‘ಅಪುಟ್ ಭಾಸ್’ ಮ್ಹಳ್ಳೆಂ ಪರಿಕಲ್ಪನ್ ಭಾಶೆಚಾ ಪ್ರಸರಣಾಕ್ ಏಕ್ ಅಡ್ಕಳ್

130

ಸಾಹಿತ್ ವಾಚ್ಲೆಲ್ಯಾನ್ ಆಮ್ಕಾಂ ಕಿತೆಂ ಫಾಯ್ದೊ ಆಸಾ? ಏಕ್ ಕಾಣಿ ವಾ ಕವಿತಾ ವಾಚ್ಲೆಲ್ಯಾನ್ ಆಮ್ಕಾಂ ಕಿತೆಂ ಲಾಭ್ತಾ? ಕಾದಂಬರಿ ವಾಚ್ಲ್ಯಾರ್ ಕಿತೆಂ ಉಪ್ಕಾರ್ತಾ? ಅಶೆಂ ಮ್ಹಣೊನ್ ಪುಸ್ತಕಾಂವಿಶಿಂ, ಸಾಹಿತಿಕ್ ಕಾರ್ಯವೆಳಿಂ ವಿಶಿಂ, ಸಾಹಿತಿಕ್ ವೆಕ್ತಿವಿಶಿಂ ಉಲಯ್ತಾಸ್ತಾನಾ ಆಜ್ ಕಾಳ್ ಜಾಯ್ತ್ಯಾನಿಂ ವಿಚಾರ್ಚೆಂ ಆಸಾ . ಮ್ಹಜಾ ಅನ್ಭೋಗಾ ಪರ್ಮಾಣೆಂ ಹಾಂವೆ ತಾಂಕಾ   ‘ಸಾಹಿತ್ ಆಮ್ಕಾಂ ಆಮ್ಚೆಥಾವ್ನ್ಂಚ್ ಸ್ವತಂತ್ರ್ ಕರ್ತಾ’ ಮ್ಹಳ್ಳಿ ಜಾಪ್ ದಿಂವ್ಚಿ ಆಸಾ.

ಆಮ್ಚೆಂ ಸರ್ವಾಂಚೆಂ ಜಿವಿತ್ ಎಕಾ ನಾಂವಾಕ್ ಆನಿಂ ಎಕಾ ಕಾಳಾಕ್ ಸೀಮಿತ್ ಜಾವ್ನ್ ಆಸ್ತಾ. ವೈಯುಕ್ತಿಕ್ ಜಾವ್ನ್ ಖಂಯ್ಸರ್ ಗೀ ಜಲ್ಮೊನ್ ಕಾಂಯ್ ಇಲ್ಲೊ ಕಾಳ್ ಹ್ಯಾ ಸಂಸಾರಾಂತ್ ಜಿಯೆವ್ನ್ ಉಪ್ರಾಂತ್ ಮರೊನ್ ವೆಚಿ ಕಾಲೆತ್ ಆಮ್ಚಿ. ಪುಣ್ ಆಮಿಂ ಆಮ್ಚೆ ವೈಯುಕ್ತಿಕ್ ಪಣ್ ಸಾಂಡುನ್ ಮನ್ಶಾಕುಳಾಚೆಂ ಜಿವಿತ್ ಪಳೆಂವ್ಕ್ ಗೆಲ್ಯಾರ್ ತೆಂ ಎಕಾ ಸಾಗೊರಾ ಪರಿಂ ವಿಸ್ತಾರ್ ದಿಸ್ತಾ. ತಾಂತುನ್ ವಿಶೇಸ್ ಗುಂಡಾಯ್ ಆಸಾ. ಗಿನ್ಯಾನಾಚೆಂ ಭಂಡಾರ್ ಆಸಾ.  ಆಸಲ್ಯಾ ಎಕಾ ಗಿನ್ಯಾನಾ ಸಾಗೊರಾಚಿ ವಳಕ್ ಕರ್ನ್ ದಿಂವ್ಚ್ಯಾ ವೊವ್ಳಿಗೆಕ್ ಅಮಿಂ ಸಾಹಿತ್ ಮ್ಹಣ್ ಠರಾವ್ಯೆತ್. ಸಾಹಿತ್ ಆಮ್ಕಾಂ ಎಕಾ ಪರ್ಕ್ಯಾ ವೆಕ್ತಿತ್ವಾಭಿತರ್ ಘುಸೊಂಕ್ ಅವ್ಕಾಸ್ ಕರ್ನ್ ದಿತಾ. ಪರ್ಕ್ಯಾಕ್ ಸಮ್ಜೊಂಕ್ ಅಧಾರ್ ಕರ್ನ್ ದಿತಾ. ಕಾಣ್ಯೆಂತ್ ಯಾ ಕವಿತೆಂತ್ ಏಕ್ ಕಿರ್ ದಾರ್ ಅಸಾ ಜಾಲ್ಯಾರ್ ವಾಚುಂಕ್ ಧರ್ತಾನಾ ಸವ್ಕಾಸ್ ಆಮಿಂ ತ್ಯಾ ಕಿರ್ ದಾರಾಭಿತರ್ ರಿಗ್ತಾಂವ್ ಅನಿಂ ಕಿರ್ ದಾರಾಚೆಂ ಜಿವಿತ್ ಭೊಗ್ಚೊ ಅನ್ಭೋಗ್ ಜೊಡುಂಕ್ ಸಕ್ತಾಂವ್.

