ಮ್ಹಜ್ಯಾ ಗಾಂವ್ಚಿ ಮಾತಿ …
ಹ್ಯೆಚ್ ಮಾತ್ಯೆನ್ ಜನಮ್ ದಿಲಾ
ಹ್ಯೆಚ್ ಮಾತ್ಯೆನ್ ಪುನವ್ ದಿಲ್ಯಾ,
ಹ್ಯೆಚ್ ಮಾತ್ಯೆನ್ ಪೋಡ್ ದಿಲಾ
ಕೊಂಕ್ಣೆಚಿ ತಿ ವೋಡ್ ದಿಲ್ಯಾ
ಹೆ ಮಾತ್ಯೆಂತ್ ಮೆಳ್ಳ್ಯಾತ್ ಕಾಂಟೆ
ಗುಲಬ್ ತಶೆಚ್ ಕಾಂಟ್ಯಾಂ ಮದ್ಲೆ
ಹ್ಯೆಚ್ ಮಾತ್ಯೆಂತ್ ಜಾವುನ್ ಜಾಂಟೆ
ನಿದ್ಲ್ಯಾತ್ ಮ್ಹಜೆ ಆದ್ಲೆ
ಮ್ಹಜ್ಯಾ ಮೊಗಾಚೊ ಮರಿಯಾಣ್ ಪಾವ್ಲ್ ರೊಡ್ರಿಗಸ್ ಜಾಚ್ಯಾ ಅತ್ಮಾಕ್ ಶಾಂತಿ ಮಾಗೊಂಕ್ ಆನಿ ತಾಚೆಂ ಆಪುರ್ಬಾಯೆಚೆಂ, ಆದರ್ಶ್ ಜಿವಿತ್ ಸಂಬ್ರಮುಂಕ್ ಆಮಿ ಆಜ್ ಜಮ್ಲ್ಯಾಂವ್, ತಾಚ್ಯಾ ಕೊಂಕ್ಣಿ ಸಾಹಿತ್ಯ್ ಭಂಡಾರಾಂತ್ಲಿ ಆಸಾ ಹಿ ಕವಿತಾ, ಮ್ಹಜ್ಯಾ ಗಾಂವ್ಚಿ ಮಾತಿ.
ಆಮ್ಚ್ಯಾ ಗಾಂವ್ಚ್ಯಾ ಮಾತ್ಯೆಚೊ ಏಕ್ ಸುಪುತ್ರ್, ಮಾನೇಸ್ತ್ ಪಾವ್ಲಾಬ್. ತೊ ಆಸಲ್ಲೊ ಏಕ್ ಆಪುರ್ಬಾಯೆಚೆಂ ಕುಟಾಮ್ ಬಾಂದ್‌ಲ್ಲೊ, ಆಪ್ಲ್ಯಾ ಕುಟ್ಮಾಚ್ಯಾ, ಸೆಜಾರ‍್ಯಾಂಚ್ಯಾ, ಸಾಂಗಾತ್ಯಾಂಚ್ಯಾ ಆನಿ ಸಮುದಾಯಾಚ್ಯಾ ಗರ್ಜಾಂಕ್ ಪಾವಲ್ಲೊ, ಸ್ಪಂದನ್ ಕೆಲ್ಲೊ ಆನಿ ತಾಚ್ಯೆ ಸಾಂಗಾತಾ ಏಕ್ ಸಾದಿ, ಖಾಲ್ತಿ ಆನಿ ಆದರ್ಶ್ ಕ್ರೀಸ್ತಿ ಜಿಣಿ ಜಿಯೆಲ್ಲೊ ಏಕ್ ಬರೊ ಮ್ಹನಿಸ್, ಏಕ್ ಉತ್ತೀಮ್ ಕವಿ ಆನಿ ಬರವ್ಪಿ.
ಆಜ್ ಪಾವ್ಲಾಬಾ ವಿಶಿಂ ಹಾಂವೆ ಕಾಂಯ್ ಉಲಯ್ಜೆ ತರ್ ತಾಕಾ ತಾಚ್ಯೆ ಕವಿತೆ ಥಾವ್ನ್ ಮೆಕ್ಳೊ ಕರ‍್ನ್ ಪಳಂವ್ಕ್ ಸಾಧ್ಯ್ ನಾ ಕಿತ್ಯಾಕ್ ತಾಚ್ಯಾ ಕವಿತೆನಿಂಚ್ ಆಸಾ ತಾಚಿ ಅಸ್ಮಿತಾಯ್, ತಾಚಿ ವಳಕ್.
