್ಲೆ , ಜೀವ್ ದಿಲೊ ಮುಣೊನ್ ಇತಿಹಾಸ್ ಸಾಂಗ್ತಾ ತರ್ ಸಿಮಾಂವ್ ಮಾತ್ರ್ ಸಗ್ಳ್ಯಾಂ ಥಾವ್ನ್ ಪಯ್ಸ್ ಗುಡ್ಯಾ ವಯ್ರ್ ಕಿತ್ಯಾಕ್ ರಾವೊನ್ ಆಸ್ಲೊ ಮುಳ್ಳೆಂ ಮ್ಹಾಕಾ ಸಮ್ಜಾನಾ.
ಬಾಲ್ತು ಪೈಚ್ಯಾ ಘರಾ ರೊಸಾ ದಿಸಾ ಜಾಂವ್ಚೆಂ ಘಡಿತ್ ನಿರ್ದೇಶಕಾಚ್ಯಾ ನಾ ಸಮ್ಜೊಣೆಕ್ ಉಕ್ಲುನ್ ಧರ್‌ಲ್ಲೊ ಆರ್ಸೊ. ಥಂಯ್ ರೊಸಾಕ್ ಬಸ್ಚ್ಯಾ ಪಯ್ಲೆಂ ಕಿತೆಂ ಸರ್ವ್ ಉಪಯೋಗ್ ಕರುಂಕ್ ನಾ ತೆಂ, ರೊಸಾಚಿ ಪ್ರಾಮುಖ್ಯತಾ ಸಮ್ಜೊವ್ನ್ ಮೊಗಾನ್ ಸಾಂಗ್ಯೆತ್ ಆಸ್ಲೆಂ. ಉಪ್ರಾಂತ್ ಬೊಬಾಟ್ ಮಾರ್ಚಿ ಕಿತೆಂಚ್ ಗರ್ಜ್ ನಾತ್ಲಿ. ಕೊಣಿ ಜಾಲ್ಯಾರೀ ತೆ ಆಪ್ಲೆ ಸಯ್ರೆಚ್ಚ್. ಆನಿ ತಾಂಕಾಂ ಮರ್ಯಾದ್ ದಿಂವ್ಚಿ ಆತಾಂ ತರೀ ಪದ್ದತ್ ಆಸಾ.
ನೆಲ್ಲು ಪೆರ್ಮನ್ನೂರ್ ಏಕ್ ಪ್ರಭುದ್ದ್ ಕಲಾಕಾರ್. ಹರ್ಯೆಕ್ ಪೌವ್ಟಿಂ ಹಾಸ್ಯ್ ಪ್ರಧಾನ್ ಪಾತ್ರ್ ಖೆಳ್ಚ್ಯಾ ನೆಲ್ಲುನ್ ಹ್ಯಾ ಪೌವ್ಟಿಂ ವಿಲನ್ ಜಾವ್ನ್ ಬೊರೆಂಚ್ ನಟನ್ ಕೆಲಾಂ ತರೀ ನಿರ್ದೇಶಕಾನ್ ತಾಕಾ ಸಾರ್ಕ್ಯಾ ರಿತಿನ್ ಉಪಯೋಗ್‌ಚ್ ಕರುಂಕ್ ನಾ. ಎಕ್ ಬಚ್ಚಾಲಿ ಗೂಂಡಾಚ್ಯಾಕಿ ನಿಕೃಷ್ಟ್ ರಿತಿನ್ ತಾಕಾ ಪಿಂತ್ರಾಯ್ಲಾಂ. ಹರ್ಯೆಕಾ ದ್ರಶ್ಯಾಂನಿ Beer ಬೊತ್ಲ್ಯೊ ಘೆವ್ನ್ ಭೊಂವ್ಚ್ಯಾ ಪಾಟ್ಲೊ ಉದ್ದೇಶ್ ಕಿತೆಂ ಮುಣೊನ್ ಆನಿಕೀ ಮ್ಹಾಕಾ ಸಮ್ಜೊಂಕ್ ನಾ. ಕ್ರೀಸ್ತಾಂವಾಂಚೊ ಭಾಯ್ಲೊ ಘುರ್ತ್ ಸೊರೊ ಆನಿ ದುಕ್ರಾ ಮಾಸ್ ಮುಣೊನ್ ದಾಕೊಂವ್ಕ್ ಗೀ ?