ದಾಕ್ಲ್ಯಾಕ್, ಆಮ್ಕಾಂ ಕೊಣಾಯ್ಕಿ ವ್ಯಭಿಚಾರಿಣೆಚೆಂ ಜಿವಿತ್ ನಾ. ಪುಣ್ ಎಕಾ ವ್ಯಭಿಚಾರಿಣೆಚಿ ಕಾಣಿ ವಾಚ್ತಾಂವ್ ಮ್ಹಣ್ ಚಿಂತ್ಯಾಂ. ಕಾಣಿಯೆಂತ್ಲ್ಯಾ  ವ್ಯಭಿಚಾರಿಣೆಕ್ ಏಕ್ ಬಾಳ್ಶೆಂ ಆಸಾ. ಏಕ್ ದೀಸ್ ಎಕ್ಲೊ ಗಿರಾಯ್ಕಿ ಆಯ್ಲೆಲ್ಯಾ ವೆಳಾರ್ ತಿ ಅಪ್ಲ್ಯಾ ಭುರ್ಗ್ಯಾಕ್ ಘರಾ ಮಧ್ಲ್ಯಾ ಚೊವ್ಕೆಂತ್ ನಿದಾಯ್ತಾ ಅನಿ ಭಿತರ್ ವ್ಯಭಿಚಾರಾಂತ್ ವ್ಯಸ್ತ್ ಜಾತಾ. ಥೊಡ್ಯಾ ವೆಳಾನ್ ಏಕ್ ಮೂಯ್ ಚಾಬ್ಲೆಲ್ಯಾನ್ ಭುರ್ಗೆಂ ನಿದೆಥಾವ್ನ್ ಜಾಗೆಂ ಜಾತಾ ಆನಿಂ ರಡೊಂಕ್ ಲಾಗ್ತಾ. ಭುರ್ಗ್ಯಾಚೆಂ ರಡ್ಣೆಂ ಅಯ್ಕಾಲ್ಲಿ  ತಾಚಿ  ಅವಯ್ ಮ್ಹಣ್ಜೆ ವ್ಯಭಿಚಾರಿಣ್ ಗಣ್ಣೆ ಕರಿನಾಸ್ತಾಂ ಅಪ್ಲ್ಯಾ ಗಿರಾಯ್ಕ್ಯಾಸವೆಂ ವ್ಯಭಿಚಾರ್ ಮುಂದರಿತಾ. ಜಾಯ್ತೊ ವೇಳ್ ರಡ್ ಲ್ಲೆ ಉಪ್ರಾಂತ್ ಭುರ್ಗೆಂ ಪರತ್ ನಿದೆಕ್ ವೆಂಗ್ತಾ.