ಪಯ್ಲ್ಯಾನ್ ಪಯ್ಲೆಂ ಆಮಿ ಸರ್ವ್ ಜಾಣಾಂವ್ ಆಮ್ಚೊ ಪಾವ್ಲಾಬ್, ಪಾಲಾಟ್ಟು, ಎಮ್‌ಪಿ., ತೊ ಆಸ್‌ಲ್ಲೊ ಕಾಳ್ಜಾನ್, ಮನಾನ್ ಆನಿ ಉತ್ರಾಂನಿ ಏಕ್ ಉದಾರ್ ಮನಿಸ್. ಹೆಂ ಉದಾರ್ಪಣ್ ತಾಚೆಂ ಖಂಯ್ ಥಾವ್ನ್ ಆಯ್ಲೆಂ? ತಾಚಿ ಏಕ್ ಕವಿತಾ ಅಶಿ ಆಸಾ,
ಅಂಜುರಾಚ್ಯಾ ರುಕಾ
ಖೊಲೆ ತುಜೆ ಪಾಂಗುರ‍್ನ್ ನ್ಹಂಯ್ಗಿ
ಪುರ್ವಜಾನಿ ರಾಕ್ಲಿ ಮರ್ಯಾದ್…
ತುಜ್ಯೆ ಸಾವ್ಳೆಂತ್ ಬಸುನ್ ವಾಚ್ಲಾಂ ಲಿಸಾಂವ್
ಆಸ್ಲೆಂ ತುಜೆಂ ಬೆಸಾಂವ್
ತುಜೆಬರಿ ಜಾಯ್ಜಯ್ ಹಾಂವೆಂ ಉದಾರ್ ಸದಾಂಚ್ ಹೆರಾಂ ಸವೆಂ
ಹಾವೆಂ ದೆಖ್‌ಲ್ಲೊ, ಪಾವ್ಲಾಬ್ ತಾಚ್ಯಾ ಸದಾಂಚ್ಯಾ ಜಿವಿತಾಂತ್ ಏಕ್ ನಾಜೂಕ್ ಕಾಳ್ಜಾಚೊ ಮೊವಾಳ್ ತಾಳ್ಯಾಚೊ ಸಾದೊ ಸರಳ್ ವ್ಯಕ್ತಿ ಜಾವ್ನ್ ಆಸಲ್ಲೊ. ತಾಕಾ ಪಯ್ಲೆ ಪಾವ್ಟಿಂ ಮೆಳ್‌ಲ್ಲೊ ಕೊಣೀ ತಾಚ್ಯೆ ಥಂಯ್ ಆಸಲ್ಲೆಂ ತೆಂ ಉದಾರ್ಪಣಾಚೆಂ, ಚಿಂತ್ಪಾಚೆಂ, ಜ್ನಾನಾಂಚೆಂ ಭಂಡಾರ್ ಮೆಜುಂಕ್ ಸಕ್ತೊನಾ ಕಿತ್ಯಾಕ್ ಆಪ್ಲ್ಯಾ ನಡ್ತ್ಯಾನ್ ಜಾಂವ್ ಉಲೊವ್ಪಾಂತ್ ಜಾಂವ್ ಆಪ್ಲ್ಯಾ ಹುಶಾರ‍್ಗಾಯೆಚೆಂ ಪ್ರದರ್ಶನ್ ತೊ ಕರಿನಾತಲ್ಲೊ. ಹಾಕಾ ಏಕ್ ಕಾರಾಣ್ ಆಸ್ಯೆತ್ ತೊ ಜಲ್ಮಾಲ್ಲೆಂ ಘರ್, ತಾಚಿಂ ಮಾಲ್ಘಡಿಂ ಆನಿ ಭಾಂವ್ಡಾಂ ಆನಿ ತೊ ಭೊಂವಾರ್. ಉಪ್ರಾಂತ್ ಆನ್ಯೇಕ್ ಕಾರಣ್ ಆಸ್ಯೆತ್ ತಾಣೆಂ ಆದರ್ಶ್ ಮ್ಹಣ್ ಮಾಂದಲ್ಲೆ ತೇಗ್ ಕೊಂಕ್ಣಿ ಮನಿಸ್.
ಪಯ್ಲೊ ಮೊನ್ಸಿಂಜೊರ್ ಸಿಲಾ ಮಿನೇಜ್. ತರ್ನಾಟ್ಪಣಾರ್ ಆಪ್ಣೆ ಬರಯಿಲ್ಲ್ಯೊ ಕವಿತಾ ಘೆವ್ನ್ ಮೊನ್ಸಿಂಜೊರಾಕಡೆನ್ ಗೆಲ್ಲ್ಯಾ ವೆಳಾ, ’ಹ್ಯೊ ಕವಿತಾ ನ್ಹಯ್’ ಮ್ಹಣ್ ಪಯ್ಲೆಂ ಸಾಂಗ್ಲ್ಯಾರೀ, ಉಪ್ರಾಂತ್ ತಾಣೆ ವ್ಹೆಲ್ಲ್ಯೊ ಕವಿತಾ ತಿದ್ವುನ್ ’ಭಾಶೆಚೊ, ಕವಿತೆಚೊ ಅಭ್ಯಾಸ್ ಕರ‍್ತೇ ರಾವ್, ಬರಯ್ತೇ ರಾವ್’ ಅಶೆಂ ಸಾಂಗುನ್ ತಾಕಾ ತಾಣೆ ಪ್ರೇರಿತ್ ಕೆಲ್ಲೊ ಖಂಯ್.