ಡೊಲ್ಲಾ ಆಮ್ಚೊ ಮಾಲ್ಘಡೊ ಕಲಾಕರ್. ತಾಕಾ ಎಕ್ ಬೊರೊ ಪಾತ್ರ್ ದಿವ್ಯೆತ್ ಆಸ್ಲೊ. ತೊ ದಿನಾಸ್ತಾನಾ ರಸ್ತ್ಯಾ ದೆಗೆಚ್ಯಾ ಆಂಗ್ಡಿಗಾರಾಚೊ ಪಾತ್ರ್ ದಿಲಾ. ತೊ ಪಾತ್ರ್ ಆನಿ ಘಡಿತ್ ಇತ್ಲೆಂ ಹಾಸ್ಯಾಸ್ಪದ್ ಜಾಲಾಂಗಿ ಮ್ಹಾಕಾ ಡೊಲ್ಲಾಚಿಚ್ ಭಿರ್ಮತ್ ದಿಸ್ತಾ. ನಾಯಕ್ ರೋಶನ್ ಮಿನೆಜಸ್ ಕಾಮತ್ ಹಾಚ್ಯಾ ಗಾಡಿಯೆ ಥಾವ್ನ್ ದೆಂವ್ತಾ ಆನಿ ಬಾಲ್ತು ಪೈಚೆಂ ಘರ್ ಖಂಯ್ ಮುಣೊನ್ ವಿಚಾರ್ತಾ. ಹಾಂಗಾ ಬಾಲ್ತು ಪೈನ್ಂಚ್ ತಾಚ್ಯಾ ಡ್ರೈವರಾಕ್ ಧಾಡ್ಲಾಂ ನಾಯಕಾಕ್ ಘರಾ ಆಪೊವ್ನ್ ಹಾಡುಂಕ್ ತಶೆಂ ಆಸ್ತಾಂ ಕೇವಲ್ ಡೊಲ್ಲಾಕ್ Accomodate ಕರುಂಕ್ ಘಡ್‌ಲ್ಲೆಂ ಘಡಿತ್ ಕಿತ್ಲೆಂ ಹಾಸ್ಯಾಸ್ಪದ್ ಮುಣೊನ್ ತುಮಿಂಚ್ ಚಿಂತುನ್ ಪಳೆಯಾ. ಹಾಂಗಾ ಡೊಲ್ಲಾ ಆನಿ ಹೆರ್ ಕಲಾಕಾರಾಂನಿ ಚಿಂತುಂಕ್ ಪಳೆಂವ್ಕ್ ಜಾಯ್. ಆವ್ಕಾಸ್ ಮೆಳ್ಳೋ ಮುಣೊನ್ ಧಾಂವ್ಚೆಂ ನಂಯ್. ಡೊಲ್ಲಾಕ್ ಸರ್ವ್ ಕಲಾಪ್ರೇಮಿಂಚ್ಯಾ ಕಾಳ್ಜಾಂತ್ ವಿಶೇಸ್ ಜಾಗೊ ಆಸಾ.