ಕಾಣಿ ವಾಚ್ಲ್ಯಾ ಯಾ ಆಯ್ಕಾಲ್ಲ್ಯಾ ಉಪ್ರಾಂತ್ ಆಮ್ಚೆ ಭಿತರ್ ಕಾಳಾಂಥಾವ್ನ್ ರೊಂಬೊನ್ ಗೆಲ್ಲ್ಯಾ  ಅವಯ್ ಮ್ಹಳ್ಳ್ಯಾ ಏಕ್ ರೂಪಿಂ ಪರಿಕಲ್ಪಣಾಚಿ ಗಡ್ ಫುಟೊನ್ ಉಸಾಳ್ತಾ. ಸಮಾನ್ ಜಾವ್ನ್,  ಅನ್ಯೇಕೆ ಕುಶಿನ್ ಆಮಿಂ ಸಮ್ಜಲ್ಲ್ಯಾ ವ್ಯಭಿಚಾರ್ ಮ್ಹಳ್ಳ್ಯಾ ಚಿಂತ್ಪಾಚೆ ದೊರೆ ಕೊಸ್ಳೊನ್ ಪಡ್ತಾತ್. ಅಶೆಂ ಸಾಹಿತ್ ಆಮ್ಕಾಂ ಆಮ್ಚ್ಯಾ ಚಿಂತ್ಪಾ ಭಾಯ್ರ್ ವ್ಹರ್ನ್ ಸ್ವತಂತ್ರ್ ಕರ್ತಾ. ಆಮ್ಚ್ಯಾ ಚಿಂತ್ಪಾಚಿ ವಿಸ್ತಾರಾಯ್ ಚಡಯ್ತಾ. ಆಮಿಂ ಚಿಂತ್ಪಾನ್ ವಾಡ್ತೆ ವೆತಾಂವ್ .

[blockquote align=”none” author=””]ಭಾಸ್ ಮ್ಹಳ್ಯಾರ್ ಕಿತೆಂ?[/blockquote]

ಕಾರ್ಲ್ ಮಾರ್ಕ್ಸಾನ್ ಬರಯಿಲ್ಲ್ಯಾ ಜರ್ಮನ್ ಫಿಲೋಸಫಿಂತ್ ಭಾಶೆವಿಶಿಂ ಭೋವ್ ಸೊಭಿತ್ತ್ ಏಕ್  ವ್ಯಾಖ್ಯಾನ್ ಆಸಾ.  ‘ಹೆರಾಂಖಾತಿರ್ ಜಿಯೆಂವ್ಚೆಸವೆಂ ಅಪ್ಣಾಖಾತಿರ್ ಜಿಯೆಂವ್ಚ್ಯಾ ಪ್ರಕ್ರಿಯೆಕ್’ ತೊ ಭಾಸ್ ಮ್ಹಣ್ ನಾಂವ್ ದಿತಾ. ವಿರ್ಗಾಳಾವ್ನ್ ಸಾಂಗ್ಚೆಂ ತರ್  ‘ಆಮ್ಚ್ಯಾ ಭಾಶೆಂತ್ ಹೆರ್ ಕಿತ್ಲೆ ಜಣ್ ಆಸಾತ್ ಗೀ , ತಿತ್ಲ್ಯಾಚ್ ಮಾಪಾನ್ ಆಮಿಂ ಆಮ್ಚೆ ಭಾಶೆಂತ್ ಅಸೊಂಕ್ ಸಕ್ತಾಂವ್ . ದಾಕ್ಲ್ಯಾಕ್ ಹಾಂವೆಂ ಹಾಂಗಾ  ಬರಯಿಲ್ಲೆಂ, ಉಚಾರ್ ಲ್ಲೆಂ ತುಮಿಂ ಕೊಂಕ್ಣಿ ಜಾಣಾ ಆಸ್ಚೆ ಲೋಕ್ ವಾಚ್ತಾತ್/ಆಯ್ಕಾತಾತ್. ತುಮ್ಕಾಂ ಹೆಂ ಸಾರ್ಕೆಂ ಸಮ್ಜತಾ.  ಎಕಾ ವೆಳಾ ಹೆಂಚ್ ಪಂಜಾಬಿ ಮಾತ್ರ್ ಜಾಣಾ ಆಸ್ಚ್ಯಾ ಲೊಕಾಮುಕಾರ್ ಉಚಾರ್ ಲ್ಲೆಂ ತರ್ ತಾಂಕಾ ಸಮ್ಜತ್ ಗೀ? ನಾ. ಸಾಧ್ ಚ್ ನಾ. ದೆಕುನ್ ಮ್ಹಜಾ ಕೊಂಕ್ಣೆಂತ್ ತುಮಿಂ ಕಿತ್ಲೆ ಅಸಾತ್ ಗೀ ತಿತ್ಲ್ಯಾ ಮ್ಹಣಾಸರ್ ಹಾಂವ್ ತುಮ್ಚ್ಯಾ ಕೊಂಕ್ಣೆಂತ್ ಆಸಾಂ. ತತ್ವ್ ಶಾಸ್ತ್ರಾಂಯ್ ಭಾಶೆಕ್ ಇತ್ಲೆಂ ಸೊಭಿತ್ತ್ ವಿವರಣ್ ದಿಲ್ಲೆಂ ಹಾಂವೆಂ ದುಸ್ರೆಂ ವಾಚುಂಕ್ ನಾ.