ದುಸ್ರೊ ಸಿರಿವಂತ್. ತೊ ಆಸ್‌ಲ್ಲೊ ಏಕ್ ನಾಜೂಕ್ ಕಾಲೆತಿಚೊ ಮನಿಸ್. ತಾಚಿಂ ಬರ್ಪಾಂ ತಾಣೆಂ ಪ್ರಕಟ್ಲೆಲಿಂ ವಿಂಚ್ಣಾರ್ ಸಾಹಿತ್ಯ್ ಆಟಾಪ್ಲೆಲಿಂ ಶೆಂಭರಾಂನಿ ಪುಸ್ತಕಾಂ, ತ್ಯಾ ಪುಸ್ತಕಾಂಚೆ ಫೊರ್, ಭಿತರ‍್ಲೆಂ ವಿನ್ಯಾಸ್ ಸರ್ವ್ ತಾಚ್ಯೆಬರಿಚ್ ನಾಜೂಕ್ ಆನಿ ಕಲಾತ್ಮಕ್. ತಾಚೊ ಭಾಶೆಚೊ ಆನಿ ಮನ್ಶಾಂಚೊ ಮೋಗ್ ಆನಿ ತ್ಯಾ ಕಾತಿರ್ ತಾಣೆ ಕೆಲ್ಲೊ ತ್ಯಾಗ್, ನವ್ಯಾ ತಶೆಂ ಹೆಳಲ್ಲ್ಯಾ ಬರವ್ಪ್ಯಾಂಕ್ ತಾಣೆಂ ದಿಲ್ಲೆಂ ಉತ್ತೇಜನ್, ತೆಂ ಸಾಂಗುಂಕ್ ಉತ್ರಾಂ ನಾಂತ್. ಹ್ಯಾ ಮಹಾನ್ ಮನ್ಶಾಚ್ಯೆ ವಳ್ಕಿನ್ ಆನಿ ಪ್ರೋತ್ಸಾವಾನ್ ಹಾಂವ್‌ಯ್ ಆಮ್ಚ್ಯಾ ಸಮುದಾಯಾಂತ್ಲೊ ಏಕ್ ಚಿತ್ರ ಕಲಾಕಾರ್ ಜಾವ್ನ್ ವಾಡ್‌ಲ್ಲೊಂ. ಸಿರಿವಂತಾಚೆಂ ತೆ ಸರ್ವ್ ಬರೆ ಗೂಣ್ ಹಾವೆಂ ಪಾವ್ಲಾಬಾಚ್ಯಾಯ್ ಜಿವಿತಾಂತ್ ದೆಖ್ಲೆ.
ತಾಚ್ಯಾ ಪಸಂದೆಚೊ ಆನ್ಯೆಕ್ಲೊ, ತೊ ಆಸಾ ವಿಲ್ಫಿ ರೆಬಿಂಬಸ್. ವಿಲ್ಫಿಚ್ಚ್ಯಾ ಪದಾಂಚ್ಯಾ ವಿಶಯಾಂಚಿ, ಉತ್ರಾಂಚಿ ಜಡಾಯ್, ತಾಳ್ಯಾಂಚಿ ಸೊಭಾಯ್, ಹಾಂಚೆರ್ ಸ್ವತಹ್ ಏಕ್ ಕವಿ ಆನಿ ಪದಾಂ ಬರವ್ಪಿ ಸಂಗೀತ್ಗಾರ್, ಗಾವ್ಪಿ ಜಾವ್ನಾಸ್‌ಲ್ಲೊ ಪಾವ್ಲಾಬ್ ಫಿದಾ ಜಾಲ್ಲೊ. ವಿಲ್ಫಿ ಆಪ್ಲ್ಯಾ ಪದಾಂ ಖಾತಿರ್ ಸಂಸಾರ್ ಭರ್ ನಾಂವಾಡ್ಲೊ ತರಿ ತಾಚ್ಯೆ ಥೈಂ ಕುಸ್ಕುಟಾಚೆಂಯ್ ಗರ್ವ್, ಹಂಕಾರ್ ವಾ ಗಮಂಡ್ ನಾತ್‌ಲ್ಲೆಂಚ್. ತೆಂ ಮೆಚ್ವೊನ್ ವಿಲ್ಫಿಚ್ಯಾ ಕೊಂಕ್ಣಿ ವಾವ್ರಾಂತ್ ಸಭಾರ್ ಪಾವ್ಟಿಂ ಗರ್ಜೆಚಿ ಮಜತ್ ಪಾವ್ಲಾಬಾನ್ ಕೆಲ್ಲಿ ಆಸಾ. ಅಶೆಂ ವಿಲ್ಫಿಕ್ ಮಾತ್ರ್ ನ್ಹಯ್, ಹೆರ್ ಸಭಾರ್ ಕೊಂಕ್ಣಿ ಕಲಾಕಾರಾಂಕ್‌ಯ್ ಪಾವ್ಲಾಬಾನ್ ಆಪ್ಲ್ಯಾ ತಾಂಕಿಚಿ ಆರ್ಥಿಕ್ ಮಜತ್ ದಿಲ್ಲಿ. ವಿಲ್ಫಿ ಅಂತರ್ಲ್ಯಾ ಉಪ್ರಾಂತ್ ಪಾವ್ಲಾಬಾನ್ ಲಿಖ್‌ಲ್ಲ್ಯಾ ಕವಿತೆಂತ್ಲಿ ಆಕೇರಿಚೊ ವೊಳಿ ಅಶ್ಯೊ ಆಸಾತ್;
