ಕರಾವಳೆಂತ್ 113 ವರ್ಸಾಂಚಿಂ ಚರಿತ್ರಾ ಆಸ್ಚೆಂ ಕಥೊಲಿಕಾಂಚೆಂ ಪ್ರಮುಕ್ ಸಹಕಾರಿ ಬ್ಯಾಂಕ್ ಎಂ. ಸಿ.ಸಿ. ಬ್ಯಾಂಕಾನ್ 31 ಮಾರ್ಚ್ 2025 ವೆರ್ ಸಂಪ್ಲೆಲ್ಯಾ 2024 –25 ಆರ್ಥಿಕ್ ವರ್ಸಾಂತ್, 13 ಕೊರೊಡ್ ರುಪಯ್ ವ್ಯವಹಾರಿಕ್ ಮುನಾಫೊ ಆನಿ 1.30% ಎನ್.ಪಿ.ಎ. ದಾಕಲ್ ಕೆಲಾ. ಬ್ಯಾಂಕಾಚೊ ವ್ಹೆವಾರ್ 1240 ಕೊರೊಡಾಂಕ್ ತೆಂಕ್‌ಲ್ಲಿ ಗಜಾಲ್ ಆಂವ್ದುಚ್ಯಾ ಆರ್ಥಿಕ್ ವರ್ಸಾಚೆಂ ಅನ್ಯೇಕ್ ಮಹತ್ವಾಚೆಂ ಸಾಧನ್ ಜಾವ್ನಾಸಾ – ಮ್ಹಣ್ತಾ ಎಂ.ಸಿ.ಸಿ. ಬ್ಯಾಂಕ್ ಲಿಮಿಟೆಡ್ ಅಧ್ಯಕ್ಷ್ ಅನಿಲ್ ಲೋಬೊ.
ಪ್ರಸ್ತುತ್ ಅಧ್ಯಕ್ಷ್ ಅನಿಲ್ ಲೋಬೊ ಪಂಗ್ಡಾನ್ ಬ್ಯಾಂಕಾಚ್ಯಾ ಆಡಳ್ತ್ಯಾಚೆಂ ಸುಂಕಾಣ್ ಹಾತಿಂ ಘೆತ್ಲ್ಯಾ ಉಪ್ರಾಂತ್ ಬ್ಯಾಂಕಾಚೊ ವ್ಯವಹಾರ್, ಮುನಾಫೊ ಚಡೊನ್ ಆಸಾ ಮಾತ್ ನಯ್ ಅನುತ್ಪಾದಕ್ ಆಸ್ತ್ 1.50% ವಯ್ರ್ ವಚಾನಾತ್ಲೆ ಪರಿಂ ವಿಶೇಸ್ ಕಾಳ್ಜಿ ಘೆವುನ್ ಆಸಾತ್. ಫಕತ್ ಅವಿಭಜಿತ್ ದಕ್ಶಿಣ ಕನ್ನಡ ಜಿಲ್ಲ್ಯಾಂಕ್ ಸೀಮಿತ್ ಆಸ್‌ಲ್ಲಿ ಬ್ಯಾಂಕಾಚಿ ಕಾರ್ಯಾವ್ಯಾಪ್ತಿ ಸಮಸ್ತ್ ಕರ್ನಾಟಕಾಕ್ ವಿಸ್ತಾರಾಯಿಲ್ಲಿ ಆಸೊನ್, ಸೊಳಾ ಆಸ್‌ಲ್ಲೆ ಬ್ಯಾಂಕಾಚೆ ಶಾಖೆ, ಚಾಲು ವರ್ಸಾ ಜೂನ್ – ಜುಲೈ ಮಯ್ನ್ಯಾಂತ್ ಬೈಂದೂರಾಂತ್ ನವೊ ಶಾಖೊ ಸುರ್ವಾತ್ಚೆ ಸವೆಂ ವಿಸಾಂಚೇರ್ ಪಾವ್ತಾತ್. ಸಾಂಗಾತಾ ಕುಲ್ಶೇಕರ್ ಭಾಡ್ಯಾಚ್ಯಾ ಸುವಾತೆರ್ ಆಸ್ಚೊ ಶಾಖೊಯ್ ಚಾಲು ವರ್ಸಾಂತ್ ಸ್ವಂತ್ ಜಾಗ್ಯಾಕ್ ಥಳಾಂತರ್ ಜಾತಾ.