ಆತಾಂ ತ್ಯಾಚ್  ಪಂಜಾಬಿಂಕ್ ಥೊಡಿಶಿ ಕೊಂಕ್ಣಿ ಸಮ್ಜಾತಾ ಮ್ಹಣ್ ಚಿಂತ್ಯಾಂ.  ತೆದಾಳಾ ಕಿತೆಂ ಜಾತಾಂ?  ಸಲೀಸ್ ಜಾವ್ನ್ ಸಾಂಗ್ಚೆಂ ತರ್ ತೆ ಪಂಜಾಬಿ ನವ್ಯಾನ್ ಮ್ಹಜಾ ಭಾಶೆ ಭಿತರ್  ಯೆತಾತ್ ಅನಿಂ ಮ್ಹಜಾ ಭಾಶೆಚಿ ಪ್ರಸರಣ್ ಸಕತ್ ಚಡ್ತಾ. ಅರ್ಥಾಚೊ ಗಡಿ ರೂಂದ್ ಜಾತೆ ವೆತಾತ್ . ಸಬ್ಧಾಂಚೆ ಅರ್ಥ್ ಭಾಶೆಂತ್ ರೊಂಬೊನ್ ಆಸ್ತಾತ್ ಮ್ಹಣೊನ್ ಚಡಾವತ್ ಸಾಂಗ್ಚೆಂ ಆಸ್ತಾ. ಪುಣ್ ತ್ಯಾ ಅಭಿಪ್ರಾಯೆಕ್ ಮ್ಹಜೊ ವಿರೋಧ್ ಆಸಾ. ಎಕಾ ಭಾಶೆಭಿತರ್ ನಿರಂತರ್ ಮ್ಹಳ್ಳೆಬರಿ ಸಬ್ಧಾಂಚೆಂ ಪ್ರಯೋಗ್ ಜಾತಾನಾ ತೆ ವಾಡ್ತೆ ವೆತಾತ್ ಆನಿಂ ಅರ್ಥಾಂಚಾ ಬದ್ಲಾವಣೆಕ್ ವಳಗ್ ಜಾತಾತ್. ಅಶೆಂ ಭಾಶೆಚಾ ಸಂಸಾರಾಂತ್, ತೆ ವಾಪಾರ್ಚೊ ಲೋಕ್ ಯೀ  ವ್ಹಡ್ ವ್ಹಡ್ ಜಾತೆ ವೆತಾ.