ನಾಯಕ್ ನಟ್ ಆಶ್ವಿನ್ ಲಾಗಿಂ ಜಾಯ್ತೆಂ ನಟನಾಚೆಂ ದೆಣೆ ಆಸಾ. ತೆಂ ಬಿಲ್ಕುಲ್ ಭಾಯ್ರ್ ಕಾಡುಂಕ್‌ಚ್ ನಾ. ಕ್ಲೈಮ್ಯಾಕ್ಸ್ ದೃಶ್ಯ್ ಖಂಚಾಯ್ ಪಿಂತುರಾಚೊ ಆತ್ಮೊ. ಪುಣ್ ಹ್ಯಾ ಪಿಂತುರಾಂತ್ಲೆಂ ಕ್ಲೈಮ್ಯಾಕ್ಸ್ ದ್ರಶ್ಯ್ ಖಂಚಾಯ್ “ಬಲೆ ತೆಲಿಪಾಲೆ” ಎಪಿಸೊಡಾಕ್ ಉಣೆಂ ನಾ. ನಾಯಕಾಕ್ ಹಾಂಗಾ ಬಿಲ್ಕುಲ್ Stand Up Comedian ತಸೊ ಉಬೊ ಕೆಲಾ. ನಾಯಕಿಚೆಂ ಕಾಮ್ ತೊಂಡಾರ್ ಹಾಸೊ ದಿಂವ್ಚ್ಯಾಕ್‌ಚ್ ಸೀಮಿತ್ ಕೆಲಾಂ. ಆಮೇರಿಕಾಂತ್ ಲ್ಹಾನ್ ವ್ಹಡ್ ಜಾಲ್ಲೊ ನಾಯಕ್ ಕೊಡಿಯಾಳ್ ದೆಂವ್‌ಲ್ಲೊಚ್ ಆಪುಟ್ ಕೊಂಕ್ಣಿ ಉಲಯ್ತಾ ಹೆಂ ಕೊಣಾಚೆಂ ಆಜ್ಯಾಪ್ ತೆಂ ಮ್ಹಾಕಾ ಎದೊಳ್ ಸಮ್ಜೊಂಕ್ ನಾ. ಪಿಂತುರಾಂತ್ ಸಾಂಗ್ಲಾಂ ಆಮ್ಚೆ ಪೂರ್ವಜ್ ಗೊಂಯಾಂ ಥಾವ್ನ್ ಆಯಿಲ್ಲೆ ಮುಣೊನ್. ತಶೆಂ ಆಸ್ತಾಂ ನಾಯಕಾಚ್ಯಾ ಪೂರ್ವಜಾಂಚ್ಯೊ ಸಭಾರ್ ತಕ್ಲ್ಯೊ ಮಂಗ್ಳೂರಾಂತ್‌ಚ್ ಆಸಾತ್ ಮುಣ್ಚ್ಯಾಕ್ ಕಿತೆಂಚ್ ದುಭಾವ್ ನಾ. ತಶೆಂ ಆಸ್ತಾಂ ನಾಯಕ್ ತಾಂಚಿಂ ಸೊದ್ನಾಂ ಕರಿನಾಸ್ತಾನಾ ಶೀದಾ ಗೊಯಾಂ ಧಾಂವ್ಲೊ ಕಿತ್ಯಾಕ್ ಪಾಸೊತ್ ? ಹಾಚಿ ಖೊಬರ್ ಸಿಮಾಂವ್ ತಶೆಂಚ್ ಬಾಲ್ತು ಪೈಕ್ ಕಳಿತ್ ನಾತ್ಲಿಗೀ ?
ಆಶೆಂ ಚೂಕಿ ದಾಕಯ್ತ್ ಗೆಲ್ಯಾರ್ ಆಖೇರ್ ಜಾಂವ್ಚೆಂ ನಾ. ಕಿತ್ಯಾಕ್ ಮುಳ್ಳ್ಯಾರ್ ಕಾಣಿ ಬರಯಿಲ್ಲ್ಯಾನ್ ಆನಿ ನಿರ್ದೇಶಕಾನ್ ಕಾಣಿಯೆ ವಯ್ರ್ ಜಾಂವ್ದಿ , ಸಂಸ್ಕ್ರತೆ ವಯ್ರ್ ಜಾಂವ್ದಿ ಕಿತೆಂಯ್ ಕಾಮ್ ಕರುಂಕ್ ನಾ ತೆಂ ಉಟೊನ್ ದಿಸ್ತಾ. ಹಾಂಗಾ ನಿರ್ದೇಶಕಾ ವಯ್ರ್ ರಾಗ್ ಕರುಂ ಯ್ಯಾ ತಾಚಿ ಭಿರ್ಮೊತ್ ಪಾವೊಂ ತೆಂ ಮ್ಹಾಕಾಚ್ಚ್ ಕಳಿತ್ ಜಾಯ್ನಾ.
