“ಫೇರ್ ವೆಲ್ ಟು ಆರ್ಮ್ಸ್”, ” ಫೊರ್ ಹೂಮ್ ದಿ ಬೆಲ್ ಟೋಲ್ಸ್”, “ಓಲ್ಡ್ ಮ್ಯಾನ್ ಆಂಡ್ ಸ ಸಿ” , “ಮೆನ್ ವಿದೌವ್ಟ್ ವಿಮೆನ್”, ಇತ್ಯಾದಿ ಕಾದಂಬರಿ , “ಫಿಫ್ತ್ ಮ್ಯಾನ್” ಮ್ಹಳ್ಳೊ ನಾಟಕ್ ಬರಯಿಲ್ಲೊ ಹೆಮಿಂಗ್ವೆ ಆಮೆರಿಕಾ ದೇಶಾಚೊ. ಹಾಕಾ ಬ್ರಾಂಝ್ಹ್ ಸ್ಟಾರ್ ಮೆಡಲ್ (1947) , ಪುಲಿಟ್ಜರ್ ಪ್ರಶಸ್ತಿ (1956) ಆನಿ ನೊಬೆಲ್ ಪುರಸ್ಕಾರ್(1945) ಲಾಬ್ಲಾ. “ಜಿಣ್ಯೆ ವಿಶಿಂ ಬರಯ್ಜಾಯ್ ಜಾಲ್ಯಾರ್, ಪಯ್ಲೆಂ ತಿ ಜಿಣಿ ಜಿಯೆಂವ್ಕ್ ಜಾಯ್” ಮ್ಹಣ್ ತಾಚಿ ಅಭಿಪ್ರಾಯ್. ಹಾಕಾ ಶಿಕಾರಿ ಕರ್ಚೆಂ ಪಿಶೆಂ ಮೊಸ್ತು ಆಸ್ ಲ್ಲೆಂ.ಅಪ್ಲ್ಯಾ 62 ಚ್ಯಾ ಪ್ರಾಯೆರ್ ಕಪಲಾಕ್ ಆಪ್ಲಿ ಬಂದೂಕ್ ದವ್ರುನ್ ಗುಳೊ ಮಾರ್ನ್ ತಾಣೆಂ ಜೀವ್ಗಾತ್ ಕೆಲೊ.
ಆಮಿ ಅನಿಕೀ ನಿದೊನ್ ಆಸ್ತಾನಾಂಚ್ ಜನೆಲಾಚಿಂ ದಾರಾಂ ಧಾಂಪುಂಕ್ ಮ್ಹಣ್ ತೊ ಕೂಡಾಕ್ ಆಯ್ಲೊ. ತೆದ್ನಾಂ ತೊ ಮ್ಹಾಕಾ ಹುಶ್ಯಾರ್ ನಾತ್ಲೆಲ್ಯಾಬರಿ ದಿಸ್ಲೊ. ತಾಚೆಂ ತೋಂಡ್ ಧವ್ಸೆಲ್ಲೆಂ. ಕಾಂಪುನ್,ಮೇಟ್ ಕಾಡೂಂಕ್ ಸಯ್ತ್ ದುಖ್ತಾ ಮ್ಹಳ್ಳ್ಯಾಬರಿ ತೊ ಸವ್ಕಾಸ್ ಚಲ್ತಾಲೊ.
“ಕಿತೆಂ ಜಾಲೆಂ ಶಾಟ್ಸ್?”
“ತಕ್ಲಿ ಫಡ್ತಾ”
“ತರ್ ವಚುನ್ ಅನಿಕೀ ಇಲ್ಲೊ ವೇಳ್ ನಿದೆ.”
“ನಾ, ಮ್ಹಾಕಾ ಕಿತೆಂಚ್ ಜಾಂವ್ಕ್ ನಾ. ಬರೊಚ್ ಆಸಾಂ.”
“ತುಂ ಆತಾಂ ನಿದೊಂಕ್ ವಚ್. ಹಾಂವ್ ನ್ಹೆಸ್ತಚ್ ತುಕಾ ಯೇವ್ನ್ ಪಳೆತಾಂ.”
