“ಜಿಣ್ಯೆ ಅನ್ಬೊಗಾಥಾವ್ನ್ ಶಿಕೊನ್ ಸಾಹಿತ್ಯ್, ನಾಟಕ್, ಸಂಗೀತ್ ರಚುನ್ ಜಾಯ್ತ್ಯಾ ಸಾಹಿತಿ – ಕಲಾಕಾರಾಂನಿ ಕೊಂಕ್ಣಿ ಭಾಸ್, ಸಾಹಿತ್ಯ್ ಆನಿ ಕಲಾ ಗಿರೇಸ್ತ್ ಕೆಲ್ಯಾ. ಕೊಂಕ್ಣಿ ಭಾಶೆಚ್ಯಾ ವಾಡಾವಳೆಂತ್ ವಿಶ್ವವಿದ್ಯಾಲಯಾಚ್ಯಾ ಪಂಡಿತಾಂ ಪ್ರಾಸ್ ಚಡ್‌ಚ್ ಮ್ಹಣ್ಯೆತ್ ತಸಲೆಂ ಯೋಗ್‌ದಾನ್ ಹವ್ಯಾಸಿ ಸಾಹಿತಿ – ಕಲಾಕಾರಾಂನಿ ದಿಲಾಂ ಮ್ಹಣ್ ಮ್ಹಾಕಾ ಭೊಗ್ತಾ. ಮಾಲ್ಘಡೊ ಕಲಾಕಾರ್ ಆನಿ ನಾಟಕಿಸ್ತ್ ಎಡ್ಡಿ ಸಿಕೇರ್ ಹಾಣಿ ಪಾಟ್ಲ್ಯಾ ಸಾಟ್ ವರ್ಸಾಂನಿ ಕೊಂಕ್ಣಿ ನಾಟಕ್ ಶೆತಾಕ್ ಮಹತ್ವಾಚಿ ದೆಣ್ಗಿ ದಿಲ್ಯಾ. ಮಂಗ್ಳುರ್, ಮುಂಬಯ್ ಆನಿ ಗಲ್ಫ್ ಅಶೆಂ ವೆವೆಗ್ಳ್ಯಾ ಗಾಂವಾಂನಿ ವಸ್ತಿ ಕರುನ್, ಭರ್ಪೂರ್ ಜಿಣ್ಯೆ ಅನ್ಭೊಗ್ ಜೊಡ್ಲೆಲ್ಯಾ ತಾಣೆ ರಚ್ಲೆಲ್ಯಾ ನಾಟಕಾಂನಿ ಮಂಗ್ಳುರಿ ಕೊಂಕ್ಣಿ ಲೊಕಾಚ್ಯಾ ಜಿವಿತಾಚೆಮ್ ದರ್ಶನ್ ಪಳೆಂವ್ಕ್ ಮೆಳ್ತಾ.” ಮ್ಹಣಾಲೊ ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚೊ ಕುಲಗುರು ಮಾ| ದೊ| ಪ್ರವೀಣ್ ಮಾರ್ಟಿಸ್, ಜೆ.ಸ.
ಮಾ| ದೊ| ಮಾರ್ಟಿಸ್, ಸಹೋದಯ ಸಭಾಸಲಾಂತ್, ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚ್ಯಾ ಸಾಂ. ಲುವಿಸ್ ಪ್ರಕಾಶನಾಚೆಂ 28 ಪುಸ್ತಕ್, ಮಾಲ್ಘಡೊ ನಾಟಕಿಸ್ತ್ ಆನಿ ಕಲಾಕಾರ್ ಎಡ್ಡಿ ಸಿಕೆರ್ ಹಾಂಚೆಂ ನಾಟಕಾಂ ಪುಸ್ತಕ್ ’ನವ್ – ರಂಗ್’ ಲೊಕಾರ್ಪಣ್ ಕರುನ್ ಉಲಯ್ತಾಲೊ. ಉಗ್ತಾವಣ್ ಸುವಾಳ್ಯಾಕ್ ಮೈಕಲ್ ಡಿ ಸೊಜಾ ಟ್ರಸ್ಟ್ ಹಾಚೊ ಸಲಹಾದಾರ್ ಮಾನೆಸ್ತ್ ಸ್ಟೀಫನ್ ಪಿಂಟೊ, ಬೆಂದುರ್ ಆನಿ ಕಿಟಾಳ್ ಜಾಳಿಜಾಗ್ಯಾಚೊ ಸಂಪಾದಕ್ ಎಚ್ಚೆಮ್, ಪೆರ್ನಾಲ್ ಸಯ್ರೆ ಜಾವ್ನ್ ಹಾಜರ್ ಆಸ್ಲೆ. ಸಾಂ. ಲುವಿಸ್ ಪ್ರಕಾಶನಾಚಿ ವ್ಹಡಿಲ್ನ್ ಪ್ರೊ| ಡೊ| ವಿದ್ಯಾ ವಿನುತ ಡಿ ಸೊಜಾ, ಶ್ರೀಮತಿ ಜೋಯ್ಸ್ ಸಿಕ್ವೇರಾ ಆನಿ ಡೊ| ಜೊಯೆನ್ ಸಿಕ್ವೇರಾ ಹಾಣಿ ವೆದಿರ್ ಸಾಂಗಾತ್ ದಿಲೊ.