ದುಸ್ರ್ಯಾನ್ ಆಮ್ಚೆ ಮಧೆಂ  ‘ಶುದ್ಧ್ ಭಾಸ್’ ಯಾ  ‘ಅಪುಟ್ ಭಾಸ್’  ಮ್ಹಳ್ಳೆಂ ಚಿಂತಾಪ್ ಚಡ್ ಬಳ್ ಆಸಾ. ಆಜ್ ಕೊಂಕ್ಣೆಕ್ ಧಕೊ ಬಸಯ್ಲ್ಯಾ ವ್ಹಡ್ ಗಜಾಲೆಪಯ್ಕಿಂ ಹೆಂ ಚಿಂತಾಪ್ ಪಯ್ಲ್ಯಾ ಪಂಗ್ತೆರ್ ಬಸ್ತಾ. ಭುರ್ಗಿಂ ಮ್ಹಣ್ತಾತ್  ‘ಆಮ್ಕಾಂ ಕೊಂಕ್ಣಿ ಉಲಂವ್ಕ್ ನಾಕಾ. ಆಮ್ಕಾಂ ಸುಢಾಳ್ ಕೊಂಕ್ಣಿ ಕಳನಾ. ಚಾರ್ ಜಣಾಂ ಮುಕಾರ್ ಆಮಿಂ ಹಾಸ್ಯಾಂಕ್ ವಳಗ್ ಜಾತಾಂವ್’ . ಕಾರ್ಯನಿರ್ವಾಹಕ್ ಮ್ಹಣ್ತಾಂತ್,  ‘ಆಮಿಂ ಇಂಗ್ಲಿಷಾಂತ್ ಕಾರ್ಯೆಂ ಚಲಯ್ತಾಂವ್ … ಆಮ್ಕಾಂ  ಅಪುಟ್ ಕೊಂಕ್ಣಿ ಯೇನಾ.’ ಟೀಚರಾಂ ಮ್ಹಣ್ತಾಂತ್ ಬುಕಾಂತ್ಲಿ ಕೊಂಕ್ಣಿ ಅಮ್ಕಾಂ ಅದಾಳ್ತಾ. ದೆಕುನ್ ದೊತೊರ್ನ್ ಆಮಿಂ ಇಂಗ್ಲಿಷಾಂತ್ ಶಿಕಯ್ತಾಂವ್. ಹಾಂಕಾ ನ್ಯಾಯೀಕರಣ್ ದಿತಾನಾ , ಭಾಶೆಂತ್ಲೆಂ ಸಬ್ಧಾಂಚೆಂ ಉಛ್ಛಾರ್, ವ್ಯಾಕರಣ್ ಸಂಪೂರ್ಣ್ ವಿಸ್ರೊನ್ ಸೊಡಿಜೆ ಮ್ಹಣೊನ್ ಅರ್ಥ್ ನ್ಹಂಯ್.  