ಹಾಂವ್ ಸಕಯ್ಲ್ಯಾ ಕೂಡಾಕ್ ಪಾವ್ತಾನಾ ತೊ ನ್ಹೆಸೊನ್ ಉಜ್ಯಾಚ್ಯಾ ಗೂಡಾ ಮುಖಾರ್ ಬಸ್ ಲ್ಲೊ ಆನಿ ನೋವ್ ವರ್ಸಾಚೊ ಬುರ್ಗೊ ಮೊಸ್ತು ಪಿಡೇಸ್ತ್ ಆಸಿ ಧುಖಿಭರಿತ್ ದಿಸ್ಲೊ. ತಾಚೆಂ ಕಪಲ್ ಆಪಡ್ತಾನಾ ತಾಕಾ ತಾಪ್ ಆಸಾ ಮ್ಹಣ್ ಕಳ್ಳೆಂ.
“ವಚ್ ಪುತಾ, ವಚುನ್ ಖಟ್ಲ್ಯಾರ್ ನಿದೆ. ತುಂ ಹುಶ್ಯಾರ್ ನಾಂಯ್.”
“ಹಾಂವ್ ಬರೊಚ್ ಆಸಾಂ.”
ವಯ್ಜ್ ಆಯ್ಲೊ ಆನಿ ತಾಚೊ ತಾಪ್ ಕಿತ್ಲೊ ಆಸಾ ಮ್ಹಣ್ ಪಳೆಲೊ.
“ಕಿತ್ಲೊ ಆಸಾ ಡಾಕ್ಟರ್?” ಹಾಂವೆ ವಿಚಾರ್ಲೆಂ.
“ಶೆಂಭರ್ ಆನಿ ದೋನ್.”
ತೀನ್ ನಮೂನ್ಯಾಚ್ಯೊ ರಂಗಾಳ್ ಗುಳಿಯೊ ದೀವ್ನ್ ಸಲಹಾ ದೀಲಾಗ್ಲೊ. ತಾಂತ್ಲಿ ಏಕ್ ಗುಳಿ ತಾಪ್ ಉಣಿ ಕರುಂಕ್, ದುಸ್ರಿ ಉದ್ಕಾಡೆ ರಾವಂವ್ಕ್ ಆನಿ ತಿಸ್ರಿ ಸಾಂಕ್ರಾಮಿಕ್ ವೈರಲ್ ತಾಪ್ ಗೂಣ್ ಕರುಂಕ್ ಆನಿ ಅಸಿಡಿಟಿ ನಿಯಂತ್ರಣ್ ಕರ್ಚಾಕ್. ತಾಣೆಂ ಸಾಂಗ್ಲೆಲೆಂ ಆಯ್ಕೊನ್ ತಾಕಾ ಪಿಡೆ ವಿಶಿಂ ಸಕ್ಕಡ್ ಕಳಿತ್ ಆಸಾ ಮ್ಹಣ್ ಮ್ಹಾಕಾ ಭಗ್ಲೆಂ. ಏಕಾದವೆಳಾ ತಾಪ್ ಶೆಂಭರ್ ಆನಿ ಚಾರ್ ಉತ್ರಾನಾತ್ಲ್ಯಾರ್ ಭಿಯೆಂವ್ಚಿ ಗರ್ಜ್ ನಾ. ಬುರ್ಗ್ಯಾಚಿ ಪಿಡಾ ಸಾಂಕ್ರಾಮಿಕ್ ಫ್ಲೂ ಜಾವ್ನಾಸಾ. ನ್ಯುಮೋನಿಯಾಕ್ ಪಯ್ಸ್ ದವರ್ಲ್ಯಾರ್ ಕಸಲೆಚ್ ತೊಂದ್ರೆ ನಾಂತ್ ಮ್ಹಣ್ ಸಯ್ತ್ ತಾಣೆಂ ಸಾಂಗ್ಲೆಂ.
ಪಾಟಿಂ ಕೂಡಾಕ್ ಆಯ್ಲೆಲ್ಯಾ ಬುರ್ಗ್ಯಾಚೊ ತಾಪ್ ಕಿತ್ಲೊ ಮ್ಹಣ್ ಹಾಂವೆ ಬರವ್ನ್ ದವರ್ಲೊ ಆನಿ ಗುಳಿಯೊ ಕೆದ್ನಾಂ ದಿಂವ್ಚ್ಯೊ ಮ್ಹಣ್ ವೇಳ್ ಟರಾಯ್ಲೊ.
“ಕಿತೆಂ ಪುಣೀ ವಾಚುನ್ ಸಾಂಗು ಪುತಾ?”