ಪರತ್ ಜಲ್ಮುನ್ ಯೇ ತುಂ ವಿಲ್ಫಿ
ಕೊಂಕ್ಣೆಕ್ ಗಿರೆಸ್ತ್ ಕರುಂಕ್
ತುಜ್ಯೆಬರಿ ನಾ ಕೊಣ್ ಶಿಲ್ಪಿ
ಸದ್ದ್ಯಾಕ್ ಲೆಕಾಕ್ ಧರುಂಕ್
ಸ್ವತಹ್ ಏಕ್ ಉತ್ತೀಮ್ ಕವಿ ಆನಿ ಬರವ್ಪಿ ಆಸೊನ್ ತಾಚ್ಯಾ ಸಮಕಾಲೀನ್ ಆನ್ಯೇಕಾ ಕವಿ ವಿಶಿಂ ಎಮ್‌ಪಿ ಮ್ಹಣ್ತಾ ಕೊಂಕ್ಣೆಕ್ ಗಿರೆಸ್ತ್ ಕರುಂಕ್ ತುಜ್ಯೆಬರಿ ನಾ ಕೊಣ್ ಶಿಲ್ಪಿ. ಹೆಂ ಆಸಲ್ಲೆಂ ಪಾವ್ಲಾಬಾಚೆಂ ಖಾಲ್ತೆಪಣ್. ಹೆರಾಂ ಕಲಾಕಾರಾಂಚೆರ್, ಬರವ್ಪ್ಯಾಂಚೆರ್ ತಾಕಾ ಆಸಲ್ಲೊ ಅಭಿಮಾನ್ ಆನಿ ಮೋಗ್.
ಪಾವ್ಲಾಬಾನ್ ಪಾಟ್ಲ್ಯಾ ಸುಮಾರ್ ಧಾಚ್ಯಾಂಕೀ ಚಡಿತ್ ವರ್ಸಾಂ, ಜೆಜುಚ್ಯಾ ಕಾಳಾಚೆಂ ಆನಿ ಜಿವಿತಾಚೆಂ ಸುಕ್ಶಿಮಾಯೆನ್ ವಿಶ್ಲೇಶಣ್ ಕರುನ್, ಏಕ್ ಆಪುರ್ಬಾಯೆಚೆಂ ಬೃಹತ್ ಪುಸ್ತಕ್ ‘ದೇವ್ ಮನ್ಶಾಂತ್ ಆಯ್ಲೊ’ ಬರಂವ್ಚ್ಯಾಂತ್ ಖರ್ಚಿಲ್ಲಿಂ. ಸಭಾರ್ ವರ್ಸಾಂ ಥಾವ್ನ್, ಹೆಂ ಪುಸ್ತಕ್ ಆಪುಣ್ ಬರಯ್ತ್‌ಲೊಂ ಮ್ಹಣ್, ತ್ಯಾ ಖಾತಿರ್ ಸಭಾರ್ ತಯಾರಾಯ್ ತಾಣೆಂ ಕೆಲ್ಲಿ. ಥೊಡೆ ವಿಶಯ್ ಸಮ್ಜೊಂಕ್ ಕಷ್ಟ್ ಜಾತಾನಾ ದೇವ್‌ಶಾಸ್ತ್ರಾಂತ್ ಸನದ್ಯೊ ಆಪ್ಣಾಯಿಲ್ಲ್ಯಾ ಜಾಣಾರಿ ಯಾಜಕಾಂಥಾವ್ನ್ ತ್ಯಾ ವಿಶಿಂ ಜಾಣ್ವಾಯ್ ಜೊಡ್‌ಲ್ಲಿ. ಕಾಂಯ್ ಪಂಚ್ವಿಸಾಚ್ಯಾಂಕಿ ಚಡಿತ್ ಬೃಹತ್ ಪುರಾತನ್ ಪುಸ್ತಕಾಂಚ್ಯೆಂ ಅಧ್ಯಯನ್ ತಾಣೆಂ ಕೆಲ್ಲೆಂ. ಚಡಿತ್ ಮೊಲಾಚಿಂ ಹಿಂ ಪುಸ್ತಕಾಂ ತಾಚ್ಯಾ ದಾಕ್ತೆರ್ ಪುತಾನ್ ಮೊಲಾಕ್ ಘೆವ್ನ್ ದಿಲ್ಲಿಂ. ಥೊಡಿಂ ಚಿತ್ರಾಂ ಧುವೆನ್ ಚಿತ್ರಾಯಿಲ್ಲಿಂ. ತ್ಯಾ ಸಗ್ಳ್ಯಾ ಪುಸ್ತಕಾಚೆಂ ವಿನ್ಯಾಸ್ ಹಾಂವೆಂ ಕರ‍್ತಾನಾ ಪಾವ್ಲಾಬಾನ್ ವ್ಹಡಾ ಹೆಮ್ಮ್ಯಾನ್ ತಿ ಗಜಾಲ್ ಮ್ಹಾಕಾ ಸಾಂಗಲ್ಲಿ.