ತೆಂ ಸಗ್ಳೆಂ ಲೆಕಾಕ್ ಧರ್ಚೆ ಸವೆಂ ಆಮ್ಚಿ ಭಾಸ್ ಆಯ್ಚಿ ಪಿಳ್ಗಿ ನವ್ಯಾ ಎಕಾ ರಿತಿನ್/ಶೈಲೆರ್ ಉಲಯ್ತೆ ಆಸಾ ಮ್ಹಳ್ಳೆಂಯ್ ಆಮಿಂ ಗುಮನಾಂತ್ ದವ್ರುಂಕ್ ಆಸಾ. ತ್ಯಾ ದಿಶೆನ್ ತಾಂಕಾ ಪ್ರೋತ್ಸಾಹ್ ದೀಂವ್ಕ್ ಆಸಾ. ವಾಲೆನ್ಶಿಯಾಗಾರಾನ್ ಕೊಂಕ್ಣಿ ಉಲಯ್ಲ್ಯಾರ್  ತಿ ಬೆಳಾಚಾ ಸ್ಟ್ಯಾನಿನ್ ಉಲಂವ್ಚ್ಯಾ ಕೊಂಕ್ಣೆಬರಿ ಆಯ್ಕೊಂಚಿ ನಾ. ತಶೆಂ ಮ್ಹಣೊನ್ ಹಾಂವೆ ಉಲಯ್ಲೆಬರಿಚ್ ತುವೆಂ ಉಲಯ್ಜೆ ಮ್ಹಣ್ ಸ್ಟ್ಯಾನಿ ಬೆಳಾನ್ ವಾಲೆನ್ಶಿಯಾಗಾರಾಚೆರ್  ದಬಾವ್ ಘಾಲುಂಕ್ ಜಾಯ್ನಾ. ಬಗಾರ್ ಸ್ಟ್ಯಾನಿ ಬೆಳಾನ್ ವಾಲೆನ್ಶಿಯಾಚಾ ಕೊಂಕ್ಣೆಕ್ ಯೀ ಸ್ವೀಕಾರ್ ಕರಿಜೆ ಪಡ್ತಾ, ಕಾರ್ ಸ್ಟ್ರೀಟಾಚಾನ್‌ಯೀ ಆಯ್ಕಾಜೆ ಪಡ್ತಾ.  ಭಾಸ್ ವಿವಿಧ್ ರಿತಿನಿಂ ಅಸ್ಲ್ಯಾರ್ ಚ್  ತಿಕಾ ಸೊಭಾಯ್. ಭಾಷೆಕ್ ಎಕಾ ಮಾನ್ ದಂಡಾಚೆರ್ ಬಾಂಧುನ್ ಘಾಲುಂಕ್ ಕರ್ಚಿಂ ಪ್ರೇತನಾ  ಸಾರ್ಕಿ ನ್ಹಂಯ್ ಮ್ಹಳ್ಳಿ ಮ್ಹಜಿ ಅಭಿಪ್ರಾಯ್.  ಕೊಂಕ್ಣೆಂತ್ ಮಾತ್ರ್ ನ್ಹಂಯ್,  ಸಂಸಾರಾಂತ್ಲ್ಯಾ ಹರ್ ಭಾಸಾನಿಂ ಹೊ ಪ್ರತಿಭಾಸ್ ಆಮ್ಕಾಂ ಪಳೆಂವ್ಕ್ ಮೆಳ್ತಾ.