“ಜಾಯ್ತ್. ತುಕಾ ವಾಚ್ಯಾಂ ಮ್ಹಣ್ ಭಗ್ತಾ ಜಾಲ್ಯಾರ್ ಮಾತ್ರ್.” ಮ್ಹಣಾಲೊ ಚೆಡೊ. ತಾಚೆಂ ಮುಸ್ಕರ್ ಧವ್ಸೆಲ್ಲೆಂ. ದೊಳ್ಯಾಂ ಸಕ್ಲಾ ಕಾತ್ ಕಾಳಿ ಜಾಲ್ಲಿ. ಕಿತೆಂ ಜಾತಾ ಮ್ಹಳ್ಳ್ಯಾವಿಶಿಂ ಸಕ್ಕಡ್ ಗರ್ಜೆಚೆಂ ನ್ಹಯ್ ಮ್ಹಳ್ಳ್ಯಾಬರಿ ತೊ ಹಾಲನಾಸ್ತಾಂ ನಿದ್ ಲ್ಲೊ.
ಹಾಂವೆ ಹಾವರ್ಡ್ ಪೈಲಾಚೊ ” ಬುಖ್ ಆಫ್ ಪೈರೇಟ್ಸ್” ಬೂಕ್ ಉಗವ್ನ್ ವಡ್ಲ್ಯಾನ್ ವಾಚಿಲಾಗ್ಲೊಂ. ಪೂಣ್ ಹಾಂವೆ ವಾಚೆಂ ತೊ ಆಯ್ಕಾನಾ ಮ್ಹಣ್ ಕಳ್ಳೆಂ.
“ಆತಾಂ ಕಸೆಂ ಭಗ್ತಾ ಶಾಟ್ಸ್?” ವಾಚೆಂ ರಾವವ್ನ್ ಹಾಂವೆ ಚಿಚಾರ್ಲೆಂ.
“ಆಸ್ಲೆಲ್ಯಾ ಬರಿಚ್ ಆಸಾ.” ತಾಚಿ ಜಾಪ್.
ಖಟ್ಲ್ಯಾಚ್ಯಾ ಪೊಂತಾರ್ ಬಸೊನ್ ಹಾಂವ್ ಆನ್ಯೆಕ್ ಗುಳಿ ದೀಂವ್ಕ್ ವೇಳ್ ಮೆಜಿಲಾಗ್ಲೊಂ ಆನಿ ಮ್ಹಜ್ಯಾ ಇತ್ಲ್ಯಾಕ್ ವಾಚಿಲಾಗ್ಲೊಂ. ತಾಕಾ ಹರ್ಕತ್ ನಾಸ್ತಾಂ ನಿದ್ಯೆತೆಂ. ಪೂಣ್ ತೊ ವಿಚಿತ್ರ್ ಥರಾನ್ ಪಾಯಾಲಾಗಿಂ ದಿಸ್ಚಿ ಗಜ್ಡಿ ಪಳೆತಾಲೊ.
“ಕಿತ್ಯಾಕ್ ತುಂ ನಿದಾನಾಂಯ್? ಗುಳಿಯೊ ದಿಂವ್ಚಾ ವಗ್ತಾ ಹಾಂವ್ ತುಕಾ ಉಟೈತಾಂ.”
“ನಿದ್ಚಾಕೀ ಜಾಗೊಚ್ ರಾವ್ತಾಂ.”
ಥೊಡ್ಯಾ ವೆಳಾನ್, ” ಪಪ್ಪಾ, ತುಕಾ ತೊಂದ್ರೆ ಜಾತಾತ್ ಜಾಲ್ಯಾರ್ ತುಂವೆ ಮ್ಹಜ್ಯಾ ಸಾಂಗಾತಾ ರಾವಿಜಾಯ್ ಮ್ಹಣ್ ನಾ” ಮ್ಹಣ್ ಮ್ಹಣಾಲೊ.
“ಮ್ಹಾಕಾ ಕಸಲೆಚ್ ತೊಂದ್ರೆ ನಾಂತ್.”
“ನಾ, ಹಾಂವೆ ಕಿತೆಂ ಸಾಂಗ್ಚೆಂಗೀ ಮ್ಹಳ್ಯಾರ್, ತುಕಾ ತೊಂದ್ರೆ ಜಾತಾ ಜಾಲ್ಯಾರ್ ತುಂವೆ ಆಸ್ಚೆಂ ನಾಕಾ ಮ್ಹಣ್.”