ಹ್ಯಾ ಪುಸ್ತಕಾಚೊ ವಾವ್ರ್ ಸುರು ಕೆಲ್ಲ್ಯಾ ಸುರ್ವೆರ್‌ಚ್ ಕ್ಯಾನ್ಸರ್ ಪಿಡೆನ್ ತಾಕಾ ಗ್ರಾಸುಂಕ್ ಧರಲ್ಲೆಂ. ತೆದಾಳಾ ತಾಣೆ ಶಿಣ್ ಕೆಲೊನಾ ಬಗಾರ್ ಆಪ್ಣಾಕ್ ಏಕ್ ಆವ್ಕಾಸ್ ದೀ ದೆವಾ ಮ್ಹಣ್ ಮಾಗಲ್ಲೆಂ ತೆಂ ತ್ಯಾ ವೆಳಾರ್ ತಾಣೆಂ ಲಿಖ್‌ಲ್ಲ್ಯಾ ಕವಿತೆಂತ್ ಜಳ್ಕತಾ.
ಮ್ಹಜ್ಯಾ ದಾರಾರ್ ಉಬೊ ರಾವುನ್,
ಸಾಂಗ್ತಾಯ್ ಸಕಡ್ ಯೆ ತುಂ ಸೊಡುನ್
ಆಪೊಂವ್ಕ್ ನಾಸ್ಲೊ ಸಯ್ರೊ ಆಸ್ತಾಂ,
ಆಪಯ್ತಾಯ್ ತುಂ ಅಧಿಕಾರಾನ್
ದಾಕ್ಶೆಣ್ ದಯಾ ಕಾಯಿಂಚ್ ನಾಸ್ತಾಂ
ಜಿಣ್ಯೆಕ್ ಮಾರ್ತಾಯ್ ಕುರಾಡ್ ಭರಾನ್
ದೀ ತುಂ ಮ್ಹಾಕಾ ಆನಿ ಏಕ್ ಆವ್ಕಾಸ್
ದೆವ್ಳಾಂತ್ ಧ್ಯಾನಾನ್ ಪೆಟಯ್ನ್ ವಾತಿ
ಉಪ್ರಾಂತ್ ಮ್ಹಾಕಾ ವ್ಹರ್ ತುಂ ಸವ್ಕಾಸ್
ಮಡ್ಯಾಕ್ ಮ್ಹಜ್ಯಾ ಲಾಗತ್ ಮಾತಿ
ಪಾವ್ಲಾಬಾಚೆಂ ಮಾಗ್ಣೆಂ ಮಾಂದುನ್ ದೆವಾನ್ ತಾಕಾ ಥೊಡಿಂ ವರ್ಸಾಂ ದಿಲಿಂ, ಸಾಂಗಾತಾ ಪಿಡಾ ಸೊಸುನ್ ವರ‍್ಚೆಂ ಬಳಯ್ ದಿಲ್ಲೆಂ. ಪತಿಣ್ ಜೆಸಿಂತಾ, ಭುರ್ಗಿಂ ಜೇನ್, ಜೊನಾಥನ್ ಆನಿ ಜೊಸ್ಲಿನಾನ್ ತಾಂಚೊ ಘಟ್ ಮೊಗಾಚೊ ಸಾಂಗಾತ್ ದಿಲ್ಲೊ. ತಶೆಂ ‘ದೇವ್ ಮನ್ಶಾಂತ್ ಆಯ್ಲೊ’ ಬೃಹತ್ ಪುಸ್ತಕ್ ದೋನ್ ಹಜಾರ್ ತೇವಿಸ್ ಇಸ್ವೆಂತ್ ಪ್ರಗಟ್ ಜಾಲೆಂ.