ಖಂಚಾಯ್ ಪಿಂತುರಾಚ್ಯಾ ಯಶಸ್ವೆಕ್ ಬಳಿಷ್ಟ್ ಪಾತ್ರ್ ಖೆಳ್ತಾ ಕ್ಯಾಮೆರಾ ಮೆನ್. ಪುಣ್ ಹ್ಯಾ ಪಿಂತುರಾಂತ್ ಕ್ಯಾಮೆರಾ ಮೆನಾಚೆಂ ಕಾಮ್ ಕೇವಲ್ ಸ್ವಿಚ್ ಚಾಲು ಕರ್ಚಿ ತಶಿ ದಿಸ್ತಾ. ಪ್ರಕೃತೆ ಸಂಗಿಂ ಖೆಳೊನ್ ಪಿಂತುರಾಚಿ ಸೊಭಾಯ್ ವಾಡೊಂವ್ಕ್ ಕ್ಯಾಮೆರಾ ಮೆನಾಕ್ ಜಾಯ್ತೆ ಆವ್ಕಾಸ್ ಆಸ್ಲೆ. ಪ್ರಕೃತೆ ಸಂಗಿಂ ಕಶೆಂ ಖೆಳ್ಯೆತ್ ಮುಣ್ಚ್ಯಾಕ್ ಆರ್ವಿಲ್ಯಾ ಮಹಿನ್ಯಾಂನಿ ಪ್ರದರ್ಶನಾಂಕ್ ಪಡ್ಲ್ಲೆಂ “ಕುದ್ರು” ಪಿಂತುರ್ ಆತ್ಯುತ್ತಮ್ ಉದಾಹರಣ್. ಚಡ್ ಕಿತ್ಯಾಕ್…..ಆಮ್ಚೆಚ್ ತರ್ನಾಟೆ ಡೆನಲ್ ಜೈಸನ್ ( ಡೊಲ್ಲಾಚೊ ಪುತ್) , ಜೊಯಲ್ ಶಮನ್ ಡಿ’ಸೋಜಾ ಹ್ಯಾ ಭುರ್ಗ್ಯಾಂಚಿ ಪೊಟೊಗ್ರಾಫಿ ಥೊಡ್ಯಾ ವಿಡಿಯೊ ಪದಾಂನಿ ಪಳೆಯಾ. ತಾಂಚ್ಯಾ ಫೊಟೊಗ್ರಾಪಿಂತ್‌ಚ್ ಜಾಯ್ತೆ ವಿಡಿಯೊ ಚಡ್ತಿಕ್ ಯಶಸ್ವಿ ಜಾಲ್ಯಾತ್. ಮಾಂಡೊ ಆನಿ ದೆಖ್ಣಿಚೆಂ ದೃಶ್ಯ್ ಪಳೆಯಾ ಯ್ಯಾ ಪ್ರಿನ್ಸ್ ಜಾಕೊಬಾಚ್ಯಾ ಘರ್ಚ್ಯಾ ಸೊಫ್ಯಾರ್ ಫ್ರಿನ್ಸ್ ಜಾಕೊಬ್ , ನಾಯಕ್ ಆನಿ ನಾಯಕಿ ಹಾಂಚೆ ಮದೆಂ ಜಾಂವ್ಚೆಂ ಉಲೊವ್ಣೆಂ ಪಳಯಾ. ಹಿಂಚ್ಚ್ ದೋನ್ ಘಡಿತಾಂ ಕ್ಯಾಮೆರಾಮೆನಾಚ್ಯಾ ಆನ್ಭೊಗಾಕ್ ಸಾಕ್ಶಿ ಜಾವ್ನ್ ಪಾವ್ತಾತ್. ಥೊಡ್ಯಾ ಪೌವ್ಟಿಂ ಮ್ಹಾಕಾ ಭಗ್ತಾ ನಿರ್ದೇಶಕಾಕ್ ಆನಿ ಕ್ಯಾಮೆರಾಮೆನಾಕ್ ಹೆಂ ಪಿಂತುರ್ “ಮಂಗನ ಕೈಯಲ್ಲಿ ಮಾಣಿಕ್ಯ” ಮೆಳ್‌ಲ್ಲ್ಯಾಬರಿ ಜಾಲಾಂ.