ಬಹುಶ್ಯಾ ತಕ್ಲಿ ಫಡಾಫಡ್ ಆನಿ ತಾಪಾ ವರ್ವಿಂ ಆಸೆಂ ಉಲಯ್ತಾ ಮ್ಹಣ್ ಚಿಂತುನ್ ಹಾಂವೆ ಇಕ್ರಾ ವಾಜ್ತಾನಾ ದಿಂವ್ಚಿ ಗುಳಿ ದಿಲಿ ಆನಿ ಇಲ್ಲೊ ವೇಳ್ ಭಾಯ್ರ್ ಗೆಲೊಂ.
ಉಜ್ವಾಡ್ ಭರುನ್, ಹಿಂವಾನ್ ಮ್ಹಾತಾರೊ ಜಾಲ್ಲೊ ದೀಸ್ ತೊ . ಧರ್ನಿರ್ ಸಗ್ಳ್ಯಾನಿತ್ಲ್ಯಾನ್ ಭರಪ್ ಭರೊನ್ ಭಂವ್ತಿಚೆ ರೂಕ್, ಝಡಾಂ, ಕಾಂಟಿ, ತಣ್ ಇತ್ಯಾದಿ ಪೂರಾ ಧವೆಂಚ್ ನ್ಹೆಸ್ಲೆಲ್ಯಾಬರಿ ದಿಸ್ತಾಲೆಂ.ಭರ್ಪಾನ್ ಭರ್ಲೆಲ್ಯಾ ತಳ್ಯಾ ಲಾಗ್ಸಿಲ್ಯಾ ವಾಟೆರ್ ಚಲೊನ್ ವೆತಾಲೆಂ. ಸಾಂಗಾತಾ ಐರಿಷ್ ಶಿಕಾರಿ ಪೆಟ್ಯಾಚೆಂ ಪೀಲ್ ಆಸ್ ಲ್ಲೆಂ. ಆರ್ಶ್ಯಾಬರಿ ದಿಸ್ಚ್ಯಾ ಭರ್ಪಾ ವರ್ವಿಂ ನಿಸ್ರೊನ್ ವೆತಾಂವ್ ಜಾಲ್ಲ್ಯಾನ್ ಉಭೊ ರಾವೊಂಕೀ ಜಾಯ್ನಾತ್ಲೆಂ. ತಾಂಬ್ಡೆಂ ಪೀಲ್ ದೋನ್ ಪಾವ್ಟಿಂ ಪಲ್ಟಿ ಜಾವ್ನ್ ಪಡ್ ಲ್ಲೆಂ. ಹಾಂವ್ ಸಯ್ತ್ ದೋನ್ಪಾವ್ಟಿಂ ಪಡ್ ಲ್ಲೊಂ. ತಸೆಂ ಏಕ್ಪಾವ್ಟಿಂ ಪಡ್ಲೆಲ್ಯಾ ವಗ್ತಾ ಹಾತಾಂತ್ಲಿ ಬಂದೂಕ್ ಸಕ್ಲಾ ಪಡೊನ್ ಭರ್ಪಾಚೆರ್ ನಿಸ್ರೊನ್ ವಚುನ್ ಇಲ್ಲ್ಯಾ ಪಯ್ಸ್ ಪಡ್ ಲ್ಲಿ.