ದೆವಾಚೆಂ ಉತರ್ ಸುರ್ಯಾಚ್ಯಾ ವೊತಾಪರಿಂ – ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ
ಏಕ್ ಮಾತ್ರ್ ನಿರಾಶಾ ತಾಣೆಂ ಮ್ಹಜೆಲಾಗಿಂ ವ್ಯಕ್ತ್ ಕೆಲ್ಲಿ. ತಿ, ತಾಚ್ಯಾ ತ್ಯಾ ವಿಶೇಸ್ ವಾವ್ರಾಕ್ ಮಾನುನ್, ತಾಕಾ ಪ್ರೋತ್ಸಾವ್ ದೀಂವ್ಕ್ ತಾಣೆಂ ಅಶೆಲ್ಲ್ಯಾ ತಿತ್ಲೆ ಯಾಜಕ್ ಆನಿ ತಾಣೆ ಶಿಕಯಿಲ್ಲೆ, ತಾಚ್ಯಾ ಪ್ರೋತ್ಸಾವಾನ್ ವ್ಹಡ್ ಜಾಲ್ಲೆ ಸಭಾರ್, ತಾಂಕಾಂ ತಾಣೆ ಆಪವ್ಣೆ ಧಾಡ್‌ಲ್ಲೆಂ ತೆ ಹ್ಯಾ ಪುಸ್ತಕಾಚ್ಯಾ ಮೊಕ್ಳಿಕ್ ಕಾರ್ಯಾಕ್ ಆಯ್ಲೆನಾಂತ್ ಮ್ಹಣ್.
ಸೃಜಾನಾತ್ಮಕ್ ಚಿಂತ್ಪಾಚೆ, ಕವಿ ಬರವ್ಪಿ ವಾ ಕಲಾಕಾರ್ ತಾಂಚ್ಯೆ ಭಂವ್ತಿಂ ತಾಂಚ್ಯಾ ಘರ್ಚಿಂ, ಮೊಗಾಚಿಂ ಹಿಂ ಸರ್ವಾಂ ಆಸ್ಲ್ಯಾರೀ, ತಾಂಚೆಂ ಜಿವಿತ್ ಚಡಾವತ್ ಎಕ್ಸುರೆಂ ಆನಿ ಕಷ್ಟಾಂಚೆಂ ಆಸ್ತಾ. ಹೆರಾಂಚ್ಯೊ ದುಖಿ, ಧಣ್ಸಾಲ್ಲ್ಯಾಂಚೆಂ ಜಿವಿತ್ ತೆ ಸೊಸ್ತಾತ್. ಆಪ್ಲ್ಯಾ ಕವನಾ ಆನಿ ಬರ್ಪಾಂ ದ್ವಾರಿಂ ಸಮಾಜಾಕ್ ಬರಿ ವಾಟ್ ದಾಕಂವ್ಕ್ ತೆ ಪೆಚಾಡ್ತಾತ್. ತೆದ್ನಾಂ ತೆ ಬೊಲ್ತ್ಯಾಚ್ ತಾಂಚ್ಯಾಚ್ ಎಕಾ ಸಂಸಾರಾಕ್ ವೆತಾತ್. ತ್ಯಾ ವೆಳಾ ತಾಂಚೆ ಬರಾಬರ್ ತಾಂಚ್ಯಾ ಕುಟ್ಮಾಂಚಿಂಯ್ ಎಕ್ಸುರಿಂ ಜಾತಾತ್. ಹಾಂವ್ ನೆಣಾಂ ಪಾವ್ಲಾಬಾಚ್ಯಾ ಘರ್ಚಿಂ ಕಿತ್ಲಿಂ ಕಷ್ಟಾಲ್ಯಾಂತ್ ತೆಂ, ಪುಣ್ ಭಂವ್ತಿಚ್ಯಾ ಸಂಸಾರಾಕ್ ಆನಿ ಮ್ಹನ್ಶಾಂಕ್ ತಾಂಚ್ಯಾ ಕಷ್ಟಾಂ ಸುಖಾಕ್ ಸ್ಪಂದನ್ ಕೆಲ್ಲೊ ಏಕ್ ಕವಿ, ಬರವ್ಪಿ ಜಾವ್ನ್ ತೊ ಖರ‍್ಯಾನ್ ಜಿಯೆಲೊ. ತಾಚ್ಯಾ ಪತಿಣೆನ್ ಆನಿ ಪುತಾನ್ ಆನಿ ಧುವಾಂನಿ ತಾಂಚೊ ಬರ್ಪೂರ್ ಸಾಂಗಾತ್‌ಯ್ ದಿಲ್ಲೊ.