ಹ್ಯಾ ವಿಭಾಗಾಂನಿ ಮ್ಹಾಕಾ ಖಂಡಿತ್ ಉಗ್ಡಾಸ್ ಯೆತಾ Harry Fernandes Barkur ಹಾಚೊ. ತೊ ಮೊಜೊ ಈಷ್ಟ್ ವ್ಹಯ್ ತರೀ ತಾಚ್ಯಾ ಪಿಂತುರಾಂಚ್ಯಾ ಕಾಣಿಯಾಂಚೊ ಹಾಂವ್ ಕಾಂಯ್ ಆಭಿಮಾನಿ ನ್ಹಂಯ್. ಪುಣ್ ತಾಚಿ Technical Knowledge, Continuity ಸಾಂಬಾಳ್ಚ್ಯಾಂತ್ ತಾಚಿ ಜಾಗ್ರುತ್ಕಾಯ್ ಹಾಚೊ ಹಾಂವ್ ವ್ಹಡ್ ಆಭಿಮಾನಿ. ಕಾಂಯ್ ತಾಚೊ ಆನ್ಭೊಗ್ ಘೆತ್‌ಲ್ಲೊ ತರ್ ಪಿಂತುರ್ ಸೊಭ್ತೆಂ ಆಸ್ಲೆಂ.
ಹ್ಯಾ ಪಿಂತುರಾಕ್ ಕಾಂಯ್ ಇಲ್ಲೆಶೆಂ ಧರ್ನ್ ಬಸಾಯ್ಲಾಂ ತರ್ ತೆಂ Cajetan Dias ಹಾಚೆಂ ಸಂಗೀತ್ , ಮಧುರ್ ಪದಾಂಚೆಂ ಸಾಹಿತ್ಯ್ ಆನಿ ತಿಂ ಪದಾಂ ಗಾಯ್ಲೆಲಿಂ ಗಾಯಕ್ ಆನಿ ಗಾಯಕಿ. ತಾಂಚ್ಯಾ ಕಾಮಾಂಕ್ ಚೆಪೆಂ ಉಕ್ಲಿನಾ ತರ್ ಹಾಂವ್ ಚುಕಿದಾರ್ ಜಾಂವ್ಕ್ ಆಸಾಂ. ಸಂಪೂರ್ಣ್ ಸಂಗೀತ್ ಪಂಗ್ಡಾಕ್ ಮೊಜೆ ಉಲ್ಲಾಸ್.
