ಸನ್ವಾರಾ, ಮೇ 10 ವೆರ್ ಎಂಸಿ.ಸಿ. ಬ್ಯಾಂಕಾನ್ ಬ್ಯಾಂಕಾಚ್ಯಾ ಆಂಗ್ಣಾಂತ್ ಆಪ್ಲೊ 113 ವೊ ಸ್ಥಾಪನಾ ದೀಸ್ ಸಂಭ್ರಮ್ಲೊ. ಕಾರ್ಯಕ್ರಮಾಕ್ ಉಡುಪಿ ದಿಯೆಸೆಜಿಚೊ ಸರ್ವಜಣಿಕ್ ಸಂಪರ್ಕ್ ಅಧಿಕಾರಿ ಮಾ| ಬಾ| ಡೆನಿಸ್ ಡೆಸಾ ಮುಕೆಲ್ ಸಯ್ರೊ, ಅರ್ಸುಲಾಯ್ನ್ ಫ್ರಾನ್ಸಿಸ್ಕನ್ ಮೆಳಾಚಿ ಪ್ರಾಂತೀಯ್ ವ್ಹಡಿಲ್ನ್ ಭ| ಕ್ಲೆರಾ ಮಿನೇಜಸ್, ನಾಮ್ನೆಚೊ ಲೇಕ್ ತಪಾಸ್ಣಾರ್ ಆನಿ ಅರ್ಥ್‌ಶಾಸ್ತ್ರಿ ಸಿ.ಎ. ಲೈನಲ್ ಅರಾನ್ಹಾ, ಪ್ರಜ್ಞಾ ಸಲಹಾ ಕೇಂದ್ರಾಚಿ ಸ್ಥಾಪಕಿ ಸಮಾಜ್ ಸೇವಕಿ ಪ್ರೊ। ಹಿಲ್ಡಾ ರಾಯಪ್ಪನ್ ಆನಿ ಮ್ಯಾಂಗಲೋರ್ ಕೊಂಕಣ್ಸ್ ದುಬಯ್ ಹಾಚೊ ಅಧ್ಯಕ್ಶ್ ಸ್ಟೀಫನ್ ಮಿನೇಜಸ್ ಮನಾಚೆ ಸಯ್ರೆ ಜಾವ್ನ್ ಹಾಜರ್ ಆಸ್ಲೆ. ಬ್ಯಾಂಕಾಚೊ ಅಧ್ಯಕ್ಶ್ ಸಹಕಾರ ರತ್ನ ಅನಿಲ್ ಲೊಬೊ ಹಾಣೆ ಕಾರ್ಯಾಚೆಂ ಅಧ್ಯಕ್ಷ್ ಸ್ಥಾನ್ ಘೆತ್‌ಲ್ಲೆಂ.
ಬ್ಯಾಂಕಾಂಚೆಂ ಧ್ಯೇಯ್ ಗೀತ್ ಆನಿ ಪ್ರಾರ್ಥನಾ ಸವೆಂ ಕಾರ್ಯಾಚಿ ಸುರ್ವಾತ್ ಜಾತಚ್, ಅಧ್ಯಕ್ಶ್ ಅನಿಲ್ ಲೋಬೊನ್ ತಾಚ್ಯಾ ಮುಕೆಲ್ಪಣಾಚ್ಯಾ ಆಡಳ್ತ್ಯಾ ಮಂಡಳೆನ್ ಬ್ಯಾಂಕಾಚೆಂ ಸುಂಕಾಣ್ ಘೆತ್ಲ್ಯಾ ಉಪ್ರಾಂತ್ ಪುಡ್ ಕೆಲ್ಲಿಂ ಪಂಥಾಹ್ವನಾಂ ಆನಿ ದಾಕಲ್ ಕೆಲ್ಲ್ಯಾ ಪ್ರಗತೆಚೊ ವಿವರ್ ಮಾಂಡುನ್, ಮುಕೆಲ್ ಸಯ್ರೊ ಆನಿ ಮಾನಾಚ್ಯಾ ಸಯ್ರ್ಯಾಂಕ್ ಯೆವ್ಕಾರ್ ಮಾಗ್ಲೊ. ಬ್ಯಾಂಕಾಚೊ ಸ್ಥಾಪಕ್ ಅಧ್ಯಕ್ಷ್ ಫಿ. ಎಫ್. ಎಕ್ಸ್. ಸಲ್ಡಾನ್ಹಾ ಹಾಚ್ಯಾ ತಸ್ವಿರೆಕ್ ವೆದಿವಯ್ಲ್ಯಾ ಸಯ್ರ್ಯಾಂನಿ ಫುಲಾಂ – ಪಾಕ್ಳ್ಯೊ ಅರ್ಪುನ್ ಮಾನ್ ಕೆಲೊ. ಹ್ಯಾ ವೆಳಿಂ ಫಿ. ಎಫ್. ಎಕ್ಸ್. ಸಲ್ಡಾನ್ಹಾ ಹಾಂಚೊ ನಾತು ಎಚ್. ಟಿ. ಸಲ್ಡಾನ್ಹಾನ್ ವೆದಿರ್ ಸಾಂಗಾತ್ ದಿಲೊ.