ನವೆಂಬ್ರಾಂತ್ ತಾಚಿ ದೊಳ್ಯಾಂಚಿ ದೀಷ್ಟ್ ಉಣಿ ಜಾಲ್ಲಿ, ಕಂಪ್ಯುಟರಾಂತ್ ಟಾಯ್ಪ್ ಕರುಂಕ್ ತಾಕಾ ಜಾಯ್ನಾತಲ್ಲ್ಯಾ ವೆಳಾ ಮ್ಹಾಕಾ ಘರಾ ಆಪವ್ನ್ ಮಿಲಾರ್ಚ್ಯಾ ಫಿರ್ಗಜ್ ಪತ್ರಾಕ್ ಆನಿ ತಾಚೊ ಆಮಿಗ್ ಕವಿ ಮೆಲ್ವಿನ್ ಲುದ್ರಿಗಾ ಖಾತಿರ್ ದೋನ್ ಕವನಾಂ ಟಾಯ್ಪ್ ಕರಯಿಲ್ಲಿಂ. ತಿಂ ಕವನಾಂ ತಾಣೆ ಬರವ್ನ್ ದವರುಂಕ್ ನಾತಲ್ಲಿಂ ಪುಣ್ ಕಾಳ್ಜಾ ಪುಸ್ತಕಾಂತ್ ಜಗವ್ನ್ ದವರಿಲ್ಲಿಂ.
ಪಾವ್ಲಾಬಾಚೆ ಸಭಾರ್ ಗೂಣ್, ತಾಣೆ ಕೆಲ್ಲಿಂ ಬರಿಂ ಕಾಮಾ, ಕೊಂಕ್ಣಿ ಸಾಹಿತ್ಯಾಚಾ ಆನಿ ಸಂಗೀತಾಚ್ಯಾ ಮಾಳಾರ್ ತಾಣೆಂ ಕೆಲ್ಲಿಂ ಕಾಮಾಂ ಆನಿ ಹೆರ್ ಉಗ್ಡಾಸ್ ಜಾಯಿತ್ತೆ ಆಸಾತ್. ಮ್ಹಜೆ ತಸಲ್ಯಾ ಏಕ್ ಲ್ಹಾನ್ ಕಲಾಕಾರಾಕ್ ತಾಚ್ಯಾ ‘ರಸ್ತ್ಯಾ ದೆಗೆಚಿಂ ಫುಲಾಂ’ ಕವಿತಾ ಸಂಗ್ರಹಾಕ್ ಪ್ರಸ್ತಾವನ್ ಬರಂವ್ಚೆಂ ಭಾಗ್ ತಾಣೆ ಮ್ಹಾಕಾ ದಿಲ್ಲೆಂ. ತಾಚ್ಯೆ ಥಾವ್ನ್ ಹಾಂವ್ ಜಾಯಿತ್ತೆಂ ಶಿಕ್ಲಾಂ. ತಾಕಾ ಹಾಂವ್ ಸದಾಂಚ್ ಅಭಾರಿ. ಆಪ್ರೂಪ್ ಕೆದ್ನಾಂ ಫೋನ್ ಕೆಲೆಂ ತರ್, ವಾ ಮೆಳೊಂಕ್ ಗೆಲೊಂ ತರ್ ತಾಚ್ಯಾ ಮಯ್ಪಾಸಿ, ಮೊಗಾಳ್ ತಾಳ್ಯಾನ್ ತಾಣೆ ಪಯಿಲ್ಲೆಂ ವಿಚಾರ್ಚೆಂ ಆಸ್‌ಲ್ಲೆಂ ‘ಕಸೊ ಆಸಾಯ್ ಏಡಿ’ ಉಪ್ರಾಂತ್ ಮ್ಹಜ್ಯಾ ಪತಿಣೆ ಆನಿ ಧುವೆ ವಿಶಿಂ ತಾಣೆಂ ವಿಚಾರ್ಚೆಂ ಆಸ್‌ಲ್ಲೆಂ.