ಉಭಾರ್ ಆಸ್ಲೆಲ್ಯಾ ರೊಲ್ಣೆಚ್ಯಾ ತುದ್ಯೆರ್ ವಾಡ್ಲೆಲ್ಯಾ ಕಾಂಟಿಯೆಚ್ಯಾ ಝಡಾಂಚೆರ್ ಉಮ್ಕಾಳೊನ್ ಆಸ್ಲೆಲಿಂ ಥೊಡಿಂ ಸುಕ್ಣ್ಯಾಂಕ್ ಹಾಂವೆ ಥೈಂ ಥಾವ್ನ್ ಧಾಂವ್ಡಾಯ್ಲಿಂ. ತಸೆಂ ಕರ್ತಾನಾ ದೋನ್ ಮ್ಹಜ್ಯಾ ಬಂದೂಕೆಕ್ ಬಲಿ ಜಾಲಿಂ. ಉಭೊನ್ ಗೆಲ್ಲಿಂ ಥೊಡಿಂ ಲಾಗ್ಸಿಲ್ಯಾ ರೂಕಾನಿ ಲಿಪ್ಲಿಂ. ಪೂಣ್ ಸಭಾರ್ ಸುಕ್ಣಿಂ ಕಾಂಟಿಂತ್ ಚ್ ಶಿರ್ಕಾಲಿಂ. ಭರ್ಪಾನ್ ಭರ್ಲೆಲ್ಯಾ ಕಾಂಟಿ ಮಧೆಂ ಥಾವ್ನ್ ಉಭೊನ್ ವೆಚ್ಯಾಕ್ ಉಡ್ಕಣಾಂ ಘಾಲಿಜಾಯ್ ಪಡ್ತಾಲೆಂ. ಸ್ಪ್ರಿಂಗಾಬರಿ ಆಸ್ಚ್ಯಾ ತ್ಯಾ ಕಾಂಟಿಯೆಚ್ಯಾ ಫಾಂಟ್ಯಾಂಚೆರ್ ಆನಿ ನಿಸ್ರೊಂವ್ಚಾ ಧರ್ನಿರ್ ರಾವೊನ್ ತಾಂಕಾ ಮಾರುಂಕ್ ಸುಲಭ್ ನ್ಹಯ್. ಜಾಲ್ಯಾರೀ ಹಾಂವೆ ಜಾಗ್ರೂತ್ಕಾಯೆನ್, ಲಕೊನ್ ತರೀ ಚಲೊನ್ ದೋನ್ ಸುಕ್ಣ್ಯಾಂಕ್ ಮಾರ್ ಲ್ಲಿಂ. ಪಾಂಚ್ ಚುಕವ್ನ್ ಧಾಂವ್ಲಿಂ. ಘರಾ ಲಾಗ್ಸರ್ ಚ್ ಆಸಾತ್ ಆನಿ ಆನ್ಯೆಕಾ ದಿಸಾ ಶಿಕಾರಿ ಕರುಂಕ್ ಉಪ್ಕಾರ್ತೆಲಿಂ ಮ್ಹಳ್ಳ್ಯಾ ಖುಶೆನ್ ಪಾಟಿಂ ಘರಾ ಆಯ್ಲೊಂ.
ಶಾಟ್ಸ್ ಆಪ್ಲ್ಯಾ ಕೂಡಾಕ್ ಕೊಣಾಕ್ ಚ್ ಯೇಂವ್ಕ್ ಸೊಡಿನಾ ಮ್ಹಣ್ ಘರ್ಚಾನಿ ಸಾಂಗ್ಲೆಂ.
“ತುಂ ಭಿತರ್ ಯೇನಕಾ. ಮ್ಹಾಕಾ ಆಯ್ಲೆಲೊ ತಾಪ್ ತುಕಾಯ್ ಯೆಂವ್ಚೊ ನಾಕಾ.” ಮ್ಹಣಾಲೊ ತೊ.
ಹಾಂವ್ ತಾಚ್ಯೆ ಸರ್ಶಿಂ ಗೆಲೊಂ. ಹಾಂವೆ ಭಾಯ್ರ್ ವೆಚ್ಯಾ ವಗ್ತಾ ಕಸೊ ನಿದ್ಲಲೊಗೀ ತಸೊಚ್ ನಿದೊನ್ ಆಸ್ಲೊ. ಇಲ್ಲೊ ಪುಣಿ ಹಾಲೊಂಕ್ ನಾತ್ ಲ್ಲೊ. ಮುಸ್ಕರ್ ಧವ್ಸೆಲ್ಲೆಂ. ತಾಪಾ ವರ್ವಿಂ ತಾಚಿಂ ಗಾಲಾಂ ತಾಂಬ್ಸೆಲ್ಲಿಂ. ಪಾಯಾಲಾಗಿಂ ದಿಸ್ಚಾ ಗಜ್ಡೆಕ್ ಪಲೇತ್ತ್ ಆಸ್ಲಲೊ ಆತಾಂಯ್ ತಸೆಂಚ್ ಪಲೇತ್ತ್ ಆಸ್ಲೊ.
ಹಾಂವೆ ತಾಚೊ ತಾಪ್ ಪಳೆಲೊ.
“ಕಿತ್ಲೊ ಆಸಾ?”
“ಸುಮಾರ್ ಶೆಂಭರ ತಿತ್ಲೊ ಆಸಾ.” ಮ್ಹಳೆಂ ಹಾಂವೆ. ತಾಪ್ ಶಂಭರ್ ಆನಿ ಧಾ ಆಸ್ ಲ್ಲೊ.
