ಜಿವಿತ್ ಜಾವ್ನಾಸಾ ದೆವಾಚೆಂ ದೆಣೆಂ ಆನಿ ಹೆಂ ದೆಣೆಂ ದಿರ್ವೆಂ ಜಾವ್ನ್ ಬದ್ಲುಂಚೆಂ ಜಾವ್ನಾಸ್ಲೆಂ ಬೊ। ಮಾ| ಬಾ| ಆಲ್ಫ್ರೆಡ್ ರೋಚಾಚೆಂ ಜಿಣೆಂ ಮ್ಹಣಾಲೊ ಕರ್ನಾಟಕ ಕಾಪುಚಿನ್ ಪವಿತ್ ತ್ರಿಂದಾದ್ ಪ್ರಾಂತ್ಯಾಚೊ ವ್ಹಡಿಲ್ ಮಾ| ಬಾ| ಜೊನ್ ಆಲ್ವಿನ್ ಡಾಯಸ್. ಬೊ। ಮಾ| ಡಾಯಸ್, ಬ್ರಹ್ಮಾವರ್ ಭಾಗೆವೊಂತ್ ಕುಟ್ಮಾಕ್ ಸಮರ್ಪಿಲ್ಲ್ಯಾ ಇಗರ್ಜೆಂತ್ ದೆವಾಚೊ ಸೆವಕ್ ಆಮ್ಚೊ ಪಾದ್ರ್ಯಾಬ್ ಫಾ| ಆಲ್ಫ್ರೆಡ್ ರೋಚ್ ಹಾಂಚ್ಯಾ ಜಲ್ಮಾ ಶತಾಬ್ದಿ ಸಮಾರೋಪ್ ಸಂಭ್ರಮ್ ಕಾರ್ಯಕ್ರಮಾಚೊ ವಾಂಟೊ ಜಾವ್ನ್ ಮಾಂಡುನ್ ಹಾಡ್ಲೆಲ್ಯಾ ಪವಿತ್ ಮಿಸಾಚ್ಯಾ ಬಲಿದಾನಾಚೊ ಪ್ರಧಾನ್ ಯಾಜಕ್ ಆನಿ ಪ್ರಸಂಗ್‌ದಾರ್ ಜಾವ್ನ್ ಉಲಯ್ತಾಲೊ.
ಫಾಮಾದ್ ಅಮೆರಿಕನ್ ಬರಯ್ಣಾರ್ ಮಾರ್ಕ್ ಟ್ವೈನ್ ಹಾಂಚ್ಯಾ ಉತ್ರಾಂಚೊಂ ಉಲ್ಲೇಕ್ ಕರುನ್ ಬೊ। ಮಾ। ಡಾಯಸ್ ಮ್ಹಣಾಲೊ ” ಮನ್ಶ್ಯಾ ಜಿವಿತಾಂತ್ ಜಲ್ಮ್ ಆನಿ ಜಿವಿತಾಚೊ ಉದ್ದೇಶ್ ಹ್ಯೊ ದೋನ್ ಸಂಗ್ತಿ ಪ್ರಮುಕ್ ಜಾವ್ನಾಸಾತ್. ಜಿವಿತಾಚೊ ಉದ್ದೇಶ್ ಸಮ್ಜುಂಕ್ ಸಕ್‌ಲ್ಲೊ ದೆವಾಥಾವ್ನ್ ದೆಣ್ಯಾರುಪಾರ್ ಮೆಳ್‌ಲ್ಲೆಂ ಜಿಣೆಂ ದಿರ್ವೆಂ ಜಾವ್ನ್ ಬದ್ಲುಂಕ್ ಸಕ್ತಾ. ಸಾಂತಿಪಣಾಚ್ಯೆ ವಾಟೆರ್ ಆಸ್ಚೊ ದೆವಾಚೊ ಸೆವಕ್ ಆಮ್ಚೊ ಪಾದ್ರ್ಯಾಬ್ ಫಾ| ಆಲ್ಫ್ರೆಡ್ ರೋಚ್ ಆಪ್ಲೆಂ ಸೆವೆಚೆಂ ಜಿವಿತ್ ದೆಣೆಂ ಜಾವ್ನ್ ಪರಿವರ್ತಿತ್ ಕೆಲ್ಲೊ ಕಾಪುಚಿನ್ ಯಾಜಕ್.”