ಕೊಂಕ್ಣಿ ನಾಟಕ್ ಶೆತಾಂತ್ ಬಾಳ್ ಕಲಾಕಾರ್ ಜಾವ್ನ್ ಪ್ರವೇಶ್ ಜಾವ್ನ್, ಪಾರಂಪರಿಕ್ ನಾಟಕಾಂನಿ ಜೆಜು, ಜುದಾಸ್, ಖಳ್‌ನಾಯಕ್ ಅಶೆಂ ವೆವೆಗ್ಳೆ ಪಾತ್ರ್ ಖೆಳೊನ್, ಚಾ. ಫ್ರಾ. ದೆಕೊಸ್ತಾಚಿ ಸಳಾವಳ್ ಜಾಲ್ಯಾ ಉಪ್ರಾಂತ್ ಆಧುನಿಕ್ ರಂಗ್‌ಪ್ರಯೋಗ್ ಕೆಲ್ಲೆ ವಿಶ್ಯಾಂತ್ ಆಪ್ಲೆ ರೊಸಾಳ್ ಅನ್ಭೊಗ್ ಆನಿ ನಾಟಕಾಚೆ ಪಾತ್ರ್ ರಚ್ತಾನಾ ಕಸಲಿ ಆನಿ ಕಿತ್ಲಿ ಜಾಗ್ರುತ್ಕಾಯ್ ಘೆಜೆ ಪಡ್ತಾ ಮ್ಹಳ್ಳೆ ವಿಶ್ಯಾಂತ್ ಎಡ್ಡಿ ಸಿಕ್ವೇರಾನ್ ಆಪ್ಲಿ ಅಭಿಪ್ರಾಯ್ ಪೇಶ್ ಕೆಲಿ. ಸಾಂಗಾತಾ ಪುಸ್ತಕಾಂತ್ಲ್ಯಾ ಥೊಡ್ಯಾ ನಾಟಕಾಂತ್ಲಿಂ ವಿಂಚ್ಣಾರ್ ಸಂಭಾಶಣಾಂ ಉದೆಲ್ಲೆ ಸನ್ನೀವೇಶ್ ವಿವರುನ್ ಅಭಿನಯಾ ಸಾಂಗಾತಾ ಸಾದರ್ ಕೆಲಿಂ. ನಾಮ್ನೆಚಿ ಅಭಿನೇತ್ರಿ ಜೀನಾ ಬ್ರ್ಯಾಗ್ಸ್ ಹಿಣೆ ಎಡ್ಡಿ ಸಿಕೆರಿಕ್ ವಾಚನ್ ಆನಿ ಅಭಿನಯಾಂತ್ ವೆದಿರ್ ಸಾಂಗಾತ್ ದಿಲೊ. ಖ್ಯಾತ್ ನಿರ್ದೇಶಕ್ ಕ್ರಿಸ್ಟೋಫರ್, ನೀನಾಸಮ್ ಹಾಣೆ ಉಜ್ವಾಡ್, ಸಂಗೀತ್ ಆನಿ ಮಾಂಚಿ ಸಜವ್ಣೆಂತ್ ಸಹಕಾರ್ ದಿಲೊ.
ಸಾಂ. ಲುವಿಸ್ ಪ್ರಕಾಶನಾಚಿ ವ್ಹಡಿಲ್ನ್ ಪ್ರೊ| ಡೊ| ವಿದ್ಯಾ ವಿನುತ ಡಿ ಸೊಜಾ ಹಿಣೆ ಸಯ್ರ್ಯಾಂಚಿಂ ಒಳಕ್ ಕರುನ್ ದೀವ್ನ್ ಯೆವ್ಕಾರ್ ಮಾಗ್ಲೊ. ಕವಿ ಟೈಟಸ್ ನೊರೊನ್ಹಾ ಹಾಣೆ ಕಾರ್ಯೆಂ ಚಲವ್ನ್ ವೆಲೆಂ. ಎಡ್ಡಿ ಸಿಕ್ವೇರಾ ಹಾಣಿ ದಿನ್ವಾಸ್ ಪಾಟಯ್ಲೆ.
☼ ತಸ್ವಿರ‍್ಯೊ : ಸ್ಟೀವನ್ ಪಾಯ್ಸ್, ಸ್ಟುಡಿಯೊ ಓರ್ಕಿಡ್