ಆಶೆಂ ಸರ್ವಾಂಯ್ ಕುಶಿಂನಿ ಹ್ಯಾ ಪಿಂತುರಾಂತ್ ಉಬಿ ಜಾಲ್ಲಿ ಗುಸ್ಪೊಡ್ ಗೊಂದೊಳ್ ಆನಿ ಪಿಂತುರಾಚ್ಯಾ ನಿರ್ಮಾಣಾಚಿ Quality ಪಳೆತಾನಾ ಹಾವೆಂ ಆದಿಂ ಸಾಂಗ್ಲ್ಲ್ಯಾ ಬರಿ ಮಾಂಡ್ ಸೊಭಾಣ್ ಸಂಸ್ಥ್ಯಾನ್ ಯ್ಯಾ ಮಾನೇಸ್ತ್ ಎರಿಕ್ ಒಝೆರಾನ್ ಕೊಂಕ್ಣೆಚಿ ಸಂಸ್ಕ್ರತಿ ವಾ ಆಸ್ಮಿತಾಯ್ ಹಾಚೆಂ ಪ್ರದರ್ಶನ್ ಕರ್ಚ್ಯಾಕಿ ಆಪ್ಲೆಂ Hidden Agenda ಪ್ರದರ್ಶನ್ ಕೆಲಾಂ ಮುಣ್ಚ್ಯಾಕ್ ಮ್ಹಾಕಾ ಕಾಂಯ್ ದುಭಾವ್ ನಾ. ಸದ್ದ್ಯಾಚಿ ಆಮ್ಚಿ ದೇಶಾಚಿ ರಾಜಕಿಯ್ ಪರಿಗತ್ ಪಳೆತಾನಾ ಕ್ರೀಸ್ತಾಂವಾಂ ವಯ್ರ್ ಆನ್ವಾರಾಂಚೆ ದೀಸ್ ಪಯ್ಸ್ ನಾಂತ್ ಮುಣ್ಚ್ಯಾಕ್ ಕಿತೆಂಚ್ ದುಭಾವ್ ನಾ. ತರ್ ತಸಲ್ಯಾ ಪರಿಸ್ಥಿತೆಕ್ ಜವಾಬ್ಧಾರ್ಪಣ್ ಕೋಣ್ ಕಾಣ್ಘೆತಾ ? ಮಾಂಡ್ ಸೊಭಾಣ್ ಸಂಸ್ಥೊ ? ಸ್ವಕಲ್ಪಿತ್ ಬೊರಯಿಲ್ಲೊ ಮಾನೇಸ್ತ್ ಎರಿಕ್ ಒಝೆರ್ ? ವಾ ಕೊಂಕ್ಣೆಚೊ ಇತಿಹಾಸ್ ಕಿತೆಂ ಮುಣೊನ್ ಬಿಲ್ಕುಲ್ ಕಳಿತ್ ನಾಸ್ತಾಂ ವ್ಹಾ ವ್ಹಾ ಮುಣೊನ್ ಹೆರ್ ಲೊಕಾಂಕ್ ಪಳೆಂವ್ಕ್ ಉಲೊ ದಿಲ್ಲೆ ಆಮ್ಚೆ ಧಾರ್ಮಿಕ್ ಮಣಿಯಾರಿ ?
ಕೊಂಕ್ಣೆಚಿ ಆಸ್ಮಿತಾಯ್ ದಾಕೊಂವ್ಚೆಂ ಪ್ರಯತ್ನ್ ವ್ಹಯ್ ತರ್ ಕೊಂಕ್ಣಿ ರಾಜ್ ಭಾಸ್ ಜಾವ್ನಾಸ್ಚ್ಯಾ ಗೊಂಯಾಂತ್ ಹೆಂ ಪಿಂತುರ್ ಕಿತ್ಲ್ಯಾ ಘರಾಂನಿ ಪಾವ್ಲಾಂ ? ಹಾಂಗಾಚ್ಯಾಚ್ ಆಮ್ಚ್ಯಾ ಹೆರ್ ಧರ್ಮಾಚ್ಯಾ ಕೊಂಕ್ಣಿ ಘರಾಣ್ಯಾಂನಿ ಹೆಂ ಪಿಂತುರ್ ಪಾವ್ಲಾಂಗಿ ? ಕೊಂಕ್ಣೆಚಿ ಆಸ್ಮಿತಾಯ್ ಕೇವಲ್ ಮಂಗ್ಳೂರಿ ಕಥೊಲಿಕಾಂಕ್ ಮಾತ್ರ್ ಸೀಮಿತ್‌ಗೀ ? ಆಮ್ಚೊ ಲೋಕ್ ಪಾದ್ರ್ಯಾಬಾಂನಿ ಕಿತೆಂ ಸಾಂಗ್ಲ್ಯಾರಿ ಆಮೆನ್ ಮುಣ್ತಾ ಮುಣೊನ್ ಬೊರ‍್ಯಾನ್ ಕಳಿತ್ ಆಸ್‌ಲ್ಲ್ಯಾ ಮಾಂಡ್ ಸೊಭಾಣಾಚ್ಯಾ ಕಾರ್ಭಾರ‍್ಯಾಂನಿ ಪಾದ್ರ್ಯಾಬಾಂಕ್ ಆನಿ ಧರ್ಮ್ ಭಯ್ಣ್ಯಾಂಕ್ Scape Goat ಕೆಲಾಂ ಆನಿ ಆಮ್ಚ್ಯಾ ಲೊಕಾಕ್ ಯಶಸ್ವಿ ರಿತಿನ್ ಮಾಂಕೊಡ್ ಕೆಲಾಂ.