ಮುಂದರುನ್ ಬೊ। ಮಾ| ಡಾಯಸ್ ಮ್ಹಣಾಲೊ ” ದೆವಾಥಂಯ್ ಭಾವಾರ್ಥ್, ಭರ್ವಸೊ ಆನಿ ಮೋಗ್, ಕ್ರೀಸ್ತಾಚೆಂ ಮಿಸಾಂವ್ ಪರ್ಗಟುಂಕ್ ಬಳ್ ಆನಿ ಧಯ್ರ್ ದಿತಾತ್. ಜಶೆಂ ಮೊಯ್ಜೆನ್ ಲೊಕಾಕ್ ಸಾಂಗಾತಾ ಹಾಡ್ಲೆಂ ದೆವಾಥಂಯ್ ಪರ್ತಿಲೆಂ, ಫಾ| ಆಲ್ಫ್ರೆಡ್ ರೋಚಾನ್ ಆಪ್ಲ್ಯಾ ತಾಬೆನ್ ದಿಲ್ಲ್ಯಾ ಭಾವಾಡ್ತ್ಯಾಂಕ್ ದೆವಾಚ್ಯಾ ಮೊಗಾನ್ ಸಾಂಗಾತಾ ಹಾಡ್ಲೆಂ. ಮೊಯ್ಜೆಪರಿಂ ತೋ ಲೊಕಾ ಖಾತಿರ್ ವಾವುರ್ಲೊ. ಕ್ರೀಸ್ತಾಪರಿಂ ದೆವಾಚೊ ಮೋಗ್ ತಾಣೆಂ ತಾಂಕಾ ವಾಂಟ್ಲೊ. ಆಪ್ಲೆ ಸಾಂಗಾತಾ ಲೊಕಾಚಿಂ ಜಿವಿತಾ ದೆಣಿಂಯ್ ದಿರ್ವೆಂ ಜಾವ್ನ್ ತಾಣೆಂ ರುಪಾಂತರ್ ಕೆಲಿಂ . ದೆಕುನ್ ತಾಕಾ ಮೊಯ್ಜೆ ಸಾರ್ಕೊ ಪ್ರವಾದಿ ಆನಿ ಕ್ರಿಸ್ತಾ ಸಾರ್ಕೊ ಯಾಜಕ್ ಮ್ಹಣ್ಯೆತ್. ತಾಚೆಂ ಆದರ್ಶ್ ಆಮಿ ಆಮ್ಚ್ಯಾ ಜಿಣ್ಯೆಕ್ ಪ್ರೇರಣ್ ಜಾವ್ನ್ ಘೆವ್ಯಾಂ”
ಮಿಸಾ ಉಪ್ರಾಂತ್ ಫಾ| ರೊಚ್ ಸಮಾಧಿಲಾಗಿಂ ಮಟ್ವಿ ಮಾಗ್ಣ್ಯಾ ವಿಧಿ ಚಲ್ಲಿ. ಭಾಗೆವೊಂತ್ ಕುಟ್ಮಾಚ್ಯಾ ಇಗರ್ಜೆಚೊ ವಿಗಾರ್ ಮಾ| ಬಾ| ಜೊನ್ ಫೆರ್ನಾಂದ್ ಹಾಣಿ ಹಾಜರ್ ಜಾಲ್ಲ್ಯಾ ಭಕ್ತಿಕಾಂಚೊಂ ಉಪ್ಕಾರ್ ಭಾವುಡ್ಲೊ. ದೆವಾಚೊ ಸೆವಕ್ ಫಾ| ಆಲ್ಫ್ರೆಡ್ ರೋಚ್, ಸಾಂತಿಪಣಾಚ್ಯಾ ಪ್ರಕ್ರಿಯೆಚೊ ಮುಕೆಲಿ ಮಾ| ಬಾ| ಸಂತಾ ಲೋಪೆಜ್ ಹಾಣಿ ಚಲೊನ್ ಆಸ್ಚ್ಯಾ ಸಾಂತಿಪಣಾಚ್ಯಾ ಪ್ರಕ್ರಿಯೆಚೊ ವಿವರ್ ಆನಿ ಸಾಂತಿಪಣಾಚ್ಯಾ ಮಿಸಾಂವಾಕ್ ಆದಾರ್ ದಿಲ್ಲ್ಯಾ ಆನಿ ದಿತೆಲ್ಯಾ ಸಮೆಸ್ತಾಂಚೊಂ ಉಪ್ಕಾರ್ ಭಾವುಡ್ಲೊ.
ಜಲ್ಮಾ ಶತಾಬ್ದಿ ಸಮಾರೋಪ್ ಸಂಭ್ರಮ್ ಕಾರ್ಯಾಕ್ ಬ್ರಹ್ಮಾವರ್, ಬಾರ್ಕೂರ್, ಲೋವರ್ ಕಾಸರಕೋಡ್, ಬಿಣಗ, ಮಂಗ್ಳುರ್ ಅಶೆಂ ಜಾಯ್ತ್ಯಾಂ ಜಾಗ್ಯಾಂಥಾವ್ನ್ ಫಾ| ಆಲ್ಫ್ರೆಡ್ ರೋಚ್ ಅಭಿಮಾನಿ ಆನಿ ಭಕ್ತಿಕ್ ಹಾಜರ್ ಆಸ್ಲೆ.