“ಶಂಭರ್ ಆನಿ ದೋನ್ ನ್ಹಯ್ವೇ?” ತಾಣೆಂ ವಿಚಾರ್ಲೆಂ.
“ತಸೆಂ ಮ್ಹಣ್ ತುಕಾ ಕೊಣೆಂ ಸಾಂಗ್ಲೆಂ?”
“ದಾಖ್ತೆರಾನ್.”
“ತುಜೊ ತಾಪ್ ಸಾರ್ಕೊ ಆಸಾ. ಘಾಭ್ರೆಂವ್ಚೆಂ ತಸಲೆಂ ಕಿತೆಂಚ್ ನಾ.”
“ಹಾಂವ್ ಕಾಂಯ್ ಗಾಭ್ರೆನಾ. ಪೂಣ್ ಮ್ಹಾಕಾ ತ್ಯಾ ವಿಶಿಂ ಚಿಂತಿನಾಸ್ತಾಂ ರಾವೊಂಕ್ ಜಾಯ್ನಾ.”
“ಕಿತ್ಯಾಕ್ ಭೆಶ್ಟೆಂ ಚಿಂತ್ತಾಯ್? ತಕ್ಲಿ ಪಾಡ್ ಕರಿನಾಸ್ತಾಂ ಆಸ್ಲ್ಯಾರ್ ಜಾಲೆಂ.”
“ಹಾಂವ್ ಕಾಂಯ್ ತಕ್ಲಿ ಪಾಡ್ ಕರಿನಾ.” ಮ್ಹಣೊನ್ ನಿಟ್ಟ್ ಪಾಯಾಲಾಗಿಂ ಅಸ್ಚಾ ಗಜ್ಡೆಕ್ ಪಳೆಲಾಗ್ಲೊ. ತೊ ಆಪ್ಲ್ಯಾ ಭಿತರ್ ಚ್ ಕಿತೆಂಗೀ ಗಟ್ಟ್ ಧರ್ನ್ ಬಸ್ಲಾ ತೆಂ ಸ್ಪಶ್ಟ್ ಜಾಲೆಂ.
“ಧರ್, ಹೆಂ ಉದಾಕ್ ಪಿಯೆ”
“ಉದ್ಕಾನ್ ಬರೆಂ ಜಾತಾ ಮ್ಹಣ್ ಚಿಂತ್ತಾಯ್ವೇ?”
“ಖಂಡಿತ್.”
ಹಾಂವ್ ಬಸ್ಲೊಂ ಆನಿ ‘ಬುಕ್ ಆಫ್ ಪೈರೇಟ್ಸ್’ ವಾಚಿಲಾಗ್ಲೊಂ. ತೊ ಆಯ್ಕನಾ ಮ್ಹಣ್ ಕಳ್ತಚ್ ವಾಚ್ಚೆಂ ರಾವಯ್ಲೆಂ.
“ಹಾಂವ್ ಕಿತ್ಲ್ಯಾ ವೆಳಾಕ್ ಮೊರ್ತಾಂ ಮ್ಹಣ್ ತುಂ ಚಿಂತ್ತಾಯ್?”
“ಕಿತೆಂ ಮ್ಹಳೆಂಯ್?”
“ಹಾಂವ್ ಮೊರೊಂಕ್ ಆನಿ ಕಿತ್ಲೊ ವೇಳ್ ಆಸಾ?”
“ತುಂ ಮೊರಾನಾಂಯ್ ಪುತಾ. ತುಂ ಕಿತ್ಯಾಕ್ ಮೊರ್ತಾಯ್ ಸಾಂಗ್?”
“ಓ, ಹಾಂವ್ ಜಾಣಾಂ. ಹಾಂವ್ ಮೊರ್ತಾಂ. ದಾಖ್ತೆರಾನ್ ತಾಪ್ ಶಂಭರ್ ಆನಿ ದೋನ್ ಮ್ಹಣ್ ಸಾಂಗ್ತಾನಾ ಹಾಂವೆ ಆಯ್ಕಾಲ್ಲೆಂ.”
“ತಿತ್ಲೊ ಆಸ್ಲ್ಯಾರ್ ಕೊಣ್ಂಚ್ ಮೊರನಾ. ಪದ್ದಬರಿ ಉಲಯ್ನಾಕಾ.”