ದೆಶಾಚೊ ಆದ್ಲೊ ರಾಷ್ಟ್ರಾಧ್ಯಕ್ಶ್ ದೊ| ಅಬ್ದುಲ್ ಕಲಾಂ ಹಾಂಚ್ಯಾ ಜಿವಿತಾಚೆಂ ಘಡಿತ್ ಉಲ್ಲೇಕ್ ಕರುನ್ ಮುಕೆಲ್ ಸಯ್ರೊ ಮಾ| ಬಾ| ಡೆನಿಸ್ ಡೆಸಾ ಹಾಣಿ ಸ್ಥಾಪಕಾಂಚ್ಯಾ ದಿಸಾಚೊ ಮಹತ್ವ್ ವಿವರುನ್ ಸಾಂಗ್ಲೊ. ಉಪ್ಕಾರಿ ಮನಾನ್ ಪಾಟಿಂ ನದರ್, ಸಂಸ್ಥಾಚ್ಯಾ ಬುನ್ಯಾದಿ ಶೆವೊಟಾಚೆರ್ ಥಿರಾಸಣ್ , ಸ್ವಯಂ ಮೌಲ್ಯಮಾಪನ್ – ವಿಶ್ಲೇಷಣ್ ಆನಿ ದೆವಾಚೆರ್ ಪಾತ್ಯೆಣಿ ದವರ್ನ್ ಪಂಥಾಹ್ವನಾಂ ಫುಡ್ ಕರುನ್ ಮುಕಾರ್ ಸರ್ಚೆಂ ಧಯ್ರ್ ಹ್ಯಾ ವಿಶಯಾಂಚೇರ್ ದೆಕಿ ದೀವ್ನ್ ಮಾ। ಬಾ। ಡೆಸಾ ಹಾಣಿ ಆಪ್ಲೊ ಸಂದೇಶ್ ದಿಲೊ.
ಪಾನೀರ್‌ ದಿ ಮರ್ಸಿಡ್ ಅನಾಥಾಶ್ರಮ್ ಆನಿ ಕಂಕ್ನಾಡಿ ಶಾಲೋಮ್ ಟ್ರಸ್ಟ್‌ ಹಾಂಕಾ ಹ್ಯಾ ಸಂದರ್ಬಾರ್ ತಾಣಿ ಕರ್ಚ್ಯಾ ಸಮಾಜ್‌ಮುಕಿ ವಾವ್ರಾಕ್ ಕುಮ್ಕೆ ದೆಣ್ಗಿ ಅರ್ಪಿಲಿ.
ಸಿ| ಕ್ಲಾರಾ ಮಿನೇಜಸ್ ಹಾಣಿ ಬ್ಯಾಂಕಾಚೆಂ ಬುಲೆಟಿನ್ ಉಗ್ತಾಯ್ಲೆಂ ಆನಿ ಸ್ಥಿರ್ ವಾಡಾವಳೆಚ್ಯಾ ವಾಟೆರ್ ಅವ್ಕಾಸ್, ಸೊಸ್ಣಿಕಾಯ್, ವೃತ್ತಿಪರತಾ ಆನಿ ಪರಿಶ್ರಮಾಚ್ಯಾ ಮಹತ್ವಾ ವಿಶ್ಯಾಂತ್ ವಿವರುನ್ ಸಾಂಗ್ಲೆಂ.