ಪೋರ್ ಆಯ್ತಾರಾ, ಜೆಜುನ್ ಜುವಾಂವ್ ಬಾಪ್ತಿಸ್ತಾ ಥಾವ್ನ್ ಪವಿತ್ರ್ ಸ್ನಾನ್ ಘೆತಲ್ಲೆಂ ಫೆಸ್ತ್. ಜೆಜು ಪವಿತ್ರ್ ಸ್ನಾನ್ ಘೆತಾನಾ ಆಕಾಸಾ ಥಾವ್ನ್ ದೆವಾಚೊ ತಾಳೊ ಆಯ್ಕಾಲ್ಲೊ ‘ಹೊ ಮ್ಹಜೊ ಪೂತ್, ಮ್ಹಾಕಾ ಚಡ್ ಮಾನ್ವಾಲಾ’
ಥೊಡ್ಯಾಚ್ ದಿಸಾಂ ಆದಿಂ ಪಾವ್ಲಾಬ್ ಆಪ್ಲ್ಯಾ ಪತಿಣೆ ಸಾಂಗಾತಾ ಆಪ್ಲಿಂ ಭುರ್ಗಿಂ ಆಸ್ಚ್ಯಾ ಅಮೇರಿಕಾಕ್ ಪಾವ್‌ಲ್ಲೊ. ಆಪ್ಲ್ಯಾ ಮೊಗಾಚ್ಯಾ ಪತಿಣೆ ಆನಿ ತೆಗಾಂಯ್ ಭುರ್ಗ್ಯಾಂ ಸಾಂಗಾತಾ ತಾಣೆಂ ಆಶೆಲ್ಲೆ ಸೊಭಿತ್ ಥೊಡೆ ದೀಸ್ ತಾಣೆ ಖರ್ಚಿಲ್ಲೆ. ತೊ ಸಂತುಷ್ಟ್ ಆಸ್‌ಲ್ಲೊ ಆನಿ ತ್ಯಾಚ್ ವೆಳಾ, ಜನೆರಾಚ್ಯಾ ಪಾಂಚ್ ತಾರ್ಕೆರ್ ಆಯ್ತಾರಾ, ತೆಗಾಂ ರಾಯಾಂಚ್ಯಾ ಫೆಸ್ತಾ ದಿಸಾ ದೆವಾನ್ ಆಮ್ಚ್ಯಾ ಮೊಗಾಳ್, ಪಾವ್ಲಾಬಾಕ್ ಸಾಂಗ್ಲೆಂ ಆಸ್ತ್‌ಲೆಂ ‘ಮರಿಯಾಣ್ ಪಾವ್ಲ್, ತುಂ ಮಜೊ ಮೊಗಾಚೊ, ಏಕ್ ಖರಿ ಕ್ರೀಸ್ತಿ ಜೀಣಿ ತುಂ ಜಿಯೆಲೊಯ್, ತುಜ್ಯಾ ಸಾಹಿತ್ಯಾ ಆನಿ ಕವನಾಂ ದ್ವಾರಿಂ ಮ್ಹಜೆಂ ಉತರ್ ತುವೆಂ ಹೆರಾಂಕ್ ಪರ್ಗಟ್ಲೆಂಯ್. ತುಕಾ ಹಾಂವ್ ಮಾನ್ವಾಲಾಂ, ಯೆ ಮ್ಹಜ್ಯಾ ರಾಜಾಂತ್, ಮ್ಹಜ್ಯಾ ಬಗ್ಲೆಕ್ ತುಜೊ ಜಾಗೊ ತಯಾರ್ ಆಸಾ’
ಪಾವ್ಲಾಬಾನ್ ಪರತ್ ಅವ್ಕಾಸ್ ಮಾಗ್ಲೊನಾ. ಬಗರ್ ದೆವಾಚೆಂ ಆಪವ್ಣೆಂ ಖುಶೆನ್ ಸ್ವೀಕಾರ್ ಕೆಲೆಂ.
■ ಎಡ್ಡಿ ಸಿಕೇರ್
( ಮಿಲಾರ್ ಇಗರ್ಜೆಂತ್ ದೆವಾದಿನ್ ಎಮ್. ಪಿ. ರೊಡ್ರಿಗಸಾಚ್ಯಾ ಹಪ್ತ್ಯಾಚ್ಯಾ ಮಿಸಾ ಉಪ್ರಾಂತ್ ತಾಕಾ ಅರ್ಪಿಲ್ಲೆಂ ಉತ್ರಾಂ-ನಮನ್ )
1 comment
ಎಡ್ಡಿ ಸಿಕೇರಿಚೆಂ, ಬೋವ್ ಆಪುರ್ಬಾಯೆನ್, ಪಾವ್ಲಾಬಾ ವಿಶಿಂ ಫಾವೊತೊ ವಿವರ್ ದಿಂವ್ಚೆಂ ಲೇಖನ್ ವಾಚುನ್ ಮತಿಕ್ ಬರ್ಪೂರ್ ಸಂತೊಸ್ ಜಾಲೊ. ಪಾವ್ಲಾಬಾಕ್ ಮೆಳ್ಚೆಂ ಭಾಗ್ ಮ್ಹಾಕಾ ಫಾವೊ ಜಾಂವ್ಕ್ ನಾ ತರೀ, ತಾಚಿ ಮಾಹೆತ್, ಸಂಕ್ಷಿಪ್ತ್ ರಿತಿರ್ ಸಕ್ಡಾಂಲಾಗಿಂ ವಾಂಟ್‌ಲ್ಲ್ಯಾ ಎಡಿಕ್, ದೇವ್ ಬರೆಂ ಕರುಂ!