ಎಂ.ಸಿಸಿ ಬ್ಯಾಂಕಾಚಾ ಆಡಳ್ಯ್ತ್ಯಾ ದಫ್ತರಾಂತ್ ಆಪಯಿಲ್ಲ್ಯಾ ಪತ್ರಿಕಾ ಪರಿಷದೆಂತ್ ಬ್ಯಾಂಕಾಚೊ ಅಧ್ಯಕ್ಶ್ ಅನಿಲ್ ಲೋಬೊನ್ ಹಿ ಮಾಹೆತ್ ದಿಲಿ. ಅನಿವಾಸಿ ಭಾರತೀಯಾಂಕ್ ಸೆವಾ ದಿಂವ್ಚ್ಯಾ ಸಹಕಾರಿ ಶೆತಾಚ್ಯಾ ಬ್ಯಾಂಕಾಪಯ್ಕಿ ಎಂ.ಸಿ.ಸಿ. ಬ್ಯಾಂಕ್ ದುಸ್ರ್ಯಾ ಸ್ಥಾನಾರ್ ಆಸೊನ್ ಗ್ರಾಹಕಾಂಕ್ ಚಾಲು ವರ್ಸಾ ಯುಪಿಐ ಸವ್ಲತ್ ಫಾವೊ ಜಾತೆಲಿ ಮ್ಹಣ್ ಅನಿಲಾನ್ ಮ್ಹಳೆಂ. 2026 ಮಾರ್ಚ್ ಪರ್ಯಾಂತ್ ರುಪಯ್ 1500 ಕೊರೊಡಾಂಕ್ ಎಕುಣ್ ವ್ಹೆವಾರ್ ಪಾವಂವ್ಚೊ ಇರಾದೊ ಪ್ರಸ್ತುತ್ ಆಡಳ್ತ್ಯಾ ಮಂಡಳೆಕ್ ಆಸಾ ಮ್ಹಣ್ ತಾಣೆ ಮ್ಹಳೆಂ.
ಬ್ಯಾಂಕಾಚೆ ಸಾಂದೆ, ಗ್ರಾಹಕ್, ಆಡಳ್ತ್ಯಾ ಮಂಡಳೆಚ್ಯಾ ಸಾಂದ್ಯಾಂಚೊಂ ಸಹಕಾರ್ ಆನಿ ಅಧಿಕಾರಿ, ಶಿಬಂದೆಚ್ಯಾ ಪರಿಶ್ರಮಾನ್ ಬ್ಯಾಂಕಾಚಿ ಪ್ರಗತಿ ಸಾದ್ಯ್ ಜಾಲ್ಯಾ ಮ್ಹಣ್ ಅನಿಲ್ ಲೋಬೊನ್ ಹ್ಯಾ ಸಂದರ್ಬಾರ್ ಮ್ಹಳೆಂ ಆನಿ ಸರ್ವಾಂಚೊಂ ಉಪ್ಕಾರ್ ಭಾವುಡ್ಲೊ.
ಪತ್ರಿಕಾ ಪರಿಷದೆಂತ್ ಬ್ಯಾಂಕಾಚೊ ಅಧ್ಯಕ್ಷ್ ಅನಿಲ್ ಲೋಬೊ ಸಾಂಗಾತಾ, ಉಪಾಧ್ಯಕ್ಷ್ ಜೆರಾಲ್ಡ್ ಜೂಡ್ ಡಿಸಿಲ್ವ, ನಿರ್ದೇಶಕ್ ಜಾವ್ನಾಸ್ಚೆ ಆಂಡ್ರ್ಯೂ ಡಿಸೊಜಾ, ಡೊ| ಜೆರಾಲ್ಡ್ ಪಿಂಟೊ, ಅನಿಲ್ ಪತ್ರಾವೊ, ಜೆ.ಪಿ. ರೊಡ್ರಿಗಸ್, ಡೇವಿಡ್ ಡಿಸೊಜಾ, ಎಲ್ರೊಯ್ ಕಿರಣ್ ಕ್ರಾಸ್ಟೊ, ಹೆರಾಲ್ಡ್ ಮೊಂತೇರೊ, ರೋಶನ್ ಡಿಸೊಜಾ, ಮೆಲ್ವಿನ್ ವಾಸ್, ವಿನ್ಸೆಂಟ್ ಲಸ್ರಾದೊ, ಸಿ.ಜಿ. ಪಿಂಟೊ, ಸುಶಾಂತ್ ಸಲ್ಡಾನ್ಹಾ, ಐರಿನ್ ರೆಬೆಲ್ಲೊ, ಡೊ| ಫ್ರೀಡಾ ಡಿಸೊಜಾ, ಆಲ್ವಿನ್ ಪಿ. ಮೊಂತೆರೊ, ಫೆಲಿಕ್ಸ್ ಡಿಕ್ರೂಜ್, ಶರ್ಮಿಳಾ ಮಿನೇಜಸ್ ಹಾಗೂ ಮಹಾ ಪ್ರಬಂದಕ್ ಸುನಿಲ್ ಮಿನೇಜಸ್ ಹಾಜರ್ ಆಸ್ಲೆ.