ಸಿಎ ಪರೀಕ್ಶೆಂತ್ ಉತ್ತೀರ್ಣ್ ಜಾಲ್ಲ್ಯಾ ಬ್ಯಾಂಕಾಚ್ಯಾ ಗ್ರಾಹಕಾಂಚ್ಯಾ ಭುರ್ಗ್ಯಾಂಕ್ ಹ್ಯಾ ವೆಳಾರ್ ಮಾನ್ ಕೆಲೊ. ಮಾಲ್ಘಡೊ ಸಿ.ಎ. ವಿವಿಯನ್ ಪಿಂಟೊ ಹ್ಯಾ ಸಂದರ್ಭಿಂ ವೆದಿರ್ ಹಾಜರ್ ಆಸ್ಲೊ. ಎಂಸಿಸಿ ಬ್ಯಾಂಕಾಚೆ ಆದ್ಲೆ ನಿರ್ದೇಶಕ್ ಎಡ್ಮಂಡ್ ಜೆ.ಬಿ. ಫ್ರಾಂಕ್ ಆನಿ ಮಾರ್ಸೆಲ್ ಡಿಸೋಜ, ಮಂಗ್ಳುರ್ ಕೊಂಕಣ್ಸ್ ದುಬಯ್ ಹಾಚೊ ಅಧ್ಯಕ್ಶ್ ಸ್ಟೀಫನ್ ಮಿನೇಜಸ್ ಹಾಂಕಾ ಹ್ಯಾ ಸಂದರ್ಭಾರ್ ತಾಂಚ್ಯಾ ಸಾಧನಾ ಖಾತಿರ್ ಮಾನ್ ಕೆಲೊ.
ಸಿ.ಎ. ಲೈನಲ್ ಅರಾನ್ಹಾ ಹಾಣಿ 1912 ವ್ಯಾ ವರ್ಸಾ ಸಂಸಾರ್, ಭಾರತ್ ದೇಶ್ ಆನಿ ಮಂಗ್ಳುರ್ಚೊ ಪ್ರದೇಶ್ ಕಸೊ ಆಸ್ಲೊ ಮ್ಹಳ್ಳ್ಯಾ ಐತಿಹಾಸಿಕ್ ಗಜಾಲಿ ಥಾವ್ನ್ ಸುರ್ವಾತ್ ಕರುನ್, ಬ್ಯಾಂಕಾಚ್ಯಾ ಆರ್ಥಿಕ್ ಪ್ರಗತೆಚೆರ್ ಖೊಲಾಯೆಚಿ ಮೊಲಾಮಾಪ್ಣಿ ಕೆಲಿ. ಅಧ್ಯಕ್ಷ್ ಆನಿ ಆಡಳ್ತ್ಯಾ ಮಂಡಳೆಕ್ ತಶೆಂ ಶಿಬಂದೆಕ್ ಅಭಿನಂದನ್ ಪಾಟಯಿಲ್ಲ್ಯಾ ತಾಣಿ, ಬ್ಯಾಂಕಾಚಿ ವಾಡಾವಳ್ ಆನಿ ಪ್ರಗತಿ ಗ್ರಾಹಕಾಂಚ್ಯಾ ವಿಶ್ವಾಸಾಚೆರ್ ಹೊಂದೊನ್ ಆಸಾ ಜಾಲ್ಲ್ಯಾನ್, ಗ್ರಾಹಕಾಂಚ್ಯಾ ವಿಶ್ವಾಸಾ ಸಾಂಗಾತಾ ಸೊಡ್‌ದೊಡ್ ಕರಿನಾಯೆ ಮ್ಹಣ್ ಉಲೊ ದಿಲೊ.
ನವ್ಯಾನ್ ಸಿ.ಎ. ಪರೀಕ್ಷೆಂತ್ ಉತ್ತೀರ್ಣ್ ಜಾಲ್ಲ್ಯಾ ಭುರ್ಗ್ಯಾಂಕ್ ಉಲ್ಲಾಸ್ ಪಾಟವ್ನ್ ಸಿ.ಎ. ಲೈನಲ್ ಅರಾನ್ಹಾ ಹಾಣಿ ಮನ್ಶ್ಯಾಚಿ ಯಶಸ್ವಿ ಫಕತ್ ಫಲಿತಾಂಶ್ ಆನಿ ಅಂಕ್ಡ್ಯಾಂನಿ ಮೆಜುಂಕ್ ಫಾವೊ ನಯ್, ಬಗಾರ್ ಆಮಿ ಆಮ್ಚ್ಯಾ ವೃತ್ತೆಂತ್ ಆನಿ ಕರ್ನ್ಯಾಂನಿ ಆಪಡ್ಲೆಲ್ಯಾ ಆಮ್ಚ್ಯಾ ಭಂವ್ತಿ ಆಸ್ಚ್ಯಾ ಭಾಂವ್ಡಾಚ್ಯಾ ಜಿವಿತಾಂತ್ ಮೆಜುಂಕ್ ಜಾಯ್ ಮ್ಹಣ್ ಆಪುರ್ಬಾಯೆಚೊ ಸಂದೇಶ್ ದಿಲೊ.