ಫ್ರೆಂಚ್ ಭಾಶೆಂತ್ಲೊ ಳ: ಮ್ಹಳ್ಳೊ ಸಬ್ಧ್ ಇಂಗ್ಲಿಷಾಕ್ ಪಾವ್ತಾನಾ  ‘ಜ’  ಜಾವ್ನ್ ಬದಳ್ತಾ. ಕಾರಣ್ ಬ್ರಿಟಿಷಾಂಕ್ ಳ: ಮ್ಹಳ್ಳೆಂ ಉಚ್ಚಾರಣ್ ಯೇನಾ.  ದೆಕುನ್ ತೆ ಫ್ರಾನ್ಸಾಚಾ ಳಾಂಗ್ ವಾಲ್ ಳಾಂಗಕ್ |  ಜೀಂಗ್ ವಾಲ್ ಜೀಂಗ್ ಜಾವ್ನ್ ಬದ್ಲಿತಾತ್.

‘ಳಾಂಗ್ ‘ ಳೆ : ನೇ ಇಂಗ್ಲಿಷಾಕ್ ಪಾವ್ತಾನಾ  ತೆ ಜೀಂಗ್  ಜಿನೇ ಜಾವ್ನ್ ಬದ್ಲಾತಾ.

ಪುಣ್ ಉಚ್ಛಾರಣಾಂತ್ ಇತ್ಲೆ ವ್ಯತ್ಯಾಸ್ ಆಸೊನೀ ಬ್ರಿಟಿಷಾಂಚೆಂ ಉಲಂವ್ಚೆಂ ಚೂಕ್ ಮ್ಹಣ್ ಎದೊಳ್ ಕೊಣೆಂಚ್ ಸಾಂಗ್ ಲ್ಲೆಂ ನಾ. ಕಾರಣ್ ಬ್ರಿಟಿಷ್ ಸಂಸಾರ್ ಚ್ ಬದ್ಲುಂಕ್ ಸಕ್ಚೆ ಮನಿಸ್.  ಎಕಾ ಕಾಳಾರ್ ಸಂಸಾರಾಚೆರ್ ಅಧಿಕಾರ್ ಚಲಯ್ಲೆ ಮನಿಸ್ ತೆ.  ದೆಕುನ್ ತಾಣಿಂ ಕಶೆಂಯ್ ಉಚ್ಛಾರಣ್ ಕರ್ಯೆತ್. ತಾಂಚೆ ಉಚ್ಛಾರಣ್ ಅಸಾ ತಶೆಂ ಸ್ವೀಕಾರ್ ಜಾತಾ ಆನಿ ತಾಚೆಂ ಅನುಕರಣ್ ಜಾತಾ. ಪುಣ್ ಆಮ್ಚ್ಯಾ ಎಕಾ ಮಲ್ಬಾರಿನ್  ‘ಕಂಟೈನರ್’  ಅಸ್ಲೆಲೆಂ  ‘ಗಂಡೈನರ್’  ಜಾವ್ನ್ ಉಚ್ಛಾರಣ್ ಕೆಲ್ಯಾರ್ ತೆಂ ಚೂಕ್ ತಶೆಂ ದಿಸ್ತಾ. ಮದ್ರಾಸಿನ್  ‘ಪರ್ಮನೆಂಟ್’ ಅಸ್ಲೆಲೆಂ  ‘ಬೆರ್ಮನೆಂಟ್’ ಮ್ಹಣ್ ಉಚ್ಛಾರ್ ಕರ್ತಾನಾ ತೆಂ ಕೇವಲ್ ಹಾಸ್ಯ್ ಅನುಕರಣಾಕ್ ಸೀಮಿತ್ ಜಾತಾ.

ಕೊಂಕ್ಣೆಂತ್ ಯೀ  ‘ಶುದ್ಧ್ ಭಾಸ್’  ಮ್ಹಳ್ಳೊ ಸಂಕಲ್ಫ್ ಆದಿಂಮಾಗಾಂಥಾವ್ನ್ ಆಸಾ. ಅಜೂನ್ ಥಂಯ್ ಹಾಂಗಾ  ‘ಶುದ್ಧ್ ಭಾಸ್’ ಯಾ ಅಪುಟ್ ಭಾಸ್ ಮ್ಹಳ್ಳ್ಯಾ ಚಿಂತ್ಪಾನ್ , ಬೌಗೋಳಿಕ್ ಅನಿಂ ಸಮುದಾಯಿಕ್ ಘಟಣಾವಳೆಪ್ರಕಾರ್  ಉಚ್ಛಾರಣಾಂತ್, ಸಬ್ಧಾಂನಿಂ, ಅರ್ಥಾನಿಂ ವೆಗ್ಳೆಂಪಣ್ ಉಚಾರ್ತೆಲ್ಯಾಂಕ್/ಉಲಂವ್ಚ್ಯಾಂಕ್ ಅಸ್ಪ್ರಶ್ಯ್ ಮ್ಹಣ್ ಲೆಕ್ಚೆಂ ಆಸಾ. ಥೊಡೆಪಾವ್ಟಿಂ ಥೊಡ್ಯಾ ಸಮುದಾಯಾನಿಂ, ಪ್ರದೇಶಾಂತ್ಲ್ಯಾ ಲೊಕಾನಿಂ ಹಿ ಅಸ್ಪ್ರಶ್ಯತಾ ವೋಡ್ನ್ ಕಾಣ್ಘೆಲ್ಲೆಬರಿ ಭೊಗ್ ಲ್ಲೆಂಯ್ ಅಸಾ. ಅಪ್ಣಾಚಿ ಭಾಸ್ ಅಶಿಚ್ ಮ್ಹಣ್ ಉಗ್ತ್ಯಾನ್ ಉಲಂವ್ಕ್ ಪಾಟಿಂ ಸರ್ಚೊ ಲೋಕ್ ಯೀ ಆಮ್ಚೆಂ ಮಧೆಂ ಯಥೇಶ್ಟ್ ಆಸಾ.