ಹಾವೆಂ ಹ್ಯಾ ಮೊಜ್ಯಾ ತಸಲ್ಯಾಂನಿ ಆಶೆಂ ಬೊರಯ್ಲ್ಯಾ ಫರಾ ಹೆಂ ಮೊಸ್ರಾನ್ ಬೊರಯ್ಲಾಂ ಮುಣೊನ್ ಶಿದಾ ಪೈಸಲ್ ದಿಂವ್ಚೆ ವಿಶೇಷ್ ಜ್ಞಾನಿ ಸಭಾರ್ ಆಸಾತ್. ಹಾಂವೆ ಕಿತೆಂ ಬೊರಯ್ಲಾಂ ತೆಂ ತಜ್ವಿಜ್ ಕರಿನಾಸ್ತಾನಾ – ಕೇವಲ್ ಮಾನೇಸ್ತ್ ಎರಿಕ್ ಒಝೆರಾನ್ ವೇದಿರ್ ಆಪೊವ್ನ್ ಏಕ್ ಗುಲೊಭ್ ಆನಿ ಉಲೊಂವ್ಕ್ ಮೈಕ್ ಹಾತಿಂ ದಿಲ್ಯಾರ್ ಪಾವ್ತಾ ತಾಂಕಾಂ. ಕಿತೆಂಯ್ ಉಲಾಯ್ತಾತ್. ತ್ಯಾ ದೆಕುನ್ ಹಾವೆಂ ಮಾನೇಸ್ತ್ ಎರಿಕ್ ಒಝೆರಾ ವಿಶಿಂ ಆತಾಂ ಜಾಲ್ಯಾರೀ ಸಾಂಗ್ಚೆಂ ಇತ್ಲೆಂಚ್ ತಾಣೆ ಕೆಲ್ಲಿಂ ಕಾಮಾಂ ಥೊಡಿಂ ಮ್ಹಾಕಾ ಆನಿ ಮೊಜೆ ತಸಲ್ಯಾಂಕ್ ಬೊರಿಂ ಲಾಗೊಂಕ್ ನಾಂತ್ ಆಸೊಂಕ್ ಪುರೊ. ಪುಣ್ ವೇದಿರ್ ಮೈಕ್ ಮೆಳ್‌ಲ್ಲ್ಯಾ ತಕ್ಷಣ್ ಹೆರಾಂಕ್ ಖೆಂಡುನ್ ತಿಂ ಧಾಂಪುನ್ ದವರ್ಚಿ ಗರ್ಜ್ ನಾ. ತಸಲ್ಯಾಂನಿ ಆಮಿಂ ಬೊರಯ್ಲ್ಯಾ ವಯ್ರ್ ಆಪ್ಲಿ ಪ್ರತಿಕ್ರಿಯಾ ಕೆದಾಳಾಯ್ ದಿವ್ಯೆತ್. ತೆಂ ಸೊಡ್ನ್ ವಿವಿಧ್ ಕಾರಣಾಂ ದೀವ್ನ್ ಹಾತ್ ಧುಂವ್ಚೆ ಕಿತೆಂಚ್ ಗರ್ಜ್ ನಾ.
■ ನಾನು ಮರೊಲ್ ತೊಟ್ಟಾಮ್