ಪಾಟ್ಲ್ಯಾ ಸುಮಾರ್ ಪನ್ನಾಸ್ ವರ್ಸಾಂ ಪಾಸುನ್ ಮಂಗ್ಳುರ್ ಭಂವ್ತಿಂ ಸಮಾಜ್ ಸೆವಾ ಶೆತಾಂತ್ ನಿರಂತರ್ ವಾವುರ್ನ್ ಆಸ್ಚ್ಯಾ ಪ್ರಜ್ಞ ಕೌನ್ಸೆಲಿಂಗ್ ಸೆಂಟರ್‌ ಹಾಚಿ ಸ್ಥಾಪಕಿ ಪ್ರೊ| ಹಿಲ್ಡಾ ರಾಯಪ್ಪನ್ ಹಿಕಾ ಹ್ಯಾ ಸುವಾಳ್ಯಾರ್ ಮಾನ್ ಕೆಲೊ. ಆಪ್ಲ್ಯಾ ಉಲವ್ಪಾಂತ್ ಜಿವಿತಾಂತ್ ಸಹಾನುಭೂತಿ ಪ್ರಾಸ್ ವ್ಹಡ್ ಸಂತೃಪ್ತಿ ದುಸ್ರಿ ನಾ ಮ್ಹಳ್ಳ್ಯಾ ಪ್ರೊ| ರಾಯಪ್ಪನ್ ಹಿಣೆ ತಿಚ್ಯಾ ಕುಟ್ಮಾಕ್ ಎಕಾ ತೆಂಪಾರ್ ಎಂ.ಸಿ.ಸಿ. ಬ್ಯಾಂಕಾನ್ ಕೆಲ್ಲ್ಯಾ ಕುಮ್ಕೆಚೊ ಉಡಾಸ್ ಕಾಡುನ್ ಕೃತಜ್ಞತಾ ವೆಕ್ತ್ ಕೆಲಿ.
ಬ್ಯಾಂಕಾಚೆ ನಿರ್ದೇಶಕ್ ಅನಿಲ್ ಪತ್ರಾವೊ, ಅಂಡ್ರ್ಯು ಡಿಸೋಜ, ಹೆರಾಲ್ಡ್ ಮೊಂತೇರೊ, ರೋಶನ್ ಡಿಸೋಜ, ಜೆರಾಲ್ಡ್ ಪಿಂಟೊ, ಮೆಲ್ವಿನ್ ವಾಸ್, ಸಿ.ಜಿ.ಪಿಂಟೊ, ಐರಿನ್ ರೆಬೆಲ್ಲೊ, ಫ್ರೀಡಾ ಡಿಸೋಜ. ಶರ್ಮಿಳಾ ಮಿನೇಜಸ್, ಫೆಲಿಕ್ಸ್ ಡಿಕ್ರುಜ್ ಆನಿ ಆಲ್ವಿನ್ ಪಿ. ಮೊಂತೇರೊ ಹಾಜರ್ ಆಸ್ಲೆ.
ಬ್ಯಾಂಕಾಚೊ ಮಹಾಪ್ರಬಂಧಕ್ ಸುನಿಲ್ ಮಿನೇಜಸ್ ಹಾಣೆ ದಿನ್ವಾಸ್ ಪಾಟಯ್ಲೆ. ಗ್ರೀಶ್ಮಾ ಸಲ್ಡಾನ್ಹಾ, ನೀರ್‌ಮಾರ್ಗ ಹಿಣೆ ಕಾರ್ಯೆಂ ಚಲವ್ನ್ ವೆಲೆಂ. ಕಾರ್ಯಾಚ್ಯಾ ಪಯ್ಲೆಂ ಬ್ಯಾಂಕಾಚಿ ಪ್ರಗತಿ ದಾಕಂವ್ಚೆಂ ಸಾಕ್ಶೆಚಿತ್ರ್ ಪ್ರದರ್ಶಿತ್ ಕೆಲೆಂ.