ನೇತ್ರಾವತಿ ನಂಯ್ಚೆ ಹಿಶಿನ್ ಆನಿಂ ತಿಶಿನ್  ಏಕ್ ಉಚ್ಛಾರಣ್ ರೀತ್ ತರ್, ಗುರ್ಪುರ್ ನ್ಹಂಯ್ ತಿಶಿನ್ ದುಸ್ರಿಚ್ ಉಚ್ಛಾರಣ್ ರೀತ್.  ಉದ್ಯಾವರ್, ಬಾರ್ಕೂರ್, ಹೊನ್ನಾವರ್ ಮ್ಹಣೊನ್ ಹರ್ ನಂಯ್ಚೆ ದುಸ್ರೆ ತಡಿಕ್ ಪಾವ್ತಾನಾ ಭಾಶೆಚಾ ಸಬ್ಧಾನಿಂ, ಸಬ್ಧಾಂಚಾ ಅರ್ಥಾನಿಂ ಅನಿ ಉಚ್ಛಾರಣಾಂತ್ ಬದ್ಲಾವಣ್ ದಿಸೊನ್ ಯೆತಾ. ನ್ಹಂಯ್ ತಡಿನಿಂ ಸ್ವತಂತ್ರ್ ರಿತಿನಿಂ ರುತಾ ಜಾಲ್ಲ್ಯಾ ಸಂಸ್ಕೃತೆಚೊ, ಆಚಾರ್-ವಿಚಾರಾಂಚೊ ಫಳ್ ಹೊ. ಅಶೆಂ ಆಸ್ತಾಂ ಶುದ್ಧ್ ಭಾಸ್ ಯಾ ಅಪುಟ್ ಭಾಸ್   ಮ್ಹಣ್ ಠರಾಂವ್ಚಿ ತರೀ ಕಶೀ?  ಸಾಧ್ ಚ್ ನಾ. ದೆಕುನ್ ಪರತ್ ಉಚಾರ್ತಾಂ,   ‘ಆಮ್ಚ್ಯಾ ಭಾಶೆಂತ್ ಹೆರ್ ಕಿತ್ಲೆ ಜಣ್ ಆಸಾತ್ ಗೀ , ತಿತ್ಲ್ಯಾಚ್ ಮಾಪಾನ್ ಆಮಿಂ ಆಮ್ಚೆ ಭಾಶೆಂತ್ ಅಸೊಂಕ್ ಸಕ್ತಾಂವ್ ’

ಸರ್ವ್ ವಾಚ್ಪ್ಯಾಂಕ್ 33 ವ್ಯಾ ಕೊಂಕ್ಣಿ ಮಾನ್ಯತಾ ದಿಸಾಚೆ ಉಲ್ಲಾಸ್.

■ ಸ್ಟ್ಯಾನಿ ಬೆಳಾ

(ಅಗೋಸ್ತ್ 24 ವೆರ್, ಸಾಂ ವಿಶೆಂತ್ ಫೆರೆರ್ ಫಿರ್ಗಜೆಂತ್ ಕೊಂಕ್ಣಿ ಮಾನ್ಯತಾ ದಿವಸ್ ಆಚರಣಾ ಸಂದರ್ಭಾರ್ ಸಾದರ್ ಕೆಲ್ಲೆಂ ಉಲೊವ್ಪ್)