“ತಿತ್ಲೊ ಆಸ್ಲ್ಯಾರ್ ಮೊರ್ತಾತ್ ಮ್ಹಣ್ ಹಾಂವ್ ಜಾಣಾಂ. ಚಾಳಿಸ್ ಆನಿ ಚಾರ್ ಆಸ್ಲ್ಯಾರ್ ಮೊರ್ತಾತ್ ಮ್ಹಣ್ ಮ್ಹಾಕಾ ಫ್ರಾನ್ಸಾಚ್ಯಾ ಇಸ್ಕೊಲಾಂತ್ ಭುರ್ಗೆ ಸಾಂಗ್ತಾಲೆ. ಮ್ಹಾಕಾ ಜಾಲ್ಯಾರ್ ಶಂಭರ್ ಆನಿ ದೋನ್ ಆಸಾ.”
ತೊ ಸಾಕಾಳಿಂಚ್ಯಾ ನವ್ ವರಾಂ ಥಾವ್ನ್ ಸಗ್ಳೊ ದೀಸ್ ಮೊರೊಂಕ್ ರಾಕ್ತಾಲೊ.
“ಆಯ್ಯೋ ಪೆದ್ದ. ದಾಡ್ಡೊ ಬುರ್ಗೊ ತುಂ. ತಾಪ್ ಮೈಲಾಂ ಆನಿ ಕಿಲೋಮೀಟರ್ ಆಸ್ಲೆಲ್ಯಾಬರಿ. ತುಂ ಖಂಚಾಚ್ ಕಾರಣಾಕ್ ಮೊರನಾಂಯ್. ತೆಂ ವಿಂಗಡ್ ಥರ್ಮಾಮೀಟರ್ ಪುತಾ. ತಾಂತು ತೀಸ್ ಆನಿ ಸಾತ್ ಮ್ಹಳ್ಯಾರ್ ನಾರ್ಮಲ್, ಮ್ಹಳ್ಯಾರ್ ಸಾಮಾನ್ಯ್ ಸ್ತ್ಜಿತಿ. ಆಮ್ಚ್ಯಾಂತ್ 98 ನಾರ್ಮಲ್. ಸಮ್ಜಾಲೆಂವೇ?.
“ತುಂವೆ ಸಾಂಗ್ಚೆಂ ಸತ್ ವೇ?”
“ಖಂಡಿತ್ ಜಾವ್ನ್ ಸತ್. ಮೈಲಾಂ ಆನಿ ಕಿಲೋಮೀಟರಾಂ ಬರಿ. ಕಾರಾರ್ ಸತ್ತರ್ ಮೈಲಾಂ ಗೆಲ್ಯಾರ್ ಕಿತ್ಲಿಂ ಕಿಲೋಮೀಟರಾಂ ಜಾತಾತ್ ಮ್ಹಣ್ ಗೊತ್ತಾಸಾವೇ/”
“ಓ, ತಸೆಂ ಮ್ಹಳ್ಯಾರ್ ತೆಂ ಆಸೆಂ ಮ್ಹಣ್ ಸಾಂಗ್.” ತೊ ಮ್ಹಣಾಲೊ.
ಪಾಯಾಂಲಾಗಿಂ ಗಝ್ಡೆಕ್ ಪಳೆಂವ್ಚಿ ತಾಚಿ ದೀಶ್ಟ್ ಕ್ರಮೇಣ್ ಉಣಿ ಜಾಲಿ. ತಾಚ್ಯೆ ವಯ್ಲೆಂ ನಿಯಂತ್ರಣ್ ಸಯ್ತ್ ಸಡಿಲ್ ಜಾಲೆಂ.
ದುಸ್ರ್ಯಾ ದಿಸಾ ಇಲ್ಲೊ ಬಾವ್ಲೆಲ್ಯಾಬರಿಚ್ ಆಸ್ಲೊ ಆನಿ ಲ್ಹಾನ್ ಲ್ಹಾನ್ ತಸೆಂ ಕಾಮ್ ನಾತ್ಲೆಲ್ಯಾ ಸಂಗ್ತಿಂಕ್ ಲಾಗೊನ್ ಘಡ್ಯೆನ್ ರಡ್ತಾಲೊ.
■ ಕೊಂಕ್ಣೆಕ್ : ಉಬ್ಬ, ಮೂಡಬಿದ್ರಿ
